«¿IN KUBʼPE nximane qa bʼaʼn chin qʼone chjonte?». Qkyaqilx bʼaʼn tuʼn qximen tiʼj xjel lu. Kyaj qʼamaʼn toj Tyol Dios qa kyoj bʼajsbʼil tqʼijlalil nim xjal mlay che qʼon chjonte (2 Tim. 3:2). Bʼalo o che ok qojtzqiʼn xjal mintiʼ in che qʼon chjonte tuʼnju in kubʼ kyximen qa at kyoklen tiʼj tkyaqilju o tzaj kykʼamoʼn ex tiʼj tkyaqilju at kye. Tuʼntzunju in kubʼ kyximen qa nya il tiʼj tuʼn t-xi kyqʼoʼn chjonte. Ni jun qe in qo tzalaj kyukʼil xjal ik kyximbʼetz ik tzeʼn jlu.

Atzunte Jehová in tzaj tqʼamaʼn jlu kye tmajen: «Kyqʼonxe chjonte» ex «kyqʼonxe chjonte tiʼj tkyaqil» (Col. 3:15; 1 Tes. 5:18). Tbʼanel tuʼn t-xi qqʼoʼn chjonte tuʼnju in tzaj tiʼn tbʼanel qe. ¿Tiquʼn? Qo xnaqʼtzan kyiʼj junjun techel.

Nim toklen tuʼn qqʼon chjonte tuʼnju in nonin qiʼj tuʼn tten qximbʼetz toj tumel qiʼjx. Aj in che qʼon kabʼe xjal chjonte kyxolx, in kubʼ kynaʼn bʼaʼn. ¿Tiquʼn? Qo ximen tiʼj jlu. Qa at jun xjal taj tuʼn tkubʼ tbʼinchaʼn jun xtalbʼil qiʼj, oklo kbʼantel jlu tuʼn tuʼnju in kubʼ t-ximen qa at qoklen ex tuʼnju kʼujlaʼn qoʼ tuʼn. In nonin jlu qiʼj tuʼn qtzalaj tuʼnju in kubʼ qnaʼn bʼaʼn. Jaku txi qqʼamaʼn qa atzun jlu bʼaj tiʼj Rut. Tej tkubʼ tyekʼin Boaz tbʼanel tmod tukʼil, nimlo jaw tzalaj Rut tej tok tkeʼyin qa at jun xjal taj tuʼn tonin tiʼj tukʼilju at tajbʼen te (Rut 2:10-13).

Mas nimxix toklen tuʼn t-xi qqʼoʼn chjonte te Jehová. Bʼalo o qo ximen jun maj tiʼj tkyaqil oyaj o tzaj tqʼoʼn Jehová qe, ik tzeʼn tiʼj qwa ex tiʼj xnaqʼtzbʼil in tzaj tqʼoʼn qe, ex kukx in bʼant jlu tuʼn (Deut. 8:17, 18; Hech. 14:17). Pero nya noq jun rat kʼelel qpaʼn ambʼil tuʼn qximen tiʼj tbʼanel tmod Jehová at qukʼil. Tbʼanel tuʼn tel qpaʼn nim ambʼil tuʼn qximen tiʼj tkyaqilju t-xtalbʼil o kubʼ tyekʼin qiʼj ex kyiʼj toj qja. Iktzun tten kukx kxel qqʼoʼn chjonte te Jehová ex kʼokel qeʼ qkʼuʼj tiʼj qa kʼujlaʼn qoʼ tuʼn, ex qa nim qoklen toj twitz (1 Juan 4:9).

Nya oʼkx tuʼn qximen tiʼj tkʼiwlabʼil Jehová ex tiʼj t-xtalbʼil, ax ikx nim toklen tuʼn t-xi qqʼoʼn chjonte te tuʼnju at tbʼanel tmod (Sal. 100:4, 5). O tzaj kyqʼamaʼn junjun xjal «qa bʼaʼn qo qʼon chjonte, in nonin jlu qiʼj tuʼn qtzalaj».

Juntl tiquʼn nim toklen tuʼn qqʼon chjonte, tuʼnju in nonin qiʼj tuʼn tchʼiy qamiwbʼil. Qkyaqilx qaj tuʼn tok qʼoʼn qoklen. Aj in xi qqʼoʼn chjonte tuʼn tkyaqil qanmi te jun xjal in kubʼ tbʼinchaʼn jun xtalbʼil qiʼj, mas in chʼiy qamiwbʼil tukʼil (Rom. 16:3, 4). Ax ikx, qa bʼaʼn qo qʼon chjonte, mas nya kwest jaku qo onin kyiʼj txqantl. Aj t-ximen jun xjal tiʼj onbʼil in xi qʼoʼn te, ax ikx te taj tuʼn tonin kyiʼj txqantl. Aj qonin kyiʼj txqantl in nonin qiʼj tuʼn qtzalaj. Tuʼntzunju tqʼama Jesús jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hech. 20:35).

Tqʼama Robert Emmons jlu, jun kyxol qeju e kubʼ nej twitz junjun xjel xi qanin toj Universidad te California: «Tuʼn tbʼant qqʼon chjonte, nim toklen tuʼn tel qnikʼ tiʼj qa il tiʼj tuʼn tbʼaj qonin qibʼ qxolx; at maj, aqoʼ qo onil kyiʼj txqantl, atzun toj juntl maj, aʼye txqantl che onil qiʼj». Ikju, at toklen qchwinqlal ex qanqʼibʼil kyukʼil txqantl. Jun techel, jakulo tzaj kyqʼoʼn txqantl chʼin qwa moqa jaku che onin  qiʼj aj qok weʼ twitz jun yabʼil (1 Cor. 12:21). Aqeju bʼaʼn che qʼon chjonte, in nok kyqʼoʼn toklen aju in bʼant kyuʼn txqantl kyiʼj. Qa ikju, ¿bʼaʼnpe qo qʼon chjonte?

Juntl tiquʼn nim toklen tuʼn qqʼon chjonte, tuʼnju in nonin qiʼj tuʼn tten qximbʼetz toj tumel. Ik tten qximbʼetz ik tzeʼn jun colador, tuʼnju in xi tqʼoʼn ambʼil tuʼn tex junjun tiʼchaq toj, atzun junjuntl in kyaj tiʼn. Aqeju xjal bʼaʼn che qʼon chjonte in che ximen kyiʼj tbʼanel tiʼchaq ex mintiʼxix in nok kyqʼoʼn kywiʼ kyiʼj nya bʼaʼn in che tzaj kyiʼj. Qa bʼaʼn qo qʼon chjonte, mas in qo ximen kyiʼj tbʼanel tiʼchaq ex tuʼnju jlu mas in qo qʼon chjonte. Qa ma ten qmod ik tzeʼn jlu, kʼonil qiʼj tuʼn tbʼant quʼn ik tzeʼn tqʼama apóstol Pablo: «Kukx che tzalaje tiʼj Qajaw» (Filip. 4:4).

Qa bʼaʼn qo qʼon chjonte, mlay ten nya bʼaʼn qximbʼetz kyiʼj tiʼchaq. Ex kwest jaku txi qqʼoʼn chjonte qa in tzaj loʼch tiʼj qkʼuʼj kyiʼj txqantl, qa in qo bʼisun ex qa at qʼoj toj qanmi. Ax ikx, qa bʼaʼn che qʼon xjal chjonte, mintiʼ in che jyon tiʼj qʼinumabʼil tuʼnju in che tzalaj tiʼjju at kye ex mintiʼ in che ximen tiʼj tuʼn tten mas tiʼchaq kye (Filip. 4:12).

Ojtzqiʼn quʼn qa taj Satanás tuʼn qkubʼ numj ex tuʼn ttzaj qbʼis kyuʼn nya bʼaʼn in qo ok weʼ twitz toj ambʼil jaʼlo. Taj tuʼn tten qximbʼetz nya toj tumel ex tuʼn miʼn qtzalaj kyiʼj tiʼchaq. Qa ma txi qqʼoʼn ambʼil te jlu, mlay tzʼonin qiʼj tuʼn tok tilil quʼn toj pakbʼabʼil. Bʼaʼn tuʼn ttzaj qnaʼn qa aju tuʼn qqʼon chjonte, at tmojbʼabʼil tibʼ kyukʼil qe mod in tzaj tqʼoʼn xewbʼaj xjan, ik tzeʼn tuʼn qtzalaj kyiʼj tbʼanel tiʼchaq in tzaj tqʼoʼn Jehová qe ex tiʼj qʼuqbʼil qkʼuʼj at kyiʼj ttziybʼil tiʼj ambʼil tzul (Gál. 5:22, 23).

Bʼalo qkyaqilx tbʼanel ma tzʼela toj qwitz aju ma tzaj qʼamaʼn tiʼjju tuʼn qqʼon chjonte. Noqtzun tuʼnj, in nel qnikʼ tiʼj qa nya qʼiʼn mod lu quʼn aj qul itzʼj. Pero miʼn tzaj qbʼis. Jaku txi qxnaqʼtzan qibʼ tuʼn t-xi qqʼoʼn chjonte ex tuʼn kukx tten qmod lu. Tuʼn tbʼant quʼn, il tiʼj tuʼn tel qpaʼn ambʼil tuʼn qximen tkyaqil qʼij kyiʼj tbʼanel tiʼchaq at qe ex jaku txi qqʼoʼn chjonte kyiʼj. Qa mas ma bʼant jlu quʼn, mas nya kwest kxel qqʼoʼn chjonte. Ex mas qo tzalajel kywitz qeju xjal oʼkx in che ximen tiʼj nya bʼaʼn in tzaj kyiʼj. Bʼaʼn tuʼn qximen tiʼj tkyaqilju tbʼanel tiʼchaq in tzaj tqʼoʼn Jehová ex junjuntl xjal qe, aqeju in che onin qiʼj ex in qo tzalaj kyuʼn. Axpe ikx, jaku kubʼ qtzʼibʼin kabʼe moqa oxe tbʼanel tiʼchaq in nikʼ qiʼj toj jun qʼij ex bʼaʼn tuʼn t-xi qqʼoʼn chjonte kyiʼj.

O tzʼel kynikʼ xjal o tzʼetz nim kyxnaqʼtzbʼil tiʼj qa mas in naqʼunan qximbʼetz toj tumel qa naqʼli qoʼ tuʼn qqʼon chjonte ex qa in nonin qiʼj tuʼn tten qximbʼetz toj tumel. Mas in che tzalaj xjal qa bʼaʼn che qʼon chjonte. Tuʼntzunju, bʼaʼn tuʼn qximen kyiʼj tbʼanel tiʼchaq at qe, qo tzalaj kyiʼj ex qqʼonx chjonte kyiʼj. Twitzju tuʼn tkubʼ qximen qa at tkyaqil qe, bʼaʼn tuʼn t-xi qbʼinchaʼn aju in tzaj tqʼamaʼn Tyol Dios: «Kyqʼonxe chjonte te Qman, porke puro bʼaʼn te», ex «kyqʼonxe chjonte tiʼj tkyaqil» (1 Crón. 16:34; 1 Tes. 5:18).