Miʼn. Mintiʼ in tzaj tqʼamaʼn Tyol Dios nix qe uʼj in che yolin tiʼj ambʼil ojtxe qa bʼaj jlu.

Kyoj nim Tyol Dios, in tzaj tqʼamaʼn texto lu qa toj tqʼijlalil Pablo, ateʼ junjun xjal jaw aʼ kywiʼ tej kyxel qeju otoq che kyim. Jun techel, in tzaj tqʼamaʼn la Nueva Traducción Viviente texto lu kyjalu: «Qa mlay che jaw anqʼin kyimni, ¿tiquʼntzun in jaw aʼ kywiʼ xjal te kyxel qeju o che kyim?».

Pero qqʼonk qwiʼ tiʼj tiʼ kyqʼama kabʼe xjal tiʼj jlu. Tqʼama teólogo Gregory Lockwood «qa mintiʼ ttxolil kyximbʼetz xjal tiʼjju qa jaw aʼ twiʼ jun xjal te t-xel jun xjal otoq kyim», tuʼnju «mintiʼ in kanet tqanil quʼn kyoj uʼj nix toj Tyol Dios». Chʼixmi axju tqʼama aj xnaqʼtzal Gordon Fee tej tkubʼ ttzʼibʼin jlu: «Mintiʼ jun uʼj te ambʼil ojtxe in yolin tiʼj xnaqʼtzbʼil lu ex mintiʼ in yolin Xjan Uʼj tiʼj qa jaw aʼ kywiʼ xjal ik tzeʼn jlu. Atzun toj NT [moqa Nuevo Testamento], mintiʼ in tzaj qʼamaʼn jun tqanil tiʼj xnaqʼtzbʼil lu. Ex mintiʼ in kanet tqanil quʼn tiʼj qa bʼant jlu kyuʼn okslal toj iglesia tej tikʼ ambʼil kykyimlen apóstol».

Ik tzeʼn in tzaj tqʼamaʼn Tyol Dios, tqʼama Jesús jlu: «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene [...] ex tuʼn kybʼyan kyuʼne; kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye» (Mat. 28:19, 20). Ik tzeʼn in nel qnikʼ tiʼj toj taqikʼ Tyol Dios lu, qa taj jun xjal tuʼn tjaw aʼ twiʼ, il tiʼj tuʼn tel tnikʼ tiʼj Jehová ex tiʼj Jesús ex tuʼn tnimen kye. Ex mlay bʼant jlu tuʼn jun xjal otoq kyim moqa tuʼn juntl xjal te t-xel (Ecl. 9:5, 10; Juan 4:1; 1 Cor. 1:14-16).

Qa ikju, ¿tiʼtzun taj Pablo tuʼn ttzaj tqʼamaʼn toj 1 Corintios 15:29?

Toj kʼloj okslal te Corinto, e ten junjun mintiʼ xi kynimen qa che jawil anqʼin kyimni (1 Cor. 15:12). ¿Tiʼ bʼant tuʼn Pablo tuʼn t-xi tyekʼin axix tok xnaqʼtzbʼil kye? Xi tqʼamaʼn jlu kye: «Nneʼljeʼ wiʼje tkyaqil qʼij tuʼn nkyime». Ok weʼ Pablo twitz nim nya bʼaʼn, noqtzun tuʼnj, ok qeʼ tkʼuʼj tiʼj qa jakutoq jaw anqʼin tuʼn tten toj kyaʼj ik tzeʼn te Jesús (1 Cor. 15:30-32, 42-44).

Iltoq tiʼj tuʼn tel kynikʼ okslal skʼoʼn maj te Corinto tiʼj qa che okel weʼ twitz nim nya bʼaʼn, ex qa iltoq tiʼj tuʼn kykyim tuʼntzun kyjaw anqʼin toj kyaʼj. Aj tbʼyan jun okslal skʼoʼn maj, in nok tmojbʼan tibʼ tukʼil Crist ex at toklen tiʼj tkamik (Rom. 6:3). A t-xilen jlu qa iltoq tiʼj tuʼn kyikʼ twitz nim nya bʼaʼn ik tzeʼn te Jesús ex qa iltoq tiʼj tuʼn kykyim naʼmxtoq kyjaw anqʼin toj kyaʼj.

Tej otoq tzikʼ kabʼe abʼqʼi tjawlen aʼ twi Jesús, tqʼama jlu kye kabʼe t-apóstol: «Kʼikʼex nim kʼixkʼoj kyuʼne ik tzaʼn weye kʼikʼex wuʼne» (Mar. 10:38, 39). Tuʼn jlu, in nel qnikʼ tiʼj qa iltoq tiʼj tuʼn kykyim okslal skʼoʼn maj tuʼntzun tkubʼ kyyekʼin qa tzʼaqli qe twitz Dios. Ex kubʼ ttzʼibʼin Pablo qa che ikʼel twitz nim nya bʼaʼn ik tzeʼn te Jesús tuʼntzun kyjaw nimsaʼn junx tukʼil (Rom. 8:16, 17; 2 Cor. 4:17). Toj juntl yol, ax ikx kye iltoq tiʼj tuʼn kykyim naʼmxtoq kyjaw anqʼin toj kyaʼj.

Tuʼntzunju, tuʼn telxix qnikʼ kyiʼj tyol Pablo, jaku che kubʼ qtraducirin kyjalu: «Qa ikju, ¿tiʼtzun kbʼantel kyuʼn qeju in jaw aʼ kywiʼ tuʼn kykyim? Qa mlay che jaw anqʼin kyimni, ¿tiquʼntzun in jaw aʼ kywiʼ tuʼn kykyim?».