1. ¿Tiʼ jaku kubʼ qxjelin aj qximen tiʼj qʼuqbʼil tkʼuʼj Abrahán?

 NIM xjal o tzʼok kybʼiʼn tqanil tiʼj Abrahán, pero chʼixme kykyaqil mintiʼxix ojtzqiʼn kyuʼn, atzun qe ojtzqiʼnxix quʼn. Jun techel, in yolin Biblia tiʼj qa in nok te «mambʼaj kye kykyaqil okslal [ . . . ] noq tuʼn kyokslabʼl» (Rom. 4:11). Noqtzun tuʼnj, jakulo kubʼ qxjelin jlu: «¿Jakupe chin ok lepeʼye tiʼj techel kyaj tqʼoʼn Abrahán ex jakupe tten qʼuqbʼil nkʼuʼje ik tzeʼn te?». Jaku.

2. ¿Tiquʼn nim toklen tuʼn qxnaqʼtzan tiʼj techel kyaj tqʼoʼn Abrahán? (Santiago 2:​22, 23).

² Jun tiʼ jaku tzʼonin qiʼj tuʼn tten qʼuqbʼil qkʼuʼj ik tzeʼn te Abrahán, aju qa ma qo ximen tiʼj techel kyaj tqʼoʼn. Kukx xi tnimen tkyaqilju tzaj tqʼamaʼn Jehová te. Xiʼ anqʼil najchaq, ten kyoj ja xbʼalun toj nim abʼqʼi ex mintiʼ kubʼ t-xkʼayin tuʼn t-xi tqʼoʼn Isaac te chojbʼil. Tuʼn tbʼinchbʼen Abrahán kubʼ tyekʼin qa attoq nimxix qʼuqbʼil tkʼuʼj. Tuʼn qʼuqbʼil tkʼuʼj ex tuʼn tbʼinchbʼen, tzalaj Jehová tiʼj ex ok te tamiw (kjawil uʼjit Santiago 2:​22, 23). Ax ikx taj Jehová tuʼn ttzalaj qiʼj ex tiʼja ex taj tuʼn qok te tamiw. Tuʼntzunju, onin tiʼj Pablo ex Santiago tuʼn tkubʼ kytzʼibʼin techel kyaj tqʼoʼn Abrahán. Qo xnaqʼtzal jaʼlo tiʼj jun tiʼ nim toklen in tzaj tqʼamaʼn Romanos capítulo 4 ex Santiago capítulo 2 tiʼj Abrahán.

3. ¿Alkye texto yolin Pablo ex Santiago tiʼj?

³ Yolin Pablo ex Santiago tiʼj texto te Génesis 15:​6, jatumel in tzaj tqʼamaʼn jlu: «Xi tokslaʼn Abram tyol Qman,  ex kyjaʼtzun ok qʼoʼn te tzʼaqlxix tuʼn». ¿Tiʼ t-xilen aj tok tqʼoʼn Jehová jun xjal te tzʼaqli? A t-xilen qa in tzalaj tiʼj, qa tzʼaqli toj twitz ex qa mintiʼ til. In qo tzalaj tuʼnju jaku tzʼok tqʼoʼn Jehová jun xjal nya tzʼaqli ex aj il te tzʼaqli ex mintiʼ til. Axlo ikx teya taja tuʼn ttzalaj Jehová tiʼja ex jaku bʼant tuʼna. Qo yolin tiʼj tiquʼn ok tqʼoʼn Jehová Abrahán te tzʼaqli ex tiʼ jaku bʼant quʼn tuʼn qok tqʼoʼn Jehová te tzʼaqli.

4. ¿Tiquʼn mintiʼ in che ok xjal te tzʼaqli?

⁴ Toj carta xi ttzʼibʼin Pablo kye okslal te Roma, tqʼama qa kykyaqil xjal aj il qe (Rom. 3:23). ¿Alkyetzun tten in tzalaj Dios qiʼj ex in qo ok tqʼoʼn te tzʼaqli? Ajbʼen techel tiʼj Abrahán tuʼn Pablo tuʼn tonin kyiʼj kykyaqil axix tok okslal tuʼn t-xi qʼet tzaqʼwebʼil tiʼj xjel lu.

5. ¿Tiquʼn ok tqʼoʼn Jehová Abrahán te tzʼaqli? (Romanos 4:​2, 4).

⁵ Nya tuʼnju xi tbʼiʼn Abrahán Tley Moisés ok qʼoʼn te tzʼaqli tuʼn Jehová (Rom. 4:13). ¿Tiquʼn? Tuʼnju tej tqʼama Jehová qa tzʼaqli Abrahán, naʼmxtoq ttzaj qʼoʼn Ley te Moisés. Tzmaxi ten Ley lu tej otoqxi tzikʼ 400 abʼqʼi. Tuʼntzunju, jaku txi qqʼamaʼn qa kubʼ tyekʼin Jehová tbʼanel tmod tukʼil Abrahán ex ok tqʼoʼn te tzʼaqli tuʼnju ten qʼuqbʼil tkʼuʼj (kjawil uʼjit Romanos 4:​2-4).

6. ¿Tiquʼn jaku tzʼok jun xjal te tzʼaqli toj twitz Jehová?

⁶ Tibʼajxi jlu, tzaj tchikʼbʼaʼn Pablo qa in nok qeʼxix tkʼuʼj jun xjal tiʼj Jehová, «nnoʼk qʼoʼn te tzʼaqlxix [ . . . ] noq tuʼn tokslabʼl» (Rom. 4:5). Ex tqʼamatl: «Ik tzaʼn in tmaʼn David, at tzalajbʼil te xjal aju nnoʼk qʼoʼn te tzʼaqlxix tuʼn Dios mya tuʼn taqʼunbʼen. Porke chi David: At tzalajbʼil kye xjal in kubʼ najsaʼn kyil, ex in kubʼ maqsiʼn kyil. At tzalajbʼil te xjal aju mlay tzaj naʼntl til tuʼn Qman» (Rom. 4:​6-8; Sal. 32:​1, 2). In kubʼ tnajsaʼn moqa in kubʼ tmaqsiʼn Jehová kyil xjal in nok qeʼ kykʼuʼj tiʼj ex mintiʼ in tzaj tnaʼn kyil. Toj twitz Jehová, aqeju xjal lu tzʼaqliqe ex mintiʼ kyil noq tuʼn qʼuqbʼil kykʼuʼj.

7. ¿Tiquʼn tqʼama Dios qa tzʼaqli junjun tmajen toj ambʼil ojtxe?

⁷ Tqʼama Jehová qa ok Abrahán, David ex junjuntl tmajen te tzʼaqli, pero nya a t-xilen jlu qa nya aj il qe. Tuʼnju ten qʼuqbʼil kykʼuʼj tqʼama Jehová qa mintiʼ kyil, mas tuʼnju junxitl kybʼinchbʼen kywitz qe xjal mintiʼ e kʼulin twitz (Efes. 2:12). Toj carta xi ttzʼibʼin Pablo kye okslal te Roma, tqʼama qa nim toklen tuʼn tten qʼuqbʼil qkʼuʼj tuʼn qok te tamiw Jehová. Atzun jlu bʼaj tiʼj Abrahán ex David, e ok te tamiw Dios tuʼnju ten qʼuqbʼil kykʼuʼj. Ax ikx qe, il tiʼj tuʼn tten qʼuqbʼil qkʼuʼj tuʼntzun qok te tamiw.

8, 9. ¿Alkye kyximbʼetz xjal nya toj tumel at tiʼjju tqʼama Pablo ex Santiago ex tiquʼn?

⁸ Toj nimku ambʼil kukx o che yolin nejenel kye okslabʼil tiʼj toklen qʼuqbʼil qkʼuʼj at tukʼil qbʼinchbʼen. Ateʼ junjun in kyqʼamaʼn qa jaku qo klet qa ma tzʼok qeʼ qkʼuʼj tiʼj Jesucristo. Bʼalo o tzʼok qbʼiʼn qe yol lu: «Tzʼokslana tiʼj Jesús ex kkletela». Atzlo in che yolin nejenel kye okslabʼil tiʼj texto te Romanos 4:​6, jatumel yolin Pablo tiʼj «xjal aju nnoʼk qʼoʼn te tzʼaqlxix tuʼn Dios mya tuʼn taqʼunbʼen». Atzun junjuntl in kyqʼamaʼn qa jaku qo  klet qa ma qoʼx naʼl Dios toj junjuntl lugar ex qa ma ten tbʼanel qbʼinchbʼen. Bʼalo atz in che yolin tiʼjju in tqʼamaʼn Santiago 2:24: «Aju xjal nnoʼk qʼoʼn te tzʼaqlxix tuʼn Dios tuʼn taqʼunbʼen, ex mya noq oʼkx tuʼn tokslabʼl».

⁹ Tuʼnju junxitl kyximbʼetz xjal tiʼj lu, ateʼ junjun xnaqʼtzal tiʼj Biblia in kyqʼamaʼn qa junxitl t-ximbʼetz Pablo ex Santiago ten tiʼj qʼuqbʼil qkʼuʼj ex tiʼj qbʼinchbʼen. In kyqʼamaʼn xjal qa kubʼ t-ximen Pablo qa oʼkx jaku tzalaj Dios qiʼj qa ma ten qʼuqbʼil qkʼuʼj, atzunte Santiago tqʼama qa nim toklen tuʼn tten tbʼanel qbʼinchbʼen. Tqʼama jun teólogo jlu: «Mintiʼ el tnikʼ Santiago tiʼj tiquʼn ok tilil tuʼn Pablo tuʼn ttzaj tqʼamaʼn qa in nok jun xjal te tzʼaqli tuʼn qʼuqbʼil tkʼuʼj ex nya tuʼn tbʼinchbʼen». Pero kykabʼil kubʼ kytzʼibʼin tqanil tqʼama Jehová kye (2 Tim. 3:16). Noqtzun tuʼnj, jaku tzʼel qnikʼ tiʼj tiʼ t-xilen yol tqʼama Pablo ex Santiago. Qo xnaqʼtzan tiʼj contexto tiʼjju kyqʼama.

10. ¿Alkye bʼinchbʼen yolin Pablo tiʼj? (Romanos 3:​21, 28; ax ikx qʼonka twitza kyiʼj dibujo).

¹⁰ ¿Alkye bʼinchbʼen yolin Pablo tiʼj toj Romanos 3 ex 4? Atztoq in yolin tiʼj bʼinchbʼen in tman Ley, toj juntl yol, atz yolin tiʼj Ley tzaj tqʼoʼn Dios kye israelita (kjawil uʼjit Romanos 3:​21, 28). Ateʼtoq junjun okslal judiy kwest ela kye tuʼn t-xi kyniman qa ya mintiʼtoq toklen Ley ex qa nya il tiʼj tuʼn t-xi kybʼinchaʼn aju in tqʼamaʼntoq. Tuʼntzunju, yolin Pablo tiʼj Abrahán tuʼn tkubʼ tyekʼin qa nya oʼkx il tiʼj tuʼn tjapun Ley tuʼn jun xjal tuʼntzun ttzalaj Dios tiʼj, sino il tiʼj tuʼn tten qʼuqbʼil  tkʼuʼj. Tbʼanel aju tqʼama Pablo tuʼnju in tzaj tyekʼin qe qa jaku tzalaj Dios qiʼj qa ma tzʼok qeʼ qkʼuʼj tiʼj ex tiʼj Jesucristo.

11. ¿Alkyeqe bʼinchbʼen yolin Santiago tiʼj?

¹¹ Atzunte bʼinchbʼen in tzaj qʼamaʼn toj capítulo 2 te Santiago, nya atz in yolin tiʼj bʼinchbʼen in tqʼamaʼn Ley aju yolin Pablo tiʼj. Atztoq in yolin Santiago tiʼj bʼinchbʼen in bʼant kyuʼn okslal tkyaqil qʼij. Kyuʼn bʼinchbʼen lu, in nel nikʼbʼaj tiʼj qa axix tok at qʼuqbʼil tkʼuʼj jun okslal tiʼj Dios moqa mintiʼ. Qo xnaqʼtzan tiʼj kabʼe techel ajbʼen tuʼn Santiago.

12. ¿Tiʼ tzaj tchikʼbʼaʼn Santiago tiʼj qʼuqbʼil qkʼuʼj ex qbʼinchbʼen? (Ax ikx qʼonka twitza kyiʼj dibujo).

¹² Toj tnejel techel, yolin Santiago tiʼj tuʼn tten tbʼanel kymod okslal kyukʼil kykyaqil xjal te junxitl kyyajil. Xi tqʼamaʼn kye qa ma kubʼ kyyekʼin tbʼanel kymod tiʼj jun xjal qʼinun pero in nel kyikʼun jun xjal prow, in kubʼ kyyekʼin tukʼil kybʼinchbʼen qa mintiʼ qʼuqbʼil kykʼuʼj maske in kyqʼamaʼn qa at (Sant. 2:​1-5, 9). Toj tkabʼin techel yolin Santiago tiʼj jun xjal ok tqʼoʼn twitz tiʼj jun terman mintiʼ t-xbʼalun ex mintiʼ twa, pero mintiʼ xi tqʼoʼn onbʼil te. Tqʼama xjal qa at qʼuqbʼil tkʼuʼj, pero mintiʼtoq tajbʼen tuʼnju mintiʼ kubʼ tyekʼin tukʼil tbʼinchbʼen. Kubʼ ttzʼibʼin Santiago jlu: «Qa mintiʼ ma txi qyekʼin qa at qokslabʼl tuʼnju bʼaʼn in qbʼinchaʼn, tuʼn jlu mintiʼ tajbʼen qokslabʼl» (Sant. 2:​14-17).

13. ¿Alkye techel yolin Santiago tiʼj tuʼn ttzaj tqʼamaʼn qa il tiʼj tuʼn tkubʼ qyekʼin qʼuqbʼil qkʼuʼj tukʼil qbʼinchbʼen? (Santiago 2:​25, 26).

¹³ Yolin Santiago tiʼj Rahab. ¿Tiquʼn? Tuʼnju kubʼ tyekʼin qʼuqbʼil tkʼuʼj tukʼil  tbʼinchbʼen (kjawil uʼjit Santiago 2:​25, 26). Otoq tzʼok tbʼiʼn Rahab junjun tqanil tiʼj Jehová ex qa in nonintoq kyiʼj israelita (Jos. 2:​9-11). ¿Tiʼtzun bʼant tuʼn Rahab tuʼn tkubʼ tyekʼin qa qʼuqli tkʼuʼj tiʼj Jehová? Kolin kyiʼj kabʼe espía israelita tuʼn miʼn kykubʼ bʼyoʼn. Tuʼn jlu, ok qʼoʼn Rahab te tzʼaqli ik tzeʼn te Abrahán maske aj il ex nya israelita. In tzaj tyekʼin techel lu qa nim toklen tuʼn tkubʼ qyekʼin qʼuqbʼil qkʼuʼj tukʼil qbʼinchbʼen.

14. ¿Tiʼ tqʼama Pablo ex Santiago?

¹⁴ Ik tzeʼn ma tzʼel qnikʼ tiʼj, toj junxichaq tten yolin Pablo ex Santiago tiʼj qʼuqbʼil qkʼuʼj ex qbʼinchbʼen. Tqʼama Pablo kye okslal judiy qa mlayx tzalaj Jehová kyiʼj qa oʼkx ma kubʼ kybʼinchaʼn aju in tzaj tqʼamaʼn Ley. Atzunte Santiago, tzaj tchikʼbʼaʼn qa kykyaqil okslal nim toklen tuʼn tkubʼ kyyekʼin qʼuqbʼil kykʼuʼj tukʼil kybʼinchbʼen.

15. Qʼamantza junjun techel tzeʼn jaku kubʼ qyekʼin qʼuqbʼil qkʼuʼj tukʼil qbʼinchbʼen. (Ax ikx qʼonka twitza kyiʼj foto).

¹⁵ Aj ttzaj tqʼamaʼn Jehová qa il tiʼj tuʼn qok lepeʼ tiʼj qʼuqbʼil tkʼuʼj Abrahán tuʼn qok te tzʼaqli toj twitz, nya a t-xilen jlu qa aʼyex tiʼchaq kxel qbʼinchaʼn ik tzeʼn bʼant tuʼn Abrahán. At nim tumel tzeʼn jaku kubʼ qyekʼin tukʼil qbʼinchbʼen qa at qʼuqbʼil qkʼuʼj. Jaku txi qqʼamaʼn kye qeju tzma in che pon toj chmabʼil qa in qo tzalaj kyiʼj, jaku qo onin kyiʼj erman mintiʼxix at kye ex jaku qo onin kyiʼj toj qja. Tbʼanel in nela tkyaqil jlu toj twitz Jehová (Rom. 15:7; 1 Tim. 5:​4, 8; 1 Juan 3:18). Jun tumel nim toklen tuʼn tkubʼ qyekʼin qʼuqbʼil qkʼuʼj, aju qa ma qo pakbʼan tukʼil tzalajbʼil (1 Tim. 4:16). Qkyaqilx  jaku kubʼ qyekʼin tukʼil qbʼinchbʼen qa qʼuqli qkʼuʼj tiʼj qa japunel kywi tpromesa Jehová ex qa in xi tbʼinchaʼn qe tiʼchaq toj tumel. Qa ma bʼant jlu quʼn, jaku tzʼok qeʼ qkʼuʼj tiʼj qa qo okel tqʼoʼn Jehová te tzʼaqli ex te tamiw.

16. ¿Tiʼ toklen aju tzaj tziyen te Abrahán tukʼil qʼuqbʼil tkʼuʼj?

¹⁶ Toj capítulo 4 te Romanos in kanet juntl tbʼanel xnaqʼtzbʼil quʼn tiʼj techel kyaj tqʼoʼn Abrahán. Nim toklen tuʼn qayon tiʼjju o tzaj tziyen qe. Tzaj ttziyen Jehová te Abrahán tuʼn ttzaj tkʼiwlaʼn «nimku nasyon». ¡Tbʼanelxix jlu! (Gén. 12:3; 15:5; 17:4; Rom. 4:17). Noqtzun tuʼnj, tej qʼiʼntoq 100 abʼqʼi tuʼn Abrahán ex 90 tuʼn Sara, naʼmxtoq tul itzʼj jun kykʼwal. Toj twitz jun xjal mlayxtoq ten jun kykʼwal. Maske mintiʼ tumel toj twitz Abrahán tuʼn tul itzʼj jun tkʼwal, «xi tokslaʼn tyol Dios ex kubʼ tyoʼn ex o qeʼxix tkʼuʼj tiʼj tuʼn tok te mambʼaj kye nimku xjal» (Rom. 4:​18, 19). Tej tikʼ ambʼil, ul itzʼj jun tkʼwal Abrahán aju Isaac tbʼi, otoq ayon nim ambʼil tiʼj (Rom. 4:​20-22).

17. ¿Tiquʼn in xi qqʼamaʼn qa jaku qo ok te tzʼaqli toj twitz Jehová ex te tamiw?

¹⁷ Ik tzeʼn bʼaj tiʼj Abrahán, jaku qo ok te tzʼaqli toj twitz Jehová ex jaku qo ok te tamiw. Tuʼntzunju, tqʼama Pablo qe yol lu tiʼj Abrahán: «Mya noq oʼkx tiʼj Abraham o tzʼibʼanjtz qa otoq tzʼok qʼoʼn te tzʼaqlxix tuʼn Dios, ax ikx o tzʼibʼanjtz qiʼj, porke ikx qe in qo ok qʼoʼn te tzʼaqlxix tuʼn Dios noq tuʼn qokslabʼl, aqoʼ in qo okslan tiʼj Dios aju jatz anqʼin Qajaw Jesús tuʼn kyxol kyimni» (Rom. 4:​23, 24). Ax ikx qe, nim toklen tuʼn tten qokslabʼil, qbʼinchbʼen ex qʼuqbʼil qkʼuʼj ik tzeʼn te Abrahán. Toj juntl xnaqʼtzbʼil, kʼelel qnikʼ tiʼjju tqʼama Pablo tiʼj qʼuqbʼil qkʼuʼj toj Romanos capítulo 5.