1. ¿Tiquʼn jaku txi qqʼamaʼn qa japun twi aju tzaj ttziyen Jehová te Abrahán?

 TZAJ ttziyen Jehová te Abrahán qa tuʼn t-xeʼchel che ktzajel kʼiwlaʼn kykyaqil xjal twitz Txʼotxʼ (Gén. 15:5; 22:18). Ok qeʼ tkʼuʼj Abrahán tiʼj qa ax tok kjapunel twi promesa lu tuʼnju ten nim tokslabʼil tiʼj Jehová. Noqtzun tuʼnj, naʼmxtoq tul itzʼ jun tkʼwal tej tjapun twi 100 abʼqʼi ex te t-xuʼjil te 90 abʼqʼi (Gén. 21:​1-7). Pero in tzaj tqʼamaʼn Tyol Dios jlu tiʼj Abrahán: «Xi tokslaʼn tyol Dios ex kubʼ tyoʼn ex o qeʼxix tkʼuʼj tiʼj tuʼn tok te mambʼaj kye nimku xjal, ik tzaʼnx o tma Dios te» (Rom. 4:18). Ik tzeʼn ojtzqiʼn quʼn, japun twi tyol Jehová ex ok Abrahán te tman Isaac, aju tkʼwal in nayontoq tiʼj. ¿Tiquʼn jaku txi qqʼamaʼn qa ok qeʼ tkʼuʼj Abrahán tiʼj qa tuʼn tjapun twi tyol Jehová?

2. ¿Tiquʼn ok qeʼxix tkʼuʼj Abrahán tiʼj qa kjapuneltoq twi aju tzaj ttziyen Jehová te?

² Tuʼnju ojtzqiʼnxix Jehová tuʼn Abrahán ok «qeʼxix tkʼuʼj tiʼj» qa kjapuneltoq twi aju tzaj ttziyen te (Rom. 4:21). Ex tuʼnju ten qʼuqbʼil tkʼuʼj Abrahán, ok qʼoʼn te tzʼaqli tuʼn Jehová ex ok te tamiw (Sant. 2:23). Ik tzeʼn in tzaj tqʼamaʼn Romanos 4:​18, attoq toklen qʼuqbʼil tkʼuʼj Abrahán tukʼilju in nayontoq tiʼj. Atzun jaʼlo, qo yolin tiʼjju  tqʼama apóstol Pablo toj Romanos capítulo 5 tiʼj qʼuqbʼil qkʼuʼj in qo ayon tiʼj.

3. ¿Tiʼ tqʼama Pablo tiʼj qʼuqbʼil qkʼuʼj o tzaj ttziyen Jehová?

³ Tqʼama Pablo tiquʼn segur atoʼ tiʼj qa aju «qʼuqbʼabʼl [qkʼuʼj] tuʼn Dyos lay kubʼnaj» (Rom. 5:​5, XT). Ex in nonin qiʼj tuʼn tel qnikʼ tiʼj tzeʼn jaku qo ten mas segur tiʼjju o tzaj ttziyen Jehová. Akux in qo xnaqʼtzan tiʼjju in tzaj tqʼamaʼn Romanos 5:1 a 5, qo ximen tiʼj tiquʼn mas segur atoʼ tiʼj qʼuqbʼil qkʼuʼj in qo ayon tiʼj. Ax ikx, kʼonil xnaqʼtzbʼil lu tuʼn tel qnikʼ tiʼj tiʼ jaku bʼant quʼn tuʼn miʼn tkubʼ naj qʼuqbʼil qkʼuʼj lu. Tnejel, qo xnaqʼtzan tiʼjju o tzaj tziyen qe ex ik tzeʼn tqʼama Pablo, mlay tzaj qbʼis tuʼn.

4. ¿Alqiʼj in yolin Romanos 5:1 ex 2?

⁴ (Kjawil uʼjit Romanos 5:​1, 2). Xi ttzʼibʼin Pablo qe yol toj texto lu kye okslal te Roma. Otoq tzʼel kynikʼ tiʼj Jehová ex Jesús. Ax ikx, otoq kubʼ kyyekʼin qʼuqbʼil kykʼuʼj ex otoq che ok te okslal. Tuʼntzunju, e ok te tzʼaqli noq tuʼn kyokslabʼil ex e jaw skʼoʼn tuʼn xewbʼaj xjan. Atxix toj ambʼil aju, segurtoq ateʼ tiʼjju in che ayontoq tiʼj.

5. ¿Tiʼ qʼuqbʼil kykʼuʼj skʼoʼn maj at?

⁵ Tej tikʼ ambʼil, xi tqʼamaʼn Pablo kye okslal skʼoʼn maj te Éfeso aju otoq tzaj ttziyen Jehová kye. Tqʼama qa ktzajel qʼoʼn jun «etzbʼil nimxix ex tbʼanilxix [ . . . ] kye okslal» skʼoʼn maj (Efes. 1:18). Atzun kye okslal te Colosas xi tqʼamaʼn jatumel ktzajel qʼoʼn etzbʼil lu. Tqʼama: «Ktzajel tqʼoʼn Dios kyeye [ . . . ] tuj kyaʼj» (Col. 1:​4, 5). Tuʼntzunju, in che ayon okslal skʼoʼn maj tiʼj qʼuqbʼil kykʼuʼj tuʼn kyjaw anqʼin ex tuʼn kyxiʼ anqʼil te jumajx toj kyaʼj tuʼn kykawin junx tukʼil Jesús (1 Tes. 4:​13-17; Apoc. 20:6).

6. ¿Tiʼ tqʼama jun ermano skʼoʼn maj tiʼj qʼuqbʼil tkʼuʼj?

 ⁶ In nok kyqʼoʼn okslal skʼoʼn maj nim toklen aju o tzaj ttziyen Jehová kye. Jun techel, tqʼama ermano Frederick Franz jlu toj 1991: «Segur qʼuqbʼil qkʼuʼje o tzaj ttziyen Jehová ex teyele junjun 144,000 ktzajel tkʼamoʼn aju o tzaj ttziyen Dios te. Ex mas tbʼanel etzbʼil lu twitz alkyexku juntl tiʼ». ¿Tiʼtzun kubʼ tnaʼn ermano tej tajbʼen te Jehová toj nim ambʼil? Tqʼamatl jlu: «Kukx in nok qqʼoʼne toklen aju in qo ayone tiʼj. [ . . . ] Ex mas in xi qqʼoʼne chjonte tiʼj aj qayone mas ambʼil. Tbʼanelxix qa kukx ma qo ayone tiʼj, maske jaku tzikʼ jun millón abʼqʼi. Ax ikx, mas in nok nqʼoʼne toklen ik tzeʼn tnejel».

7, 8. ¿Alkye qʼuqbʼil kykʼuʼj chʼixmi kykyaqil tmajen Jehová in che ayon tiʼj? (Romanos 8:​20, 21).

⁷ Chʼixmi kykyaqil tmajen Jehová toj ambʼil jaʼlo junxitl qʼuqbʼil kykʼuʼj in che ayon tiʼj. Ax qʼuqbʼil kykʼuʼj at ik tzeʼn te Abrahán, che anqʼil te jumajx tzalu twitz Txʼotxʼ tjaqʼ Tkawbʼil Dios (Heb. 11:​8-10, 13). Ax ikx yolin Pablo tiʼj lu (kjawil uʼjit Romanos 8:​20, 21). Tej t-xnaqʼtzana tiʼjju in tzaj tqʼamaʼn Biblia tiʼj ambʼil tzul, ¿alkye jun tiʼ mas tbʼanel ela toj twitza? ¿Bʼaʼnpe ela toj twitza tej tok tbʼiʼna qa qo tzaqpajel tiʼj il ex qo okel te tzʼaqli? ¿Kubʼpe tnaʼna tzalajbʼil tej tel tnikʼa tiʼj qa che kjawil anqʼin qe toj tjaya o che kyim ex qa che anqʼil toj jun paraíso? Noq tuʼnju o tzaj ttziyen Jehová qe, at tbʼanel tiʼchaq in qo ayon tiʼj toj ambʼil tzul.

⁸ In kubʼ qnaʼn tzalajbʼil tuʼnju qkyaqilx in qo ayon tiʼj jun qʼuqbʼil qkʼuʼj, ya sea tuʼn qanqʼin te jumajx toj kyaʼj moqa tzalu twitz Txʼotxʼ. Ex mas segur jaku qo kyaj tiʼj qʼuqbʼil qkʼuʼj lu junjun qʼij. ¿Tzeʼn jaku bʼant jlu quʼn? Tuʼn tok qojtzqiʼn, qo xnaqʼtzan tiʼjju tqʼama Pablo. Kʼonil aju tqʼama tuʼn tel qnikʼ tiʼj qa axix tok qʼuqbʼil qkʼuʼj in qo ayon tiʼj.

9, 10. Ik tzeʼn bʼaj tiʼj Pablo, ¿tiʼ qo okel weʼ twitz? (Romanos 5:3; ax ikx qʼonka twitza kyiʼj tilbʼilal).

⁹ (Kjawil uʼjit Romanos 5:​3, XT). Tqʼama Pablo qa mas segur jaku qo ten tiʼjju in qo ayon tiʼj aj qikʼ kyoj ambʼil kwest. Kykyaqil tmajen Jehová ojtzqiʼn kyuʼn qa che okel weʼ twitz nim nya bʼaʼn. Qo ximen tiʼjju tqʼama Pablo kye okslal te Tesalónica: «Tej qtene kyukʼile, bʼiʼx xi qmaʼne kyeye qa il tiʼj tuʼn qyajlanjtz, ex kyjaʼtzun tten in bʼaj qiʼj, bʼaʼn jlu kyuʼne» (1 Tes. 3:4). Ax ikx tqʼama jlu kye okslal te Corinto: «Qajbʼile tuʼn kybʼinteye tiʼj ju yajbʼil qeye [ . . . ], mintiʼ qipaye ex o qmaye qa tuʼn qnaje» (2 Cor. 1:8; 11:​23-27).

¹⁰ Ax ikx kye tmajen Jehová toj ambʼil jaʼlo, ojtzqiʼn kyuʼn qa che okel weʼ kywitz nya bʼaʼn (2 Tim. 3:12). ¿Tiʼ o tzʼok weʼya twitz atxix tej tok qeʼ tkʼuʼja tiʼj Jesús ex tej tok lepeʼya tiʼj? Bʼalo o che ok ten tamiwa moqa qe toj tjaya xmayil tiʼja moqa o tzʼok kybʼinchaʼn jun nya bʼaʼn tiʼja. ¿Ope tzaj nya bʼaʼn tiʼja toj aqʼuntl tuʼnju mintiʼ in sbʼuʼna? (Heb. 13:18). ¿Ope tzʼok weʼya twitz ambʼil kwest tukʼil Gobierno tuʼnju in yolina tiʼj qʼuqbʼil tkʼuʼja kyukʼil txqantl? Noq alkyexku nya bʼaʼn qo okel weʼ twitz, qo tzalaj ik tzeʼn tqʼama Pablo. ¿Tiquʼn?

11. ¿Tiʼ ktzajel qkʼamoʼn qa ma tzikʼx quʼn?

¹¹ In kubʼ qnaʼn tzalajbʼil aj qikʼ kyoj ambʼil kwest tuʼnju in nonin qiʼj tuʼn tten jun tbʼanel qmod. In tzaj tqʼamaʼn Romanos 5:3 jlu: «Aju yajbʼil qe in tqʼoʼn qpasens tuʼn tikʼx quʼn». Kykyaqil tmajen Jehová che okel weʼ kywitz ambʼil kwest, tuʼntzunju qkyaqilx il tiʼj tuʼn tikʼx quʼn. Oʼkx qa ma tzikʼx quʼn ktzajel qkʼamoʼn qʼuqbʼil qkʼuʼj in qo ayon tiʼj. Nya qaj tuʼn qok ik tzeʼn qe xjal ok tmojbʼan Jesús ik tzeʼn qe iyaj e kubʼ tzʼaq toj txʼotxʼ at nim abʼj toj. Xi kykʼamoʼn xjal lu «ju yol» tukʼil tzalajbʼil, pero ok «tzaj jun yajbʼil» ex ok kyel ikʼun in che kubʼ numj (Mat. 13:​5, 6, 20, 21). Ax tok, nya qgan tuʼn qel ikʼun ex tuʼn qok weʼ kywitz prueba, pero kʼonil qiʼj qa ma tzikʼx quʼn. Qo xnaqʼtzan tiʼj tzeʼn.

12. ¿Tzeʼn in nonin qiʼj qa ma tzikʼx quʼn?

¹² Yolin Santiago tiʼj tzeʼn in nonin qiʼj qa ma tzikʼx quʼn. Tqʼama jlu: «Tzʼok tililx kyuʼne tuʼn [tikʼx kyuʼne tuʼntzun] tten kypasense cabalxix, tuʼn tok kynabʼle ex tuʼn kytene mintiʼ kypaltile, ex mintiʼ jun atx taj kyeye» (Sant. 1:​2-4). Tqʼama Santiago qa il tiʼj tuʼn tikʼx quʼn. ¿Tiquʼn? Tuʼnju in nonin qiʼj tuʼn tten qpasens, tuʼn tchʼiy mas qokslabʼil ex tuʼn tok qeʼ mas qkʼuʼj tiʼj Dios. Nya oʼkx jlu, ax ikx in nonin qiʼj toj juntl tumel.

13, 14. ¿Tiʼ in kubʼ tnaʼn Jehová aj tikʼx quʼn ex tzeʼn in nonin qiʼj? (Romanos 5:4).

¹³ (Kjawil uʼjit Romanos 5:​4, XT). Tqʼama Pablo qa «nikʼx quʼn inqoʼ ok kaʼyiʼn tuʼn Dyos» moqa in tzalaj Dios qiʼj (Rom. 5:​4, XT). Nya a t-xilen jlu qa in tzalaj Jehová qiʼj aj qikʼ kyoj ambʼil kwest, sino in tzalaj tuʼnju in nikʼx quʼn. In tzaj qʼuqbʼaʼn qkʼuʼj aj tel qnikʼ tiʼj qa in tzalaj Jehová qa kukx ma qo ten tzʼaqli twitz ex qa kukx ma tzikʼx quʼn (Sal. 5:12).

¹⁴ Qo ximen tiʼj Abrahán. Kukx tzalaj Jehová tiʼj tuʼnju ikʼx tuʼn qe nya bʼaʼn ok weʼ twitz. Ok te tamiw Jehová ex ok tqʼoʼn te tzʼaqli (Gén. 15:6; Rom. 4:​13, 22). Ax jlu jaku bʼaj qiʼj, ktzalajel Jehová qiʼj qa ma qo ten tzʼaqli twitz ex qa  ma tzikʼx quʼn. Mintiʼ toklen jlu tukʼil jniʼ aqʼuntl in bʼant quʼn toj qajbʼebʼil te moqa kyiʼj qoklen toj congregación. Ex qkyaqilx jaku bʼant jlu quʼn maske junxitl qabʼqʼi, aju in nikʼ qiʼj ex aju jaku bʼant quʼn. ¿Atpe jun nya bʼaʼn in nok weʼya twitz toj ambʼil jaʼlo? Bʼaʼn tuʼn ttzaj tnaʼna qa ktzalajel Jehová tiʼja qa kukx ma tena tzʼaqli twitz. Aj tel qnikʼ tiʼj jlu, in nonin qiʼj tuʼn tok qeʼ mas qkʼuʼj tiʼj qa ax tok aju in qo ayon tiʼj.

15. ¿Tiʼ mas tqʼama Pablo ex tiʼ jaku kubʼ qximen?

¹⁵ Ik tzeʼn ma qo yolin tiʼj, tqʼama Pablo qa ktzalajel Dios qiʼj qa ma tzikʼx quʼn. Atzun jaʼlo qkeʼyink tiʼ mas tqʼama: «Inqoʼ ok kaʼyiʼn tuʼn Dyos, [ . . . ] [ex tuʼn jlu in ten qʼuqbʼil qkʼuʼj]. Atzunjuʼ qʼuqbʼabʼl [qkʼuʼj] tuʼn Dyos lay kubʼnaj» (Rom. 5:​4, 5, XT). Tej naʼmxtoq ttzaj tqʼamaʼn Pablo qe yol lu, yolin tiʼj qʼuqbʼil kykʼuʼj okslal te Roma toj Romanos 5:​2, tqʼama: «Qʼuql qkʼuʼj tiʼj tuʼn qten tukʼil Dios tuj tajwalil». Tuʼntzunju, jakulo kubʼ qximen jlu: «Ya attoq qʼuqbʼil kykʼuʼj okslal lu, ¿tiquʼntzun yolin Pablo juntl maj tiʼj?».

16. Qʼamantza tzeʼn jaku chʼiy mas qʼuqbʼil qkʼuʼj tiʼjju in qo ayon tiʼj. (Ax ikx qʼonka twitza kyiʼj tilbʼilal).

¹⁶ Jaku tzʼel qnikʼ tiʼjju tqʼama Pablo qa ma tzaj qnaʼn qa jaku chʼiy qʼuqbʼil qkʼuʼj tiʼjju in qo ayon tiʼj. Jun techel, ximana tiʼj ambʼil tej ttzaj qʼamaʼn tnejel maj teya qa jaku qo anqʼin te jumajx twitz Txʼotxʼ. Bʼalo kubʼ t-ximana qa nya ax tok qe yol lu. Pero tej tok tojtzqiʼna mas Jehová ex aju o kyaj ttziyan toj Biblia, mas ok qeʼ tkʼuʼja tiʼj qa kanqʼila toj jun paraíso.

17. Atxix tej tbautisarina, ¿tzeʼn o chʼiy mas qʼuqbʼil tkʼuʼja tiʼjju in ayona tiʼj?

¹⁷ Axpe ikx tej otoqxi bautisarina, o chʼiy mas qʼuqbʼil tkʼuʼja tiʼjju in ayona tiʼj tuʼnju o tzʼok tojtzqiʼna ex o tzʼok tkʼujlaʼna mas Jehová (Heb. 5:13–6:1). Bʼalo axju o bʼaj tiʼja ik tzeʼn in tzaj qʼamaʼn toj Romanos 5:2 a 4, olo tzʼok weʼya twitz ambʼil kwest ex o tzʼok tkeʼyina qa in tzalaj  Jehová tiʼja. Ex tuʼnju ojtzqiʼn tuʼna qa in tzalaj Jehová tiʼja, mas in nok qeʼ tkʼuʼja tiʼj qa kjapunel tuʼn aju o tzaj ttziyan. Ax ikx, mas o tzʼok qeʼ tkʼuʼja tiʼj jlu ik tzeʼn tnejel. Mas in kubʼ qximen qa axix tok qʼuqbʼil qkʼuʼj, qa at mas toklen qukʼil ex mas in nonin qiʼj toj tkyaqil ambʼil. Jun techel, in kubʼ qyekʼin tbʼanel qmod tukʼil qfamilia, in jaw qjyoʼn aju mas tbʼanel ex in najbʼen ambʼil toj tumel quʼn.

18. ¿Tiquʼn jaku txi qqʼamaʼn qa ax tok kjapunel twi aju in qo ayon tiʼj?

¹⁸ Tej otoqxi yolin Pablo tiʼj qa tuʼnju in tzalaj Jehová qiʼj, in nok qeʼ mas qkʼuʼj tiʼj qa ax tok kjapunel twi aju in qo ayon tiʼj. ¿Tiquʼn? Tuʼnju tqʼama Pablo qe yol lu kye okslal noq tuʼn tonbʼil Dios: «Atzunjuʼ qʼuqbʼabʼl tuʼn Dyos lay kubʼnaj, quʼn inaʼ qnaʼn toj qanmi ati tkʼuʼjlalil Dyos qiʼj tuʼnjuʼ Xewbʼaj Xjan tzaj tqʼoʼn qe» (Rom. 5:​5, XT). Tuʼntzunju, jaku tzʼok qeʼ qkʼuʼj tiʼj qa ax tok kjapunel twi aju o tzaj ttziyan Jehová qe.

19. ¿Tiʼ segur atoʼ tiʼj?

¹⁹ Qo ximen tiʼjju bʼaj tiʼj Abrahán, xi tqʼamaʼn Jehová jun promesa te, tzalaj tiʼj ex ok tqʼoʼn te tamiw. Ex japun twi aju ok qeʼ tkʼuʼj Abrahán tiʼj. In tzaj tqʼamaʼn Tyol Dios jlu: «O tkʼam Abraham aju tzaj ttziyan Dios te, tuʼnju at tpasens tuʼn tayon tiʼj» (Heb. 6:15; 11:​9, 18; Rom. 4:​20-22). Ik tzeʼn te Abrahán, qa kukx ma qo ten tzʼaqli twitz Jehová, segur atoʼ tiʼj qa ktzajel qkʼamoʼn aju o tzaj ttziyen qe ex mlay tzaj qbʼis tuʼn. Axix tok qʼuqbʼil qkʼuʼj o tzaj tqʼamaʼn ex in qo tzalaj tuʼn (Rom. 12:12). Kubʼ ttzʼibʼin Pablo jlu: «Ate Dios in tzaj qʼuqbʼante qkʼuʼj, awt nojsante kyanmiye tuʼn tkyaqil tzalajbʼil, ex awt qʼonte kymojbʼabʼl kyibʼe noq tuʼn kyokslabʼle, tuʼntzun tqeʼxix kykʼuʼje [ . . . ] tuʼn tipumal Xewbʼaj Xjan» (Rom. 15:13).