1. ¿Tiquʼn xi tqanin Jesús te Jehová tuʼn t-xqʼuqin kyiʼj t-xnaqʼtzbʼen?

 TOJ qonikʼen tej naʼmxtoq tkyim Jesús, xi tqanin te Jehová tuʼn t-xqʼuqin kyiʼj t-xnaqʼtzbʼen (Juan 17:15, 20). Ojtzqiʼn quʼn qa atxix toj ambʼil ojtxe in xqʼuqin Jehová kyiʼj tmajen ex in kwentin kyiʼj. Noqtzun tuʼnj, ojtzqiʼntoq tuʼn Jesús qa mas tzul nya bʼaʼn kyiʼj t-xnaqʼtzbʼen tuʼn Satanás, tuʼntzunju, iltoq tiʼj tuʼn tonin Jehová kyiʼj.

2. Ik tzeʼn in tzaj tyekʼin Salmo 33:18 a 20, ¿tiquʼn mintiʼ tuʼn qtzaj xobʼ kywitz nya bʼaʼn?

² In nok tilil kyuʼn xjal ateʼ tjaqʼ tkawbʼil Satanás tuʼn tkubʼ kyiʼj tmajen Jehová kyuʼn. Aj qok weʼ kywitz nya bʼaʼn, jaku tzʼel kyiʼn qipumal ex tuʼn jlu kwest jaku qo ajbʼen te Jehová. Pero mintiʼ tuʼn qtzaj xobʼ tuʼn jlu ik tzeʼn kʼelel qnikʼ tiʼj toj xnaqʼtzbʼil lu. In ximen Jehová qiʼj, toj juntl yol, tok twitz kyiʼj nya bʼaʼn in qo ok weʼ twitz ex list taʼ tuʼn tonin qiʼj. Qo xnaqʼtzal kyiʼj kabʼe txʼolbʼabʼil toj Tyol Dios, aʼyeju in tzaj kyyekʼin qa ax tok qe yol lu: «Atzun qeju in che niman te Qman ex in qeʼ kykʼuʼj tiʼj tkʼujlalil, kukx kwentin qe tuʼn» (kjawil uʼjit Salmo 33:18-20).

3. ¿Toj alkye ambʼil jaku kubʼ qximen qa qjunalx atoʼ?

³ Ojtzqiʼn quʼn qa ateʼ nim erman twitz tkyaqil Txʼotxʼ, pero atlo maj jaku kubʼ qximen qa qjunalx atoʼ. Jun techel, jakulo kubʼ kyximen kuʼxun qa kyjunalx ateʼ aj t-xi kychikʼbʼaʼn kye kyukʼil toj escuela tiʼ nimen kyuʼn moqa aj kyxiʼ toj juntl congregación. Atzun junjuntl erman, in che bʼisun ex in nok tilil kyuʼn tuʼn tten tbʼanel kyximbʼetz, ex in kubʼ kyximen qa ni jun jaku tzʼonin kyiʼj. Bʼalo mintiʼ in xi  kyqʼamaʼn kybʼis kye txqantl tuʼnju in kubʼ kyximen qa mlayx tzʼel kynikʼ kyiʼj. Ax ikx qe, atlo maj jaku kubʼ qximen qa ni jun in ximen qiʼj. Qa in kubʼ qximen qa qjunalx atoʼ, jaku tzaj bʼaj qkʼuʼj ex tuʼn jlu mlay ten qipumal. Pero nya taj Jehová tuʼn tkubʼ qximen qa qjunalx atoʼ. ¿Tiquʼn in xi qqʼamaʼn jlu?

4. ¿Tiquʼn tqʼama Elías qa tjunalx otoq kyaj ten?

⁴ Qo yolin tiʼjju bʼaj tiʼj profeta Elías. El oq Elías 40 qʼij tuʼntzun t-xi tewin tibʼ tuʼnju otoq tqʼama Jezabel qa kbʼeltoq tbʼyoʼn (1 Rey. 19:1-9). Tjunalx pon tewin tibʼ toj jun jul ex xi tqʼamaʼn jlu te Jehová: «Oʼkx qine ma chin kyaj ten» (1 Rey. 19:10). Kubʼ t-ximen Elías qa tjunalx otoq kyaj ten te profeta toj tnam, pero nya ik ttenju. Otoq kolin Abdías kyiʼj 100 profeta tuʼn miʼn kykubʼ bʼyoʼn tuʼn Jezabel (1 Rey. 18:7, 13). ¿Tiquʼntzun kubʼ tnaʼn Elías qa tjunalx at? Bʼalo tuʼnju kubʼ t-ximen qa otoq che kubʼ bʼyoʼn kykyaqil profeta moqa tuʼnju ni jun xjal ok lepeʼ tiʼj Jehová tej otoqxi txi tqʼoʼn chojbʼil twi witz Carmelo. Moqa kubʼ t-ximen qa ni jun in neltoq tnikʼ tiʼj nya bʼaʼn in nok weʼ twitz ex qa ni jun in ximen tiʼj. Mintiʼ in tzaj tqʼamaʼn Tyol Dios tkyaqil tqanil tiʼj jlu, pero ojtzqiʼn quʼn qa el tnikʼ Jehová tiʼj Elías ex ojtzqiʼntoq tuʼn tzeʼn tuʼn tonin tiʼj.

5. ¿Tiʼ bʼant tuʼn Jehová tuʼn t-xi tqʼamaʼn te Elías qa nya tjunalxtoq at?

⁵ Bʼant nim tiʼchaq tuʼn Jehová tuʼn tonin tiʼj Elías. Jun techel, onin tiʼj tuʼn t-xi tqʼamaʼn te tiʼ kubʼ tnaʼn. Kabʼe maj xi tqanin jlu te: «¿Ti in bʼaj teya tzalu, Elías?» (1 Rey. 19:9, 13). Ex kyoj ambʼil lu, ok tqʼoʼn Jehová twiʼ tiʼjju xi tqʼamaʼn Elías te. Yajxitl, kubʼ tyekʼin Jehová qa attoq tukʼil Elías ex qa attoq nim tipumal. Ax ikx, xi tqʼamaʼn te qa ateʼ txqantl xjal te Israel in che onin tiʼj kʼulbʼil axix tok (1 Rey. 19:11, 12, 18). Jaku txi qqʼamaʼn qa chewix tanmi Elías tej tyolin tukʼil Jehová ex tej tok tbʼiʼn aju tzaj tqʼamaʼn te. Nya oʼkxju, ax ikx xi tqʼoʼn Jehová junjun aqʼuntl nim toklen te. Iltoq tiʼj tuʼn tok tqʼoʼn toklen Hazael te rey toj tnam Siria, tuʼn tok  tqʼoʼn toklen Jehú te rey toj Israel ex tuʼn tok tqʼoʼn toklen Eliseo te profeta (1 Rey. 19:15, 16). Tej t-xi tqʼoʼn Jehová qe oklenj lu te Elías, onin tiʼj tuʼn tok tqʼoʼn twiʼ kyiʼj tbʼanel tiʼchaq ex xi tqʼoʼn ambʼil tuʼn tonin Eliseo tiʼj. ¿Tiʼ jaku bʼant quʼn qa in kubʼ qnaʼn qa qjunalx atoʼ ex qa qaj tuʼn tonin Jehová qiʼj?

6. ¿Tiʼ jaku txi qqʼamaʼn te Jehová qa in kubʼ qnaʼn qa qjunalx atoʼ? (Salmo 62:8).

⁶ Taj Jehová tuʼn qyolin tukʼil toj naʼj Dios. In nel tnikʼ tiʼj tiʼ in kubʼ qnaʼn ex in tzaj tqʼamaʼn qe qa jaku qo naʼn Dios te toj alkyexku ambʼil ex qa kʼokel tqʼoʼn twiʼ tiʼj qyol (1 Tes. 5:17). In tzalaj Jehová aj kyyolin tmajen tukʼil (Prov. 15:8). ¿Tiʼ jaku txi qqʼamaʼn te Jehová qa in kubʼ qnaʼn qa qjunalx atoʼ? Jaku txi qqʼamaʼn tkyaqil qbʼis te ik tzeʼn bʼant tuʼn Elías (kjawil uʼjit Salmo 62:8). Qqʼamanx te tiʼ in tzaj bʼaj qkʼuʼj tiʼj ex tiʼ in kubʼ qnaʼn. Qqaninx te tuʼn tonin qiʼj tuʼn tel qnikʼ tiʼj tiʼ jaku bʼant quʼn. Jun techel, qa in tzaj xobʼa tuʼn tyolina tiʼj Jehová toj escuela ex qa in kubʼ t-ximana qa tjunalxa at, ¿tiʼ jaku bʼant tuʼna? Jaku txi tqanina te Jehová tuʼn ttzaj tqʼoʼn tipumala ex tuʼn ttzaj tqʼoʼn tnabʼila tuʼntzun t-xi tchikʼbʼaʼna aju nimen tuʼna toj tumel (Luc. 21:14, 15). ¿Ex tiʼ jaku bʼant tuʼna qa in kubʼ tnaʼna bʼis? Qaninxa te Jehová tuʼn tonin tiʼja tuʼn tyolina tukʼil jun erman ma tzʼok tnabʼil ex tuʼn tonin tiʼj erman tuʼn tel tnikʼ tiʼjju in kubʼ tnaʼna. Qa ma qo yolin tukʼil Jehová, qa ma tzʼok qqʼoʼn qwitz tiʼj tzeʼn in tzaj ttzaqʼweʼn qnaʼj Dios ex qa ma tzaj qkʼamoʼn onbʼil in tzaj kyqʼoʼn txqantl qe, kʼonil jlu qiʼj tuʼn miʼn qbʼisun.

7. ¿Tiʼ xnaqʼtzbʼil jaku tzʼel tiʼna tiʼjju bʼaj tiʼj Mauricio?

⁷ In tzaj tqʼoʼn Jehová jun tbʼanel aqʼuntl te teyele junjun tmajen. In keʼyin tiʼjju in bʼant quʼn toj congregación ex toj pakbʼabʼil ex in nok tqʼoʼn toklen (Sal. 110:3, TNM). Qa ma tzʼok tilil quʼn tuʼn qajbʼen te Jehová, kʼonil qiʼj tuʼn miʼn tkubʼ qnaʼn qa qjunalx atoʼ. ¿Tiquʼn? Qo yolin tiʼjju bʼaj tiʼj Mauricio. * Tej tbautisarin, chebʼe chebʼe el tpan tibʼ jun tamiw tiʼj Jehová. Tqʼama jlu: «Tej tel tpan tibʼ wamiwe tiʼj axix tok, kubʼ nximane jlu: ‹¿Jakupe chin tene tzʼaqli twitz Jehová? ¿Jakupe japun twi nyole o txi ntziyene te? ¿Kukxpe chin tele toj ttnam?›. Kubʼ nximane qa njunalxe atine ex qa ni jun jakutoq tzʼel tnikʼ wiʼje». ¿Tiʼ onin tiʼj tuʼn kukx tok tilil tuʼn? Tqʼama jlu: «Ok tilil wuʼne tuʼn npakbʼane mas ambʼil ex tuʼn miʼn nximane oʼkx wiʼjxe ex kyiʼj nya bʼaʼn. Tej npakbʼane kyukʼil junjuntl erman, kubʼ nnaʼne tzalajbʼil ex ya mintiʼ kubʼ nximane qa njunalxe atine». Qkyaqilx jaku qo tzalaj  maske mintiʼ in qo pakbʼan kytziyele ja kyukʼil erman. Jaku ten qipumal qa ma tzʼel qpaʼn ambʼil tuʼn qpakbʼan kyukʼil kyoj carta moqa toj teléfono. ¿Tiʼ mas onin tiʼj Mauricio? Kukx in tzaj tnaʼn tiʼ bʼant tuʼn tej tqʼama jlu: «Ok tilil wuʼne tuʼn waqʼunane mas toj congregación. Ax ikx, ok tilil wuʼne tuʼn tbʼaj nbʼinchaʼne ntene kyiʼj woklene tzaj qʼoʼn ex ok tilil wuʼne tuʼn kyex nqʼoʼne. Tuʼn jlu, kubʼ nnaʼne qa kʼujlaʼn qine tuʼn Jehová ex kyuʼn erman».

8. ¿Tiʼ jaku kubʼ qnaʼn aj qok weʼ twitz ambʼil kwest?

⁸ Qkyaqilx ojtzqiʼn quʼn qa qo okel weʼ kywitz nya bʼaʼn kyoj mankbʼil tqʼijlalil (2 Tim. 3:1). Pero jaku qo jaw sekʼpaj qa noq minabʼen in qo ok weʼ twitz jun nya bʼaʼn, ik tzeʼn qa mintiʼ qpwaq, aj ttzaj tqʼamaʼn doctor qa at jun yabʼil qiʼj moqa aj tkyim jun xjal kʼujlaʼn quʼn. Kyoj ambʼil lu, in tzaj bʼaj qkʼuʼj ex in tzaj qbʼis, mas qa in tzaj jun ex juntl nya bʼaʼn qiʼj moqa in che tzaj toj junx ambʼil. Pero bʼaʼn tuʼn ttzaj qnaʼn qa in ximen Jehová qiʼj ex qa qo elex kywitz nya bʼaʼn tuʼnju in nonin qiʼj.

9. ¿Alkyeqe nya bʼaʼn ok weʼ Job twitz?

⁹ Atzun jaʼlo, qo yolin tiʼjju bʼaj tiʼj Job. Toj junx ambʼil, ikʼ Job twitz nim nya bʼaʼn. Toj junx qʼij, ok tbʼiʼn qa otoq che kubʼ bʼyoʼn talun, qa otoq che kyim tmajen ex aju mas bʼisbʼajil, ok tbʼiʼn qa otoq che kyim tkʼwal (Job 1:13-19). Nya oʼkxju, ax ikx tzaj jun yabʼil tiʼj ex ya mintiʼ el kynikʼ txqantl tiʼj (Job 2:7). Otoq tzaj nim tbʼis, tuʼntzunju tqʼama jlu: «Mlay tzikʼx mastl wuʼne. Mi wajtle tuʼn wanqʼine» (Job 7:16).

10. ¿Tiʼ bʼant tuʼn Jehová tuʼn tonin tiʼj Job tuʼn tikʼx nya bʼaʼn tuʼn? (Qʼonka twitza tiʼj tilbʼilal tok tiʼj t-xkʼomil).

¹⁰ Ojtzqiʼntoq tuʼn Jehová tiʼtoq in bʼaj tiʼj Job. Ex tuʼnju kʼujlaʼntoq Job tuʼn, xi tqʼoʼn tkyaqilju at tajbʼen te tuʼn tikʼx tuʼn ex tuʼn kukx tajbʼen te. Tzaj yolin Jehová te Job ex xi tqʼamaʼn te qa at nim tnabʼil ex qa kʼujlaʼn tkyaqil tbʼinchbʼen tuʼn. Ex yolin kyiʼj junjun nimaq txkup (Job 38:1, 2; 39:9, 13, 19, 27; 40:15; 41:1, 2). Ax ikx, xi tsamaʼn Jehová Elihú tuʼntzun t-xi tqʼuqbʼaʼn tkʼuʼj Job. Xi tnaʼn Elihú te Job qa in che tzaj tkʼiwlaʼn Jehová qeju kukx in nikʼx kyuʼn. Noqtzun tuʼnj, ax ik tajtoq Jehová tuʼn t-xi tqʼoʼn Elihú junjun nabʼil te Job. Tukʼil kʼujlabʼil onin Elihú tiʼj Job tuʼn tel tnikʼ tiʼj tkyaqil ex xi tnaʼn te qa mas nim toklen Jehová kywitz xjal tuʼnju a Bʼinchalte tkyaqil (Job 37:14). Ax ikx, xi tqʼoʼn Jehová jun taqʼun Job. Xi tqʼamaʼn te tuʼn tnaʼn Dios kyiʼj oxe tamiw tuʼnju otoq che bʼinchan il (Job 42:8-10). Yajtzun jaʼlo, ¿tzeʼn in nonin Jehová qiʼj aj qok weʼ twitz nya bʼaʼn?

11. ¿Tzeʼn in tzaj tqʼuqbʼaʼn Tyol Dios qkʼuʼj aj qok weʼ twitz nya bʼaʼn?

¹¹ Toj ambʼil jaʼlo, mintiʼ in tzaj yolin Jehová qukʼil ik tzeʼn bʼant tuʼn tukʼil Job, pero in najbʼen Tyol tuʼn tuʼn tyolin qukʼil (Rom. 15:4). In chewix qanmi tuʼn aj ttzaj tqʼoʼn jun qʼuqbʼil qkʼuʼj tiʼj ambʼil tzul. Qo xnaqʼtzan kyiʼj junjun texto in che onin qiʼj aj qok weʼ kywitz nya bʼaʼn. In tzaj tqʼamaʼn Biblia qa ni jun nya bʼaʼn jaku tzʼel «paʼnte qe tiʼj tkʼujlalil Dios» (Rom. 8:38, 39). Ax ikx in tzaj ttziyen Jehová qa «niqayin taʼ [...] kyiʼj qeju in che kubʼsan twitz», toj juntl yol, qa in tzaj tbʼiʼn kynaʼj Dios (Sal. 145:18). In tzaj tqʼamaʼn Jehová qe qa jaku tzikʼx alkyexku nya bʼaʼn quʼn qa ma tzʼok qeʼ qkʼuʼj tiʼj, axpe ikx, jaku qo tzalaj aj qikʼ toj yajbʼil (1 Cor. 10:13; Sant. 1:2, 12). Nya oʼkxju, ax ikx in tzaj tqʼamaʼn Biblia qa noq chʼin ambʼil in che ten nya bʼaʼn qa ma tzʼok qmojbʼaʼn tukʼil  qchwinqlal te jumajx tzul tqʼoʼn Jehová (2 Cor. 4:16-18). In tzaj ttziyen Jehová qa kbʼel tnajsaʼn Satanás ex qeju in che ok lepeʼ tiʼj (Sal. 37:10). ¿Ope che kyaj junjun versículo toj twiʼya, aqeju jaku che onin tiʼja tuʼn texa kywitz nya bʼaʼn toj ambʼil tzul?

12. ¿Tiʼ taj Jehová tuʼn tbʼant quʼn tuʼntzun tonin Tyol qiʼj?

¹² Taj Jehová tuʼn tel qpaʼn ambʼil tuʼn qxnaqʼtzan tiʼj Tyol ex tuʼn qximen tiʼjju in jaw quʼjin. Qa ma kubʼ qbʼinchaʼn aju in nel qnikʼ tiʼj, kchʼiyil qʼuqbʼil qkʼuʼj ex mas qo okel laqʼeʼ ttxlaj Jehová. Qa ma bʼant jlu quʼn, kʼonil qiʼj tuʼn tikʼx quʼn. Ax ikx, tzul tqʼoʼn Jehová xewbʼaj xjan qe qa ma tzʼok qeʼ qkʼuʼj tiʼj Tyol. Aj ttzaj tqʼoʼn Jehová xewbʼaj xjan qe, ktel «nimxix qipumal» tuʼntzun tikʼx alkyexku nya bʼaʼn quʼn (2 Cor. 4:7-10).

13. ¿Tzeʼn in che onin xnaqʼtzbʼil in che etz tuʼn «majen in bʼant taqʼun [...] ex at tnabʼl» qiʼj tuʼn tikʼx nya bʼaʼn quʼn?

¹³ Tuʼn tonbʼil Jehová, in tzaj tqʼoʼn «majen in bʼant taqʼun [...] ex at tnabʼl» nim xnaqʼtzbʼil qe. Kyxol qe jlu, in che etz video ex qe bʼitz tuʼntzun kyonin qiʼj tuʼn tchʼiy qʼuqbʼil qkʼuʼj ex tuʼn miʼn qikʼ jtan toj qokslabʼil (Mat. 24:45). Tbʼanelxix qa ma che ajbʼen tkyaqil onbʼil lu quʼn tuʼnju in che ul tojxix ambʼil at tajbʼen. Kʼitzqeku, tqʼama jun ermana te Estados Unidos tiʼ in kubʼ tnaʼn tuʼnju in che etz nim xnaqʼtzbʼil tuʼn ttnam Jehová. Tqʼama jlu: «Kyoj qeju 40 abʼqʼi qʼiʼn wuʼne toj wajbʼebʼile te Jehová, o tzʼok wokslabʼile toj prueba jun ex juntl maj». O tzikʼ ermana lu toj nim nya bʼaʼn. Tzaj jun aksident tiʼj tchman ex kyaj tjaqʼ kar, o che kyim tman tuʼn yabʼil ex o tzaj cáncer tiʼj kabʼe maj. ¿Tiʼ onin tiʼj ermana tuʼn tikʼx tuʼn? Tqʼama jlu: «Kukx o xqʼuqin Jehová wiʼje. Tuʼn tikʼx tkyaqil nya bʼaʼn wuʼne, o che onin xnaqʼtzbʼil wiʼje in che etz tuʼn majen in bʼant taqʼun ex at tnabʼl. Noq tuʼn jlu, jaku txi nqʼamaʼne qe yol ik tzeʼn te Job: ‹¡Kukx chin tele tzʼaqli ajxi nkyime!›» (Job 27:5, TNM).

14. ¿Tzeʼn in che ajbʼen erman tuʼn Jehová tuʼn tonin qiʼj aj qikʼ kyoj ambʼil kwest? (1 Tesalonicenses 4:9).

¹⁴ O tzaj tyekʼin Jehová kye tmajen tuʼn tok kykʼujlan kyibʼ ex tuʼn tbʼaj kyqʼuqbʼaʼn kykʼuʼj kyoj ambʼil kwest (2 Cor. 1:3, 4; kjawil uʼjit 1 Tesalonicenses 4:9). In che ok erman ik tzeʼn Elihú tuʼnju kyaj tuʼn kyonin qiʼj tuʼn kukx qajbʼen te Jehová  aj qikʼ kyoj ambʼil kwest (Hech. 14:22). Atzun jlu o til ermana Diane. Tej ttzaj yabʼil tiʼj tchmil, xi qʼuqbʼaʼn tkʼuʼj kyuʼn erman ex e onin tiʼj tuʼn kukx tten jun tbʼanel tamiwbʼil tukʼil Jehová. Tqʼama ermana Diane jlu: «Kwest ok ambʼil lu, pero kubʼ qnaʼne qa atoʼye toj tqʼabʼ Jehová ex qa kʼujlaʼn qoʼye tuʼn. Nim e onin erman qiʼje ex tzaj kyqʼoʼn tkyaqilju at tajbʼen qeye tuʼn qexe twitz nya bʼaʼn. E pon visitaril qeye, e pon llamarin qiʼje, o tzaj chleʼne kyuʼn... Ex tuʼnju mintiʼ in bʼant nmanejarine, xi kyiʼn qine tuʼn nxiʼye kyoj chmabʼil ex toj pakbʼabʼil qa jakutoq bʼant wuʼne». Tbʼanelxix tuʼnju atoʼ kyxol erman in kubʼ kyyekʼin kykʼujlabʼil qiʼj.

15. ¿Tiquʼn qʼuqli qkʼuʼj tiʼj qa jaku qo ex kywitz nya bʼaʼn?

¹⁵ Qkyaqilx qo okel weʼ twitz jun nya bʼaʼn. Pero ik tzeʼn ma tzʼel qnikʼ tiʼj, nya qjunalx qo tel toj ambʼil lu. Kukx in ximen Jehová qiʼj ik tzeʼn in bʼant tuʼn jun tbʼanel mambʼaj. At Jehová qukʼil ex list taʼ tuʼn tonin qiʼj aj t-xi qqanin onbʼil te (Is. 43:2). Qʼuqli qkʼuʼj tiʼj qa jaku qo ex kywitz nya bʼaʼn tuʼnju in tzaj tqʼoʼn Jehová tkyaqilju at tajbʼen qe tuʼn tikʼx quʼn. In tzaj tqʼoʼn ambʼil qe tuʼn qnaʼn Dios te, in tzaj tqʼoʼn Tyol ex qe xnaqʼtzbʼil. Nya oʼkxju, ax ikx in che ajbʼen erman tuʼn tuʼnju in che onin qiʼj tukʼil kʼujlabʼil.

16. ¿Tiʼ kbʼantel quʼn tuʼn kukx qok t-xqʼuqin Jehová?

¹⁶ In xi qqʼoʼn chjonte te Jehová tuʼnju kukx in ximen qiʼj. «In tzalaj qanmi tiʼj Qman» (Sal. 33:21). ¿Tzeʼn jaku kubʼ qyekʼin qa in xi qqʼoʼn chjonte te Jehová tuʼnju in xqʼuqin qiʼj tukʼil kʼujlabʼil? Kbʼel qyekʼin aj kyajbʼen tkyaqil onbʼil in tzaj tqʼoʼn qe. Tuʼn kukx t-xqʼuqin Jehová qiʼj, il tiʼj tuʼn t-xi qbʼiʼn tkyaqilju in tzaj tqʼamaʼn qe. Ex il tiʼj tuʼn tkubʼ qbʼinchaʼn aju in tzalaj tiʼj. Qa ma bʼant jlu quʼn, kukx kxqʼuqil Jehová qiʼj te jumajx (1 Ped. 3:12).