XNAQʼTZBʼIL 52
Aqeye mambʼaj, kyxnaqʼtzanxe kykʼwale tuʼn tok kykʼujlaʼn Jehová
«Qe qkʼwaʼl jun qetzbʼil in tzaj tqʼoʼn Qman» (SAL. 127:3).
BʼITZ 134 Jun oyaj qe kʼwal tuʼn Dios
AJU KʼELEL QNIKʼ TIʼJ *
1. ¿Alkye oklenj o txi tqʼoʼn Jehová kye mambʼaj?
KUX tqʼoʼn Jehová toj kyanmi Adán ex Eva tuʼn tten kygan tuʼn tul kykʼwal. Tuʼntzunju, in tzaj tqʼamaʼn Tyol Dios jlu: «Qe qkʼwaʼl jun qetzbʼil in tzaj tqʼoʼn Qman» (Sal. 127:3). Tuʼn tel qnikʼ kyiʼj yol lu, qo ximen tiʼj qa in tzaj tqanin jun qamiw tuʼn tok qxqʼuqin nim tpwaq. Nimlo qo tzalajel tuʼnju in nok qeʼ tkʼuʼj qamiw qiʼj. Noqtzun tuʼnj, ax ikx jaku tzaj bʼaj qkʼuʼj aj qximen tiʼj tzeʼn kʼokel qxqʼuqin pwaq. A Jehová aju mas tbʼanel Qamiw ex o tzaj toqxenin jun tiʼ mas nim toklen kye mambʼaj twitzju pwaq: tuʼn kyxqʼuqin kyiʼj kykʼwal ex tuʼn kytzalaj.
2. ¿Alkyeqe xjel qo xnaqʼtzal kyiʼj?
2 ¿Alkye kbʼel ximente qa tzul kykʼwal mejebʼleʼn ex toj alkye ambʼil? Ex ¿tiʼ jaku bʼant kyuʼn tatbʼaj tuʼn kytzalaj kykʼwal? Qo xnaqʼtzan kyiʼj junjun nabʼil in tzaj tqʼoʼn Tyol Dios, aʼyeju jaku che onin kyiʼj mejebʼleʼn tuʼn tkubʼ kyximen aju mas bʼaʼn.
QQʼONK TOKLEN AJU KBʼEL KYXIMEN MEJEBʼLEʼN
3. a) ¿Alkye kbʼel ximente qa tzul tkʼwal jun mejebʼleʼn moqa miʼn? b) ¿Alkyeqe nabʼil toj Tyol Dios bʼaʼn tuʼn ttzaj kynaʼn qeju kyamiw ex qe toj kyja mejebʼleʼn?
3 Kyoj junjun lugar, naqʼli qe xjal tuʼn tul naj kykʼwal mejebʼleʼn. Axpe ikx jaku tzaj kyqʼamaʼn toj kyja ex junjuntl xjal tuʼn tbʼant jlu kyuʼn. In tzaj tqʼamaʼn jun testigo de Jehová te Asia jlu, aju Jethro tbʼi: * «Ateʼ junjun erman o tzul kykʼwal, in xi kyqʼamaʼn kye qeju mintiʼ kykʼwal tuʼn tten kykʼwal». Juntl erman te Asia aju Jefri tbʼi, in tzaj tqʼamaʼn jlu: «Ateʼ junjun erman in xi kyqʼamaʼn kye mejebʼleʼn mintiʼ kykʼwal qa ni jun kxqʼuqil kyiʼj aj kytijen». Noqtzun tuʼnj, teyele te junjun mejebʼleʼn kbʼel t-ximen qa tzul kykʼwal moqa miʼn (Gál. 6:5). Ax tok, kyaj qe kyamiw ex qe toj kyja qeju in che kubʼ mojeʼ tuʼn kytzalaj, pero il tiʼj tuʼn tel kynikʼ tiʼj qa aʼye mejebʼleʼn che kbʼel ximente qa tzul kykʼwal moqa miʼn (1 Tes. 4:11).
4, 5. a) ¿Alkye kabʼe tiʼ nim toklen tuʼn kyyolin mejebʼleʼn tiʼj? b) Chikʼbʼantza toj alkye ambʼil mas bʼaʼn tuʼn kyyolin tiʼj jlu.
4 Qa ma kubʼ t-ximen jun mejebʼleʼn tuʼn tul kykʼwal, nim toklen tuʼn kyyolin tiʼj kabʼe tiʼ: tnejel, jtoj tzul kykʼwal, ex tkabʼin, jteʼ kykʼwal tzul. Noqtzun tuʼnj, ¿toj alkye ambʼil bʼaʼn tuʼn kyyolin tiʼj jlu? Ex ¿tiquʼn nim toklen?
5 Chʼixmi tkyaqil maj, mas bʼaʼn tuʼn kyyolin tiʼj qa tzul kykʼwal akux in che xmoxin kyibʼ, tuʼnju nim toklen tuʼn tten ax kyximbʼetz tiʼj jlu. Ax ikx nim toklen tuʼn kyximen tiʼj qa bʼantni kyten tuʼn kyok te mambʼaj. Ateʼ junjun mejebʼleʼn in kubʼ kyximen qa mas bʼaʼn tuʼn kyyon jun moqa kabʼe abʼqʼi naʼmxtoq tul kykʼwal. In nonin jlu kyiʼj tuʼn kynaqʼet tiʼj kymejebʼleʼn ex tuʼn tchʼiy kyamiwbʼil kyxolx, tuʼnju aj tul kykʼwal kʼokel kyqʼoʼn nim ambʼil kyiʼj ex kyipumal (Efes. 5:33).
6. Tuʼnju in qo anqʼin toj jun ambʼil jatumel at nim yajbʼil, ¿tiʼ o kubʼ kyximen junjun mejebʼleʼn?
6 Ateʼ junjun okslal o tzʼel kykanoʼn tiʼj techel kyaj kyqʼoʼn oxe tkʼwal Noé ex qe kyxuʼjil tuʼnju mintiʼ ul naj kykʼwal (Gén. 6:18; 9:18, 19; 10:1; 2 Ped. 2:5). Ok tmojbʼaʼn Jesús qqʼijlalil ik tzeʼn tqʼijlalil Noé, ex jaku txi qqʼamaʼn qa at «nim yajbʼil» toj ambʼil jaʼlo (2 Tim. 3:1; Mat. 24:37). Tuʼntzunju, ateʼ junjun mejebʼleʼn o kubʼ kyximen tuʼn miʼn tul kykʼwal jaʼlo tuʼntzun kyajbʼen mas te Jehová.
Aj kyximen mejebʼleʼn tiʼj qa ktel kykʼwal moqa miʼn ex jteʼ ktel, il tiʼj tuʼn tel kynikʼ tiʼj qa jaku che xqʼuqit kyuʼn. (Qʼonka twitza tiʼj taqikʼ 7). *
7. ¿Tzeʼn jaku che onin nabʼil tkuʼx toj Lucas 14:28 ex 29, ex Proverbios 21:5 kyiʼj mejebʼleʼn?
7 Aj tkubʼ kyximen mejebʼleʼn qa tzul kykʼwal moqa miʼn ex jteʼ tzul, bʼaʼn tuʼn kyximen tiʼj qa jaku che xqʼuqit kyuʼn (kjawil uʼjit Lucas 14:28, 29). Aʼyeju mejebʼleʼn o tzul kykʼwal, ojtzqiʼn kyuʼn qa in xi tiʼn ambʼil, kyipumal ex pwaq tuʼn kychʼiy kʼwal. Tuʼntzunju, nim toklen tuʼn tkubʼ kyxjelin mejebʼleʼn jlu: «¿Ilpe tiʼj tuʼn qaqʼunane qkabʼile tuʼn tten aju at tajbʼen kye toj qjaye? ¿Axpe qximbʼetze at tiʼjju at tajbʼen qeye? Qa qo aqʼunale qkabʼile, ¿alkyetzun kxqʼuqil kyiʼj qkʼwale? ¿Alkye kʼonil kyiʼj tuʼn tten tbʼanel kyximbʼetz ex kymod?». Aj kyyolin mejebʼleʼn kyiʼj xjel lu, jaku txi kybʼiʼn nabʼil tkuʼx toj Proverbios 21:5 (uʼjinktza).
Qa at tkʼujlabʼil chmilbʼaj tiʼj t-xuʼjil, kʼokel tilil tuʼn tuʼn tonin tiʼj. (Qʼonka twitza tiʼj taqikʼ 8).
8. a) ¿Alkye juntl tiʼ bʼaʼn tuʼn kyximen mejebʼleʼn tiʼj naʼmxtoq kyul kykʼwal? b) ¿Tiʼ kbʼantel tuʼn chmilbʼaj qa kʼujlaʼn t-xuʼjil tuʼn?
8 Kʼelel tpaʼn mambʼaj ex txubʼaj nim ambʼil ex kyipumal tuʼn kyxqʼuqin kyiʼj kykʼwal. Tuʼntzunju, qa ma che ul nim kykʼwal, kwestlo jaku tzʼela toj kywitz tuʼn kyxqʼuqin kyiʼj ex tuʼn t-xi kyqʼoʼn aju tajbʼen kye. O tzaj kyqʼamaʼn junjun mejebʼleʼn qa e sikt tej tbʼaj jlu kyiʼj. Bʼalo nim jaku sikt txubʼaj ex jaku tzaj bʼaj tkʼuʼj, ex tuʼn jlu ya mlay ten tipumal tuʼn tex pakbʼal, tuʼn t-xnaqʼtzan ex tuʼn tnaʼn Dios. Axlo ikx kwest tuʼn tok tqʼoʼn twiʼ kyiʼj chmabʼil ex mlay tzʼonin tiʼj. Pero aju chmilbʼaj kʼujlaʼn t-xuʼjil tuʼn, kʼokel tilil tuʼn tonin tuʼn tiʼj ik tzeʼn toj chmabʼil ex toj ja. Jun techel, jakulo tzʼonin kyiʼj aqʼuntl toj ja ex kʼokel tilil tuʼn tuʼn kytzalaj toj tja tiʼj kykʼulbʼil in nok tkyaqil seman, ex kukx kʼelex pakbʼal kyukʼil toj tja.
XNAQʼTZANXA KYE TKʼWALA TUʼN TOK KYKʼUJLAʼN JEHOVÁ
9, 10. ¿Tiʼ il tiʼj tuʼn tbʼant kyuʼn mambʼaj kyaj tuʼn kyonin kyiʼj kykʼwal?
9 ¿Tiʼ jaku bʼant kyuʼn mambʼaj tuʼn t-xi kyxnaqʼtzaʼn kye kykʼwal tuʼn tok kykʼujlaʼn Jehová? ¿Tzeʼn jaku che ok kyxqʼuqin tiʼjju nya bʼaʼn at twitz txʼotxʼ? Qo xnaqʼtzan kyiʼj junjun nabʼil.
10 Kyqaninxe onbʼil te Jehová toj naʼj Dios. Qo xnaqʼtzan tiʼj techel kyaj tqʼoʼn Manóah ex t-xuʼjil. Tej tok tbʼiʼn Manóah qa tzul jun kykʼwal aju Sansón tbʼi, xi tqanin onbʼil te Jehová tuʼn ttzaj tyekʼin te tzeʼn tuʼn t-xi tqʼoʼn xnaqʼtzbʼil te tkʼwal.
11. Ik tzeʼn in tzaj tyekʼin Jueces 13:8, ¿alkye tten jaku tzʼel kykanoʼn mambʼaj tiʼj techel kyaj tqʼoʼn Manóah?
11 El kykanoʼn Nihad ex Alma te Bosnia-Herzegovina aju techel kyaj tqʼoʼn Manóah. Kyqʼama jlu: «Xi qqanine te Jehová tuʼn tonin qiʼje tuʼn qoke te tbʼanel mambʼaj ik tzeʼn bʼant tuʼn Manóah. Ex tzaj ttzaqʼweʼn qnaʼj Diose toj junxichaq tten ik tzeʼn tuʼn Tyol, kyuʼn quʼj, kyuʼn chmabʼil ex kyuʼn nimaq chmabʼil» (kjawil uʼjit Jueces 13:8).
12. ¿Alkye tbʼanel techel kubʼ tqʼoʼn José ex María kywitz kykʼwal?
12 Kyqʼonkuye tbʼanel techel kywitz. Aqeye mambʼaj, nim toklen aju in xi kyqʼamaʼne kye kykʼwale. Pero maslo jaku Deut. 4:9, 10). «Tkyaqil abʼqʼi in cheʼxtoq» tiʼn qe toj tja toj tnam Jerusalén tuʼn tkubʼ kyikʼsaʼn Xjan Qʼij, maske mintiʼtoq in tzaj tqʼamaʼn Ley (Luc. 2:41, 42). Kubʼlo kyximen junjun mambʼaj toj ambʼil aju qa kwest tuʼn tbʼant jlu kyuʼn, qa najchaq tuʼn kyxiʼ ex qa nimtoq pwaq in xi tiʼn. Pero nimtoq toklen toj twitz José aju tajbʼebʼil te Jehová ex xi tyekʼin kye tkʼwal tuʼn tbʼant jlu kyuʼn. Atzunte María ojtzqiʼnxixtoq Tyol Dios tuʼn. Tukʼilju bʼant tuʼn ex tqʼama, onin kyiʼj tal tuʼn tok kykʼujlaʼn Tyol Dios.
tzʼonin kyiʼj qa ma kubʼ kyqʼoʼne jun tbʼanel techel kywitz. Jaku txi qqʼamaʼn qa kubʼ tqʼoʼn José ex María jun tbʼanel techel kywitz kykʼwal, kyxol qe jlu ten Jesús. Nya oʼkx aqʼunan José kyuw tuʼn tten aju at tajbʼen kye toj tja, sino ax ikx onin kyiʼj tuʼn tok kyqʼoʼn toklen kyajbʼebʼil te Jehová (13. ¿Tiʼ bʼant tuʼn jun mejebʼleʼn tuʼn tel tkanoʼn tiʼj techel kyaj tqʼoʼn José ex María?
13 Ok tilil tuʼn Nihad ex Alma, aju ma qo yolin kyiʼj, tuʼn tel kykanoʼn tiʼj José ex María tuʼntzun kyonin tiʼj kykʼwal tuʼn tok tkʼujlaʼn Jehová ex tuʼn tajbʼen te. In tzaj kyqʼamaʼn tiʼ bʼant kyuʼn: «Ok tilil quʼne tuʼn tkubʼ qyekʼine twitz qkʼwale tiʼ tbʼanel in tzaj qa ma kubʼ qbʼinchaʼn aju in tzaj tqʼamaʼn Tyol Dios». Ex tqʼamatl Nihad jlu: «Qa qaj tuʼn tten jun tbʼanel kyamiwbʼil qkʼwal tukʼil Jehová, nim toklen tuʼn tten jun tbʼanel qamiwbʼil tukʼil».
14. ¿Tiquʼn nim toklen tuʼn tok kybʼiʼn mambʼaj alkyeqe kyamiw kykʼwal at?
14 Che onine kyiʼj kykʼwale tuʼn kyten tbʼanel kyamiw. Il tiʼj tuʼn tok tbʼiʼn mambʼaj ex txubʼaj alqukʼil in nok kymojbʼan kyibʼ kykʼwal ex tiʼ in bʼant kyuʼn. Ax ikx il tiʼj tuʼn tok kybʼiʼn alqukʼil in che yolin toj yolbʼil ex kyoj redes sociales. ¿Tiquʼn? Tuʼnju jaku chʼexpaj kyximbʼetz ex kymod kyuʼn kyamiw che tel (1 Cor. 15:33).
15. ¿Tiʼ xnaqʼtzbʼil jaku tzʼel kyiʼn mambʼaj tiʼj techel in kubʼ tqʼoʼn Jessie?
15 ¿Tiʼ jaku bʼant kyuʼn mambʼaj qa mintiʼxix kyojtzqibʼil tiʼj computadora ex kyiʼj kʼuxbʼil? In tzaj tqʼamaʼn jun mambʼaj te Filipinas jlu, aju Jessie tbʼi: «Maske nya nimtoq qojtzqibʼile at kyiʼj kʼuxbʼil, nya tuʼn jlu mintiʼ xi qqʼamaʼne kye qkʼwale alkye junjun nya bʼaʼn jaku tzaj kyiʼj tuʼn». Mintiʼ xi tqʼamaʼn Jessie kye tkʼwal tuʼn miʼn kyajbʼen kʼuxbʼil kyuʼn noq tuʼnju mintiʼtoq in najbʼen tuʼn. Tqʼamatl jlu: «Xi nqʼamaʼne kye nkʼwale qa jaku che onin kʼuxbʼil kyiʼj tuʼn tbʼant juntl yol kyuʼn, tuʼn tbʼaj kybʼinchaʼn kyten kyiʼj chmabʼil ex tuʼn kyuʼjin tiʼj Tyol Dios tkyaqil qʼij». Qa mambʼaj teya, ¿ope jaw tuʼjina ex ope yolina kyukʼil tkʼwala kyiʼj tbʼanel nabʼil tiʼjju alkye tten tuʼn kyxi samet tqanil ex qe foto, aju at toj jw.org® jatumel in tzaj tqʼamaʼn «Kye kuxʼun»? Ax ikx o che etz video ¿Oʼkxpe tok twiʼya kyiʼj tkʼuxbʼila? ex aju Qa in che ajbʼen tembʼil tuʼna toj Internet, miʼn bʼaj tsukun tibʼa kyoj. * ¿Ope che kubʼ t-xnaqʼtzaʼna qe video lu kyukʼil tkʼwala? Jaku che onin tqanil lu tuʼn kyxi xnaqʼtzet kʼwal tuʼn kyajbʼen kʼuxbʼil kyuʼn toj tumel (Prov. 13:20).
16. ¿Tiʼ o bʼant kyuʼn nim mambʼaj ex tiʼ o tzaj tuʼn jlu?
16 Nim mambʼaj in nok tilil kyuʼn tuʼn kyten kykʼwal kyukʼil erman in kubʼ kyqʼoʼn jun tbʼanel techel toj kyajbʼebʼil te Jehová. Atzun jlu bʼant tuʼn Dani ex Bella, jun mejebʼleʼn te Costa de Marfil.
Otoq che naqʼet tuʼn t-xi kyqʼoʼn txokbʼil tiʼj ansyan in bʼet kyojele Ja te Chmabʼil tuʼn tkyaj ten kyja. In tzaj tqʼamaʼn Dani jlu: «Nim onin jlu tiʼj qkʼwale. Ok te precursor ex jaʼlo in najbʼen te onil tiʼj ansyan in bʼet kyojele Ja te Chmabʼil». Aqeye mambʼaj, ¿jakupe bʼant ax jlu kyuʼne tuʼn kyonine kyiʼj kykʼwale?17, 18. ¿Toj alkye ambʼil kxel tzyet tuʼn t-xi kyqʼoʼn mambʼaj xnaqʼtzbʼil tiʼj Tyol Dios kye kykʼwal?
17 Kyxnaqʼtzanxe Tyol Dios kye kykʼwale noq oʼkx aj kyul itzʼj. Qa ma bʼant jlu kyuʼne, atzun mas tbʼanel (Prov. 22:6). Atzun jlu bʼant tuʼn ttxuʼ Timoteo aju Eunice tbʼi, ex tuʼn Loida aju t-awela. Xi tzyet tuʼn t-xi kyqʼoʼn xnaqʼtzbʼil te Timoteo noq oʼkx tej tul itzʼj (2 Tim. 1:5; 3:15). Tej tbʼet ambʼil, xiʼ Timoteo tukʼil Pablo kyoj tbʼe.
18 Juntl mejebʼleʼn te Costa de Marfil, aju John ex Paula kybʼi, e onin kyiʼj qaq kykʼwal tuʼn tok kykʼujlaʼn Jehová ex tuʼn kyajbʼen te. ¿Tiʼ onin kyiʼj tuʼn tbʼant jlu kyuʼn? El kykanoʼn tiʼj techel kyaj tqʼoʼn Eunice ex Loida. In tzaj kyqʼamaʼn jlu: «Xi tzyet tuʼn t-xi qxnaqʼtzaʼne Tyol Dios kye qkʼwale tej tzmatoq in che ul itzʼj» (Deut. 6:6, 7).
19. ¿Tiʼ t-xilen txol yol «kukx kymanxe» Tyol Dios kye kykʼwale?
19 ¿Tiʼ t-xilen txol yol «kukx kymanxe» Tyol Dios kye kykʼwale? Aju txol yol in najbʼen tzalu, a t-xilen tuʼn t-xi qʼet xnaqʼtzbʼil ex tuʼn t-xi naʼn jun tiʼ nimku maj. Tuʼntzunju, nim toklen tuʼn tel kypaʼn mambʼaj ambʼil tuʼn kyten kyukʼil kykʼwal junjun qʼij. Atlo maj jaku che sikt tuʼnju kxel kyqʼamaʼn jun ex juntl maj jun xnaqʼtzbʼil kye. Pero bʼaʼn tuʼn tkubʼ kyximen mambʼaj qa in xi tqʼoʼn jlu ambʼil kye tuʼn kyonin kyiʼj kykʼwal tuʼn telxix kynikʼ tiʼj Tyol Dios ex tuʼn t-xi kynimen.
Nim toklen tuʼn tel kynikʼ mambʼaj tiʼj tzeʼn tuʼn t-xi qʼet xnaqʼtzbʼil te teyele junjun kykʼwal. (Qʼonka twitza tiʼj taqikʼ 20). *
20. Chikʼbʼantza tzeʼn jaku tzʼonin Salmo 127:4 tuʼn kychʼiyset kʼwal.
20 Bʼaʼn tuʼn tok kyojtzqiʼne qe kykʼwale. In tzaj tqʼamaʼn Salmo 127 qa ik kyten kʼwal ik tzeʼn qe plech (kjawil uʼjit Salmo 127:4). Junxitl tten bʼinchabʼin qe plech ex kywaʼlil, ax ikx kye kʼwal junxitl tmod jun twitz juntl. Tuʼntzunju, il tiʼj tuʼn kyximen mambʼaj tiʼj tzeʼn kxel kyqʼoʼn xnaqʼtzbʼil te teyele junjun kʼwal. In tzaj tqʼamaʼn jun mejebʼleʼn te tnam Israel tiʼ onin kyiʼj tuʼn kyajbʼen kykʼwal te Jehová: «O xnaqʼtzane tiʼj Tyol Dios tukʼil teyele junjun kye». Ax tok, a mambʼaj kbʼel ximente qa il tiʼj ex qa jaku bʼant jlu kyuʼn.
KʼONIL JEHOVÁ KYIʼJE
21. ¿Alkye onbʼil jaku tzaj tqʼoʼn Jehová kye mambʼaj?
21 Atlo maj jaku che tzaj xobʼ mambʼaj aj kyximen tiʼj alkyeqe tiʼchaq jaku che ok weʼ twitz tuʼn kyjaw chʼiyset kykʼwal, pero jun oyaj qe jlu tuʼn Jehová. Taj tuʼn tonin kyiʼj mambʼaj. In tzaj tbʼiʼn kynaʼj Dios ex in tzaj ttzaqʼweʼn aj tonin kyiʼj tukʼil Xjan Uʼj, kyukʼil quʼj ex tukʼil techel in kubʼ kyqʼoʼn mejebʼleʼn at kykʼwal ex qe consej in tzaj kyqʼoʼn.
22. ¿Alkyeqe junjun tbʼanel tiʼchaq jaku txi kyqʼoʼn mambʼaj kye kykʼwal?
22 In kubʼ kyximen junjun xjal qa in xi tiʼn 20 abʼqʼi tuʼn kyjaw chiʼyset kʼwal, pero kukx in bʼant jlu kyuʼn mambʼaj. Ex aju mas tbʼanel jaku txi kyqʼoʼne kye kykʼwale, aju kykʼujlabʼile, aju ambʼil at kyiʼje ex aju xnaqʼtzbʼil tiʼj Tyol Dios. Pero junxitl kymod kʼwal in ten tiʼj xnaqʼtzbʼil in xi qʼet kye. Noqtzun tuʼnj, nim kʼwal o che jaw chʼiy toj jun ja xjal kʼujlaʼn Jehová kyuʼn ex in kubʼ kynaʼn ik tzeʼn te Anna, jun ermana te Asia aju tqʼama jlu: «Aj nximane tiʼj xnaqʼtzbʼil tzaj kyqʼoʼn nmane weye, in xi nqʼoʼne chjonte kye tuʼnju in tzaj kawine kyuʼn ex e onin wiʼje tuʼn tok nkʼujlaʼne Jehová. Nya oʼkx tzaj kyqʼoʼn nchwinqlale, sino e onin wiʼje tuʼn tten ttxolil wanqʼibʼile» (Prov. 23:24, 25). Ax jlu jaku kyqʼama nim millón tmajen Jehová.
BʼITZ 59 Tzaja nimsal tbʼi Qman Jehová
^ taqik' 5 ¿Ilpe tiʼj tuʼn tul kykʼwal qeju o che kubʼ mojeʼ? Qa ikju, ¿jteʼ kykʼwal tzul? Ex ¿alkye tten jaku chex kyxnaqʼtzaʼn tuʼntzun tok kykʼujlaʼn Jehová ex tuʼn kyajbʼen te? Toj xnaqʼtzbʼil lu qo yolil kyiʼj junjun techel kyiʼj mambʼaj toj ambʼil jaʼlo ex kyiʼj junjun nabʼil toj Tyol Dios, aqeju che onil qiʼj tuʼn kytzaqʼwet xjel lu.
^ taqik' 3 Ma che kubʼ chʼixpet junjun bʼibʼaj toj xnaqʼtzbʼil lu.
^ taqik' 15 Ax ikx jaku tzʼok tkeʼyina xnaqʼtzbʼil «Xqʼuqink tibʼa kyiʼj nya bʼaʼn jaku che tzaj kyuʼn redes sociales», aju tkuʼx toj Uʼj te aqʼuntl toj chmabʼil Kyanqʼibʼil Okslal ex Kypakbʼabʼil te junio te 2018.
^ taqik' 61 TQANIL KYIʼJ TILBʼILAL: In yolin jun mejebʼleʼn tiʼj qa tzul kykʼwal moqa miʼn ex in che ximen tiʼj tiʼ tbʼanel tzul kye tuʼn jlu, ex tiʼj junjun tiʼ kbʼantel kyuʼn aj kyok te mambʼaj.
^ taqik' 65 TQANIL KYIʼJ TILBʼILAL: In xi tqʼoʼn jun mejebʼleʼn xnaqʼtzbʼil te teyele junjun kykʼwal, tuʼnju junxichaq kyabʼqʼi ex junxichaq tten in nel kynikʼ kyiʼj xnaqʼtzbʼil.