1. ¿Tiʼ jaku tzʼonin tiʼja tuʼn ttzalaj aj t-xnaqʼtzana kyiʼj profecía?

 IN TZAJ tqʼamaʼn jun kuʼxun Ben tbʼi qe yol lu: «In chin tzalaje aj xnaqʼtzane kyiʼj profecía tkuʼx toj Biblia». Yajtzun teya, ¿axpe jlu in kubʼ t-ximana? ¿Moqa in kubʼ t-ximana qa kwest tuʼn tel qnikʼ kyiʼj profecía? Qa ikju, jakulo chʼexpaj t-ximbʼetza aj tel mas tnikʼa tiʼj tiquʼn xi tqʼoʼn Jehová ambʼil tuʼn kykubʼ tzʼibʼin profecía toj Biblia.

2. ¿Tiʼ kʼelel qnikʼ tiʼj toj xnaqʼtzbʼil lu?

² Toj xnaqʼtzbʼil lu, qo yolil tiʼj tiquʼn nim toklen tuʼn qxnaqʼtzan kyiʼj profecía ex alkyeqe tiʼchaq jaku che onin qiʼj aj qxnaqʼtzan kyiʼj. Yajxitl, qo xnaqʼtzal kyiʼj kabʼe profecía te Daniel ex kʼelel qnikʼ tiʼj tzeʼn in nonin qiʼj aj tel qnikʼ tiʼj tiʼ t-xilen.

3. ¿Tiʼ il tiʼj tuʼn tbʼant quʼn tuʼn tel qnikʼ kyiʼj profecía?

³ Tuʼn tel qnikʼ kyiʼj profecía, nim toklen tuʼn t-xi qqanin onbʼil. Qo ximen tiʼj techel lu. Ximana tiʼj qa ma txiʼya toj jun tnam mintiʼ ojtzqiʼn tuʼna, pero at jun tamiwa tukʼila ojtzqiʼn lugar tuʼn. Ojtzqiʼn tuʼn jatumel in che bʼete ex jatumel in cheʼx junjun bʼe. In kubʼlo tnaʼna nim tzalajbʼil tuʼnju at tamiwa tukʼila. In nok Jehová ik tzeʼn qamiw jlu tuʼnju ojtzqiʼn tuʼn toj alkye ambʼil in qo anqʼin ex tiʼ kbʼajel toj ambʼil tzul. Tuʼntzunju, qa qaj tuʼn tel qnikʼ kyiʼj profecía, nim toklen tuʼn t-xi qqanin te tuʼn tonin qiʼj (Dan. 2:28; 2 Ped. 1:19, 20).

4. ¿Tiquʼn xi tqʼoʼn Jehová ambʼil tuʼn kykubʼ tzʼibʼin profecía toj Tyol? (Jeremías 29:11; ax ikx qʼonka twitza tiʼj foto).

⁴ Kyaj mambʼaj tuʼn kytzalaj kykʼwal toj ambʼil tzul. Ax ikx te Jehová taj tuʼn kytzalaj tmajen (kjawil uʼjit Jeremías 29:11). Noqtzun tuʼnj, mlay tzʼel kynikʼ mambʼaj tiʼjju  jaku bʼaj toj ambʼil tzul, atzunte Jehová jaku tzaj tqʼamaʼn tkyaqilju jaku bʼaj. Tuʼntzunju, xi tqʼoʼn ambʼil tuʼn kykubʼ tzʼibʼin profecía toj Tyol tuʼntzun tel qnikʼ tiʼj alkyeqe tiʼchaq nim toklen tuʼn kybʼaj (Is. 46:10). Jaku txi qqʼamaʼn qa e tzaj tqʼoʼn Jehová profecía te jun oyaj te qe tuʼnju kʼujlaʼn qoʼ tuʼn. ¿Pero tzeʼn jaku tzʼok qeʼ qkʼuʼj tiʼj qa kjapunel kywiʼ?

5. ¿Tiʼ xnaqʼtzbʼil jaku tzʼel kyiʼn kuʼxun tiʼjju bʼaj tiʼj Max?

⁵ Toj escuela, mintiʼxix moqa mintiʼ in nok kyqʼoʼn xjal toklen Biblia. Tuʼntzunju, jakulo che dudarin kuʼxun tiʼjju nimen kyuʼn aj tok kybʼiʼn aju in kyqʼamaʼn xjal lu ex tuʼn kybʼinchbʼen. Qo yolin tiʼjju bʼaj tiʼj jun ermano Max tbʼi. Tqʼama jlu: «Tej kuʼxun qine, ya mintiʼ ok qeʼ nkʼuʼje tiʼj qa tzaj kyyekʼin nmane axix tok okslabʼil weye ex ya mintiʼ ok qeʼ nkʼuʼje tiʼj qa atz tzajni Biblia tukʼil Dios». ¿Tzeʼn e onin tman Max tiʼj? Tqʼamatl jlu: «Tzaj bʼaj kykʼuʼj wiʼje, pero mintiʼ tzaj kyqʼoj». Ajbʼen Biblia kyuʼn tman tuʼntzun t-xi kytzaqʼweʼn qe t-xjel. Ax ikx te Max ok tilil tuʼn tuʼn t-xnaqʼtzan. Tqʼama jlu: «In nok tene xnaqʼtzal kyiʼj profecía toj Biblia ex xi nqʼamaʼne kye txqantl kuʼxun toj congregación aju otoq tzʼel nnikʼe tiʼj». ¿Tzeʼn onin jlu tiʼj Max? Tqʼamatl jlu: «Tej tbʼant jlu wuʼne, ok qeʼ nkʼuʼje tiʼj qa tyol Dios tkuʼx toj Biblia».

6. ¿Tiʼ jaku bʼant quʼn qa kwest tuʼn tok qeʼ qkʼuʼj tiʼj jun tiʼ ex tiquʼn?

⁶ Ik tzeʼn bʼaj tiʼj Max, jakulo pon jun ambʼil jatumel kwest jaku tzʼela toj twitza tuʼn tok qeʼ tkʼuʼja tiʼjju in tzaj tqʼamaʼn Tyol Dios. Aj tbʼaj jlu tiʼja, miʼn tzaj bʼaj tkʼuʼja, pero bʼaʼn tuʼn tbʼant jun tiʼ tuʼna. Qa mintiʼ in nok qeʼ qkʼuʼj tiʼj jun tiʼ, in nok jlu ik tzeʼn óxido. Maske tbʼanel keʼyin jun tiʼ, jaku naj tuʼn óxido qa mintiʼ ma tzʼok qxqʼuqin. Tuʼn miʼn tnaj qʼuqbʼil qkʼuʼj, ax ikx nim toklen tuʼn kybʼant junjun tiʼchaq quʼn. Tuʼntzunju, bʼaʼn tuʼn tkubʼ qxjelin jlu: «¿In nokpe qeʼ nkʼuʼje tiʼjju in tzaj tqʼamaʼn Tyol Dios tiʼj ambʼil tzul?». Qa kwest tuʼn tok qeʼ qkʼuʼj tiʼj, bʼaʼn tuʼn qxnaqʼtzan kyiʼj profecía ya o japun kywiʼ. Qo xnaqʼtzan tiʼj tzeʼn jaku bʼant quʼn.

7. ¿Tiʼ bʼant tuʼn Daniel tej t-xnaqʼtzan kyiʼj profecía? (Daniel 12:10; ax ikx qʼonka twitza tiʼj foto).

⁷ Aj qxnaqʼtzan kyiʼj profecía, tbʼanel tuʼn tel qkanoʼn tiʼjju bʼant tuʼn Daniel. Xnaqʼtzan Daniel kyiʼj profecía tuʼnju tajtoq tuʼn tel tnikʼ tiʼj axix tok. Ax ikx, kubʼ tyekʼin qa mintiʼ jaw tnimsan tibʼ. El tnikʼ tiʼj qa in nonin Jehová kyiʼj qeju in che ten nqayin ttxlaj ex in che nimen te (Dan. 2:27, 28; kjawil uʼjit Daniel 12:10). Kubʼ tyekʼin qa kubʼ tin tibʼ tej tjyon onbʼil tukʼil Jehová (Dan. 2:18). Ax ikx, el tpaʼn Daniel ambʼil tuʼn t-xnaqʼtzan tiʼj Tyol Dios. Xi tjyoʼn tzaqʼwebʼil kyiʼj t-xjel kyoj libro tiʼj Biblia ya otoq che kubʼ tzʼibʼin toj ambʼil aju (Jer. 25:11, 12; Dan. 9:2). ¿Tzeʼn jaku tzʼel qkanoʼn tiʼj tbʼanel techel kyaj tqʼoʼn?

8. ¿Tiquʼn in che xnaqʼtzan junjun xjal kyiʼj profecía tkuʼx toj Biblia?

⁸ Ximana tiʼj tiquʼn in xnaqʼtzana kyiʼj  profecía. ¿In xnaqʼtzanpe teya kyiʼj profecía tuʼnju taja tuʼn tel tnikʼa tiʼj axix tok? Qa ikju, kʼonil Jehová tiʼja (Juan 4:23, 24; 14:16, 17). Noqtzun tuʼnj, ateʼ junjun xjal in che xnaqʼtzan tiʼj Biblia noq tuʼn ttzaj kyqʼamaʼn qa nya tyol Dios tkuʼx toj. In bʼant jlu kyuʼn tuʼnju kyaj tuʼn tkubʼ kybʼinchaʼn aju kyex kyajbʼil ex tuʼn tkubʼ kyximen alkye bʼaʼn ex alkye nya bʼaʼn. Pero aj qxnaqʼtzan kyiʼj profecía, nim toklen tuʼn tbʼant quʼn tuʼnju qaj tuʼn tel qnikʼ tiʼj axix tok. Ex tuʼn tel qnikʼ tiʼj, nim toklen tuʼn tten jun tbʼanel qmod. ¿Alkye?

9. ¿Alkye jun qmod il tiʼj tuʼn tten tuʼn tel qnikʼ kyiʼj profecía ex tiquʼn?

⁹ Miʼn jaw tnimsan tibʼa. In tzaj ttziyen Jehová qa kʼonil kyiʼj xjal mintiʼ in jaw kynimsan kyibʼ (Sant. 4:6). Tuʼntzunju, qa qaj tuʼn tel qnikʼ kyiʼj profecía, nim toklen tuʼn qnaʼn Dios te Jehová tuʼntzun tonin qiʼj. Ex qa mintiʼ in jaw qnimsan qibʼ, kxel qkʼamoʼn onbʼil in tzaj tqʼoʼn majen in bʼant taqʼun. In najbʼen majen lu tuʼn Jehová tuʼn ttzaj tqʼoʼn xnaqʼtzbʼil qe toj ambʼil atxix tajbʼen (Luc. 12:42). Tuʼnju toj ttxolil in bʼant tkyaqil tuʼn Jehová, toj tumel tuʼn tajbʼen oʼkx jun majen tuʼn tuʼn tonin qiʼj tuʼn tel qnikʼ tiʼj axix tok (1 Cor. 14:33; Efes. 4:4-6).

10. ¿Tiʼ xnaqʼtzbʼil jaku tzʼel tiʼna tiʼj Esther?

¹⁰ Jyona tqanil toj Biblia. Ximana tiʼj jun profecía tgana ex xnaqʼtzana tiʼj. Atzun jlu bʼant tuʼn jun ermana Esther tbʼi. Tgan Esther tuʼn tjaw tuʼjin qe profecía in che yolin tiʼj ambʼil aj tul Mesías. Tqʼama jlu: «Tej qʼiʼntoq 15 abʼqʼi wuʼne, wajtoqe tuʼn tel nnikʼe tiʼj qa ax tok e kubʼ tzʼibʼin profecía lu tej naʼmxtoq tul Jesús tzalu twitz Txʼotxʼ». ¿Tiʼtzun bʼant tuʼn Esther? Ok ten xnaqʼtzal kyiʼj rollo e kanet toj mar Muerto ex jaw labʼin tiʼjju el tnikʼ tiʼj. Tqʼamatl jlu: «Ateʼ junjun rollo e kubʼ tzʼibʼin tej naʼmxtoq tul Jesús. Tuʼntzunju, jaku tzʼok qeʼ qkʼuʼj tiʼj qa a Dios qʼamante qe profecía tkuʼx toj». Ex tqʼamatl jlu: «Nim maj jaw wuʼjine junjun xnaqʼtzbʼil tuʼntzun tel nnikʼe kyiʼj». Maske ikju, kubʼ tnaʼn nim tzalajbʼil tuʼnju bʼant jlu tuʼn. In tzaj tqʼamaʼntl Esther tiʼ kubʼ tnaʼn tej t-xnaqʼtzan kyiʼj junjun profecía. Tqʼama jlu: «Tuʼnju in jyone tqanil, el nnikʼe tiʼj qa in tzaj tqʼamaʼn Biblia axix tok».

11. ¿Tiquʼn nim toklen tuʼn tok qeʼ qkʼuʼj tiʼj qa in tzaj tqʼamaʼn Biblia axix tok?

¹¹ Aj tel qnikʼ tiʼj tzeʼn o japun kywi junjun profecía, mas in nok qeʼ qkʼuʼj tiʼj Jehová ex kyiʼj tqanil in tzaj tqʼoʼn qe. Ax ikx, in che onin profecía qiʼj tuʼn ttzaj qnaʼn qʼuqbʼil qkʼuʼj tiʼj ambʼil tzul. Tuʼntzunju, aj qxnaqʼtzan kyiʼj, in ten qximbʼetz toj tumel noq tiʼxku jaku bʼaj. Atzun jaʼlo, qo xnaqʼtzan chʼin kyiʼj kabʼe profecía tkuʼx toj uʼj te Daniel aju in japun kywi toj ambʼil jaʼlo. Aj tel qnikʼ tiʼj tiʼ t-xilen, kʼonil qiʼj tuʼn tjaw qjyoʼn aju mas tbʼanel.

12. ¿Tiʼ in kubʼ techlaʼn tqan matij tilbʼilal bʼinchaʼn tuʼn «kʼuxbʼil ex xkabʼ txʼotxʼ»? (Daniel 2:41-43).

¹² (Kjawil uʼjit Daniel 2:41-43). Toj jun witzikʼ, ok tkeʼyin rey Nabucodonosor jun matij tilbʼilal ex ok tqʼoʼn twitz tiʼj qa bʼinchaʼn  qe tqan tuʼn «kʼuxbʼil ex xkabʼ txʼotxʼ». Aj tok qmojbʼaʼn profecía lu kyukʼil junjuntl in tzaj qʼamaʼn toj uʼj te Daniel ex Apocalipsis, in nel qnikʼ tiʼj qa atz in yolin tiʼj tkawbʼil Reino Unido ex Estados Unidos. Aju kykawbʼil kabʼe tnam lu, atzun mas nim toklen toj ambʼil jaʼlo. Tej t-xi tchikʼbʼaʼn Daniel te Nabucodonosor tiʼ t-xilen twitzikʼ, tqʼama jlu tiʼj nimaq kawbʼil lu: «Tuj jun tumel ktel nim tipun ex tuj juntl tumel mya nim tipun ktel». ¿Tiquʼn tqʼama Daniel jlu? Tuʼnju mintiʼ in xi kyqʼoʼn xjal ambʼil tuʼn tten tipumal ik tzeʼn te kʼuxbʼil. b

13. ¿Alkyeqe xnaqʼtzbʼil in nel qnikʼ tiʼj aj qximen tiʼj tilbʼilal ok tkeʼyin Daniel?

¹³ Jaku tzʼel qnikʼ kyiʼj xnaqʼtzbʼil axix tok aj qximen tiʼj tilbʼilal ok tkeʼyin Daniel, ex mas tej tyolin kyiʼj tqan. Tnejel, o kubʼ tyekʼin nimaq kawbʼil te Reino Unido ex Estados Unidos qa at nim kyipumal. Jun techel, e ten kyxol tnam e kambʼan tiʼj Tnejel ex Tkabʼ Nimaq Qʼoj twitz Tkyaqil Txʼotxʼ. Pero chebʼe chebʼe xi tkubʼaj kyipumal tnam lu tuʼnju mintiʼ mujbʼabʼil kyxol xjal ateʼ tjaqʼ kykawbʼil ex aju gobierno. Tkabʼin, oʼkx mankbʼil nimaq kawbʼil lu tuʼn tten naʼmxtoq tel tiʼn Tkawbʼil Dios qe gobierno. Jakulo che jyon junjuntl tnam qʼoj tukʼil, pero mlay kubʼ tiʼj kyuʼn. ¿Tiquʼn in xi qqʼamaʼn jlu? Tuʼnju in tzaj tqʼamaʼn profecía qa tuʼn jun «abʼj» kbʼel xitj tqan matij tilbʼilal lu. Toj juntl yol, tuʼn Tkawbʼil Dios (Dan. 2:34, 35, 44, 45).

14. Aj tel qnikʼ tiʼj profecía kyiʼj tqan matij tilbʼilal, ¿tzeʼn jaku tzʼonin qiʼj tuʼn tjaw qjyoʼn aju mas tbʼanel?

¹⁴ ¿In nokpe qeʼ tkʼuʼja tiʼj qa ax tok aju tzaj tqʼamaʼn Daniel kyiʼj tqan matij tilbʼilal? Qa ikju, kbʼel tyekʼina toj tanqʼibʼila. Jun techel, mlay tzʼok tilil tuʼna tuʼn tkambʼana tiʼj nim pwaq ex tuʼn kyten nim tiʼchaq teya tuʼnju qʼuqli tkʼuʼja tiʼj qa chʼix tpon ambʼil tuʼn kykubʼ najsaʼn (Luc. 12:16-21; 1 Juan 2:15-17). Ax ikx, aj tel tnikʼa tiʼj profecía lu, kʼonil tiʼja tuʼn tok tqʼoʼna mas toklen pakbʼabʼil ex tuʼn tonina kyiʼj xjal tuʼn kyok te t-xnaqʼtzbʼen Jesús (Mat. 6:33; 28:18-20). Otoqxi xnaqʼtzana tiʼj profecía lu, bʼaʼn tuʼn tkubʼ t-xjelina: «¿In kubʼpe nyekʼine tukʼil nbʼinchbʼene qa qʼuqli nkʼuʼje tiʼj qa ya chʼix tel tiʼn Tkawbʼil Dios aju kykawbʼil xjal?».

15. ¿Alkye in nok te «rey te jawni» ex «rey te kubʼni» toj ambʼil jaʼlo? (Daniel 11:40).

¹⁵ (Kjawil uʼjit Daniel 11:40, TNM). In yolin capítulo 11 te Daniel kyiʼj kabʼe rey moqa gobierno in nok tilil kyuʼn tuʼn tel kynikʼ tiʼj alkye mas nim tipumal. Aj tok qmojbʼaʼn profecía lu kyukʼil junjuntl tkuʼx toj Biblia, in nel qnikʼ tiʼj qa in nok Rusia kyukʼil qeju in che onin tiʼj te «rey te jawni». Ax ikx, qa in nok tnam te Reino Unido ex Estados Unidos te «rey te kubʼni». c

16. ¿Alkyeqe nya bʼaʼn in che ok weʼ tmajen Dios twitz kyoj lugar jatumel in kawin «rey te jawni»?

¹⁶ In nok tzoqpaj «rey te jawni» kyiʼj tmajen Dios in che anqʼin toj lugar jatumel in kawin. Ateʼ junjun erman, o che bʼaj kʼixbʼisaʼn ex o che okx qʼoʼn toj cárcel tuʼn tpaj kyokslabʼil. Maske ikju, mintiʼ in che tzaj xobʼ erman ex mas o chʼiy qʼuqbʼil kykʼuʼj tiʼj Jehová ex tiʼj Tyol. ¿Tiquʼn? Tuʼnju ojtzqiʼn kyuʼn qa kyaj qʼamaʼn toj uʼj te Daniel qa che elel ikʼun (Dan. 11:41). d Ax ikx qe, qa kukx ma tzaj qnaʼn tqanil lu jaku tzʼonin qiʼj tuʼn  tchʼiy qʼuqbʼil qkʼuʼj ex tuʼn kukx qten tzʼaqli twitz Jehová.

17. ¿Alkyeqe nya bʼaʼn in che ok weʼ tmajen Dios twitz kyoj lugar jatumel in kawin «rey te kubʼni»?

¹⁷ Toj ambʼil ojtxe, ax ikx ok tzoqpaj «rey te kubʼni» tiʼj ttnam Jehová. Jun techel, tej tok Tnejel ex Tkabʼ Nimaq Qʼoj twitz Tkyaqil Txʼotxʼ, e okx qʼoʼn nim erman toj cárcel ex ateʼ junjun kʼwal i etz expulsarin toj escuela tuʼn tpaj kyokslabʼil. Atzun kyoj mankbʼil abʼqʼi o che kyaj, kykyaqil erman in che anqʼin tjaqʼ tkawbʼil «rey te kubʼni», o tzʼok qʼuqbʼil kykʼuʼj toj prueba toj junjuntl tten. Jun techel, jakulo tzʼok qʼuqbʼil tkʼuʼj jun erman toj prueba aj tjaw kyjyoʼn xjal jun akʼaj gobierno. Mintiʼ in xi votaril, pero il tiʼj tuʼn tok t-xqʼuqin tibʼ tuʼn miʼn tkubʼ t-ximen qa mas tbʼanel tuʼn tkambʼan jun kyxol qe candidato. Noqtzun tuʼnj, qa qaj tuʼn qten tzʼaqli twitz Jehová, nya oʼkx il tiʼj tuʼn tok qxqʼuqin aju in kubʼ qbʼinchaʼn, sino ax ikx aju in kubʼ qximen ex in kubʼ qnaʼn (Juan 15:18, 19; 18:36).

18. ¿Tiʼ in kubʼ qnaʼn aj tok qkeʼyin qa in che qʼojin kabʼe rey lu? (Ax ikx qʼonka twitza kyiʼj tilbʼilal).

¹⁸ Kykyaqil qeju mintiʼ in nok qeʼ kykʼuʼj  kyiʼj profecía tkuʼx toj Biblia, jakulo tzaj bʼaj kykʼuʼj aj tok kykeʼyin qa in qʼojin «rey te kubʼni» tukʼil «rey te jawni» (Dan. 11:40). Kyuʼn arma in najbʼen kyuʼn kabʼe rey lu, jaku naj anqʼibʼil twitz Txʼotxʼ. Pero ojtzqiʼn quʼn qa mlay txi tqʼoʼn Jehová ambʼil tuʼn tbʼaj jlu (Is. 45:18). Tuʼntzunju, mintiʼ in tzaj bʼaj qkʼuʼj ex mintiʼ in qo xobʼ. Ax ikx, mas in chʼiy qʼuqbʼil qkʼuʼj aj tok qkeʼyin qa in qʼojin «rey te jawni» tukʼil «rey te kubʼni». ¿Tiquʼn? Tuʼnju in tzaj tyekʼin jlu qe qa ya chʼix tul xitbʼil.

19. ¿Tiʼ bʼaʼn tuʼn ttzaj qnaʼn aj qxnaqʼtzan kyiʼj profecía?

¹⁹ Mintiʼ ojtzqiʼn quʼn tzeʼn kjapunel kywi junjun profecía tkuʼx toj Biblia. Axpe ikx te Daniel mintiʼtoq ojtzqiʼn tuʼn tiʼtoq t-xilen tkyaqilju kubʼ ttzʼibʼin (Dan. 12:8, 9). Qa mintiʼxix in nel qnikʼ tiʼj tzeʼn kjapunel twi jun profecía, nya a t-xilen qa mlay japun twiʼ. Qʼuqli qkʼuʼj tiʼj qa tzul tqʼoʼn Jehová mas tqanil qe toj ambʼil mas tbʼanel ik tzeʼn bʼant tuʼn toj ambʼil ojtxe (Amós 3:7).

20. ¿Alkyeqe profecía kjapunel kywi toj chʼintl ambʼil ex tiʼ il tiʼj tuʼn kukx tbʼant quʼn?

²⁰ Tzul kyqʼamaʼn tnam jlu: «Mintiʼ bʼis, bʼaʼn taʼ tkyaqil» (1 Tes. 5:3). Aj tbʼaj jlu, che okel tzoqpaj gobierno kyiʼj okslabʼil nya axix tok ex kbʼel kynajsaʼn te jumajx (Apoc. 17:16, 17). Yajxitl, che okel tzoqpaj tiʼj ttnam Jehová (Ezeq. 38:18, 19). Te mankbʼil, kxel tzyet qʼoj Armagedón tbʼi (Apoc. 16:14, 16). Qʼuqli qkʼuʼj tiʼj qa ya chʼix kybʼaj tiʼchaq lu. Akux in pon ambʼil tuʼn kybʼaj, bʼaʼn tuʼn tkubʼ qyekʼin qa in xi qqʼoʼn chjonte te Jehová aj qxnaqʼtzan kyiʼj profecía ex aj qonin kyiʼj txqantl tuʼn tel kynikʼ kyiʼj.