Nya oʼkx in yolin txʼolbʼabʼil tkuʼx toj Deuteronomio 22:25 a 27 tuʼn tel nikʼbʼaj tiʼj qa a xinaq at tpaj, tuʼnju ya ojtzqiʼntoq jlu kyuʼn txqantl. Sino mas in yolin jlu tiʼj tuʼn tel nikʼbʼaj tiʼj qa mintiʼ tpaj txin. Qo xnaqʼtzan kyiʼj junjun versículo tok tibʼajxi qe taqikʼ lu.

Kyoj versículo tkubʼ tibʼajxi Deuteronomio 22:25 a 27, in che yolin tiʼj jun xinaq in kubʼ kuẍe tukʼil jun xuʼj «tuj tnam» ex otoq bʼant tiʼj tuʼn tmojeʼ. Qa otoq bʼant tiʼj tuʼn tmojeʼ jun xuʼj, in nok qʼoʼn ik tzeʼn otoq kubʼ mojeʼ, tuʼntzunju ok qʼoʼn tpaj xinaq te aj pajil. ¿Yajtzun te xuʼj? «Mintiʼ jaw schʼin» toj tnam. Noqwit jaw schʼin, oklo bʼiʼn kyuʼn txqantl ex e kolintlo tiʼj. Pero tuʼnju mintiʼ jaw schʼin, ax ikx te ok qʼoʼn tpaj te aj pajil. Ex tuʼn jlu kykabʼil attoq kyil (Deut. 22:23, 24).

Tibʼajxi jlu, in tzaj tqʼamaʼn Ley juntl nya bʼaʼn, chi: «Qatzun at jun xinaq ma tzʼok noj tiʼj jun txin tuj kojbʼil ex qa otoq bʼant tiʼj tuʼn tmojeʼ txin, ex qa ma tzʼok tqʼoʼn il tiʼj tuʼn tkubʼ tan txin tukʼil, oʼkx te xinaq lu kbʼel bʼyet, aju otoq kubʼ tan tukʼil txin. Atzunte txin miʼn kubʼ bʼyet, porke mintiʼ otoq tbʼincha jun il tuʼn tkyim. Junx taʼ jlu ik tzaʼn jun xinaq nnoʼk tzoqpaj tiʼj juntl ex in kubʼ tbʼyoʼn, porke otoq tzʼok noj tiʼj txin tjunalx taʼtoq tuj kojbʼil, ex maske jaw schʼin, pero mi aʼl jun jaku kolin tiʼj» (Deut. 22:25-27).

Tej tbʼaj jlu, xi kynimen jwes tyol txin. ¿Tiquʼn? Tuʼnju kubʼ kyximen qa «jaw schʼin, pero mi aʼl jun jaku kolin tiʼj». Tuʼntzunju mintiʼ ok qʼoʼn tpaj te aj pajil. Atzunte xinaq xi qʼamaʼn tiʼj qa otoq tzaj tviolarin txin ex ok qʼoʼn tpaj te aj pajil tuʼnju otoq «tzʼok tqʼoʼn il» tiʼj txin «tuʼn tkubʼ tan» tukʼil.

Tuʼntzunju, mas in yolin ley lu tiʼj qa mintiʼ tpaj txin, pero in tzaj tyekʼin qa toj tumel tuʼn t-xi qʼamet qa otoq tzaj tviolarin xinaq txin ex ok qʼoʼn tpaj te aj pajil. Jaku tzʼok qeʼ qkʼuʼj tiʼj qa e ok ten jwes jyol mas tqanil tiʼ jlu ex xi kybʼinchaʼn tiʼj nya bʼaʼn ik tzeʼn qe nabʼil otoq tqʼama Jehová kye kyoj junjuntl ambʼil (Éx. 20:14; Deut. 13:14; 17:4).