Nyalo tiʼj jlu yolin. Tuʼnju mintiʼ xi tqʼamaʼn Satanás te Eva qa kxeʼltoq anqʼil toj juntl lugar qa matoq txi tloʼn twitz tzeʼ otoq txi tqʼamaʼn Dios tuʼn miʼn t-xi kyloʼn. Toj ambʼil jaʼlo ojtzqiʼn xnaqʼtzbʼil lu kyuʼn xjal ik tzeʼn mintiʼ in kyim kyanmi xjal. Ajbʼen jun kan tuʼn Satanás tuʼn t-xi tqʼamaʼn te Eva qa mlayxtoq kyim. Kyukʼil yol lu tajtoq tuʼn t-xi tqʼamaʼn te Eva qa kukx kʼanqʼiltoq ex qa mas ktzalajeltoq tiʼj tanqʼibʼil tzalu twitz Txʼotxʼ, ex qa nya iltoq tiʼj tuʼn tonin Jehová tiʼj (Gén. 2:17; 3:3-5).

Qa nya toj Edén tzaj tzyet nya ax tok xnaqʼtzbʼil tiʼjju qa mintiʼ in kyim kyanmi xjal, ¿toj alkye ambʼil tzaj tzyet? Mlayxix txi qqʼamaʼn toj alkye ambʼil. Ojtzqiʼn quʼn qa kubʼ naj nya ax tok okslabʼil toj tqʼijlalil Noé tej ttzaj Nim Jbʼal. Ex toj ambʼil aju oʼkx Noé ex qe toj tja e klet, ex in che ajbʼentoq te Jehová. Tuʼn jlu e kubʼ naj nya ax tok xnaqʼtzbʼil.

Tuʼn jlu in nel qnikʼ tiʼj qa aju xnaqʼtzbʼil nya ax tok nimen kyuʼn xjal jaʼlo, aju qa mintiʼ in kyim kyanmi xjal, tzaj tzyet tej otoqxi tzikʼ Nim Jbʼal. Tej tbʼaj ttzpetsaʼn Jehová kyyol xjal toj Babel ex tej tbʼaj tsputin qe xjal «tuj tkyaqil twitz txʼotxʼ», jaku txi qqʼamaʼn qa e ok ten xjal lu qʼamalte kye junjuntl qa mintiʼ in kyim kyanmi xjal (Gén. 11:8, 9). Tuʼntzunju, mintiʼ ojtzqiʼn quʼn toj alkye ambʼil tzaj tzyet nya ax tok xnaqʼtzbʼil lu. Oʼkx ojtzqiʼn quʼn qa a Satanás at tpaj tiʼj nya ax tok xnaqʼtzbʼil lu, tuʼnju atz tzajni nya ax tok yol tukʼil ex in tzalaj aj tok kybʼiʼn txqantl noq jaxku tumel (Juan 8:44).