XNAQʼTZBʼIL 35
Kukx ten qpasens
«Ten kypasense» (COL. 3:12).
BʼITZ 114 Qyekʼinx qpasens
AJU KʼELEL QNIKʼ TIʼJ a
1. ¿Tiquʼn in qo tzalaj aj qten kyukʼil xjal at kypasens?
IN QO tzalaj aj qten kyukʼil xjal in kubʼ kyyekʼin kypasens. Jun techel, at jun tbʼanel qximbʼetz kyiʼj qeju mintiʼ in bʼaj kygan tuʼn kyyon. Ax ikx, in xi qqʼoʼn nimxix chjonte kye xjal in kubʼ kyyekʼin kypasens qiʼj aj qel txalpaj. Ex in xi qqʼoʼn nimxix chjonte te erman tzaj qʼonte xnaqʼtzbʼil qe tuʼnju ten tpasens qiʼj tej mintiʼ el qnikʼ tiʼj jun xnaqʼtzbʼil, tej kwest ela toj qwitz tuʼn t-xi qnimen moqa tuʼn tkubʼ qbʼinchaʼn. Pero mas in xi qqʼoʼn nimxix chjonte te Jehová tuʼnju in kubʼ tyekʼin tpasens qiʼj (Rom. 2:4).
2. ¿Toj alkye junjun ambʼil kwest jaku tzʼela toj qwitz tuʼn tkubʼ qyekʼin qpasens?
2 In qo tzalaj aj tkubʼ kyyekʼin txqantl kypasens qiʼj. Pero aj tpon ambʼil tuʼn tkubʼ qyekʼin qpasens, atlo maj kwest jaku tzʼela toj qwitz. Jun techel, atlo maj kwest jaku tzʼela toj qwitz tuʼn tkubʼ qyekʼin qpasens qa at nim tráfico ex mas qa noq chʼin ambʼil at qiʼj. Moqa jakulo bʼaj qpasens tiʼj jun xjal in molestarin qiʼj. Ex atlo maj jaku kubʼ qximen qa o tzikʼ ambʼil tuʼn tjapun twi t-ximbʼetz Jehová tuʼn tul Tbʼanel Najbʼil. Qkyaqilx qaj tuʼn tkubʼ qyekʼin qpasens. Tuʼntzunju, toj xnaqʼtzbʼil lu qo yolil tiʼj tiʼ t-xilen tuʼn tten qpasens ex tiquʼn nim toklen tuʼn tkubʼ qyekʼin. Ax ikx, qo xnaqʼtzal kyiʼj junjun nabʼil jaku che onin qiʼj tuʼn tkubʼ qyekʼin qpasens.
¿TIʼ T-XILEN TUʼN TKUBʼ QYEKʼIN QPASENS?
3. ¿Tzeʼn tmod jun xjal at tpasens in kubʼ tyekʼin aj tok bʼinchaʼn nya bʼaʼn tiʼj?
3 Qo xnaqʼtzan tiʼj kyaje tiʼ in bʼant tuʼn jun xjal at tpasens. Tnejel, nya jun rat in tzaj tqʼoj. Aj tok bʼinchaʼn nya bʼaʼn tiʼj tuʼn juntl, nya jun rat in tzaj tqʼoj ex mintiʼ in naj tqʼoʼn t-xel nya bʼaʼn. Ax ikx, in kubʼ tyekʼin tbʼanel tmod kyukʼil txqantl maske at nim tiʼchaq tuʼn tbʼant tuʼn. Ex in kanet tnejel maj tqanil lu quʼn tiʼj pasens toj Éxodo 34:6 aj ttzaj qʼamaʼn jlu tiʼj Jehová: «Aqine Dios at nim tqʼaqʼbʼil nkʼuʼje, aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline».
4. ¿Tzeʼn tmod jun xjal at tpasens in kubʼ tyekʼin qa il tiʼj tuʼn tayon?
4 Tkabʼin, qa at tpasens jun xjal, mintiʼ in bʼaj tgan tuʼn tayon. Toj juntl yol, mintiʼ in tzaj tqʼoj qa in xi tiʼn mas ambʼil tuʼn tbʼant jun tiʼ (Mat. 18:26, 27). Il tiʼj tuʼn tkubʼ qyekʼin qpasens kyoj nimku ambʼil. Jun techel, nim toklen tuʼn tten qpasens aj tok qbʼiʼn jun xjal ex nya jun rat tuʼn t-xi qqʼoʼn tzaqʼwebʼil te (Job 36:2). Ax ikx, nim toklen tuʼn tten qpasens kyiʼj xjal in che xnaqʼtzan qukʼil. ¿Tiquʼn? Tuʼnju atlo maj kwest jaku tzʼel kynikʼ tiʼj jun xnaqʼtzbʼil moqa kwest tuʼn tkyaj kytzaqpiʼn jun tiʼ otoq che naqʼet tiʼj.
5. ¿Toj alkye juntl ambʼil in kubʼ qyekʼin qa at qpasens?
5 Toxin, qa at tpasens jun xjal, nya jun rat in xi tbʼinchaʼn qe tiʼchaq. At maj, il tiʼj tuʼn t-xi bʼinchet naj junjun tiʼchaq. Noqtzun tuʼnj, qa at tpasens jun xjal, nya jun rat in xi tbʼinchaʼn qe tiʼchaq nim kyoklen noq tuʼnju taj tuʼn tkubʼaj. Sino in kubʼ t-ximen tiʼ tuʼn t-xi tbʼinchaʼn ex in nel tpaʼn ambʼil tuʼn t-xi tbʼinchaʼn toj tumel.
6. ¿Tzeʼn tmod jun xjal at tpasens in kubʼ tyekʼin aj tok weʼ twitz nya bʼaʼn?
6 Tkyajin, qa at tpasens jun xjal nya kukx in yolin kyiʼj nya bʼaʼn in nok weʼ twitz. At toklen pasens tukʼilju tuʼn tikʼx quʼn. Aj qok weʼ twitz jun nya bʼaʼn, toj tumel qa ma qo yolin tiʼjju in bʼaj qiʼj tukʼil jun qamiw ex tuʼn t-xi qqʼamaʼn te tiʼ in kubʼ qnaʼn. Pero qa at tpasens jun xjal, kʼokel tilil tuʼn tuʼn tten t-ximbʼetz toj tumel ex tuʼn tajbʼen te Jehová tukʼil tzalajbʼil (Col. 1:11). Nim toklen tuʼn tkubʼ kyyekʼin tmajen Jehová kypasens toj kyaje tumel lu ex qo xnaqʼtzan tiʼj tiquʼn.
¿TIQUʼN NIM TOKLEN TUʼN TTEN QPASENS?
In nayon jun xjal in naqʼunan tiʼj txʼotxʼ tukʼil pasens tuʼnju qʼuqli tkʼuʼj tiʼj qa kjawel tchmoʼn twitz tawal. Ax ikx qe in kubʼ qyekʼin qpasens tuʼnju qʼuqli qkʼuʼj tiʼj qa che kjapunel twi ttziybʼil Jehová toj ambʼil mas tbʼanel. (Qʼonka twitza tiʼj párrafo 7).
7. Ik tzeʼn in tzaj tqʼamaʼn Santiago 5:7 ex 8, ¿tiquʼn nim toklen tuʼn tten qpasens? (Ax ikx qʼonka twitza kyiʼj dibujo).
7 Nim toklen tuʼn tten qpasens qa qaj tuʼn qklet. Ik tzeʼn kye tmajen Jehová toj ambʼil ojtxe, ax ikx qe nim toklen tuʼn qayon tuʼn kyjapun twi tyol (Heb. 6:11, 12). In tzaj tqʼamaʼn Biblia qa in qo ok ik tzeʼn jun xjal in naqʼunan tiʼj txʼotxʼ (kjawil uʼjit Santiago 5:7, 8). In nok tilil tuʼn xjal lu tuʼn tok tawal ex tuʼn t-xqʼuqin tiʼj, pero mintiʼ ojtzqiʼn tuʼn toj alkye ambʼil tuʼn tchʼiy. Tuʼntzunju, in nayon tukʼil pasens ex qʼuqli tkʼuʼj tiʼj qa kjawil tchmoʼn twitz tawal. Chʼixme ax jlu in bʼant kyuʼn tmajen Jehová. In nok tilil kyuʼn tuʼn kyaqʼunan, pero mintiʼ ojtzqiʼn kyuʼn «alkye or tzul» Kyajaw (Mat. 24:42). In qo ayon tukʼil pasens tuʼnju ojtzqiʼn quʼn qa che japunel twi tyol Jehová toj ambʼil mas tbʼanel. Qa ma kubʼaj qpasens, jaku qo sikt tuʼn qayon ex chebʼe chebʼe jaku tzʼel qpan qibʼ tiʼj. Ax ikx, jakulo txi tzyet tuʼn tok qqʼoʼn qwiʼ kyiʼj tiʼchaq oʼkx jaku qo tzalaj jun rat kyuʼn. Pero qa kukx ma kubʼ qyekʼin qpasens, kʼokel tilil quʼn tzmaxi aj tul xitbʼil ex jaku qo klet (Miq. 7:7; Mat. 24:13).
8. ¿Tzeʼn in nonin pasens qiʼj tuʼn qtzalaj aj qten kyukʼil txqantl? (Colosenses 3:12; Efesios 4:32).
8 Qa ma ten qpasens, jaku tzʼonin qiʼj tuʼn qtzalaj kyukʼil txqantl ex jaku tzʼonin qiʼj tuʼn tok qqʼoʼn qwiʼ tiʼj kyyol (Sant. 1:19). Ax ikx, jaku tzʼonin qiʼj tuʼn tten mujbʼabʼil qxol. Qa ma kubʼ qyekʼin tbʼanel qmod lu, nya jun rat kxel qbʼinchaʼn qe tiʼchaq ex mlay txi qqʼamaʼn jun qyol nya toj tumel kye txqantl aj qok weʼ twitz jun ambʼil kwest. Ex qa ma tzʼok bʼinchaʼn jun nya bʼaʼn qiʼj, mlay tzʼaj qqʼoʼn t-xel ex nya jun rat ktzajel qqʼoj. Sino kʼokel tilil quʼn tuʼn t-xi qbʼiʼn consej lu: «Tzikʼx kyuʼne aju kypaltil junjuntl, kynajsam kyile kyxolxe qa at jun at tyol tiʼj juntl» (kjawil uʼjit Colosenses 3:12; Efesios 4:32).
9. ¿Tzeʼn in nonin pasens qiʼj aj tkubʼ qximen tiʼ tuʼn t-xi qbʼinchaʼn? (Proverbios 21:5).
9 Ax ikx in nonin pasens qiʼj tuʼn tjaw qskʼoʼn aju mas tbʼanel. Qa ma kubʼ qyekʼin qpasens, nya jun rat kxel qbʼinchaʼn jun tiʼ moqa mlay kubʼ qximen aju kbʼantel quʼn. Sino kʼelel qpaʼn ambʼil tuʼn tel qnikʼ tiʼj tiʼ jaku bʼant quʼn ex tuʼn tjaw qskʼoʼn aju mas tbʼanel (kjawil uʼjit Proverbios 21:5). Qo ximen tiʼj jun techel. Ximana tiʼj qa ma tzʼel qʼiʼn taqʼuna. Toj ambʼil lu, jakulo txi tkʼamoʼna alkyexku aqʼuntl maske jaku tzʼel tiʼn ambʼil tiʼja tuʼn t-xiʼya kyoj chmabʼil moqa toj pakbʼabʼil. Pero qa ma kubʼ tyekʼina tpasensa, tnejel jaku ximana tiʼj qa kxel tiʼn ambʼil tuʼn tviajarina, qa kʼokel tqʼoʼna nim or tiʼj aqʼuntl, qa ktel ambʼil tiʼja tuʼn ttena kyukʼil toj tjaya ex tuʼn tok t-xqʼuqina tamiwbʼila tukʼil Jehová. Qa ma kubʼ qyekʼin qpasens, jaku tzʼonin qiʼj tuʼn miʼn ttzaj qbʼis tiʼjju otoq kubʼ qximen.
¿TIʼ JAKU TZʼONIN QIʼJ TUʼN TKUBʼ QYEKʼIN MAS QPASENS?
10. ¿Tiʼ jaku bʼant quʼn tuʼn kukx tkubʼ qyekʼin qpasens?
10 Qqaninx onbʼil te Jehová tuʼn tten mas qpasens. Jaku kanet pasens quʼn kyxol qe tbʼanel mod in tqʼoʼn xewbʼaj xjan (Gál. 5:22, 23). Tuʼntzunju, jaku txi qqanin te Jehová tuʼn ttzaj tqʼoʼn xewbʼaj xjan qe ex tuʼn tonin qiʼj tuʼn kyten tbʼanel qmod in tqʼoʼn. Qa in qo ok weʼ twitz jun nya bʼaʼn ex kwest in nela toj qwitz tuʼn tten qpasens, kukx qqaninx te Jehová tuʼn ttzaj tqʼoʼn xewbʼaj xjan qe (Luc. 11:9, 13). Ax ikx, jaku txi qqanin te tuʼn tonin qiʼj tuʼn tten qximbʼetz ik tzeʼn te. Ex tej otoqxi qo naʼn Dios, tbʼanel tuʼn tok tilil quʼn tuʼn tkubʼ qyekʼin qpasens tkyaqil qʼij. Qa kukx ma txi qqanin onbʼil te Jehová ex qa ma tzʼok tilil quʼn tuʼn tkubʼ qyekʼin qpasens, kʼokel qqʼoʼn qwitz tiʼj qa chebʼe chebʼe kbʼel qyekʼin tbʼanel mod lu.
11, 12. ¿Tzeʼn o kubʼ tyekʼin Jehová qa at tpasens?
11 Qo ximen kyiʼj techel in yolin Biblia tiʼj. In yolin Biblia kyiʼj nim xjal kubʼ kyyekʼin kypasens. Qa ma qo xnaqʼtzan tiʼj tbʼanel techel kubʼ kyqʼoʼn, jaku tzʼonin qiʼj tuʼn tkubʼ qyekʼin qpasens. Qo xnaqʼtzan kyiʼj junjun techel, pero naʼmxtoq tbʼant jlu quʼn qo ximen tiʼj tbʼanel techel in kubʼ tqʼoʼn Jehová qwitz aju xjal mas nim tpasens at.
12 Toj jardín te Edén, tzaj tqʼamaʼn Satanás nya ax tok yol tiʼj tbʼi Jehová ex tzaj tqʼamaʼn qa mintiʼ in kubʼ tyekʼin tkʼujlabʼil ex qa nya tzʼaqli tkawbʼil. Pero nya jun rat kubʼ tnajsaʼn Jehová Satanás, sino kubʼ tyekʼin tpasens. ¿Tiquʼn? Tuʼnju el tnikʼ tiʼj qa kxel tiʼn ambʼil tuʼn tel nikʼbʼaj tiʼj qa oʼkxte jaku kawin toj tumel. Akux in nayon Jehová, o bʼaj tzʼilsaʼn tbʼi. Pero tuʼnju in kubʼ tyekʼin tpasens, o tzʼel kynikʼ nimku xjal tiʼj ex jaku che anqʼin te jumajx (2 Ped. 3:9, 15). Qa ma qo ximen tiʼj tkyaqil kʼiwlabʼil in tzaj tuʼnju in kubʼ tyekʼin Jehová tpasens, mas nya kwest jaku tzʼela toj qwitz tuʼn qayon tiʼj ambʼil o kubʼ t-ximen tuʼn ttzaj tiʼn xitbʼil.
Kʼonil pasens qiʼj tuʼn miʼn ttzaj naj qqʼoj aj tok bʼinchaʼn nya bʼaʼn qiʼj. (Qʼonka twitza tiʼj párrafo 13).
13. ¿Tzeʼn el tkanoʼn Jesús tpasens Jehová toj jun tten tzʼaqli tej tten tzalu twitz Txʼotxʼ? (Ax ikx qʼonka twitza tiʼj foto).
13 In kubʼ tyekʼin Jesús qa in nel tkanoʼn tpasens Jehová toj jun tten tzʼaqli ex atzun jlu el nikʼbʼaj tiʼj tej tten tzalu twitz Txʼotxʼ. Atlo maj kwest ela toj twitz tuʼn tkubʼ tyekʼin tpasens ex mas kyukʼil qeju escriba ex fariseo tuʼnju e ok te xmeletzʼ (Juan 8:25-27). Pero ok tilil tuʼn Jesús tuʼn miʼn ttzaj naj tqʼoj ik tzeʼn in bʼant tuʼn Jehová. Mintiʼ aj tmojtzaʼn kyyol aj qʼoj e xmayin tiʼj ex mintiʼ aj tqʼoʼn t-xel nya bʼaʼn ok kybʼinchaʼn tiʼj (1 Ped. 2:23). Sino kubʼ tyekʼin tpasens tej tikʼx nya bʼaʼn tuʼn ex nya kukx yolin kyiʼj. Tuʼn jlu, in nel qnikʼ tiʼj tiquʼn in tzaj tqʼoʼn Biblia consej jlu qe: «Che ximane tiʼj Jesús aju ikʼx kyqʼoj aj il tuʼn» (Heb. 12:2, 3). Tuʼn tonbʼil Jehová, jaku tzikʼx alkyexku prueba quʼn tukʼil pasens.
Qa ma kubʼ qyekʼin qpasens ik tzeʼn te Abrahán, jaku tzʼok qeʼ qkʼuʼj tiʼj qa ok qo tzajel kʼiwlaʼn tuʼn Jehová toj ambʼil jaʼlo ex mas toj Tbʼanel Najbʼil. (Qʼonka twitza tiʼj párrafo 14).
14. ¿Tiʼ xnaqʼtzbʼil jaku tzʼel qiʼn tiʼj tpasens Abrahán? (Hebreos 6:15; ax ikx qʼonka twitza kyiʼj tilbʼilal).
14 Atlo junjun qe olo tzikʼ ambʼil in qo ayon tuʼn tul xitbʼil. Ex in tzajlo bʼaj qkʼuʼj tuʼnju mintiʼ ojtzqiʼn quʼn qa kʼokel qqʼoʼn qwitz tiʼj moqa miʼn. ¿Tiʼ jaku tzʼonin qiʼj tuʼn kukx qayon tukʼil pasens? Tbʼanel qa ma qo ximen tiʼj techel Abrahán. Tej t-xi tqʼamaʼn Jehová qe yol lu te Abrahán «tiʼja kbʼel nbʼinchaʼne jun nasyon maʼxix», qʼiʼntoq 75 abʼqʼi tuʼn ex mintiʼtoq jun tkʼwal (Gén. 12:1-4). ¿Okpe tqʼoʼn Abrahán twitz tiʼj tzeʼn e japun twi tyol Jehová? Oʼkx kyiʼj junjun. Ex kubʼ tayon junlo 25 abʼqʼi tuʼn tbʼaj jlu tej otoqxi tzikʼx toj río Éufrates. Toj ambʼil lu, tuʼn jun milagro ul itzʼj jun tkʼwal ex ok tqʼoʼn tbʼi te Isaac. Ex tej tikʼ juntl 60 abʼqʼi, ul itzʼj kabʼe tchman aju ok qʼoʼn kybʼi te Esaú ex Jacob (kjawil uʼjit Hebreos 6:15). Pero mintiʼ ok tqʼoʼn Abrahán twitz tiʼj qa e ok tyajil te jun matij tnam ex qa xi qʼoʼn Txʼotxʼ Tziyen maj kye. Maske ikju, ten jun tbʼanel tamiwbʼil tukʼil Jehová (Sant. 2:23). Ex aj tjaw anqʼin Abrahán, oklo kbʼel tnaʼn nimxix tzalajbʼil aj tok tbʼiʼn qa e tzaj kʼiwlaʼn nimku nasyon tuʼnju ten qʼuqbʼil tkʼuʼj ex tpasens (Gén. 22:18). ¿Tiʼ xnaqʼtzbʼil ma tzʼel qnikʼ tiʼj? Bʼalo mlay tzʼok qqʼoʼn qwitz tiʼj tzeʼn che kjapunel kywi kykyaqil ttziybʼil Jehová toj ambʼil jaʼlo. Pero qa ma kubʼ qyekʼin qpasens ik tzeʼn te Abrahán, jaku tzʼok qeʼ qkʼuʼj tiʼj qa ok qo tzajel kʼiwlaʼn tuʼn Jehová toj ambʼil jaʼlo ex mas toj Tbʼanel Najbʼil (Mar. 10:29, 30).
15. ¿Tiʼ jaku qo ximen tiʼj aj qxnaqʼtzan qjunalx?
15 In yolin Biblia kyiʼj txqantl xjal kubʼ kyyekʼin kypasens (Sant. 5:10). Tuʼntzunju, tbʼanel qa ma kubʼ t-ximana tuʼn t-xnaqʼtzana kyiʼj. b Jun techel, tzmatoq kuʼxun David tej tjaw skʼoʼn tuʼn tok te akʼaj rey te Israel, pero ayon nim ambʼil tuʼn ttzaj qʼoʼn oklenj jlu te. Atzunte Simeón ex Ana, kukx e ajbʼen tzʼaqli te Jehová akux in che ayon tiʼj Mesías (Luc. 2:25, 36-38). Aj t-xnaqʼtzana tiʼj kyanqʼibʼil xjal lu, bʼaʼn tuʼn tkubʼ t-xjelina: «¿Tiʼ onin tiʼj xjal lu tuʼn tkubʼ tyekʼin tpasens? ¿Alkyeqe kʼiwlabʼil tzaj tkʼamoʼn tuʼnju kubʼ tyekʼin mod lu? ¿Ex tzeʼn jaku tzʼel nkanoʼne tiʼj?». Nya oʼkxju, ax ikx jaku tzʼel tiʼna nim xnaqʼtzbʼil kyiʼj qeju mintiʼ ten kypasens (1 Sam. 13:8-14). Jaku kubʼ t-xjelina jlu: «¿Tiquʼn mintiʼ ten kypasens? ¿Alkyeqe nya bʼaʼn tzaj kyiʼj tuʼnju mintiʼ kubʼ kyyekʼin mod lu?».
16. ¿Alkye junjun kʼiwlabʼil in tzaj qkʼamoʼn aj tkubʼ qyekʼin qpasens?
16 Qo ximen kyiʼj kʼiwlabʼil jaku tzaj qkʼamoʼn qa ma ten qpasens. In nonin pasens qiʼj tuʼn qtzalaj ex tuʼn miʼn ttzaj bʼajxix qkʼuʼj. Tuʼntzunju, jaku txi qqʼamaʼn qa in nonin qiʼj tuʼn miʼn kytzaj yabʼil qiʼj. Ax ikx, in nonin qiʼj tuʼn qten bʼaʼn kyukʼil txqantl ex tuʼn tten mujbʼabʼil toj congregación. Qa nya jun rat in tzaj qqʼoj aj tok bʼinchaʼn jun nya bʼaʼn qiʼj, kʼonil tuʼn miʼn t-xiʼ nya bʼaʼn toj il (Sal. 37:8; Prov. 14:29). Pero aju mas tbʼanel, in nel qkanoʼn tiʼj Jehová aj tkubʼ qyekʼin qpasens ex in qo ok laqʼeʼ mas ttxlaj.
17. ¿Tiʼ bʼaʼn tuʼn tkubʼ qximen tuʼn tbʼant quʼn?
17 Ik tzeʼn ma tzʼel qnikʼ tiʼj, jun tbʼanel mod pasens ex in nonin qiʼj. Maske atlo maj kwest in nela toj qwitz tuʼn tkubʼ qyekʼin, kukx kʼonil Jehová qiʼj tuʼn tbʼant quʼn. Ex akux in qo ayon tukʼil pasens tuʼn tul Tbʼanel Najbʼil, jaku tzʼok qeʼ qkʼuʼj kyiʼj yol lu: «Atzun qeju in che niman te Qman ex in qeʼ kykʼuʼj tiʼj tkʼujlalil [moqa in che ayon tiʼj], kukx kwentin qe tuʼn» (Sal. 33:18). Tuʼntzunju, tbʼanel tuʼn tkubʼ qximen qkyaqilx tuʼn kukx tkubʼ qyekʼin qpasens.
BʼITZ 41 Bʼintza nnaʼj Diose Mambʼaj Jehová
a Chʼixme kykyaqil xjal toj ambʼil jaʼlo mintiʼ in kubʼ kyyekʼin pasens. Noqtzun tuʼnj, in tzaj tqʼamaʼn Tyol Dios qa il tiʼj tuʼn tkubʼ qyekʼin qpasens. Toj xnaqʼtzbʼil lu, kʼelel qnikʼ tiʼj tiquʼn nim toklen tuʼn tten qpasens ex tiʼ jaku tzʼonin qiʼj tuʼn tkubʼ qyekʼin.
b Jaku che kanet junjun txʼolbʼabʼil lu tuʼna jatumel in tzaj qʼamaʼn «Paciencia» toj Índice de las publicaciones Watch Tower.
