1. ¿Tiʼ in bʼant tuʼn jun xjal in najtz tiʼj tanmi?

 AJ TKUBʼ qbʼinchaʼn jun nya bʼaʼn, nim toklen tuʼn tajtz tiʼj qanmi. In tzaj tqʼamaʼn Biblia qa aj tajtz tiʼj tanmi jun xjal in nel tikʼun aju nya bʼaʼn otoq kubʼ tbʼinchaʼn. In kyaj tkolin aju nya bʼaʼn tbʼinchbʼen ex in kubʼ t-ximen tuʼn miʼn tkubʼ tbʼinchaʼn juntl maj (qʼonka twitza tiʼj yol «arrepentimiento» toj Glosario at toj TNM).

2. ¿Tiquʼn qkyaqilx il tiʼj tuʼn tel qnikʼ tiʼj qa nim toklen tuʼn tajtz tiʼj qanmi? (Nehemías 8:​9-11).

² Qkyaqilx il tiʼj tuʼn tel qnikʼ tiʼj tiʼ t-xilen tuʼn tajtz tiʼj qanmi. ¿Tiquʼn? Tuʼnju in kubʼ qbʼinchaʼn nya bʼaʼn tkyaqil qʼij. Ex tuʼnju tzajni qoʼ tiʼj Adán ex Eva qkyaqilx aj il qoʼ ex in qo kyim (Rom. 3:23; 5:12). Ni jun jaku txi tqʼamaʼn qa nya aj il. Axpe ikx qe xjal ten nim qʼuqbʼil kykʼuʼj ik tzeʼn apóstol Pablo, ok tilil kyuʼn tuʼn miʼn kykubʼ tzʼaq toj il (Rom. 7:​21-24). Pero nya t-xilen lu qa tkyaqil qʼij kbʼel qnaʼn bʼis tuʼn nya bʼaʼn in kubʼ qbʼinchaʼn. At nim qʼaqʼbʼil tkʼuʼj Jehová ex taj tuʼn qtzalaj. Qo ximen kyiʼj qe judiy e anqʼin toj tqʼijlalil Nehemías (kjawil uʼjit Nehemías 8:​9-11). Nyatoq taj Jehová tuʼn ttzaj bʼajxix kykʼuʼj judiy kyiʼj il otoq bʼant kyuʼn, sino tajtoq tuʼn kytzalaj tej kykʼulin te. Ojtzqiʼn tuʼn Jehová qa kbʼel qnaʼn tzalajbʼil qa ma tzʼajtz tiʼj qanmi, tuʼntzunju in tzaj tqʼoʼn xnaqʼtzbʼil qe tiʼj tzeʼn jaku tzʼajtz tiʼj qanmi. In nok qeʼ qkʼuʼj tiʼj qa kbʼel tnajsaʼn Jehová qil qa ma tzʼajtz tiʼj qanmi tuʼnju at nim qʼaqʼbʼil tkʼuʼj.

3. ¿Tiʼ kʼelel qnikʼ tiʼj toj xnaqʼtzbʼil lu?

³ Toj xnaqʼtzbʼil lu kʼelel mas qnikʼ tiʼjju tuʼn tajtz tiʼj qanmi. Tnejel, qo yolil tiʼj xnaqʼtzbʼil xi tyekʼin Jehová kye israelita tiʼjju tuʼn tajtz tiʼj qanmi. Yajxitl qo yolil tiʼj tzeʼn onin Jehová kyiʼj xjal tuʼn tajtz tiʼj kyanmi. Ex te mankbʼil qo  yolil tiʼj tiʼ xnaqʼtzbʼil el kyiʼn t-xnaqʼtzbʼen Jesús tiʼjju tuʼn tajtz tiʼj qanmi.

AJU XI T-XNAQʼTZAʼN JEHOVÁ KYE ISRAELITA TIʼJJU TUʼN TAJTZ TIʼJ QANMI

4. ¿Tiʼ xi t-xnaqʼtzaʼn Jehová kye israelita tiʼjju tuʼn tajtz tiʼj kyanmi?

⁴ Tej kyok tqʼoʼn Jehová israelita te ttnam, kyaj bʼant tiʼj jun tyol kyukʼil. Xi ttziyen Jehová kye qa kyxqʼuqiltoq kyiʼj ex qa che xeltoq tkʼiwlaʼn, pero oʼkx qa ma txi kyniman qe tley. Tqʼama jlu kye: «Aju mandamyent in xi nmaʼne kyeye jaʼlo mya kyuw te kyeye, ex mya mlay bʼant kyuʼne» (Deut. 30:​11, 16). Pero qa mintiʼtoq ma che nimen te Jehová, ik tzeʼn qa ma che ajbʼen kye junjuntl dios, mlaytoq tzalaj Jehová kyiʼj ex tzultoq nya bʼaʼn kyiʼj. Qa ma bʼant jlu kyuʼn, ¿ape t-xilen jlu qa mlayx tzalaj Jehová juntl maj kyiʼj? Nya, tuʼnju in tzaj tqʼamaʼn ley qa jakutoq che meltzʼaj ex jakutoq txi kyniman tyol Jehová (Deut. 30:​1-3, 17-20). Toj juntl yol jakutoq tzʼajtz tiʼj kyanmi. Qa ma bʼant jlu kyuʼn, jakutoq txi laqʼeʼ Jehová juntl maj kytxlaj ex jakutoq che tzaj kʼiwlaʼn tuʼn.

5. ¿Tzeʼn kubʼ tyekʼin Jehová qa kukx tajtoq tuʼn tonin tiʼj ttnam? (2 Reyes 17:​13, 14).

⁵ Aju tnam jaw tskʼoʼn Jehová el tpan tibʼ nim maj tiʼj. Nya oʼkx e kʼulin kywitz junjuntl dios, ax ikx bʼant junjuntl nya bʼaʼn kyuʼn. Tuʼn jlu tzaj nim nya bʼaʼn kyiʼj. Pero kukx onin Jehová tiʼj ttnam otoq tzʼel tpaʼn tibʼ tiʼj. Xi tsamaʼn Jehová qe tprofeta jun ex juntl maj tuʼn tonin kyiʼj israelita tuʼn tajtz tiʼj kyanmi ex tuʼn kymeltzʼaj juntl maj tukʼil (kjawil uʼjit 2 Reyes 17:​13, 14).

6. ¿Tzeʼn e ajbʼen qe profeta tuʼn Jehová tuʼn t-xi tyekʼin te ttnam qa nim toklen tuʼn tajtz tiʼj tanmi? (Ax ikx qʼonka twitza tiʼj tilbʼilal).

⁶ Nim maj xi tsamaʼn Jehová qe tprofeta tuʼn kyxi tkawin israelitas ex tuʼn t-xi tqʼamaʼn kye qa tzultoq nya bʼaʼn kyiʼj qa mintiʼ ma che nimen. Jun techel, xi tqʼamaʼn jlu te profeta Jeremías tuʼn t-xi tqʼamaʼn kye israelita: «Kyajtz meltzʼaje  wukʼile aqeye aj Israel kypaʼn kyibʼe wiʼje. Mlay tzaj mastl nqʼoje kyiʼje, ex mya kukx chin qʼojile kyiʼje, tuʼnju at tqʼaqʼbʼil nkʼuʼje. Tzʼelx kynikʼe tiʼj ju mya bʼaʼn ma kybʼinchaye. Ma che oke mibʼan che nimane weye» (Jer. 3:​12, 13). Ex ajbʼen Joel tuʼn tuʼn tzaj tqʼamaʼn jlu: «Kyajtz meltzʼaje wukʼile tuʼn tkyaqil kyanmiye» (Joel 2:​12, 13). Ax ikx, xi tqʼamaʼn Jehová te Isaías tuʼn txi tqʼamaʼn qe yol lu: «Kytxʼjom kyibʼe ex kyiʼn ele aju tzʼil kyiʼje. Kyiʼn ele kybʼinchbʼene mya bʼaʼn nwitze ex kykolinxe tuʼn kybʼinchanteye mya bʼaʼn» (Is. 1:​16-19). Ex xi tqʼamaʼn Jehová jlu te Ezequiel: «Miʼn waje tuʼn tkyim xjal bʼinchal mya bʼaʼn, noq oʼkx waje tuʼn tbʼaj tchʼexpuʼn tnabʼl tuʼntzun tanqʼin. [ . . . ] Porke miʼn waje tuʼn tkyim jun kyeye. Kypaʼn el kyibʼe tiʼj ju mya bʼaʼn, tuʼntzun kyanqʼine» (Ezeq. 18:​23, 32). Nim tzalajbʼil in kubʼ tnaʼn Jehová aj tajtz tiʼj kyanmi xjal tuʼnju taj tuʼn kyanqʼin te jumajx. Pero, nya oʼkx in nayon Jehová tuʼn tbʼant chʼixpubʼil kyuʼn xjal, sino in nonin kyiʼj. Qo xnaqʼtzan kyiʼj junjuntl techel.

7. ¿Tiʼ xi t-xnaqʼtzan Jehová te ttnam tej tkubʼ tqʼoʼn techel tiʼj Oseas ex t-xuʼjil?

⁷ Qqʼonk qwitz tiʼjju xnaqʼtzbʼil xi tyekʼin Jehová te ttnam tej tajbʼen profeta Oseas tuʼn ex aju t-xuʼjil Gómer tbʼi. Kubʼ tbʼinchaʼn Gómer aj pajil ex yajxitl kyaj kolin Oseas tuʼn tuʼn txiʼ kyukʼil junjuntl xinaq. ¿Tiʼtoq t-xim Jehová tiʼj Gómer? Tuʼnju ojtzqiʼn tuʼn Jehová tiʼtoq at toj tanmi, xi tqʼamaʼn jlu te Oseas: «Txiʼya ex kʼujlama aju xuʼj at tyaẍ ex aj pajil, ik tzaʼn in che ok nkʼujlaʼne qe aj Israel maske in che ok lpeʼ kyiʼj junxitl dios» (Os. 3:1; Prov. 16:2). Bʼaʼn tuʼn ttzaj qnaʼn qa toj ambʼil aju kukxtoq in kubʼ tbʼinchaʼn Gómer il. Pero xi tqʼamaʼn Jehová te Oseas tuʼn tkubʼ tnajsaʼn til ex tuʼn tmeltzʼaj tukʼil. a Tukʼil techel lu xi tyekʼin Jehová te ttnam qa kukxtoq in ximen kyiʼj ex tajtoq tuʼn kymeltzʼaj juntl maj tukʼil. Maske kukxtoq in kubʼ kybʼinchan nim il, kukx e ok tkʼujlaʼn. Xi tsamaʼn qe tprofeta, onin kyiʼj tuʼn tajtz tiʼj kyanmi ex tuʼn tbʼaj kychʼexpuʼn kyanqʼibʼil. A jlu in tzaj tyekʼin qe qa ojtzqiʼnxix tuʼn Jehová tiʼ tkuʼx toj tanmi jun xjal ex tuʼntzunju kʼokel tilil tuʼn tuʼn tonin tiʼj tuʼn tajtz tiʼj tanmi maske kukx in kubʼ tbʼinchaʼn il (Prov. 17:3).

¿TZEʼN IN NONIN JEHOVÁ KYIʼJ QEJU O KUBʼ KYBʼINCHAʼN IL TUʼN TAJTZ TIʼJ KYANMI?

8. ¿Tiʼ bʼant tuʼn Jehová tuʼn tonin tiʼj Caín tuʼn tajtz tiʼj tanmi? (Génesis 4:​3-7; ax ikx qʼonka twitza tiʼj tilbʼilal).

⁸ A Caín tnejel kykʼwal Adán tukʼil Eva ex el tiqin il kyiʼj. Ax ikx in tzaj tqʼamaʼn Biblia qa «mya bʼaʼn aju tbʼinchbʼen» (1 Juan 3:12). Bʼalo tuʼn jlu mintiʼ tzalaj Jehová tiʼj ex tiʼj oyaj xi tqʼoʼn. Mintiʼ chʼexpaj tmod Caín, sino tzaj nim tqʼoj. ¿Tiʼ bʼant tuʼn Jehová? Yolin tukʼil tukʼil kʼujlabʼil (kjawil uʼjit Génesis 4:​3-7). Xi tqʼamaʼn te qa jakutoq tzalaj juntl maj tiʼj, ex xi tqʼamaʼn te qa jakutoq tzaj nya bʼaʼn tiʼj qa mintiʼ ma chʼexpaj tmod. Bʼisbʼajilxix tuʼnju mintiʼ xi tbʼiʼn Caín aju tzaj tqʼamaʼn Jehová te ex mintiʼ xi tkʼamoʼn onbʼil tuʼn tajtz tiʼj tanmi. ¿Tiʼ bʼant tuʼn Jehová tej mintiʼ xi tkʼamoʼn Caín onbʼil? ¿Kubʼpe t-ximen Jehová tuʼn miʼn tonin tiʼj ni juntl xjal tuʼn tajtz tiʼj tanmi? Mintiʼ.

9. ¿Tzeʼn onin Jehová tiʼj David tuʼn tajtz tiʼj tanmi?

 ⁹ Kʼujlaʼnxixtoq David tuʼn Jehová ex tqʼama jlu tiʼj: «Ate jlu jun xinaq ik tzaʼnx wajbʼile» (Hech. 13:22). Pero kubʼ tbʼinchaʼn David junjun matij il, ik tzeʼn yaẍbʼil ex kubʼ tbʼyoʼn jun xjal. In tqʼamaʼntoq Tley Moisés qa iltoq tiʼj tuʼn tkyim David (Lev. 20:10; Núm. 35:31). Pero tuʼnju tbʼanel tmod Jehová, kubʼ t-ximen tuʼn t-xi tsamaʼn profeta Natán tuʼn tyolin tukʼil David maske naʼmxtoq tajtz tiʼj tanmi. b Ajbʼen jun techel tuʼn Natán tuʼn tel tnikʼ David kyiʼj il bʼant tuʼn, ex el tnikʼ David tiʼj qa tzaj tbʼis Jehová tuʼn ex ajtz tiʼj tanmi (2 Sam. 12:​1-14). Kubʼ ttzʼibʼin jun salmo jatumel tqʼama qa nimxix bʼis kubʼ tnaʼn (Sal. 51, qe yol tkubʼ twi capítulo). Toj nimku ambʼil o tzʼonin salmo kyiʼj nim xjal o kubʼ kybʼinchan jun il ex o tzʼonin kyiʼj tuʼn tajtz tiʼj kyanmi. In kubʼ qnaʼn nim tzalajbʼil tuʼnju kubʼ tyekʼin Jehová tkʼujlabʼil tiʼj David ex onin tiʼj tuʼn tajtz tiʼj tanmi.

10. ¿Tiʼ in kubʼ tnaʼna aj tel tnikʼa tiʼj qa at tpasens Jehová qiʼj ex qa in kubʼ tnajsaʼn qil?

¹⁰ In nel tikʼun Jehová tkyaqil il (Sal. 5:​4, 5). Pero ax ikx ojtzqiʼn tuʼn qa qkyaqilx aj il qoʼ, ex taj tuʼn tonin qiʼj qa ma kubʼ qbʼinchaʼn jun il tuʼnju kʼujlaʼn qoʼ tuʼn. Axpe ikx, in nok tilil tuʼn tuʼn tonin kyiʼj qeju in kubʼ kybʼinchaʼn jun matij il tuʼn tajtz tiʼj kyanmi ex tuʼn kyok laqʼeʼ ttxlaj. ¡Nim tzalajbʼil in kubʼ qnaʼn tuʼn jlu! Aj qximen tiʼj tpasens Jehová ex aj tel qnikʼ tiʼj qa in kubʼ tnajsaʼn qil, in nonin qiʼj tuʼn qten tzʼaqli twitz ex tuʼn tajtz tiʼj qanmi jun rat naj aj tkubʼ qbʼinchaʼn jun il. Jaʼlo, qo xnaqʼtzan tiʼj tiʼ xnaqʼtzbʼil el kyiʼn qe t-xnaqʼtzbʼen Jesús tiʼjju tuʼn tajtz tiʼj qanmi.

AJU XNAQʼTZBʼIL EL KYIʼN T-XNAQʼTZBʼEN JESÚS TIʼJJU TUʼN TAJTZ TIʼJ QANMI

11, 12. ¿Alkye techel ajbʼen tuʼn Jesús tuʼn ttzaj tyekʼin qa tajxix Jehová tuʼn tkubʼ tnajsaʼn qil? (Ax ikx qʼonka twitza tiʼj tilbʼilal).

¹¹ Toj tnejel syent abʼqʼi pon ambʼil tuʼn tul Mesías. Ik tzeʼn el qnikʼ tiʼj toj xnaqʼtzbʼil o kyaj, ajbʼen Juan el Bautista ex  Jesús tuʼn Jehová tuʼn t-xi kyyekʼin kye xjal qa nim toklen tuʼn tajtz tiʼj kyanmi (Mat. 3:​1, 2; 4:17).

¹² Tej tten Jesús tzalu twitz Txʼotxʼ, xi t-xnaqʼtzaʼn qa tajxix Tman tuʼn tkubʼ tnajsaʼn qil. Bʼant jlu tuʼn tej tyolin tiʼj jun techel in yolin tiʼj jun qʼa ex oq tja. Kubʼ t-ximen qʼa lu tuʼn tex oq tja ex tuʼn tkubʼ tbʼinchan nim nya bʼaʼn. Pero tej tikʼ ambʼil, kubʼ ten ximel ex meltzʼaj tja. ¿Tiʼ bʼant tuʼn mambʼaj? Tqʼama Jesús qa tej «naʼnxtoq tkanun, o ilwaj tuʼn tman, tzaj qʼaqʼan tkʼuʼj tman tiʼj, ex xiʼ qelan kanul tiʼj, tzaj tchleʼn, ex el ttzʼubʼan twitz». Kubʼ t-ximen qʼa tuʼn t-xi tqʼamaʼn te tman qa jaku tzʼok te jun tmajen. Pero tajtoq mambʼaj tuʼn tkubʼ tnajsaʼn til ex tuʼn tok juntl maj te tkʼwal. Tqʼamaʼn lu: «Porke aju nkʼwaʼle lu [ . . . ] tzpetnitoq ex ma knet» (Luc. 15:​11-32). Tej naʼmxtoq tul Jesús tzalu twitz Txʼotxʼ, nimku maj ok tqʼoʼn twitz tiʼj tzeʼn kubʼ tyekʼin Jehová qʼaqʼbʼil tkʼuʼj kyiʼj xjal kubʼ kybʼinchaʼn il ex otoq tzʼajtz tiʼj kyanmi. Tuʼntzunju, ajbʼen jun tbʼanel techel tuʼn Jesús tuʼn ttzaj tyekʼin qe qa at nimxix qʼaqʼbʼil tkʼuʼj Jehová.

13, 14. ¿Tiʼ xnaqʼtzbʼil el tnikʼ Pedro tiʼjju tuʼn tajtz tiʼj qanmi ex tiʼ xi t-xnaqʼtzaʼn tiʼj lu? (Ax ikx qʼonka twitza tiʼj tilbʼilal).

¹³ El tiʼn Pedro nim xnaqʼtzbʼil tiʼj Jesús tiʼj tzeʼn in kubʼ tnajsaʼn Jehová kyil qeju in najtz tiʼj kyanmi. Nim maj el txalpaj Pedro, atzunte Jesús kukx tajtoq tuʼn tkubʼ tnajsaʼn til. Jun techel, tqʼama oxe maj qa mintiʼ ojtzqiʼn Jesús tuʼn ex yajxitl tzaj nimxix tbʼis tuʼn (Mat. 26:​34, 35, 69-75). Pero tej otoqxi jaw anqʼin Jesús, kubʼ tyekʼin tibʼ twitz Pedro ex bʼalo tjunalxtoq at (Luc. 24:​33, 34; 1 Cor. 15:​3-5). Ojtzqiʼntoq tuʼn Jesús qa otoq tzʼajtz tiʼj tanmi Pedro, tuʼntzunju, xi tqʼuqbʼaʼn tkʼuʼj ex xi tqʼamaʼn te qa otoq kubʼ tnajsaʼn til.

 ¹⁴ Ok tqʼoʼn Pedro twitz tiʼj tzeʼn kubʼ najsaʼn til tuʼnju ajtz tiʼj tanmi. Tuʼnju bʼaj jlu tiʼj, xi tqʼoʼn xnaqʼtzbʼil kye txqantl tiʼj lu. Tej otoq tzikʼ Ninqʼij te Pentecostés, ex tqʼoʼn jun chikʼbʼabʼil kye nimku xjal judiy atz jatumel xi tqʼamaʼn kye qa kyuʼn otoq kyim Mesías. Pero tukʼil kʼujlabʼil tqʼamaʼntl jlu kye: «Tajtztzun tiʼj kyanmiye, ex kyajtz meltzʼaje tukʼil Dios tuʼn tkubʼ najset kyile; tuʼntzun ttzaj tqʼoʼn Qman tqʼijlalil chewsabʼl» (Hech. 3:​14, 15, 17, 19). Kyukʼil yol lu tzaj tyekʼin Pedro qa at jun xjal in najtz tiʼj tanmi, il tiʼj tuʼn tqʼon welt, toj juntl yol, tuʼn tbʼaj tchʼexpuʼn t-ximbʼetz, tuʼn tkyaj ttzaqpiʼn nya bʼaʼn tbʼe ex tuʼn tkubʼ tbʼinchaʼn aju bʼaʼn toj twitz Dios. Ax ikx, tqʼamatl apóstol Pedro qa kbʼeltoq tnajsaʼn Jehová til jun xjal te jumajx. Ex tej tikʼ nim ambʼil tqʼama jlu: «Noq oʼkx tuʼnju at tpasens qiʼj, porke miʼn tajbʼil Qajaw tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Ped. 3:9). ¡In kubʼ qnaʼn nim tzalajbʼil aj tel qnikʼ tiʼj qa jaku kubʼ tnajsaʼn Jehová qil te jumajx, axpe ikx qa ma kubʼ qbʼinchaʼn jun matij il!

15, 16. a) ¿Tiʼ xnaqʼtzbʼil el tiʼn Pablo tiʼjju tej tkubʼ najsaʼn til? (1 Timoteo 1:​12-15). b) ¿Tiʼ kʼelel qnikʼ tiʼj toj juntl xnaqʼtzbʼil?

¹⁵ Nya nim xjal in kubʼ najsaʼn kyil ik tzeʼn te Saulo te Tarso tuʼnju bʼant nim nya bʼaʼn tuʼn, pero ajtz tiʼj tanmi. Ok tbʼinchaʼn nimxix nya bʼaʼn kyiʼj tdiscípulo Jesús. Tuʼntzunju, kubʼ kyximen chʼixmi kykyaqil okslal qa mlaytoq chʼexpaj tanqʼibʼil. Pero ojtzqiʼntoq tuʼn Jesús qa jakutoq chʼexpaj tmod ex qa jakutoq tzʼajtz tiʼj tanmi. El tnikʼ Jesús ex Jehová tiʼj tbʼanel tmod Saulo, tuʼntzunju tqʼama Jesús jlu tiʼj: «Porke nmajene jlu skʼoʼmaj wuʼne» (Hech. 9:15). Axpe ikx ajbʼen jun milagro tuʼn tuʼn tonin tiʼj tuʼn tajtz tiʼj tanmi (Hech. 7:58–8:3; 9:​1-9, 17-20). Tej tikʼ ambʼil, ok Saulo te okslal ex ok ojtzqiʼn twitz te apóstol Pablo. Tuʼn jlu nim maj xi tqʼoʼn chjonte tuʼnju kubʼ tyekʼin Jehová ex Jesús nim qʼaqʼbʼil tkʼuʼj tiʼj (kjawil uʼjit 1 Timoteo 1:​12-15). Tqʼama Pablo jlu: «Ate Dios in txokon teya tuʼn tajtz tiʼj tanmiya tuʼnju at nim t-xtalbʼil» (Rom. 2:4).

¹⁶ Jun maj, ok tbʼiʼn Pablo qa attoq jun nya bʼaʼn in tzaj toj congregación te Corinto tuʼnju in xitoq kyqʼoʼn ambʼil te jun xjal in yaẍin tuʼn kukx tten kyxol. Pero, ¿tzeʼn xi tbʼinchaʼn Pablo tiʼj jlu? Jaku tzʼel qiʼn nim xnaqʼtzbʼil tiʼjju xi tqʼamaʼn Pablo kye. In tzaj tyekʼin jniʼ tkʼujlabʼil Jehová at, jniʼ qʼaqʼbʼil tkʼuʼj at ex tzeʼn kawbʼil in xi qʼoʼn te jun xjal in najtz tiʼj tanmi. Qo yolil tiʼj jlu toj juntl xnaqʼtzbʼil.