O TZAJ tqʼoʼn Jehová nim oyaj qe ex in xi qqʼoʼn chjonte te tuʼnju in tzaj tqʼoʼn ambʼil qe tuʼn tkubʼ qximen tzeʼn tuʼn kyajbʼen quʼn. Kyxol qe oyaj lu, jaku kanet vino ex qʼeʼn moqa traw. In tzaj tqʼamaʼn Biblia jlu: «Aju pan, atzun tajbʼen tuʼn qwaʼn tiʼj; ex aju taʼl twitz uva, atzun tajbʼen tuʼn qtzalaj» (Ecl. 10:19; Sal. 104:15). Noqtzun tuʼnj, olo tzʼok qqʼoʼn qwitz tiʼj qa ateʼ junjun xjal in xi kykʼaʼn nim qʼeʼn. Ex junxitl kyximbʼetz xjal twitz tkyaqil Txʼotxʼ tiʼj jniʼ qʼeʼn tuʼn t-xi kykʼaʼn. Yajtzun kye okslal, ¿tiʼ kyximbʼetz ktel tiʼj qʼeʼn?

Aj tkubʼ qximen jniʼ qʼeʼn kxel qkʼaʼn, mintiʼ tuʼn qok lepeʼ tiʼj kyximbʼetz xjal jatumel in qo anqʼin moqa jatumel o qo jaw chʼiy. Sino nim toklen tuʼn tel qnikʼ tiʼj t-ximbʼetz Dios. Qa ma bʼant jlu quʼn, jaku qo tzalaj.

Olo tzʼok qqʼoʼn qwitz tiʼj qa ateʼ nim xjal in xi kykʼaʼn nim qʼeʼn ex kukx in bʼant jlu kyuʼn. Ateʼ junjun in xi kykʼaʼn qʼeʼn tuʼn kytzalaj. Atzun junjuntl, in xi kykʼaʼn tuʼn ya miʼn kyximen kyiʼj kyproblem. Ex kyoj junjun lugar, in kubʼ kyximen xjal qa at tipumal juntl qa in xi tkʼaʼn nim qʼeʼn.

Atzun kye okslal in che ok lepeʼ kyiʼj nabʼil tkuʼx toj Tyol Dios. In tzaj tqʼamaʼn Biblia qa jaku che tzaj nya bʼaʼn qiʼj qa ma txi qkʼaʼn nim qʼeʼn. Jun techel, in yolin Proverbios 23:29 a 35 tiʼj jun xjal in xi tkʼaʼn nim qʼeʼn ex kyiʼj nya bʼaʼn in che tzaj tiʼj tuʼn qʼeʼn. a Qo yolin tiʼjju bʼaj tiʼj Daniel, jun ermano in najbʼen te ansyan atz Europa, tqʼama tiʼ bʼaj tiʼj tej naʼmxtoq tok te testigo de Jehová: «Tuʼnju xi nkʼaʼne nim qʼeʼn kubʼ nbʼinchaʼne junjun tiʼchaq nya toj tumel. Tuʼn jlu, tzaj nya bʼaʼn wiʼje ex at maj in tzaj nqʼoje aj nximane tiʼj wanqʼibʼile».

Tuʼn tjaw qskʼoʼn aju mas tbʼanel ex tuʼn miʼn kytzaj nya bʼaʼn qiʼj noq tuʼnju in xi qkʼaʼn nim qʼeʼn, nim toklen tuʼn tel qnikʼ tiʼj alkye t-ximbʼetz Dios at tiʼj jlu.

Qo xnaqʼtzan tiʼj tiʼ in tzaj qʼamaʼn Biblia tiʼj qʼeʼn ex tiquʼn in xi kykʼaʼn xjal.

Mintiʼ in tzaj tqʼamaʼn Tyol Dios qa nya toj tumel tuʼn t-xi qkʼaʼn chʼin qʼeʼn. Sino in tzaj tyekʼin qa jaku qo tzalaj aj t-xi qkʼaʼn chʼin qʼeʼn tuʼnju in tzaj tqʼamaʼn Eclesiastés 9:7 jlu: «Waʼnxa twaya tukʼil tzalajbʼil, tzalajxa tiʼj tkʼaʼya taʼl twitz uva». In tzaj tqʼamaʼn Biblia qa xi tkʼaʼn Jesús ex junjuntl tmajen Jehová vino kyoj junjun ambʼil (Mat. 26:​27-29; Luc. 7:34; 1 Tim. 5:23).

Noqtzun tuʼnj, junxitl tuʼn t-xi qkʼaʼn chʼin qʼeʼn twitzju tuʼn ttzaj sutin toj qwitz tuʼn. In tzaj tqʼamaʼn Biblia jlu: «Miʼn che kʼane qʼeʼn» (Efes. 5:18). Ax ikx in tzaj tqʼamaʼn jlu: «Qe kʼal qʼeʼn, [ . . . ] mintiʼ kyoklen tiʼj tkawbʼil Dios» (1 Cor. 6:10). Ik tzeʼn ma tzʼel qnikʼ tiʼj, nya bʼaʼn in nela toj twitz Jehová tuʼn t-xi kykʼaʼn xjal nim qʼeʼn ex in tzaj sutin toj kywitz tuʼn. Tuʼntzunju, mintiʼ tuʼn qok lepeʼ tiʼj kyximbʼetz xjal sino mas bʼaʼn tuʼn tel qnikʼ tiʼj alkye t-ximbʼetz Dios.

Ateʼ junjun xjal in tzaj kyqʼamaʼn qa jaku txi kykʼaʼn nim qʼeʼn ex mintiʼ in tzaj sutin toj kywitz tuʼn. Pero jaku tzaj nim nya bʼaʼn qiʼj qa ma ten qximbʼetz ik tzeʼn jlu. In tzaj tqʼamaʼn Biblia qa jaku kubʼ tbʼinchaʼn jun xjal il ex jaku tzaj nya bʼaʼn tiʼj tamiwbʼil tukʼil Jehová qa ma txi tkʼaʼn nim qʼeʼn. Jaku bʼaj jlu tiʼj jun xinaq moqa tiʼj jun xuʼj (Tito 2:3;  Prov. 20:1). Ax ikx, tzaj tqʼamaʼn Jesús qa ateʼ junjun mlay che okx toj akʼaj twitz Txʼotxʼ noq tuʼnju in che kʼaʼn nim qʼeʼn (Luc. 21:​34-36). Qa ikju, ¿tiʼ jaku tzʼonin kyiʼj tmajen Jehová tuʼn miʼn kyxiʼ toj il tuʼn qʼeʼn?

Aj tkubʼ qximen jniʼ qʼeʼn kxel qkʼaʼn, jaku tzaj nya bʼaʼn qiʼj qa ma qo ok lepeʼ tiʼj kykostumbr xjal jatumel in qo anqʼin. Tuʼntzunju, in nok tilil kyuʼn tmajen Jehová tuʼn ttzalaj kyuʼn aj kyximen kyiʼj tiʼchaq at toklen tukʼil kywa ex kykʼaʼ. In tzaj tqʼoʼn Biblia consej lu qe: «Kyjaʼtzun, qa ma che chyoʼne, ex qa ma che kʼane, ex qa ma kybʼinchaye juntl, kybʼinchame tkyaqil tuʼntzun tjaw nimsaʼn tbʼi Dios» (1 Cor. 10:31). Qo yolin kyiʼj junjun xjel ex junjun texto jaku qo ximen kyiʼj.

¿In xipe nkʼaʼne qʼeʼn noq tuʼn miʼn kyxmayin txqantl wiʼje? In tzaj tqʼamaʼn Éxodo 23:2 jlu: «Miʼn che ok lpeʼye tiʼj tnimal xjal». Kukx at tajbʼen consej lu kye okslal toj ambʼil jaʼlo. Toj texto lu, xi tqʼamaʼn Jehová kye xjal te Israel tuʼn miʼn tel kykanoʼn kyiʼj xjal in che bʼinchan nya bʼaʼn. Qa ma qo ok lepeʼ tiʼj kyximbʼetz txqantl ex tiʼj kybʼinchbʼen, jaku qo ikʼ kyibʼaj tkawbʼil Jehová ex jaku tzʼel qpan qibʼ tiʼj (Rom. 12:2).

¿In xipe nkʼaʼne qʼeʼn noq tuʼn tkubʼ nyekʼine qa at wipumale? Kyoj junjun lugar, mintiʼ in ten kyximbʼetz xjal nya toj tumel kyiʼj qeju in xi kykʼan nim qʼeʼn ex qa kukx in bʼant jlu kyuʼn (1 Ped. 4:3). Pero qo ximen tiʼj consej in tzaj tqʼoʼn 1 Corintios 16:13: «Che xqʼuqine ex che weʼxixe tuj okslabʼl; che okxe xinaq ex kyqʼoʼnk kyipune». ¿Jakupe ten mas tipumal jun xjal noq tuʼnju in xi tkʼaʼn nim qʼeʼn? Miʼn, sino ya mintiʼ in ximen toj tumel ex mlay jaw tskʼoʼn aju mas bʼaʼn. Tuʼntzunju, mintiʼ in kubʼ tyekʼin jun xjal qa at tipumal noq tuʼnju in xi tkʼaʼn nim qʼeʼn, sino in kubʼ tyekʼin qa mintiʼ tnabʼil. In tzaj tqʼamaʼn Isaías 28:7 qa in naj kynabʼl xjal tuʼn tpaj qʼeʼn ex qa jaku che jaw tolj.

Tuʼn tten qipumal tuʼn t-xi qbʼinchaʼn aju bʼaʼn, nim toklen tuʼn tok qeʼ qkʼuʼj tiʼj Jehová ex tuʼn tok tilil quʼn tuʼn qxqʼuqin tiʼj qokslabʼil (Sal. 18:32). In bʼant jlu quʼn aj tok qxqʼuqin qibʼ kyiʼj tiʼchaq jaku tzaj kyiʼn nya bʼaʼn  tiʼj qamiwbʼil tukʼil Jehová. Atzun jlu bʼant tuʼn Jesús tej tten tzalu twitz txʼotxʼ ex kubʼ kyximen nim xjal qa kubʼ tyekʼin tipumal.

¿In xipe nkʼaʼne qʼeʼn noq tuʼn miʼn nximane kyiʼj problem in chin ok weʼye twitz? Xi tqʼamaʼn jun salmista qe yol lu te Jehová: «Ok in tzaj nximbʼetze ex in bʼaj nkʼuʼje, in tzaj tqʼuqbʼaʼna nkʼuʼje ex in tzaj tqʼoʼna tzalajbʼil» (Sal. 94:19). Qa in tzaj bʼaj tkʼuʼja, mas bʼaʼn tuʼn tjyona onbʼil tukʼil Jehová twitzju tuʼn t-xi tkʼaʼna qʼeʼn. Jaku bʼant jlu tuʼna aj tnaʼna Dios. Ateʼ junjun o tzʼonin kyiʼj tej t-xi kyqanin onbʼil kye erman o che chʼiy toj kyokslabʼil. Mas kwest jaku tzʼela toj twitz jun xjal tuʼn tex twitz jun nya bʼaʼn ex tuʼn tjaw tskʼoʼn aju mas tbʼanel qa in xi tkʼaʼn qʼeʼn aj tok weʼ kywitz ambʼil kwest (Os. 4:11). In tzaj tqʼamaʼn Daniel jlu, aju ma qo yolin tiʼj: «Tuʼnju tzaj bʼaj nkʼuʼje ex kubʼ nnaʼne qa at npaje kyiʼj junjuntl tiʼchaq, xi nkʼaʼne qʼeʼn tuʼn tikʼ tnaʼl wuʼne. Pero tuʼn jlu tzaj mas nya bʼaʼn wiʼje ex ya mintiʼ e ten wamiwe». ¿Tiʼ onin tiʼj Daniel? In tzaj tqʼamaʼntl jlu: «El nnikʼe tiʼj qa il tiʼj tuʼn tok qeʼ nkʼuʼje tiʼj Jehová ex nya tiʼj qʼeʼn. Ex tuʼn tonbʼil Jehová kubʼ kyiʼj nya bʼaʼn wuʼne». Miʼn tzikʼ tnaʼl quʼn qa kukx kʼonil Jehová qiʼj maske in kubʼ qximen qa mlay kubʼ tiʼj nya bʼaʼn quʼn (Filip. 4:​6, 7; 1 Ped. 5:7).

Qa in xi tkʼaʼna qʼeʼn junjun maj, bʼaʼn tuʼn t-ximana kyiʼj xjel lu: «¿Ope yolin jun toj njaye wukʼile moqa jun wamiwe tiʼj jniʼ qʼeʼn in xi nkʼaʼne?». Qa ikju, bʼalo in tzaj tyekʼin jlu qa o naqʼeta tuʼn tkʼana tiʼj qʼeʼn ex mintiʼ in nok tqʼoʼn twitza tiʼj. «¿Maspe nim qʼeʼn in xi nkʼaʼne jaʼlo twitzju ojtxe?». Qa ikju, bʼalo naʼmx tnaqʼeta tiʼj qʼeʼn pero nim toklen tuʼn tok t-xqʼuqin tibʼa tiʼj. «¿Kwestpe in nela toj nwitze qa mintiʼ ma txi nkʼaʼne qʼeʼn kyoj junjun qʼij?». Qa ikju, bʼalo in tzaj tyekʼin jlu qa o naqʼeta tiʼj qʼeʼn moqa o tzʼok te jun vicio. Ex bʼalo il tiʼj tuʼn ttzaj qʼoʼn onbʼil teya tuʼn tkyaj ttzaqpiʼna.

Ateʼ junjun okslal o kubʼ kyximen tuʼn miʼn txi kykʼaʼn qʼeʼn tuʼntzun miʼn ttzaj nya bʼaʼn kyiʼj. Ex ateʼ junjuntl mintiʼ in xi kykʼaʼn tuʼnju  nya kygan tsabor qʼeʼn. Qatzun a lu in kubʼ t-ximen jun erman ojtzqiʼn quʼn, tbʼanel tuʼn tok qqʼoʼn toklen aju in kubʼ t-ximen ex tuʼn miʼn qyolin nya bʼaʼn tiʼj.

Atzun junjuntl, o kubʼ kyximen tuʼn t-xi kybʼinchaʼn junjun tiʼ. Bʼalo o kubʼ kyximen jniʼ qʼeʼn kxel kykʼaʼn moqa jteʼ maj kxel kykʼaʼn, ik tzeʼn jun maj toj seman moqa junjun maj aj kywaʼn. Ax ikx, jaku kubʼ kyximen alkye qʼeʼn kxel kykʼaʼn ex alkye mlay t-xi kykʼaʼn. Jun techel, ateʼ junjun in xi kykʼaʼn chʼin vino moqa cerveza, pero mintiʼ in xi kykʼaʼn junjuntl qʼeʼn at mas alcohol toj maske in che bʼaj smoʼn tukʼil jugo moqa tukʼil junjuntl tiʼ. Qa klarxix taʼ toj t-ximbʼetz jun xjal jniʼ qʼeʼn kxel tkʼaʼn, mas nya kwest tuʼn t-xi tbʼinchaʼn. Qa a jlu o kubʼ t-ximen jun erman o chʼiy toj tokslabʼl, mintiʼ tuʼn ttzaj tchʼixwi tiʼj.

Ax ikx, bʼaʼn tuʼn qximen tiʼjju in kubʼ kynaʼn txqantl. In tzaj tqʼamaʼn Romanos 14:21 jlu: «Bʼaʼn tuʼn miʼn t-xi tchyoʼna chibʼj ex tuʼn miʼn t-xi tkʼaʼna vin ex mi jun tuʼn tbʼinchanteya aju jaku jaw tolj termaniya tuʼn». ¿Tzeʼn jaku txi qbʼiʼn consej lu? Jaku bʼant quʼn aj qximen kyiʼj txqantl ex aj tkubʼ qyekʼin qkʼujlabʼil kyiʼj. Qa in nok tkeʼyina qa nya bʼaʼn in nela te jun erman tuʼn t-xi tkʼaʼna qʼeʼn, kʼonil kʼujlabʼil tiʼja tuʼn miʼn t-xi tkʼaʼna toj ambʼil lu. Iktzun tten, kbʼel qyekʼin qa in nok qqʼoʼn toklen aju in kubʼ kyximen junjuntl erman ex nya oʼkx in qo ximen qiʼjx (1 Cor. 10:24).

Ax ikx, bʼaʼn tuʼn t-xi qnimen qe ley o tzaj tqʼoʼn Gobierno tiʼj qʼeʼn. Jun techel, bʼalo mintiʼ in xi qʼoʼn ambʼil kye menor de edad tuʼn t-xi kykʼaʼn qʼeʼn moqa kye xjal aj kymanejarin tiʼj kar moqa junjun máquina (Rom. 13:​1-5).

In tzaj tqʼoʼn Jehová ambʼil qe tuʼn tkubʼ qximen tzeʼn tuʼn qtzalaj kyiʼj qe oyaj o tzaj tqʼoʼn qe. Tuʼntzunju, qkyaqilx jaku kubʼ qximen tiʼ kxel qwaʼn ex tiʼ kxel qkʼaʼn. Tzʼajbʼenx toj tumel quʼn aju tzaqpibʼil o tzaj tqʼoʼn Jehová qe ex qyekʼinx te qa qaj tuʼn ttzalaj qiʼj tukʼilju in kubʼ qbʼinchaʼn.