1. ¿Tiʼ il tiʼj tuʼn tbʼant kyuʼn ermano?

 XI TQʼAMAʼN rey David jlu te Salomón: «Tenx tipuna ex tzʼokxa xinaq» (1 Rey. 2:​1-3). Tbʼanel tuʼn kyok lepeʼ ermano tiʼj consej lu. Tuʼn tbʼant jlu kyuʼn, il tiʼj tuʼn kyok lepeʼ kyiʼj tkawbʼil Jehová ex kyiʼj nabʼil in che jatz toj Biblia toj tkyaqil tten kyanqʼibʼil (Luc. 2:52). ¿Tiquʼn nim toklen tuʼn tok kynabʼil qʼa?

2, 3. ¿Tiquʼn nim toklen tuʼn tok kynabʼil qʼa?

² At nim aqʼuntl il tiʼj tuʼn tbʼant kyuʼn ermano toj familia ex toj congregación. Qa jun qʼa teya, bʼalo o ximana tiʼj tiʼ jaku bʼant tuʼna toj ambʼil tzul. Bʼalo o kubʼ t-ximana tuʼn toka te precursor, te siervo ministerial ex te ansyan. Axlo ikx o kubʼ t-ximana tuʼn tkubʼ mojeʼya ex tuʼn kyten tkʼwala (Efes. 6:4; 1 Tim. 3:1). Tuʼn tjapun twiʼ aju o kubʼ t-ximana ex tuʼn tel bʼaʼn, il tiʼj tuʼn tok tnabʼila. b

³ ¿Tiʼ jaku tzʼonin tiʼja tuʼn tchʼiya toj tokslabʼila? ¿Alkye junjun tiʼchaq nim toklen tuʼn t-xi tbʼinchaʼna? Ex ¿tiʼ jaku bʼant tuʼna tuʼn tbʼaj tbʼinchaʼn ttena tuʼn tbʼant junjun tiʼ tuʼna toj ambʼil tzul? Qo xnaqʼtzan tiʼj.

4. ¿Jatumel jaku che kanet tbʼanel techel tuʼna? (Ax ikx qʼonka twitza kyiʼj tilbʼilal).

⁴ Kanoʼmila kyiʼj tbʼanel techel. Jaku ximana kyiʼj junjun xinaq moqa ichin in yolin Biblia tiʼj, aʼyeju kʼujlaʼn Dios kyuʼn ex e xqʼuqin tiʼj ttnam toj nimku tten. Axlo ikx ateʼ tbʼanel techel toj teya tfamilia ex toj congregación ex jaku tzʼel tkanoʼna kyiʼj (Heb. 13:7). Nya oʼkxju, ax ikx jaku tzʼel tkanoʼna tiʼj tbʼanel techel kyaj tqʼoʼn Jesucristo (1 Ped. 2:21). Aj t-xnaqʼtzana kyiʼj techel lu, ximana tiʼj kymod teyele junjun tbʼanel in nela toj twitza (Heb. 12:​1, 2). Yajxitl, ximana tiʼj tzeʼn jaku tzʼel tkanoʼna kyiʼj.

5. ¿Tiʼ jaku bʼant tuʼna tuʼn tten tbʼanel tnabʼila ex tiquʼn nim toklen? (Salmo 119:9).

⁵ Tbʼanel tuʼn tten «tnabʼla bʼaʼn» ex xqʼuqinka. (Prov. 3:21). In bʼant jlu tuʼn jun xinaq aj tel tpaʼn ambʼil tuʼn t-ximen tiʼj jun tiʼ naʼmxtoq t-xi tbʼinchaʼn. Tuʼntzunju, qʼonka tilil tuʼn tbʼant jlu tuʼna ex tuʼn kukx txi tbʼinchaʼna. ¿Tiquʼn? Tuʼnju ateʼ nim kuʼxun in che ok lepeʼ tiʼj kyex kynabʼil ex tiʼjju in kubʼ kynaʼn (Prov. 7:7; 29:11). Ax ikx, jaku tzpet tnabʼila tuʼn televisión, kyuʼn película, tuʼn internet ex kyuʼn redes sociales. ¿Tiʼtzun jaku bʼant tuʼna tuʼn tten tbʼanel tnabʼila? Tnejel, il tiʼj tuʼn tel tnikʼa kyiʼj nabʼil ateʼkux toj Tyol Dios ex jaku ximana tiʼj tiquʼn tbʼanel aju in tzaj tqʼamaʼn Jehová teya. Yajxitl, jaku tzʼajbʼen tuʼna aju otoq tzʼel tnikʼa tiʼj tuʼn tjaw tjyona aju in tzalaj Jehová tuʼn (kjawil uʼjit Salmo 119:9). Nim toklen tuʼn tok tnabʼila (Prov. 2:​11, 12; Heb. 5:14). Atzun jaʼlo, qo xnaqʼtzan tiʼj tzeʼn jaku tzʼonin tbʼanel tnabʼila tuʼn tkubʼ tyekʼina tbʼanel tmoda kyukʼil ermana ex aj tkubʼ t-ximana alkye tten kbʼajel t-xbʼalumin tibʼa.

6. ¿Tzeʼn kbʼel tyekʼin jun qʼa at tnabʼil qa in respetarin kye ermana?

⁶ Jaku tzʼonin tbʼanel nabʼil tuʼn trespetarina kye xuʼj. Toj tumel qa tgan jun qʼa jun ermana ex qa taj tuʼn tok tojtzqiʼn. Pero qa at tnabʼil jun qʼa, mlay txi tqʼamaʼn, mlay txi ttzʼibʼin moqa mlay bʼant  jun tiʼ tuʼn tuʼn tkubʼ tyekʼin qa tgan jun ermana. Oʼkx jaku bʼant jlu tuʼn, qa ax tok in ximen tuʼn tkubʼ mojeʼ tukʼil ermana (1 Tim. 5:​1, 2). Qatzun at jun qʼa in yolin tukʼil jun ermana, tbʼanel tuʼn tok tilil tuʼn tuʼn miʼn kyten kyjunalx. Iktzun tten kʼokel tqʼoʼn toklen ermana (1 Cor. 6:18).

7. ¿Tiʼ kximel jun qʼa at tnabʼil tiʼj aj tbʼaj tbʼinchaʼn tten ex aj tbʼaj t-xbʼalumin tibʼ?

⁷ Juntl tten jaku kubʼ tyekʼin jun qʼa qa in ximen ik tzeʼn te Jehová, aju qa ma tzʼok t-xbʼalumin tibʼ ex qa ma bʼaj t-xyebʼin twiʼ toj tumel. Toj ambʼil jaʼlo, aqeju in che bʼinchan tiʼj xbʼalun ex in che kʼayin, mintiʼ in nok kyqʼoʼn toklen Jehová ex in che yaẍin. Tuʼntzunju, in xi kybʼinchaʼn kyxbʼalun xinaq jitzʼ moqa ik keʼyin ik tzeʼn kyxbʼalun xuʼj. Qa in nok tilil tuʼn jun qʼa tuʼn tok tnabʼil, in ximen kyiʼj nabʼil ateʼkux toj Tyol Dios ex kyiʼj tbʼanel techel ateʼ toj congregación. Aj tkubʼ t-ximen alkye tten kbʼajel t-xbʼalumin tibʼ ex kbʼajel tbʼinchaʼn tten, jaku kubʼ t-xjelin jlu: «¿In kubʼ nyekʼine tukʼil nbʼinchbʼene qa o tzʼok nnabʼile ex qa in chin ximane tiʼjju in kubʼ kynaʼn txqantl? ¿In kubʼ nyekʼine qa in che ajbʼene te Dios tuʼnju alkye tten in bʼaj nxbʼalumin wibʼe?» (1 Cor. 10:​31-33; Tito 2:6). Nya oʼkx in che tzalaj erman kyiʼj qʼa o tzʼok kynabʼil, sino ax ikx in tzalaj Jehová kyiʼj.

8. ¿Tiʼ jaku bʼant tuʼn jun ermano tuʼn tok qeʼ kykʼuʼj txqantl tiʼj?

⁸ Tzʼok tilil tuʼna tuʼn tok qeʼ kykʼuʼj txqantl tiʼja. A t-xilen jlu qa il tiʼj tuʼn t-xi tbʼinchaʼna tkyaqil aqʼuntl o tzaj qʼoʼn teya (Luc. 16:10). Ximana tiʼj techel kyaj tqʼoʼn Jesús. Ok te responsable ex xi tbʼinchaʼn tkyaqilju tzaj tqʼamaʼn Jehová te, axpe ikx kyoj ambʼil kwest. Ax ikx, ok tkʼujlaʼn qe xjal, pero mas qe t-xnaqʼtzbʼen ex xi tqʼoʼn tchwinqlal tuʼn kyklet (Juan 13:1). Ik tzeʼn te Jesús, qʼonka tilil tuʼn tbʼant alkyexku aqʼuntl tzul qʼoʼn teya. Qa mintiʼ ojtzqiʼn tuʼna alkye tten tuʼn tbʼant, tbʼanel tuʼn tkubʼ tin tibʼa ex qaninxa onbʼil te jun ermano o tzʼok tnabʼil. Ex bʼinchanxa mas twitzju in tzaj qanin teya (Rom. 12:11). Bʼajsankuya tkyaqil aqʼuntl tzul qʼoʼn teya ex bʼinchama ik tzeʼn te Jehová kbʼantel tuʼna ex «mya kye xjal» (Col. 3:23). Ax ikx, tbʼanel tuʼn tel tnikʼa tiʼj qa mlay bʼant tkyaqil tuʼna ex qa jaku tzʼel txalpaja tuʼnju nya tzʼaqli teya (Prov. 11:2).

9. ¿Tzeʼn jaku tzʼonin tiʼj jun ermano qa ma bʼant junjun tiʼchaq tuʼn?

⁹ Tuʼn toka te jun ermano at tnabʼil, il tiʼj tuʼn tbʼant junjun tiʼ tuʼna. Kʼonil jlu tiʼja tuʼn tbʼant junjun aqʼuntl toj congregación, tuʼn tkanet jun taqʼuna tuʼntzun txi tqʼoʼna aju at tajbʼen kye toj tjaya ex tuʼn  ttena bʼaʼn kyukʼil txqantl. Qo xnaqʼtzan kyiʼj junjun.

10, 11. ¿Tiquʼn nim toklen tuʼn tbʼant tuʼjin ex ttzʼibʼin jun ermano? (Salmo 1:​1-3; ax ikx qʼonka twitza tiʼj foto).

¹⁰ Bʼaʼn tuʼn tbʼant tuʼjina ex ttzʼibʼina. In tzaj tqʼamaʼn Biblia qa aju xjal in uʼjin ex in ximen tiʼj, in tzalaj ex tbʼanel in nela tkyaqilju in bʼant tuʼn (kjawil uʼjit Salmo 1:​1-3). Iktzun tten ktel t-ximbʼetza ik tzeʼn te Jehová ex kximela toj tumel (Prov. 1:​3, 4). Tbʼanel qa ateʼ ermano ik tzeʼn jlu toj congregación. ¿Tiquʼn?

¹¹ Kyaj erman tuʼn kyxi xnaqʼtzaʼn ex tuʼn t-xi qʼoʼn consej kye kyuʼn ermano o tzʼok kynabʼil (Tito 1:9). Qa ma bʼant tuʼjina ex ttzʼibʼina, jaku tzʼonin tiʼja tuʼn tbʼaj tbʼinchaʼna qe chikʼbʼabʼil ex qe comentario jaku tzʼonin kyiʼj txqantl. Ax ikx, jaku kubʼ ttzʼibʼina qe tqanil aj t-xnaqʼtzana ex aj tok tbʼiʼna chikʼbʼabʼil kyoj chmabʼil ex kyoj asamblea. Jaku che onin tqanil lu tuʼn tchʼiy qʼuqbʼil tkʼuʼja ex tuʼn tonina kyiʼj txqantl.

12. ¿Tiʼ jaku tzʼonin tiʼja tuʼn tbʼant-xix tyolina kyukʼil txqantl?

¹² Bʼaʼn tuʼn tbʼant-xix tyolina kyukʼil txqantl. Nim toklen tuʼn tbʼant jlu kyuʼn ermano. A t-xilen jlu qa il tiʼj tuʼn tok kybʼiʼn ex tuʼn tel kynikʼ tiʼjju in kubʼ kyximen ex in kubʼ kynaʼn txqantl (Prov. 20:5). Jaku tzʼel tnikʼa tiʼjju kyaj txqantl tuʼn ttzaj kyqʼamaʼn teya tukʼil tqʼajqʼajel kywiʼ, tukʼilju in bʼant kyuʼn tukʼil kywitz ex tukʼil kyxmilal. Oʼkx jaku tzʼel tnikʼa tiʼj jlu aj ttena kyukʼil. Qa mas in yolina toj mensaje ex toj correo electrónico, mas kwest kʼelel teya tuʼn tyolina kyukʼil txqantl aj ttena kyukʼil. Tuʼntzunju, jyonxa ambʼil tuʼn ttena kyukʼil txqantl ex tuʼn tyolina kyukʼil (2 Juan 12).

13. ¿Tiʼ mas jaku bʼant kyuʼn kuʼxun? (1 Timoteo 5:8; ax ikx qʼonka twitza tiʼj foto).

¹³ Bʼaʼn tuʼn tkambʼet tpwaqa tuʼnxa. Qa o tzʼok tnabʼil jun okslal, il tiʼj tuʼn tok tilil tuʼn tuʼn tten aju at tajbʼen te ex kye toj tja (kjawil uʼjit 1 Timoteo 5:8). Toj junjun tnam ateʼ kuʼxun in xi kybʼinchaʼn jun aqʼuntl in bʼant tuʼn kyman moqa tuʼn jun kyfamiliar. Atzun toj junjuntl lugar, in che xnaqʼtzan kuʼxun tiʼj junjun aqʼuntl jaku bʼant kyuʼn. Tuʼntzunju, noq tiʼxku jaku bʼant tuʼna, tbʼanel tuʼn tkambʼet texa tpwaq (Hech. 18:​2, 3; 20:34; Efes. 4:28). Tzʼok tilil tuʼna tuʼn taqʼunana ex bʼajsankuya taqʼuna. Qa ma bʼant jlu tuʼna che yolil txqantl bʼaʼn tiʼja, kkanetel jun  taqʼuna ex mlay tzʼel qʼiʼn. Ax ikx, qa ma che ten tbʼanel tmoda ex qa ma che bʼant junjun tiʼ tuʼna, kʼonil tiʼja tuʼn tjapun kywi toklena che ul qʼoʼn toj ambʼil tzul. Qo xnaqʼtzan kyiʼj junjun.

14. ¿Tiʼ jaku tzʼonin tiʼj jun kuʼxun tuʼn tajbʼen te Jehová toj tkyaqil ambʼil?

¹⁴ Jaku tzʼajbʼena te Jehová toj tkyaqil ambʼil. Ateʼ nim ermano toj ambʼil jaʼlo o tzʼok kynabʼil ex onin kyiʼj tej kyok te precursor tej kuʼxun qe. Qa ma tzʼoka te precursor, jaku tzʼaqʼunana kyxol junxichaq xjal ex kʼajbʼel pwaq tuʼna toj tumel (Filip. 4:​11-13). Tbʼanel qa ma txi tzyet tuʼna tiʼj precursorado auxiliar ex kʼonil jlu tiʼja tuʼn tajbʼena te precursor regular yajxitl. Ax ikx, ktzajel tqʼoʼn jlu ambʼil teya tuʼn tonina toj construcción moqa tuʼn tajbʼena te betelita.

15, 16. ¿Tiʼ jaku bʼant tuʼn jun ermano tuʼn tok te siervo ministerial moqa ansyan?

¹⁵ Jaku tzʼajbʼena te siervo ministerial moqa te ansyan. Tbʼanel tuʼn tok tilil kyuʼn kykyaqil ermano tuʼn tjapun requisito kyuʼn tuʼn kyok te ansyan. In tzaj tqʼamaʼn Biblia qa aʼyeju kyaj tuʼn kyonin kyiʼj erman, tbʼanel tuʼn tok tilil kyuʼn tuʼn kyaqʼunan tiʼj (1 Tim. 3:1). Tuʼn tok jun ermano te ansyan, tnejel il tiʼj tuʼn tok te siervo ministerial. Nim in che onin siervo ministerial kyiʼj ansyan toj junxichaq tten. Mintiʼ in jaw kyin kyibʼ aj kyonin kyiʼj erman ex in che pakbʼan tukʼil tzalajbʼil. Jaku japun requisito tuʼn jun qʼa tuʼn tok te siervo ministerial qa qʼiʼn 17 a 19 abʼqʼi tuʼn. Ex jaku tzʼok jun siervo ministerial te jun tbʼanel ansyan aj tjapun twi 20 abʼqʼi.

¹⁶ Atz in che jatz qʼiʼn requisito kye siervo ministerial ex qe ansyan toj Biblia. Ax ikx nim toklen tuʼn tten kykʼujlabʼil tiʼj Jehová, kyiʼj toj kyja ex kyiʼj erman (1 Tim. 3:​1-13; Tito 1:​6-9; 1 Ped. 5:​2, 3). Qʼonka tilil tuʼn tel tnikʼa tiʼj teyle junjun requisito ex naʼna Dios te Jehová tuʼn tjapun tuʼna. c

17. ¿Tzeʼn jaku bʼaj tbʼinchaʼn tten jun kuʼxun tuʼn tok te jun tbʼanel chmilbʼaj ex wibʼaj toj ja? (Ax ikx qʼonka twitza tiʼj foto).

¹⁷ Jaku kubʼ mojeʼya ex jaku tzʼoka te wibʼaj toj ja. Ik tzeʼn kyaj tqʼamaʼn Jesús ateʼ junjun ermano in kubʼ kyximen tuʼn miʼn kykubʼ mojeʼ (Mat. 19:12). Pero qa ma kubʼ mojeʼya, il tiʼj tuʼn t-xi tkʼamoʼna oklenj  te chmilbʼaj ex te wibʼaj toj ja (1 Cor. 11:3). Taj Jehová tuʼn tok tkʼujlaʼn chmilbʼaj t-xuʼjil, tuʼn t-xi tqʼoʼn aju at tajbʼen te, tuʼn tok te jun tbʼanel tamiw ex tuʼn tonin tiʼj tuʼn tten nqayin ttxlaj Jehová (Efes. 5:​28, 29). Qa ma tzʼok tilil tuʼna tuʼn tten tnabʼila, tuʼn t-respetarina kye xuʼj ex tuʼn tok qeʼ kykʼuʼj txqantl tiʼja, kʼonil tiʼja tuʼn toka te jun tbʼanel chmilbʼaj ex wibʼaj toj ja.

18. ¿Tzeʼn jaku bʼaj tbʼinchaʼn tten jun qʼa tuʼn tok te mambʼaj?

¹⁸ Jaku che ten tkʼwala. Qa ma kubʼ mojeʼya, jaku tzʼoka te mambʼaj. Tuʼn toka te jun tbʼanel mambʼaj jaku tzʼonin tiʼja qa ma tzʼel tkanoʼna tiʼj Jehová (Efes. 6:4). Mintiʼ tzaj tchʼixwi Jehová tej t-xi tqʼamaʼn te tkʼwal qa kʼujlaʼn tuʼn ex qa in tzalaj tiʼj (Mar. 1:11). Qa ma tzʼoka te mambʼaj, bʼaʼn tuʼn tnaqʼeta tuʼn t-xi tqʼamaʼna kye tkʼwala qa kʼujlaʼn qe tuʼna ex qa in tzalaja tiʼj tbʼanel aqʼuntl in bʼant kyuʼn. Ax ikx, in nel kykanoʼn mambʼaj tiʼj Jehová aj kyonin kyiʼj kykʼwal tuʼn tok kynabʼil. ¿Tzeʼn jaku bʼaj tbʼinchaʼna ttena jaʼlo tuʼn toka te jun tbʼanel mambʼaj? Jaku bʼant tuʼna qa ma kubʼ tyekʼina tbʼanel tmoda kyiʼj toj tjaya, kyiʼj erman ex qa ma txi tqʼamaʼna kye qa kʼujlaʼn qe tuʼna ex qa in nok tqʼoʼna kyoklen (Juan 15:9). Nya okx kʼonil lu tiʼja qa ma kubʼ mojeʼya ex qa ma che ten tkʼwala, sino ax ikx kʼonil tuʼn tzalaj Jehová tiʼja, qe toj tjaya ex qe erman.

19, 20. ¿Tiʼ il tiʼj tuʼn tbʼant tuʼn jun kuʼxun tuʼn tok tnabʼil? (Qʼonka twitza kyiʼj foto tok tiʼj revista).

¹⁹ Qa tzma kuʼxuna, bʼaʼn tuʼn ttzaj tnaʼna qa il tiʼj tuʼn tok tilil tuʼna tuʼn tok tnabʼila. Tuʼntzunju, jyoma qe tbʼanel techel, qʼonka tilil tuʼn tten tnabʼila, tuʼn tok qeʼ kykʼuʼj txqantl tiʼja, tuʼn tbʼant junjun tiʼ tuʼna ex tuʼn tbʼaj tbʼinchaʼn ttena tiʼj ambʼil tzul.

²⁰ Aj t-ximana tiʼj tkyaqilju kbʼantel tuʼna, bʼalo jaku kubʼ tnaʼna qa mlayx bʼant tuʼna. Pero miʼn tzaj bʼaj tkʼuʼja, taj Jehová tuʼn tonin tiʼja (Is. 41:​10, 13). Ax ikx, bʼaʼn tuʼn ttzaj tnaʼna qa che onil erman tiʼja. Qa ma tzʼoka te jun xinaq ik tzeʼn taj Jehová, ktzalajela toj tanqʼibʼila. Kʼujlaʼna quʼne ex qaje tuʼn kukx ttzaj kʼiwlaʼna tuʼn Jehová tuʼnju in nok tilil tuʼna tuʼn toka te jun okslal ma tzʼok tnabʼil (Prov. 22:4).