XNAQʼTZBʼIL 31
BʼITZ 12 Nimxix toklena Jehová
Aju o bʼant tuʼn Jehová tuʼn kyklet xjal tiʼj il ex tiʼj kamik
«Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl» (JUAN 3:16).
¿TIʼ KʼELEL QNIKʼ TIʼJ?
Kʼelel qnikʼ tiʼj tiʼ o bʼant tuʼn Jehová tuʼn tonin qiʼj tuʼn tkubʼ tiʼj il quʼn. Ax ikx kʼelel qnikʼ tiʼj tiʼ o bʼant tuʼn tuʼn tten qchwinqlal te jumajx, jatumel miʼn tentl il.
1, 2. a) ¿Tiʼ aju il ex tzeʼn jaku kubʼ tiʼj quʼn? (Ax ikx qʼonka twitz tiʼj «Yol nim toklen») b) ¿Tiʼ kʼelel qnikʼ tiʼj toj xnaqʼtzbʼil lu ex kyoj junjuntl xnaqʼtzbʼil toj uʼj lu? (Ax ikx qʼonka twitza tiʼj «Nota kye qeju in che uʼjin tiʼj uʼj lu»).
¿TAJA tuʼn tel tnikʼa tiʼj jniʼ kʼujlaʼna tuʼn Jehová? Jaku tzʼel tnikʼa tiʼj qa ma xnaqʼtzana tiʼjju o bʼant tuʼn tuʼn tkleta tiʼj il ex tiʼj kamik. Aju il, jun aj qʼoj qiʼj ex mlay kubʼ tiʼj quʼn qjunalx. a Nya tzʼaqli qoʼ ex tkyaqil qʼij in kubʼ qbʼinchaʼn il, tuʼntzunju in qo kyim (Rom. 5:12). Pero qʼuqli qkʼuʼj tiʼj qa jaku kubʼ tiʼj il quʼn noq tuʼn tonbʼil Jehová.
2 Ma tzikʼ junlo 6 mil abʼqʼi in nonin Jehová kyiʼj xjal tuʼn tkubʼ tiʼj il kyuʼn. ¿Tiquʼn? Tuʼnju kʼujlaʼnxix qe tuʼn. Atxix tej qkubʼ tbʼinchaʼn o qo ok tkʼujlaʼn ex tuʼntzunju o che bʼant junjun tiʼchaq tuʼn tuʼn tonin qiʼj. Ojtzqiʼn tuʼn Dios qa in qo kyim tuʼn il ex nya taj tuʼn tbʼaj jlu qiʼj, sino taj tuʼn qanqʼin te jumajx (Rom. 6:23). Ax jlu taj Dios tuʼn ttzaj tqʼoʼn teya. Toj xnaqʼtzbʼil lu kxel qqʼoʼn tzaqʼwebʼil tiʼj oxe xjel: Tnejel, ¿tiʼ bʼant tuʼn Jehová tuʼn ttzaj tqʼoʼn jun qʼuqbʼil kykʼuʼj xjal? Tkabʼin, ¿tiʼtoq in bʼant kyuʼn xjal ojtxe tuʼn ttzalaj Dios kyiʼj ex tuʼn kyxi laqʼeʼ ttxlaj maske aj il qe? Ex toxin, ¿tiʼ bʼant tuʼn Jesús tuʼn kyklet xjal tiʼj il ex tiʼj kamik?
¿TIʼ BʼANT TUʼN JEHOVÁ TUʼN TTZAJ TQʼOʼN JUN QʼUQBʼIL KYKʼUʼJ XJAL?
3. ¿Tiʼ bʼant tuʼn Adán ex Eva tuʼn kyok te aj il?
3 Tej tkubʼ tbʼinchaʼn Jehová Adán ex Eva tajtoq tuʼn kytzalaj. Tuʼntzunju, xi tqoʼn jun tbʼanel lugar jatumel tuʼn kyanqʼin, e kubʼ tmojbʼaʼn, xi tqʼamaʼn kye tuʼn tnoj twitz Txʼotxʼ kyuʼn kyukʼil xjal ex tuʼn tok Txʼotxʼ kyuʼn te jun paraíso, ik tzeʼn jardín te Edén. Oʼkx xi tqʼamaʼn kye tuʼn miʼn tbʼant jun tiʼ kyuʼn, ex xi tqʼamaʼn kye qa che kyimel qa mintiʼ ma che nimen. Ik tzeʼn o tzʼel qnikʼ tiʼj, ok tilil tuʼn jun nya bʼaʼn anjel tuʼn tsbʼun tiʼj Adán ex Eva tuʼnju mintiʼ ten tkʼujlabʼil kyiʼj ex tiʼj Jehová. Kubʼ kybʼinchaʼn il tuʼnju e nimen te Satanás ex mintiʼ ok qeʼ kykʼuʼj tiʼj Jehová, aju kubʼ tyekʼin tkʼujlabʼil kyiʼj. Tej tbʼaj jlu, japun twi tyol Jehová otoq txi tqʼamaʼn kye. Atxix toj ambʼil aju, e tijen ex e kyim (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Tiquʼn in nel tikʼun Jehová il ex tiquʼn in nonin qiʼj tuʼn tkubʼ tiʼj quʼn? (Romanos 8:20, 21).
4 Bʼisbʼajilxix aju bʼaj, pero o kyaj tzʼibʼin toj Biblia tuʼn tel qnikʼ tiʼj tiquʼn in nel tikʼunxix Jehová il. In qo el tpaʼn il tiʼj Jehová ex in qo kyim tuʼn (Is. 59:2). Tuʼntzunju kʼujlaʼn il tuʼn Satanás ex sbʼun tiʼj Adán tukʼil Eva, ex kukx in sbʼun qiʼj toj ambʼil jaʼlo. Kubʼlo t-ximen qa otoq kambʼan toj jardín te Edén, pero mintiʼ ojtzqiʼn tuʼn qa at nimxix tkʼujlabʼil Jehová. Mintiʼ kubʼ tchʼixpuʼn Jehová t-ximbʼetz at kyiʼj tyajil Adán ex Eva, tuʼntzunju, jurat naj kubʼ t-ximen tuʼn tten jun qʼuqbʼil kykʼuʼj tuʼnju kʼujlaʼn qe tuʼn (kjawil uʼjit Romanos 8:20, 21). Ojtzqiʼntoq tuʼn qa che tel junjun xjal kteltoq kykʼujlabʼil tiʼj ex che jyol onbʼil tuʼn tkubʼ tiʼj il kyuʼn. Tuʼnju tbʼanel Mambʼaj te Jehová ex a Bʼinchal kye xjal, ok tilil tuʼn tuʼn ttzaj tqʼoʼn jun tumel tuʼn kyxi laqʼeʼ xjal ttxlaj ex tuʼn tkubʼ tiʼj il ex kamik kyuʼn. ¿Tiʼ bʼant tuʼn?
5. ¿Alkye tten ex toj alkye ambʼil tzaj tqʼoʼn Jehová jun qʼuqbʼil kykʼuʼj xjal? (Génesis 3:15).
5 (Kjawil uʼjit Génesis 3:15). Jurat naj tzaj tqʼamaʼn Jehová qa kbʼel tnajsaʼn Satanás ex tzaj tqʼoʼn jun qʼuqbʼil kykʼuʼj xjal. Tzaj tqʼamaʼn Jehová qa tzul jun «tiyjil xuʼj» nim toklen ex aj tbʼet ambʼil kbʼeltoq pachʼuʼn Satanás tuʼn. Ex kxel tbʼinchaʼn tiʼj tkyaqil nya bʼaʼn tzaj tuʼn Satanás toj jardín te Edén (1 Juan 3:8). Pero oktoq ksufriril Tyajil xuʼj tuʼnju kʼokel kʼixbʼisaʼn tuʼn Satanás ex kkyimel. Tzultoq nimxix tbʼis Jehová tuʼn jlu, pero ikʼx kʼixkʼoj tuʼn tuʼnju kʼonil tuʼn kyklet nim millón xjal tiʼj il ex tiʼj kamik.
¿TIʼ BʼANT KYUʼN XJAL TOJ AMBʼIL OJTXE TUʼN KYXI LAQʼEʼ TTXLAJ JEHOVÁ EX TUʼN TTZALAJ KYIʼJ?
6. ¿Tiʼ bʼant tuʼn Abel ex Noé tuʼn kyok laqʼeʼ ttxlaj Jehová?
6 ¿Tzeʼn jaku che ok laqʼeʼ xjal ttxlaj Jehová maske aj il qe? Chʼinaq tzaj tyekʼin Jehová tzeʼn jakutoq bʼant kyuʼn. A Abel tnejel xjal ok qeʼ tkʼuʼj tiʼj Jehová, aju tkabʼ tkʼwal Adán tukʼil Eva. Ok tkʼujlaʼn Abel Jehová, tajtoq tuʼn ttzalaj tiʼj ex tajtoq tuʼn t-xi laqʼeʼ ttxlaj. Tuʼntzunju, kubʼ t-ximen tuʼn t-xi tqʼoʼn junjun t-rit te chojbʼil te Jehová. ¿Tzeʼn ela jlu toj twitz Jehová? «Tzajtzun tkeʼyin Qman ex o tzalaj tiʼj Abel tukʼix tiʼj toyaj» (Gén. 4:4). Ax ikx tej tikʼ ambʼil, tzalaj kyiʼj junjun chojbʼil xi kyqʼoʼn xjal te, aqeju ten kykʼujlabʼil tiʼj ex ok qeʼ kykʼuʼj tiʼj, ik tzeʼn Noé (Gén. 8:20, 21). Aju bʼaj kyiʼj xjal lu tzaj tyekʼin qa jakutoq chex laqʼeʼ xjal ttxlaj Jehová ex jakutoq tzalaj kyuʼn, maske aj il qe. b
7. ¿Tiʼ xnaqʼtzbʼil in nel qnikʼ tiʼj tej tkubʼ t-ximen Abrahán tuʼn t-xi tqʼoʼn tkʼwal te chojbʼil?
7 Ten qʼuqbʼil tkʼuʼj Abrahán tiʼj Jehová. Xi tqʼamaʼn Jehová tuʼn tbʼant jun tiʼ kwest tuʼn: Xi tqʼamaʼn te tuʼn t-xi tqʼoʼn Isaac, aju tkʼwal, te chojbʼil. Tzajlo nimxix tbʼis Abrahán tuʼn jlu, pero nimen te Jehová. Tej chʼixtoq tkubʼ tbʼyoʼn Abrahán tkʼwal, xi tqʼamaʼn Jehová te tuʼn miʼn tbʼant tuʼn. Ojtzqiʼn tuʼn Jehová jniʼ bʼis jakutoq kubʼ tnaʼn Abrahán qa ma kubʼ tbʼyoʼn tkʼwal. Aju bʼant tuʼn tzaj tyekʼin tiʼtoq kbʼantel tuʼn Jehová toj ambʼil tzul: Kxeltoq tqʼoʼn tkʼwal te chojbʼil tuʼnju at nimxix tkʼujlabʼil kyiʼj xjal (Gén. 22:1-18).
8. ¿Tiʼ tzaj kyyekʼin chojbʼil e bʼant tjaqʼ Tley Moisés? (Levítico 4:27-29; 17:11).
8 Tej tikʼ nim syent abʼqʼi, xi tqʼoʼn Jehová Ley kye aj Israel ex xi tqʼamaʼn kye tuʼn t-xi kyqʼoʼn txkup te chojbʼil tuʼntzun tkubʼ tnajsaʼn kyil (kjawil uʼjit Levítico 4:27-29; 17:11). Tzaj tyekʼin jlu qa kxeltoq tqʼoʼn Jehová jun chojbʼil mas tbʼanel kywitz chojbʼil lu tuʼnju che kletel xjal tuʼn te jumajx tiʼj il. E ajbʼen qe profeta tuʼn Jehová tuʼn ttzaj tchikʼbʼaʼn qa aju Tyajil xuʼj, moqa aju oʼkxku jun Tkʼwal Dios, kʼokeltoq bʼinchaʼn nim nya bʼaʼn tiʼj ex kkyimel. Iktoq kʼokel ik tzeʼn jun rit in xi qʼoʼn te chojbʼil (Is. 53:1-12). Tzaj ttziyen Jehová tuʼn ttzaj tqʼoʼn Tkʼwal te jun chojbʼil tuʼn kyklet kykyaqil xjal tiʼj il ex tiʼj kamik.
¿TIʼ BʼANT TUʼN JESÚS TUʼN KYKLET XJAL?
9. ¿Tiʼ tzaj tqʼamaʼn Juan el Bautista? (Hebreos 9:22; 10:1-4, 12).
9 Toj abʼqʼi 29, tej tok tqʼoʼn Juan el Bautista twitz tiʼj Jesús tqʼama jlu: «Lu tzul ju Tal T-ẍneʼl Dios aju nneʼl qʼiʼn kyil xjal tuʼn» (Juan 1:29). Toj ambʼil lu, tzaj tyekʼin Dios qa a Jesús Tyajil xuʼj otoq tzaj ttziyen. Atoq Jesús kxel qʼonte tchwinqlal te chojbʼil, iktzun tten jakutoq kubʼ tiʼj il ex kamik te jumajx kyuʼn xjal (kjawil uʼjit Hebreos 9:22; 10:1-4, 12).
10. ¿Tzeʼn kubʼ tyekʼin Jesús qa ul txkol kye aj il?
10 Mas onin Jesús kyiʼj xjal kubʼ kynaʼn nya bʼaʼn tuʼn il kubʼ kybʼinchaʼn ex xi tqʼoʼn txokbʼil kyiʼj tuʼn kyok lepeʼ tiʼj. Ojtzqiʼntoq tuʼn qa tuʼn il in tzaj nya bʼaʼn kyiʼj kykyaqil xjal. Tuʼntzunju, ok tilil tuʼn tuʼn tok laqʼeʼ kyiʼj xjal in che bʼinchan il. Yolin tiʼj jun techel tej tqʼama jlu: «Qe xjal mya yabʼ, mya il tiʼj jun qʼanal kye, noq oʼkx qe xjal yabʼ». Ex tqʼamatl: «Mintiʼ ma chin ule txkol kye xjal tzʼaqlxix, noq oʼkx ma chin ule txkol kye aj il tuʼn tajtz tiʼj kyanmi» (Mat. 9:12, 13). Ex kubʼ tyekʼin jlu tukʼil tbʼinchbʼen, ik tzeʼn tej ttzaj qʼaqʼin tkʼuʼj tiʼj jun xuʼj el ttxʼajoʼn tiʼj tqan tukʼil taʼl twitz ex kubʼ tnajsaʼn til (Luc. 7:37-50). Ax ikx xi tyekʼin junjun xnaqʼtzbʼil nim toklen te jun xuʼj te Samaria, maske ojtzqiʼn tuʼn qa in bʼinchantoq il (Juan 4:7, 17-19, 25, 26). In che kyim xjal tuʼn il, pero xi tqʼoʼn Jehová tipumal Jesús tuʼn kyjaw anqʼin xinaq, xuʼj ex kʼwal tuʼn (Mat. 11:5).
11. ¿Tiquʼn kygantoq xjal in kubʼ kybʼinchaʼn il tuʼn kyxi laqʼeʼ ttxlaj Jesús?
11 Axpe ikx qe xjal e bʼinchal matij il, kygantoq tuʼn kyten ttxlaj Jesús. Mintiʼ in qo jaw labʼin tiʼj tiquʼn kygantoq tuʼn kyten ttxlaj Jesús, tuʼnju el tnikʼ kyiʼj ex kubʼ tyekʼin tbʼanel tmod kyukʼil (Luc. 15:1, 2). Ax ikx xi tqʼamaʼn tbʼanel yol kye ex ten kyukʼil tuʼnju ok qeʼ kykʼuʼj tiʼj (Luc. 19:1-10). Kubʼ tyekʼin Jesús qʼaqʼbʼil tkʼuʼj Ttat (Juan 14:9). Kyukʼil tyol ex kyukʼil tbʼinchbʼen tzaj tyekʼin qa kʼujlaʼn qoʼ tuʼn Jehová, qa in tzaj qʼaqʼin tkʼuʼj qiʼj ex qa taj tuʼn tonin qiʼj tuʼn tkubʼ tiʼj il quʼn. Tuʼnju bʼant tuʼn Jesús, kubʼ kyximen xjal in che bʼinchal il tuʼn tchʼexpaj kyanqʼibʼil ex tuʼn kyok lepeʼ tiʼj (Luc. 5:27, 28).
12. ¿Tiʼ tqʼama Jesús tiʼj tkyimlen?
12 Ojtzqintoq tuʼn Jesús tiʼ kʼokel bʼinchaʼn tiʼj. Nim maj xi tqʼamaʼn kye t-xnaqʼtzbʼen qa kʼokel bʼinchaʼn nya bʼaʼn tiʼj ex qa kbʼel bʼyoʼn twitz tzeʼ (Mat. 17:22; 20:18, 19). Pero ax ikx ojtzqiʼntoq tuʼn qa tuʼn chojbʼil kxel tqʼoʼn kbʼel najsaʼn kyil xjal, ik tzeʼn otoq tqʼama Juan ex qe txqantl profeta. Ax ikx tqʼama qa kykyaqil klas xjal kʼokel qeʼ kykʼuʼj tiʼj (Juan 12:32). Kykyaqil qeju kbʼantel jlu kyuʼn ex che okel lepeʼ tiʼj, jakutoq tzalaj Jehová kyuʼn ex jakutoq che tzoqpaj «tjaqʼ tipumal il» (Rom. 6:14, 18, 22; Juan 8:32). Tuʼn tbʼant jlu, ten tipumal Jesús ex xi tqʼoʼn ambʼil tuʼn tbʼaj kʼixbʼisaʼn tej tkubʼ bʼyoʼn (Juan 10:17, 18).
13. ¿Alkye tten kyim Jesús ex tiʼ in tzaj tyekʼin qe tiʼj Jehová? (Ax ikx qʼonka twitza kyiʼj tilbʼilal).
13 Xi kʼayin Jesús, xi qʼiʼn pres, xi qʼamaʼn nya bʼaʼn ex nya ax tok yol te, kubʼ qʼoʼn tsentens tuʼn tkyim ex bʼaj kʼixbʼisaʼn. Te mankbʼil, jaw qʼoʼn twitz tzeʼ kyuʼn soldad tuʼn tkubʼ bʼyoʼn. Ikʼx tkyaqil jlu tuʼn Jesús ex ten tzʼaqli, pero kux choʼn toj tanmi Jehová tej tok tqʼoʼn twitz tiʼj tkyaqilju ok bʼinchaʼn tiʼj Tkʼwal. Maske at nim tipumal Jehová ex kʼujlaʼn Jesús tuʼn, xi tqʼoʼn ambʼil tuʼn tbʼaj jlu tiʼj Tkʼwal. Tqʼama Jesús tiquʼn: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:16).
Ikʼx nimxix kʼixkʼoj tuʼn Jehová tej ttzaj tqʼoʼn ambʼil tuʼn tkubʼ bʼyoʼn Tkʼwal tuʼntzun qtzaqpaj tiʼj il ex tiʼj kamik. (Qʼonka twitza tiʼj párrafo 13).
14. ¿Tiʼ in tzaj tyekʼin chojbʼil bʼant tuʼn Jesús?
14 Aju chojbʼil bʼant tuʼn Jesús, atzun jun yekʼbʼil tiʼj nimxix tkʼujlabʼil Jehová at kyiʼj tyajil Adán ex Eva. Ax ikx in tzaj tyekʼin qa nimxix kʼujlaʼna tuʼn. Xi tqʼoʼn Tkʼwal, aju kʼujlaʼnxix tuʼn, te chojbʼil ex ikʼx nim kʼixkʼoj tuʼn tuʼn tkleta tiʼj il ex tiʼj kamik (1 Juan 4:9, 10). Taj Jehová tuʼn tonin tiʼj teyele junjun qe tuʼn tkubʼ tiʼj il quʼn.
15. ¿Tiʼ il tiʼj tuʼn tbʼant quʼn tuʼn tonin chojbʼil qiʼj?
15 Tzaj tqʼoʼn Jehová oʼkxku jun Tkʼwal te chojbʼil tuʼn tnajset qil. Pero ax ikx qe il tiʼj tuʼn tbʼant jun tiʼ quʼn. Tqʼama Jesús ex Juan el Bautista tiʼ tuʼn tbʼant quʼn tej kyqʼama: «Tajtz tiʼj kyanmiye, porke ma tzul laqʼeʼ ju kawbʼil in tzaj tuj kyaʼj» (Mat. 3:1, 2; 4:17). Qa ax tok qaj tuʼn tkubʼ tiʼj il quʼn ex tuʼn qxi laqʼeʼ ttxlaj Jehová, nim toklen tuʼn tajtz tiʼj qanmi. Pero, ¿tiʼ t-xilen tuʼn tajtz tiʼj qanmi ex tzeʼn in nonin qiʼj tuʼn ttzalaj Jehová qiʼj maske aj il qoʼ? Kxel qqʼoʼn tzaqʼwebʼil tiʼj xjel lu toj juntl xnaqʼtzbʼil.
BʼITZ 18 Chjonte tuʼn chojbʼil
a YOL NIM TOKLEN: Aj tyolin Biblia tiʼj il, mintiʼ in yolin tkyaqil maj tiʼj il in kubʼ kybʼinchaʼn xjal. Jun techel, in kubʼ qbʼinchaʼn jun il qa in kubʼ qbʼinchaʼn jun nya bʼaʼn toj twitz Jehová moqa mintiʼ in kubʼ qbʼinchaʼn jun tiʼ in tzaj tqʼamaʼn qe. Ax ikx in yolin tiʼj il o tzʼel qiqen tiʼj Adán aju in che kyim xjal tuʼn.
