1. ¿Tiʼ o bʼant kyuʼn nim kuʼxun?

 TKYAQIL abʼqʼi in che bautisarin nim kuʼxun. ¿Atpe teya kyxol? Qa ikju, in che tzalaj erman tiʼja, ax ikx te Jehová (Prov. 27:11). Ximana tiʼj tkyaqilju o bʼant tuʼna. Jun techel, olo xnaqʼtzana tiʼj Tyol Dios toj nimku abʼqʼi ex o tzʼel tnikʼa tiʼj qa ax tok aju in tzaj tqʼamaʼn. Pero aju mas nim toklen, o tzʼok tojtzqiʼna ex o tzʼok tkʼujlaʼna Jehová. Tuʼntzunju, xi ttziyena tuʼn tajbʼena te ex tuʼn tbautisarina. ¡Tbʼanel tuʼnju bʼant jlu tuʼna!

2. ¿Tiʼ kʼelel qnikʼ tiʼj toj xnaqʼtzbʼil lu?

 ² Tej naʼmxtoq tbautisarina, oklo weʼya twitz junjun nya bʼaʼn. Pero kukx kʼokel weʼya kywitz junjuntl aj tbʼet ambʼil. Kukx kʼokel tilil tuʼn Satanás tuʼn tchewix tkʼujlabʼila tiʼj Jehová ex tuʼn tel tpan tibʼa tiʼj (Efes. 4:14). Miʼn txi tqʼoʼna ambʼil te Satanás tuʼn tkubʼ tiʼja tuʼn. ¿Tiʼ jaku tzʼonin tiʼja tuʼn ttena tzʼaqli twitz Jehová ex tuʼn tjapun twi tyola o txi ttziyena te? Jaku tzʼok tilil tuʼna tuʼn tchʼiya toj tokslabʼila moqa tuʼn tokxix tnabʼila (Heb. 6:1). Toj xnaqʼtzbʼil lu, kʼelel qnikʼ tiʼj tzeʼn jaku bʼant tuʼna.

3. ¿Tiʼ il tiʼj tuʼn tbʼant quʼn otoqxi qo bautisarin?

³ Aj tbautisarin jun xjal, nim toklen tuʼn t-xi tbʼiʼn consej xi tqʼoʼn apóstol Pablo kye okslal te Éfeso. Xi tqʼamaʼn kye «tuʼn ttzʼaqet-xix» kynabʼil toj kyokslabʼil (Efes. 4:13). Toj juntl yol, xi tqʼamaʼn kye tuʼn kukx tok tilil kyuʼn. Tqʼama Pablo qa in nok qajbʼebʼil te Jehová ik tzeʼn aj tchʼiy jun kʼwal. In che tzalaj mambʼaj tiʼj jun kykʼwal aj tul itzʼj,  pero aj tbʼet ambʼil il tiʼj tuʼn tchʼiy. Ex kpol ambʼil tuʼn tkyaj ttzaqpiʼn «aju in kybʼinchaʼn kʼwaʼl» (1 Cor. 13:11). Chʼixmi ax jlu in bʼaj toj qajbʼebʼil te Jehová, nim toklen tuʼn kukx qchʼiy toj qokslabʼil otoqxi qo bautisarin. Qo xnaqʼtzan kyiʼj junjun nabʼil jaku che onin tiʼja.

4. ¿Tiʼ kʼonil tiʼja tuʼn tchʼiya toj tokslabʼila ex tiquʼn? (Filipenses 1:9).

⁴ Chʼiysama tkʼujlabʼila tiʼj Jehová. Ya in kubʼ tyekʼina qa kʼujlaʼn Jehová tuʼna, pero jaku bʼant junjuntl tiʼchaq tuʼna tuʼn kukx tchʼiy tkʼujlabʼila tiʼj. ¿Tiʼ jaku bʼant tuʼna? Yolin Pablo tiʼj jun tumel ex in kanet quʼn toj Filipenses 1:9 (uʼjinktza). Xi tqanin Pablo te Jehová «tuʼn tten mas» kykʼujlabʼil okslal te Filipos. Tuʼn jlu, in nel qnikʼ tiʼj qa jaku chʼiy qkʼujlabʼil tiʼj Dios. Pero tuʼn tbʼant jlu, nim toklen tuʼn tten mas qnabʼil ex tuʼn telxix qnikʼ tiʼj tkyaqil. Toj juntl yol, qa mas in nok qojtzqiʼn Jehová, mas in nok qkʼujlaʼn, mas tbʼanel in che ela tmod toj qwitz ex tzeʼn in che bʼant qe tiʼchaq tuʼn. Tuʼntzunju, nya qaj tuʼn ttzaj tbʼis ex in nok tilil quʼn tuʼn tel qnikʼ tiʼjju tajbʼil tuʼn tbʼant quʼn ex in xi qbʼinchaʼn.

5, 6. ¿Tiʼ juntl tiʼ jaku bʼant quʼn tuʼn tchʼiy qkʼujlabʼil tiʼj Jehová?

⁵ Ax ikx, jaku tzʼonin qiʼj tuʼn tchʼiy qkʼujlabʼil tiʼj Jehová aj tok qojtzqiʼn Tkʼwal. ¿Tiquʼn in xi qqʼamaʼn jlu? Tuʼnju kubʼ tyekʼin Jesús qe tbʼanel tmod Tman (Heb. 1:3). ¿Tiʼtzun jaku tzʼonin qiʼj tuʼn tok qojtzqiʼn Jesús? Jaku tzʼonin qiʼj qa ma qo xnaqʼtzan kyiʼj uʼj in che yolin tiʼj tanqʼibʼil. ¿In jawpe tuʼjina Tyol Dios tkyaqil qʼij? Qa mintiʼ in bʼant tuʼna, jaku txi tzyet tuʼn tuʼjina tiʼj. Aj tjaw tuʼjina aju bʼant tuʼn Jesús ex aju kyaj tqʼamaʼn, ximana tiʼj alkyeqe tbʼanel tmod kubʼ tyekʼin. Nyatoq kwest tuʼn kyyolin txqantl tukʼil ex tzaj tchleʼn qe kʼwal (Mar. 10:13-16). Ax ikx, mintiʼ e tzaj xobʼ t-xnaqʼtzbʼen tej kyten tukʼil ex nya kwest ela toj kywitz tuʼn t-xi kyqʼamaʼn te aju kubʼ kynaʼn (Mat. 16:22). Bʼant tkyaqil jlu tuʼn Jesús tuʼnju el tkanoʼn qe tbʼanel tmod Jehová. Tuʼntzunju, jaku txi qqʼamaʼn qa taj Jehová tuʼn t-xi qqʼamaʼn tkyaqilju tkuʼx toj qanmi aj qnaʼn Dios te. Ex jaku tzʼok qeʼ qkʼuʼj tiʼj qa mlay ten nya bʼaʼn t-ximbʼetz qiʼj. Kʼujlaʼn qoʼ tuʼn ex in ximen qiʼj (1 Ped. 5:7).

⁶ Tzaj qʼaqʼin tkʼuʼj Jesús kyiʼj xjal. Tqʼama apóstol Mateo jlu: «Tejtzun tkeʼyinte Jesús nim xjal, tzaj qʼaqʼan tkʼuʼj kyiʼj; tuʼnju otoq che sikt ex in che bʼisun, ik kyten ik tzaʼn qe ẍneʼl mintiʼ pastoril kye» (Mat. 9:36). Yajtzun te Jehová, ¿tiʼ t-ximbʼetz at kyiʼj xjal? Tqʼama Jesús jlu tiʼj: «Myatzun tajbʼil tuʼn tnaj jun kye qeju tal chʼin lu» (Mat. 18:14). ¡In kubʼ qnaʼn nimxix tzalajbʼil tuʼnju kʼujlaʼnxix qoʼ tuʼn Jehová! Qa mas ma tzʼok qojtzqiʼn Jesús, mas kʼokel qkʼujlaʼn Jehová.

7. ¿Tiquʼn bʼaʼn tuʼn tok tamiwin tibʼa kyukʼil erman o che chʼiy toj kyokslabʼil?

⁷ ¿Tiʼ mastl jaku bʼant tuʼna tuʼn tchʼiy tkʼujlabʼila tiʼj Jehová ex tuʼn tchʼiya toj tokslabʼila? Jaku tzʼok tamiwin tibʼa kyukʼil erman o che chʼiy toj kyokslabʼil. Bʼaʼn tuʼn tok tqʼoʼn twitza tiʼj qa kukx in che tzalaj erman lu ex mintiʼ in tzaj kybʼis tuʼnju in che ajbʼen te Jehová. Jaku txi tqanina kye tuʼn ttzaj kyqʼamaʼn teya alkye junjun tiʼ o tzikʼ toj kyanqʼibʼil. Ex aj tkubʼ t-ximana tuʼn tbʼant jun tiʼ tuʼna, bʼaʼn tuʼn t-xi tqanina junjun consej kye. Ax tok qe yol lu: «Qa at nimku xjal at kynabʼl, jaku klet tnam» (Prov. 11:14).

8. ¿Tiʼ jaku bʼant tuʼna qa ma jawje tkʼuʼja tiʼjju in tzaj tqʼamaʼn Tyol Dios?

 ⁸ Jyonxa tqanil tiʼjju in jawje tkʼuʼja tiʼj. Ik tzeʼn ma tzʼel qnikʼ tiʼj toj  párrafo 2, kʼokel tilil tuʼn Satanás tuʼn miʼn tchʼiya toj tokslabʼila. Tuʼntzunju, taj tuʼn miʼn tok qeʼ tkʼuʼja tiʼjju in tzaj tqʼamaʼn Tyol Dios. Jun techel, taj tuʼn t-xi tnimana xnaqʼtzbʼil tiʼj evolución. Tej naʼmxtoq tchʼiya, mintiʼlo ok tqʼoʼn twiʼya tiʼj jlu. Atzun jaʼlo, in tzajlo yekʼin xnaqʼtzbʼil lu teya toj escuela. Jakulo kubʼ t-ximana qa toj ttxolil aju in tzaj kyqʼamaʼn maestro. Pero bʼaʼn tuʼn ttzaj tnaʼna qa naʼmx tel kypaʼn ambʼil tuʼn tel kynikʼ tiʼj qa at jun Bʼinchal qe. Bʼaʼn tuʼn ttzaj tnaʼna aju in tzaj tqʼamaʼn Proverbios 18:17: «Aju xjal in pon nej twitz jwes tuʼn tklonte tibʼ, mer ik tzaʼnku mintiʼ til, ex ok tpon tajqʼoj nnoʼk tuj xjel tuʼn jwes, atzun in jaw tzʼaq twitz, tuʼnju in nikʼan yol». ¿Tiʼ xnaqʼtzbʼil jaku tzʼel tiʼna kyiʼj yol lu? Qa mintiʼ tuʼn t-xi tnimana tkyaqilju in tzaj xnaqʼtzaʼn teya toj escuela. Sino mas bʼaʼn tuʼn t-xnaqʼtzana tiʼjju in tzaj tqʼamaʼn Tyol Dios. Ax ikx jaku txi tjyoʼna tqanil kyoj uʼj o che etz tuʼn ttnam Jehová. Nya oʼkxju, ax ikx jaku yolina kyukʼil erman xi kynimen evolución toj ambʼil ojtxe ex jaku txi tqanina kye tiquʼn ok qeʼ kykʼuʼj tiʼj qa at jun Bʼinchal qe. * Aj tbʼant jlu quʼn, jaku tzʼonin qiʼj tuʼn tok qeʼ qkʼuʼj tiʼj qa at jun Bʼinchal qe.

9. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Melissa?

⁹ Nim o tzʼonin tiʼj jun ermana Melissa tbʼi tej t-xnaqʼtzan kyiʼj tbʼinchbʼen Dios. * In tzaj tqʼamaʼn jlu: «In nok tilil kyuʼn maestro tuʼn t-xi tnimana xnaqʼtzbʼil tiʼj evolución. Tnejel, nyatoq waje tuʼn njyone tqanil tuʼnju kubʼ nximane qa mlaytoq tzʼonin tiʼj qʼuqbʼil nkʼuʼje. Pero tzaj nnaʼne qa taj Jehová tuʼn tel qnikʼ tiʼj qa ax tok aju in tzaj tqʼamaʼn qe ex ok tilil wuʼne tuʼn njyone tqanil. Tuʼntzunju, jaw wuʼjine libro ¿Existe un Creador que se interese por nosotros? ex qe folleto ¿Es la vida obra de un Creador? ex El origen de la vida. Cinco cuestiones dignas de análisis. Nim onin  jlu wiʼje ex maswitlo bʼaʼn noqwit lwey njyone tqanil».

10, 11. ¿Tiʼ jaku tzʼonin tiʼja tuʼn tkubʼ tiʼj nya bʼaʼn t-ximbʼetza? (1 Tesalonicenses 4:3, 4).

¹⁰ Ikʼumela qe nya bʼaʼn ximbʼetz. Aj tokxa toj tkuʼxumala, mas in ximana kyiʼj qʼa moqa kyiʼj txin. Ex jakulo tzaj kyqʼamaʼn txqantl teya tuʼn tkubʼ tena kyukʼil. Taj Satanás tuʼn t-xi tbʼinchaʼna aju in kubʼ t-ximana. Pero ¿tiʼ jaku tzʼonin tiʼja tuʼn miʼn tkubʼ tiʼja tuʼn? (Kjawil uʼjit 1 Tesalonicenses 4:3, 4). Aj tnaʼna Dios te Jehová, qʼamanxa te tiʼ in kubʼ tnaʼna ex qaninxa tipumala te (Mat. 6:13). Miʼn tzikʼ tnaʼl tuʼna qa taj Jehová tuʼn tonin tiʼja ex mlay yolin nya bʼaʼn tiʼja (Sal. 103:13, 14). Ex jaku tzʼonin Tyol Dios tiʼja. Ok tilil tuʼn Melissa, aju ma qo yolin tiʼj toj párrafo ma kyaj, tuʼn tkubʼ tiʼj nya bʼaʼn t-ximbʼetz tuʼn. Tqʼama jlu: «Onin wiʼje tej wuʼjine tiʼj Tyol Dios tkyaqil qʼij. Tej tbʼant jlu wuʼne, tzaj nnaʼne qa a Jehová tajaw nchwinqlale ex qa waje tuʼn kukx tten ntxlaje» (Sal. 119:9).

¹¹ Mas bʼaʼn qa ma jyona onbʼil kyukʼil tmana aj tok weʼya kywitz nya bʼaʼn. Kwest in nela toj qwitz tuʼn t-xi qqʼamaʼn aju in bʼaj qiʼj, pero nim toklen tuʼn tbʼant jlu tuʼna. In tzaj tqʼamaʼn Melissa jlu: «Xi nqanine te Jehová tuʼn ttzaj tqʼoʼn wipumale tuʼn nyoline tukʼil nmane tiʼjju in bʼaj wiʼje. Kubʼ nnaʼne bʼaʼn tej tbʼant jlu wuʼne ex el nnikʼe tiʼj qa tzalaj Jehová wiʼje».

12. ¿Tiʼ jaku tzʼonin tiʼja tuʼn tjaw tskʼoʼna aju mas bʼaʼn?

¹² Qʼonxa ambʼil kye nabʼil tkuʼx toj Tyol Dios tuʼn kyonin tiʼja. Aj tbʼet ambʼil, mas tzul qʼoʼn ambʼil teya tuʼn tkubʼ t-ximana tiʼ kxel tbʼinchaʼna. Noqtzun tuʼnj, naʼmx tel tnikʼa kyiʼj junjun tiʼchaq. ¿Tiʼ jaku tzʼonin tiʼja tuʼn miʼn tkubʼ tbʼinchaʼna jun tiʼ jaku tzaj tiʼn nya bʼaʼn tiʼj tamiwbʼila tukʼil Jehová? (Prov. 22:3). Qbʼinx tiʼ bʼant tuʼn jun ermana Kari tbʼi tuʼn tjaw tskʼoʼn aju mas bʼaʼn. El tnikʼ tiʼj qa nya il tiʼj tuʼn tten jun ley tiʼj tkyaqilju in bʼant quʼn qa o qo chʼiy toj qokslabʼil. Tqʼama Kari jlu: «El nnikʼe tiʼj qa mas bʼaʼn tuʼn tel qnikʼ kyiʼj t-ximbʼetz Jehová twitzju tuʼn qok lepeʼ kyiʼj nim ley». Aj tuʼjina tiʼj Tyol Dios, bʼaʼn tuʼn tkubʼ t-xjelina jlu: «¿Tiʼ in tzaj tyekʼin texto lu weye tiʼj t-ximbʼetz Jehová? ¿Jakupe kanet jun nabʼil wuʼne toj texto lu aju jaku tzʼonin wiʼje tuʼn tkubʼ nbʼinchaʼne bʼaʼn? Qa ma kubʼ nbʼinchaʼne aju in nel nnikʼe tiʼj, ¿tiʼ jaku bʼaj?» (Sal. 19:7; Is. 48:17, 18). Qa ma ximana kyiʼj nabʼil tkuʼx toj Tyol Dios, mas nya kwest kʼelel toj twitza tuʼn t-xi tbʼinchaʼna aju bʼaʼn toj twitz Jehová. Aj tel mas tnikʼa kyiʼj t-ximbʼetz Jehová, nya il tiʼj tuʼn ttzaj qʼamaʼn teya tiʼ kxel tbʼinchaʼna. Ex iktzun tten in kubʼ tyekʼina qa in chʼiya toj tokslabʼila.

13. ¿Tzeʼn jaku che onin tbʼanel tamiwa tiʼja? (Proverbios 13:20).

¹³ Jyoma qe tamiwa kʼujlaʼn Jehová kyuʼn. Ik tzeʼn ma tzʼel qnikʼ tiʼj toj párrafo 7, jaku che onin tamiwa tiʼja tuʼn tchʼiya toj tokslabʼila (kjawil uʼjit Proverbios 13:20). Qo ximen tiʼjju bʼaj tiʼj jun ermana Sara tbʼi. Ya mintiʼtoq in tzalaj toj tajbʼebʼil te Jehová, pero onin jun tiʼ tiʼj. Tqʼama Sara jlu: «E kanet tbʼanel wamiwe toj ambʼil mas atxix tajbʼen weye. Tkyaqil seman o xnaqʼtzane tiʼj uʼj Aju Xqʼuqil tukʼil jun wamiwe ex onin juntl wiʼje tuʼn t-xi nqʼoʼne nyole kyoj chmabʼil. Tuʼnju e onin wamiwe wiʼje, mas ok nqʼoʼne toklen naʼj Dios ex nxnaqʼtzbʼile tiʼj  Biblia. Chebʼe chebʼe chʼiy wamiwbʼile tukʼil Jehová ex in tzalaje juntl maj».

14. ¿Tzeʼn e kanet tbʼanel tamiw Julien?

¹⁴ ¿Tiʼ jaku bʼant tuʼna tuʼn kykanet tbʼanel tamiwa? O tzʼok jun ermano Julien tbʼi te ansyan ex in tzaj tqʼamaʼn jlu: «Tej kuʼxun qine, ok wamiwen wibʼe kyukʼil erman toj pakbʼabʼil. In che tzalajtoq aj kypakbʼan ex e onin wiʼje tuʼn ntzalaje toj pakbʼabʼil. Kubʼ nximane tuʼn wajbʼene te Jehová toj tkyaqil ambʼil. Ax ikx, el nnikʼe tiʼj qa otoq t-xi nnajsaʼne ambʼil tuʼn kyten tbʼanel wamiwe tuʼnju oʼkx ok nmojbʼan wibʼe kyukʼil junjuntl kuʼxun. Ex tej wajbʼene toj Betel, ax ikx e ten tbʼanel wamiwe. E onin wiʼje tuʼn tel nnikʼe tiʼj alkyeqe saqchbʼil mas bʼaʼn ex onin jlu wiʼje tuʼn tchʼiy wamiwbʼile tukʼil Jehová».

15. ¿Tiʼ xi tqʼamaʼn apóstol Pablo te Timoteo? (2 Timoteo 2:20-22).

¹⁵ ¿Yajtzun qa ma tzʼel tnikʼa tiʼj qa at jun nya bʼaʼn amiw toj congregación? Toj tnejel syent abʼqʼi, el tnikʼ apóstol Pablo tiʼj qa ateʼ junjun okslal mintiʼ ten kyximbʼetz ik tzeʼn te Jehová. Tuʼntzunju, xi tqʼamaʼn te Timoteo tuʼn tel tpan tibʼ kyiʼj (kjawil uʼjit 2 Timoteo 2:20-22). Nim toklen qamiwbʼil tukʼil Jehová ex in xi tiʼn ambʼil tuʼn tchʼiy. Tuʼntzunju, miʼn t-xi qqʼoʼn ambʼil tuʼn tnaj (Sal. 26:4).

16. ¿Alkyeqe tiʼchaq jaku txi tbʼinchaʼna?

¹⁶ Bʼinchanxa qe tiʼchaq jaku che onin tiʼja. Jaku t-xi tbʼinchaʼna qe tiʼchaq in che onin tiʼja tuʼn tchʼiy qʼuqbʼil tkʼuʼja ex tuʼn toka te jun tbʼanel okslal (Efes. 3:16). Jun techel, jaku tzʼok tilil tuʼna tuʼn t-xnaqʼtzana tjunalxa ex tuʼn tuʼjina tiʼj Tyol Dios (Sal. 1:2, 3). Moqa jaku tzʼok tilil tuʼna tuʼn tnaʼna Dios tuʼn tkyaqil tanmiya. Bʼalo il tiʼj tuʼn tok t-xqʼuqina aju saqchbʼil in jaw tjyoʼna ex tuʼn tajbʼen ambʼil tuʼna toj tumel (Efes. 5:15, 16). Nimxix in tzalaj Jehová aj tok tqʼoʼn twitz tiʼj qa in nok tilil tuʼna tuʼn tchʼiya toj tokslabʼila.

17. ¿Tzeʼn jaku tzʼonin tiʼja qa ma tzʼonina kyiʼj txqantl?

¹⁷ Aj tonina kyiʼj txqantl, in nonin tiʼja tuʼn tchʼiya toj tokslabʼila. Tqʼama Jesús jlu: «Mas at tzalajbʼil kyeye qa at chʼin  ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye» (Hech. 20:35). Qa ma tzʼel tpaʼna ambʼil tuʼn tonina kyiʼj txqantl, ax ikx jaku tzʼonin tiʼja. ¿Tzeʼn jaku tzʼonina kyiʼj? Jun techel, jaku tzʼonina kyiʼj erman ma che tijen ex kyiʼj qeju at jun yabʼil kyiʼj tuʼn ttzaj laqʼet junjun tiʼchaq kye moqa tuʼn tel kynikʼ tiʼj tzeʼn tuʼn tajbʼen celular kyuʼn. Qa ermano teya ex qa o bautisarina, jaku kubʼ t-ximana tuʼn toka te onil kye ansyan tuʼntzun tajbʼena mas kye erman (Filip. 2:4). Ax ikx, jaku kubʼ tyekʼina tkʼujlabʼila kyiʼj xjal aj tyolina tiʼj tbʼanel tqanil kyukʼil (Mat. 9:36, 37). Ex qa jaku bʼant, jaku tzʼajbʼena te Jehová toj tkyaqil ambʼil.

18. Qa ma tzʼajbʼena toj tkyaqil ambʼil, ¿tzeʼn jaku tzʼonin tiʼja tuʼn tchʼiya toj tokslabʼila?

¹⁸ Aj tajbʼena toj tkyaqil ambʼil te Jehová, mas in nonin tiʼja tuʼn tchʼiya toj tokslabʼila. Qa ma tzʼoka te precursor, jaku tzaj qʼoʼn ambʼil teya tuʼn t-xiʼya toj Xnaqʼtzbʼil kye Pakbʼal tiʼj Tkawbʼil Dios, tuʼn tajbʼena toj Betel moqa tuʼn tonina tiʼj construcción. Tzaj tqʼamaʼn jun precursora jlu, aju Kaitlyn tbʼi: «Tej otoqxi chin bautisarine, nim onin wiʼje tuʼn nchʼiye toj wokslabʼile tej npakbʼane kyukʼil erman at nim kyojtzqibʼil. Tuʼnju kubʼ kyqʼoʼn jun tbʼanel techel nwitze, onin wiʼje tuʼn nxnaqʼtzane mas tiʼj Tyol Dios ex tuʼn tbʼant-xix nqʼone xnaqʼtzbʼil».

19. ¿Alkyeqe kʼiwlabʼil che ktzajel tkʼamoʼna qa kukx ma chʼiya toj tokslabʼila?

¹⁹ Qa kukx ma chʼiya toj tokslabʼila, ktzajel tkʼamoʼna nim kʼiwlabʼil ex mlay txi tnajsaʼna ambʼil kyiʼj tiʼchaq mintiʼ kyajbʼen (1 Juan 2:17). Ax ikx, mlay tzaj nim nya bʼaʼn tiʼja qa ma kubʼ tbʼinchaʼna aju mas bʼaʼn. Nya oʼkxku, ax ikx ktzalajela toj tanqʼibʼila (Prov. 16:3). Qa ma tzʼok tilil tuʼna, kʼonil techel in kubʼ tqʼoʼna kyiʼj txqantl kuʼxun ex kyiʼj erman ma che tijen (1 Tim. 4:12). Ex aju mas nim toklen, kbʼel tnaʼna bʼaʼn aj tel tnikʼa tiʼj qa in tzalaj Jehová tiʼja ex qa o tzʼoka te tamiw (Prov. 23:15, 16).