1, 2. ¿Alkyeqe nya bʼaʼn jaku qo jaw oqʼ kyuʼn?

 ¿ALKYE jun naʼmx toqʼ jun maj? Qkyaqilx o qo oqʼ. Jaku qo jaw oqʼ tuʼn tzalajbʼil aj tikʼ junjun tbʼanel tiʼchaq toj qanqʼibʼil, ik tzeʼn aj tul itzʼj jun qkʼwal. Atlo maj jaku qo jaw oqʼ aj ttzaj qnaʼn junjun tbʼanel tiʼchaq o che ikʼ toj qanqʼibʼil moqa aj tok qkeʼyin juntl maj jun tbʼanel qamiw aju ma tzikʼ ambʼil naʼmx qyolin tukʼil.

² Pero chʼixmi tkyaqil maj in qo oqʼ tuʼnju at jun bʼis toj qanmi. At maj tuʼnju at jun o tzʼok tbʼinchaʼn nya bʼaʼn qiʼj, tuʼnju at jun yabʼil qiʼj moqa tuʼnju o kyim jun xjal kʼujlaʼn quʼn. Kyoj ambʼil lu jaku kubʼ qnaʼn ik tzeʼn kubʼ tnaʼn profeta Jeremías tej tkubʼ kyxiten xjal te Babilonia tnam Jerusalén. Tqʼama profeta jlu: «Nimxix taʼl nwitze nneʼl tuʼn oqʼel [ . . . ]. In chin oqʼe, mintiʼ ojlabʼl kye tbʼaqʼ nwitze, mintiʼx tuʼn kyqʼajen» (Lam. 3:​48, 49).

3. ¿Tiʼ in kubʼ tnaʼn Jehová aj tok tqʼoʼn twitz kyiʼj tmajen in tzaj nya bʼaʼn kyiʼj? (Isaías 63:9).

³ Ojtzqiʼn tuʼn Jehová jniʼ taʼl qwitz o tzʼel tuʼn bʼis toj tkyaqil qanqʼibʼil. In tzaj tqʼamaʼn Biblia qa ojtzqiʼn tuʼn tkyaqil maj  aj qok weʼ twitz jun nya bʼaʼn ex in nonin qiʼj aj t-xi qqanin onbʼil te (Sal. 34:15). Pero nya oʼkx in nok tqʼoʼn twitz tiʼjju in bʼaj qiʼj ex in qo tzaj tbʼiʼn, sino in bʼant juntl tiʼ tuʼn. A Jehová Qman, kʼujlaʼnxix qoʼ tuʼn ex in tzaj nim tbʼis aj tok tqʼoʼn twitz kyiʼj tkʼwal in che oqʼ, tuʼntzunju, jurat in tzaj tqʼoʼn onbʼil qe (kjawil uʼjit Isaías 63:9).

4. ¿Alkyeqe techel toj Tyol Dios qo xnaqʼtzal tiʼj ex tiʼ in bʼant tuʼn Jehová?

⁴ In tzaj tqʼamaʼn Jehová toj Tyol tiʼ kubʼ tnaʼn tej tok tqʼoʼn twitz kyiʼj tmajen in che oqʼ ex tiʼ bʼant tuʼn tuʼn tonin kyiʼj. Qo ximen tiʼjju bʼaj tiʼj Ana, tiʼj David ex tiʼj rey Ezequías. ¿Tiquʼn e oqʼ? ¿Tiʼ bʼant tuʼn Jehová tuʼn tonin kyiʼj? Aju techel kyaj kyqʼoʼn jaku tzʼonin qiʼj aj ttzaj qbʼis, aj tok bʼinchaʼn jun nya bʼaʼn qiʼj moqa aj ttzaj bʼaj qkʼuʼj ex in qo oqʼ tuʼn.

AJ QOQʼ TUʼN BʼIS

5. ¿Tiʼ kubʼ tnaʼn Ana?

⁵ Tzaj nim nya bʼaʼn tiʼj Ana ex nim oqʼ tuʼn bʼis kubʼ tnaʼn. Attoq juntl t-xuʼjil tchmil, aju Peniná tbʼi. El ikʼun twitz Ana tuʼn Peniná ex ok tbʼinchaʼn nim nya bʼaʼn tiʼj. Nya oʼkxju, ax ikx mintiʼtoq in che ul itzʼj tal Ana, atzunte Peniná otoq che ul itzʼj nim tal (1 Sam. 1:​1, 2). Tuʼntzunju kukx xmayin Peniná tiʼj Ana. ¿Tiʼ jaku kubʼ tnaʼna noqwit tiʼja ok bʼinchaʼn jlu? Tzaj «nim taʼw tuj tanmi» Ana ex «tuʼntzun jlu nnoʼk ten [ . . . ] oqʼel ex mintiʼ in waʼn» (1 Sam. 1:​6, 7, 10).

6. ¿Tiʼ bʼant tuʼn Ana tuʼn tkubʼ tnaʼn bʼaʼn?

⁶ ¿Tiʼ bʼant tuʼn Ana tuʼn tkubʼ tnaʼn bʼaʼn? Tnejel, xiʼ kʼulil te Jehová toj ja xbʼalun. Tejlo tpon nqayin ttzi tja Dios, «ok ten naʼl Dios» ex «in oqʼtoq tuʼnju at nim taʼw tuj tanmi». Ok ten kubʼsal twitz Dios ex xi tqʼamaʼn te tuʼn ttzaj tnaʼn tej tqʼama jlu: «Qa ma tzaj tkeʼyina aju yajbʼil weye» (1 Sam. 1:10b, 11). Xi tqʼamaʼn Ana te Jehová tkyaqilju in kubʼtoq tnaʼn. Kʼujlaʼnxixtoq Ana tuʼn Jehová, tuʼntzunju, noqpe ximana tiʼj jniʼ bʼis kubʼ tnaʼn tej tok tqʼoʼn twitz tiʼj Ana in noqʼ.

7. ¿Tiʼ kubʼ tnaʼn Ana tej otoqxi txi tqʼamaʼn tkyaqilju tkuʼx toj tanmi te Jehová?

⁷ ¿Tiʼ kubʼ tnaʼn Ana tej t-xi tqʼamaʼn te Jehová tkyaqilju tkuʼx toj tanmi ex tej tok tbʼiʼn tbʼanel tyol Elí aju tnejel pal? In tzaj tqʼamaʼn txʼolbʼabʼil jlu: «Ajtzun meltzʼaj Ana jatum otoq tzaj nej, ex ok ten waʼl ex mintiʼtl o bʼisun» (1 Sam. 1:​17, 18). Maske kukxtoq in tzaj nya bʼaʼn tiʼj Ana, kubʼ tnaʼn bʼaʼn tuʼnju kyaj tqʼoʼn tkyaqil toj tqʼabʼ Jehová. Ok tqʼoʼn twitz tiʼj Ana tej ttzaj bʼaj tkʼuʼj, tzaj tbʼiʼn tnaʼj Dios ex tzaj tkʼiwlaʼn tej ttzaj tqʼoʼn ambʼil te tuʼn kyul itzʼj tal (1 Sam. 1:​19, 20; 2:21).

8, 9. Ik tzeʼn in tzaj qʼamaʼn toj Hebreos 10:24 ex 25, ¿tiquʼn il tiʼj tuʼn tok tilil quʼn tuʼn qxiʼ kyoj chmabʼil? (Ax ikx qʼonka twitza tiʼj tilbʼilal).

⁸ ¿Tiʼ xnaqʼtzbʼil jaku tzʼel qiʼn tiʼj? ¿Atpe jun  nya bʼaʼn in nok weʼya twitz ex in noqʼa tuʼn? Bʼalo in bʼisuna tuʼnju o kyim jun toj tjaya moqa jun tamiwa. Qa ikju, nyalo taja tuʼn ttena kyukʼil txqantl. Pero bʼaʼn tuʼn ttzaj tnaʼna aju bʼant tuʼn Ana. Xiʼ toj ja xbʼalun ex atzun tzaj qʼuqbʼaʼn tkʼuʼj tuʼn Jehová. Ax ikx teya jaku tzaj qʼuqbʼaʼn tkʼuʼja tuʼn qa ma txiʼya kyoj chmabʼil maske in kubʼ tnaʼna bʼis ex mintiʼ tipumala (kjawil uʼjit Hebreos 10:​24, 25). Atz kyoj chmabʼil in tzaj qʼuqbʼan qkʼuʼj kyuʼn junjun versículo in che jatz toj Tyol Dios. Iktzun tten in nonin Jehová qiʼj tuʼn ya miʼn qximen tiʼj nya bʼaʼn in tzaj tiʼn nim bʼis qiʼj. Tuʼn jlu kbʼel qnaʼn bʼaʼn maske kukx in qo ok weʼ twitz nya bʼaʼn.

⁹ In tzaj kyqʼuqbʼaʼn erman qkʼuʼj kyoj qe chmabʼil, in tzaj kyyekʼin qa nim kʼujlaʼn qo kyuʼn ex in kubʼ qnaʼn bʼaʼn tuʼn jlu (1 Tes. 5:​11, 14). Qbʼinx tiʼ tqʼama jun precursor especial tej tkyim t-xuʼjil: «Atxix tej tkyim kukx in chin oqʼe tiʼj. At maj waje tuʼn ntene njunalxe tuʼntzun wok tene oqʼil. Pero in che onin chmabʼil wiʼje tuʼn kukx tikʼx wuʼne. In chewix wanmiye tuʼn tbʼanel kyyol erman in xi kyqʼoʼn kyoj chmabʼil ex aj ttzaj kyqʼamaʼn tbʼanel yol weye. At maj in kubʼ nnaʼne nim bʼis aj npone kyoj chmabʼil, pero yajxitl, in kubʼ nnaʼne bʼaʼn». Aj qpon kyoj chmabʼil, jaku che ajbʼen erman tuʼn Jehová tuʼn tonin qiʼj.

10. ¿Tzeʼn jaku tzʼel qkanoʼn tiʼj Ana aj qikʼ toj ambʼil te nimxix bʼis?

¹⁰ Kubʼ tnaʼn Ana bʼaʼn tej t-xi tqʼamaʼn tkyaqil te Jehová. Ax ikx teya jaku txi tbʼinchaʼna aju in tzaj tqʼamaʼn 1 Pedro 5:7 tuʼn tkyaj tqʼoʼna tkyaqilju in bʼaj tkʼuʼja tiʼj toj tqʼabʼ Jehová ex qeʼk tkʼuʼja tiʼj qa tzul bʼiʼna tuʼn. In tzaj tchikʼbʼaʼn jun ermana tiʼ kubʼ tnaʼn tej tkubʼ bʼyoʼn tchmil kyuʼn junjun eleqʼ: «Kubʼ nnaʼne nimxix bʼis ex kubʼ nximane qa mlayx chin tzalaje juntl maj», chi ermana. ¿Tiʼ onin tiʼj? Tqʼamatl jlu: «Xi nqʼamaʼne aju in bʼaj wiʼje te Nmane at toj kyaʼj, aju kʼujlaʼn qine tuʼn, ex kubʼ nnaʼne qa tzaj tqʼuqbʼaʼn nkʼuʼje tkyaqil maj tej nnaʼne Dios te. At maj mintiʼtoq in bʼant tuʼn t-xi nchikʼbʼaʼne te aju in kubʼ nnaʼne, pero in neltoq tnikʼ wiʼje. Tej in tzajtoq nim nbʼise ex tej in tzaj bʼajxixtoq nkʼuʼje, xi nqanine te Jehová tuʼn tkubʼ nnaʼne bʼaʼn. Jurat-toq in kubʼ nnaʼne bʼaʼn toj wanmiye ex toj nximbʼetze ex in tentoq wipumale tuʼn kukx tikʼx wuʼne». Ax ikx teya, aj t-xi tqʼamaʼna te Jehová aju in bʼaj tiʼja, kʼelelxix tnikʼ tiʼjju in kubʼ tnaʼna. Maske mintiʼ sel aju in nikʼ tiʼja, jaku chewix tanmiya tuʼn Jehová (Sal. 94:19; Filip. 4:​6, 7). Ax ikx qa kukx ma tzikʼx tuʼna, ktzajel kʼiwlaʼna tuʼn (Heb. 11:6).

AJ QOQʼ TUNJU IN NOK BʼINCHAʼN JUN NYA BʼAʼN QIʼJ

11. ¿Tiʼ kubʼ tnaʼn David tej tok bʼinchaʼn nya bʼaʼn tiʼj kyuʼn txqantl?

¹¹ Toj tkyaqil tanqʼibʼil David, ok weʼ twitz junjun ambʼil kwest aju etz taʼl twitz tuʼn. El ikʼun kyuʼn nimku xjal, axpe ikx ateʼ junjun tfamiliar ex junjun tamiw kyajtoq tuʼn tok kybʼinchaʼn nya bʼaʼn tiʼj (1 Sam. 19:​10, 11; 2 Sam. 15:​10-14, 30). Kubʼ ttzʼibʼin jlu: «Ma chin sikte tuʼn oqʼel. Tkyaqil qonikʼan in chin oqʼe nim, ma tzʼakʼ nqʼaxwiʼye tuʼn taʼl nwitze». ¿Tiquʼn in kubʼtoq tnaʼn jlu? Tqʼama jlu: «Tuʼn kylaj qe aj qʼoj wiʼje» (Sal. 6:​6, 7). Nimxix nya bʼaʼn ok kybʼinchaʼn txqantl tiʼj David ex tuʼn jlu nimxix oqʼ ex nimxix taʼl twitz etz.

12. Ik tzeʼn in tzaj tqʼamaʼn Salmo 56:​8, ¿tiʼ qʼuqlitoq tkʼuʼj David tiʼj?

¹² Qʼuqlitoq tkʼuʼj David tiʼj qa kʼujlaʼntoq tuʼn Jehová maske attoq nya bʼaʼn in nok weʼ twitz. Kubʼ ttzʼibʼin jlu: «Ma tbʼi Qman tqʼajqʼajel nwiʼye in chin oqʼe» (Sal. 6:8). Toj juntl ambʼil e kubʼ ttzʼibʼin qe tbʼanel yol in che kanet  quʼn toj Salmo 56:8 (kjawil uʼjit). In tzaj kyyekʼin yol lu jniʼ kʼujlaʼn qo tuʼn Jehová ex qa in nok tqʼoʼn toklen aju in kubʼ qnaʼn. Tqʼama David qa jaw tiʼn Jehová teyele junjun txut taʼl twitz ex ok ik tzeʼn kux ttzʼibʼin toj tuʼj. Qʼuqlitoq tkʼuʼj David tiʼj qa ok tqʼoʼn Jehová twitz tiʼj tbʼis, pero nya oʼkx ok tqʼoʼn twitz tiʼj, sino ax ikx el tnikʼ tiʼj tiʼ kubʼ tnaʼn kyuʼn nya bʼaʼn.

13. ¿Tiʼ jaku tzʼonin tiʼja qa at jun ma tzʼok tbʼinchaʼn nya bʼaʼn tiʼja moqa in tzaj tbʼisa tuʼn? (Ax ikx qʼonka twitza tiʼj tilbʼilal).

¹³ ¿Tiʼ xnaqʼtzbʼil jaku tzʼel qiʼn tiʼj? ¿Ope tzaj tbʼisa tuʼn jun xjal kʼujlaʼn tuʼna? ¿Ope kubʼ naj tmejebʼleʼna moqa ya mintiʼ xkubʼ mojeʼya tukʼil xjal in yolintoq tukʼila? Qa at jun xjal kʼujlan tuʼna ex ya mintiʼ in najbʼen te Jehová, ¿in tzajpe tbʼisa tuʼn? Qo yolin tiʼjju kubʼ tnaʼn jun ermano tej tkyaj tzaqpiʼn tuʼn t-xuʼjil tuʼnju xi tjyoʼn juntl tchmil. Tqʼama ermano jlu: «Mintiʼtoq in xi nnimane aju in bʼajtoq wiʼje. Tzaj nimxix nqʼoje, nimxix nbʼise ex in kubʼtoq nnaʼne qa mintiʼx wajbʼene». ¿Tiʼ jaku tzʼonin tiʼja qa at jun ma tzʼok tbʼinchaʼn nya bʼaʼn tiʼja moqa in tzaj tbʼisa tuʼn? Bʼaʼn tuʼn ttzaj tnaʼna qa mlayx kyaj tzaqpiʼna tuʼn Jehová. Tzaj tqʼamaʼn erman jlu: «El nnikʼe tiʼj qa jaku tzaj qbʼis kyuʼn xjal, pero atzunte Jehová mlayx. In nok ik tzeʼn jun pik, kukx ktel qukʼil noq tiʼxku ma tzaj qiʼj. Mlayx che kyaj tkolin qeju in che ten tzʼaqli twitz» (Sal. 37:28). Bʼaʼn tuʼn ttzaj tnaʼna qa mix aʼl juntl xjal jaku pon tkʼujlabʼil tiʼja ik tzeʼn te Jehová. Bʼalo o tzʼok bʼinchaʼn nim nya bʼaʼn tiʼja, pero mintiʼ in chʼexpaj tkʼujlabʼil Jehová tiʼja ex nimxix toklena toj twitz (Rom. 8:​38, 39). Jakulo tzʼok bʼinchaʼn nya bʼaʼn tiʼja tuʼn jun xjal, pero bʼaʼn tuʼn ttzaj tnaʼna qa kukx kʼokel kʼujlaʼna tuʼn Jehová.

14. ¿Tiʼ in tzaj ttziyen Salmo 34:18 qe?

¹⁴ Qa ax ikx teya o tzʼok bʼinchaʼn jun nya bʼaʼn tiʼja, jaku tzaj qʼuqbʼaʼn tkʼuʼja kyuʼn yol kubʼ ttzʼibʼin David toj Salmo 34:18 (kjawil uʼjit). In tzaj tqʼamaʼn jun libro qa aju txol yol «mintiʼtl jatum tuʼn tok qeʼ kykʼuʼj», ax ikx jaku txi qʼamet ik tzeʼn «aqeju mintiʼ jun bʼaʼn in che ayon tiʼj». ¿Tzeʼn in nonin Jehová kyiʼj qeju in kubʼ kynaʼn jlu? Ax texto lu in tzaj qʼamante qa «niqayin taʼ Qman» Jehová kytxlaj qeju in che bʼisun tuʼnju olo tzʼok bʼinchaʼn jun nya bʼaʼn kyiʼj moqa tuʼnju o che kyaj kolin. In nok ik tzeʼn jun mambʼaj in jaw tchleʼn tkʼwal ex in xi tqʼuqbʼaʼn tkʼuʼj aj tok tqʼoʼn twitz tiʼj qa in noqʼ. In tnaʼn aju bʼis in kubʼ qnaʼn ex jurat in tzaj onil qe tuʼnju taj tuʼn tchewix qanmi ex tuʼn miʼn qbʼisun. Ax ikx in  tzaj ttziyen jun qʼuqbʼil qkʼuʼj toj ambʼil tzul tuʼntzun tonin qiʼj tuʼn kyikʼx nya bʼaʼn quʼn jaʼlo (Is. 65:17).

AJ QOQʼ TUʼNJU IN TZAJ BʼAJ QKʼUʼJ

15. ¿Tiʼ ok weʼ rey Ezequías twitz aju kukx oqʼ tuʼn?

¹⁵ Ok Ezequías te rey te Judá ex tej tjapun twi 39 abʼqʼi, tzaj jun yabʼil kyuw tiʼj. Ex ajbʼen profeta Isaías tuʼn Jehová tuʼn t-xi tqʼamaʼn te qa oktoq kkyimel tuʼn yabʼil (2 Rey. 20:1). Kubʼ t-ximen Ezequías qa kkyimel. Ok ten oqʼel nim wen ex ok ten kubʼsal twitz Jehová ex xi tqanin te tuʼn tonin tiʼj (2 Rey. 20:​2, 3).

16. Tej tok tqʼoʼn Jehová twiʼ tiʼj tnaʼj Dios Ezequías ex tej tok tqʼoʼn twitz tiʼj qa in noqʼ, ¿tiʼ kubʼ tnaʼn ex tiʼ bʼant tuʼn tiʼj?

¹⁶ Tej tok tbʼiʼn Jehová tnaʼj Dios Ezequías ex tej tok tqʼoʼn twitz tiʼj taʼl twitz, tzaj qʼaqʼan tkʼuʼj tiʼj. Tuʼntzunju ajbʼen Isaías tuʼn tuʼn t-xi tqʼamaʼn jlu te: «Ma nbʼiye aju tnaʼj Diosa ex ma wile taʼl twitza ma tzʼetz. Kbʼantela wuʼne teju yabʼil tok tiʼja». Tuʼnju tzaj qʼaqʼan tkʼuʼj Jehová tiʼj, xi ttziyen te qa kʼanqʼiltoq mas ambʼil ex qa kkletel tnam Jerusalén tuʼn toj tqʼabʼ rey te Asiria (2 Rey. 20:​4-6).

17. ¿Tiʼ in bʼant tuʼn Jehová aj ttzaj jun yabʼil qiʼj aju mintiʼ qʼanbʼil tiʼj? (Salmo 41:3; ax ikx qʼonka twitza tiʼj tilbʼilal).

¹⁷ ¿Tiʼ xnaqʼtzbʼil jaku tzʼel qiʼn tiʼj? ¿Tiʼ jaku bʼant tuʼna qa at jun yabʼil tiʼja aju mintiʼ qʼanbʼil tiʼj? Qʼamanxa te Jehová tiʼ in kubʼ tnaʼna, axpe ikx qa in noqʼa aj t-xi tqʼamaʼna. In tzaj tqʼamaʼn Biblia qa tzul tqʼuqbʼaʼn Jehová qkʼuʼj toj tkyaqil yajbʼil qe tuʼnju «atzunte Mambʼajju kukx in qʼaqʼan tkʼuʼj qiʼj, ex atzunte Diosju kukx in tqʼuqbʼaʼn qkʼuʼj» (2 Cor. 1:​3, 4). Ax tok mlay tzʼel tiʼn Jehová tkyaqil nya bʼaʼn in tzaj qiʼj toj ambʼil jaʼlo. Pero qʼuqli qkʼuʼj tiʼj qa ok kʼonil qiʼj (kjawil uʼjit Salmo 41:3). Jun techel, in tzaj tqʼoʼn xewbʼaj xjan qe tuʼn tten qipumal, tuʼn tten qnabʼl ex tuʼn tkubʼ qnaʼn bʼaʼn (Prov. 18:14; Filip. 4:13). Ax ikx in tzaj ttziyen qe qa kʼelel tiʼn tkyaqil yabʼil toj ambʼil tzul (Is. 33:24).

18. ¿Alkye jun texto o txi tqʼuqbʼaʼn tkʼuʼja kyoj ambʼil kwest? (Qʼonka twitza tiʼj recuadro « Qe yol in che ajbʼen tuʼn Jehová tuʼn tkubʼ qnaʼn bʼaʼn»).

¹⁸ Tzaj qʼuqbʼaʼn tkʼuʼj Ezequías kyuʼn tyol Jehová. Ax ikx qe jaku tzaj qʼuqbʼaʼn qkʼuʼj kyuʼn tyol tkuʼx toj Biblia. Xi tqʼoʼn Jehová ambʼil tuʼn tkux tzʼibʼin tyol toj Biblia tuʼntzun kyonin qiʼj aj qikʼ kyoj ambʼil kwest (Rom. 15:4). Qo ximen tiʼj jun ermana te África Occidental aju nimxix in noqʼtoq tuʼnju xi qʼamaʼn te qa tok cáncer tiʼj. In tzaj tqʼamaʼn jlu: «Aju texto kukx in nonin wiʼje aju tkuʼx toj Isaías 26:3. Maske mlay tzʼok qxqʼuqin aju in bʼaj qiʼj, pero jaku tzʼok qxqʼuqin alkye qmod kbʼel qyekʼin aj qikʼ kyoj ambʼil kwest tuʼnju in tzaj tyekʼin texto lu qa jaku tzaj tqʼoʼn Jehová txubʼtxaj toj qanmi». Yajtzun teya, ¿atpe jun texto o txi tqʼuqbʼaʼn tkʼuʼja ex o tzʼok  ik tzeʼn jun inyección te qʼol tipumala kyoj ambʼil kwest?

19. ¿Tiʼ kʼiwlabʼil tzul qkʼamoʼn toj ambʼil tzul?

¹⁹ Tuʼnju in qo anqʼin toj bʼajsbʼil tqʼijlalil maslo qo okel weʼ kywitz nya bʼaʼn jaku qo oqʼ kyuʼn. Pero ik tzeʼn ma tzʼel qnikʼ tiʼj tiʼjju ikʼ tiʼj Ana, tiʼj David ex tiʼj rey Ezequías, in nok tqʼoʼn Jehová twitz tiʼj aj tel taʼl qwitz ex in tnaʼn aju kʼixkʼoj in nikʼ qiʼj. Ojtzqiʼn tuʼn aj toqʼa, tuʼntzunju, aj tikʼa toj ambʼil kwest qʼamanxa te Jehová tkyaqilju in kubʼ tnaʼna. Miʼn tzʼel tpan tibʼa kyiʼj erman tuʼnju kʼujlaʼna kyuʼn. Ex kukx jyonxa qʼuqbʼil tkʼuʼja in tzaj tqʼoʼn Jehová toj Tyol. Ex jaku tzʼok qeʼ tkʼuʼja tiʼj qa ok tzul kʼiwlaʼna tuʼn qa kukx ma tena tzʼaqli twitz. Chʼix tpon qʼij tuʼn tel tsuʼn Jehová tkyaqil taʼl qwitz aju in tzaj tuʼn kʼixkʼoj (Apoc. 21:4). Aj qanqʼin toj akʼaj twitz Txʼotxʼ, oʼkx kʼeletz taʼl qwitz tuʼn tzalajbʼil.