XNAQʼTZBʼIL 50
BʼITZ 135 Chi Jehová teya: «Nkʼwaʼl, toka at tnabʼla»
¿Tzeʼn jaku che onin mambʼaj kyiʼj kykʼwal tuʼn tchʼiy qʼuqbʼil kykʼuʼj?
«Tuʼntzun kyojtzqinteye alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix» (ROM. 12:2).
¿TIʼ KʼELEL QNIKʼ TIʼJ?
Qo yolil kyiʼj junjun nabʼil jaku tzʼonin kyiʼj mambʼaj tuʼn kyyolin kyukʼil kykʼwal ex tuʼn tok qeʼ mas kykʼuʼj tiʼj Jehová ex tiʼj Biblia.
1, 2. ¿Tiʼ kymod mambʼaj kbʼel kyyekʼin kyukʼil kykʼwal aj ttzaj kyqanin junjun kyxjel?
ATEʼ junjun in tzaj kyqʼamaʼn qa in xi tiʼn nim aqʼuntl tuʼn kychʼiy kʼwal. Qa at teya tkʼwal tzma tal chʼin qe, in qo tzalaje tiʼja tuʼnju in nok tilil tuʼna tuʼn tchʼiy qʼuqbʼil kykʼuʼj (Deut. 6:6, 7). Aj kychʼiy, jakulo tzaj kyqanin junjun xjel tiʼj qokslabʼil. Ik tzeʼn tiquʼn nya bʼaʼn in che ela junjun tiʼchaq toj twitz Jehová.
2 Aj ttzaj kyqanin kʼwal junjun kyxjel, jakulo kubʼ kyximen mambʼaj qa mintiʼ qʼuqbʼil kykʼuʼj ex jakulo tzaj kybʼis tuʼn. Pero nim toklen tuʼn ttzaj kyqanin kʼwal kyxjel tuʼntzun tchʼiy mas qʼuqbʼil kykʼuʼj (1 Cor. 13:11). Tuʼntzunju mintiʼ tuʼn ttzaj bʼaj kykʼuʼje aj ttzaj kyqanin kyxjel. Jaku tzʼajbʼen ambʼil lu kyuʼne tuʼn kyonine kyiʼj kykʼwale tuʼn kyximen, tuʼntzun tchʼiy mas qʼuqbʼil kykʼuʼj tij Jehová ex tiʼj Tyol.
3. ¿Tiʼ kʼelel qnikʼ tiʼj toj xnaqʼtzbʼil lu?
3 Toj xnaqʼtzbʼil lu kʼelel qnikʼ tiʼj tzeʼn jaku che onin mambʼaj kyiʼj kykʼwal tuʼn tok qeʼ kykʼuʼj tiʼj Jehová ex tiʼj Tyol, tuʼn tel kynikʼ tiʼj tiquʼn mas bʼaʼn qa ma txi kynimen aju in tzaj tqʼamaʼn Biblia tiʼj alkye bʼaʼn ex alkye nya bʼaʼn, ex tuʼn kykolin tiʼj kyokslabʼil. Ax ikx kʼelel qnikʼ tiʼj tiquʼn bʼaʼn tuʼn ttzaj kyqanin kʼwal kyxjel ex toj alkye ambʼil jaku che onin mambʼaj kyiʼj.
CHE ONINE KYIʼJ KYKʼWALE TUʼN TOK QEʼ KYKʼUʼJ TIʼJ JEHOVÁ EX TIʼJ TYOL
4. ¿Alkye junjun xjel jaku tzaj kyqanin kʼwal ex tiquʼn?
4 Ojtzqiʼn kyuʼn mambʼaj qa mintiʼ in che ul itzʼj kykʼwal tukʼil qʼuqbil kykʼuʼj, axpe ikx kye mintiʼ qʼuqbil kykʼuʼj tej kyul itzʼj. Tuʼntzunju aj kychʼiy kykʼwal jakulo tzaj kyqanin junjun kyxjel ik tzeʼn jlu: «¿Atpe Dios? ¿Jakupe tzʼok qeʼ nkʼuʼje tiʼj Tyol Dios?». In tzaj tqʼamaʼn Biblia jlu: «Kykeʼyin bʼaje tkyaqil» tuʼntzun tel kynikʼe tiʼj «alkyeju bʼaʼn ex alkyeju mya bʼaʼn» (1 Tes. 5:21; Heb. 5:14). Pero aqeye mambʼaj, ¿tzeʼn jaku che onine kyiʼj kykʼwale tuʼn tchʼiy qʼuqbil kykʼuʼj?
5. ¿Tzeʼn jaku che onin mambʼaj kyiʼj kykʼwal tuʼn tok qeʼ kykʼuʼj tiʼj Biblia? (Romanos 12:2).
5 Che onine kyiʼj tuʼn tel qnikʼ tiʼj qa axix tok aju nimen quʼn (kyjawil uʼjit Romanos 12:2). Aj ttzaj kyqanin kykʼwale kyxjel, jaku txi kyyekʼine kye tzeʼn jaku kanet tzaqʼwebʼil kyuʼnx. Jaku che ajbʼen junjun onbʼil kyuʼn ik tzeʼn Índice de las publicaciones Watch Tower ex Onbʼil tuʼn kyxnaqʼtzan testigos de Jehová. Toj uʼj lu jaku txi kyjyoʼn junjun xnaqʼtzbʼil tjaqʼ subtítulo «Tzajni tukʼil Dios» toj xnaqʼtzbʼil «Tyol Dios», tuʼntzun tel kynikʼ tiʼj qa nya kyximbʼetz xjal tkuʼx toj Biblia sino «tyol Dios» (1 Tes. 2:13). Ax ikx, jaku txi kyjyoʼn tqanil tiʼj tnam Nínive. Ojtxe in tzaj kyqʼamaʼn junjun xjal in chi xnaqʼtzan tiʼj Tyol Dios qa mintiʼ o ten tnam lu. Pero nqayin tiʼj abʼqʼi 1850 kanet qe truina tnam lu, ex tzaj tyekʼin jlu qa ax tok bʼaj aju in tzaj tqʼamaʼn Biblia tiʼj tnam lu (Sof. 2:13-15). Ex jaku txi kyjyon tqanil tiʼj tzeʼn japun kywiʼ qe profecía tej kubʼ xiten tnam Nínive toj xnaqʼtzbʼil «¿O tzʼok tbʼiʼna?» toj uʼj Aju Xqʼuqil te noviembre te 2021. Aj tok kymojbʼaʼn kykʼwale aju in tzaj kyqʼamaʼn quʼj tukʼilju in tzaj kyqʼamaʼn junjuntl uʼj, kʼonil kyiʼj tuʼn tok qeʼ mas kykʼuʼj tiʼjju in tzaj tqʼamaʼn Biblia.
6. ¿Tzeʼn jaku che onin mambʼaj kyiʼj kykʼwal tuʼn kyximen? Yolina tiʼj jun techel. (Ax ikx qʼonka twitza tiʼj tilbʼilal).
6 Che onine kyiʼj kykʼwale tuʼn tok kyqʼoʼn kywitz tiʼj qa tzʼaqli tqanil tkuʼx toj Biblia. At nim tumel tuʼn kyyolin mambʼaj kyukʼil kykʼwal tiʼj Biblia ex tiʼj qʼuqbʼil kykʼuʼj tiʼj Jehová. Bʼalo jaku che yoline kyukʼil kykʼwale tiʼj jlu aj kyxiʼye toj jun lugar, toj jun museo moqa toj jun sucursal kye testigos de Jehová. Jun techel, aj kyxiʼye toj jun museo moqa aj tok kykeʼyine junjun tilbʼilal toj internet, jaku txi kyyekʼine kye kykʼwale junjun tiʼchaq moqa junjun tiʼ bʼaj ojtxe, tuʼntzun tel kynikʼ tiʼj qa tzʼaqli aju in tzaj tqʼamaʼn Biblia. Ax ikx, jaku che yoline tiʼj jun abʼj moabita tbʼi. Bʼalo ma tzikʼ 3 mil abʼqʼi tuʼn abʼj lu ex tzʼibʼin tbʼi Jehová twitz. Atz taʼ abʼj lu toj Museo del Louvre, atz París, Francia. Ax ikx at jun copia tiʼj toj exposición «Aju Xjan Uʼj ex tbʼi Dios», atz toj kytxuylal ninja qʼil twitz aqʼuntl kye testigos de Jehová atz Warwick, Nueva York. Twitz abʼj moabita tzʼibʼin qa jaw tin tibʼ rey Mesá te Moab tiʼj rey te Israel. Ex ax jlu in tzaj tqʼamaʼn Biblia (2 Rey. 3:4, 5). Kchʼiyel mas qʼuqbʼil kykʼuʼj kykʼwale aj tok kyqʼoʼn kywitz tiʼj qa ax tok ex qa tzʼaqli aju in tzaj tqʼamaʼn Biblia (mojbʼankuya tukʼil 2 Crónicas 9:6).
Tuʼn kyximen kykʼwale, bʼaʼn tuʼn kyajbʼen qe tiʼchaq at toj jun museo kyuʼne tuʼn t-xi kyqanine junjun xjel kye. (Qʼonka twitza tiʼj párrafo 6).
7, 8. a) ¿Tiʼ in tzaj tyekʼin qe aju alkye tten bʼinchaʼn qe tiʼchaq? Yolina tiʼj jun techel. (Ax ikx qʼonka twitza kyiʼj tilbʼilal). b) ¿Alkye junjun xjel jaku che onin kyiʼj kʼwal tuʼn tok qeʼ kykʼuʼj tiʼj qa at jun Bʼinchal qe?
7 Kyqʼamanxe kye tuʼn tok kyqʼoʼn kywitz kyiʼj tbʼinchbʼen Jehová. Aj kybʼete toj kojbʼil moqa toj kʼul, kyyekʼinxe kye kykʼwale alkye tten o bʼaj tbʼinchaʼn Jehová qe tiʼchaq. Che onine kyiʼj tuʼn tel kynikʼ tiʼj qa at nimxix tnabʼil aju kubʼ bʼinchante kykyaqil qe tiʼchaq. Jun techel, ma tzikʼ nim syent abʼqʼi in che xnaqʼtzan científico tiʼj alkye tten bʼinchaʼn junjun tiʼchaq; ik tzeʼn qeju o che kubʼ bʼinchaʼn te jun tten in che qʼoʼn welt ik tzeʼn jun espiral. In tzaj tqʼamaʼn jun científico Nicola Fameli tbʼi, qa aj t-xi ajlet kyajlal espiral at kyoj junjun tiʼchaq in che kanet junjun número kyiʼj, aju in nok qʼoʼn tbʼi te sucesión de Fibonacci. At nim qe tiʼchaq ik kyten ik tzeʼn jun espiral ik tzeʼn junjun galaxia, junjun concha, junjun kyxaq awal ex qe girasol. a
8 Ax ikx toj escuela jaku tzaj xnaqʼtzan junjuntl tiʼchaq kye kykʼwale kyiʼj tbʼinchbʼen Jehová. Jun techel, in bʼaj jlu kyiʼj chʼixmi kykyaqil tzeʼ: Tiʼj tqan jun tzeʼ in che el qe tqʼabʼ, ex kyiʼj tqʼabʼ in che el junjuntl tal tqʼabʼ ex in nok qʼoʼn tbʼi proceso lu te fractal. Ax ikx in bʼaj jlu kyiʼj junjuntl tbʼinchen Jehová. Pero ¿alkye bʼaj bʼinchante tkyaqil jlu? Qa ma tzaj kyqanin kykʼwale jun kyxjel ik tzeʼn jlu, jakulo tzʼonin kyiʼj tuʼn tel kynikʼ tiʼj qa a Dios o kubʼ bʼinchante kykyaqil qe tiʼchaq (Heb. 3:4). Ex jaku txi kyqanine jlu kye: «Qa a Dios o kubʼ bʼinchante qe, ¿nyapetzulo oʼkx te ojtzqilte tzeʼn jaku qo tzalaj?». Yajxitl, jaku txi kyyekʼine kye qa atz toj Biblia in tzaj tqʼamaʼn Jehová qe tzeʼn jaku qo tzalaj.
NASA, ESA, and the Hubble Heritage (STScl/AURA)-ESA/Hubble Collaboration
¿Alkye kubʼ bʼinchante qe tbʼanel tiʼchaq lu? (Qʼonka twitza tiʼj párrafo 7 ex 8).
CHE ONINE KYIʼJ TUʼN TEL KYNIKʼ TIʼJ QA NIM KYOKLEN QE NABʼIL KYKUʼX TOJ BIBLIA
9. ¿Tiquʼn jakulo jawje kykʼuʼj kʼwal kyiʼj nabʼil toj Tyol Dios?
9 Qa in tzaj kyqanin kykʼwale junjun kyxjel tiʼj tiquʼn in tzaj tqʼamaʼn Biblia qa nya bʼaʼn junjun tiʼchaq, bʼaʼn tuʼn tel kynikʼe tiʼj tiquʼn in tzaj kyqanin. ¿In jawje kykʼuʼj tiʼjju in tzaj qʼamaʼn Biblia? Moqa, ¿in che tzaj xobʼ ex kwest tuʼn t-xi kychikʼbʼaʼn kye txqantl aju nimen kyuʼn? Noq tzeʼnxku, jaku che onine kyiʼj kykʼwale tuʼn tel kynikʼ tiʼj tiquʼn bʼaʼn tuʼn t-xi kynimen qe tkawbʼil Jehová. Tuʼn tbʼant jlu kyuʼne, jaku che xnaqʼtzane kyukʼil tiʼj uʼj Tzalaja tiʼj tanqʼibʼila. b
10. ¿Tzeʼn jaku chʼiy kyamiwbʼil kykʼwale tukʼil Jehová?
10 Che onine kyiʼj kykʼwale tuʼn tchʼiy kyamiwbʼil tukʼil Jehová. Aj kyxnaqʼtzane kyukʼil, jaku che ajbʼen qe xjel kyuʼne ex qe techel kykuʼx toj uʼj Tzalaja tiʼj tanqʼibʼila tuʼntzun ttzaj kyqʼamaʼn tiʼ in kubʼ kynaʼn ex tiʼ in kubʼ kyximen (Prov. 20:5). Jun techel, toj xnaqʼtzbʼil 8 in nok mojbʼaʼn Jehová tukʼil jun tbʼanel amiw aju in nonin qiʼj tuʼn tjaw qjyoʼn aju mas bʼaʼn tuʼntzun miʼn ttzaj jun nya bʼaʼn qiʼj. Otoqxi che xnaqʼtzane tiʼj 1 Juan 5:3, jaku txi kyqanine jlu kye: «Tuʼnju tbʼanel amiw te Jehová, ¿tiʼ qximbʼetz ktel tiʼjju in tzaj tqanin tuʼn tbʼant quʼn?». Jakulo kubʼ kyximane qa nya nim toklen xjel lu, pero jaku tzʼonin kyiʼj kykʼwale tuʼn tel kynikʼ tiʼj qa in tzaj tqʼoʼn Jehová qe kawbʼil qe tuʼnju kʼujlaʼn qoʼ tuʼn (Is. 48:17, 18).
11. Aqeye mambʼaj, ¿tiʼ mas jaku bʼant kyuʼne tuʼn tok kyqʼoʼn kykʼwale mas kyoklen nabʼil toj Tyol Dios? (Proverbios 2:10, 11).
11 Che yoline tiʼj tzeʼn o che onin qe nabʼil toj Tyol Dios kyiʼje. Aj kyuʼjine tiʼj Biblia moqa aj tjaw kyuʼjine taqikʼ Tyol Dios te junjun qʼij, bʼaʼn tuʼn kyyoline tiʼj tzeʼn o che onin qe nabʼil toj Tyol Dios kyiʼje. Jun techel, ¿in nelpe kynikʼ kykʼwale tiʼj qa nim toklen tuʼn kyok te aqʼunal xjal ex tuʼn miʼn kysbʼun? (Heb. 13:18). Ax ikx, jaku che yoline tiʼj tzeʼn in che onin qe nabʼil toj Tyol Dios tuʼn miʼn ttzaj jun yabʼil qiʼj ex tuʼn qtzalaj (Prov. 14:29, 30). Qa ma che yoline kyukʼil kykʼwale kyiʼj qe consej in tzaj tqʼoʼn Biblia qe, kʼokel kyqʼoʼn mas kyoklen (kjawil uʼjit Proverbios 2:10, 11).
12. ¿Tiʼ in bʼant tuʼn jun mejebʼleʼn tuʼn kyonin tiʼj kykʼwal tuʼn tel tnikʼ tiʼj qa mas bʼaʼn tuʼn t-xi tnimen qe nabʼil toj Tyol Dios?
12 In tzaj tqʼamaʼn Steve ex t-xuʼjil tzeʼn in che onin tiʼj Ethan, aju kykʼwal, tuʼn tok tqʼoʼn twitz tiʼj tkʼujlabʼil Jehová at qiʼj aj ttzaj tqʼoʼn qe consej qe: «In xi qqanine qe xjel lu te: ‹¿Tiquʼn taj Jehová tuʼn t-xi qnimen nabʼil lu? ¿Tzeʼn in tzaj tyekʼin nabʼil lu qa kʼujlaʼn qo tuʼn Jehová? ¿Tiʼ jaku tzaj qiʼj qa ma mintiʼ ma txi qnimen?›». O tzʼonin jlu tiʼj Ethan tuʼn tchʼiy mas qʼuqbʼil tkʼuʼj kyiʼj nabʼil in tzaj tqʼoʼn Jehová qe. In tzaj tqʼamaʼntl Steve jlu: «Qaje tuʼn tel tnikʼ Ethan tiʼj qa mas bʼaʼn qe consej tkux toj Biblia twitzju kyximbʼetz xjal».
13. ¿Tzeʼn jaku txi kyyekʼin mambʼaj kye kykʼwal tuʼn t-xi kybʼinchaʼn aju in nel kynikʼ tiʼj? Yolina tiʼj jun techel.
13 Kyyekʼinxe kye kykʼwale tzeʼn tuʼn t-xi kybʼinchaʼn aju in nel kynikʼ tiʼj toj Biblia. Jaku bʼant jlu kyuʼne ik tzeʼn aj ttzaj kyqʼamaʼn maestro kye kykʼwale tuʼn tjaw kyuʼjin jun libro toj escuela. Bʼalo in yolin libro kyiʼj xjal in kubʼ kybʼinchaʼn junjun tiʼchaq nya bʼaʼn toj twitz Jehová, ik tzeʼn yaẍbʼil moqa bʼiybʼel. Ex bʼalo in tzaj tyekʼin libro qa bʼaʼn aju in bʼant kyuʼn. Pero jaku che onine kyiʼj kykʼwale tuʼn tok kymojbʼaʼn aju in bʼant kyuʼn xjal lu tukʼilju in tzaj tqʼamaʼn Biblia (Prov. 22:24, 25; 1 Cor. 15:33; Filip. 4:8). Jakulo tzʼonin jlu kyiʼj tuʼn tel kynikʼ tiʼj qa mas bʼaʼn tuʼn t-xi kybʼiʼn qe consej tkuʼx toj Tyol Dios. Ex qa ma tzaj tqanin maestro moqa qe kyukʼil tiʼ kyximbʼetz kykʼwale tiʼj libro, jaku che yolin tiʼj qokslabʼil.
KYXNAQʼTZANXE QE KYKʼWALE TUʼN KYYOLIN TIʼJ KYOKSLABʼIL
14. ¿Alkye jun xnaqʼtzbʼil jaku che tzaj xobʼ kuʼxun tuʼn kyyolin tiʼj ex tiquʼn?
14 Jakulo che tzaj xobʼ qe kuʼxun tuʼn kyyolin tiʼjju nimen kyuʼn kyukʼil txqantl. Jun techel, jaku che tzʼaj chʼixwi tuʼn t-xi kychikʼbʼaʼn tiquʼn mintiʼ in xi kynimen aju xnaqʼtzbʼil tiʼj evolución, mas qa in tzaj tqʼamaʼn kymaestro qa ax tok xnaqʼtzbʼil lu. ¿Tzeʼn jaku che onine kyiʼj kykʼwale tuʼn tok qeʼ kykʼuʼj tiʼjju nimen kyuʼn ex tuʼn kykolin tiʼj?
15. ¿Tiʼ jaku tzʼonin kyiʼj kuʼxun tuʼn tok qeʼ mas kykʼuʼj tiʼjju nimen kyuʼn?
15 Che onine kyiʼj tuʼn tok qeʼ mas kykʼuʼj tiʼjju nimen kyuʼn. Mintiʼ tuʼn kytzaj chʼixwi kykʼwale tuʼn t-xi kynimen qa at jun Bʼinchal qe (2 Tim. 1:8). Axpe ikx at nim científico in nel kynikʼ tiʼj qa at jun kubʼ bʼinchante qe tiʼchaq. Tuʼnju alkye tten bʼinchaʼn qe tiʼchaq, in nel kynikʼ tiʼj qa at nimxix tnabʼil aju kubʼ bʼinchante kye. Tuʼntzunju, mintiʼ in xi kynimen xnaqʼtzbʼil tiʼj evolución, aju in xi xnaqʼtzaʼn kyoj escuela twitz tkyaqil Txʼotxʼ. Juntl tiʼ jaku tzʼonin kyiʼj kykʼwale tuʼn tok qeʼ mas kykʼuʼj tiʼjju nimen kyuʼn aju qa ma che ximen tiʼjju o tzʼonin kyiʼj junjuntl erman tuʼn t-xi kynimen qa at jun Bʼinchal qe. c
16. ¿Tzeʼn jaku che onin mambʼaj kyiʼj kykʼwal tuʼn kykolin tiʼj qa at jun Bʼinchal qe? (1 Pedro 3:15; ax ikx qʼonka twitza tiʼj tilbʼilal).
16 Che onine kyiʼj tuʼn kykolin tiʼjju nimen kyuʼn (kjawil uʼjit 1 Pedro 3:15). Bʼalo jaku tzʼonin kyiʼj qa ma kubʼ kyxnaqʼtzane junjun xnaqʼtzbʼil tok kybʼi «¿Creación o evolución?» toj sección «Los jóvenes preguntan» toj jw.org. Ex jaku txi kyqanine kye alkye jun xnaqʼtzbʼil jaku tzʼajbʼen kyuʼn tuʼn kyonin kyiʼj junjuntl tuʼn t-xi kynimen qa at jun Bʼinchal qe. Ex bʼaʼn tuʼn tkubʼ kyyekʼin kywitze tzeʼn jaku txi kychikʼbʼaʼn. Ax ikx, bʼaʼn tuʼn t-xi kynaʼne kye tuʼn miʼn kyqʼojin kyukʼil qe kyukʼil. Pero qa at jun taj tuʼn tyolin, jaku txi tchikʼbʼaʼn kyukʼil yol nya kwest tuʼn tel tnikʼ tiʼj ex toj ttxolil. Jun techel, jakulo tzaj tqʼamaʼn jun kyukʼil jlu: «Oʼkx in xi wokslaʼne aju in nok nkeʼyine, ex naʼmx tok nkeʼyine Dios». Pero jakulo txi ttzaqʼweʼn kykʼwale jlu: «Ximana tiʼj qa in bʼeta tjaqʼ tzeʼ ex in nok tqʼoʼna twitza tiʼj jun pozo o bʼaj bʼinchaʼn tukʼil abʼj moqa xaq. ¿Jakupe kubʼ t-ximana qa tuʼnx tibʼ pozo bʼant? Entonces, qa at jun kubʼ bʼinchante pozo lu, ax ikx at jun kubʼ bʼinchante kykyaqil qe tiʼchaq».
Aj kyyolin kʼwal kyukʼil qe kyukʼil, mas bʼaʼn qa ma txi kychikʼbʼaʼn kyukʼil yol nya kwest tuʼn tel kynikʼ tiʼj ex toj ttxolil. (Qʼonka twitza tiʼj párrafo 16 ex 17). d
17. ¿Tzeʼn jaku che yolin kʼwal tiʼj Biblia? Yolina tiʼjju jaku txi tqanin jun kuʼxun te tukʼil.
17 Kyqʼamanxe kye tuʼn t-xi kyjyoʼn tumel tuʼn kyyolin tiʼj Tyol Dios (Rom. 10:10). Tuʼn qyolin tiʼj Tyol Dios, ik tten ik tzeʼn tuʼn tbʼant qtokarin tiʼj jun instrumento. Aj t-xi tzyet qxnaqʼtzan bʼalo kwest in bʼant quʼn, pero aj tikʼ ambʼil ya nya kwest in nela qe tuʼnju in qo naqʼet tiʼj. Ax jlu in bʼaj aj qyolin tiʼj qokslabʼil, tuʼntzunju, maslo bʼaʼn qa ma qo yolin tiʼj jun xnaqʼtzbʼil nya kwest tuʼn t-xi qchikʼbʼaʼn. Jun techel, jakulo txi kyqanin kykʼwale xjel lu te jun tukʼil: «¿Ojtzqiʼn tuʼna qa nim qe científico in nel kykanoʼn kyiʼj junjun tiʼchaq ateʼ twitz Txʼotxʼ? Qʼonka twitza tiʼj video lu». Ex jaku txi tyekʼin jun kyxol qe video «¿Atpe jun Bʼinchal kye moqa mintiʼ?». Yajxitl, jaku txi tqanin xjel lu: «Qa in jaw nimsaʼn jun científico aju noq in nel tkanoʼn kyiʼj junjun txkup moqa kyiʼj junjun tzeʼ, ¿alkyetzun jaku jaw qnimsaʼn tuʼnju o che kubʼ tbʼinchaʼn qe txkup ex qe tzeʼ?». Qa ma bʼant jlu kyuʼn, jakulo tzaj tgan tukʼil tuʼn tel mas tnikʼ tiʼj Jehová.
KUKX CHE ONINE KYIʼJ TUʼN TCHʼIY QʼUQBʼIL KYKʼUʼJ
18. ¿Tzeʼn jaku che onin mambʼaj kyiʼj kykʼwal tuʼn tchʼiy mas qʼuqbʼil kykʼuʼj?
18 In qo anqʼin kyxol xjal mintiʼ in xi kynimen qa at Jehová (2 Ped. 3:3). Tuʼntzunju, aqeye mambʼaj, che onine kyiʼj kykʼwale tuʼn kyxnaqʼtzan kyiʼj xnaqʼtzbʼil jaku tzʼonin kyiʼj tuʼn tok qeʼ mas kykʼuʼj tiʼj Tyol Dios ex kyiʼj nabʼil tkuʼx toj. Che yoline kyukʼil kyiʼj tbʼinchbʼen Jehová tuʼntzun tok qeʼ kykʼuʼj tiʼj ex tuʼn kyximen kyiʼj tbʼinchbʼen. Ax ikx, che yoline kyiʼj profecía o japun kywiʼ. Ex che naʼne Dios kyiʼj ex junx kyukʼil. Jaku tzʼok qeʼ kykʼuʼje tiʼj qa tzul tkʼiwlaʼn Jehová aju kbʼantel kyuʼne tuʼn kyonine kyiʼj kykʼwale tuʼn tchʼiy qʼuqbʼil kykʼuʼj (2 Crón. 15:7).
BʼITZ 133 Qo ajbʼen te Jehová toj qkuʼxumal
a Qa taja tuʼn tel mas tnikʼa tiʼj jlu, jaku tzʼok tkeʼyina video Las maravillas de la creación revelan la gloria de Dios: Patrones en la naturaleza toj jw.org.
b Qa o kubʼaj tuʼn tkubʼ kyxnaqʼtzaʼn kykʼwale uʼj Tzalaja tiʼj tanqʼibʼila jaku che xnaqʼtzane juntl maj kyiʼj junjun xnaqʼtzbʼil tkubʼ toj sección 3 ex 4, jatumel in yolin kyiʼj nabʼil toj Tyol Dios.
c Qʼonka twitza tiʼj xnaqʼtzbʼil «Por qué creemos que hay un Creador», toj uʼj ¡Despertad! te septiembre te 2006, ex folleto El origen de la vida. Cinco cuestiones dignas de análisis. Tuʼn kykanet mas techel tuʼna, qʼonka twitza kyiʼj junjun video «Aju kyximbʼetz xjal tiʼjju tzeʼn tzaj tzyet qanqʼibʼil» toj jw.org.
d TQANIL TIʼJ TILBʼILAL: In xi tyekʼin jun kuʼxun testigo de Jehová jun video te jun kuʼxun tgan qe dron. At video lu toj kʼloj video «¿Atpe jun Bʼinchal kye moqa mintiʼ?».
