Xi tqʼamaʼn Jehová kye aj Israel tuʼn kyok te jun tnam xjan. Tuʼn tonin kyiʼj tuʼn kyok te xjan, xi tqʼamaʼn kawbʼil lu kye: «Miʼn che siʼmine yol kyiʼj kyukʼile kyxol kyxjalile. Miʼn jaw kysiʼmine yol tiʼj kyukʼile tuʼn tkubʼ bʼyoʼn. Aqine Kymane» (Lev. 19:2, 16).

Tej tkubʼ tzʼibʼin Tyol Dios tnejel maj toj yol hebreo, toj tumel e kubʼ tzʼibʼin qe yol toj versículo lu. Pero, ¿tiʼtzun kyxilen? In tzaj tchikʼbʼaʼn jun uʼj kye aj Judiy jlu tiʼj uʼj te Levítico: «Kwest tuʼn telxix qnikʼ tiʼj versículo lu tuʼnju kwest tuʼn tkyaj bʼant tiʼj tiʼxix kyxilen yol lu, tuʼnju kubʼ tzʼibʼin jlu toj yol hebreo: ‹mya waʼl ttxlaj moqa nya nqayin ttxlaj›».

Ateʼ junjun xjal in kubʼ kyximen qa at kyoklen yol lu tukʼil versículo tok tiʼjxi, jatumel in tzaj qʼamaʼn jlu: «Miʼn txi kybʼinchaʼne tiʼj xtis mya tuj tumel: Qa at til xjal, mya noq tuʼnju mebʼa xjal miʼn kubʼ t-sentens kyuʼne, ax ikx mya noq tuʼnju maʼ toklen xjal miʼn kubʼ t-sentens kyuʼne qa at til, noq oʼkx tuj tumel tuʼn kykawine kyibʼaj kykyaqil» (Lev. 19:15). Qa ikju, jakulo txi qqʼamaʼn qa a kyxilen yol tkuʼx toj versículo 16 tuʼn miʼn tjaw kysiʼmen aj Israel jun yol tiʼj jun xjal aj kyxiʼ toj juicio, toj jun kʼaẍjel moqa tiʼj jun toj tja. Ax ikx, mintiʼ tuʼn t-xi kybʼinchaʼn jun tiʼ nya toj tumel noq tuʼn tonin kyiʼj. Ojtzqiʼn quʼn qa mintiʼ tuʼn tbʼant jlu quʼn, pero at juntl tumel jaku qo ximen tiʼj tuʼn tel qnikʼ tiʼj versículo 16.

Qqʼonk qwiʼ kyiʼj qe tnejel yol tkuʼx toj versículo lu. Xi tqʼamaʼn Jehová kye aj Israel tuʼn miʼn kyyolin tiʼj nya ax tok yol. Bʼaʼn tuʼn ttzaj qnaʼn qa junxitl aju tuʼn qyolin tiʼj nya ax tok yol twitzju tuʼn qok tten qʼamalte kye txqantl jun tiʼ otoq tzʼok qbʼiʼn (Prov. 10:19; Ecl. 10:12-14; 1 Tim. 5:11-15; Sant. 3:6). Aj tok ten jun xjal qʼamalte nya ax tok yol tiʼj jun xjal, chʼixme tkyaqil maj in bʼant jlu tuʼn noq tuʼn ttzaj jun nya bʼaʼn. Ex aj tbʼant jlu tuʼn, ax ikx jaku tzaj tiʼn nya bʼaʼn tiʼj tanqʼibʼil xjal. Atzun jlu bʼaj tiʼj Nabot. Xi kyqʼamaʼn junjun xjal nya ax tok yol tiʼj Nabot ex tuʼn jlu ok xoʼn abʼj tiʼj maske mintiʼ til (1 Rey. 21:8-13). Tuʼntzunju, qa ma txi qqʼamaʼn jun nya ax tok yol tiʼj jun xjal, jaku tzʼok qbʼinchaʼn nya bʼaʼn tiʼj tanqʼibʼil ik tzeʼn in tzaj tqʼamaʼn tkabʼin plaj texto te Levítico 19:16.

Ax ikx, jaku tzʼok ten jun xjal qʼamalte jun nya ax tok yol tiʼj juntl tuʼnju at tqʼoj tiʼj. Toj 1 Juan 3:15 in tzaj qʼamaʼn jlu: «Aju xjal nneʼl tikʼun terman, bʼyol xjal te; ex bʼaʼn kyuʼne mi jun bʼyol xjal ktel tchwinqlal te jumajx». Tej otoq tzaj tqʼoʼn Jehová kawbʼil tkuʼx toj Levítico 19:16, tqʼama jlu: «Miʼn tzʼel kyikʼune jun kyermaniye tuj kyanmiye» (Lev. 19:17).

Tuʼntzunju, in tzaj tqʼoʼn Levítico 19:16 jun kawbʼil nim toklen kye okslal. Mintiʼ tuʼn tten qximbʼetz nya toj tumel kyiʼj txqantl nix tuʼn qyolin nya ax tok yol kyiʼj. Qa ma qo ok ten yolil nya ax tok yol kyiʼj txqantl noq tuʼnju nya bʼaʼn in nela kymod toj qwitz moqa tuʼnju in txʼaʼl tiʼj qkʼuʼj kyiʼj, tuʼn jlu in kubʼ qyekʼin qa in che el qikʼun ex qa at qqʼoj kyiʼj. Pero mintiʼ tuʼn tel tikʼun jun okslal jun xjal (Mat. 12:36, 37).