1. ¿Tiʼ taj Jehová tuʼn tkubʼ kyximen kykyaqil xjal?

 KUBʼ tbʼinchaʼn Jehová qe xjal tuʼn tkubʼ kyximen tiʼ kbʼantel kyuʼn ex tkyaqil qʼij in najbʼen oyaj lu quʼn. Aju mas nim toklen tuʼn tkubʼ t-ximen jun xjal aju tuʼn t-xi tqʼamaʼn te Jehová qa kʼajbʼel te ex qa kʼokel te tfamilia. Tajbʼil Jehová tuʼn tkubʼ kyximen tkyaqil xjal tuʼn kyajbʼen te ex tuʼn kyok te tfamilia. ¿Tiquʼn? Tuʼnju kʼujlaʼn qe xjal tuʼn ex tajbʼil tuʼn kyten toj bʼaʼn, tuʼn tten jun tbʼanel kyamiwbʼil tukʼil ex tuʼn kyanqʼin te jumajx (Deut. 30:​19, 20; Gál. 6:​7, 8).

2. ¿Tiʼ taj Jehová tuʼn tbʼant tuʼn jun xjal in kubʼ tbʼinchan jun il ex naʼmx tajtz tiʼj tanmi? (1 Juan 2:1).

² Mintiʼ in che ok t-obligarin Jehová qe xjal tuʼn kyajbʼen te, sino in xi tqʼoʼn ambʼil kye tiʼ kyajbʼil tuʼn t-xi kybʼinchaʼn. Pero ¿tiʼtzun in bʼaj qa ma kubʼ tbʼinchaʼn jun okslal otoq bautisarin jun matij il? Qa mintiʼ in najtz tiʼj tanmi in nex qʼiʼn toj congregación (1 Cor. 5:13). Maske ikju, taj Jehová tuʼn tmeltzʼaj juntl maj tukʼil. Tuʼntzunju tzaj tqʼoʼn chojbʼil tuʼn tkubʼ tnajsaʼn kyil xjal in najtz tiʼj kyanmi (kjawil uʼjit 1 Juan 2:1). Nimxix tkʼujlabʼil Jehová at kyiʼj xjal aj il qeʼ ex taj tuʼn tajtz tiʼj kyanmi (Zac. 1:3; Rom. 2:4; Sant. 4:8).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Taj Jehová tuʼn tel qkanoʼn tiʼj tiʼ in kubʼ tnaʼn tiʼj jun il ex kyiʼj ju in kubʼ kybʼinchaʼn jun matij il. Kʼonil xnaqʼtzbʼil  lu qiʼj tuʼn tel qnikʼ tiʼj. Tnejel, tzeʼn xi bʼinchaʼn tiʼj jun matij il tzaj toj congregación te Corinto. Tkabʼin, kʼelel qnikʼ tiʼj junjun nabʼil xi tqʼoʼn apóstol Pablo tej tmeltzʼaj xjal bʼinchan il. Ex toxin, kʼelel qnikʼ tiʼj tiʼ in kubʼ tnaʼn Jehová kyiʼj xjal in kubʼ kybʼinchaʼn jun matij il.

¿TZEʼN XI BʼINCHAʼN TIʼJ JUN MATIJ IL TOJ TNEJEL SYENT ABʼQʼI?

4. ¿Tiʼtoq in bʼaj toj congregación te Corinto? (1 Corintios 5:​1, 2).

⁴ (Kjawil uʼjit 1 Corintios 5:​1, 2). Toj toxin tvisita Pablo ok tbʼiʼn jun tqanil tiʼj akʼaj congregación te Corinto: In kubʼtoq ten jun erman tukʼil t-xuʼjil tman. Tuʼntzunju xi ttzʼibʼin apóstol Pablo jlu: «At jun ma tbʼincha aj pajil kyxole, [ . . . ] mintiʼlpe in kybʼinchaʼn xjal mya okslal ikju». Nya oʼkx in xitoq qʼoʼn ambʼil te xjal tuʼn tkubʼ tbʼinchaʼn il, sino kubʼlo kyximen erman toj congregación lu qa bʼaʼntoq in bʼant tuʼn xjal ex in che tzalajtoq tiʼj. Ateʼlo junjun kubʼ kyximen qa jun yekʼbʼil jlu tiʼj nimxix qʼaqʼbʼil tkʼuʼj Dios at kyiʼj xjal aj il. Pero nya tgan Jehová tuʼn tten il toj ttnam. Ex tukʼil ju nya bʼaʼn tbʼinchbʼen xjal lu in tzajtoq tiʼn nya bʼaʼn tiʼj congregación. Ex jakutoq tzʼok te jun nya bʼaʼn techel kywitz erman. Tuʼntzunju, ¿tiʼ xi tqʼamaʼn apóstol Pablo kye okslal te Corinto tuʼn tbʼant kyuʼn?

5. ¿Tiʼ xi ttzʼibʼin Pablo kye erman te congregación te Corinto ex tiʼ in nel qnikʼ tiʼj kyuʼn tyol? (1 Corintios 5:13; ax ikx qʼonka twitza tiʼj tilbʼilal).

⁵ (Kjawil uʼjit 1 Corintios 5:13). Tukʼil onbʼil tzaj tqʼoʼn xewbʼaj xjan, xi tzʼibʼin Pablo kye erman tuʼn tex kyiʼn xjal toj congregación tuʼnju mintiʼ otoq tzʼajtz tiʼj tanmi. ¿Tzeʼntoq kymod okslal kbʼel kyyekʼin tukʼil? Xi tqʼamaʼn Pablo jlu kye: «Miʼn tzʼok kymojbʼan kyibʼe tukʼil, ex miʼn che waʼne junx tukʼil» (1 Cor. 5:11). Aj qwaʼn tukʼil jun xjal, in qo yolin tukʼil ex in qo ten mas ambʼil tukʼil. Tuʼn jlu in nel qnikʼ tiʼj qa xi tqʼamaʼn Pablo tuʼn miʼn tok kymojbʼan kyibʼ erman tukʼil xjal lu. Tuʼnju kʼoniltoq tuʼn miʼn ttzaj nya bʼaʼn kyiʼj erman tuʼn tbʼinchbʼen xjal (1 Cor. 5:​5-7). Ax ikx jakutoq tzʼonin tiʼj xjal tuʼn tel tnikʼ tiʼj qa otoq tzaj tbʼis Jehová tuʼn ex jakutoq tzʼonin tiʼj tuʼn ttzaj tchʼixwi tiʼjju otoq bʼant tuʼn tuʼn tajtz tiʼj tanmi.

6. ¿Tiʼ bʼant kyuʼn erman ex tuʼn xjal in bʼinchan il tej tok kybʼiʼn carta xi ttzʼibʼin Pablo?

⁶ Tajtoq Pablo tuʼn tel tnikʼ tiʼj tiʼtoq kbʼantel kyuʼn erman te congregación  te Corinto tej otoqxi txi ttzʼibʼin carta kye. Tej tikʼ chʼin ambʼil, xi tqʼamaʼn Tito tbʼanel tqanil te Pablo ex tqʼama qa tbʼanel ela toj kywitz ex qa otoq txi kynimen aju xi tqʼamaʼn kye (2 Cor. 7:​6, 7). Ax ikx tej otoq tzikʼ chʼin ambʼil t-xilen tsamaʼn Pablo carta, ajtz tiʼj tanmi xjal. Ya otoq chʼexpaj tbʼinchbʼen ex tmod ex ya otoq txi tzyet tuʼn tnimen qe tkawbʼil Jehová (2 Cor. 7:​8-11). ¿Tiʼ mas tqanil xi tqʼoʼn Pablo te congregación?

¿TZEʼNTOQ KYMOD ERMAN TUʼN TKUBʼ KYYEKʼIN TIʼJ XJAL KUBʼ TBʼINCHAN IL?

7. ¿Tiʼ tbʼanel tzaj tuʼnju etz qʼiʼn xjal aj il toj congregación? (2 Corintios 2:​5-8).

⁷ (Kjawil uʼjit 2 Corintios 2:​5-8). Tqʼama Pablo jlu: «Akux tcastiw xjal tuʼnju ma bʼaj kykawine, tuʼn nimku kybʼaje ẍe kawin te». Toj juntl yol, ya otoq tzʼajbʼen kawbʼil xi qʼoʼn te: Tuʼnju ya otoq tzʼajtz tiʼj tanmi xjal (Heb. 12:11).

8. ¿Tiʼ xi tqʼamaʼn Pablo kye erman yajxitl?

 ⁸ Yajxitl, xi tqʼamaʼn Pablo kye erman tiʼtoq tuʼn tbʼant kyuʼn tiʼj erman otoq bʼinchan il: «Noq oʼkx tuʼn tkubʼ kynajsaʼne til ex tuʼn t-xi kyqʼuqbʼaʼne tkʼuʼj». Ex tqʼamatl: «Chin kubʼsale kywitze, kykʼujlame juntl maj». Ik tzeʼn ma tzʼel qnikʼ tiʼj, nya oʼkx tajtoq Pablo tuʼn t-xi kyqʼoʼn erman ambʼil tuʼn tmeltzʼaj erman toj congregación, sino tuʼn tkubʼ kyyekʼin tukʼil kybʼinchbʼen ex kyyol qa otoq kubʼ kynajsaʼn til ex qa kʼujlaʼntoq kyuʼn. Iktzun tten kbʼel tnaʼn xjal qa in che tzalaj erman tiʼj tuʼnju otoq meltzʼaj toj congregación.

9. ¿Tiquʼn kwest jakutoq tzʼela kye junjun tuʼn tkubʼ kynajsaʼn til xjal otoq bʼinchan il?

⁹ Kwestlo ela kye junjun tej tmeltzʼaj xjal toj congregación. ¿Tiquʼn in xi qqʼamaʼn jlu? Tuʼnju ateʼ junjun kukxtoq in tzaj kyqʼoj tiʼjju otoq bʼant tuʼn ex junjuntl kukxtoq in tzaj nya bʼaʼn kyiʼj kyuʼn tbʼinchbʼen. Atzun kye, otoq tzʼok tilil kyuʼn tuʼn t-xi kybʼiʼn qe tkawbʼil Jehová ex tuʼntzunju nyalo bʼaʼn ela toj kywitz tej tokx kʼamoʼn juntl maj xjal toj congregación tukʼil nim kʼujlabʼil (mojbʼankuya tukʼil Lucas 15:​28-30). Pero ¿tiquʼn iltoq tiʼj tuʼn tkubʼ kyyekʼin kykʼujlabʼil tiʼj erman otoq meltzʼaj toj congregación?

10, 11. Noqwit mintiʼ kubʼ kynajsaʼn ansyan til xjal otoq tzʼajtz tiʼj tanmi, ¿tiʼwtlo bʼaj?

¹⁰ ¿Tiʼwtlo o bʼaj noqwit mintiʼ oktz kykʼamoʼn ansyan aju xjal otoq tzʼajtz tiʼj tanmi moqa noqwit mintiʼ kubʼ kyyekʼin erman kykʼujlabʼil tiʼj? Kyajwitlo ten xjal otoq tzʼajtz tiʼj tanmi «tuj nim bʼis». Jakutoq kubʼ t-ximen qa mlayx meltzʼaj toj congregación, qa mlayx kubʼ najsaʼn til tuʼn Jehová ex qa nya il tiʼj tuʼn tchʼexpaj tmod.

¹¹ Pero nya oʼkx jlu. Noqwit mintiʼ kubʼ kynajsaʼn til xjal otoq tzʼajtz tiʼj tanmi, xiwtlo kynajsaʼn kyamiwbʼil tukʼil Jehová. ¿Tiquʼn? Tuʼnju mintiʼwtlo kubʼ kyyekʼin tmod Jehová aju in kubʼ tnajsaʼn kyil aj il in najtz tiʼj kyanmi, sino kubʼwitlo kyyekʼin tmod Satanás aju puro nya bʼaʼn tmod ex mintiʼ in tzaj qʼaqʼin tkʼuʼj kyiʼj txqantl. Ex xiwtlo kyqʼoʼn ambʼil tuʼn kyajbʼen tuʼn Satanás tuʼn tnaj tamiwbʼil xjal tukʼil Jehová (2 Cor. 2:​10, 11; Efes. 4:27).

12. ¿Tzeʼn jakutoq tzeʼl kykanoʼn erman tmod Jehová?

¹² ¿Tzeʼntzun jakutoq tzʼel kykanoʼn qe okslal te Corinto tiʼj Jehová ex nya tiʼj Satanás? Aj tel qkanoʼn tiʼj tmod Jehová in kubʼ tyekʼin kyukʼil qeju otoq tzʼajtz tiʼj kyanmi. Qqʼonk qwitz tiʼjju kyqʼama junjun aj tzʼibʼil tiʼj Biblia tiʼj tmod Jehová. Tqʼama David jlu: «Bʼaʼna Nman ex in kubʼ tnajsaʼna kyil xjal» (Sal. 86:5). Ax ikx kubʼ ttzʼibʼin Miqueas jlu: «Mintiʼ juntl Dios at ik tzaʼn teya porke in kubʼ tnajsaʼna aju mya bʼaʼn in kybʼinchaʼn qe xjal» (Miq. 7:18). Ex tqʼama Isaías jlu: «Aju xjal bʼinchal il, bʼaʼn tuʼn tkyaj tkolin ju tbʼe mya bʼaʼn, aju xjal bʼinchal tplojil, bʼaʼn tuʼn tkyaj tqʼoʼn ju t-ximbʼetz mya bʼaʼn; e tajtz meltzʼaj tukʼil Qdios, porke ate Dios at nim xtalbʼil tukʼil tuʼn tkubʼ tnajsaʼn kyil xjal» (Is. 55:7).

13. ¿Tiquʼn tbʼanel tej toktz kykʼamoʼn okslal te Corinto aju xjal otoq tzʼajtz tiʼj tanmi? (Qʼonka twitza tiʼj recuadro « ¿Jniʼ ambʼil xi tiʼn tuʼn tmeltzʼaj xjal te tnam Corinto toj congregación?»).

¹³ Tuʼn tkubʼ kyyekʼin okslal te tnam Corinto tmod Jehová, iltoq tiʼj tuʼn tkubʼ kyyekʼin kykʼujlabʼil tiʼj xjal otoq tzʼajtz tiʼj tanmi ex iltoq tiʼj tuʼn tkubʼ kyyekʼin qa in che tzalaj tuʼnju otoq meltzʼaj toj  congregación. Xi tqʼamaʼn Pablo kye qa bʼaʼn che niman qa ma kubʼ kynajsaʼn til xjal otoq tzʼajtz tiʼj tanmi (2 Cor. 2:9). Ax tok tzmatoq in nikʼ junjun xjaw texlen qʼiʼn xjal toj congregación, pero tej t-xi qʼoʼn kawbʼil lu te onin tiʼj tuʼn tajtz tiʼj tanmi. Tuʼntzunju nya iltoq tiʼj tuʼn t-xi kyqʼoʼn ansyan mas ambʼil tuʼn toktz kyiʼn xjal toj congregación juntl maj.

¿TZEʼN JAKU TZʼEL QKANOʼN TBʼANEL TMOD EX QʼAQʼBʼIL TKʼUʼJ JEHOVÁ?

14, 15. ¿Tiʼ in tzaj tyekʼin qe aju tzeʼn xi bʼinchaʼn tiʼj nya bʼaʼn tzaj toj congregación te Corinto? (2 Pedro 3:9; ax ikx qʼonka twitza tiʼj tilbʼilal).

¹⁴ Xi tqʼoʼn Jehová ambʼil tuʼn tkyaj tzʼibʼin toj Tyol tiʼj tzeʼn xi bʼinchaʼn tiʼj nya bʼaʼn tzaj toj congregación te Corinto tuʼntzun tajbʼen «te xnaqʼtzbʼil qe» (Rom. 15:4). Aju ikʼ toj congregación lu in tzaj tyekʼin qa nya tgan Jehová tuʼn kyten xjal in che bʼinchan il toj ttnam. Ateʼ junjun in kubʼ kyximen qa tuʼnju at qʼaqʼbʼil tkʼuʼj Jehová in tzaj tqʼoʼn ambʼil tuʼn kukx tten jun xjal in bʼinchan nya bʼaʼn toj congregación. Pero nya ax tok jlu. At te Jehová nim qʼaqʼbʼil tkʼuʼj, pero mintiʼ in tzaj tqʼoʼn ambʼil tuʼn kukx tten jun aj il toj ttnam. Ex mintiʼ in che kubʼ tchʼexpuʼn qe tley tiʼjju bʼaʼn ex tiʼjju nya bʼaʼn (Jud. 4). Qa ma txi tqʼoʼn Jehová ambʼil tuʼn kukx tten jun xjal toj congregación aju mintiʼ in najtz tiʼj tanmi,  jakulo tzaj tyekʼin qa mintiʼ qʼaqʼbʼil tkʼuʼj tuʼnju jaku tzaj tiʼn nim nya bʼaʼn kyiʼj erman (Prov. 13:20; 1 Cor. 15:33).

¹⁵ In tzaj tyekʼin txʼolbʼabʼil lu qa nya taj Jehová tuʼn tkubʼ tnajsaʼn jun xjal. Sino tajbʼil tuʼn kyklet kykyaqil qeju jaku che klet. In kubʼ tyekʼin qʼaqʼbʼil tkʼuʼj kyiʼj qeju in kubʼ kychʼexpuʼn kymod ex in nok tilil kyuʼn tuʼn tten juntl maj kyamiwbʼil tukʼil (Ezeq. 33:11; kjawil uʼjit 2 Pedro 3:9). Tuʼntzunju tej tajtz tiʼj tanmi xjal te tnam Corinto ex tej tkyaj ttzaqpiʼn nya bʼaʼn tbʼinchbʼen, ajbʼen Pablo tuʼn Jehová tuʼn t-xi tqʼamaʼn kye erman toj congregación qa iltoq tiʼj tuʼn tkubʼ kynajsaʼn til ex tuʼn toktz kykʼamoʼn juntl maj.

16. ¿Tiʼ in kubʼ tnaʼna tiʼj Jehová aj t-ximana tiʼj alkye tten xi tbʼinchaʼn tiʼj il kubʼ tbʼinchan xjal te tnam Corinto?

¹⁶ Aj qximen tiʼjju bʼaj tiʼj congregación te tnam Corinto, in nonin qiʼj tuʼn tel qnikʼ tiʼj qa at nim tkʼujlabʼil Jehová, qa tbʼanel tmod ex qa tzʼaqli (Sal. 33:5). Aj tel qnikʼ kyiʼj tbʼanel tmod Jehová lu, in nonin qiʼj tuʼn tjaw qnimsaʼn mas tbʼi. Qkyaqilx aj il xjal qoʼ ex qaj tuʼn tkubʼ tnajsaʼn qil. Pero in qo tzalaj tuʼnju jaku kubʼ tnajsaʼn qil noq tuʼn chojbʼil tzaj tqʼoʼn. Ex in tzaj tqʼuqbʼaʼn nimxix qkʼuʼj aj tel qnikʼ tiʼj qa ax tok at tkʼujlabʼil Jehová kyiʼj tmajen ex taj tuʼn kyten bʼaʼn.

17. ¿Tiʼ kʼelel qnikʼ tiʼj toj junjuntl xnaqʼtzbʼil?

¹⁷ ¿Yajtzun toj ambʼil jaʼlo tzeʼn in xi kybʼinchaʼn ansyan tiʼj jun il? ¿Tzeʼn jaku tzʼel kykanoʼn ansyan tkʼujlabʼil Jehová ex tuʼn kyonin tiʼj xjal otoq tzʼajtz tiʼj tanmi? Aj tkubʼ kyximen ansyan tuʼn tex kyiʼn moqa tuʼn toktz kyiʼn jun xjal toj congregación, ¿tiʼ qmod kbʼel qyekʼin? Kʼelel qnikʼ kyiʼj tzaqʼwebʼil kye xjel lu kyoj junjuntl xnaqʼtzbʼil che ul.