1. ¿Alkye nya bʼaʼn ok weʼ José twitz ex tiʼ bʼant tuʼn?

 OK WEʼ José, aju tkʼwal Jacob twitz jun ambʼil kwest. In xitoq tqʼamaʼn jun xuʼj jlu te: «Tankuya wukʼile». Mintiʼ ok tqʼoʼn José twiʼ tiʼjju xi tqʼamaʼn t-xuʼjil Potifar te. Jakulo kubʼ kyxjelin junjun xjal tiquʼn mintiʼ kubʼ kuẍe José tukʼil t-xuʼjil Potifar. Mintiʼtoq Potifar tja ex in naqʼunantoq José te majen. Jakutoq tzʼok tbʼinchaʼn t-xuʼjil Potifar nim nya bʼaʼn tiʼj José qa ma tzʼel tikʼun. Pero mintiʼ kubʼ tiʼj José tuʼn. ¿Tiquʼn? Ax José qʼamante jlu: «¿Tzaʼntzun tten tuʼn nbʼinchanteye matij il lu ex tuʼn nbʼinchanteye il twitz Dios?» (Gén. 39:7-12).

2. ¿Tiquʼn ojtzqiʼntoq tuʼn José qa jun matij il toj twitz Dios aju aj pajil?

² ¿Tiquʼn ojtzqiʼntoq tuʼn José qa jun matij il aj pajil toj twitz Dios? Bʼaʼn tuʼn ttzaj qnaʼn qa atxtoq junlo 200 abʼqʼi tuʼn ttzaj tqʼoʼn Dios Tley te Moisés jatumel tzaj tqʼamaʼn jlu: «Miʼn kybʼinchaye aj pajil» (Éx. 20:14). Pero onin tojtzqibʼil José attoq tiʼj Jehová tuʼn tel tnikʼ tiʼj tiʼtoq t-ximbʼetz Jehová at tiʼj aj pajil. Jun techel, ojtzqiʼnlo tuʼn qa otoq kubʼ tbʼinchaʼn Jehová mejebʼleʼn te jun xinaq ex te jun xuʼj. Ex otoqlo tzʼok tbʼiʼn tiʼ bʼant tuʼn Jehová tuʼn tok t-xqʼuqin Sara tej kyajtoq kabʼe aj kawil tuʼn kykubʼ jtan tukʼil. Ax ikx, otoqlo tzʼok tbʼiʼn tiʼ bʼant tuʼn Jehová tuʼn t-xqʼuqin tiʼj Rebeca, aju t-xuʼjil Isaac (Gén. 2:24; 12:14-20; 20:2-7; 26:6-11). Tej t-ximen José tiʼj tkyaqil jlu, onin tiʼj tuʼn tel tnikʼ tiʼj alkye bʼaʼn ex alkye nya bʼaʼn toj twitz Dios. Tuʼnju attoq nim tkʼujlabʼil José tiʼj Jehová, ax ikx ok tkʼujlaʼn qe tkawbʼil ex otoq kubʼ t-ximen tuʼn kyxi tnimen.

3. ¿Tiʼ kʼelel qnikʼ tiʼj toj xnaqʼtzbʼil lu?

 ³ ¿In nokpe tkʼujlaʼn teya aju in nok tqʼoʼn Dios te tzʼaqli? Jaku txi qqʼamaʼn qa kʼujlaʼn tuʼna. Pero tuʼnju aj il qoʼ, jaku qo ok lepeʼ tiʼj kyximbʼetz xjal tiʼj alkye bʼaʼn ex tiʼj alkye nya bʼaʼn qa mintiʼ ma tzʼok qxqʼuqin qibʼ (Is. 5:20; Rom. 12:2). Tuʼntzunju, qo xnaqʼtzan tiʼj tiʼ in nok tqʼoʼn Jehová te tzʼaqli ex tiquʼn tbʼanel tuʼn tok qkʼujlaʼn. Ax ikx qo xnaqʼtzal tiʼj oxe tiʼ jaku bʼant quʼn tuʼn tchʼiy qkʼujlabʼil kyiʼj tkawbʼil Jehová.

4. ¿Alkye mod mintiʼ toklen tukʼilju in nok tqʼoʼn Dios te tzʼaqli?

⁴ Tej tten Jesús tzalu twitz Txʼotxʼ, ok kyqʼon kyibʼ nejenel kye okslabʼil te tzʼaqli. Pero xi tqʼamaʼn Jesús kye qa nya toj tumel aju bʼant kyuʼn tuʼnju kubʼ kyyekʼin nya bʼaʼn kymod kyukʼil xjal. Ax ikx, kubʼ kyqʼoʼn kyex kykawbʼil tej t-xi kyqʼamaʼn kye xjal alkye bʼaʼn ex alkye nya bʼaʼn (Ecl. 7:16; Luc. 16:15). Toj ambʼil jaʼlo, ax ikx ateʼ xjal ik kymod ik tzeʼn kye. In kubʼ kyximen qa mintiʼ in bʼant jun nya bʼaʼn kyuʼn. Chʼixmi tkyaqil maj, in jaw kynimsan kyibʼ ex in che yolin kyiʼj txqantl. Nya bʼaʼn in nela kymod xjal lu toj twitz Jehová ex mintiʼ toklen jlu tukʼilju in nok tqʼoʼn te tzʼaqli.

5. Ik tzeʼn in tzaj tqʼamaʼn Tyol Dios, ¿tiʼ t-xilen tuʼn qok te tzʼaqli? Qʼamantza junjun techel.

⁵ Tbʼanelxix aj tel qnikʼ tiʼj alkyeqe tiʼchaq in che ok tqʼoʼn Dios te tzʼaqli. Toj chʼin yol, atz in yolin jlu tiʼj aj tkubʼ qbʼinchaʼn aju bʼaʼn toj twitz. Aj tajbʼen yol tzʼaqli tuʼn Biblia, atz in yolin tiʼjju tuʼn qanqʼin ik tzeʼn in tzaj kyqʼamaʼn tkawbʼil Jehová. Jun techel, xi tqʼamaʼn Jehová jlu kye qeju in che kʼayin: «Noq oʼkx tuʼn tajbʼen mark cabalxix kyuʼne ex malbʼil tzʼaqlxix» (Deut. 25:15). Tuʼntzunju, qa taj jun okslal tuʼn tok te tzʼaqli toj twitz Dios, nim toklen tuʼn miʼn tsbʼun toj tkʼaẍjel. Aju xjal in nok tkʼujlaʼn aju in nok tqʼoʼn Dios te tzʼaqli, nya bʼaʼn in nela toj twitz aj tok bʼinchaʼn nya bʼaʼn kyiʼj txqantl. Ex in nok tqʼoʼn toklen t-ximbʼetz Dios naʼmxtoq txi tbʼinchaʼn jun tiʼ tuʼnju taj tuʼn ttzalaj tiʼj (Col. 1:10).

6. ¿Tiquʼn in nok qeʼ qkʼuʼj kyiʼj tkawbʼil Jehová aj ttzaj tqʼamaʼn alkye bʼaʼn ex alkye nya bʼaʼn? (Isaías 55:8, 9).

⁶ In tzaj tqʼamaʼn Biblia qa a Jehová aju Dios tzʼaqlixix. A t-xilen jlu qa atz tzajni aju tzʼaqlixix tukʼil (Jer. 50:7). Tuʼnju a Jehová Bʼinchal qe, oʼkx te at toklen tuʼn ttzaj tqʼamaʼn alkye bʼaʼn ex alkye nya bʼaʼn. Tuʼnju aj il qoʼ, mlayx pon qximbʼetz ik tzeʼn te Jehová (Prov. 14:12; kjawil uʼjit Isaías 55:8, 9). Pero, ¿jakupe che japun tkawbʼil tzʼaqli quʼn? Jaku. ¿Tiquʼn? Tuʼnju o qo kubʼ tbʼinchaʼn «ik tzaʼnx te tilbʼilal» (Gén. 1:27). Tbʼanel in nela toj qwitz tuʼn t-xi qbʼiʼn qe tkawbʼil Jehová. Tuʼnju kʼujlaʼn quʼn, in nok tilil quʼn tuʼn tel qkanoʼn tiʼj (Efes. 5:1).

7. ¿Tiquʼn il tiʼj tuʼn kykubʼ qʼoʼn kawbʼil? Qʼamantza jun techel.

⁷ Aj tok tilil quʼn tuʼn t-xi qbʼiʼn qe tkawbʼil Jehová tiʼjju alkye bʼaʼn ex tiʼjju alkye nya bʼaʼn, in qo tzalaj toj qanqʼibʼil. Qo xnaqʼtzan tiʼj tiquʼn. Jun techel, ¿tiʼ jaku bʼaj noqwit teyele junjun banco in kubʼ t-ximen jteʼ tvalor pwaq kʼokel tqʼoʼn? Jaku tzaj nim nya bʼaʼn. Ex jaku che kyim xjal noqwit teyele junjun doctor moqa enfermera in kubʼ t-ximen tzeʼn che okel tqʼanin qe yabʼ. Tuʼn jlu, in nel qnikʼ tiʼj qa nim toklen tuʼn t-xi qbʼiʼn qe kawbʼil in che kubʼ qʼoʼn. Ax jlu in bʼaj kyukʼil  tkawbʼil Dios, in che onin qiʼj tuʼn qtzalaj toj qanqʼibʼil.

8. ¿Tiʼ kʼiwlabʼil tzul tqʼoʼn Dios kye qeju in nok kykʼujlaʼn aju tzʼaqli?

⁸ In tzaj tkʼiwlaʼn Jehová qeju in nok tilil kyuʼn tuʼn t-xi kybʼiʼn qe tkawbʼil. In tzaj ttziyen jlu: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Sal. 37:29). ¿Jakupe qo ximen tiʼj tzeʼn kʼokel qanqʼibʼil aj kyok lepeʼ kykyaqil xjal kyiʼj tkawbʼil Jehová? Toj ambʼil aju, qo anqʼil toj tzalajbʼil ex toj mujbʼabʼil. Taj Jehová tuʼn ttzaj tkʼamoʼna qe kʼiwlabʼil lu. Tuʼntzunju, at nim tiquʼn tuʼn tok qkʼujlaʼn aju tzʼaqli. ¿Tiʼ jaku bʼant quʼn tuʼn tok qkʼujlaʼn mas aju mod lu? Qo xnaqʼtzan tiʼj oxe tiʼ jaku che onin qiʼj.

9. ¿Tiʼ kʼonil qiʼj tuʼn tok qkʼujlaʼn aju tzʼaqli?

⁹ Tnejel: Bʼaʼn tuʼn tok qkʼujlaʼn aju in tzaj qʼonte kawbʼil. Qa qaj tuʼn tok qkʼujlaʼn aju tzʼaqli, nim toklen tuʼn tok qkʼujlaʼn xjal in tzaj qʼamante alkye bʼaʼn ex alkye nya bʼaʼn. Qa mas ma tzʼok qkʼujlaʼn Jehová, mas kʼokel tilil quʼn tuʼn qanqʼin ik tzeʼn in tzaj tqʼamaʼn qe tkawbʼil. Qo ximen tiʼjju bʼaj tiʼj Adán ex Eva. Noqwit ok kykʼujlaʼn Jehová, mintiʼwtlo el kypan kyibʼ tiʼj (Gén. 3:1-6, 16-19).

10. ¿Tiʼ bʼant tuʼn Abrahán tuʼn tel mas tnikʼ tiʼj Jehová?

¹⁰ Nya qaj tuʼn qok ik tzeʼn Adán ex Eva. Tuʼn miʼn qel txalpaj ik tzeʼn kye, il tiʼj tuʼn tok qojtzqiʼn mas Jehová, tuʼn tok qkʼujlaʼn qe tmod ex tuʼn tok tilil quʼn tuʼn tten qximbʼetz ik tzeʼn te. Qa ma bʼant jlu quʼn, kchʼiyil qkʼujlabʼil tiʼj. Atzun jlu bʼaj tiʼj Abrahán. Kukx xi tbʼiʼn Jehová maske at maj mintiʼ el tnikʼ tiʼj tiquʼn xi tbʼinchaʼn junjun tiʼchaq. Aju bʼant tuʼn, ok tilil tuʼn tuʼn tel mas tnikʼ tiʼj. Jun techel, tej tok tbʼiʼn qa tuʼn tkubʼ tnajsaʼn Jehová tnam Sodoma ex Gomorra, tnejel, tzaj xobʼ tuʼnju kubʼ t-ximen qa kbʼel tbʼyoʼn «jwes kyibʼaj kykyaqil xjal twitz txʼotxʼ» qeju bʼinchal nya bʼaʼn junx kyukʼil qeju mintiʼ kyil. Kubʼlo t-ximen qa mlay bʼant jlu tuʼn Dios, tuʼntzunju, kubʼ tin tibʼ ex xi tqanin junjun xjel te. Ten tpasens Jehová tiʼj ex tzaj ttzaqʼweʼn qe t-xjel. Tej kybʼaj yolin, el tnikʼ Abrahán tiʼj qa in bʼaj t-xpichʼen Jehová toj kyanmi xjal ex qa mintiʼ in kubʼ tqʼoʼn kykastiw qeju mintiʼ kyil junx kyukʼil qeju bʼinchal nya bʼaʼn (Gén. 18:20-32).

11. ¿Tzeʼn kubʼ tyekʼin Abrahán qa kʼujlaʼntoq Jehová tuʼn ex qa qʼuqlitoq tkʼuʼj tiʼj?

¹¹ Tej tyolin Abrahán tukʼil Jehová tiʼj tnam Sodoma ex Gomorra, mintiʼ ikʼ tnaʼl jlu tuʼn. Jaku txi qqʼamaʼn qa onin jlu tiʼj tuʼn tchʼiy tkʼujlabʼil tiʼj Jehová ex tuʼn tnimen te. Tej tikʼ junjuntl abʼqʼi, ax ikx ok weʼ Abrahán twitz juntl ambʼil kwest jatumel ok qʼuqbʼil tkʼuʼj toj malbʼil. Xi tqʼamaʼn Jehová te Abrahán tuʼn t-xi tqʼoʼn tkʼwal te chojbʼil. Toj ambʼil aju, ya otoq chʼiy tojtzqibʼil Abrahán tiʼj Jehová, tuʼntzunju, ya mintiʼ xi tqanin jun xjel te. Noq oʼkx bʼaj tbʼinchaʼn tten tuʼn t-xi tbʼiʼn aju tzaj tqʼamaʼn Jehová te. Maske ikju, kwest ela toj twitz tuʼn t-xi tbʼiʼn. Bʼalo ok ten ximel tiʼjju otoq tzʼel tnikʼ tiʼj Jehová. Ojtzqiʼntoq tuʼn qa mlayx bʼant jun tiʼ nya tzʼaqli tuʼn Jehová. Ik tzeʼn tqʼama apóstol Pablo, el tnikʼ Abrahán tiʼj qa jakutoq jaw anqʼin Isaac tuʼn Jehová (Heb. 11:17-19). Toj tumel aju kubʼ t-ximen tuʼnju otoq txi ttziyen Jehová qa kʼokel Isaac te t-xeʼchel jun tnam, ex toj ambʼil aju, naʼmxtoq tul jun tkʼwal Isaac. Tuʼnju kʼujlaʼntoq  Jehová tuʼn Abrahán, ok qeʼ tkʼuʼj tiʼj qa toj tumel kxel tbʼinchaʼn tkyaqil tiʼchaq. Tuʼnju otoq chʼiy qʼuqbʼil tkʼuʼj tiʼj Jehová, xi tbʼiʼn aju tzaj tqʼamaʼn te maske kwest ela toj twitz (Gén. 22:1-12).

12. ¿Tzeʼn jaku tzʼel qkanoʼn tiʼj Abrahán? (Salmo 73:28).

¹² ¿Tzeʼn jaku tzʼel qkanoʼn tiʼj Abrahán? Il tiʼj tuʼn tchʼiy qojtzqibʼil tiʼj Jehová. Qa ma bʼant jlu quʼn, qo okel laqʼeʼ ttxlaj ex mas kʼokel qkʼujlaʼn (kjawil uʼjit Salmo 73:28). Nya oʼkxju, ax ikx kxel qxnaqʼtzaʼn qximbʼetz tuʼn tok ik tzeʼn te Dios (Heb. 5:14). Tuʼn jlu, mlay kubʼ qiʼj aj qok weʼ twitz jun joybʼil. Mlayx kubʼ qximen tuʼn tkubʼ qbʼinchaʼn jun nya bʼaʼn tuʼntzun miʼn ttzaj tbʼis Jehová ex tuʼn miʼn tnaj qamiwbʼil tukʼil. ¿Tiʼ mas jaku bʼant quʼn tuʼntzun tkubʼ qyekʼin qa kʼujlaʼn aju tzʼaqli quʼn?

13. ¿Tiʼ il tiʼj tuʼn tbʼant quʼn tuʼn kukx qanqʼin ik tzeʼn in tzaj tqʼamaʼn Jehová? (Proverbios 15:9).

¹³ Tkabʼin: Nim toklen tuʼn tok tilil quʼn tuʼn tchʼiy qkʼujlabʼil tiʼjju tzʼaqli. Tuʼn tchʼiy qkʼujlabʼil kyiʼj tkawbʼil Jehová, in nok jlu ik tzeʼn aj tok tipumal qxmilal. Il tiʼj tuʼn tok tilil quʼn tkyaqil qʼij. Ojtzqiʼn quʼn qa in nel tnikʼ Jehová qiʼj ex mintiʼ in nayon tuʼn tkubʼ qbʼinchaʼn jun tiʼ mlay bʼant quʼn (Sal. 103:14). In tzaj tqʼamaʼn jlu qe toj Tyol: «Atzunju xjal in bʼet tuj tumel kʼujlaʼn tuʼn Qman» (kjawil uʼjit Proverbios 15:9). Aj tkubʼ qximen tuʼn tbʼant jun tiʼ quʼn toj qajbʼebʼil te Jehová, in nok tilil quʼn tuʼn tjapun twi qximbʼetz. Ax jlu in bʼant quʼn aj tok tilil quʼn tuʼn qanqʼin ik tzeʼn in tzaj tqʼamaʼn Jehová. Ex kʼonil qiʼj tukʼil pasens tuʼn kukx tok tilil quʼn (Sal. 84:5, 7).

14. ¿Tiʼ in kubʼ techlaʼn «chikyet kʼuxbʼil» ex tiquʼn nim toklen tuʼn t-xi qiʼn?

¹⁴ Tukʼil kʼujlabʼil in tzaj tnaʼn Jehová qe qa nya jun iqtz aj t-xi qbʼinchaʼn aju tbʼanel in nela toj twitz (1 Juan 5:3). In che xqʼuqin tkawbʼil Jehová qiʼj tkyaqil qʼij. Qo ximen tiʼj tkyaqil onbʼil yolin Pablo tiʼj tuʼn miʼn qkubʼ numj toj qokslabʼil (Efes. 6:14-18). ¿Tiʼ in najbʼen quʼn  tuʼn tok qxqʼuqin qanmi? In najbʼen «chikyet kʼuxbʼil» quʼn, toj juntl yol, aqeju tbʼanel tkawbʼil Jehová, aʼyeju in che onin qiʼj tuʼn tok qxqʼuqin qanmi ex qximbʼetz. Tuʼntzunju, il tiʼj tuʼn t-xi qiʼn toj tkyaqil ambʼil tuʼnju atzun jun kyxol qe tiʼchaq in najbʼen quʼn tuʼn miʼn qkubʼ numj toj qokslabʼil (Prov. 4:23).

15. ¿Tzeʼn in nok qqʼoʼn «chikyet kʼuxbʼil» tzʼaqli qiʼj?

¹⁵ ¿Tzeʼn in nok qqʼoʼn «chikyet kʼuxbʼil» qiʼj? In nok qqʼoʼn aj qximen kyiʼj tkawbʼil Jehová ik tzeʼn aj qximen kyiʼj qyol, tiʼj música kʼokel qbʼiʼn, tiʼj película kʼokel qkeʼyin moqa tiʼj alkye libro kjawil quʼjin. Tuʼntzunju, bʼaʼn tuʼn tkubʼ qxjelin jlu: «¿Tiʼ kjel tqʼoʼn jlu toj wanmiye? ¿In tzalajpe Jehová tiʼj? ¿Moqa mintiʼ in nok tqʼoʼn Jehová jlu te tzʼaqli ex atpe toklen tukʼil yaẍbʼil, tukʼil qʼoj moqa tukʼilju tuʼn qximen oʼkx qiʼjx?» (Filip. 4:8). Qa at kyoklen qbʼinchbʼen tukʼilju tajbʼil Jehová, che onil qe tkawbʼil qiʼj tuʼn tok qxqʼuqin qanmi.

16, 17. ¿Tzeʼn in tzaj tyekʼin Isaías 48:18 qa jaku chex qnimen tkawbʼil Jehová te jumajx?

¹⁶ ¿Yajtzun qa in tzaj bʼaj qkʼuʼj tuʼnju in kubʼ qximen qa mlay che japun tkawbʼil Jehová quʼn tkyaqil qʼij ex tkyaqil abʼqʼi? Qo ximen tiʼj jun techel ajbʼen tuʼn Jehová ex atz in kanet quʼn toj Isaías 48:18 (uʼjinktza). In tzaj ttziyen Jehová qa che okel kʼiwlabʼil in tzaj tqʼoʼn qe ik tzeʼn qe ola «in [che] jaw xtulqʼin tibʼaj mar». Qo ximen tiʼj qa in qo keʼyin kyiʼj ola in che etz toj mar. Kukx in che etz ex mintiʼ bʼajsbʼil kye. Mintiʼ in kubʼ qximen qa kpol jun qʼij jatumel ya mlay che etz. Ojtzqiʼn quʼn qa ya ma tzikʼ nim mil abʼqʼi in che etz ola ex kukx che eletz.

¹⁷ Qa ikju, ¿tiʼ jaku bʼant quʼn tuʼn kyok kʼiwlabʼil in tzaj tqʼoʼn Jehová qe ik tzeʼn qe ola? Aj tkubʼ qximen tuʼn tbʼant jun tiʼ quʼn, qo ximen tiʼj tnejel tiʼ taj Jehová tuʼn tbʼant quʼn ex yajxitl, jaku kubʼ qbʼinchaʼn. Maske kwest tuʼn tbʼant jun tiʼ quʼn, kukx kʼonil Jehová qiʼj tuʼn tok tilil quʼn ex tuʼn kyxi qbʼiʼn qe tkawbʼil tkyaqil qʼij (Is. 40:29-31).

18. ¿Atpe qoklen tuʼn t-xi qqʼamaʼn kye txqantl qa tbʼanel xjal qe moqa nya?

¹⁸ Toxin: Bʼaʼn tuʼn t-xi qqʼoʼn ambʼil te Jehová tuʼn t-xi tbʼinchaʼn kyiʼj tiʼchaq. Maske in nok tilil quʼn tuʼn qanqʼin ik tzeʼn in tzaj kyqʼamaʼn tbʼanel tkawbʼil Jehová, mintiʼ tuʼn qyolin kyiʼj txqantl ex mintiʼ tuʼn tkubʼ qximen qa mas tzʼaqli qoʼ kywitz. Mintiʼ in jaw qnimsan qibʼ ex mintiʼ in kubʼ qximen qa at qoklen tuʼn t-xi qqʼamaʼn kye qa tbʼanel xjal qe moqa nya. Sino in tzaj qnaʼn qa a Jehová in nok te «jwes kyibʼaj kykyaqil xjal twitz txʼotxʼ» (Gén. 18:25). Mintiʼ o tzaj tqʼoʼn Jehová qoklen tuʼn qok te jwes. Axpe ikx, kyaj tqʼamaʼn Jesús kawbʼil lu: «Miʼn che yoline kyiʼj kyukʼile qa mya bʼaʼn qe, tuʼntzun miʼn kyoke tuj xjel tuʼn Dios» (Mat. 7:1). *

19. ¿Tzeʼn kubʼ tyekʼin José qa ok qeʼ tkʼuʼj tiʼj qa oʼkx Jehová jaku txi bʼinchante tiʼj nya bʼaʼn?

¹⁹ Qo yolin juntl maj tiʼj José. Xi tbʼiʼn qe tkawbʼil Jehová ex mintiʼ xi tbʼinchaʼn kyiʼj nya bʼaʼn ok bʼinchaʼn tiʼj. Xi kʼayin te majen kyuʼn ttzik ex xi kyqʼamaʼn te kyman qa otoq kyim. Tej tikʼ ambʼil, ok kykeʼyin kywitz juntl maj. Toj ambʼil aju, otoq tzʼok José te aj kawil, tuʼntzunju, jakutoq  kubʼ tyekʼin nya bʼaʼn tmod kyukʼil ttzik ex jakutoq tzʼaj tqʼoʼn t-xel nya bʼaʼn. Kubʼ kyximen qa atzun jlu tuʼn tbʼant tuʼn maske otoq tzʼajtz tiʼj kyanmi. Pero xi tqʼamaʼn José jlu kye: «Miʼn che xobʼe, baqa Dios qine» (Gén. 37:18-20, 27, 28, 31-35; 50:15-21). Kubʼ tin tibʼ José ex kubʼ t-ximen qa oʼkx Jehová at toklen tuʼn t-xi tbʼinchaʼn tiʼj nya bʼaʼn.

20, 21. ¿Tiʼ jaku tzʼonin qiʼj tuʼn miʼn tkubʼ qximen qa mas tzʼaqli qoʼ kywitz txqantl?

²⁰ Ik tzeʼn bʼant tuʼn José, ax ikx qe qqʼonx ambʼil te Jehová tuʼn t-xi tbʼinchaʼn kyiʼj nya bʼaʼn. Jun techel, mintiʼ tuʼn tkubʼ qximen qa ojtzqiʼn quʼn tiquʼn in bʼant junjun tiʼchaq kyuʼn erman. Mlay tzʼel qnikʼ tiʼj tiʼ tkuʼx toj tanmi jun erman, sino oʼkx Jehová «in bʼaj malonte t-ximbʼetz» (Prov. 16:2). Noq alkyexku kytnam xjal moqa kykostumbr, kʼujlaʼn qe tuʼn Jehová. Tuʼntzunju, in tzaj tqʼamaʼn jlu qe: «Kyjaqonktz kyanmiye» (2 Cor. 6:13, TNM). Bʼaʼn tuʼn tok tilil quʼn qkyaqilx tuʼn kyok qkʼujlaʼn kykyaqil erman ex nya tuʼn qyolin kyiʼj.

²¹ Ax ikx, mintiʼ qoklen tuʼn qyolin kyiʼj xjal naʼmx kyok te tmajen Jehová (1 Tim. 2:3, 4). Jun techel, mintiʼ in qo yolin kyiʼj toj qja naʼmx tel kynikʼ tiʼj axix tok ex mintiʼ in kubʼ qximen qa mlayx che ok te testigo de Jehová. Qa ma bʼant jlu quʼn, in jaw qnimsan qibʼ ex in kubʼ qximen qa mas tzʼaqli qoʼ kywitz txqantl. Kukx in tzaj tqʼoʼn Jehová ambʼil kye «kykyaqil xjal tuj tkyaqil lugar» tuʼn tajtz tiʼj kyanmi (Hech. 17:30). Miʼn tzikʼ tnaʼl quʼn qa in nok tqʼoʼn Jehová te nya tzʼaqli aju xjal in nok tqʼon tibʼ te tzʼaqli.

22. ¿Tiʼ in nonin tiʼja tuʼn tok tkʼujlaʼna aju tzʼaqli?

²² Qa ma che ok qkʼujlaʼn qe tkawbʼil Jehová, kbʼel qnaʼn tzalajbʼil ex kbʼel qqʼoʼn jun tbʼanel techel kywitz txqantl. Nya oʼkxju, ax ikx kʼokel kykʼujlaʼn txqantl Jehová ex qo okel kʼujlaʼn kyuʼn. Tuʼntzunju, kukx tzʼok tilil quʼn tuʼn tok qkʼujlaʼn aju tzʼaqli (Mat. 5:6). Qʼuqli qkʼuʼj tiʼj qa in nok tqʼoʼn Jehová twitz qiʼj aj tok tilil quʼn tuʼn t-xi qnimen qe tkawbʼil tkyaqil qʼij ex qa in tzalaj tanmi tuʼn jlu. Toj ambʼil jaʼlo, nya toj tumel in xi kybʼinchaʼn xjal qe tiʼchaq, pero miʼn tzaj bʼaj qkʼuʼj. Bʼaʼn tuʼn ttzaj qnaʼn qa «in tkʼujlaʼn [Jehová] qe xjal tzʼaqlxix» (Sal. 146:8).