XNAQʼTZBʼIL 35
«Kykyuwsam kynabʼle kyxolxe»
«Kyjaʼtzun, kyqʼom kynabʼle kyxolxe ex kykyuwsam kynabʼle kyxolxe» (1 TES. 5:11).
BʼITZ 90 Qo onin qibʼ qxolx
AJU KʼELEL QNIKʼ TIʼJ *
1. Ik tzeʼn in tzaj tqʼamaʼn 1 Tesalonicenses 5:11, ¿alkye aqʼuntl mas bʼaʼn tuʼn tbʼant quʼn qkyaqilx?
¿OPE tzʼonin congregación jatumel in nok tchmon tibʼa tuʼn tjaw bʼinchet jun Ja te Chmabʼil moqa tuʼn tbʼaj bʼinchet chʼintl? Qa ikju, in tzajlo tnaʼna tnejel chmabʼil ok. Kubʼ tnaʼna tzalajbʼil ex xi tqʼoʼna chjonte te Jehová, axpe ikx kwestlo ela toj twitza tuʼn t-xi tbʼitzina tnejel bʼitz. Qʼuqli qkʼuʼj tiʼj qa in jaw nimsaʼn tbʼi Jehová aj tbʼant jun Ja te Chmabʼil. Noqtzun tuʼnj, mlay ten te jumajx. Atzun te aqʼuntl in bʼant quʼn tuʼn qonin kyiʼj erman, jaku ten te jumajx ex in jaw tnimsaʼn tbʼi Jehová. Ex atztoq in ximen apóstol Pablo tiʼj construcción tej tkubʼ ttzʼibʼin 1 Tesalonicenses 5:11 (uʼjinktza).
2. ¿Tiʼ kʼelel qnikʼ tiʼj toj xnaqʼtzbʼil lu?
2 Tuʼn tel qnikʼ tiʼj tzeʼn tuʼn qonin kyiʼj erman, jaku tzʼel qkanoʼn tiʼj tbʼanel techel kyaj tqʼoʼn apóstol Pablo qwitz. In neltoq tnikʼ tiʼjju in kubʼ kynaʼn txqantl. Toj xnaqʼtzbʼil lu, kʼelel qnikʼ tiʼj tzeʼn onin Pablo kyiʼj erman tej kyok weʼ kywitz ambʼil kwest, tzeʼn onin kyiʼj tej ttzaj nya bʼaʼn kyxol ex tzeʼn onin kyiʼj tuʼn tchʼiy qʼuqbʼil kykʼuʼj tiʼj Jehová. Qo xnaqʼtzan tiʼj tzeʼn jaku tzʼel qkanoʼn techel kyaj tqʼoʼn (1 Cor. 11:1).
ONIN PABLO KYIʼJ ERMAN KYOJ AMBʼIL KWEST
3. ¿Tiʼ t-ximbʼetz Pablo ten tiʼj aqʼuntl ex tiʼj tajbʼebʼil te Jehová?
3 Kʼujlaʼn qetoq erman tuʼn Pablo. Tuʼnju otoq tzʼok weʼ kywitz ambʼil kwest ik tzeʼn kye erman, jakutoq tzʼel tnikʼ kyiʼj. Toj jun ambʼil, ya mintiʼ kanun tpwaq Pablo ex ok ten aqʼunal tuʼntzun tkanet aju at tajbʼen te ex kye tukʼil (Hech. 20:34). Aqʼunan Pablo tuʼn kybʼinchet ja xbʼalun. Tej tpon toj tnam Corinto, aqʼunan tukʼil Áquila ex Priscila tuʼnju ax aqʼuntl bʼant kyuʼn. Pero «tkyaqil qʼij te ojlabʼl» el tpaʼn ambʼil tuʼn tpakbʼan kye judiy ex kye xjal te Grecia. Ex tej tpon Silas ex Timoteo tukʼil, «bʼiʼx xi tqʼon tibʼ Pablo tuʼn tpakbʼan tiʼj tyol Dios» (Hech. 18:2-5). Tuʼn jlu, in nel qnikʼ tiʼj qa mas ok tqʼoʼn Pablo toklen tajbʼebʼil te Jehová. Tuʼnju ok tilil tuʼn Pablo tuʼn taqʼunan ex tuʼn tpakbʼan, jakutoq txi tqʼamaʼn kye erman tuʼn miʼn tok kyqʼoʼn kywiʼ tiʼj aqʼuntl ex kyiʼj nya bʼaʼn e ok weʼ twitz. Sino mastoq bʼaʼn tuʼn tok kyqʼoʼn kywiʼ tiʼj kyajbʼebʼil te Jehová (Filip. 1:10).
4. ¿Tzeʼn onin Pablo ex Timoteo kyiʼj erman tuʼn tikʼx ikʼbʼil kyuʼn?
4 Tej tzmatoq in xi tzyet tuʼn tten congregación toj tnam Tesalónica, e ok weʼ erman twitz ikʼbʼil. Kubʼ kyximen junjun xjal tuʼn tok kybʼinchaʼn nya bʼaʼn tiʼj Pablo ex tiʼj Silas, pero tuʼnju mintiʼ e kanet kyuʼn, «tzaj kyjawoʼn [...] junjun erman» ex xi «kyiʼn kywitz aj sanjelal tuj tnam». In kyqʼamaʼntoq jlu: «Kykyaqil qe jlu mintiʼ in xi kyniman tley gobierni» (Hech. 17:6, 7). Nimlo e tzaj xobʼ erman lu tej kyel ikʼun kyuʼn xjal ex jakutoq tzaj nya bʼaʼn tiʼj kyamiwbʼil tukʼil Jehová. Pero nyatoq taj Pablo tuʼn tbʼaj jlu. Tuʼntzunju, ok tilil tuʼn tukʼil Silas tuʼn kyok xqʼuqit erman maske mintiʼ e kyaj ten kyukʼil. Tej tikʼ ambʼil, xi tqʼamaʼn Pablo jlu kye okslal te Tesalónica: «Xi qsamaʼne qerman Timoteo kyukʼile tuʼntzun kykyuwsanjtze tuʼn ex tuʼn t-xi qʼot kynabʼle tuj kyokslabʼle [...]. Xi qsamaʼne tuʼn miʼn tel tzpet kynabʼle tuʼn tlaj ju yajbʼil kyeye» (1 Tes. 3:2, 3). Axlo ikx te Timoteo ok weʼ twitz nya bʼaʼn tej in nanqʼintoq toj tnam Listra. Noqtzun tuʼnj, otoq tzʼok tqʼoʼn twitz tiʼj tzeʼn onin Pablo kyiʼj erman toj tnam aju ex tzeʼn onin Jehová kyiʼj. Tuʼntzunju, jakutoq txi tqʼamaʼn kye erman tuʼn miʼn ttzaj bʼaj kykʼuʼj (Hech. 14:8, 19-22; Heb. 12:2).
5. ¿Tzeʼn onin tiʼj Bryant tej tonin jun ansyan tiʼj?
5 ¿Tiʼ mas bʼant tuʼn Pablo tuʼn tonin kyiʼj erman? Tej tmeltzʼaj Pablo ex Bernabé toj tnam Listra, Iconio ex Antioquía, ok «kyqʼoʼn kyoklen anciano kyxol okslal tuj junjun tnam» (Hech. 14:21-23). Nimlo e onin ansyan lu kyiʼj congregación toj ambʼil aju, ik tzeʼn in bʼant kyuʼn ansyan toj ambʼil jaʼlo. Qbʼinx tiʼ tqʼama jun ermano Bryant tbʼi. Tqʼama jlu: «Tej njapune twi 15 abʼqʼi, o kyaj koline tuʼn nmane. Nya oʼkxju, ax ikx ex expulsarin ntxuʼye. Kubʼ nnaʼne nim bʼis ex qa njunalxe atine». ¿Tiʼ onin tiʼj Bryant toj ambʼil lu? Tqʼamatl jlu: «Kukxtoq in chin yoline tukʼil jun ansyan Tony tbʼi kyoj chmabʼil ex kyoj junjuntl ambʼil. Tzaj tqʼamaʼn weye tiʼ bʼant kyuʼn junjun erman tuʼntzun kukx kytzalaj tej kyok weʼ kywitz nya bʼaʼn. Jaw tuʼjin Salmo 27:10 weye ex nim maj yolin tiʼj Ezequías wukʼile. Tzaj tnaʼn weye qa kukx ajbʼen Ezequías te Jehová maske mintiʼ kubʼ tqʼoʼn tman jun tbʼanel techel twitz». ¿Tzeʼn onin jlu tiʼj Bryant? In tzaj tqʼamaʼntl jlu: «Tuʼnju tzaj tqʼuqbʼaʼn Tony nkʼuʼje, kubʼ nximane tuʼn wajbʼene te Jehová toj tkyaqil ambʼil ex in chin tzalaje tuʼn jlu». Aqeye ansyan, qa taj jun erman onbʼil ik tzeʼn te Bryant, jaku t-xi kyqʼamaʼne jun «yol bʼaʼnxix» te (Prov. 12:25).
6. ¿Tiquʼn yolin Pablo kyiʼj tmajen Jehová e anqʼin toj ambʼil ojtxe?
6 Xi tnaʼn Pablo kye erman qa otoq tzikʼx nim nya bʼaʼn kyuʼn «nim kyajlal testiw» tuʼnju otoq tzaj tqʼoʼn Jehová kyipumal (Heb. 12:1). El tnikʼ Pablo tiʼj qa jakutoq tzʼonin tbʼanel techel kubʼ kyqʼoʼn tmajen Jehová lu kyiʼj erman tuʼn kukx kyajbʼen te (Heb. 12:22). Ax ikx, jaku che onin tbʼanel techel lu qiʼj. ¿Ope tzʼonin tiʼja aju tbʼanel techel kubʼ tqʼoʼn Gedeón, Barac, David, Samuel ex junjuntl? (Heb. 11:32-35). Ax ikx, jaku tzʼonin qiʼj aju tbʼanel techel in kubʼ kyqʼoʼn erman toj ambʼil jaʼlo. O pon kysamaʼn erman junjun carta toj kytxuylal ninja qʼil twitz aqʼuntl jatumel in tzaj kyqʼamaʼn qa o tzʼonin kyiʼj aju tbʼanel techel in kubʼ kyqʼoʼn erman in che yolin quʼj tiʼj.
KUBʼ TQʼOʼN PABLO JUN TBʼANEL TECHEL EX ONIN TUʼN TTEN MUJBʼABʼIL
7. ¿Tiʼ xnaqʼtzbʼil jaku tzʼel qiʼn tiʼjju tqʼama Pablo toj Romanos 14:19 a 21?
7 Ax ikx jaku qo onin kyiʼj erman aj tok tilil quʼn tuʼn tten mujbʼabʼil qxol. Mintiʼ in xi qqʼoʼn ambʼil tuʼn tnaj mujbʼabʼil qxol noq tuʼnju junxitl qximbʼetz kywitz erman ex mas qa mintiʼ in che ikʼ kyibʼaj tkawbʼil Jehová. Qo yolin tiʼjju bʼaj toj congregación te Roma jatumel ok kychmon kyibʼ okslal judiy ex te junjuntl tnam. Tuʼnju ya otoq tzeʼl qʼiʼn toklen Tley Moisés, jakutoq txi kywan junjuntl wabʼj (Mar. 7:19). Kubʼ kynaʼn junjun okslal judiy bʼaʼn tej t-xi kywaʼn junjun wabʼj, atzun junjuntl nya bʼaʼn ela toj kywitz. Tuʼntzunju, ten pabʼil kyxol okslal. Xi tnaʼn Pablo kye qa nim toklen tuʼn tten mujbʼabʼil kyxol tej t-xi tqʼamaʼn jlu kye: «Bʼaʼn tuʼn miʼn t-xi tchyoʼna chibʼj ex tuʼn miʼn t-xi tkʼaʼna vin ex mi jun tuʼn tbʼinchanteya aju jaku jaw tolj termaniya tuʼn» (kjawil uʼjit Romanos 14:19-21). Kyuʼn yol lu, xi tnaʼn Pablo kye qa jakutoq tzaj nya bʼaʼn kyiʼj ex tiʼj congregación qa kukx ma bʼant jlu kyuʼn. Ax ikx te Pablo bʼant junjun chʼixpubʼil tuʼn tuʼntzun kukx tten mujbʼabʼil kyxol erman (1 Cor. 9:19-22). Ik tzeʼn bʼant tuʼn Pablo, jaku qo onin tuʼn tten mujbʼabʼil kyxol erman qa mintiʼ ma qo yolin nya bʼaʼn tiʼjju in bʼant tuʼn teyele junjun kye.
8. ¿Tiʼ bʼant tuʼn Pablo tej ttzaj nya bʼaʼn toj congregación?
8 ¿Yajtzun qa junxitl qximbʼetz kyiʼj junjun tiʼ nim kyoklen? Jaku tzʼel qkanoʼn tiʼj techel kyaj tqʼoʼn Pablo tuʼntzun kukx tten mujbʼabʼil qxol. Toj congregación ten toj tnejel syent abʼqʼi, kubʼ kyximen junjun okslal qa iltoq tiʼj tuʼn tkubʼ kycircuncidarin kyibʼ qe akʼaj okslal te junjuntl tnam tuʼntzun miʼn kyyolin xjal nya bʼaʼn kyiʼj (Gál. 6:12). Maske nya bʼaʼn ela jlu toj twitz Pablo, mintiʼ xi tqʼamaʼn tex t-ximbʼetz. Sino kubʼ tin tibʼ ex jyon onbʼil kyukʼil apóstol ex qe ansyan toj Jerusalén (Hech. 15:1, 2). Tej tbʼant jlu tuʼn Pablo, onin tuʼn tten mujbʼabʼil ex tzalajbʼil toj congregación (Hech. 15:30, 31).
9. ¿Tiʼ jaku bʼant quʼn tuʼn tel qkanoʼn techel kyaj tqʼoʼn Pablo?
9 Qa ma tzaj jun nya bʼaʼn qxol kyukʼil erman, jaku qo onin tuʼn tten mujbʼabʼil aj qjyon onbʼil kyukʼil erman o tzaj tqʼoʼn Jehová kyoklen toj congregación. Chʼixme tkyaqil maj, jaku kanet onbʼil quʼn kyoj quʼj ex qe tqanil in che tzaj tqʼoʼn ttnam Jehová ex atz in che jatz toj Tyol Dios. Qa ma txi qbʼiʼn tkyaqilju in tzaj kyqʼamaʼn uʼj lu ex qa mintiʼ ma txi qqʼamaʼn qex qximbʼetz, jaku qo onin tuʼn tten mujbʼabʼil toj congregación.
10. ¿Tiʼ juntl tiʼ bʼant tuʼn Pablo tuʼn tten mujbʼabʼil toj congregación?
10 Ax ikx bʼant juntl tiʼ tuʼn Pablo tuʼntzun kukx tten mujbʼabʼil toj congregación. Ok tqʼoʼn twitz tiʼj tbʼanel kymod erman ex nya tiʼj kypaltil. Jun techel, tej tkubʼaj tcarta kye okslal te Roma, tqʼama junjun tbʼanel yol kyiʼj junjun ermano ex ermana. ¿Tzeʼn jaku tzʼel qkanoʼn tiʼj techel kyaj tqʼoʼn Pablo? Jaku bʼant quʼn aj qyolin kyiʼj tbʼanel kymod erman. Aj tbʼant jlu quʼn, in qo onin tuʼn tchʼiy kʼujlabʼil kyxol erman ex tuʼn tok kyamiwen kyibʼ.
11. ¿Tiʼ jaku bʼant quʼn tuʼn tten mujbʼabʼil aj ttzaj jun nya bʼaʼn qxol kyukʼil erman?
11 At maj jakulo tzaj nya bʼaʼn kyxol erman o che chʼiy toj kyokslabʼil, axpe ikx jaku che ok ten ilil kyxolx. Atzun jlu bʼaj tiʼj Pablo ex Bernabé maske kyamiw kyibʼ. Tzaj kyqʼoj tuʼnju nyatoq taj Pablo tuʼn t-xi kyiʼn Marcos kyukʼil toj juntl tnam. ¿Tiʼtzun bʼaj? In tzaj tqʼamaʼn Tyol Dios jlu: «Jaw jun yol kyuw kyxolx, kyjaʼtzun kubʼ kypaʼn kyibʼ» (Hech. 15:37-39). Noqtzun tuʼnj, xi tbʼinchaʼn Pablo, Bernabé ex Marcos tiʼj nya bʼaʼn tzaj kyxol. Tuʼn jlu, kubʼ kyyekʼin qa nimtoq toklen toj kywitz tuʼn tten mujbʼabʼil toj congregación. Tej tikʼ ambʼil, yolin Pablo bʼaʼn tiʼj Bernabé ex Marcos (1 Cor. 9:6; Col. 4:10). Ax jlu tuʼn tbʼant quʼn qa ma tzaj jun nya bʼaʼn qxol kyukʼil erman, nim toklen tuʼn t-xi qbʼinchaʼn tiʼj ex tuʼn tok qqʼoʼn qwitz kyiʼj tbʼanel kymod. Qa ma bʼant jlu quʼn, qo onil tuʼn tten mujbʼabʼil (Efes. 4:3).
ONIN PABLO KYIʼJ ERMAN TUʼN TCHʼIY QʼUQBʼIL KYKʼUʼJ
12. ¿Alkye junjun nya bʼaʼn in che ok weʼ erman twitz toj ambʼil jaʼlo?
12 Ax ikx in qo onin kyiʼj erman aj qonin kyiʼj tuʼn tchʼiy qʼuqbʼil kykʼuʼj tiʼj Jehová. Ateʼ junjun erman in che el ikʼun kyuʼn toj kyja mintiʼ in che ajbʼen te Jehová moqa kyuʼn xjal toj aqʼuntl ex toj escuela. Atzun junjuntl, o tzaj jun yabʼil kyiʼj moqa in che bʼisun. Ex ateʼ junjuntl ma tzikʼ ambʼil kybautisarin ex kukx in che ayon tuʼn tpon ambʼil tuʼn tul xitbʼil. Qa ma bʼaj jlu tiʼj jun okslal, jaku tzʼok qʼuqbʼil tkʼuʼj toj malbʼil. Chʼixme aʼyex nya bʼaʼn lu e ok weʼ okslal twitz toj tnejel syent abʼqʼi. ¿Tiʼ bʼant tuʼn Pablo tuʼn tonin kyiʼj?
¿Tzeʼn jaku tzʼel qkanoʼn tiʼj apóstol Pablo tuʼntzun qonin kyiʼj erman? (Qʼonka twitza kyiʼj párrafo 13). *
13. ¿Tzeʼn onin Pablo kyiʼj erman i el ikʼun tuʼn tpaj kyokslabʼil?
13 Ajbʼen Tyol Dios tuʼn Pablo tuʼn tonin kyiʼj erman tuʼn tchʼiy qʼuqbʼil kykʼuʼj. Jun techel, mintiʼlo el kynikʼ junjun okslal judiy tiʼj tzaqʼwebʼil tuʼn t-xi kyqʼoʼn kye kyfamiliar tej ttzaj kyqʼamaʼn kye qa mas nim toklen kyokslabʼil judiy twitz kyokslabʼil t-xnaqʼtzbʼen Jesús. Nimlo onin kyiʼj aju carta xi ttzʼibʼin Pablo kye okslal Hebreo (Heb. 1:5, 6; 2:2, 3; 9:24, 25). ¿Tiquʼn? Tuʼnju jakutoq che ajbʼen tyol Pablo kyuʼn tuʼn t-xi kyqʼoʼn jun tbʼanel tzaqʼwebʼil kye kyfamiliar. Yajtzun qe, ¿tiʼ jaku bʼant quʼn tuʼn qonin kyiʼj erman in che xmayin txqantl kyiʼj? Jaku qo onin kyiʼj tzeʼn tuʼn kyajbʼen uʼj kyuʼn tuʼn t-xi kyqʼoʼn jun tbʼanel tzaqʼwebʼil. Jun techel, qa qaj tuʼn qonin tiʼj jun kuʼxun tuʼn tel tnikʼ tiʼj tzeʼn tuʼn t-xi tchikʼbʼaʼn qa o qo kubʼ bʼinchaʼn, jaku che ajbʼen folleto quʼn ¿Es la vida obra de un Creador? ex El origen de la vida. Cinco cuestiones dignas de análisis.
¿Tzeʼn jaku tzʼel qkanoʼn tiʼj apóstol Pablo tuʼntzun qonin kyiʼj erman? (Qʼonka twitza kyiʼj párrafo 14). *
14. ¿Tiʼ bʼant tuʼn Pablo maske iltoq tiʼj tuʼn tpakbʼan ex tuʼn tqʼon xnaqʼtzbʼil?
14 Xi tqʼamaʼn Pablo kye erman tuʼn tkubʼ kyyekʼin kykʼujlabʼil tukʼil kybʼinchbʼen (Heb. 10:24). Nya oʼkx onin kyiʼj erman tukʼil tyol, sino ax ikx tukʼil tbʼinchbʼen. Jun techel, tej ttzaj weʼyaj toj tnam Judea, onin Pablo tuʼn t-xi qʼet kywa erman (Hech. 11:27-30). Nya oʼkxju, ax ikx el tpaʼn ambʼil tuʼn tonin kyiʼj erman nya nim tiʼchaq at kye maske iltoq tiʼj tuʼn tpakbʼan ex tuʼn tqʼon xnaqʼtzbʼil (Gál. 2:10). Tej tbʼant jlu tuʼn, onin kyiʼj erman tuʼn tok qeʼ kykʼuʼj tiʼj qa kxqʼuqil Jehová kyiʼj. Yajtzun qe, ¿tzeʼn jaku qo onin kyiʼj erman tuʼn tchʼiy qʼuqbʼil kykʼuʼj? Jaku qo onin kyiʼj aj tel qpaʼn ambʼil ex qipumal aj ttzaj jun xitbʼil ex aj t-xi qqʼoʼn pwaq te oyaj tiʼj aqʼuntl in bʼant twitz tkyaqil Txʼotxʼ. Qa ma bʼant jlu quʼn, jaku qo onin kyiʼj erman tuʼn tok qeʼ kykʼuʼj tiʼj qa mlayx che kyaj kolin tuʼn Jehová.
¿Tzeʼn jaku tzʼel qkanoʼn tiʼj apóstol Pablo tuʼntzun qonin kyiʼj erman? (Qʼonka twitza kyiʼj párrafo 15 ex 16). *
15, 16. ¿Tiʼ qmod kbʼel qyekʼin kyukʼil erman ya mintiʼ in nok tilil kyuʼn?
15 Kukx xi tqʼuqbʼaʼn Pablo kykʼuʼj qeju ya mintiʼtoq in nok tilil kyuʼn. Tzaj qʼaqʼin tkʼuʼj Pablo kyiʼj ex yolin tukʼil kʼujlabʼil kyukʼil (Heb. 6:9; 10:39). Jun techel, mintiʼ xi tqʼamaʼn Pablo kye okslal Hebreo qa oʼkx kye tuʼn t-xi kybʼiʼn consej xi tqʼoʼn kye, sino kubʼ ttzʼibʼin qa ax ikx te iltoq tiʼj tuʼn t-xi tbʼiʼn consej (Heb. 2:1, 3). Ik tzeʼn bʼant tuʼn Pablo, ax ikx qe bʼaʼn tuʼn kukx qonin kyiʼj erman ya mintiʼ in nok tilil kyuʼn toj kyajbʼebʼil te Jehová. In bʼant jlu quʼn, aj tkubʼ qyekʼin qa in qo ximen kyiʼj ex qa kʼujlaʼn qe quʼn. Nim kyoklen yol kxel qqʼamaʼn kye erman, pero mas nim toklen qa ma t-xi qqʼamaʼn tukʼil kʼujlabʼil.
16 Xi tqʼamaʼn Pablo kye okslal qa kukx naʼn kybʼinchbʼen tuʼn Jehová (Heb. 10:32-34). Chʼixme ax jlu jaku bʼant quʼn aj tok tilil quʼn tuʼn qonin tiʼj jun erman ya mintiʼ in nok tilil tuʼn. Jaku txi qqanin te tuʼn ttzaj tqʼamaʼn tzeʼn ok tojtzqiʼn axix tok moqa tuʼn qonin tiʼj tuʼn ttzaj tnaʼn junjun ambʼil tej tonin Jehová tiʼj. Aj ttzaj tqʼamaʼn qe, qqʼonk tilil tuʼn tajbʼen ambʼil lu quʼn tuʼn t-xi qnaʼn te qa mintiʼ o tzikʼ tnaʼl taqʼunbʼen tuʼn Jehová ex qa mlay kyaj kolin tuʼn toj ambʼil tzul (Heb. 6:10; 13:5, 6). Qa ma bʼant jlu quʼn, jaku qo onin kyiʼj erman tuʼn kukx kyajbʼen te Jehová.
«KYKYUWSAM KYNABʼLE KYXOLXE»
17. ¿Tiʼ jaku bʼant quʼn tuʼn t-xi qqʼoʼn jun tbʼanel onbʼil kye erman?
17 Aj tikʼ ambʼil, mas tbʼanel taqʼun jun albañil in bʼant. Ax ikx qe, mas tbʼanel jaku txi qqʼuqbʼaʼn kykʼuʼj erman aj tikʼ ambʼil. Jaku qo onin kyiʼj erman tuʼn tikʼx nya bʼaʼn kyuʼn aj qyolin kyukʼil kyiʼj tbʼanel techel o kubʼ kyqʼoʼn tmajen Jehová. Ax ikx, qqʼonk tilil tuʼn tten mujbʼabʼil qxol aj qyolin kyiʼj tbʼanel tiʼchaq in bʼant kyuʼn txqantl. Nya oʼkxju, ax ikx bʼaʼn tuʼn tok qxqʼuqin mujbʼabʼil qa chʼix tnaj ex qqʼonk tilil tuʼn miʼn tnaj aj ttzaj jun nya bʼaʼn. Ex kukx qo onin kyiʼj erman tuʼn tchʼiy qʼuqbʼil kykʼuʼj aj qyolin kyukʼil kyiʼj xnaqʼtzbʼil nim kyoklen toj Tyol Dios, aj t-xi qqʼoʼn onbʼil kye ex aj qonin kyiʼj qeju ya mintiʼ in nok tilil kyuʼn toj kyajbʼebʼil te Jehová.
18. ¿Tiʼ taja tuʼn tbʼant tuʼna?
18 In kubʼ kynaʼn erman tzalajbʼil aj kyonin tuʼn tjaw bʼinchet jun Ja te Chmabʼil. Ax ikx qe, in kubʼ qnaʼn tzalajbʼil aj qonin kyiʼj erman tuʼn kychʼiy toj kyokslabʼil. Aj tikʼ ambʼil jaku naj jun ja, atzun onbʼil in xi qqʼoʼn kye erman jaku ten te jumajx. Tuʼntzunju, tzʼok tilil quʼn tuʼn t-xi qbʼin aju in tzaj tqʼamaʼn 1 Tesalonicenses 5:11, jatumel in tzaj tqʼamaʼn jlu: «Kyqʼom kynabʼle kyxolxe ex kykyuwsam kynabʼle kyxolxe».
BʼITZ 100 Qbʼincham xtalbʼil kyiʼj txqantl
^ Qkyaqilx in qo ok weʼ kywitz nim nya bʼaʼn toj ambʼil jaʼlo. ¿Tiʼ jaku bʼant quʼn tuʼn tbʼaj qonin qibʼ qxolx? Qo xnaqʼtzan tiʼj techel kyaj tqʼoʼn apóstol Pablo tuʼn tel qnikʼ tiʼj.
^ TQANIL KYIʼJ TILBʼILAL: In xi tqʼamaʼn jun mambʼaj te tmeʼjel tzeʼn tuʼn t-xi tbʼinchaʼn aju in tzaj tqʼamaʼn jun uʼj tuʼntzun miʼn tkubʼ tikʼsaʼn Navidad.
^ TQANIL KYIʼJ TILBʼILAL: In nonin jun mejebʼleʼn kyiʼj erman jatumel otoq tzaj jun xitbʼil.
^ TQANIL KYIʼJ TILBʼILAL: Ma pon jun ansyan visitaril te jun erman ya mintiʼ in nok tilil tuʼn toj tajbʼebʼil te Jehová. In xi tyekʼin ansyan junjun foto te tiʼj ambʼil tej kyten toj Xnaqʼtzbʼil kye Pakbʼal toj tkyaqil Ambʼil. In che tzalaj aj tok kykeʼyin qe foto. Aj ttzaj tnaʼn erman ambʼil lu, taj tuʼn tkubʼ tnaʼn juntl maj tzalajbʼil toj tajbʼebʼil te Jehová. Aj tikʼ ambʼil, in meltzʼaj juntl maj toj congregación.
