1. ¿Tiʼ kyximbʼetz junjun xjal at tiʼj chwinqlal te jumajx?

 ATEʼ nim xjal in bʼant ejercicio kyuʼn ex in nok kyxqʼuqin aju in xi kywaʼn tuʼntzun kyten bʼaʼn. Pero ojtzqiʼn kyuʼn qa kukx che tijel ex che kyimel. Mintiʼ in kubʼ kyximen qa che anqʼil te jumajx. Tqʼama Jesús qa jaku ten «kychwinqlal [xjal] te jumajx» ik tzeʼn in tzaj tqʼamaʼn Juan 3:16 ex 5:24.

2. ¿Tiʼ in tzaj tqʼamaʼn capítulo 6 te Juan tiʼj qanqʼibʼil te jumajx? (Juan 6:​39, 40).

² Jun maj, bʼant jun milagro tuʼn Jesús tej t-xi tqʼoʼn kywa nim xjal. a Tbʼanel aju bʼant tuʼn, pero aju tqʼama toj juntl qʼij mas tbʼanel. Otoq chex lepeʼ xjal tiʼj tzmax toj tnam Capernaúm, aju tkubʼ ttzi mar te Galilea, ex toj lugar lu xi tqʼamaʼn qa jaku che jaw anqʼin xjal ex jaku ten kychwinqlal te jumajx (kjawil uʼjit Juan 6:​39, 40). Ximana kyiʼj toj tjaya ex tamiwa o che kyim. Aju tqʼama Jesús in tzaj tyekʼin qa ateʼ nim xjal che jawil anqʼin ex qa jaku tzʼanqʼina te jumajx junx kyukʼil toj tjaya ex qe tamiwa. Pero tqʼama Jesús junjuntl yol toj Juan capítulo 6 aju kwest in nela toj kywitz nim xjal tuʼn tel kynikʼ tiʼj. ¿Tiʼ tqʼama Jesús?

3. Ik tzeʼn in tzaj tqʼamaʼn Juan 6:​51, ¿tiʼ tqʼama Jesús tiʼjx?

 ³ Tej otoqxi txi tqʼoʼn Jesús kywa xjal te Capernaúm, tzaj kynaʼn maná tzaj tqʼoʼn Jehová kye aj Israel toj desierto. In tzaj tqʼamaʼn Biblia jlu tiʼj maná: «Aju wabʼj kuʼtz tuj kyaʼj» (Sal. 105:40; Juan 6:31). Ajbʼen kyojtzqibʼil xjal tiʼj maná tuʼn Jesús tuʼn t-xi tyekʼin junjun xnaqʼtzbʼil nim toklen kye. Maske jun milagro bʼant tuʼn Jehová tej ttzaj toyin maná, tej tikʼ ambʼil e kyim qeju e waʼn tiʼj (Juan 6:49). Tqʼama Jesús qa a «aju wabʼj axix tok tzajni tuj kyaʼj», qa a «aju wabʼj in tzaj tqʼoʼn Dios». Ex tqʼamatl jlu: «Aqine wabʼj tuʼn tten kychwinqlale» (Juan 6:​32, 33, 35). Yajxitl, tqʼama Jesús jun tqanil nim toklen tiʼj tiquʼn junxitl te twitz maná. Tqʼama jlu: «Aqine wabʼj qʼol chwinqlal ma chin kuʼtze tuj kyaʼj; qa ma txi twaʼn jun xjal wabʼj lu, kʼanqʼil te jumajx» (kjawil uʼjit Juan 6:51). Tej tqʼama Jesús jlu ya mintiʼ el kynikʼ judiy kyiʼj tyol. Mintiʼ el kynikʼ tiʼj tiquʼn tqʼama Jesús qa ate in nok te wabʼj in tzaj toj kyaʼj ex qa mas nim toklen twitz maná tzaj tqʼoʼn Dios kye kyxeʼchel. Tuʼntzunju xi tqʼamaʼn Jesús jlu kye: «Aju wabʼj kxel nqʼoʼne, atzunju nchibʼjale». ¿Tiʼtzun kyxilen qe tyol Jesús? Qajbʼil tuʼn tok qbʼiʼn tzaqʼwebʼil tuʼntzun tel qnikʼ tiʼj tzeʼn jaku qo anqʼin te jumajx kyukʼil toj qja ex qe qamiw. Qo xnaqʼtzan tiʼj tiʼ kyxilen tyol Jesús.

AJU «WABʼJ QʼOL CHWINQLAL» EX AJU TCHIBʼJAL

4. ¿Tiquʼn nya bʼaʼn o tzʼela toj kywitz junjun aju tqʼama Jesús?

⁴ Nya bʼaʼn ela toj kywitz junjun xjal tej tok kybʼiʼn qa kxel tqʼoʼn Jesús tchibʼjal tuʼn kyanqʼin xjal. Kubʼlo kyximen qa ax tok kxel kychyoʼn tchibʼjal Jesús ex qa che okel ik tzeʼn qe xjal in xi kychyoʼn t-xmilal juntl xjal (Juan 6:52). Nya oʼkxju, ax ikx xi tqʼamaʼn Jesús juntl tqanil kye aju mas kwest tuʼn tel kynikʼ tiʼj. Xi tqʼamaʼn jlu: «Ax tok kxel nmaʼne kyeye, qa mintiʼ ma txi kywaʼne nchibʼjale, ex qa mintiʼ ma txi kykʼaʼne nchkʼele, mlayx ten kychwinqlale, porke aqine skʼoʼmaj qine tuʼn Dios tuʼn ntene kyukʼil xjal» (Juan 6:53).

5. ¿Tiquʼn jaku txi qqʼamaʼn qa mintiʼ xi tqʼamaʼn Jesús kye xjal tuʼn t-xi kykʼaʼn axix tok tchkʼel?

⁵ Atxix toj tqʼijlalil Noé tzaj tqʼamaʼn Dios tuʼn miʼn t-xi kychyoʼn xjal chikʼ (Gén. 9:​3, 4). Yajxitl xi tqʼamaʼn juntl maj toj Ley xi tqʼoʼn kye aj Israel. Qa at jun in xitoq tchyoʼn chikʼ, in kubʼtoq bʼyoʼn (Lev. 7:​27, TNM). Ex japun Tley Moisés tuʼn Jesús (Mat. 5:​17-19). Tuʼntzunju jaku txi qqʼamaʼn qa mintiʼ xi tqʼamaʼn kye judiy tuʼn t-xi kychyoʼn tchibʼjal nix tuʼn t-xi kykʼaʼn tchkʼel. Kyukʼil yol tqʼama Jesús in nel qnikʼ tiʼj qa tajtoq tuʼn t-xi tchikʼbʼaʼn kye xjal tzeʼn jakutoq ten kychwinqlal te jumajx (Juan 6:54).

6. ¿Tiʼ in nonin qiʼj tuʼn tel qnikʼ tiʼj qa noq jun techel ajbʼen tuʼn Jesús tej tqʼama qa il tiʼj tuʼn t-xi qchyoʼn tchibʼjal ex tuʼn t-xi qkʼaʼn tchkʼel?

⁶ Tukʼil jlu in nel qnikʼ tiʼj qa noq jun techel ajbʼen tuʼn Jesús ex nya tnejel maj in najbʼen jun techel tuʼn. Jaku tzaj qnaʼn aju xi tqʼamaʼn te jun xuʼj te Samaria tej tqʼama jlu: «Alkyeju ma txi kʼante ju aʼ kxel nqʼoʼne te, mlay tzaj juntl maj txqetleʼn tiʼj. Porke aju aʼ kxel nqʼoʼne te, kpulwil tuj tanmi ik tzaʼn jun twiʼ aʼ tuʼn tten tchwinqlal te jumajx» (Juan 4:​7, 14). b Tej tqʼama Jesús jlu mintiʼ xi tqʼamaʼn te xuʼj qa jakutoq tzʼanqʼin te jumajx noq tuʼnju kxel tkʼaʼn chʼin aʼ kjawitz toj jun xoch. Ax ikx tej tyolin Jesús tiʼj tchibʼjal ex tiʼj tchkʼel kyukʼil xjal atz Capernaúm nya a t-xilen qa axix tok iltoq tiʼj tuʼn t-xi kychyoʼn tchibʼjal nix tuʼn t-xi kykʼaʼn tchkʼel tuʼn tten kychwinqlal te jumajx.

 CHʼIXME AʼYEX YOL E AJBʼEN TOJ JUNTL MAJ TUʼN JESÚS

7. ¿Tiʼ in kyqʼamaʼn junjun xjal tiʼj tyol Jesús tkuʼx toj Juan 6:53?

⁷ Ateʼ junjun xjal kye txqantl okslabʼil in kyqʼamaʼn qa aju tqʼama Jesús toj Juan 6:53 tej tyolin tiʼj tchibʼjal ex tiʼj tchkʼel, atz yolin tiʼj tiʼ tuʼn tbʼant aj tkubʼ ikʼset Wabʼj te Qale te Jesucristo. In kubʼ kyximen jlu tuʼnju chʼixme aʼyex yol e ajbʼen tuʼn Jesús tej tkubʼ tikʼsaʼn jlu (Mat. 26:​26-28). In kyqʼamaʼn qa kykyaqil qeju in che pon toj ambʼil lu, il tiʼj tuʼn tbʼaj pan ex vino kyuʼn. ¿Axpe tok aju in kyqʼamaʼn? Nim toklen tuʼn tel qnikʼ tiʼj tzaqʼwebʼil tuʼnju tkyaqil abʼqʼi in che pon nim millón xjal qukʼil tuʼn tkubʼ ikʼset Wabʼj te Qale te Jesucristo. Pero kʼelel qnikʼ kyiʼj junjun tiʼchaq junxitl in tzaj qʼamaʼn toj Juan 6:53 twitzju tqʼama Jesús tej tkubʼ tikʼsaʼn ambʼil lu.

8. ¿Tiquʼn in xi qqʼamaʼn qa junxitl jun ambʼil twitz juntl? (Ax ikx qʼonka twitza kyiʼj tilbʼilal).

⁸ Qo yolil tiʼj tiquʼn in xi qqʼamaʼn qa junxitl jun ambʼil twitz juntl. Tnejel, ¿jatumel ex jtoje tqʼama Jesús qe yol ateʼkux toj Juan 6:53 a 56? Kye nim xjal judiy toj Galilea toj abʼqʼi 32 tiʼj ambʼil qʼiʼn quʼn jaʼlo. Bʼaj jlu tej atxtoq juntl abʼqʼi tuʼn tkubʼ tikʼsaʼn Jesús Wabʼj te Qale toj tnam Jerusalén. Tkabʼin, ¿alqe xi tqʼamaʼn qe yol lu? Tqʼama qe yol lu atz Galilea ex chʼixmi kykyaqil qeju in che bʼin tiʼj oʼkxtoq kyaj tuʼn t-xi tqʼoʼn Jesús kywa ex  nya tuʼn tel kynikʼ tiʼj Jehová nix tiʼj Tkawbʼil (Juan 6:26). Ax ikx jurat naj kubʼ naj qʼuqbʼil kykʼuʼj tiʼj Jesús tej t-xi tqʼamaʼn jun tiʼ kwest kye. Axpe ikx ateʼ junjun t-xnaqʼtzbʼen ya mintiʼ e ok lepeʼ tiʼj (Juan 6:​14, 36, 42, 60, 64, 66). Pero aju bʼaj toj ambʼil aju junxitl twitzju bʼaj toj juntl abʼqʼi, toj abʼqʼi 33, tej tkubʼ tikʼsaʼn Jesús Wabʼj te Qale. Toj ambʼil aju kukx e ten qeju 11 apóstol tzʼaqli tukʼil maske mintiʼxix in neltoq kynikʼ tiʼjju xi xnaqʼtzaʼn kye. Pero junxitl kymod kubʼ kyyekʼin kywitz chʼixme kykyaqil xjal te Galilea tuʼnju qʼuqlitoq kykʼuʼj tiʼj qa a Jesús Tkʼwal Dios otoq kuʼtz toj kyaj (Mat. 16:16). Tuʼntzunju xi tqʼamaʼn qa in tzalaj kyiʼj tej t-xi tqʼamaʼn jlu: «Atzun kyeye kukx ma che tene wukʼile tuj yajbʼil weye» (Luc. 22:28). Oʼkx kyukʼil kabʼe techel lu in nel qnikʼ tiʼj qa nya ax tok aj ttzaj kyqʼamaʼn xjal qa atz in yolin Juan 6:53 tiʼj tzeʼn tuʼn tkubʼ ikʼset Wabʼj te Qale. Pero at mas yekʼbʼil tiʼj jlu.

¿TZEN JAKU CHE ONIN TYOL JESÚS TIʼJA?

9. ¿Alqe xi tqʼamaʼn Jesús qe yol tej tkubʼ tikʼsaʼn Wabʼj te Qale?

⁹ Tej tkubʼ tikʼsaʼn Jesús Wabʼj te Qale, xi tqʼoʼn pan mintiʼ levadura toj kye t-apóstol ex xi tqʼamaʼn kye qa atzun pan lu in kubʼ techlaʼn t-xmilal. Yajxitl ikʼx tqʼoʼn vino kye ex xi tqʼamaʼn tiʼ kubʼ techlaʼn tchkʼel tej tqʼama jlu: «Atzun nchkʼele jlu te kyuwsabʼl teju akʼaj yol» (Mar. 14:​22-25; Luc. 22:20; 1 Cor. 11:24). Nim toklen aju tqʼama tiʼj akʼaj yol tuʼnju mintiʼ kyaj bʼant tiʼj akʼaj yol lu kyukʼil kykyaqil xjal, sino oʼkx kyukʼil «aj Israel», toj juntl yol, oʼkx kyukʼil qeju che kawil tukʼil Jesús toj «tkawbʼil Dios» (Heb. 8:​6, 10; 9:15). Toj ambʼil aju mintiʼxix el kynikʼ apóstol tiʼj tiʼ t-xilen jlu. Pero chʼixtoq tpon ambʼil tuʼn kyjaw skʼoʼn tuʼn xewbʼaj xjan ex tuʼn tkyaj bʼant tiʼj akʼaj yol kyukʼil tuʼntzun ttzaj kykʼamoʼn jun kylugar toj kyaʼj junx tukʼil Jesús (Juan 14:​2, 3).

10. ¿Alkye juntl tiʼ junxitl tqʼama Jesús atz Galilea twitzju tqʼama tej tkubʼ tikʼsaʼn Wabʼj te Qale? (Ax ikx qʼonka twitza tiʼj tilbʼilal).

¹⁰ Bʼaʼn tuʼn ttzaj qnaʼn qa tej tkubʼ tikʼsaʼn Jesús Wabʼj te Qale oʼkx ximen tiʼj tal chʼuq rit. Aqeju apóstol e ten tzʼaqli ex ateʼtoq tukʼil toj ambʼil aju, atzun qeju e jaw skʼoʼn tnejel tuʼn kyten kyxol kʼloj rit chʼin kybʼet (Luc. 12:32). Ax ikx ateʼ junjuntl o che jaw skʼoʼn tuʼn kyten kyxol qe jlu ex il tiʼj tuʼn kywan tiʼj pan ex tuʼn kykʼan tiʼj vino. Kykyaqilx qe jlu ktzajel qʼoʼn jun kylugar toj kyaʼj junx tukʼil Jesús. Toj ambʼil aju, junxitl aju xi tqʼamaʼn Jesús kye t-apóstol twitzju xi tqʼamaʼn kye xjal atz Galilea, tuʼnju ximen kyiʼj nimku xjal.

11. ¿Tzeʼn in nel qnikʼ tiʼj qa aju kʼiwlabʼil yolin Jesús tiʼj atz Galilea nya oʼkx tzul qʼoʼn kye junjun xjal?

¹¹ Tej attoq Jesús Galilea toj abʼqʼi 32 atz yolin kyukʼil xjal judiy aʼyeju kyajtoq kywa pan. Pero yolin Jesús tiʼj juntl tiʼ mas tbʼanel twitz wabʼj tuʼnju jakutoq txi tqʼoʼn kychwinqlal te jumajx. Ax ikx xi tqʼamaʼn qa toj mankbʼil tqʼijlalil jaku che jaw anqʼin qeju o che kyim ex jaku che anqʼin te jumajx. Mintiʼ tqʼama Jesús qa oʼkx tzul qʼoʼn kʼiwlabʼil lu kye junjun xjal ik tzeʼn tqʼama tej tkubʼ tikʼsaʼn Wabʼj te Qale. Sino tej tyolin kyukʼil xjal atz Galilea o ximen kyiʼj kykyaqil tuʼn ttzaj kykʼamoʼn kʼiwlabʼil. Axpe ikx tqʼama jlu: «Qa ma txi twaʼn jun xjal wabʼj lu, kʼanqʼil te jumajx; ex aju wabʼj kxel nqʼoʼne, atzunju nchibʼjale kxel nqʼoʼne tuʼn tten kychwinqlal xjal» (Juan 6:51). c

12. ¿Tiʼ il tiʼj tuʼn tbʼant quʼn tuʼntzun qanqʼin te jumajx ik tzeʼn tqʼama Jesús atz Galilea?

¹² Kyukʼil tyol Jesús tqʼama atz Galilea  mintiʼ tqʼama qa kykyaqil xjal che anqʼil te jumajx, ik tzeʼn qeju otoq che kyim ex qeju naʼmxtoq kyul itzʼj. Noq oʼkx qeju in kubʼ kyyekʼin qa in nok qeʼ kykʼuʼj tiʼj Jesús tzul kykʼamoʼn kʼiwlabʼil lu. Toj ambʼil jaʼlo, ateʼ nim xjal in kyqʼamaʼn qa in che okslan tiʼj Jesucristo ex qa a Klol kye (Juan 6:29). Pero ateʼ junjun kyxol qe xjal in che bʼin tej tyolin Jesús otoq che okslan tiʼj ex yajxitl el kypan kyibʼ tiʼj. ¿Tiquʼntzun bʼaj jlu?

13. ¿Tiʼ iltoq tiʼj tuʼn tbʼant kyuʼn xjal tuʼn kyok te axix tok t-xnaqʼtzbʼen Jesús?

¹³ Chʼixme kykyaqil xjal otoq txi tqʼoʼn Jesús kywa kyajtoq tuʼn kyok lepeʼ tiʼj, pero noq oʼkx qa ma txi tqʼoʼn aju kyajtoq. Oʼkxtoq kyaj tuʼn kykubʼ qʼanin, tuʼn t-xi qʼoʼn kywa ex tuʼn t-xi yekʼin junjun xnaqʼtzbʼil kye aju bʼaʼn in nela toj kywitz. Pero xi tqʼamaʼn Jesús kye qa iltoq tiʼj tuʼn tbʼant juntl tiʼ kyuʼn qa kyajtoq tuʼn kyok te axix tok t-xnaqʼtzbʼen. Mintiʼ otoq tzul twitz Txʼotxʼ noq tuʼn t-xi tqʼoʼn aju at tajbʼen kye xjal. Tuʼntzunju xi tqʼamaʼn jlu: «Kytzaje wukʼile», toj juntl yol, iltoq tiʼj tuʼn t-xi kykʼamoʼn ex tuʼn t-xi kynimen tkyaqilju xi t-xnaqʼtzaʼn kye (Juan 5:40; 6:44).

14. ¿Tiʼ il tiʼj tuʼn tbʼant quʼn tuʼntzun tonin tchibʼjal ex tchkʼel Jesús qiʼj?

¹⁴ Xi tqʼamaʼn Jesús kye xjal toj ambʼil aju qa iltoq tiʼj tuʼn tkubʼ kyyekʼin qa at qʼuqbʼil kykʼuʼj. ¿Pero alqiʼj tuʼn tkubʼ kyyekʼin qʼuqbʼil kykʼuʼj? Tiʼj tchibʼjal ex tiʼj tchkʼel kxeltoq tqʼoʼn te chojbʼil tuʼntzun tten kyanqʼibʼil te jumajx. Nimtoq toklen tuʼn tten qʼuqbʼil kykʼuʼj judiy, ax ikx qe toj ambʼil jaʼlo (Juan 6:40). Ikju, il tiʼj tuʼn tkubʼ qyekʼin qʼuqbʼil qkʼuʼj tiʼj chojbʼil  tuʼntzun tonin tchkʼel ex tchibʼjal Jesús qiʼj, aju in tzaj qʼamaʼn toj Juan 6:53. Ex nimku xjal jaku tzaj kykʼamoʼn kʼiwlabʼil lu (Efes. 1:7).

15, 16. ¿Tiʼ in tzaj tyekʼin capítulo 6 te Juan qe?

¹⁵ Nim kyoklen qe yol tkuʼx toj capítulo 6 te Juan te qe kyukʼil toj qja ex qe qamiw. In tzaj tyekʼin jniʼ kʼujlaʼn qe xjal tuʼn Jesús. E kubʼ tqʼanin qe xjal atz Galilea, yolin kyukʼil tiʼj Tkawbʼil Dios ex xi tqʼoʼn kywa qeju mintiʼ kywa (Luc. 9:11; Juan 6:​2, 11, 12). Nya oʼkx jlu, ax ikx xi t-xnaqʼtzaʼn qa a aju «wabʼj tuʼn tten» chwinqlal (Juan 6:​35, 48).

¹⁶ Aqeju xjal in nok tqʼoʼn Jesús kybʼi te txqantl ẍneʼl, mintiʼ in xi kywan pan ex mintiʼ in xi kykʼaʼn vino aj tkubʼ ikʼset Wabʼj te Qale (Juan 10:16). Pero jaku txi qqʼamaʼn qa in bʼaj pan te chwinqlal kyuʼn aj tok qeʼ kykʼuʼj tiʼj chojbʼil (Juan 6:53). Atzun qeju o kyaj bʼant tiʼj akʼaj yol kyukʼil ex o tzaj qʼoʼn kyoklen toj Tkawbʼil Dios toj kyaʼj, il tiʼj tuʼn t-xi kywaʼn axix tok pan ex tuʼn t-xi kykʼaʼn axix tok vino te jun techel qa o che jaw skʼoʼn. Tuʼntzunju, qa atoʼ kyxol qeju skʼoʼn maj moqa kyxol txqantl rit, nim toklen toj qwitz aju in tzaj tqʼamaʼn Juan capítulo 6 tuʼnju in tzaj tyekʼin qa nim toklen tuʼn tkubʼ qyekʼin qʼuqbʼil qkʼuʼj tuʼntzun qanqʼin te jumajx.