Toj xnaqʼtzbʼil lu, el qnikʼ tiʼj qa oʼkx at jun tiʼ nim toklen tuʼn tok kyqʼoʼn xjal kywiʼ tiʼj ex qe anjel. ¿Alkyetzun? Aju tuʼn tok tbʼi Jehová te xjan. Ax ikx, at toklen tuʼn tok tbʼi Jehová te xjan tukʼilju alkye tten in kawin ex tukʼilju qa che tel xjal tzʼaqli twitz moqa miʼn.

¿Tiquʼn in xi qqʼamaʼn jaʼlo qa mas nim toklen tbʼi Jehová ex aju tuʼn tok te xjan? Qo xnaqʼtzan tiʼj oxe tiquʼn.

Tnejel, yolin Satanás nya bʼaʼn tiʼj tbʼi Jehová toj jardín te Edén moqa tzaj tqʼamaʼn qa nya bʼaʼn tmod. Tuʼn xjel tqʼama Satanás te Eva, tajtoq tuʼn ttzaj tqʼamaʼn qa mintiʼ in bʼinchaʼn Jehová xtalbʼil ex qa nya tzʼaqli qe kawbʼil xi tqʼoʼn kye. Yajxitl, tqʼama Satanás qa nya ax tok qe tyol Jehová ex iktzun tten tzaj tqʼamaʼn qa in nikʼan yol. Tej tbʼant jlu tuʼn, bʼaj ttzʼilsaʼn tbʼi Jehová. Ex tej tbʼant jlu tuʼn ok tbʼi te «tajaw il», aju a t-xilen «nikʼal yol» (Juan 8:44). Tej t-xi tbʼiʼn Eva tyol Satanás, ya mintiʼ nimen te Jehová ex ya mintiʼ onin tiʼj toklen tuʼn tkawin (Gén. 3:1-6). Toj ambʼil jaʼlo, kukx in nok tilil tuʼn Satanás tuʼn tbʼaj ttzʼilsaʼn tbʼi Jehová aj tyolin nya bʼaʼn tiʼj. Ex kykyaqil qeju in xi kynimen nya ax tok yol in tzaj tqʼamaʼn Satanás, mas nya kwest tuʼn tel kypan kyibʼ tiʼj Jehová. Tuʼntzunju, nya bʼaʼn in nela toj kywitz tmajen Jehová aj tbʼaj kytzʼilsaʼn xjal tbʼi xjan. Tuʼnju nikʼan Satanás yol, at nim nya bʼaʼn ex kʼixkʼoj toj ambʼil jaʼlo.

Tkabʼin, taj Jehová aju mas tbʼanel kye kykyaqil, tuʼntzunju, o kubʼ t-ximen tuʼn tbʼaj tsaqsaʼn tbʼi. Atzun jlu mas nim toklen toj twitz Jehová. Tuʼntzunju in tzaj tqʼamaʼn jlu: «Kʼokel nqʼoʼne nbʼiye xjan» (Ezeq. 36:23). Toj naʼj Dios kyaj tyekʼin Jesús qe, tzaj tqʼamaʼn jlu: «Tzʼokwit tbʼiya te xjan». Kyuʼn yol lu, tzaj tyekʼin qe alkye jun kyxol qe tiʼ mas nim toklen tuʼn qnaʼn Dios tiʼj (Mat. 6:9, TNM). Kukx in tzaj tnaʼn Biblia qe qa nim toklen tuʼn tjaw qnimsaʼn tbʼi Jehová. Qqʼonk qwitz tiʼjju in tzaj kyqʼamaʼn junjun versículo. «Kyqʼonxe nimbʼil te Qman tuʼnju maʼ t-xilen» (1 Crón. 16:29; Sal. 96:8). «Che bʼitzane tuʼn tjaw kynimsaʼne tbʼi tbʼanilxix» (Sal. 66:2). «Kukx kjawil nnimsaʼne tbʼiya» (Sal. 86:12). Ax ikx, tej attoq Jesús toj templo te Jerusalén, xi tqʼamaʼn jlu te Jehová: «Nimsaʼnktz tbʼiya». Ik tzeʼn bʼant tuʼn Jehová kyoj junjuntl ambʼil, tzaj yolin ex tqʼama jlu: «Ma jaw nnimsaʼne, ex kjawil nnimsaʼntle juntl maj» (Juan 12:28). a

Toxin, o kubʼ t-ximen Jehová tuʼn kukx tjaw nimsaʼn tbʼi te jumajx. Qo ximen tiʼj jniʼ toklen tbʼi Jehová ktel aj tkubʼaj tuʼn Tkawin Jesús toj Mil Abʼqʼi tej otoqxi kubʼaj mankbʼil prueba. ¿Tiʼ kyximbʼetz xjal ex qe anjel ktel tiʼj tbʼi Jehová toj ambʼil aju? Tuʼn tel qnikʼ tiʼj  tzaqʼwebʼil, qo ximen juntl maj kyiʼj kabʼe tiʼ at toklen tukʼil tbʼi Jehová, aju toklen tuʼn tkawin ex aju tuʼn kyten xjal tzʼaqli twitz. Tuʼnju ya otoq tzikʼx mankbʼil prueba kyuʼn xjal ex ya otoq che ok te tzʼaqli, ya nya il tiʼj tuʼn tikʼx juntl prueba kyuʼn ex che anqʼil te jumajx. Ax ikx, ya nya il tiʼj tuʼn tel toj qʼanchaʼl qa tbʼanel kawin Jehová. ¿Tiquʼn? Tuʼnju junx kyximbʼetz xjal ex qe anjel ktel ex kʼokex kyqʼon kyibʼ tjaqʼ tkawbʼil. Yajtzun tbʼi Jehová, ¿kukxpe kʼokel qʼoʼn toklen?

Toj ambʼil aju, ya otoq tzʼel kynikʼ xjal tiʼj axix tok ex ya otoq tzʼok tbʼi Jehová te xjan. Ex kukx kʼokel tbʼi te mas nim toklen toj kywitz anjel ex qe xjal. ¿Tiquʼn in xi qqʼamaʼn jlu? Tuʼnju kukx che bʼantel tbʼanel tiʼchaq tuʼn Jehová. Jun techel, aj tkubʼ tin tibʼ Jesús ex aj t-xi tqʼoʼn juntl maj kawbʼil te Tman, «ktel toklen Dios tibʼaj tkyaqil» (1 Cor. 15:28). Aj tbʼaj jlu, kykyaqil qeju che anqʼil twitz Txʼotxʼ ktzajel qʼoʼn «tzoqpibʼl kye maʼ t-xilen» (Rom. 8:21). Ex kjapunel twi t-ximbʼetz Jehová tuʼn tten mujbʼabʼil toj tfamilia, ktel mujbʼabʼil kyxol xjal ex qe anjel (Efes. 1:10).

Aj tbʼaj tkyaqil jlu, ¿tiʼ kbʼel tnaʼn tfamilia Jehová? Kykyaqil qeju ateʼ toj kyaʼj ex tzalu twitz Txʼotxʼ, kjawel kynimsaʼn tbʼanel tbʼi Jehová tuʼn tkyaqil kyanmi. Ex aju kbʼel kynaʼn kʼokel ik tzeʼn jun qʼaqʼ in kʼant wen. Kubʼ ttzʼibʼin salmista David jlu tuʼn tonbʼil xewbʼaj xjan: «Qqʼonx chjonte te Qman Dios [...]. Nimanxwit te jumajx aju tbʼi maʼ t-xilen» (Sal. 72:18, 19). Ktel nim ambʼil qiʼj tuʼn qjyon kyiʼj junjuntl tbʼanel tiʼchaq che onil qiʼj tuʼn tjaw qnimsaʼn tbʼi Jehová.

At toklen tbʼi Jehová tukʼil kykyaqil tmod. Tuʼntzunju, aj qximen tiʼj tbʼi, in tzaj qnaʼn tkʼujlabʼil in kubʼ tyekʼin (1 Juan 4:8). Kukx ktzajel qnaʼn qa o qo kubʼ tbʼinchaʼn Jehová tuʼnju kʼujlaʼn qoʼ tuʼn ex qa tzaj tqʼoʼn chojbʼil tuʼnju kubʼ tyekʼin tkʼujlabʼil qiʼj. Ax ikx, oʼkxte jaku kawin toj tumel ex tukʼil kʼujlabʼil. Kukx kʼokel qqʼoʼn qwitz tiʼj tzeʼn kbʼel tyekʼin Jehová tkʼujlabʼil qiʼj te jumajx. Ex kukx che kanetel tbʼanel tiʼchaq quʼn tuʼn qok laqʼeʼ mas ttxlaj Jehová ex tuʼn tjaw qnimsaʼn tbʼi tukʼil bʼitz (Sal. 73:28).