1. ¿Jakupe tzʼajtz tiʼj tanmi jun xjal otoq kubʼ tbʼinchaʼn jun matij il?

 TOJ xnaqʼtzbʼil o kyaj el qnikʼ tiʼj tiʼ xi tqʼamaʼn apóstol Pablo te congregación te Corinto tiʼjju tuʼn tbʼant tuʼn tukʼil jun xjal otoq kubʼ tbʼinchaʼn jun matij il. Tuʼnju mintiʼ ajtz tiʼj tanmi xjal lu, ex qʼiʼn toj congregación. Pero ik tzeʼn in tzaj tqʼamaʼn texto jatumel ma jatz xnaqʼtzbʼil lu, jaku tzʼajtz tiʼj tanmi jun xjal (Rom. 2:4). ¿Tzeʼn in che ajbʼen ansyan tuʼn Jehová tuʼn kyonin tiʼj jun xjal tuʼn tajtz tiʼj tanmi?

2, 3. ¿Tiʼ il tiʼj tuʼn tbʼant quʼn qa in nok qbʼiʼn qa otoq kubʼ tbʼinchaʼn jun erman jun matij il ex tiquʼn?

² ¿Tiʼ jaku bʼant quʼn qa in nok qbʼiʼn qa o kubʼ tbʼinchaʼn jun erman jun matij il, aju jaku tzʼex qʼiʼn toj congregación tuʼn? Tuʼn kyonin ansyan tiʼj, il tiʼj tuʼn tok kybʼiʼn tiʼ otoq bʼaj. Tuʼntzunju, bʼaʼn tuʼn t-xi qqʼamaʼn te tuʼn tyolin kyukʼil ansyan tuʼntzun kyonin tiʼj (Is. 1:18; Hech. 20:28; 1 Ped. 5:2).

³ Pero, ¿yajtzun qa nya taj erman tuʼn tyolin kyukʼil ansyan? Tuʼnju qaj tuʼn kyonin ansyan tiʼj, bʼaʼn tuʼn qyolin kyukʼil ex tuʼn t-xi qqʼamaʼn kye. Qa ma bʼant jlu quʼn, in kubʼ qyekʼin kʼujlabʼil tiʼj qerman. Qa kukx ma bʼinchan il, jaku tzaj mas nya bʼaʼn tiʼj tamiwbʼil tukʼil Jehová ex jaku bʼaj ttzʼilsaʼn congregación. Tuʼntzunju, maske at maj kwest, il tiʼj tuʼn qyolin kyukʼil ansyan tuʼnju kʼujlaʼn Jehová ex erman quʼn (Sal. 27:14).

 ¿TZEʼN JAKU CHE ONIN ANSYAN TIʼJ JUN ERMAN IN KUBʼ TBʼINCHAʼN JUN MATIJ IL?

4. ¿Tiquʼn kʼokel kychmon kyibʼ ansyan tukʼil jun erman otoq kubʼ tbʼinchaʼn jun matij il?

⁴ Aj tkubʼ tbʼinchaʼn jun erman jun matij il, in jaw kyskʼoʼn ansyan oxe kyxol, aʼyeju at mas kyojtzqibʼil, tuʼn tok kychmon kyibʼ tukʼil. a Il tiʼj tuʼn tkubʼ kyiʼn kyibʼ ansyan ex tuʼn tel kynikʼ tiʼj qa mlay bʼant tuʼn tok ky-obligarin tuʼn tchʼexpaj tmod, maske kʼokel tilil kyuʼn tuʼn kyonin tiʼj tuʼn tajtz tiʼj tanmi (Deut. 30:19). Ojtzqiʼn kyuʼn qa nya kykyaqil kbʼel kyyekʼin tbʼanel kymod, ik tzeʼn te rey David (2 Sam. 12:13). Ateʼ junjun o kubʼ kyximen tuʼn miʼn t-xi kybʼiʼn qe tkawbʼil Jehová (Gén. 4:​6-8). Pero kʼokel tilil kyuʼn ansyan tuʼn kyonin tiʼj erman tuʼn tajtz tiʼj tanmi. ¿Tiʼ bʼaʼn tuʼn ttzaj kynaʼn ansyan aj tok kychmon kyibʼ tukʼil erman?

5. ¿Alkye consej bʼaʼn tuʼn ttzaj kynaʼn ansyan aj tok kychmon kyibʼ tukʼil erman? (2 Timoteo 2:​24-26; ax ikx qʼonka twitza tiʼj tilbʼilal).

⁵ Ojtzqiʼn kyuʼn ansyan qa nimxix toklen erman toj twitz Jehová, maske otoq kubʼ tbʼinchaʼn jun il (Luc. 15:​4, 6). Tuʼntzunju, aj tok kychmon kyibʼ ansyan tukʼil, kbʼel kyyekʼin tbʼanel kymod ex che yolil toj tumel. Mintiʼ tuʼn tkubʼ kyximen ansyan qa oʼkx kxel kyqanin xjel tuʼn tok kybʼiʼn tkyaqil tqanil. Sino kbʼel kyyekʼin qe mod in tzaj qʼamaʼn toj 2 Timoteo 2:24 a 26 (kjawil uʼjit). Toj tkyaqil ambʼil, kbʼel kyyekʼin tbʼanel kymod ex qʼaqʼbʼil kykʼuʼj tuʼnju kyaj tuʼn kyonin tiʼj.

6. ¿Tiʼ in bʼant kyuʼn ansyan naʼmxtoq tok kychmon kyibʼ tukʼil erman? (Romanos 2:4).

⁶ In bʼaj kybʼinchaʼn ansyan kyten tuʼn tten kyximbʼetz ik tzeʼn te Jehová. In tzaj kynaʼn qe yol tqʼama Pablo: «¿Mintiʼpe bʼaʼn tuʼna ate Dios in txokon teya tuʼn tajtz tiʼj tanmiya tuʼnju at nim t-xtalbʼil?» (kjawil uʼjit Romanos 2:4). Tuʼntzunju, in nok tilil kyuʼn tuʼn tel kykanoʼn tbʼanel tmod Jehová in kubʼ tyekʼin kyukʼil qeju in kubʼ kybʼinchaʼn il. Bʼaʼn tuʼn ttzaj kynaʼn qa in che ok ik tzeʼn xqʼuqil rit, tuʼntzunju il tiʼj tuʼn t-xi kybʼiʼn nabʼil in tzaj tqʼoʼn Jesús ex tuʼn tel kykanoʼn tmod aj kyxqʼuqin kyiʼj erman kyoj congregación (Is. 11:​3, 4; Mat. 18:​18-20). Naʼmxtoq tok kychmon kyibʼ tukʼil erman, in xi kyqanin onbʼil te Jehová tuʼn kyonin tiʼj tuʼn tajtz tiʼj tanmi. In xi kyjoʼn tqanil toj Biblia ex kyoj quʼj, ex in xi kyqanin te Jehová tuʼn ttzaj tqʼoʼn  kynabʼil tuʼn tel kynikʼ tiʼj erman ex tiʼjju in bʼaj tiʼj. Ax ikx, che yolil tiʼjju ya ojtzqiʼn kyuʼn tiʼj ex che ximel kyiʼj junjun xjel jaku txi kyqanin kyiʼj tiʼchaq i ex qʼinte te tuʼn tchʼexpaj t-ximbʼetz ex tmod tuʼn tkubʼ tzʼaq toj il (Prov. 20:5).

7, 8. ¿Alkye tten jaku tzʼel kykanoʼn ansyan tiʼj tpasens Jehová aj tok kychmon kyibʼ tukʼil erman?

⁷ In ten kypasens ansyan, ik tzeʼn te Jehová. In tzaj kynaʼn tzeʼn tmod Jehová kubʼ tyekʼin kyukʼil xjal kubʼ kybʼinchaʼn il toj ambʼil ojtxe. Jun techel, ten tpasens Jehová tej tyolin tukʼil Caín. Xi tqʼamaʼn te qa jakutoq tzalaj juntl maj tiʼj, pero ax ikx xi tqʼamaʼn te tiʼ jakutoq tzaj tiʼj qa mintiʼ ma chʼexpaj tmod (Gén. 4:​6, 7). Ex tuʼn t-xi tkawin David, xi tsamaʼn profeta Natán tuʼn tyolin tukʼil, ex ajbʼen jun techel tuʼn tuʼn tkuʼpin toj tanmi David (2 Sam. 12:​1-7). Ax ikx, kukx xi tsamaʼn Jehová qe profeta kyukʼil aj Israel tuʼn tajtz tiʼj kyanmi (Jer. 7:​24, 25). Mintiʼ ayon Jehová tuʼn tajtz tiʼj kyanmi tmajen tuʼntzun tonin kyiʼj, sino xi tqʼamaʼn kye tuʼn tajtz tiʼj kyanmi maske kukxtoq in che bʼinchan il.

⁸ ¿Tiʼ in bʼant kyuʼn ansyan tuʼn tel kykanoʼn tiʼj Jehová aj kyonin tiʼj jun erman otoq kubʼ tbʼinchaʼn jun il? Ik tzeʼn in tzaj tqʼamaʼn 2 Timoteo 4:​2, nim toklen tuʼn tten nim kypasens. Kʼokel tilil kyuʼn miʼn ttzaj kyqʼoj ex tuʼn kyyolin toj tumel tukʼil erman tuʼntzun kyonin tiʼj tuʼn tkubʼ tbʼinchaʼn aju bʼaʼn. Qa mintiʼ ma ten kypasens, mlay che ok bʼiʼn tuʼn erman ex mlaylo tzʼajtz tiʼj tanmi.

9, 10. ¿Tiʼ jaku bʼant kyuʼn ansyan tuʼn kyonin tiʼj erman tuʼn t-ximen ex tuʼn tel tnikʼ tiʼj tiquʼn kubʼ tbʼinchan il?

⁹ In nok tilil kyuʼn ansyan tuʼn tel kynikʼ tiʼj tiquʼn kubʼ tbʼinchaʼn erman il. Jun techel, ¿o chewix toj tokslabʼil tuʼnju ya mintiʼ in xnaqʼtzaʼn tiʼj Tyol Dios moqa ya mintiʼ in pakbʼan? ¿Ya mintiʼ in naʼn Dios te Jehová? ¿In xipe tqʼoʼn ambʼil tuʼn tchʼiy nya bʼaʼn toj tanmi? ¿Alkyeqe tamiw ateʼ? ¿Alkyeqe saqchbʼil in nok tqʼoʼn mas ambʼil tiʼj? ¿Tzeʼn chʼexpaj t-ximbʼetz ex tmod kyuʼn tiʼchaq lu? ¿In nelpe tnikʼ tiʼj tiʼ in kubʼ tnaʼn Jehová tiʼjju o bʼant tuʼn?

¹⁰ Kxel kyqanin ansyan junjun xjel toj tumel te erman, pero mlay txi kyqanin junjun tiʼ nya il tiʼj tuʼn tok kybʼiʼn. Kbʼel kyyekʼin ansyan tbʼanel kymod, tuʼntzun miʼn t-xobʼ erman tuʼn tyolin ex tuʼn tel tnikʼ tiʼj tiquʼn kubʼ tbʼinchaʼn il (Prov. 20:5). Ex ik tzeʼn bʼant tuʼn Natán tukʼil David, jaku tzʼajbʼen junjun techel kyuʼn ansyan tuʼntzun tel tnikʼ erman tiʼj qa nya bʼaʼn aju otoq bʼant tuʼn. Bʼalo aj tok kychmon kyibʼ tnejel maj, jakulo kubʼ tyekʼin erman qa in tzaj tbʼis tiʼjju otoq bʼant tuʼn, axpe ikx jaku tzʼajtz tiʼj tanmi.

11. ¿Tiʼ tmod Jesús kubʼ tyekʼin kyukʼil xjal kubʼ kybʼinchaʼn jun il?

¹¹ In nok tilil kyuʼn ansyan tuʼn tel kykanoʼn tiʼj Jesús. Jun techel, xi tqanin jlu te Saulo te Tarso: «Saulo, Saulo, ¿tiquʼn in chin kubʼ tyajlaʼna?». Xi tqanin Jesús xjel lu te tuʼn tel tnikʼ tiʼj qa nya bʼaʼn aju in bʼanttoq tuʼn (Hech. 9:​3-6). Ex in yolin Apocalipsis 2:20 ex 21 tiʼj jun xuʼj in nok qʼoʼn tbʼi te «Jezabel», aju tqʼama Jesús jlu tiʼj: «Xi nqʼoʼne ambʼil te tuʼn tajtz tiʼj tanmi».

12, 13. ¿Tiʼ jaku bʼant kyuʼn ansyan tuʼn t-xi kyqʼoʼn tiemp te erman tuʼn tajtz tiʼj tanmi? (Ax ikx qʼonka twitza kyiʼj tilbʼilal).

¹² Ik tzeʼn te Jesús, mintiʼ in kubʼ kyximen ansyan qa nya taj erman tuʼn tajtz tiʼj tanmi. Ateʼ junjun in najtz tiʼj kyanmi aj tok kychmon kyibʼ tnejel maj tukʼil  comité, atzun junjuntl in xi tiʼn chʼintl ambʼil tuʼn tajtz tiʼj kyanmi. Tuʼntzunju, jaku tzʼok kychmon kyibʼ ansyan tukʼil erman mas te jun maj. Jakulo kubʼ ten ximel tiʼjju otoq txi kyqʼamaʼn ansyan te ex jakulo txi tqanin najsam te Jehová toj naʼj Dios (Sal. 32:5; 38:18). Ex aj tok kychmon kyibʼ ansyan tukʼil juntl maj, bʼalo otoq chʼexpaj t-ximbʼetz ex tmod.

¹³ Tuʼn kyonin ansyan tiʼj erman tuʼn tajtz tiʼj tanmi, il tiʼj tuʼn tkubʼ kyyekʼin tbʼanel kymod ex qʼaqʼbʼil kykʼuʼj. In xi kyqanin onbʼil te Jehová tuʼntzun kyonin tiʼj erman tuʼn tspikʼeʼ toj twitz ex tuʼn tjatz tiʼj tanmi (2 Tim. 2:​25, 26).

14. Aj tajtz tiʼj tanmi jun erman, ¿alkye in nonin tiʼj tuʼn tchʼexpaj tmod ex tiquʼn?

¹⁴ In kubʼ qnaʼn nim tzalajbʼil aj tajtz tiʼj tanmi jun erman otoq kubʼ tbʼinchaʼn il (Luc. 15:​7, 10). Maske in che onin ansyan tiʼj erman, ¿alkye in nonin tiʼj tuʼn tchʼexpaj tmod? Bʼaʼn tuʼn ttzaj qnaʼn qe yol tqʼama Pablo: «Mya yajku tzʼajtz tiʼj kyanmi tuʼn Dios» (2 Tim. 2:25). In tzaj kyyekʼin yol lu qa a Jehová in nonin tiʼj erman tuʼn tchʼexpaj tmod ex t-ximbʼetz. In tzaj tqʼamaʼn Pablo alkye junjun tbʼanel tiʼchaq in che bʼaj aj tajtz tiʼj tanmi jun xjal. Jaku tzʼel mas tnikʼ tiʼj axix tok, jaku sipkʼeʼ toj twitz ex jaku tzʼonin tiʼj tuʼn miʼn tkubʼ tzʼaq kyoj ttramp Satanás (2 Tim. 2:26).

15. ¿Tiʼ jaku bʼant kyuʼn ansyan tuʼn kukx kyonin tiʼj jun erman in najtz tiʼ tanmi?

¹⁵ Qa ma tzʼajtz tiʼj tanmi erman, kukx che visitaril ansyan te tuʼn tchʼiy qʼuqbʼil tkʼuʼj, tuʼntzun miʼn tkubʼ tzʼaq toj il ex tuʼn tkubʼ tbʼinchaʼn aju bʼaʼn toj twitz Jehová (Heb. 12:​12, 13). Mintiʼ tuʼn t-xi kyqʼamaʼn ansyan kye txqantl tiʼ nya bʼaʼn otoq bʼant tuʼn erman. Pero, ¿tiʼ bʼaʼn tuʼn t-xi kyqʼamaʼn te congregación?

«QʼMANXA KYIL KYWITZ KYKYAQIL»

16. ¿Alqiʼj yolin Pablo tej tqʼama «kywitz kykyaqil» toj 1 Timoteo 5:20?

¹⁶ (Kjawil uʼjit 1 Timoteo 5:20). Xi tqʼamaʼn Pablo te Timoteo, aju ax ikx  ansyan, tuʼn t-xi tqʼamaʼn «kyil kywitz kykyaqil». ¿Alqiʼj in yolin Pablo tej tqʼama «kywitz kykyaqil»? Mintiʼ in yolin tiʼj tkyaqil congregación, sino kyiʼj junjun erman in nok kykeʼyin moqa in nok kybʼiʼn nya bʼaʼn in kubʼ tbʼinchaʼn, ex kye qeju in xi tqʼamaʼn erman kye. Oʼkx kye erman lu, kxel kyqʼamaʼn ansyan qa otoq txi bʼinchet tiʼj nya bʼaʼn ex otoq txi kyqʼoʼn kawbʼil te.

17. Qa ojtzqiʼn moqa jaku tzʼok kybʼiʼn nim erman tiʼ nya bʼaʼn otoq bʼant tuʼn erman otoq bʼinchan il, ¿tiʼ tqanil kʼelex qʼoʼn toj congregación ex tiquʼn?

¹⁷ At maj ojtzqiʼn moqa jaku tzʼok kybʼiʼn nim erman tiʼ nya bʼaʼn otoq bʼant tuʼn erman otoq bʼinchal il. Tzalu jaku yolin tiʼj tkyaqil congregación aju txol yol «kywitz kykyaqil». Tuʼntzunju, kʼelex tqʼoʼn jun ansyan tqanil toj congregación qa ma kubʼ tsensura erman. ¿Tiquʼn? Ik tzeʼn tqʼama Pablo, tuʼn tel kyiʼn txqantl jun xnaqʼtzbʼil tiʼj tuʼntzun miʼn tkubʼ kybʼinchaʼn jun matij il.

18. ¿Tiʼ in bʼant kyuʼn ansyan qa jun menor de edad in kubʼ tbʼinchaʼn jun matij il? (Ax ikx qʼonka twitza tiʼj tilbʼilal).

¹⁸ Yajtzun qa naʼmx tjapun erman twi 18 abʼqʼi ex in kubʼ tbʼinchaʼn jun il, ¿tiʼ jaku bʼant kyuʼn ansyan? Kjawil kyjoʼn ansyan kabʼe kyxol tuʼn tyolin tukʼil erman junx kyukʼil ttat, aqeju testigo de Jehová qeʼ. b Kxel kyqanin ansyan te tman tiʼ o bʼant kyuʼn tuʼn kyonin tiʼj kykʼwal tuʼn tbʼant chʼixpubʼil tuʼn ex tuʼn tajtz tiʼj tanmi. Qa in kubʼ tyekʼin kʼwal tbʼanel tmod  ex in xi tbʼiʼn consej in xi kyqʼoʼn tman te, jaku kubʼ kyximen qeju kabʼe ansyan qa nya il tiʼj tuʼn tbʼant jun comité. Bʼaʼn tuʼn ttzaj qnaʼn qa o txi tqʼoʼn Jehová kyoklen mambʼaj tuʼn t-xi kykawin kykʼwal tukʼil kʼujlabʼil (Deut. 6:​6, 7; Prov. 6:20; 22:6; Efes. 6:​2-4). Kukx kxel kyqanin ansyan kye mambʼaj qa in che onin tiʼj. Pero, ¿yajtzun qa nya taj kʼwal tuʼn tbʼant chʼixpubʼil tuʼn ex nya taj tuʼn tajtz tiʼj tanmi? Entonces kʼokel tchmon tibʼ jun comité kye ansyan tukʼil kʼwal junx kyukʼil ttat, aqeju testigo de Jehová qeʼ.

«ATE QMAN NIM IN QʼAQʼAN TKʼUʼJ EX IN TZʼEʼY TKʼUʼJ QIʼJ»

19. ¿Tzeʼn in nel kykanoʼn ansyan tiʼj Jehová aj kyonin tiʼj jun erman in kubʼ tbʼinchaʼn il?

¹⁹ In nok tilil kyuʼn ansyan in che ten toj jun comité tuʼn tten congregación saq tuʼnju o txi qʼoʼn kyoklen tuʼn Jehová tuʼn tbʼant jlu kyuʼn (1 Cor. 5:7). Pero ax ikx in nok tilil kyuʼn tuʼn tajtz tiʼj tanmi erman in kubʼ tbʼinchaʼn il, tuʼntzunju in ten kyximbʼetz toj tumel. Iktzun tten in nel kykanoʼn tiʼj Jehová, aju «nim in qʼaqʼan tkʼuʼj ex in tzʼeʼy tkʼuʼj qiʼj» (Sant. 5:11). Qo ximen kyiʼj tbʼanel yol kubʼ ttzʼibʼin apóstol Juan tej otoq tijen: «Aqeye tal nkʼwaʼle, in xi ntzʼibʼane tkyaqil jlu kyeye tuʼntzun miʼn kybʼinchane il. Pero qa at jun ma bʼinchan il, at jun yolil qʼij tukʼil Qman Dios, ate Jesucrist aju tzʼaqlxix» (1 Juan 2:1).

20. ¿Tiʼ kʼelel qnikʼ tiʼj toj juntl xnaqʼtzbʼil?

²⁰ Bʼisbʼajilxix tuʼnju at maj mintiʼ in najtz tiʼj tanmi jun erman otoq kubʼ tbʼinchaʼn jun matij il. Qa in bʼaj jlu, il tiʼj tuʼn tex qʼiʼn toj congregación. ¿Tiʼ in bʼant kyuʼn ansyan tiʼj jlu? Kʼelel qnikʼ tiʼj toj juntl xnaqʼtzbʼil.