1. ¿Jniʼ toklen pan toj kywitz xjal toj ambʼil in yolin Tyol Dios tiʼj?

 AQEJU xjal in yolin Tyol Dios kyiʼj, in najbʼentoq pan kyuʼn te kywa (Gén. 14:18; Mat. 7:9). Nimtoq toklen toj kywitz ex tuʼntzunju at maj in najbʼen pan tuʼn Tyol Dios tuʼn tyolin tiʼj tkyaqil wabʼj (1 Rey. 17:​11, 12; Hech. 20:7). Ax ikx ajbʼen pan tuʼn Jesús tuʼn kybʼant kabʼe milagro tuʼn (Mat. 16:​9, 10). Jun kyxol qe milagro lu qo xnaqʼtzal tiʼj toj capítulo 6 te Juan ex kʼelel qnikʼ tiʼj tiʼ xnaqʼtzbʼil jaku tzʼel qiʼn tiʼj toj ambʼil jaʼlo.

2. ¿Toj alkye ambʼil kyajtoq nim mil xjal tuʼn kywaʼn?

² Kyajtoq t-apóstol Jesús tuʼn kyojlan tuʼnju otoq che sikt in che pakbʼan. Tuʼntzunju, e jax toj jun bark ex e bʼet toj mar te Galilea tuʼntzun kypon toj jun lugar jatumel mintiʼ qe xjal, nqayin tiʼj tnam Betsaida tbʼi (Mar. 6:​7, 30-32; Luc. 9:10). Pero jurat naj e pon nim mil xjal keʼyilte Jesús. Tzaj qʼaqʼin tkʼuʼj Jesús kyiʼj ex ok ten yolin kyukʼil tiʼj Tkawbʼil Dios ex e kubʼ tqʼanin qe yabʼ. Pero tuʼnju otoq txiʼ ambʼil, kubʼ kyximen qe t-xnaqʼtzbʼen Jesús tiʼtoq kbʼantel kyuʼn xjal lu tuʼn tkanet chʼin kywa. Ateʼlo junjun xjal qʼiʼntoq chʼin kywa, pero chʼixmi kykyaqil iltoq tiʼj tuʼn kyxiʼ laqʼol kywa kyoj aldea (Mat. 14:15; Juan 6:​4, 5). ¿Tiʼtoq kbʼantel tuʼn Jesús?

 BʼANT JUN MILAGRO TUʼN JESÚS EX XI TQʼOʼN KYWA XJAL

3. ¿Tiʼ xi tqʼamaʼn Jesús kye t-apóstol tuʼn tbʼant kyuʼn? (Ax ikx qʼonka twitza tiʼj tilbʼilal tok tiʼj revista).

³ Xi tqʼamaʼn Jesús jlu kye t-apóstol: «Mya il tiʼj tuʼn kyxiʼ xjal laqʼol kywa; kyqʼonxe chʼin kywa» (Mat. 14:16). Kubʼlo kyximen t-xnaqʼtzbʼen Jesús qa mlayx bʼant jlu tuʼnju ateʼtoq junlo 5 mil xinaq ex qa ma txi qajlaʼn qe xuʼj ex qe kʼwal, jakulo japun kyajlal te 15 mil (Mat. 14:21). Tqʼama Andrés jlu: «At jun tal qʼa tzalu at jweʼ wabʼj sebad tukʼil tukʼix kabʼe tal kyiẍ, ex, ¿ti tten tuʼn tkanun jlu kye nimku xjal?» (Juan 6:9). Ojtzqiʼnxixtoq pan bʼinchaʼn tiʼj sebad kyuʼn xjal ex nyatoq nim twiʼ. Ex bʼalo tzqij pescad qe qʼiʼn tuʼn tal qʼa. Maske ikju, mlayxtoq kanin wabʼj lu tuʼn kywaʼn nim xjal.

4. ¿Alkyeqe xnaqʼtzbʼil in che kanet quʼn toj Juan 6:11 a 13? (Ax ikx qʼonka twitza kyiʼj tilbʼilal).

⁴ Tajtoq Jesús tuʼn t-xi tqʼoʼn kywa xjal, tuʼntzunju, xi tqʼamaʼn kye tuʼn kykubʼ qeʼ tibʼaj kʼul toj kʼlojin (Mar. 6:​39, 40; kjawil uʼjit Juan 6:​11-13). In tzaj tqʼamaʼn Biblia qa xi tqʼoʼn Jesús chjonte te Tman kyiʼj pan ex kyiʼj pescad. Tbʼanel aju bʼant tuʼn tuʼnju a Dios tzaj qʼonte wabʼj lu. In tzaj tnaʼn jlu qe qa nim toklen tuʼn kukx tel qkanoʼn techel kubʼ tqʼoʼn Jesús ex tuʼn qnaʼn Dios naʼmxtoq qwaʼn, qa qjunalx moqa kyukʼil txqantl. Yajxitl, xi tqʼamaʼn Jesús tuʼn t-xi sipet wabʼj kye xjal ajxi kynoj. Kyaj sobriyin wabʼj ex xi tqʼamaʼn Jesús tuʼn tjaw chmet tuʼn miʼn tbʼaj yajit ex tuʼn tajbʼen yajxitl. Iktzun tten kyaj t-xnaqʼtzaʼn Jesús qe tuʼn miʼn tbʼaj qyajin qe tiʼchaq at qe. Jaku kubʼ kyxnaqʼtzaʼn mambʼaj  juntl maj txʼolbʼabʼil lu kyukʼil kykʼwal tuʼntzun t-xi kyxnaqʼtzaʼn kye tuʼn tbʼant kynaʼn Dios ex tuʼn tbʼant kyqʼoʼn oyaj.

5. ¿Tiʼ kyajtoq xjal tuʼn tbʼant kyuʼn tej tok kyqʼoʼn kywitz tiʼj milagro, pero tiʼ bʼant tuʼn Jesús?

⁵ Tbʼanel ela toj kywitz xjal aju alkye tten qʼoʼn Jesús xnaqʼtzbʼil ex aju alkye tten e bʼant milagro tuʼn. Ojtzqiʼntoq kyuʼn qa yolin Moisés tiʼj jun profeta nim toklen ktzajeltoq t-samaʼn Dios, tuʼntzunju, kubʼ kyximen qa bʼalo a Jesús profeta lu (Deut. 18:​15-18). Qa ikju, kubʼlo kyximen qa jakutoq tzʼok Jesús te jun tbʼanel aj kawil aju jakutoq txi tqʼoʼn kywa kykyaqil xjal toj jun tnam. Tuʼn jlu in nel qnikʼ tiʼj tiquʼn «otoq kubʼ kyximan tuʼn kytzaj qʼilte te tuʼntzun tok te kyrey» (Juan 6:​14, 15). Noqwit xi tqʼoʼn Jesús ambʼil tuʼn tbʼant jlu kyuʼn, okxwitlo tqʼon tibʼ toj política kyxol xjal judiy, aqeju ateʼtoq tjaqʼ kykawbʼil xjal te Roma. Pero mintiʼ bʼant jlu tuʼn. In tzaj tqʼamaʼn txʼolbʼabʼil qa «el tpaʼn juntl maj tibʼ kyiʼj xjal, xiʼ twi witz». Maske ok tilil kyuʼn xjal tuʼn tokx tqʼon tibʼ Jesús toj política, pero mintiʼ bʼant tuʼn. ¡Jun tbʼanelxix techel qwitz!

6. ¿Tzeʼn jaku tzʼel qkanoʼn tiʼj Jesús? (Ax ikx qʼonka twitza tiʼj tilbʼilal).

⁶ Ax tok, mi aʼlx jun tzul tqʼamaʼn qe tuʼn tbʼant jun milagro quʼn tuʼn t-xi qqʼoʼn kywa nim xjal, tuʼn tkubʼ qqʼaʼnin jun yabʼ moqa tuʼn ttzaj kyqʼamaʼn qe tuʼn qok te jun rey moqa te jun aj kawil. Pero jaku tzʼok tilil  kyuʼn xjal tuʼn tokx qqʼon qibʼ toj política ik tzeʼn tuʼn qvotarin moqa tuʼn qonin toj junjuntl tten tiʼj jun xjal aju in kubʼ kyximen qa kxel tbʼinchaʼn tiʼj nya bʼaʼn. Pero kyaj tqʼoʼn Jesús jun tbʼanel techel qwitz tuʼn tel qnikʼ tiʼj tiʼ bʼaʼn tuʼn tbʼant quʼn. Mintiʼ xi tqʼoʼn ambʼil tuʼn tokx tqʼon tibʼ toj política. Ex yajxitl tqʼama jlu: «Aju nkawbʼile mya te twitz txʼotxʼ» (Juan 17:14; 18:36). Tbʼanel in bʼant quʼn qa in nel qkanoʼn tiʼjju bʼant tuʼn Jesús ex alkye tten ximen. In nel qkanoʼn tiʼj aj qyolin tiʼj Tkawbʼil Dios ex aj qnaʼn Dios tuʼn ttzaj kawbʼil lu (Mat. 6:10). Kʼelel qnikʼ tiʼj tiʼ mas xnaqʼtzbʼil jaku tzʼel qiʼn tiʼj milagro bʼant tuʼn Jesús kyiʼj pan.

¿TIʼ T-XILEN AJU O TBʼINCHA JESÚS TIʼJ WABʼJ?

7. ¿Alkye juntl milagro bʼant tuʼn Jesús ex tzeʼn ela toj kywitz t-apóstol? (Juan 6:​16-20).

⁷ Tej otoq che bʼaj waʼn xjal tuʼn Jesús, xi tqʼamaʼn kye t-apóstol tuʼn kymeltzʼaj toj bark atz Capernaúm, atzunte xiʼ twiʼ witz tuʼntzun miʼn t-xi qʼiʼn kyuʼn xjal tuʼn tok te rey (kjawil uʼjit Juan 6:​16-20). Tej in che bʼettoq apóstol toj bark, tzaj kyqʼiqʼ tukʼil jbʼal ex jaw xtuliqʼin mar. Xi bʼet Jesús tibʼaj mar ex xi tqʼamaʼn te Pedro tuʼn tbʼant axju tuʼn (Mat. 14:​22-31). Tej tjax Jesús toj bark, weʼ kyqʼiqʼ toj mar. E jaw labʼin t-xnaqʼtzbʼen Jesús ex kyqʼama: «Ax tok aya Tkʼwaʼl Dios» (Mat. 14:33). a Pero mintiʼ el kynikʼ tiʼj tiʼ toklen milagro lu tukʼilju otoq bʼant tuʼn kyukʼil pan. Tqʼama Marcos qa nimxix e jaw labʼin apóstol «tuʼnju naʼnxtoq tel kynikʼ tiʼj ti t-xilen aju o tbʼincha Jesús tiʼj wabʼj, porke kyuw tuʼn tex tuj kywiʼ» (Mar. 6:​50-52). Ikju, naʼmxtoq tel kynikʼ tiʼj tkyaqil ipumalj otoq txi tqʼoʼn Jehová te Jesús tuʼn kybʼant milagro tuʼn. Yajxitl, yolin juntl maj Jesús tiʼj milagro bʼant tuʼn kyiʼj pan ex iktzun tten tzaj tyekʼin juntl tbʼanel xnaqʼtzbʼil qe.

8, 9. ¿Tiquʼn i eʼx xjal jyolte Jesús? (Juan 6:​26, 27).

⁸ Aqeju xjal xi tqʼoʼn Jesús kywa, mastoq nim toklen toj kywitz tuʼn kywaʼn ex tuʼn tten aju at tajbʼen kye. Ax tok, toj juntl qʼij tej tok kyqʼoʼn kywitz tiʼj qa otoq tzikʼ bʼet Jesús kyukʼil t-apóstol, i eʼx kyoj bark in che etz toj tnam Tiberíades tuʼn kypon atz Capernaúm jyolte Jesús (Juan 6:​22-24). ¿Pero bʼantpe jlu kyuʼn tuʼn tok kybʼiʼn mas tqanil tiʼj Tkawbʼil Dios? Mintiʼ, tuʼnju oʼkxtoq in che ximen tuʼn kywaʼn. ¿Tiquʼn in xi qqʼamaʼn jlu?

⁹ Qo ximen tiʼjju xi tqʼamaʼn Jesús kye xjal tej tyolin kyukʼil atz Capernaúm. Xi tqʼamaʼn kye qa otoq che ul tuʼnju kyajtoq kywa. Tqʼama jlu: «In che jyone wiʼje noq tuʼnju pan xi kywaʼne ex e noje [ . . . ]. Miʼn che aqʼnane tiʼj ju wabʼj in bʼaj». Ex xi tqʼamaʼntl jlu kye: «Oʼkx che aqʼnane tiʼj ju wabʼj mlay bʼaj ex in tqʼoʼn kychwinqlale te jumajx» (kjawil uʼjit Juan 6:​26, 27). Ex xi tqʼamaʼn kye qa a Jehová, aju Tman, kxel qʼonte wabʼj lu kye. Pero naʼmxtoqlo tok kybʼiʼn qa at jun wabʼj jakutoq txi tqʼoʼn kychwinqlal te jumajx. ¿Pero tiʼtzun wabʼj lu ex tzeʼn jakutoq kanet kyuʼn?

10. ¿Tiʼ iltoq tiʼj tuʼn tbʼant kyuʼn xjal tuʼn tten «kychwinqlal te jumajx»?

¹⁰ Bʼalo kubʼ kyximen judiy qa il tiʼj tuʼn tbʼant jun aqʼuntl kyuʼn tuʼn ttzaj kykʼamoʼn wabʼj lu. Atzlo e ximen tiʼjju in tzajtoq tqʼamaʼn Tley Moisés tuʼn tbʼant kyuʼn, pero xi tqʼamaʼn Jesús jlu kye: «Atzun aqʼuntl jlu in tmaʼn Dios tuʼn kybʼinchanteye: Che okslane wiʼje, aqine ma chin tzaj samaʼne tuʼn Dios» (Juan 6:​28, 29). Iltoq tiʼj tuʼn tok qeʼ kykʼuʼj  tiʼj Jesús tuʼntzun ttzaj qʼoʼn «kychwinqlal te jumajx». Te tjaqʼxi, ya otoq yolin Jesús tiʼj jlu (Juan 3:​16-18, 36). Ex yajxitl, yolin juntl maj tiʼj tiʼ il tiʼj tuʼn tbʼant quʼn tuʼn tten qchwinqlal te jumajx (Juan 17:3).

11. ¿Tzeʼn kubʼ kyyekʼin judiy qa oʼkxtoq in che ximen tiʼj kywa? (Salmo 78:​24, 25).

¹¹ Mintiʼ xi kynimen judiy qa iltoq tiʼj tuʼn tok qeʼ kykʼuʼj tiʼj Jesús. Tuʼntzunju, xi kyqʼamaʼn jlu te: «¿Alkyetzun señ in tbʼinchaʼna tuʼn qlonteye ex tuʼn qokslane tiʼja?» (Juan 6:30). Ex xi kyqʼamaʼn te Jesús qa otoq tzaj qʼoʼn maná kye xjal toj tqʼijlalil Moisés, aju ik tten ik tzeʼn pan (Neh. 9:15; kjawil uʼjit Salmo 78:​24, 25). Tukʼil kyyol lu kubʼ kyyekʼin qa oʼkxtoq in che ximen tiʼj kywa. Ex tej tyolin Jesús tiʼj «wabʼj axix tok tzajni tuj kyaʼj», aju ik tten in tzeʼn maná ex in tqʼoʼn chwinqlal, mintiʼ xi kyqanin te tiʼ t-xilen (Juan 6:32). Oʼkx e ximen tiʼjju at tajbʼen kye ex mintiʼ ok kyqʼoʼn kywiʼ tiʼj Jesús tej t-xi tqʼamaʼn kye tzeʼn tuʼn tten kychwinqlal te jumajx. ¿Tiʼ xnaqʼtzbʼil jaku tzʼel qiʼn tiʼj txʼolbʼabʼil lu?

¿ALKYE MAS NIM TOKLEN TOJ QWITZ?

12. ¿Toj alkye ambʼil tzaj tyekʼin Jesús alkye mas nim toklen?

¹² In kanet jun tbʼanel xnaqʼtzbʼil quʼn toj Juan capítulo 6. Aju qa ma qo nimen te Dios ex qa ma ten jun tbʼanel qamiwbʼil tukʼil, atzun mas nim toklen toj qwitz. Otoq yolin Jesús tiʼj jlu tej tkubʼ tqʼoʼn Satanás jun nya bʼaʼn twitz (Mat. 4:​3, 4). Ax ikx toj chikʼbʼabʼil ex tqʼoʼn Jesús twiʼ jun witz tqʼama qa nim toklen tuʼn tkubʼ qqʼoʼn Dios tnejel toj qanqʼibʼil (Mat. 5:3). Tuʼntzunju, qxjelinku jlu: «¿In kubʼpe nyekʼine tukʼil alkye tten in chin anqʼine qa mas nim toklen wamiwbʼile tukʼil Jehová ex nya aju wajbʼile?».

13. a) ¿Tiquʼn nya jun il aj qtzalaj tiʼj qwa? b) ¿Alkye consej nim toklen tuʼn t-xi qnimen? (1 Corintios 10:​6, 7, 11).

¹³ Nya jun il aj t-xi qqanin te Dios tuʼn ttzaj tqʼoʼn aju at tajbʼen qe ex tuʼn qtzalaj tiʼj (Luc. 11:3). In tzaj tqʼamaʼn Biblia qa jaku qo tzalaj tiʼj qaqʼunbʼen ik tzeʼn aj qwaʼn ex aj qkʼan tuʼnju a Dios in tzaj qʼonte (Ecl. 2:24; 8:15; Sant. 1:17). Pero il tiʼj tuʼn tok qxqʼuqin qibʼ tuʼn miʼn kyok qe tiʼchaq lu te mas nim toklen toj qanqʼibʼil. Xi tnaʼn apóstol Pablo kye okslal aju bʼaj kyiʼj aj Israel nqayin tiʼj witz Sinaí. Tqʼama jlu kye: ‹Miʼn pon qkʼuʼj tiʼj mya bʼaʼn›. Atzun jlu otoq bʼaj kyiʼj israelita (kjawil uʼjit 1 Corintios 10:​6, 7, 11). E bʼant milagro tuʼn Jehová tuʼn ttzaj tqʼoʼn kywa aj Israel, pero tuʼnju pon kykʼuʼj «tiʼj mya bʼaʼn», ok milagro lu te nya bʼaʼn kye (Núm. 11:​4-6, 31-34). Ax jlu bʼant kyuʼn tej kyok ten waʼl, kʼal ex tej kyok ten kʼulil twitz tilbʼilal jun tal tor (Éx. 32:​4-6). Ajbʼen techel lu tuʼn apóstol Pablo tuʼn tonin kyiʼj okslal in che anqʼin tej chʼixtoq tkubʼ xiten tnam Jerusalén ex tempo toj abʼqʼi 70 tiʼj ambʼil qʼiʼn quʼn jaʼlo. Ax ikx qe, in qo anqʼin toj jun ambʼil jatumel chʼix tkubʼ najsaʼn tkyaqil nya bʼaʼn at twitz Txʼotxʼ ex tbʼanel tuʼn t-xi qbʼiʼn consej tqʼama apóstol Pablo.

14. ¿Tiʼ in tzaj tqʼamaʼn Biblia tiʼj wabʼj ktel toj akʼaj twitz Txʼotxʼ?

¹⁴ Tej ttzaj t-xnaqʼtzaʼn Jesús tuʼn t-xi qqanin qwa te Dios «aju in ajbʼen tkyaqil qʼij», ax ikx yolin tiʼj ambʼil aj tbʼant tajbʼil Dios «twitz txʼotxʼ ik tzaʼn in bʼant tuj kyaʼj» (Mat. 6:​9-11). ¿Tzeʼn kʼokel ambʼil aju? In tzaj tqʼamaʼn Biblia qa aj tbʼant tajbʼil Dios, ax ikx ktel tbʼanel wabʼj. In tzaj tziyen toj Isaías 25:6 a 8 qa aj tkawin Tkawbʼil Jehová twitz Txʼotxʼ, ktel nimxix ex tbʼanel wabʼj. Ex in tzaj tziyen jlu toj Salmo 72:16: «Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz  txʼotxʼ». Ximana tiʼj qa toj akʼaj twitz Txʼotxʼ in kubʼ tbʼinchaʼna jun wabʼj naʼmx t-xi tnikʼbʼeʼna moqa in kubʼ tbʼinchaʼna jun twaya aju mas tgana. Ax ikx jaku ximana tiʼj qa ya in kʼana tiʼj twitz uva ok tawaʼna (Is. 65:​21, 22). Ex nya oʼkx teya ktzalajel kyiʼj kʼiwlabʼil lu.

15. Aj kyjaw anqʼin kyimni, ¿tiʼ kʼelel kynikʼ tiʼj? (Juan 6:35).

¹⁵ (Kjawil uʼjit Juan 6:35). ¿Tiʼ kbʼajel kyiʼj xjal e waʼn tiʼj pan ex xi kychyoʼn pescad e bʼant tuʼn Jesús tuʼn jun milagro? Oklo che okel qojtzqiʼn junjun aj kyjaw anqʼin kyimni. Ateʼlo junjun che jawil anqʼin maske mintiʼ ten qʼuqbʼil kykʼuʼj (Juan 5:​28, 29). Kʼelel kynikʼ tiʼj tiʼ t-xilen tyol Jesús tej tqʼama: «Aqine wabʼj tuʼn tten kychwinqlale; aju ma tzul wukʼile mlay tzaj weʼyaj tiʼj». Il tiʼj tuʼn tok qeʼ kykʼuʼj tiʼj chojbʼil bʼant tuʼn Jesús, toj juntl yol, tuʼn tok qeʼ kykʼuʼj tiʼj qa xi tqʼoʼn tchwinqlal kyiʼj. Toj akʼaj twitz Txʼotxʼ, kxel qʼoʼn xnaqʼtzbʼil tiʼj Jehová kye qeju che jawil anqʼin ex kye kʼwal che ul itzʼj. ¡Kbʼel qnaʼn tzalajbʼil aj qonin tuʼn t-xi qʼet xnaqʼtzbʼil! Tzul tqʼoʼn mas tzalajbʼil qe twitzju tuʼn qwaʼn. Ex kʼokel te mas nim toklen aj qonin kyiʼj txqantl tuʼn tten kyamiwbʼil tukʼil Jehová.

16. ¿Tiʼ kʼelel qnikʼ tiʼj toj juntl xnaqʼtzbʼil?

¹⁶ Ma tzʼel chʼin qnikʼ tiʼj xnaqʼtzbʼil in kanet quʼn toj Juan capítulo 6. Pero atxtoq nim xnaqʼtzbʼil tajtoq Jesús tuʼn ttzaj tqʼamaʼn tej tyolin tiʼj chwinqlal te jumajx. Nimtoq toklen xnaqʼtzbʼil toj kywitz judiy, ax ikx qe toj qwitz. Toj juntl xnaqʼtzbʼil qo xnaqʼtzal chʼintl tiʼj capítulo 6 te Juan.