Xi ttzʼibʼin apóstol Pablo qe yol lu te Timoteo, aju ax ikx ansyan: «Kxel nkyuwsaʼne teya twitz Dios ex twitz Qajaw Jesucrist ex kywitz qe t-anjel skʼoʼmaj qe tuʼn, japunx tuʼna tkyaqil jlu, miʼn txi tmaʼn naja qa at til jun okslal qa naʼnxtoq tbʼinteya, ex miʼn tzʼok tqʼoʼn twitza tiʼj t-xilen xjal» (1 Tim. 5:21). Pero, ¿alkyeqe anjel skʼoʼn maj?

Tuʼn tel qnikʼ tiʼj jlu, qo yolin kyiʼj qeju mlay che ten kyxol anjel lu. Nya atz yolin Pablo kyiʼj qeju 144 mil. Tej t-xi ttzʼibʼin Pablo qe yol lu te Timoteo, naʼmxtoq t-xi tzyet tuʼn kyxiʼ okslal skʼoʼn maj toj kyaʼj. Naʼmxtoq kyok apóstol ex junjuntl okslal skʼoʼn maj ik tzeʼn qe anjel, tuʼntzunju, mlay che ten kyxol anjel skʼoʼn maj (1 Cor. 15:​50-54; 1 Tes. 4:​13-17; 1 Juan 3:2).

Ax ikx, mintiʼ in yolin kyiʼj anjel mintiʼ e nimen te Jehová tej ttzaj Diluvio. Atz e ok lepeʼ anjel lu tiʼj Satanás ex e ok te demonio ex te aj qʼoj tiʼj Jesús (Gén. 6:2; Luc. 8:​30, 31; 2 Ped. 2:​4, TNM). Toj ambʼil tzul, che kbʼelex tqʼoʼn Jesús qe demonio lu «tuj qlolj» toj mil abʼqʼi, ex yajxitl che kbʼel najsaʼn junx tukʼil Satanás (Jud. 6; Apoc. 20:​1-3, 10).

Aj tyolin 1 Timoteo 5:21 kyiʼj ‹anjel skʼoʼn maj› jaku txi qqʼamaʼn qa atz in yolin kyiʼj anjel ateʼ toj kyaʼj ex tzʼaqli qe, tuʼnju ax ikx in tzaj qʼamaʼn qa ateʼ junx tukʼil Dios ex Jesús ex qa in che onin kyiʼj.

Ateʼ nim mil anjel in che ten tzʼaqli twitz Jehová (Heb. 12:​22, 23). Ex parece que nya ax aqʼuntl in xi tqʼoʼn kye (Apoc. 14:​17, 18). Jun maj, xi tqʼoʼn Jehová toklen jun anjel tuʼn tkubʼ tbʼyoʼn 185 mil soldad te Asiria (2 Rey. 19:35). Ex tqʼama Jesús jlu: «Kʼelex kyiʼn tuj nkawbʼile kykyaqil qeju in che kubʼ tzʼaq xjal tuj il kyuʼn, kyukʼix qeju in kybʼinchaʼn mya bʼaʼn». In tzaj kyyekʼin yol lu qa noqlo jun grupo anjel kʼonil tuʼn tbʼant jlu (Mat. 13:​39-41). Bʼalo che ajbʼel junjuntl anjel tuʼn kyok chmet «qeju skʼoʼmaj» che xeʼl toj kyaʼj (Mat. 24:31). Ax ikx, in xi qʼamaʼn kye junjuntl anjel tuʼn kyxqʼuqin qiʼj toj qbʼe, ik tzeʼn in tzaj tqʼamaʼn Salmo 91:11 (Mat. 18:10; mojbʼankuya tukʼil Mateo 4:11 ex tukʼil Lucas 22:43).

Ik tzeʼn ma tzʼel qnikʼ tiʼj, aqeju ‹anjel skʼoʼn maj› in yolin 1 Timoteo 5:21 tiʼj bʼalo atz in yolin kyiʼj anjel xi qʼoʼn jun aqʼuntl kye aju at toklen kyukʼil congregación. Toj capítulo lu, yolin Pablo kyiʼj ansyan ex xi tqʼoʼn consej kye erman tuʼn kynimen kye. Ax ikx xi tqʼamaʼn kye ansyan tuʼn miʼn tok kyqʼoʼn kywitz tiʼj kyyajil xjal ex tuʼn miʼn tbʼant naj jun tiʼ kyuʼn. ¿Tiquʼn? Tqʼama Pablo qa nim toklen tuʼn tbʼant jlu kyuʼn tuʼnju in che ajbʼen kye erman «twitz Dios ex twitz Qajaw Jesucrist ex kywitz qe t-anjel skʼoʼmaj». Toj juntl yol, in nok tqʼoʼn Jehová, Jesús ex «qe t-anjel skʼoʼmaj» kywitz tiʼj tzeʼn in che xqʼuqin ansyan kyiʼj erman. Tuʼntzunju, ateʼ anjel in xi qʼoʼn jun kyaqʼun at toklen tukʼil congregación, ik tzeʼn tuʼn kyxqʼuqin kyiʼj tmajen Jehová, tuʼn kyonin tiʼj pakbʼabʼil ex tuʼn t-xi kyqʼoʼn tqanil te Jehová tiʼjju in nok kykeʼyin (Mat. 18:10; Apoc. 14:6).