¿Ope jaw tuʼjina qe uʼj Aju Xqʼuqil kʼitzqeku che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Tiʼ qmod kbʼel qyekʼin kyukʼil skʼoʼn maj?

In nok qqʼoʼn toklen qʼuqbʼil kykʼuʼj at tiʼj Jehová, pero mintiʼ in che jaw qnimsaʼn. Mintiʼ in qo jaw labʼin kyiʼj ik tzeʼn in bʼant kyuʼn xjal (Jud. 16). Ex mintiʼ in xi qqanin kye tzeʼn tzaj kykʼamoʼn txokbʼil tuʼn kyxiʼ toj kyaʼj (w20.01, t-xaq 29).

¿Tiquʼn qʼuqli qkʼuʼj tiʼj qa in nok tqʼoʼn Jehová twitz tiʼj teyele junjun qe?

In tzaj tqʼamaʼn Xjan Uʼj qa ok tqʼoʼn Jehová twitz qiʼj, axpe ikx tej naʼmxtoq qul itzʼj ex in tzaj tbʼiʼn qe qnaʼj Dios. Ax ikx ojtzqiʼn tuʼn tiʼ tkuʼx toj qanmi ex tiʼ in kubʼ qximen. Ex jaku tzalaj tanmi quʼn moqa jaku tzaj tbʼis (1 Crón. 28:9; Prov. 27:11). Nya oʼkxju, ax ikx o tzaj tqʼoʼn ambʼil tuʼn qok laqʼeʼ ttxlaj (w20.02, t-xaq 12).

¿Toj alkye ambʼil bʼaʼn tuʼn qyolin ex toj alkye ambʼil mintiʼ tuʼn qyolin?

In qo tzalaj aj qyolin tiʼj Jehová. Ax ikx, il tiʼj tuʼn qyolin aj tok qqʼoʼn qwitz tiʼj qa at jun erman chʼix tel tpan tibʼ tiʼj axix tok. Qa ma bʼaj jlu, in che yolin ansyan tukʼil erman qa il tiʼj. Noqtzun tuʼnj, mintiʼ tuʼn qyolin tiʼj aqʼuntl in bʼant quʼn kyoj tnam jatumel mintiʼ qʼoʼn ambʼil qe tuʼn qajbʼen te Jehová ex mintiʼ tuʼn qyolin kyiʼj junjun tiʼchaq mintiʼ tuʼn tok kybʼiʼn kykyaqil erman (w20.03, t-xaq 20 ex 21).

¿Tiquʼn junxitl qe ẍplon in tzaj qʼamaʼn toj capítulo 2 toj uʼj te Joel kyukʼil qeju in che tzaj qʼamaʼn toj capítulo 9 toj uʼj te Apocalipsis?

In tzaj tqʼamaʼn Joel 2:20 a 29 qa in chex tiʼn Jehová qe ẍplon najchaq ex tzaj ttziyen qa ktzajeltoq tqʼoʼn t-xel tkyaqilju otoq bʼaj kywaʼn. Tibʼajxi jlu, ktzajel tqʼoʼn xewbʼaj xjan. Japun twi jlu tej kyok tzoqpaj tsoldad tnam Babilonia kyiʼj aj Israel. Atzun teju in tzaj tqʼamaʼn Apocalipsis 9:1 a 11, atz in yolin kyiʼj okslal skʼoʼn maj ateʼ toj ambʼil jaʼlo, tuʼnju in ten kyipumal tuʼn kyyolin tiʼj kastiw tzul tiʼn Dios tiʼj tkyaqilju tokx tjaqʼ tkawbʼil Satanás ex kyiʼj qeju in che onin tiʼj (w20.04, t-xaq 3 a 6).

¿Alkye in nok te aj kawil te jawni toj ambʼil jaʼlo?

A Rusia ex qeju in che onin tiʼj. ¿Tiquʼn? Tuʼnju o tzʼel kyiʼn ambʼil kye testigo de Jehová tuʼn kypakbʼan ex o che el tikʼun. Ax ikx, in bʼaj kyikʼen kywitz tukʼil aj kawil te kubʼni (w20.05, t-xaq 13).

¿Oʼkxpe qe bʼeljaj mod in tqʼoʼn xewbʼaj xjan ik tzeʼn qeju tkuʼx toj Gálatas 5:22 ex 23?

Miʼn. Tuʼnju ax ikx in nonin xewbʼaj xjan qiʼj tuʼn kyten junjuntl qmod ik tzeʼn tuʼn t-xi qbʼinchaʼn qe tiʼchaq toj tumelxix (Efes. 5:8, 9) (w20.06, t-xaq 17).

¿Tiʼ jaku bʼaj qa ma jax qqʼoʼn video, qyol, qilbʼilal kyoj redes sociales?

Aj kyjax qqʼoʼn junjun tiʼchaq toj redes sociales, tuʼn jlu jaku kubʼ kyximen txqantl qa in jaw qnimsan qibʼ (w20.07, t-xaq 6 ex 7).

¿Tiʼ xnaqʼtzbʼil jaku tzʼel qiʼn kyiʼj qe xjal in che tzyuʼn pescad?

Aqeju tbʼanel tzyul pescad, in che aqʼunan toj jun lugar ex toj jun or jatumel jaku che kanet pescad kyuʼn. Ax ikx, ojtzqiʼn kyuʼn alkyeqe tiʼchaq che ajbʼel kyuʼn ex mintiʼ in che xobʼ. Ax jlu jaku bʼant quʼn toj pakbʼabʼil (w20.09, t-xaq 5).

¿Tzeʼn jaku qo onin kyiʼj qeju in che xnaqʼtzan tiʼj Xjan Uʼj tuʼn tchʼiy kykʼujlabʼil tiʼj Jehová?

Jaku txi qqʼamaʼn kye tuʼn kyuʼjin tiʼj Tyol Dios tkyaqil qʼij, tuʼn kyximen tiʼjju in jaw kyuʼjin ex tuʼn t-xi qxnaqʼtzaʼn kye tuʼn kynaʼn Dios (w20.11, t-xaq 4).

¿Alqiʼj yolin Pablo tej tqʼama «ok che jawil anqʼin kykyaqil qeju o che okslan tiʼj Crist»? (1 Cor. 15:22).

Mintiʼ tqʼama Pablo qa che jawil anqʼin kykyaqil xjal. Tej tqʼama «kykyaqil», atz yolin kyiʼj qeju skʼoʼn maj, aqeju o che bʼaj saqsaʼn tuʼntzun tten mujbʼabʼil kyxol tukʼil Jesús (1 Cor. 1:2; 15:18) (w20.12, t-xaq 5 ex 6).

¿Tiʼ kbʼantel kyuʼn skʼoʼn maj aj kybʼaj chʼixpet ik tzeʼn aj tkubʼ kymultzʼuʼn kywitz aj «tqʼajt mankbʼil chun»?

Che onil tiʼj Jesús tuʼn kyok xqʼuqit kykyaqil tnam tuʼn var kʼuxbʼil (Apoc. 2:26, 27) (w20.12, t-xaq 12 ex 13).