1. ¿Tiquʼn tbʼanel tuʼn qyolin tiʼj tzeʼn kanet axix tok quʼn?

 «¿TZEʼN ok tojtzqiʼna axix tok?». Olo txi qtzaqʼweʼn xjel lu nim maj. Chʼixmi tkyaqil maj in bʼant jlu quʼn aj kyok qojtzqiʼn txqantl erman. Qgan tuʼn tok qbʼiʼn tzeʼn ok kyojtzqiʼn erman axix tok ex tzeʼn ok kykʼujlaʼn Jehová. Ax ikx qgan tuʼn t-xi qqʼamaʼn tiʼ qximbʼetz at tiʼj axix tok (Rom. 1:11). Tbʼanel in nela toj qwitz aj qyolin tiʼj jlu tuʼnju in tzaj tnaʼn qe qa tbʼanelxix tuʼnju testigo de Jehová qoʼ. Ax ikx, in nonin qiʼj tuʼn kukx tok tilil quʼn tuʼn qbʼet toj axix tok, toj juntl yol, tuʼn ttzalaj Jehová qiʼj ex tuʼn ttzaj tqʼoʼn tkʼiwlabʼil qe (3 Juan 4).

2. ¿Tiʼ kʼelel qnikʼ tiʼj toj xnaqʼtzbʼil lu?

² Toj xnaqʼtzbʼil lu, kʼelel qnikʼ tiʼj tiquʼn kʼujlaʼn axix tok quʼn. Ax ikx kʼelel qnikʼ tiʼj tzeʼn jaku kubʼ qyekʼin qa in nok qqʼoʼn toklen axix tok. Aj tel qnikʼ tiʼj jlu, kʼonil qiʼj tuʼn t-xi qqʼoʼn chjonte te Jehová tuʼnju o qo tzaj tiʼn toj ttnam (Juan 6:44). Ex kʼonil jlu qiʼj tuʼn tok tilil quʼn tuʼn qyolin tiʼj axix tok kyukʼil txqantl.

3. ¿Alkye jun tiquʼn mas nim toklen kʼujlaʼn axix tok quʼn?

³ At nim tiquʼn kʼujlaʼn axix tok quʼn. Aju mas nim toklen tuʼnju kʼujlaʼn Jehová quʼn, tuʼnju atz tukʼil in tzaj axix  tok. Noq tuʼn Biblia, o tzʼel qnikʼ tiʼj qa a Jehová aju Dios at nimxix tipumal ex qa a kubʼ bʼinchante kyaʼj ex Txʼotxʼ. Ax ikx, o tzʼel qnikʼ tiʼj qa kʼujlaʼn qoʼ tuʼn ex qa in ximen qiʼj (1 Ped. 5:7). In tzaj tqʼamaʼn Jehová jlu qe toj Tyol: «Aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline» (Éx. 34:6). Tgan Jehová «tuʼn tbʼinchet aju tzʼaqlxix» (Is. 61:8). In tzaj tbʼis Jehová aj qikʼ toj nya bʼaʼn ex taj tuʼn tpon ambʼil tuʼn tkubʼ tnajsaʼn tkyaqil nya bʼaʼn (Jer. 29:11). Ax ikx qe, qajxix tuʼn tpon ambʼil lu. Tuʼntzunju kʼujlaʼnxix Jehová quʼn.

4, 5. ¿Tiquʼn tqʼama apóstol Pablo qa ik tten qʼuqbʼil qkʼuʼj ik tzeʼn jun taqʼal bark?

⁴ Ax ikx kʼujlaʼn axix tok quʼn tuʼnju in nonin qiʼj toj qanqʼibʼil. Qo yolin tiʼj jun techel. Kyxol qe xnaqʼtzbʼil o tzʼel qnikʼ tiʼj toj Tyol Dios, at qʼuqbʼil qkʼuʼj tiʼj ambʼil tzul. Ok tqʼoʼn apóstol Pablo toklen qʼuqbʼil tkʼuʼj, tuʼntzunju kubʼ ttzʼibʼin jlu: «Aju oybʼil lu ik tten ik tzaʼn taqʼal barc, in ajbʼen te tzuybʼil te qanmi tuʼn tten qanmi segurxix ex tuʼn miʼn qyyukch» (Heb. 6:19). In nonin jun taqʼal bark tiʼj tuʼn miʼn tyukch. Ax ikx qe, in nonin qʼuqbʼil qkʼuʼj qiʼj tuʼn tchewix qanmi aj kytzaj nya bʼaʼn.

⁵ Tej ttzaj tqʼamaʼn Pablo qe yol lu, in ximentoq tiʼj qʼuqbʼil kykʼuʼj qeju che xeʼl toj kyaʼj. Pero ax ikx jaku che onin tyol kyiʼj okslal che anqʼil te jumajx tzalu twitz Txʼotxʼ (Juan 3:16). Jaku txi qqʼamaʼn qa o kanet ttxolil qanqʼibʼil tuʼnju at qʼuqbʼil qkʼuʼj tuʼn qanqʼin te jumajx.

6, 7. ¿Tzeʼn onin tiʼj Yvonne aju in tzaj t-xnaqʼtzaʼn Biblia tiʼj ambʼil tzul?

⁶ Qo yolin tiʼjju bʼaj tiʼj ermana Yvonne. Mintiʼ jaw chʼiy toj axix tok ex in xobʼtoq tuʼn tkyim. Tzaj tnaʼn qa jaw tuʼjin qe yol lu toj jun libro: «Kpol jun qʼij jatumel ya mlay qo spikʼeʼ». Ax ikx tqʼama jlu: «Mintiʼ ok nwatle kyuʼn yol lu; kukx in chin ximentoqe tiʼj ambʼil tzul. Ex nqʼamaye jlu: ‹¿Oʼkxpe qchwinqlal jlu at? ¿Tiquʼn atine tzalu?›. ¡Nya wajtoqe tuʼn nkyime!».

⁷ Tej tokx Yvonne toj tkuʼxumal, e ok tojtzqiʼn qe testigo de Jehová. Tqʼama jlu: «Xi tzyet tuʼn tok qeʼ nkʼuʼje tiʼj anqʼibʼil te jumajx toj Tbʼanel najbʼil tzalu twitz Txʼotx». Tuʼnju o tzʼel tnikʼ tiʼj axix tok, nim o tzʼonin tiʼj ex tqʼama jlu: «Ya mintiʼ in nel nwatle tuʼnju ya mintiʼ in bʼaj nkʼuʼje tiʼj ambʼil tzul ex tiʼj kyimen». Mintiʼ in qo jaw labʼin tiʼj qa nim toklen axix tok te Yvonne ex qa tgan tuʼn tyolin tiʼj qʼuqbʼil tkʼuʼj kyukʼil txqantl (1 Tim. 4:16).

8, 9. a) ¿Tzeʼn kubʼ tyekʼin xjal yolin Jesús tiʼj qa ok tqʼoʼn toklen axix tok? b) ¿Tiʼ teya in kubʼ tnaʼn tiʼj axix tok?

⁸ Ax ikx, at kyoklen tbʼanel tqanil tiʼj Tkawbʼil Dios tukʼil axix tok tkuʼx toj Biblia. Ok tmojbʼaʼn Jesús axix tok tiʼj Tkawbʼil Dios tukʼil jun qʼinumabʼil. Tqʼama jlu: «Aju kawbʼil in tzaj tuj kyaʼj ik tten ik tzaʼn jun qʼinumabʼl ewan tuj jun kojbʼil o knet tuʼn jun xjal ex kuʼx tewan juntl maj, ex o tzalajxix tiʼj; xiʼtzun ex xi tkʼayin tkyaqilju at te, ex laqʼet ju kojbʼil tuʼn, jatum ewan ju qʼinumabʼl» (Mat. 13:44). Ik tzeʼn saj tqʼamaʼn texto lu, mintiʼtoq in jyon xjal tiʼj qʼinumabʼil. Pero tej tkanet tuʼn, ok tilil tuʼn tuʼn tkyaj tiʼn qʼinumabʼil, tuʼntzunju xi tkʼayin tkyaqilju at te. ¿Tiquʼn bʼant jlu tuʼn? Tuʼnju el tnikʼ tiʼj qa mas nim toklen axix tok twitz alkyexku juntl tiʼ.

 ⁹ ¿Axpe teya t-ximbʼetz at tiʼj axix tok? Jaku txi qqʼamaʼn qa ax. Mlay tzʼok qmojbʼaʼn qʼuqbʼil qkʼuʼj ex tzalajbʼil in kubʼ qnaʼn tuʼnju in qo ajbʼen te Jehová kyukʼil tiʼchaq te twitz txʼotxʼ. Aj tok tilil quʼn tuʼn tten jun tbʼanel qamiwbʼil tukʼil Jehová, atzunju mas tbʼanel jaku bʼant quʼn. Jun oklenj te qe tuʼnju jaku qo ok te tamiw. Nimxix in qo tzalaj qa in tzalaj Jehová quʼn toj tkyaqil (Col. 1:10).

10, 11. ¿Tiʼ onin tiʼj Michael tuʼn tbʼant chʼixpubʼil tuʼn toj tanqʼibʼil?

¹⁰ O tzʼok tilil kyuʼn nim erman tuʼn tbʼant junjun chʼixpubʼil kyuʼn tuʼn ttzalaj Jehová kyiʼj. Ateʼ junjun o kyaj kytzaqpiʼn jun carrera nim toklen. Junjuntl ya mintiʼ in che jyon kyiʼj qʼinumabʼil. Atzun junjuntl chʼexpaj tkyaqil kyanqʼibʼil tej tok kyojtzqiʼn Jehová. Atzun jlu bʼant tuʼn Michael tej tel tnikʼ tiʼj axix tok. Tej kuʼxuntoq xnaqʼtzan tiʼj karate. Tqʼama jlu: «In chin tzalaje tiʼj nxmilale. […] At maj kubʼ nnaʼne qa mlayxtoq kubʼ wiʼje». Tejtzun txi tzyet tuʼn t-xnaqʼtzan tiʼj Biblia, el tnikʼ tiʼj qa in nel tikʼun Jehová qʼoj (Sal. 11:5). Tej tyolin tiʼj mejebʼleʼn xi qʼonte xnaqʼtzbʼil te tqʼama jlu: «Mintiʼ tzaj kyqʼamaʼn weye tuʼn tkyaj ntzaqpiʼne karate. Oʼkx ok tilil kyuʼn tuʼn ttzaj kyyekʼin axix tok weye».

¹¹ Tej tchʼiy tojtzqibʼil Michael tiʼj Jehová mas ok tkʼujlaʼn. Tej tel tnikʼ tiʼj qa in tzaj qʼaqʼin tkʼuʼj Jehová kyiʼj tmajen kuʼpin jlu toj tanmi. El tnikʼ tiʼj qa iltoq tiʼj tuʼn tbʼant jun chʼixpubʼil tuʼn toj tanqʼibʼil. Tqʼama jlu: «Ojtzqiʼn wuʼne qa kwest tuʼn tkyaj ntzaqpiʼne karate. Noqtzun tuʼnj, ax ikx ojtzqiʼntoq wuʼne qa ktzalajel Jehová wiʼje qa ma kyaj ntzaqpiʼne. Otoq tzʼok qeʼ nkʼuʼje tiʼj qa atzun mas tbʼanel jaku bʼant wuʼne». Ok tqʼoʼn Michael toklen axix tok, ex atzun jlu onin tiʼj tuʼn tbʼant chʼixpubʼil tuʼn toj tanqʼibʼil (Sant. 1:25).

12, 13. ¿Tzeʼn ok Tyol Dios ik tzeʼn jun lámpara toj tbʼe Mayli?

¹² Tuʼn ttzaj tyekʼin Tyol Dios qa nim toklen axix tok, in nok tmojbʼaʼn tukʼil jun lámpara in qoptzʼaj toj qlolj (Sal. 119:105; Efes. 5:8). In xi tqʼoʼn Mayli, jun erman te Azerbaiyán, chjonte tuʼnju tzaj yekʼin tbʼe tuʼn Tyol Dios. Attoq kabʼe kyokslabʼil toj tja. Atztoq in xiʼ ttat kyxol musulmán atzun ttxuʼ kyxol judiy. Tqʼama Mayli jlu: «Ojtzqiʼntoq wuʼne qa attoq Dios, pero attoq junjun xnaqʼtzbʼil mintiʼtoq in nel nnikʼe kyiʼj. Kubʼ nxjeline jlu: ‹¿Tiquʼn o qo kubʼ tbʼinchaʼn Dios? ¿Tiquʼn in tzaj yajbʼil kyiʼj xjal ex aj kykyim che xeʼl toj qʼaqʼ?›. In tzaj kyqʼamaʼn xjal qa tuʼn Dios in tzaj tkyaqilju in bʼaj toj qanqʼibʼil ex tuʼn jlu kubʼ nximane: ‹¿Noqpe in chin oke ik tzeʼn jun saqchbʼil toj tqʼabʼ Dios? ¿In tzalajpe Dios aj qikʼ toj yajbʼil?›».

¹³ Kukx jyon Mayli tzaqʼwebʼil kyiʼj t-xjel. Tej tbʼet ambʼil, xi tzyet tuʼn t-xnaqʼtzan tiʼj Tyol Dios ex ok te testigo de Jehová. Tqʼamatl jlu: «Tuʼnju o tzaj tqʼoʼn Tyol Dios tzaqʼwebʼil kyiʼj nxjele, junxitl nximbʼetze at tiʼj anqʼibʼil ex in kubʼ nnaʼne tzalajbʼil». Ik tzeʼn bʼaj tiʼj Mayli in jaw qnimsaʼn Jehová tuʼnju o qo tzaj txkoʼn «tuj t-spikʼumal tbʼanilxix» (1 Ped. 2:9).

14. ¿Tiʼ jaku bʼant quʼn tuʼn tchʼiy mas qkʼujlabʼil tiʼj axix tok? (Qʼonka twitza tiʼj recuadro « Junjuntl techel»).

¹⁴ Aqeju techel ma qo yolin kyiʼj kyoj párrafo ma che kyaj, in tzaj kyyekʼin  qa nim toklen axix tok. Bʼalo in che ul junjuntl techel toj qwiʼ. Tbʼanel qa ma qo ximen kyiʼj junjuntl tiquʼn kʼujlaʼn axix tok quʼn. Qa mas ma tzʼok qkʼujlaʼn axix tok, mas kbʼel qyekʼin qa kʼujlaʼn quʼn.

15. ¿Tzeʼn jaku kubʼ qyekʼin qa kʼujlaʼn axix tok quʼn?

¹⁵ Jun tumel tuʼn tkubʼ qyekʼin qa kʼujlaʼn axix tok quʼn aju qa ma qo xnaqʼtzan tiʼj Biblia ex kyiʼj uʼj in che etz tuʼn ttnam Jehová. Noq jteʼxku ambʼil qʼiʼn quʼn toj ttnam Jehová kukx in nel qnikʼ kyiʼj junjuntl xnaqʼtzbʼil. Tej tetz tnejel uʼj Xqʼuqil toj inglés tqʼama jlu: «Aju axix tok, ik tten ik tzeʼn jun bʼech toj ttzqij txʼotxʼ, nojni tiʼj tuʼn chʼiʼx kʼul ex chʼix ttzqij tuʼn nya bʼaʼn xnaqʼtzbʼil. Qa taja tuʼn tkanet tuʼna, il tiʼj tuʼn tten nim tnabʼila; [...] qa taja tuʼn tok te teya, il tiʼj tuʼn tkubʼ mokʼeya jyolte. Mi jaw tiʼna oʼkx jun bʼech tiʼj axix tok. [...] Kukx qʼinktza txqantl; kukx jyona tiʼj». Il tiʼj tuʼn tok tilil quʼn tuʼn qxnaqʼtzan, pero atzun mas tbʼanel jaku bʼant quʼn.

16. Aj t-xnaqʼtzan teya tiʼj Tyol Dios, ¿alkye tumel mas in nonin tiʼja? (Proverbios 2:4-6).

¹⁶ Nya qkyaqilx qgan tuʼn quʼjin ex tuʼn  qxnaqʼtzan, pero in tzaj tqʼamaʼn Jehová tuʼn kukx tten qojtzqibʼil tuʼntzun telxix qnikʼ tiʼj axix tok (kjawil uʼjit Proverbios 2:4-6). Qa ma tzʼok tilil quʼn, ktel mas qojtzqibʼil. In tzaj tqʼamaʼn jun ermano Corey tbʼi qa oʼkx in nok tqʼoʼn twiʼ tiʼj jun versículo aj tuʼjin tiʼj Tyol Dios tjunalx. Tqʼama jlu: «In jaw wuʼjine qe nota tkubʼ t-xe t-xaq uʼj, in che tzaj njyoʼne qe referencia tok ttxlaj ex in chin jyone tqanil kyiʼj. […] In nonin jlu wiʼje tuʼn kykanet tbʼanel xnaqʼtzbʼil wuʼne». Qa in bʼant jlu quʼn moqa miʼn, nim toklen tuʼn tkubʼ qyekʼin qa in nok qqʼoʼn toklen axix tok aj tel qpaʼn ambʼil tuʼn qxnaqʼtzan tiʼj Tyol Dios (Sal. 1:1-3).

17. ¿Tiʼ t-xilen tuʼn tkubʼ qanqʼiʼn axix tok? (Santiago 1:25).

¹⁷ Pero nya oʼkx tuʼn qxnaqʼtzan tiʼj Tyol Dios. Tuʼn tonin qiʼj il tiʼj tuʼn tkubʼ qanqʼin axix tok moqa il tiʼj tuʼn tkubʼ qbʼinchaʼn aju in nel qnikʼ tiʼj. Oʼkx qa ma bʼant jlu quʼn jaku qo tzalaj (kjawil uʼjit Santiago 1:25). ¿Tzeʼn jaku tzʼel qnikʼ tiʼj qa in kubʼ qanqʼiʼn axix tok? Tzaj tqʼamaʼn jun ermano qa il tiʼj tuʼn qximen tiʼj alkyeqe tiʼchaq toj tumel in bʼant quʼn ex alkyeqe il tiʼj tuʼn qaqʼunan chʼintl kyiʼj. Tqʼama apóstol Pablo jlu: «Aju ma tzʼel qnikʼ tiʼj, axtzunju tuʼn qximan tiʼj ex tuʼn qbʼinchante» (Filip. 3:16).

18. ¿Tiquʼn in nok tilil quʼn tuʼn kukx qbʼet toj axix tok?

¹⁸ Qo ximen tiʼj jniʼ tzalajbʼil in kubʼ qnaʼn aj tok tilil quʼn tuʼn qbʼet toj axix tok. Nya oʼkx in nok qanqʼibʼil te tbʼanel, sino ax ikx in tzalaj Jehová tuʼn ex qe erman (Prov. 27:11; 3 Juan 4). Tuʼntzunju, ¡tbʼanel tuʼn tok qkʼujlaʼn ex tuʼn tkubʼ qanqʼiʼn axix tok!