¿Ope jaw tuʼjina qe uʼj Aju Xqʼuqil kʼitzqeku che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Alkye tmod Jehová in kubʼ tyekʼin kyukʼil xuʼj?

Toj twitz Jehová junx kyoklen xuʼj kyukʼil xinaq. In che ok tbʼiʼn, in ximen tiʼjju in kubʼ kynaʼn ex in nel tnikʼ tiʼj nya bʼaʼn in che ok weʼ twitz. Ex in nok qeʼ tkʼuʼj Jehová tiʼj qa kjapunel aqʼuntl kyuʼn aju o txi tqʼoʼn kye (w24.01, página 15 ex 16).

¿Tzeʼn jaku txi qbʼinchaʼn aju in tzaj tqʼamaʼn Efesios 5:7: «Kyjaʼtzun miʼn tzʼok kymojbʼan kyibʼe kyukʼil»?

Tqʼama apóstol Pablo tuʼn miʼn tok qmojbʼan qibʼ kyukʼil xjal mintiʼ in che onin qiʼj tuʼn t-xi qnimen qe tkawbʼil Jehová. Nya oʼkx in yolin tiʼj tuʼn miʼn qten kyukʼil, sino ax ikx in yolin tiʼj tuʼn miʼn tok qamiwen qibʼ kyukʼil kyoj redes sociales (w24.03, página 22 ex 23).

¿Alkyeqe nya ax tok tqanil il tiʼj tuʼn kyel qikʼun?

Nim toklen tuʼn tten qnabʼil, tuʼnju jakulo tzaj kysamaʼn qamiw jun tqanil qe ex mintiʼ ojtzqiʼn kyuʼn qa ax tok. Moqa jakulo tzaj samaʼn jun correo electrónico qe kyuʼn xjal mintiʼ ojtzqiʼn kywitz quʼn. Ax ikx il tiʼj tuʼn tten qnabʼil kyiʼj apóstata in kubʼ kyyekʼin qa kyaj tuʼn tel kynikʼ tiʼj Tyol Dios (w24.04, página 12).

¿Tiʼ ojtzqiʼn quʼn ex tiʼ mintiʼ ojtzqiʼn quʼn tiʼj alkye tten kʼokel tjuzgarin Jehová Salomón, qe xjal e kyim toj Sodoma ex Gomorra ex qeju e kyim tuʼn Diluvio?

Mintiʼ ojtzqiʼn quʼn qa o che kubʼ tnajsaʼn Jehová te jumajx, pero qʼuqli qkʼuʼj tiʼj qa ojtzqiʼn tkyaqil tqanil tuʼn Jehová ex at nim qʼaqʼbʼil tkʼuʼj (w24.05, página 3 ex 4).

Tuʼnju in nok Jehová «ik tzaʼn jun pik», ¿tiʼ in tzaj tyekʼin jlu qe? (Deut. 32:4).

Jaku qo klet tuʼn Jehová qa ma tzʼok qklon qibʼ tiʼj. Jaku tzʼok qeʼ qkʼuʼj tiʼj, tuʼnju kukx in japun twi tyol. Ex mintiʼ in chʼexpaj tmod ex aju in kubʼ t-ximen tuʼn tbʼant tuʼn (w24.06, página 26 a 28).

¿Tiʼ jaku tzʼonin qiʼj tuʼn qnaqʼet toj juntl congregación?

Qeʼk qkʼuʼj tiʼj qa kʼonil Jehová qiʼj, ik tzeʼn bʼant tuʼn kyukʼil tmajen toj ambʼil ojtxe. Miʼn tzʼok qmojbʼaʼn ojtxe congregación tukʼilju akʼaj. Sino bʼaʼn tuʼn qonin tiʼj akʼaj congregación ex qqʼonk tilil tuʼn kyok erman te qamiw (w24.07, página 26 a 28).

¿Tiʼ xnaqʼtzbʼil jaku tzʼel qiʼn kyiʼj oxe techel yolin Jesús tiʼj toj Mateo capítulo 25?

Aju techel kyiʼj rit ex kyiʼj chip in tzaj kyyekʼin qe qa nim toklen tuʼn qten tzʼaqli. Atzun kyiʼj laj txin, in tzaj tnaʼn qe qa il tiʼj tuʼn tbʼaj qbʼinchaʼn qten ex tuʼn qxqʼuqin. Ex aju techel kyiʼj talento, in tzaj t-xnaqʼtzaʼn qe tuʼn qok te aqʼunal xjal (w24.09, página 20 a 24).

¿Jniʼ twaʼlil twitz tja Dios bʼant tuʼn Salomón?

In tzaj qʼamaʼn 2 Crónicas 3:4 kyoj junjun ojtxe uʼj qa junlo 120 codo twaʼl, moqa 53 metro. Pero atzun kyoj junjuntl uʼj in tzaj qʼamaʼn, qa noq 20 codo moqa 9 metro twaʼlil. Atzun tqanil lu aju mas in tjunin tibʼ kyukʼil tqanil tiʼj tpiʼmel tkajonil templo (w24.10, página 31).

¿Tiʼ t-xilen tuʼn tten «junx kyxuʼjil» onil kye ansyan? (1 Tim. 3:12).

Aju onil kye ansyan o kubʼ mojeʼ oʼkx tuʼn tten jun t-xuʼjil, ex mintiʼ tuʼn ttzaj qʼamaʼn tiʼj qa in yaẍin. Ax ikx mintiʼ tuʼn tpon tkʼuʼj kyiʼj junjuntl xuʼj (w24.11, página 19).

¿Tzeʼn ojtzqiʼn quʼn qa nya atz in yolin Juan 6:53 tiʼj tzeʼn tuʼn tok Wabʼj te Qale te Jesús?

Yolin Jesús toj Juan 6:53 tuʼn t-xi kychyoʼn xjal tchibʼjal ex tuʼn t-xi kykʼaʼn tchkʼel. Xi tqʼamaʼn jlu kye junjun judiy naʼmxtoq tok qeʼ kykʼuʼj tiʼj tej attoq toj Galilea toj abʼqʼi 32. Noqtzun tuʼnj, tej tkubʼ tikʼsaʼn Wabʼj te Qale atz Jerusalén, tej otoq tzikʼ jun abʼqʼi, xi tqʼamaʼn yol lu kye qeju che kawil tukʼil toj kyaʼj (w24.12, página 10 ex 11).