¿Ope jaw tuʼjina qe uʼj Aju Xqʼuqil kʼitzqeku che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Tiʼ il tiʼj tuʼn tbʼant quʼn tuʼn tbʼaj qchʼexpuʼn qximbʼetz? (Rom. 12:2).

Nya oʼkx il tiʼj tuʼn tbʼant junjun tbʼanel tiʼchaq quʼn, sino ax ikx il tiʼj tuʼn tel qnikʼ tiʼjju tkuʼx toj qanmi ex tuʼn t-xi qbʼinchaʼn qe chʼixpubʼil tuʼntzun kyjapun tkawbʼil Jehová quʼn (w23.01, página 8 ex 9).

¿Tzeʼn jaku ten qximbʼetz toj tumel tiʼjju in bʼaj twitz Txʼotxʼ?

Qaj tuʼn tok qbʼiʼn aju in bʼaj twitz Txʼotxʼ ex tzeʼn in japun kywi profecía. Pero nya qaj tuʼn t-xi qqʼamaʼn qex qximbʼetz ex nya qaj tuʼn tnaj mujbʼabʼil qxol toj congregación. Mas bʼaʼn tuʼn tok qqʼoʼn qwiʼ tiʼj akʼaj tqanil o tzaj tqʼamaʼn ttnam Jehová (1 Cor. 1:10) (w23.02, página 16).

¿Tiquʼn junxitl ok tbautismo Jesús kywitz qe t-xnaqʼtzbʼen?

Mintiʼ xi tqʼamaʼn Jesús te Jehová tuʼn tajbʼen te ik tzeʼn qe. Tuʼnju ul itzʼj toj jun tnam ya in najbʼentoq te Dios. Ax ikx, tzʼaqlitoq ex mintiʼ xi tqanin te Jehová tuʼn tkubʼ tnajsaʼn til (w23.03, página 5).

¿Tiʼ jaku bʼant quʼn tuʼn t-xi qqʼoʼn ambʼil kye mas erman tuʼn t-xi kyqʼoʼn jun kycomentario?

Bʼaʼn tuʼn t-xi qqʼoʼn qcomentario tukʼil nya nim qyol tuʼntzun kycomentarin mas erman. Ax ikx, mintiʼ tuʼn qyolin tiʼj tkyaqil xnaqʼtzbʼil at toj jun párrafo tuʼntzun kyyolin txqantl kyiʼj junjuntl xnaqʼtzbʼil (w23.04, página 23).

¿Tiʼ «Aju bʼe Xjan» in tzaj qʼamaʼn toj Isaías 35:8?

Toj kywitz judiy atz in yolin tiʼj bʼe tzajni toj tnam Babilonia tuʼn tpon toj tnam Israel. ¿Yajtzun toj ambʼil jaʼlo? Tej atxtoq nim syent abʼqʼi tuʼn tjapun 1919, e ajbʼen junjun xjal tuʼn Jehová tuʼn tbʼaj kybʼinchaʼn bʼe. Jun techel, i etz imprimirit uʼj ex e bʼaj traducirit Biblia. In xi tiʼn «bʼe xjan» qe tmajen Jehová tuʼn kykʼulin te junx tukʼil ttnam ex toj ambʼil tzul che tzalajel kyiʼj kʼiwlabʼil che ktzajel kykʼamoʼn tjaqʼ Tkawbʼil Dios (w23.05, página 15 a 19).

¿Alkye kabʼe xuʼj in yolin Proverbios capítulo 9 tiʼj?

In yolin uʼj te Proverbios tiʼj «xuʼj mintiʼ tnabʼl» ex «in xiʼ tuj kamik» aju xjal in xi tkʼamoʼn txokbʼil in tzaj tqʼoʼn. Ax ikx, in yolin tiʼj jun xuʼj in kubʼ techlaʼn nabʼil axix tok ex qa ma txi qkʼamoʼn txokbʼil in tzaj tqʼoʼn, kʼonil qiʼj tuʼn qbʼet «ik tzaʼn jun xjal at tnabʼl» (Prov. 9:​1, 6, 13, 18) (w23.06, página 22 a 24).

¿Tzeʼn kubʼ tyekʼin Jehová te Lot qa in ximen tiʼj ex qa kubʼ tin tibʼ?

Xi tqʼamaʼn Jehová te Lot tuʼn tetz toj tnam Sodoma ex tuʼn t-xi oq kywi witz. Pero tej t-xi tqanin Lot te tuʼn t-xi oq atz Zóar, xi tqʼoʼn Dios ambʼil te (w23.07, página 21).

¿Tiʼ jaku bʼant tuʼn jun xuʼj qa in nok tkeʼyin tchmil pornografía?

Bʼaʼn tuʼn ttzaj tnaʼn qa nya a at tpaj. Mas bʼaʼn qa ma tzʼok tqʼoʼn twiʼ tiʼj tamiwbʼil tukʼil Jehová ex tuʼn t-ximen kyiʼj junjun xuʼj in yolin Biblia kyiʼj, aʼyeju tzaj kybʼis ex xi tqʼuqbʼaʼn Jehová kykʼuʼj. Ax ikx, jaku onin tiʼj tchmil tuʼn tel tikʼun qe nya bʼaʼn jaku kubʼ tzʼaq tuʼn (w23.08, página 14 a 17).

¿Tzeʼn jaku tzʼonin qnabʼil qiʼj tuʼn qok te mans aj kyyolin xjal nya bʼaʼn tiʼj qokslabʼil?

Jaku qo ximen tiʼj t-xjel xjal tuʼntzun tok qojtzqiʼn alkye t-ximbʼetz ex tiʼ in tzaj bʼaj tkʼuʼj tuʼn. Qa ma bʼant jlu quʼn, kʼonil qiʼj tuʼn t-xi qtzaqʼweʼn xjal tukʼil tbʼanel qmod (w23.09, página 17).

¿Tiʼ xnaqʼtzbʼil jaku tzʼel qiʼn tiʼjju bʼant tuʼn María noq tuʼn ttzaj qʼoʼn mas tipumal?

Tej tok tbʼiʼn María qa kʼokel te ttxuʼ Mesías, jyon onbʼil kyukʼil txqantl. Xi qʼuqbʼaʼn tkʼuʼj tukʼil Tyol Dios tuʼn Gabriel ex Elisabet. Ax ikx qe jaku tzaj qʼuqbʼaʼn qkʼuʼj kyuʼn erman (w23.10, página 15).

¿Alkye tten jaku tzaj ttzaqʼweʼn Jehová qe qnaʼj Dios?

In tzaj ttziyen Jehová qa ktzajel ttzaqʼweʼn qe qnaʼj Dios qa at toklen tukʼil t-ximbʼetz moqa tajbʼil (Jer. 29:12). Ax ikx, jaku tzaj ttzaqʼweʼn kabʼe naʼj Dios toj junxichaq tten, pero kukx kʼonil qiʼj (w23.11, página 21 ex 22).

Qa in yolin Romanos 5:2 tiʼj qʼuqbʼil qkʼuʼj in qo ayon tiʼj, ¿tiquʼntzun in tzaj qʼamaʼn juntl maj toj versículo 4?

Bʼalo in xi qʼoʼn qʼuqbʼil tkʼuʼj jun xjal tuʼn tanqʼin twitz Txʼotxʼ aj tok tbʼiʼn qe tbʼanel tqanil. Pero in chʼiy mas qʼuqbʼil tkʼuʼj lu ex mas in nok tqʼoʼn toklen aj kyikʼx nya bʼaʼn tuʼn ex aj tel tnikʼ tiʼj qa in tzalaj Jehová tiʼj (w23.12, página 12 ex 13).