XNAQʼTZBʼIL 35
BʼITZ 123 Qo nimen ex qo onin tiʼj nukʼbʼil o kubʼ tqʼoʼn Dios
¿Tzeʼn jaku che onin ansyan kyiʼj qeju o che ex qʼiʼn toj congregación?
«Mas che tzalajel qeju ateʼ tuj kyaʼj tiʼj jun aj il qa ma tzʼajtz tiʼj tanmi, kywitz qeju 99 xjal tuj kywitz qa tzʼaqlxix qe ex mya il tiʼj tuʼn tajtz tiʼj kyanmi» (LUC. 15:7).
¿TIʼ KʼELEL QNIKʼ TIʼJ?
Kʼelel qnikʼ tiʼj tiquʼn in che ex qʼiʼn junjun xjal toj congregación ex tzeʼn jaku che onin ansyan kyiʼj tuʼn tajtz tiʼj kyanmi ex tuʼn tten kyamiwbʼil juntl maj tukʼil Jehová.
1, 2. a) ¿Tiʼ t-ximbʼetz Jehová at kyiʼj qeju in kubʼ kybʼinchaʼn jun il ex mintiʼ in najtz tiʼj kyanmi? b) ¿Tiʼ taj Jehová tuʼn tbʼant kyuʼn xjal o kubʼ kybʼinchaʼn jun matij il?
MINTIʼ in xi tqʼoʼn Jehová ambʼil te nya bʼaʼn ex in nel tikʼun il (Sal. 5:4-6). Taj tuʼn t-xi qbʼiʼn qe tbʼanel consej o tzaj tqʼoʼn qe toj Biblia. Mintiʼ in nayon Jehová tuʼn qok te tzʼaqli tuʼnju aj il xjal qo (Sal. 130:3, 4). Pero in nel tikʼun qe xjal «mya nimal Dios qe, in kyaj kykolin t-xtalbʼil Qdios, ex in xi kyqʼon kyibʼ tuʼn kybʼinchante tkyaqilju kyajbʼil» (Jud. 4). In tzaj tqʼamaʼn Biblia qa kbʼel tnajsaʼn Jehová qeju «mya nimal Dios» toj qʼoj Armagedón (2 Ped. 3:7; Apoc. 16:16).
2 Nya taj Jehová tuʼn tnaj ni jun xjal. Ik tzeʼn o tzʼel qnikʼ tiʼj kyoj xnaqʼtzbʼil o che kyaj, taj Jehová «tuʼn tajtz tiʼj kyanmi kykyaqil» (2 Ped. 3:9). In nel kykanoʼn ansyan tiʼj Jehová, tuʼnju in che onin kyiʼj tuʼn tajtz tiʼj kyanmi ex tuʼn tten kyamiwbʼil juntl maj tukʼil. Pero, nya kykyaqil in xi kykʼamoʼn onbʼil lu (Is. 6:9). Tuʼnju ateʼ junjun mintiʼ in bʼant chʼixpubʼil kyuʼn, maske in nok tilil kyuʼn ansyan tuʼn kyonin kyiʼj tuʼn tajtz tiʼj kyanmi. ¿Tiʼ jaku bʼant kyuʼn ansyan qa in bʼaj jlu?
«KYIʼMELE KYXOLE»
3. a) Ik tzeʼn in tzaj tqʼamaʼn Biblia, ¿tiʼ il tiʼj tuʼn tbʼant kyuʼn ansyan qa mintiʼ in najtz tiʼj tanmi jun erman? b) Qa mintiʼ in najtz tiʼj tanmi jun xjal, ¿tiquʼn in xi qqʼamaʼn qa tuʼnx in nex tin tibʼ toj congregación?
3 Qa in kubʼ tbʼinchaʼn jun erman jun matij il ex mintiʼ in najtz tiʼj tanmi, il tiʼj tuʼn t-xi kybʼinchaʼn ansyan aju in tzaj tqʼamaʼn 1 Corintios 5:13: «Aju xjal bʼinchal mya bʼaʼn, kyiʼmele kyxole». Toj juntl yol, jaku txi qqʼamaʼn qa tuʼnx xjal in nex tin tibʼ toj congregación. In jaw tchmoʼn aju in kuʼx tawaʼn (Gál. 6:7). ¿Tiquʼn? Tuʼnju mintiʼ xi tkʼamoʼn onbʼil xi kyqʼoʼn ansyan nimku maj te (2 Rey. 17:12-15). Tukʼil tbʼinchbʼen in kubʼ tyekʼin qa nya taj tuʼn t-xi tnimen qe tkawbʼil Jehová (Deut. 30:19, 20).
4. Aj tex qʼiʼn jun xjal toj congregación, ¿tiquʼn in nex qʼoʼn jun tqanil?
4 Qa mintiʼ in najtz tiʼj tanmi jun xjal, in nex qʼiʼn toj congregación ex in netz qʼoʼn jun tqanil qa nyatl testigo de Jehová. a Mintiʼ in xi bʼinchaʼn jlu tuʼn tkubʼ tchʼixwi, sino tuʼn t-xi kybʼiʼn erman aju in tzaj tqʼamaʼn Biblia: Tuʼn miʼn tok kymojbʼan kyibʼ tukʼil ex tuʼn miʼn kywan tukʼil (1 Cor. 5:9-11). Tzaj tqʼamaʼn Jehová jlu tuʼnju taj tuʼn t-xqʼuqin qiʼj. Kubʼ ttzʼibʼin apóstol Pablo jlu: «¿Mintiʼpe bʼaʼn kyuʼne, tkyaqil tqʼotjil pan in jaw mal tkʼuʼj tuʼn chʼin t-samel?» (1 Cor. 5:6). Qa ma txi qʼoʼn ambʼil te jun xjal mintiʼ in najtz tiʼj tanmi tuʼn kukx tten toj congregación, jaku kubʼ kyximen erman qa nya il tiʼj tuʼn kyjapun qe tkawbʼil Jehová kyuʼn (Prov. 13:20; 1 Cor. 15:33).
5. ¿Tiʼ qximbʼetz ktel tiʼj jun xjal in nex qʼiʼn toj congregación ex tiquʼn?
5 Aj tex qʼiʼn jun xjal toj congregación, ¿tiʼ qximbʼetz ktel tiʼj? Maske ya mintiʼ in nok qmojbʼan qibʼ tukʼil, mintiʼ in kubʼ qximen qa mlay meltzʼaj. Tuʼnju ik tten ik tzeʼn jun rit in xi tzʼaq, aju jaku meltzʼaj juntl maj. Bʼaʼn tuʼn ttzaj qnaʼn qa xi ttziyen te Jehová tuʼn tajbʼen te. Ax tok, bʼisbʼajilxix tuʼnju ya mintiʼ in najbʼen te Jehová jaʼlo ik tzeʼn xi ttziyen te ex jaku tzaj nya bʼaʼn tiʼj tuʼn jlu (Ezeq. 18:31). Pero qa kukx atx ambʼil ex kukx taj Jehová tuʼn tkubʼ tnajsaʼn til xjal, jaku meltzʼaj juntl maj. Pero, ¿tzeʼn jaku che onin ansyan kyiʼj qeju o che ex qʼiʼn toj congregación tuʼn kymeltzʼaj juntl maj?
¿TIʼ JAKU BʼANT KYUʼN ANSYAN TUʼN KYONIN KYIʼJ QEJU O CHE EX QʼIʼN TOJ CONGREGACIÓN?
6. ¿Tiʼ in bʼant kyuʼn ansyan tuʼn kyonin tiʼj xjal o tzʼex qʼiʼn toj congregación?
6 Aj tex qʼiʼn jun xjal toj congregación, ¿tiʼ in bʼant kyuʼn ansyan? ¿In kyajpe kykolin ex ya mintiʼ in che onin tiʼj tuʼn tmeltzʼaj? Mintiʼ. Aj t-xi tqʼamaʼn comité te xjal qa kʼelex qʼiʼn toj congregación, kxel kyqʼamaʼn te tiʼ tuʼn tbʼant tuʼn tuʼn tmeltzʼaj juntl maj. Pero nya oʼkx jlu kbʼantel kyuʼn, sino kxel kyqʼamaʼn te xjal qa kyaj tuʼn tok kychmon kyibʼ tukʼil aj tikʼ junjun xjaw, tuʼntzun tok kyqʼoʼn kywitz tiʼj qa otoq chʼexpaj tmod. Qa ma txi tkʼamoʼn onbʼil, kʼokel tilil kyuʼn ansyan tuʼn kyonin tiʼj tukʼil kʼujlabʼil tuʼn tajtz tiʼj tanmi ex tuʼn tmeltzʼaj. ¿Yajtzun qa naʼmx tchʼexpaj tmod? Maske ikju, kukx kʼokel tilil kyuʼn ansyan tuʼn tok kychmon kyibʼ tukʼil tuʼn kyonin tiʼj.
7. ¿Tzeʼn in nel kykanoʼn ansyan qʼaqʼbʼil tkʼuʼj Jehová aj kyonin tiʼj xjal o tzʼex qʼiʼn toj congregación? (Jeremías 3:12).
7 Kʼokel tilil kyuʼn ansyan tuʼn tel kykanoʼn tiʼj qʼaqʼbʼil tkʼuʼj Jehová aj kyonin tiʼj xjal in nex qʼiʼn toj congregación. Jun techel, toj ambʼil ojtxe kukx onin Jehová kyiʼj israelita maske naʼmxtoq tajtz tiʼj kyanmi ex xi tsamaʼn qe tprofeta tuʼn kyonin kyiʼj maske naʼmxtoq chʼexpaj kyximbʼetz. Ik tzeʼn el qnikʼ tiʼj toj tkabʼin xnaqʼtzbʼil toj uʼj lu, ajbʼen tuʼn Jehová aju bʼaj tij profeta Oseas tuʼn ttzaj tyekʼin qa at nim qʼaqʼbʼil tkʼuʼj. Xi tqʼamaʼn te Oseas tuʼn tmeltzʼaj juntl maj tukʼil t-xuʼjil, maske kukxtoq in bʼinchan il (Os. 3:1; Mal. 3:7). Ik tzeʼn te Jehová, kyajxix ansyan tuʼn tajtz tiʼj tanmi xjal ex tuʼn tmeltzʼaj juntl maj toj ttnam, tuʼntzunju in che onin tiʼj (kjawil uʼjit Jeremías 3:12).
8. Tuʼn tel qnikʼ tiʼj qʼaqʼbʼil tkʼuʼj Jehová, ¿tzeʼn in nonin qiʼj aju txʼolbʼabʼil tiʼj kʼwal ex oq tja? (Lucas 15:7).
8 Ax ikx bʼaʼn tuʼn ttzaj qnaʼn txʼolbʼabʼil tiʼj kʼwal ex oq tja, aju ma qo yolin tiʼj toj tkabʼin xnaqʼtzbʼil. Tej «naʼnxtoq tkanun, o ilwaj tuʼn tman, tzaj qʼaqʼan tkʼuʼj tman tiʼj, ex xiʼ qelan kanul tiʼj, tzaj tchleʼn, ex el ttzʼubʼan twitz» (Luc. 15:20). Mintiʼ ayon ttat tuʼn t-xi tqanin tkʼwal najsam te, sino kubʼ tnajsaʼn til, ik tzeʼn jaku bʼant tuʼn alkyexku mambʼaj at tkʼujlabʼil. Ax jlu in kubʼ kynaʼn ansyan kyiʼj qeju o tzʼel kypaʼn kyibʼ tiʼj Jehová. In nok tilil kyuʼn tuʼn kyonin kyiʼj tuʼn kymeltzʼaj (Luc. 15:22-24, 32). Ex aj tmeltzʼaj jun xjal toj ttnam Jehová, at tzalajbʼil toj kyaʼj ex twitz Txʼotxʼ (kjawil uʼjit Lucas 15:7).
9. ¿Tiʼ txokbʼil in xi tqʼoʼn Jehová kyiʼj qeju o kubʼ kybʼinchaʼn jun matij il?
9 Ik tzeʼn ma tzʼel qnikʼ tiʼj toj xnaqʼtzbʼil lu, mintiʼ in xi tqʼoʼn Jehová ambʼil te jun xjal mintiʼ in najtz tiʼj tanmi tuʼn kukx tten toj ttnam, pero taj tuʼn kukx tonin tiʼj. Toj Oseas 14:4 in nok qqʼoʼn qwitz tiʼj tiʼ t-ximbʼetz Jehová at kyiʼj qeju in najtz tiʼj kyanmi: «Che okel nkʼujlaʼne, maske mya bʼaʼn qe, porke mintiʼtl nqʼoje kyiʼj». Bʼaʼn tuʼn tok kyqʼoʼn ansyan kywitz tiʼj qa in kubʼ tyekʼin xjal qa taj tuʼn tajtz tiʼj tanmi. Ex tbʼanel qa ma tzʼok tilil kyuʼn qeju o tzʼel kypaʼn kyibʼ tiʼj Jehová tuʼn kymeltzʼaj naj.
10, 11. ¿Tzeʼn in che onin ansyan kyiʼj qeju ma tzikʼ ambʼil kyexlen qʼiʼn toj congregación?
10 Yajtzun qa ma tzikʼ nim ambʼil tex len qʼiʼn jun xjal toj congregación, ¿tiʼ in bʼant kyuʼn ansyan? Bʼalo ya mintiʼ in bʼinchan il ex bʼalo ya mintiʼ naʼn tuʼn tiquʼn ex qʼiʼn toj congregación. Noq tzeʼnxku, kʼokel tilil kyuʼn ansyan tuʼn kyxiʼ visitaril te xjal. Qa ma kanet kyuʼn, jaku txi kyqʼamaʼn te qa jaku che naʼn Dios tukʼil ex tukʼil kʼujlabʼil che onil tiʼj tuʼn tmeltzʼaj toj congregación. Qa ma tzikʼ nim ambʼil texlen qʼiʼn, bʼalo nya kyuw taʼ tamiwbʼil tukʼil Jehová. Tuʼntzunju, qa ma tzaj tqʼamaʼn qa taj tuʼn tmeltzʼaj, jaku kubʼ kyximen ansyan tuʼn t-xi qʼet xnaqʼtzbʼil te tiʼj Tyol Dios, maske naʼmxtoq tmeltzʼaj. Pero aʼye ansyan che kbʼel ximente alkye ermano moqa ermana kxel qʼonte xnaqʼtzbʼil te.
11 Kyaj ansyan tuʼn tel kykanoʼn tiʼj qʼaqʼbʼil tkʼuʼj Jehová. Tuʼntzunju, in nok tilil kyuʼn tuʼn kykanet xjal lu kyuʼn ex tuʼn kyonin kyiʼj qa kyaj tuʼn kymeltzʼaj. Ex toj alkyexku ambʼil jaku bʼant kyuʼn. Qa in kubʼ tyekʼin jun xjal qa in najtz tiʼj tanmi ex in kyaj tkolin nya bʼaʼn tbʼinchbʼen, jaku meltzʼaj naj (2 Cor. 2:6-8).
12. a) ¿Alqukʼil ktel mas kynabʼil ansyan? b) ¿Tiquʼn mintiʼ tuʼn tkubʼ qximen qa mlayx tzaj qʼaqʼin tkʼuʼj Jehová tiʼj jun xjal o kubʼ tbʼinchaʼn jun matij il? (Ax ikx qʼonka twitza tiʼj nota).
12 At maj il tiʼj tuʼn tten mas kynabʼil ansyan aj tajtz tiʼj tanmi jun xjal ok ten tiʼj jun kʼwal, qa ok te apóstata moqa kubʼ t-ximen tuʼn tnaj jun mejebʼleʼn tuʼn. Tuʼntzunju, il tiʼj tuʼn tok kyqʼoʼn ansyan kywitz tiʼj qa axix tok otoq tzʼajtz tiʼj tanmi (Mal. 2:14; 2 Tim. 3:6). Nim toklen tuʼn kyxqʼuqin ansyan kyiʼj erman. Pero bʼaʼn tuʼn ttzaj qnaʼn qa jaku tzʼoktz tkʼamoʼn Jehová alkyexku xjal in najtz tiʼj tanmi ex in kyaj tkolin tuʼn tbʼinchan il. Maske ktel kynabʼil ansyan kyiʼj qeju kubʼ kybʼinchaʼn jun matij il, pero mlay kubʼ kyximen qa mlayx tzaj qʼaqʼin tkʼuʼj Jehová kyiʼj (1 Ped. 2:10). b
¿TI JAKU BʼANT KYUʼN ERMAN?
13. ¿Tiʼ qmod in kubʼ qyekʼin tukʼil jun erman o kubʼ qʼoʼn tsensura ex tiʼ qmod in kubʼ qyekʼin tukʼil jun xjal o tzʼex qʼiʼn toj congregación?
13 Ik tzeʼn ma tzʼel qnikʼ tiʼj toj xnaqʼtzbʼil ma kyaj, at maj in nex qʼoʼn tqanil toj congregación qa o kubʼ tsensura jun erman. Kukx jaku tzʼok qmojbʼan qibʼ tukʼil tuʼnju ojtzqiʼn quʼn qa o tzʼajtz tiʼj tanmi ex ya mintiʼ in bʼinchan il (1 Tim. 5:20). Kukx in ten toj congregación ex taj tuʼn kyonin erman tiʼj tuʼn tkubʼ tbʼinchaʼn aju bʼaʼn (Heb. 10:24, 25). Pero junxitl in bʼaj aj tex qʼiʼn jun xjal toj congregación, tuʼnju ya mintiʼ in nok qmojbʼan qibʼ tukʼil nix in qo waʼn tukʼil (1 Cor. 5:11).
14. ¿Tiʼ il tiʼj tuʼn tkubʼ t-ximen teyele junjun erman tuʼn tbʼant tuʼn tukʼil jun xjal o tzʼex qʼiʼn toj congregación qa ma pon toj chmabʼil? (Ax ikx qʼonka twitza kyiʼj tilbʼilal).
14 ¿Ape t-xilen jlu qa mlayx txi qqʼoʼn txokbʼil tiʼj jun xjal o tzʼex qʼiʼn toj congregación tuʼn tpon toj chmabʼil nix tuʼn tok qqʼolbʼeʼn qa ma pon? Miʼn. Ojtzqiʼn quʼn qa mintiʼ tuʼn tok qamiwin qibʼ tukʼil. Pero qa jun qfamiliar moqa jun qamiw teyelex te junjun okslal kbʼel t-ximen qa kxel tqʼoʼn txokbʼil tiʼj tuʼn tpon toj chmabʼil moqa miʼn. ¿Tiʼ qmod kbʼel qyekʼin tukʼil qa ma pon toj Ja te Chmabʼil? Ojtxe, mintiʼ in chex qqʼolbʼen. Jaʼlo, ax ikx teyele te junjun erman kbʼel ximente qa kbʼantel jlu tuʼn moqa miʼn, ik tzeʼn in tzaj tqʼamaʼn tconciencia o bʼaj t-xnaqʼtzaʼn tuʼn Biblia. Bʼalo ateʼ junjun jaku kubʼ kyximen tuʼn t-xi kyqʼolbʼeʼn moqa tuʼn t-xi kyqʼoʼn bʼaʼn kyulen toj Ja te Chmabʼil. Pero mintiʼ tuʼn qyolin nim ambʼil tukʼil moqa tuʼn kybʼant junjuntl tiʼchaq quʼn junx tukʼil.
Teyele te junjun erman kbʼel ximente qa kxel tqʼoʼn txokbʼil tiʼj jun xjal o tzʼex qʼiʼn toj congregación tuʼn tpon toj chmabʼil moqa kxel tqʼolbʼeʼn qa ma pon, ik tzeʼn in tzaj tqʼamaʼn tconciencia. (Qʼonka twitza tiʼj párrafo 14).
15. ¿Alqiʼj in yolin 2 Juan 9 a 11? (Ax ikx qʼonka twitza tiʼj recuadro « ¿Axpe il yolin Juan ex Pablo tiʼj?»).
15 Pero jakulo kubʼ qxjelin jlu: ¿Mintiʼpe in tzaj tqʼamaʼn Biblia qa ma txi qqʼolbʼeʼn xjal lu at qoklen «tiʼj ju tbʼinchbʼen [ . . . ] mya bʼaʼn»? (kjawil uʼjit 2 Juan 9-11). In tzaj kyyekʼin junjuntl versículo qa atz in yolin jlu kyiʼj apóstata ex kyiʼj qeju in xi kyqʼamaʼn kye txqantl tuʼn tkubʼ kybʼinchaʼn nya bʼaʼn (Apoc. 2:20). Qa at jun xjal in xi tyekʼin xnaqʼtzbʼil nya ax tok moqa taj tuʼn tkubʼ kybʼinchaʼn txqantl nya bʼaʼn, mintiʼ tuʼn tkubʼ kyximen ansyan tuʼn kyxiʼ visitaril te. Bʼalo jaku chʼexpaj tmod, pero qa naʼmx tbʼant jlu tuʼn, mintiʼ tuʼn tok qqʼolbʼeʼn nix tuʼn t-xi qqʼoʼn txokbʼil te tuʼn tpon toj chmabʼil.
BʼAʼN TUʼN TEL QKANOʼN TIʼJ QʼAQʼBʼIL TKʼUʼJ JEHOVÁ
16, 17. a) ¿Tiʼ taj Jehová tuʼn tbʼant kyuʼn xjal o kubʼ kybʼinchaʼn jun il? (Ezequiel 18:32). b) ¿Tzeʼn jaku che onin ansyan tukʼil Jehová?
16 ¿Tiʼ ma tzʼel qnikʼ tiʼj kyoj jweʼ xnaqʼtzbʼil toj uʼj lu? Qa nya taj Jehová tuʼn tnaj jun xjal (kjawil uʼjit Ezequiel 18:32). Taj tuʼn tajtz tiʼj kyanmi ex tuʼn kyok te tamiw (2 Cor. 5:20). Tuʼntzunju, kukx in xi tqʼamaʼn Jehová kye tmajen in nel kypaʼn kyibʼ tiʼj tuʼn tajtz tiʼj kyanmi ex tuʼn kymeltzʼaj juntl maj. Ex o txi qʼoʼn tbʼanel kyoklen ansyan tuʼn kyonin tiʼj Jehová tuʼn tajtz tiʼj kyanmi xjal o kubʼ kybʼinchaʼn jun matij il (Rom. 2:4; 1 Cor. 3:9).
17 ¡At nimxix tzalajbʼil toj kyaʼj aj tajtz tiʼj tanmi jun xjal! In kubʼ tnaʼn Jehová, aju Qtat, nimxix tzalajbʼil aj tmeltzʼaj jun erman toj congregación. Kukx qo ximen tiʼj qʼaqʼbʼil tkʼuʼj Jehová ex tiʼj tkʼujlabʼil tuʼnju kʼonil qiʼj tuʼn tchʼiy qkʼujlabʼil tiʼj (Luc. 1:78).
BʼITZ 111 Aʼyeju tiquʼn in kubʼ qnaʼn tzalajbʼil
a Ik tzeʼn tqʼama Pablo toj 1 Corintios 5:13, jaʼlo in xi qqʼamaʼn qa in nex qʼiʼn jun xjal toj congregación ex ya mlay txi qqʼamaʼn qa in nex lajoʼn moqa in nex expulsarin.
b In tzaj tqʼamaʼn Biblia qa at junjun xjal mlayx kubʼ najsaʼn kyil, pero atz in yolin kyiʼj qeju o kubʼ kyximen tuʼn kukx kyok te aj qʼoj tiʼj Dios. Pero oʼkx Jehová ex Jesús jaku kubʼ kyximen alkye jun xjal mlay kubʼ najset til (Mar. 3:29; Heb. 10:26, 27).
