1. ¿Tiquʼn e jaw labʼin xjal te Babilonia tiʼj Daniel?

 TEJ tzmatoq kuʼxun Daniel, xi qʼiʼn pres toj Babilonia ex najchaq tiʼj tnam Jerusalén. Maske tzmatoq kuʼxun, e yolin soldad te Babilonia bʼaʼn tiʼj. El kynikʼ tiʼj qa ten Daniel kyxol kuʼxun «mintiʼ chʼin kytzakaj, mejor che keʼyin» ex tzajni toj jun familia nim toklen (1 Sam. 16:7). Tuʼntzunju, kubʼ kyximen tuʼn t-xi kyqʼoʼn xnaqʼtzbʼil te tuʼn tajbʼen toj tja rey (Dan. 1:3, 4, 6).

2. ¿Tiʼ t-ximbʼetz Jehová ten tiʼj Daniel? (Ezequiel 14:14).

² Mintiʼ ok tkʼujlaʼn Jehová Daniel tuʼnju tbʼanel keʼyin moqa tuʼnju xi qʼoʼn toklen toj tja rey, sino tuʼnju otoq kubʼ t-ximen tuʼn tten tzʼaqli twitz. Tej tzmatoq qʼiʼn junlo 20 abʼqʼi tuʼn Daniel, tzaj tqʼamaʼn Jehová tbʼi junx tukʼil Noé ex Job, junjun tmajen otoq che ajbʼen te toj nimku ambʼil. Tuʼn jlu, in nel qnikʼ tiʼj qa kubʼ t-ximen Jehová qa otoq ten Daniel tzʼaqli twitz (Gén. 5:32; 6:9, 10; Job 42:16, 17; kjawil uʼjit Ezequiel 14:14). Ax ikx, kukx ok tkʼujlaʼn Jehová Daniel toj tkyaqil tanqʼibʼil (Dan. 10:11, 19).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Toj xnaqʼtzbʼil lu, qo yolil kyiʼj kabʼe tmod Daniel tbʼanel i ela toj twitz Jehová. Tnejel, qo yolil tiʼj tiʼ kyxilen junjun mod lu ex yajxitl qo xnaqʼtzal tiʼj tzeʼn kubʼ tyekʼin Daniel. Ax ikx, qo xnaqʼtzal tiʼj tiʼ bʼant tuʼn Daniel tuʼn kyten tmod lu. Ex te mankbʼil, qo xnaqʼtzal tiʼj tzeʼn jaku tzʼel qkanoʼn tiʼj. Maske o kubʼ bʼinchaʼn xnaqʼtzbʼil lu kye kuʼxun, qkyaqilx jaku tzʼel qiʼn jun tbʼanel xnaqʼtzbʼil tiʼj Daniel.

4. ¿Toj alkye ambʼil kubʼ tyekʼin Daniel qa ten tipumal?

⁴ Jakulo qo tzaj xobʼ maske in kubʼ qximen qa at qipumal, pero nya tuʼn jlu kjel qtzaqpiʼn tuʼn t-xi qbʼinchaʼn aju  bʼaʼn. Qo yolin tiʼj Daniel ex qo xnaqʼtzan tiʼj kabʼe ambʼil tzeʼn kubʼ tyekʼin qa ten tipumal. Tnejel, kubʼlo tyekʼin tbʼanel mod lu tej otoq tzikʼ junlo kabʼe abʼqʼi tkubʼlen kyxiten soldad te Babilonia tnam te Jerusalén. Toj jun witzikʼ, ok tkeʼyin rey Nabucodonosor jun matij tilbʼilal ex tzaj bʼaj tkʼuʼj tuʼn jlu. Tuʼntzunju, xi tqanin kye kykyaqil xjal at kynabʼil ex te Daniel tuʼn t-xi kyqʼamaʼn te alkye twitzikʼ ex tiʼ t-xilen. Qa mintiʼtoq ma bʼant jlu kyuʼn, oktoq che kbʼel bʼyoʼn (Dan. 2:3-5). Iltoq tiʼj tuʼn tbʼant jun tiʼ tuʼn Daniel tuʼnju jakutoq che kubʼ bʼyoʼn nim xjal. Tuʼntzunju, xi tqanin te rey «tuʼn ttzaj tqʼoʼn chʼin ambʼil te tuʼn t-xi tchikʼbʼaʼn witzikʼ ex ju t-xilen» (Dan. 2:16). Pero tuʼn tbʼant jlu tuʼn Daniel nimtoq toklen tuʼn miʼn ttzaj xobʼ ex tuʼn tten qʼuqbʼil tkʼuʼj. ¿Tiquʼn? Tuʼnju mintiʼ in tzaj tqʼamaʼn Tyol Dios qa otoq t-xi tqʼamaʼn t-xilen junjuntl witzikʼ. Ax ikx, xi tqanin Daniel onbʼil kye oxe tamiw aju Sadrac, Mesac ex Abednego kybʼi. b Xi tqʼamaʼn kye tuʼn t-xi kyqanin «onbʼil te Dios aju at tuj kyaʼj, tuʼn tel pujet ju yol bʼajx tzʼel nikʼbʼaj tiʼj» (Dan. 2:18). Tzaj ttzaqʼweʼn Jehová kynaʼj Dios ex onin tiʼj Daniel tuʼn tel tnikʼ tiʼj twitzikʼ Nabucodonosor. Tuʼn jlu, mintiʼ kubʼ bʼyoʼn Daniel ex qe tamiw.

5. ¿Toj alkye juntl ambʼil kubʼ tyekʼin Daniel qa ten tipumal?

⁵ Tej otoq tzikʼ ambʼil t-xilen tqʼamaʼn Daniel tiʼ t-xilen twitzikʼ Nabucodonosor tiʼj matij tilbʼilal, pon juntl ambʼil jatumel iltoq tiʼj tuʼn tkubʼ tyekʼin qa mintiʼ tzaj xobʼ. Juntl maj, ok tkeʼyin Nabucodonosor jun witzikʼ jatumel ok tqʼoʼn twitz tiʼj jun matij tzeʼ. Toj ambʼil lu, mintiʼ tzaj xobʼ Daniel ex xi tqʼamaʼn te rey tiʼ t-xilen twitzikʼ. Xi tqʼamaʼn te qa kʼokel te loc ex qa mlaytoq kawin toj jun ambʼil (Dan. 4:25). Jakutoq kubʼ t-ximen Nabucodonosor qa ok meltzʼaj Daniel tiʼj ex jakutoq txi tqʼamaʼn tuʼn tkubʼ bʼyoʼn, pero mintiʼ tzaj xobʼ Daniel ex xi tchikʼbʼaʼn tiʼ t-xilen twitzikʼ.

6. ¿Tiʼtzulo onin tiʼj Daniel tuʼn tten tipumal?

⁶ ¿Tiʼtzulo onin tiʼj Daniel tuʼn tten tipumal toj tkyaqil tanqʼibʼil? Tej tzmatoq kʼwalx, el-lo tkanoʼn nim xnaqʼtzbʼil kyiʼj  tman. Xi kybʼiʼn tman Daniel aju tzaj tqʼamaʼn Jehová kye xjal te Israel ex xi kyyekʼin Tley Dios te (Deut. 6:6-9). Tuʼntzunju, nya oʼkx el tnikʼ Daniel kyiʼj Diez Mandamiento, sino ax ikx ok tojtzqiʼn alkyeqe wabʼj jakutoq txi kywaʼn ex alkyeqe mlay (Lev. 11:4-8; Dan. 1:8, 11-13). c Ax ikx, ojtzqiʼntoq tuʼn tiʼ otoq bʼaj kyiʼj tmajen Jehová tej mintiʼ e nimen te (Dan. 9:10, 11). Tkyaqilju ikʼ toj tanqʼibʼil, onin tiʼj tuʼn tok qeʼ tkʼuʼj tiʼj qa kukx onin Jehová tiʼj ex qe t-anjel (Dan. 2:19-24; 10:12, 18, 19).

7. ¿Tiʼ mas onin tiʼj Daniel tuʼn miʼn ttzaj xobʼ? (Ax ikx qʼonka twitza tiʼj dibujo).

⁷ Otoq naqʼet Daniel tuʼn t-xnaqʼtzan kyiʼj uʼj kubʼ kytzʼibʼin tprofeta Jehová ik tzeʼn aju kubʼ ttzʼibʼin Jeremías. Tuʼnju bʼant jlu tuʼn, el tnikʼ tiʼj qa chʼixtoq tpon ambʼil tuʼn kyetz tzaqpiʼn judiy tjaqʼ tkawbʼil Babilonia (Dan. 9:2). Tej tok tkeʼyin tzeʼn japun kywi profecía, mas ok qeʼ tkʼuʼj tiʼj Jehová. Ex aj tok qeʼ tkʼuʼj jun xjal tiʼj Jehová, in kubʼ tyekʼin qa mintiʼ in tzaj xobʼ ex qa at nim tipumal (mojbʼankuya tqanil lu tukʼil Romanos 8:31, 32, 37-39). Ax ikx, onin tiʼj Daniel tej kukx tnaʼn Dios te Jehová (Dan. 6:10). Xi tqʼamaʼn te Jehová alkyeqe il otoq che bʼant tuʼn, tiʼ kubʼ tnaʼn ex xi tqanin onbʼil te (Dan. 9:4, 5, 19). Ik tzeʼn kye kykyaqil xjal, mintiʼ ul itzʼj Daniel tukʼil tipumal ex iltoq tiʼj tuʼn tkubʼ tyekʼin. Ex atzun jlu bʼant tuʼn tuʼnju xnaqʼtzan, naʼn Dios ex ok qeʼ tkʼuʼj tiʼj Jehová.

8. ¿Tiʼ kʼonil qiʼj tuʼn tten qipumal?

⁸ Olo kubʼ kyyekʼin qman qa mintiʼ in che tzaj xobʼ ex olo tzaj kyqʼamaʼn qe tuʼn tel qkanoʼn kyiʼj. Noqtzun tuʼnj, mintiʼ in qo ul itzʼj tukʼil mod lu, sino il tiʼj tuʼn tkubʼ qyekʼin. Jaku txi qqʼamaʼn qa tuʼn tten qipumal in nok ik tzeʼn aj qxnaqʼtzan tiʼj jun akʼaj tiʼ tuʼn tbʼant quʼn. Tuʼn tel qnikʼ tiʼjju qaj tuʼn tbʼant quʼn, il tiʼj tuʼn tok qqʼoʼn qwitz tiʼjju in bʼant tuʼn xjal in tzaj tqʼoʼn xnaqʼtzbʼil qe ex tuʼn tel qkanoʼn tiʼj. Ax jlu il tiʼj tuʼn tbʼant quʼn qa qaj tuʼn tten qipumal, il tiʼj tuʼn tel qkanoʼn kyiʼj qeju in kubʼ kyyekʼin mod lu. ¿Tiʼ xnaqʼtzbʼil ma tzʼel qiʼn tiʼj Daniel? Qa nim toklen tuʼn qxnaqʼtzan tiʼj Biblia, tuʼn kukx qnaʼn Dios te Jehová tuʼn tkyaqil qanmi tuʼntzun qok te tamiw ex qa il tiʼj tuʼn tok qeʼ qkʼuʼj tiʼj qa kukx kʼonil qiʼj. Qa ma bʼant jlu quʼn, kbʼel qyekʼin qa mintiʼ in qo tzaj xobʼ aj tok qʼuqbʼil qkʼuʼj toj prueba.

9. ¿Alkyeqe tbʼanel tiʼchaq jaku che ikʼ qiʼj qa mintiʼ in qo tzaj xobʼ?

⁹ Jaku che ikʼ tbʼanel tiʼchaq qiʼj qa ma kubʼ qyekʼin qa mintiʼ in qo tzaj xobʼ. Atzun jlu bʼaj tiʼj Ben te tnam Alemania. d Toj escuela jatumel in xnaqʼtzan, in che nimentoq kuʼxun tiʼj evolución ex kubʼ kyximen qa noq jun cuento aju in tzaj tqʼamaʼn Tyol Dios qa at jun Bʼinchalte tkyaqil. Jun qʼij, xi qʼoʼn ambʼil te tuʼn t-xi tqʼamaʼn kye txqantl tiquʼn qʼuqli tkʼuʼj tiʼj qa o qo kubʼ bʼinchaʼn tuʼn Dios ex yolin tuʼn tkyaqil tipumal. ¿Tiʼtzun bʼaj tej tbʼant jlu tuʼn? In tzaj tqʼamaʼn jlu: «Ok tqʼoʼn profesor twiʼ kyiʼj nyole ex xi tqʼoʼn jun copia kye txqantl tiʼj xnaqʼtzbʼil otoq kubʼ nbʼinchane tuʼn t-xi nchikʼbʼaʼne». ¿Tiʼ kyqʼama txqantl tej tok kybʼiʼn tyol Ben?  Tqʼama jlu: «Ateʼ nim kye ok kyqʼoʼn kywiʼ tiʼjju xi nqʼamaʼne ex ok kyqʼoʼn woklene». Aju bʼaj tiʼj Ben, in tzaj tyekʼin qe qa aj tkubʼ qyekʼin qipumal, jaku tzʼok qʼoʼn mas qoklen kyuʼn txqantl ex jaku tzʼonin kyiʼj tuʼn tok kyojtzqiʼn Jehová. Tuʼntzunju, nim toklen tuʼn tok tilil quʼn tuʼn tkubʼ qyekʼin qa mintiʼ in qo tzaj xobʼ.

10. ¿Tiʼ t-xilen tuʼn qten tzʼaqli?

¹⁰ Aju yol hebreo ajbʼen tiʼj yol «tzʼaqli» toj Biblia, a t-xilen tuʼn tkubʼ qyekʼin qkʼujlabʼil. Ex chʼixme tkyaqil maj atz in yolin tiʼj kʼujlabʼil in kubʼ tyekʼin Jehová kyiʼj tmajen. Ax ikx, ax yol lu in najbʼen tiʼj kʼujlabʼil in kubʼ kyyekʼin tmajen Dios kyxolx (2 Sam. 9:6, 7). Taj Jehová tuʼn qten tzʼaqli twitz ex mas jaku tzʼok qeʼ qkʼuʼj tiʼj aj tbʼet ambʼil. Ex atzun jlu bʼaj tiʼj Daniel.

11. ¿Alkye prueba ok weʼ Daniel twitz tej qʼiʼntoq mas te 90 abʼqʼi tuʼn? (Qʼonka twitza tiʼj dibujo tok tiʼj revista).

¹¹ Kubʼ tyekʼin Daniel qa ten tzʼaqli twitz Jehová toj tkyaqil tanqʼibʼil. Ex tej qʼiʼntoq mas te 90 abʼqʼi tuʼn ok weʼ twitz jun matij prueba. Toj ambʼil aju, in kawintoq tnam te Medopersia tibʼaj Babilonia ex atoq Darío rey. Toj tkawbʼil rey lu, ateʼtoq junjun xjal nim kyoklen el kyikʼun Daniel ex mintiʼtoq in nok kyqʼoʼn toklen Jehová. Tuʼntzunju, kubʼ kyximen tuʼn tkubʼ kybʼyoʼn Daniel. Kubʼ tkʼuʼj rey Darío kyuʼn tuʼn tkubʼ tfirmarin jun ley ex iltoq tiʼj tuʼn tkubʼ tyekʼin Daniel qa ktel tzʼaqli twitz Jehová moqa twitz rey. Tuʼn tnimen te rey ik tzeʼn kye txqantl, oʼkx iltoq tiʼj tuʼn miʼn tnaʼn Dios te Jehová toj 30 qʼij. Pero mintiʼ bʼant jlu tuʼn, tuʼntzunju kux xoʼn toj kyjul león. Noqtzun tuʼnj, kolin Jehová tiʼj ex tzaj tkʼiwlaʼn tuʼnju ten tzʼaqli twitz (Dan. 6:12-15, 20-22). ¿Tiʼ jaku tzʼonin qiʼj tuʼn qten tzʼaqli twitz Jehová ik tzeʼn te Daniel?

12. ¿Tiʼ onin tiʼj Daniel tuʼn tkubʼ t-ximen tuʼn tten tzʼaqli twitz Jehová?

¹² Nim toklen tuʼn tok qkʼujlaʼn Jehová tuʼn qten tzʼaqli twitz. Ten Daniel tzʼaqli twitz Jehová tuʼnju kʼujlaʼntoq tuʼn. Bʼalo chʼiy tkʼujlabʼil tiʼj tej t-ximen kyiʼj tmod ex tzeʼn kubʼ tyekʼin (Dan. 9:4). Ax ikx,  ximen Daniel kyiʼj tbʼanel tiʼchaq otoq bʼant tuʼn Jehová tiʼj ex tiʼj ttnam, ex xi tqʼoʼn chjonte kyiʼj (Dan. 2:20-23; 9:15, 16).

13. a) ¿Alkyeqe prueba in che ok weʼ kuʼxun twitz? (Ax ikx qʼonka twitza tiʼj foto). b) ¿Tiʼ tzaqʼwebʼil jaku txi tqʼoʼna te jun xjal qa ma tzaj tqanin teya qa in che onin testigos de Jehová kyiʼj homosexual? (Jyonxa video lu toj jw.org Aj tbʼinchet aju tzʼaqlixix che tel xjal toj txubʼtxaj).

¹³ Ik tzeʼn bʼaj toj tqʼijlalil Daniel, mintiʼ in che respetarin chʼixme kykyaqil xjal te Jehová ex mintiʼ in nok kyqʼoʼn kyoklen tkawbʼil. Tuʼntzunju, jakulo che el ikʼun kuʼxun in che ajbʼen te Jehová kyuʼn ex jakulo tzʼok tilil kyuʼn tuʼn miʼn kyten tzʼaqli twitz. Atzun jlu bʼaj tiʼj Gabriel, aju in nanqʼin atz Australia. Tej tzmatoq kuʼxun, ok weʼ twitz jun prueba toj escuela. Xi tqanin maestra kye tiʼ jakutoq bʼant kyuʼn qa ma txi kyqʼamaʼn jun kyamiw kye qa otoq tzʼok te homosexual. Ax ikx, xi tqʼamaʼn kye tuʼn tel kypan kyibʼ qeju tbʼanel in nela jlu toj kywitz ex qeju mlay txi kyqʼoʼn ambʼil te. Tqʼama Gabriel jlu: «Oʼkx qine tukʼil juntl testigo de Jehová mintiʼ ten qximbʼetze ik tzeʼn kye txqantl». Ex ok qʼuqbʼil tkʼuʼj Gabriel toj prueba tuʼnju bʼaj yajxitl. Tqʼamatl jlu: «Atxtoq nim ambʼil tuʼn tkubʼaj clase ex ok ten maestra ex qe txqantl kuʼxun xmayil qiʼje. Ok tilil wuʼne tuʼn miʼn ttzaj nqʼoje ex tuʼn t-xi nchikʼbʼaʼne aju nimen wuʼne. Pero nyatoq kyaj tuʼn tok kybʼiʼn nyole». In tzaj tqʼamaʼntl Gabriel tiʼ kubʼ tnaʼn: «Nya bʼaʼn ela toj nwitze tuʼnju e xmayin txqantl wiʼje, pero kubʼ nnaʼne nim tzalajbʼil tuʼnju in tene tzʼaqli twitz Jehová ex in koline tiʼjju nimen wuʼne».

14. ¿Tiʼ jaku bʼant quʼn tuʼn kukx qten tzʼaqli twitz Jehová?

¹⁴ Jaku qo ten tzʼaqli twitz Jehová ik tzeʼn te Daniel qa ma tzʼok qkʼujlaʼn. Tuʼn tchʼiy qkʼujlabʼil tiʼj Jehová, nim toklen tuʼn tel qnikʼ kyiʼj tbʼanel tmod. Ex jun tumel tuʼn tbʼant jlu quʼn aju qa ma qo xnaqʼtzan kyiʼj tiʼchaq o che kubʼ tbʼinchaʼn (Rom. 1:20). Aya kuʼxun, ¿alkyeqe tiʼchaq jaku che onin tiʼja tuʼn tchʼiy mas tkʼujlabʼila tiʼj Jehová ex tuʼn trespetarina te? Jaku che kanet tbʼanel video ex xnaqʼtzbʼil tuʼna toj sección «¿Atpe jun Bʼinchal kye moqa mintiʼ?». Ax ikx jaku xnaqʼtzana kyiʼj folleto ¿Es la vida obra de un Creador? ex El origen de la vida. Ximana tiʼjju tzaj tqʼamaʼn Esther kyiʼj folleto lu, jun ermana te Dinamarca. Tqʼama jlu: «Tbʼanel in nela toj nwitze alkye tten e kubʼ tzʼibʼin xnaqʼtzbʼil ex qe folleto lu. Mintiʼ in tzaj tqʼamaʼn qe tiʼ tuʼn t-xi qokslaʼn, sino in tzaj tchikʼbʼaʼn junjun xnaqʼtzbʼil ex aqoʼ qo kbʼel ximente alkye kxel qnimen». In tzaj tqʼamaʼn Ben jlu, aju ma qo yolin tiʼj toj párrafo 9: «Mas chʼiy qʼuqbʼil nkʼuʼje tej kyjaw wuʼjine qe folleto lu. Tzaj tyekʼin weye qa tuʼn Dios at qchwinqlal». Otoqxi xnaqʼtzana tiʼj jlu, jakulo tzʼok qeʼ tkʼuʼja kyiʼj yol tkuʼx toj Apocalipsis 4:11: «Aya Qman Dios, bʼaʼn tuʼn tjaw nimset tbʼiya, ex tuʼn tnimanjtza, ex tuʼn tkʼmonteya ipumalj; porke aya bʼinchante tkyaqil». e

15. ¿Tiʼ mas jaku bʼant quʼn tuʼn tchʼiy qamiwbʼil tukʼil Jehová?

¹⁵ Ax ikx mas jaku tzʼok qkʼujlaʼn Jehová qa ma qo xnaqʼtzan tiʼj tanqʼibʼil Jesús. Atzun jlu bʼant tuʼn Samira, jun ermana in nanqʼin atz Alemania. Tqʼama jlu: «Mas ok wojtzqiʼne Jehová tej nxnaqʼtzane tiʼj tanqʼibʼil Jesús». Tej tzmatoq txin Samira,  mintiʼtoq in nok qeʼ tkʼuʼj tiʼj qa in nel tnikʼ Jehová qiʼj, pero junxitl t-ximbʼetz ten tiʼj Jesús. Tqʼamatl jlu: «Tbʼanel ela tmod Jesús toj nwitze tuʼnju kʼujlaʼn qetoq kʼwal tuʼn ex nya kwest tuʼn qok te tamiw». Tej mas ok tojtzqiʼn Samira Jesús, mas chʼiy tamiwbʼil tukʼil Jehová. ¿Tiquʼn? In tzaj tchikʼbʼaʼn Samira jlu: «Chebʼe chebʼe el nnikʼe tiʼj qa in nel tkanoʼn Jesús qe tmod Jehová toj jun tten tzʼaqli. Ex el nnikʼe tiʼj qa ax ikx tzaj tsamaʼn Jehová Jesús tzalu twitz Txʼotxʼ tuʼntzun tel mas qnikʼ kyiʼj tbʼanel tmod» (Juan 14:9). Aya kuʼxun, qa taja tuʼn tchʼiy mas tamiwbʼila tukʼil Jehová, tbʼanel qa ma kubʼ t-ximana tuʼn tok tojtzqiʼna mas te Jesús. Qa ma bʼant jlu tuʼna, mas kchʼiyil tkʼujlabʼila tiʼj Jehová ex ktela tzʼaqli twitz.

16. ¿Tiquʼn tbʼanel qa ma qo ten tzʼaqli? (Salmo 18:25; Miqueas 6:8).

¹⁶ Qa in nok tilil tuʼn jun xjal tuʼn tten tzʼaqli kywitz txqantl, jaku che ten tbʼanel tamiw aʼyeju kukx jaku che ten tukʼil (Rut 1:14-17). Ax ikx, qa ma qo ten tzʼaqli twitz Jehová, jaku kubʼ qnaʼn bʼaʼn. ¿Tiquʼn? Tuʼnju in tzaj tqʼamaʼn Jehová qa ktel tzʼaqli kyukʼil tamiw in che ten tzʼaqli twitz (kjawil uʼjit Salmo 18:25; Miqueas 6:8). In kubʼ qnaʼn nimxix tzalajbʼil aj tel qnikʼ tiʼj qa taj Jehová tuʼn tok te qamiw te jumajx maske mas chʼin qoklen twitz. Ex mintiʼ jun prueba jaku tzʼel paʼn qe tiʼj Jehová nix aju kamik (Dan. 12:13; Luc. 20:37, 38; Rom. 8:38, 39). Tuʼntzunju, tbʼanel tuʼn tel qkanoʼn tiʼj techel kyaj tqʼoʼn Daniel ex tuʼn qten tzʼaqli twitz Jehová.

17, 18. ¿Tiʼ mastl xnaqʼtzbʼil jaku tzʼel qiʼn tiʼj Daniel?

¹⁷ Toj xnaqʼtzbʼil lu, ma qo yolin kyiʼj kabʼe tmod Daniel. Pero jaku tzʼel qiʼn junjuntl tbʼanel xnaqʼtzbʼil tiʼj techel kyaj tqʼoʼn qwitz. Jun techel, xi tqʼoʼn Jehová toklen Daniel tuʼn tok tqʼoʼn twitz kyiʼj witzikʼ ex tuʼn t-xi tchikʼbʼaʼn junjun profecía. O japun kywi nim profecía tzaj tqʼamaʼn, atzun junjuntl in tzaj kyqʼoʼn tqanil qe tiʼjju kbʼajel kyiʼj xjal ex tiʼjju kbʼajel toj ambʼil tzul.

¹⁸ Toj juntl xnaqʼtzbʼil, qo yolil kyiʼj kabʼe profecía te libro te Daniel. Qa ma tzʼok tilil quʼn tuʼn tel qnikʼ kyiʼj ya sea kuʼxun qoʼ moqa nya, jaku tzʼonin qiʼj tuʼn tjaw qskʼoʼn aju mas tbʼanel. Ax ikx, che onil profecía lu qiʼj tuʼn qten tzʼaqli twitz Jehová ex tuʼn miʼn qtzaj xobʼ. Ex iktzun tten kbʼajel qbʼinchaʼn qten kyiʼj prueba chʼix qok weʼ kywitz.