¿Jakupe che tzaqʼwet xjel lu tuʼna kyiʼj xnaqʼtzbʼil i etz toj uʼj Aju Xqʼuqil te 2019?

¿Tiʼ t-xilen ttziybʼil Jehová tkuʼx toj Isaías 54:17?

Qʼuqli qkʼuʼj tiʼj qa kxqʼuqil Jehová qiʼj tiʼj alkyexku nya bʼaʼn jaku tzʼok kybʼinchaʼn aj qʼoj qiʼj (Is. 25:4, 5). Mlayx tzaj tqʼoʼn ambʼil tuʼn tok bʼinchaʼn jun nya bʼaʼn qiʼj te jumajx (w19.01 t-xaq 6 ex 7).

¿Tzeʼn kubʼ tyekʼin Jehová qa tzʼaqli qe tbʼinchbʼen tukʼil tmod ten kyukʼil aj Canaán ex kyukʼil aj Israel mintiʼ e nimen te?

Kubʼ tqʼoʼn Jehová kykastiw qeju kubʼ kybʼinchaʼn nim nya bʼaʼn tukʼil kychibʼjal, qeju ok kybʼinchaʼn nya bʼaʼn kyiʼj xuʼj ex kyiʼj tal kʼwal. Atzun qeju e nimen te ex kubʼ kybʼinchaʼn bʼaʼn, e tzaj tkʼiwlaʼn (w19.02 t-xaq 22 ex 23).

¿Tiʼ qmod kbʼel qyekʼin qa ma tzʼok tqʼoʼn jun xjal nya testigo de Jehová jun naʼj Dios?

Jaku kubʼ qyekʼin tbʼanel qmod ex miʼn qo qʼajt, pero miʼn txi qqʼamaʼn «ikxwitju» ex miʼn tzʼok qtzyuʼn kyqʼabʼ txqantl. Jaku kubʼ qximen tuʼn tok qqʼoʼn qex qnaʼj Dios toj qanmi (w19.03 t-xaq 31).

¿Junpe matij il aj tok ten jun xjal tiʼj jun tal kʼwal?

Aj tok ten jun xjal tiʼj jun tal kʼwal in nok tbʼinchaʼn jun matij il tiʼj, tiʼj kʼloj okslal, twitz ley ex twitz Jehová. Kyoj lugar jatumel at ley tiʼj tuʼn t-xi qʼet part tiʼj jun xjal in nok ten tiʼj jun tal kʼwal, in xi kynimen ansyan ley lu (w19.05 t-xaq 9 ex 10).

¿Tiʼ jaku bʼant quʼn tuʼn tok qximbʼetz te akʼaj?

Nim toklen tuʼn tbʼant oxe tiʼchaq quʼn: tuʼn qnaʼn Dios, tuʼn qximen tiʼjju tkuʼx toj qanmi ex tuʼn tjaw qjyoʼn qe tbʼanel qamiw (w19.06 t-xaq 11).

¿Alkye tten jaku bʼaj qbʼinchaʼn qten naʼmxtoq qok weʼ twitz ikʼbʼil?

Nim toklen tuʼn tchʼiy qamiwbʼil tukʼil Jehová, tuʼn tok qeʼ qkʼuʼj tiʼj qa kʼujlaʼn qoʼ tuʼn ex qa mlayx qo kyaj tkolin. Ax ikx il tiʼj tuʼn quʼjin tiʼj Xjan Uʼj tkyaqil qʼij, tuʼn kukx qnaʼn Dios, tuʼn tok qeʼ qkʼuʼj tiʼj qa ax tok che japunel qe tyol Jehová tjaqʼ Tkawbʼil, tuʼn kykyaj qe taqikʼ Tyol Dios toj qwiʼ ex qe bʼitz mas qgan (w19.07 t-xaq 2 a 4).

¿Tzeʼn jaku qo onin kyiʼj toj qja tuʼn kyklet?

Nim toklen tuʼn qximen kyiʼj, tuʼn tkubʼ qyekʼin tbʼanel qmod kywitz, tuʼn qok te tbʼanel xjal kyukʼil ex tuʼn tten qpasens kyiʼj (w19.08 t-xaq 15 a 17).

¿Tzeʼn in chewix qanmi kyuʼn tyol Jesús tkuʼx toj Mateo 11:28?

In chewix qanmi tuʼnju ateʼ mas tbʼanel nejenel qxol, ateʼ mas tbʼanel qukʼil toj aqʼuntl ex in qo aqʼunan tiʼj aqʼuntl mas tbʼanel (w19.09 t-xaq 23).

¿Tzeʼn in nonin Jehová qiʼj tuʼn ttzaj tqʼoʼn qipumal ex tuʼn tten qgan tuʼn tbʼant tajbʼil quʼn? (Filip. 2:13)

Aj tjaw quʼjin Tyol Dios ex aj qximen tiʼj, in tzaj tqʼoʼn Jehová qipumal ex qgan tuʼn tkubʼ qbʼinchaʼn tajbʼil. Ax ikx jaku tzʼajbʼen xewbʼaj tuʼn tuʼntzun kybʼant junjun aqʼuntl quʼn (w19.10, t-xaq 21).

¿Tiʼ kbʼantel quʼn naʼmxtoq tkubʼ qximen jun tiʼ nim toklen?

Nim toklen tuʼn tbʼant jweʼ tiʼ quʼn. Qo jyon tiʼj tqanil, qqaninx qnabʼil te Dios, qo ximen tiʼj tiquʼn kbʼantel quʼn, qqʼonk qwiʼ tiʼjju qaj tuʼn tbʼant quʼn ex tzʼelx qnikʼ tiʼjju mlay bʼant quʼn (w19.11 t-xaq 27 a 29).

¿Atzpe tzaj tzyet xnaqʼtzbʼil tiʼj qa mintiʼ in kyim kyanmi xjal tej tyolin Satanás tukʼil Eva?

Bʼalo nya. Mintiʼ xi tqʼamaʼn Satanás te Eva qa oʼkx kkyimeltoq t-xmilal, sino tqʼama qa mlayxtoq kyim toj alkyexku tten. Kubʼ naj nya ax tok okslabʼil toj tqʼijlalil Noé tej ttzaj Nim Jbʼal. Bʼalo tzaj tzyet xnaqʼtzbʼil tiʼj qa mintiʼ in kyim kyanmi xjal tej naʼmxtoq kyel tsputin Dios qe xjal in che bʼinchantoq tiʼj matij ja te Babel (w19.12 t-xaq 15).