Xi tqʼamaʼn apóstol Pablo jlu kye okslal te tnam Tesalónica: «Qa at jun kyxole mintiʼ in xi tniman aju in xi qmaʼne tuj uʼj lu, tzʼelx kynikʼe tiʼj» (2 Tes. 3:14). Ojtxe, xi qqʼamaʼn qa kye ansyan xi qʼamaʼn qe yol lu. Tuʼnju qa attoq jun xjal nya taj tuʼn t-xi tnimen qe nabʼil in che jatz toj Tyol Dios ex qa nimku maj otoq txi kawin, jakutoq tzʼetz kyqʼoʼn ansyan jun chikʼbʼabʼil kye erman. Toj ambʼil aju, ya mintiʼ in nok kymojbʼan kyibʼ tukʼil xjal toj junjuntl ambʼil, sino oʼkx kyoj chmabʼil ex toj pakbʼabʼil.

Pero jaʼlo in nel qnikʼ tiʼj qa atz xi qʼamaʼn qe yol lu te teyele junjun erman tuʼntzun tkubʼ t-ximen tiʼ tuʼn tbʼant tuʼn toj junjun ambʼil. Tuʼntzunju, ya nya il tiʼj tuʼn tex kyqʼoʼn ansyan jun chikʼbʼabʼil tuʼn tex kyqʼamaʼn alkye jun mintiʼ tuʼn tok qmojbʼan qibʼ tukʼil. ¿Tiquʼn ma chʼexpaj qximbʼetz jaʼlo tiʼjju in tzaj tqʼamaʼn 2 Tesalonicenses 3:14? Qo xnaqʼtzan tiʼj alqiʼjtoq in yolin Pablo toj ambʼil aju.

Toj ambʼil aju, tqʼama apóstol Pablo qa ateʼ junjun «erman in che bʼet mya tuj tumel». Otoq txi tqʼoʼn junjun consej kye toj Tyol Dios, pero mintiʼtoq in xi kynimen. Jun techel, toj jun visita otoq txi tqʼamaʼn apóstol Pablo jlu: «Qa at jun tkʼiʼ tzʼaqʼnan, ax ikx miʼn waʼn». Maske otoq txi tqʼamaʼn Pablo jlu, e ten junjun nyatoq kyaj tuʼn kyaqʼunan tuʼn tten aju at tajbʼen kye ex jakutoq bʼant kyuʼn. Axpe ikx in nokxtoq kyqʼon kyibʼ toj kyanqʼibʼil txqantl. ¿Tiʼtoq kymod erman kbʼel kyyekʼin kyukʼil qeju mintiʼtoq in che bʼet toj tumel? (2 Tes. 3:​6, 10-12).

Tqʼama apóstol Pablo jlu: «Tzʼelx kynikʼe tiʼj». Aju yol griego ajbʼen tuʼn Pablo, in tzaj tyekʼin qa il tiʼj tuʼn tel qnikʼ tiʼj jun xjal in bʼet nya toj tumel ex tuʼn tel qpan qibʼ tiʼj tuʼntzun miʼn tel qkanoʼn nya bʼaʼn tmod. Xi qʼamaʼn jlu kye kykyaqil erman toj congregación ex nya oʼkx kye ansyan (2 Tes. 1:1; 3:6). Tuʼntzunju, qa ma tzʼok tqʼoʼn jun erman twitz tiʼj juntl erman mintiʼ in xi tbʼiʼn consej tkuʼx toj Tyol Dios, tjunalx kbʼel t-ximen tuʼn ya miʼn tok tamiwin tibʼ tukʼil.

¿Ape t-xilen jlu qa ax kymod erman tuʼn tten tukʼil ik tzeʼn jun otoq tzʼex qʼiʼn toj congregación? Nya, tuʼnju xi tqʼamaʼntl Pablo jlu: «Noq oʼkx tuʼn t-xi kyqʼoʼne tnabʼl erman lu tuʼnju okslal te». Tuʼntzunju, teyele te jun okslal jakutoq tzʼok tjunin tibʼ tukʼil kyoj chmabʼil ex toj pakbʼabʼil, pero mlaytoq ten tukʼil kyoj junjuntl ambʼil, ik tzeʼn aj tok jun kywa moqa aj tel kypaʼn ambʼil tuʼn kytzalaj jun rat. Ex tqʼama Pablo tiquʼn: «Tuʼntzun ttzaj tchʼixwi». Qa mintiʼ ma tzʼok tmojbʼan tibʼ jun erman tukʼil juntl erman mintiʼ in nimen qe tkawbʼil Jehová, jaku tzʼonin tiʼj tuʼn ttzaj tchʼixwe ex tuʼn tkubʼ tchʼixpuʼn tmod (2 Tes. 3:​14, 15).

Yajtzun qe, ¿tzeʼn jaku txi qbʼiʼn consej lu? Tnejel, il tiʼj tuʼn tel qnikʼ tiʼj qa ax tok «mya tuj tumel» in bʼet erman ik tzeʼn tqʼama Pablo. Nya atz yolin tiʼj jun erman in kubʼ tbʼinchaʼn jun tiʼ ex nya bʼaʼn in nela toj qwitz, pero mintiʼ in nikʼ kyibʼaj tkawbʼil Jehová. Ex nya atz yolin tiʼj jun erman o tzʼok tbʼinchaʼn jun nya bʼaʼn qiʼj. Sino atz in yolin kyiʼj erman o txi qʼoʼn jun consej kye aju in jatz toj Biblia, pero mintiʼ in xi kynimen.

Qa ma tzʼok qqʼoʼn qwitz tiʼj qa at jun erman mintiʼ in xi tnimen jun consej in jatz toj Biblia, a teyele te junjun qe jaku kubʼ t-ximen tuʼn miʼn tok tmojbʼan tibʼ tukʼil kyoj junjuntl ambʼil, ik tzeʼn aj tok jun qwa moqa aj tel qpaʼn ambʼil tuʼn qtzalaj jun rat. Tuʼnju teyele te junjun kbʼel t-ximen tuʼn tbʼant jlu tuʼn, oʼkx qo yolil tiʼj kyukʼil qfamilia testigo de Jehová ex mintiʼ tuʼn t-xi qqʼamaʼn kye txqantl. Ex kukx kʼokel qmojbʼan qibʼ tukʼil xjal lu kyoj chmabʼil ex toj pakbʼabʼil. Aj tkubʼ tchʼexpuʼn erman tmod, jaku tzʼok qamiwen juntl maj qibʼ tukʼil.