1. ¿Tiʼ il tiʼj tuʼn tbʼant kyuʼn tmajen Jehová tuʼn tok kynabʼil?

 IN QO jaw labʼin tiʼj tzeʼn in jaw chʼiy jun kʼwal ex mintiʼ in nok qqʼoʼn qwitz tiʼj aj tbʼaj jlu. Pero tuʼn qchʼiy toj qokslabʼil, il tiʼj tuʼn tbʼant junjun tiʼ quʼn (1 Cor. 13:11; Heb. 6:1). b Tuʼn tok kynabʼil tmajen Jehová, il tiʼj tuʼn tten jun tbʼanel kyamiwbʼil tukʼil. Ax ikx il tiʼj tuʼn ttzaj qkʼamoʼn xewbʼaj xjan tuʼn kyten tbʼanel qmod, tuʼn t-xi qbʼinchaʼn junjun tiʼchaq ex tuʼn tbʼaj qbʼinchaʼn qten tiʼj ambʼil tzul (Prov. 1:5).

2. ¿Tiʼ in tzaj tyekʼin Génesis 1:27 qe ex tiʼ qo yolil tiʼj toj xnaqʼtzbʼil lu?

² Kubʼ tbʼinchaʼn Jehová qe xjal. Kubʼ tbʼinchaʼn xinaq ex xuʼj (kjawil uʼjit Génesis 1:27). Ik tzeʼn in nok qqʼoʼn qwitz tiʼj, junxitl keʼyin jun xinaq ik tzeʼn jun xuʼj, pero ax ikx ateʼ junjun tiʼ junxitl in bʼant kyuʼn. Jun techel, o txi tqʼoʼn Jehová junxitl aqʼuntl te xinaq ex te xuʼj. Tuʼn tjapun kyoklen, il tiʼj tuʼn tten tbʼanel kymod ex il tiʼj tuʼn t-xi kybʼinchaʼn junjun tiʼ (Gén. 2:18). Toj xnaqʼtzbʼil lu, qo yolil tiʼjju jaku bʼant kyuʼn txin ateʼ toj ttnam Jehová tuʼn tok kynabʼil. Atzun toj juntl xnaqʼtzbʼil, qo yolil tiʼjju jaku bʼant kyuʼn qʼa.

3, 4. ¿Jatumel jaku kanet tbʼanel techel kyuʼn txin? (Ax ikx qʼonka twitza kyiʼj tilbʼilal).

³ In yolin Biblia tiʼj tbʼanel techel kyaj kyqʼoʼn junjun xuʼj e ajbʼen te Jehová ex ok kykʼujlaʼn (jaku jaw tuʼjina xnaqʼtzbʼil «¿Tiʼ jaku tzʼel qkanoʼn kyiʼj xuʼj in yolin Biblia kyiʼj?» toj jw.org). Ik tzeʼn in tzaj tqʼamaʼn texto jatumel xjatz xnaqʼtzbʼil,  aʼye xuʼj lu «in kyjakʼun kyibʼ, ex [ . . . ] in japun kyuʼn tuj tkyaqil». Axlo ikx ateʼ ermana toj teya tcongregación, aʼyeju o tzʼok kynabʼil ex jaku tzʼel tkanoʼna kyiʼj.

⁴ Qa txin teya, jaku ximana kyiʼj junjun ermana in kubʼ kyqʼoʼn jun tbʼanel techel ex kanoʼmila kyiʼj. Tuʼn tbʼant jlu tuʼna, qʼonka twitza tiʼj tbʼanel kymod ex ximana tiʼj tzeʼn jaku txi tbʼinchaʼna. Kyoj párrafo che ul, qo yolil kyiʼj oxe mod il tiʼj tuʼn tkubʼ kyyekʼin ermana o tzʼok kynabʼil.

5. ¿Tiquʼn nim toklen tuʼn tkubʼ kyin kyibʼ xuʼj o tzʼok kynabʼil?

⁵ Tbʼanel qa ma kubʼ tin tibʼa. Aju xuʼj in kubʼ tin tibʼ, in tzalaj tiʼj jun tbʼanel tamiwbʼil tukʼil Jehová ex in ten tbʼanel txol kyukʼil txqantl (Sant. 4:6). Jun techel, tuʼnju in kubʼ tin tibʼ ex kʼujlaʼn Jehová tuʼn, in nonin kyiʼj qeju o txi tqʼoʼn Jehová kyoklen tuʼn kykubʼ nej toj congregación ex toj familia (1 Cor. 11:3). c

6. ¿Tzeʼn jaku tzʼel kykanoʼn txin tiʼj Rebeca?

⁶ Qo yolin tiʼj Rebeca. Ten tnabʼil ex mintiʼ tzaj xobʼ tej t-xi tbʼinchaʼn junjun tiʼchaq ex ojtzqintoq tuʼn toj alkye ambʼil ex tzeʼn tuʼn t-xi tbʼinchaʼn (Gén. 24:58; 27:​5-17). Pero ax ikx respetarin ex nimen (Gén. 24:​17, 18, 65). Qa ma tzʼel tkanoʼna tiʼj Rebeca aj tkubʼ tin tibʼa ex aj t-respetarina kye qeju o txi qʼoʼn kyoklen, kbʼel tqʼoʼna jun tbʼanel techel toj tjaya ex toj congregación.

7. ¿Tzeʼn jaku tzʼel kykanoʼn txin tiʼj Ester?

⁷ Tbʼanel qa ma tzʼoka te mans. In tzaj tqʼamaʼn Tyol Dios jlu: «Kyukʼil qe xjal mans, atzun taʼ nabʼl» (Prov. 11:2). Ten Ester tzʼaqli twitz Dios ex kubʼ tyekʼin mod lu. Jun techel, mintiʼ jaw tnimsan tibʼ tej t-xi qʼoʼn toklen te reina. Ax ikx xi tbʼiʼn qe consej xi tqʼoʼn Mardoqueo te, aju tprimo (Est. 2:​10, 20, 22). Ax ikx teya, jaku tzʼel tkanoʼna tiʼj aj t-xi tqanina consej ex aj t-xi tbʼiʼna (Tito 2:​3-5).

8. Aj tkubʼ kyximen ermana tzeʼn kbʼajel kybʼinchaʼn kyten ex alkye kyxbʼalun kʼokel, ¿tzeʼn jaku tzʼonin consej kyiʼj aju tkuʼx toj 1 Timoteo 2:9 ex 10?

 ⁸ Qo xnaqʼtzan tiʼj juntl tumel tzeʼn kubʼ tyekʼin Ester qa mans. «Tbʼanelxix keʼyin», pero mintiʼ ok tilil tuʼn tuʼn tok bʼaj kywitz txqantl tiʼj (Est. 2:​7, 15). ¿Tzeʼn jaku tzʼel tkanoʼna tiʼj techel kubʼ tqʼoʼn? In tzaj qʼamaʼn jun tumel toj 1 Timoteo 2:9 ex 10 (uʼjinktza). Toj texto lu xi tqʼamaʼn Pablo kye ermana tuʼn tbʼaj kyxbʼalumin kyibʼ toj tumel. Aqeju yol griego ajbʼen tuʼn Pablo tzalu, in tzaj kyyekʼin qa il tiʼj tuʼn tbʼaj kyxbʼalumin kyibʼ ermana toj tumel ex il tiʼj tuʼn tok kyqʼoʼn toklen aju in kubʼ kynaʼn txqantl. In kubʼ qnaʼn nim tzalajbʼil tuʼnju in kubʼ kyyekʼin ermana qa o tzʼok kynabʼil aj tbʼaj kyxbʼalumin kyibʼ toj tumel.

9. ¿Tiʼ xnaqʼtzbʼil jaku tzʼel qiʼn tiʼj Abigaíl?

⁹ Tbʼanel qa ma ten tnabʼila. ¿Tiʼ t-xilen jlu? Atz in yolin tiʼjju tuʼn tel qnikʼ tiʼj alkye bʼaʼn ex alkye nya bʼaʼn ex yajxitl tuʼn t-xi qbʼinchaʼn aju bʼaʼn. Qo xnaqʼtzan tiʼj Abigaíl. Nya toj tumel xi tbʼinchaʼn tchmil jun tiʼ ex el tnikʼ tiʼj qa tuʼn jlu jaku tzaj tiʼn nya bʼaʼn kyiʼj toj tja. Tuʼntzunju, jun rat xi tbʼinchaʼn jun tiʼ ex tuʼnju ten tnabʼil e klet nim xjal (1 Sam. 25:​14-23, 32-35). Ax ikx jaku tzʼonin qnabʼil qiʼj tuʼn tel qnikʼ tiʼj toj alkye ambʼil jaku qo yolin ex toj alkye ambʼil mintiʼ tuʼn tbʼant quʼn. Nya oʼkxju, ax ik in nonin qiʼj tuʼn qximin kyiʼj txqantl, pero mintiʼ tuʼn tkubʼ kynaʼn nya bʼaʼn quʼn (1 Tes. 4:11).

10, 11. ¿Tzeʼn kʼonil tiʼja qa ma bʼant-xix tuʼjina ex ttzʼibʼina? (Ax ikx qʼonka twitza tiʼj foto).

¹⁰ Tbʼanel qa ma kubʼ kybʼinchaʼn ermana junjun tiʼchaq. ¿Tiquʼn? Tuʼnju qa ma bʼant kyuʼn akux tal txin qeʼ, kʼonil kyiʼj toj tkyaqil kyanqʼibʼil. Qo xnaqʼtzan kyiʼj junjun techel.

¹¹ Tbʼanel tuʼn tbʼant tuʼjina ex ttzʼibʼina. Kyoj junjun tnam, nya nim toklen tuʼn tbʼant kyuʼjin xuʼj ex tuʼn tbʼant kytzʼibʼin. Pero nim toklen jlu kye tmajen Jehová (1 Tim. 4:13). d Tuʼntzunju, miʼn txi tqʼoʼna ambʼil te alkyexku tiʼ tuʼn tel tiʼn ambʼil teya tuʼn tbʼant tuʼjina ex ttzʼibʼina. ¿Tzeʼn jaku tzʼonin jlu tiʼja? Jaku tzʼonin tuʼn tkanet jun taqʼuna ex tuʼn tten aju at tajbʼen teya. Ax ikx, jaku tzʼonin tiʼja tuʼn tbʼant-xix t-xnaqʼtzana ex tuʼn t-xi tqʼoʼna xnaqʼtzbʼil kye txqantl tiʼj Tyol Dios. Pero aju mas tbʼanel, kʼonil tiʼja tuʼn tjaw tuʼjina Biblia ex tuʼn t-ximana tiʼj. Tuʼn jlu, kchʼiyil tamiwbʼila tukʼil Jehová (Jos. 1:8; 1 Tim. 4:15).

12. ¿Tiʼ in tzaj tyekʼin Proverbios 31:26 teya?

 ¹² Tbʼanel tuʼn tbʼant-xix tyolina kyukʼil txqantl. Nim toklen tuʼn tbʼant jlu kyuʼn kykyaqil okslal. Tzaj tqʼamaʼn Santiago jun nabʼil at toklen tukʼil jlu tej tqʼama: «Bʼaʼn tuʼn t-xi kybʼiʼn naje ju yol, ex mya jurat naj tuʼn kyyoline» (Sant. 1:19). Qa ma tzʼok tqʼoʼnxix twiʼya kyiʼj txqantl, kbʼel tyekʼina qa in ximana kyiʼj (1 Ped. 3:8). Pero qa mintiʼ in nel tnikʼa tiʼjju in tzaj kyqʼamaʼn moqa aju in kubʼ kynaʼn, bʼaʼn tuʼn t-xi tqanina junjun xjel toj tumil kye. Yajxitl, jaku ximana tiʼjju kxel tqʼamaʼna (Prov. 15:28) Xjelinkuya: «¿Axpe tok aju kxel nqʼamaʼne? ¿Kxel nqʼuqbʼaʼne tkʼuʼj? ¿Kʼokel nqʼoʼne toklen? ¿Kbʼelpe nyekʼine tbʼanel nmode tukʼil?». Ximana kyiʼj ermana in bʼant-xix kyyolin kyukʼil txqantl ex kanoʼmila kyiʼj (kjawil uʼjit Proverbios 31:26). Qʼonka twiʼya tiʼjju in che yolin tiʼj ex tzeʼn in xi kyqʼamaʼn, qa ma bʼant jlu tuʼna mas fácil kʼelel teya tuʼn toka te kyamiw txqantl ex tuʼn tten mujbʼabʼil kyxole.

13. ¿Alkyeqe jaku chex xnaqʼtzante teya tuʼn tbʼant aqʼuntl toj ja tuʼna? (Ax ikx qʼonka twitza tiʼj foto).

¹³ Tbʼanel tuʼn t-xi tbʼinchana qe aqʼuntl toj ja. Kyoj nimku lugar, aʼye xuʼj in chex bʼinchante chʼixmi tkyaqil aqʼuntl atz ja. Bʼalo jaku txi xnaqʼtzaʼna tuʼn ttxuʼya moqa tuʼn jun ermana o tzʼok tnabʼil tzeʼn tuʼn t-xi tbʼinchaʼna qe aqʼuntl lu. Tqʼama jun ermana Cindy tbʼi: «Jun oyaj tej ttzaj t-xnaqʼtzaʼn ntxuʼye weye qa jaku kubʼ qnaʼn tzalajbʼil qa ma tzʼok tilil quʼn tuʼn qaqʼunan. Tuʼnju tzaj tyekʼin weye tuʼn tbʼant ncocinarine, nlimpiarine, nslepine ex tuʼn tajbʼen pwaq wuʼne toj tumel, onin wiʼje tuʼn tok nxqʼuqin wibʼe ex tuʼn wajbʼene mas te Jehová. Ax ikx tzaj tyekʼin ntxuʼye tuʼn t-xi nqʼoʼne chʼin kye txqantl ex tuʼn jlu, ok wojtzqiʼne mas erman kubʼ kyqʼoʼn jun tbʼanel techel nwitze» (Prov. 31:​15, 21, 22). Jun kʼiwlabʼil qe ermana te kyfamilia ex te congregación qa tbʼanel che aqʼunan, qa bʼaʼn che bʼinchan xtalbʼil ex qa in nok kyxqʼuqin qe toj kyja (Prov. 31:​13, 17, 27; Hech. 16:15).

14. ¿Tiʼ xnaqʼtzbʼil jaku tzʼel tiʼna tiʼjju tqʼama Crystal ex alqiʼj kʼokel tqʼoʼna twiʼya?

¹⁴ Tbʼanel tuʼn tkambʼana tpwaqa. Nim toklen tuʼn t-xi kybʼinchaʼn okslal at kynabʼil qe tiʼchaq kyuʼnx ex tuʼn kytzalaj tiʼjju at kye (Filip. 4:11). Tqʼama jun ermana Crystal tbʼi jlu: «Tej txin qine ex tej nxnaqʼtzane, tzaj tqʼamaʼn nmane weye tuʼn tjaw njyone jun aqʼuntl jaku tzʼonin wiʼje. Jun techel, tzaj tqʼamaʼn weye tuʼn nxnaqʼtzane tiʼj contabilidad ex nim onin wiʼje». Nya oʼkx il tiʼj tuʼn tten jun taqʼuna, sino nim toklen tuʼn tkubʼ tbʼinchaʼna jun presupuesto ex tuʼn tok lepeʼya tiʼj (Prov. 31:​16, 18). Qa mintiʼ ma tzʼokx tqʼon tibʼa tjaqʼ kʼas ex qa ma tzalaja tiʼj chʼin at teya, jaku tzʼok tqʼoʼn twiʼya tiʼj tajbʼebʼila te Jehová (1 Tim. 6:8).

15, 16. ¿Tiquʼn nim kyoklen ermana kyoj congregación?

¹⁵ Qa ma tzʼok tilil tuʼna tuʼn kyten tmoda in tzalaj Jehová tiʼj ex qa ma txi tbʼinchaʼna junjun tiʼchaq, kʼonil tiʼja tuʼn tbʼaj tbʼinchaʼna ttena tiʼj ambʼil tzul. Qo xnaqʼtzan kyiʼj junjun tiʼchaq jaku bʼant tuʼna.

¹⁶ Jaku tena tjunalxa toj jun ambʼil. Ik tzeʼn tqʼama Jesús, ateʼ junjun mintiʼ in che kubʼ mojeʼ maske in xi qʼamaʼn kye kyuʼn xjal tuʼn tbʼant kyuʼn (Mat. 19:​10-12). Atzun junjuntl, mintiʼ in che kubʼ mojeʼ tuʼn junjuntl tiquʼn. Qa naʼmx tkubʼ mojeʼya, jaku tzʼok qeʼ tkʼuʼja tiʼj qa nya tuʼn jlu mintiʼ nok tqʼoʼn Jehová ex Jesús toklena. Twitz tkyaqil Txʼotxʼ in bʼant jun tbʼanel aqʼuntl kyuʼn ermana kyoj congregación. In che ok ermana lu te kyerman ex te kytxuʼ txqantl tuʼnju in kubʼ kyyekʼin kykʼujlabʼil ex in che ximen kyiʼj (kjawil uʼjit Marcos 10:​29, 30; 1 Tim. 5:2).

17. ¿Tiʼ jaku bʼant kyuʼn ermana tuʼn kyajbʼen toj tkyaqil ambʼil?

¹⁷ Jaku tzʼajbʼena te Jehová toj tkyaqil ambʼil. Chʼixmi aʼye ermana in chex bʼinchante tkyaqil aqʼuntl tiʼj pakbʼabʼil twitz tkyaqil Txʼotxʼ (Sal. 68:11). ¿Jakupe kubʼ t-ximana tuʼn tajbʼena toj tkyaqil ambʼil? Bʼalo jaku tzʼoka te precursora, jaku tzʼonina toj construcción moqa betelita. ¿Tiʼ kʼonil tiʼja tuʼn tbʼant jlu tuʼna? Jaku naʼna Dios, jaku yolina kyukʼil erman in che ajbʼen toj tkyaqil ambʼil ex ojtzqinka alkyeqe requisito. Yajxitl, jaku kubʼ ttzʼibʼina tiʼ jaku bʼant tuʼna tuʼn tjapun twi t-xima. Qa ma tzʼajbʼena toj tkyaqil ambʼil, jaku txi tbʼinchaʼna mas tiʼchaq toj tajbʼebʼila te Jehová.

18. ¿Tiquʼn nim toklen tuʼn t-ximen jun ermana tiʼj alqukʼil kbʼel mojeʼ? (Ax ikx qʼonka twitza tiʼj foto).

¹⁸ Jaku kubʼ t-ximana tuʼn tkubʼ mojeʼya. Ik tzeʼn ma tzʼel qnikʼ tiʼj, aʼyeju mod ex qe tiʼchaq jaku bʼant tuʼna toj ambʼil jaʼlo che onil tiʼja tuʼn toka te jun tbʼanel xuʼjilbʼaj. Pero nim toklen tuʼn tel tnikʼa tiʼj alqukʼil kbʼel mojeʼya. Atzun jun tiʼ mas nim toklen tuʼn t-ximana tiʼj toj tanqʼibʼila. ¿Tiquʼn? Tuʼnju aju xinaq kbʼel mojeʼya tukʼil, atzun kbʼel nej twitza (Rom. 7:2; Efes. 5:​22, 33). Tuʼntzunju, bʼaʼn tuʼn tkubʼ t-xjelina jlu: «¿In nokpe tilil tuʼn tuʼn tten t-ximbʼetz ex tmod ik tzeʼn te Jesús?  ¿In nokpe tqʼoʼn toklen tajbʼebʼil te Jehová? ¿In jawpe tjyoʼn aju mas tbʼanel? ¿In nel tnikʼ tiʼj qa at maj in nel txalpaj? ¿In respetarin kye xuʼj? ¿Jakupe tzʼonin wiʼje tuʼn tten wamiwbʼile kyuw tukʼil Jehová? ¿Jakupe tzaj tqʼoʼn aju at tajbʼen weʼye? ¿Jakupe tzʼok te jun tbʼanel wamiwe? ¿In xi tbʼinchaʼn qe toklen toj tumel? Jun techel, ¿tiʼ toklen o txi qʼoʼn toj congregación ex tzeʼn in che japun tuʼn?» (Luc. 16:10; 1 Tim. 5:8). Qa taja tuʼn tten jun tbʼanel tchmila, tzʼok tilil tuʼna tuʼn toka te jun tbʼanel xuʼjilbʼaj.

19. ¿Tiquʼn in xi qqʼamaʼn qa jun oklenj te xuʼj tuʼnju in nok te onil tiʼj tchmil?

¹⁹ In tzaj tqʼamaʼn Tyol Dios qa in nok jun tbʼanel xuʼjilbʼaj «te onil te» tchmil (Gén. 2:18). ¿Tuʼnpe jlu mintiʼ in nok qʼoʼn toklen xuʼj? Miʼn, sino jun tbʼanel oklenj te. Axpe ikx in tzaj qʼamaʼn toj Biblia qa at maj in nok Jehová ik tzeʼn jun «onil» (Éx. 18:4; Heb. 13:6). In nonin jun tbʼanel xuʼjilbʼaj tiʼj tchmil ex in xi tqʼamaʼn te alkyeju mas tbʼanel jaku jaw tjyoʼn tuʼntzun kytzalaj qe toj kyja. Ax ikx, tuʼnju kʼujlaʼn Jehová tuʼn, in nok tilil tuʼn tuʼn kyyolin txqantl bʼaʼn tiʼj tchmil (Prov. 31:​11, 12; 1 Tim. 3:11). Qa in ximana tuʼn tkubʼ mojeʼya, jaku tzʼok tilil tuʼna tuʼn tchʼiy tkʼujlabʼila tiʼj Jehová, tuʼn toka te jun tbʼanel «onil» toj tjaya ex toj congregación.

20. ¿Tzeʼn jaku tzʼonin jun tbʼanel txubʼaj kyiʼj toj tja?

²⁰ Jaku che ul itzʼj tala. Qa ma kubʼ mojeʼya, jaku tzʼoka te txubʼaj. Atzun te tchmila, jaku tzʼok te mambʼaj (Sal. 127:3). Tuʼntzunju, bʼaʼn tuʼn t-ximana tiʼj tiʼ il tiʼj tuʼn tbʼant tuʼna tuʼn toka te jun tbʼanel txubʼaj. Ik tzeʼn ma qo yolin tiʼj toj xnaqʼtzbʼil lu, aʼyeju mod ex qe tiʼchaq jaku bʼant tuʼna toj ambʼil jaʼlo nim jaku che onin tiʼja. Qa ma kubʼ tyekʼina tkʼujlabʼila, tbʼanel tmoda ex tpasensa, kʼonila kyiʼj qe toj tjaya tuʼn kytzalaj ex kbʼel kynaʼn tala qa xqʼuqin ateʼ ex qa kʼujlan qeʼ (Prov. 24:3).

21. ¿Jniʼ kyoklen ermana toj twitza ex tiquʼn? (Qʼonka twitza kyiʼj foto tok tiʼj revista).

²¹ Aqeye ermana, kʼujlan qeye quʼne tuʼnju in che onine tiʼj Jehová ex tiʼj ttnam (Heb. 6:10). In nok tilil kyuʼne tuʼn tten tbʼanel kymode, tuʼn tbʼant junjun tiʼchaq kyuʼne aju jaku tzʼonin kyiʼje ex kyiʼj txqantl ex in bʼaj kybʼinchaʼne kytene tiʼj ambʼil tzul. Nim toklen teyele junjun kyeye toj ttnam Jehová.