1, 2. ¿Tiʼ xi tqʼamaʼn anjel kye xuʼj e pon jatumel otoq kux maquʼn Jesús, ex tiʼ tqanil xi tqʼoʼn Jesús kye?

TEJ otoq tzʼetz Qʼij toj 16 te nisán toj abʼqʼi 33, i eʼx jun kʼloj xuʼj in che ajbʼentoq te Dios atz jatumel otoq kux maquʼn t-xmilal Jesús maske in che bʼisintoq. Ya otoq tzikʼ mas te 36 or tkuʼxlen maquʼn. I eʼx xuʼj lu tuʼntzun tok kyqʼoʼn junjun tkʼokʼjal tiʼj t-xmilal Jesús ex tbʼanel aseyt. Noq e jaw labʼin xuʼj tuʼnju ya mintiʼ kanet t-xmilal Jesús toj muqbʼil kyuʼn. Xi tqʼamaʼn jun anjel kye qa ya otoq jaw anqʼin Jesús kyxol kyimni ex tqʼamatl jlu: «Lu kxel nej kywitze tuʼn kypone tuj Galiley; atzun kʼokel kykeʼyine» (Mat. 28:1-7; Luc. 23:56; 24:10).

² Tej kyikʼ bʼet xuʼj, ax Jesús pon laqʼeʼ kytxlaj ex xi tqʼamaʼn jlu kye: «Kyxiʼye, kyqʼonxe tqanil kye wermaniye tuʼn kyxiʼ tuj Galiley, ex atzun chin okel keʼyine kyuʼn» (Mat. 28:10). At jun tqanil nim toklen tajtoq Jesús tuʼn t-xi tqʼamaʼn kye t-xnaqʼtzbʼen, tuʼntzunju kubʼ t-ximen tuʼn tok jun chmabʼil kyukʼil tej tjaw anqʼin.

3, 4. ¿Tiquʼn jaku txi qqʼamaʼn qa nya oʼkx kye apóstol xi tqʼamaʼn Jesús kawbʼil tkuʼx toj uʼj te Mateo 28:19 ex 20? (Qʼonka twitza tiʼj tilbʼilal tok tiʼj t-xkʼomil).

³ (Kjawil uʼjit Mateo 28:16-20). Tojju chmabʼil ok tuʼn Jesús, xi tchikʼbʼaʼn kye t-xnaqʼtzbʼen alkye aqʼuntl mas nim toklen tuʼn tbʼant kyuʼn toj ambʼil aju, ex ax aqʼuntl lu in bʼant quʼn jaʼlo. Tqʼama jlu kye: «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, [...] kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye».

 ⁴ Taj Jesús tuʼn kypakbʼan kykyaqil xjal in che ok lepeʼ tiʼj. Nya oʼkx xi tqʼoʼn kawbʼil kye qeju 11 t-apóstol kukx e ten tukʼil. ¿Tiquʼn in xi qqʼamaʼn jlu? Tuʼnju nya oʼkx qe apóstol e ten toj chmabʼil ok tuʼn Jesús toj Galilea tej tqʼama tuʼn kyok xjal te t-xnaqʼtzbʼen. Bʼaʼn tuʼn ttzaj qnaʼn qa xi tqʼamaʼn anjel kye xuʼj qa kʼokeltoq kykeʼyin Jesús atz Galilea. Tuʼntzunju, axlo ikx e ten xuʼj toj chmabʼil aju. Ex tqʼama apóstol Pablo qa «kubʼ tyekʼun tibʼ [Jesús] kywitz mas te jweʼ syent erman» (1 Cor. 15:6). ¿Jatumel?

5. ¿Alkyeqe yekʼbʼil at tiʼj qa atz in yolin 1 Corintios 15:6 tiʼj chmabʼil ok Galilea, aju in tzaj tqʼamaʼn Mateo capítulo 28?

⁵ At nim tiquʼn tuʼn tok qeʼ qkʼuʼj tiʼj qa atztoq in ximen apóstol Pablo tiʼj chmabʼil ok Galilea, aju in tzaj tqʼamaʼn Mateo capítulo 28. ¿Tiquʼn? Tnejel, tuʼnju chʼixme kykyaqil qe t-xnaqʼtzbʼen Jesús atztoq tzajni qe toj Galilea. Tuʼntzunju, mastoq bʼaʼn tuʼn tok kychmon kyibʼ nim xjal twi jun witz te Galilea ex nya toj jun ja toj Jerusalén. Tkabʼ, otoqxi tzʼok tchmon tibʼ Jesús kyukʼil qeju 11 t-apóstol toj jun ja toj tnam Jerusalén tej tjaw anqʼin. Noqwit oʼkx kye t-apóstol tajtoq tuʼn t-xi tqʼamaʼn kawbʼil tuʼn kyxiʼ pakbʼal ex tuʼn kyok xjal te t-xnaqʼtzbʼen, jakutoq bʼant jlu tuʼn ax Jerusalén ex nya iltoq tiʼj tuʼn t-xi tqʼamaʼn kye t-apóstol, kye xuʼj ex kye junjuntl t-xnaqʼtzbʼen tuʼn tok kychmon kyibʼ atz Galilea (Luc. 24:33, 36).

6. ¿Alkye tten in tzaj tyekʼin Mateo 28:20 qa nim toklen tuʼn tjapun kawbʼil tuʼn kyok xjal te t-xnaqʼtzbʼen Jesús toj ambʼil jaʼlo, ex tzeʼn in japun quʼn?

⁶ Qo ximen tiʼj juntl tiquʼn. Nya oʼkx xi tqʼamaʼn Jesús kawbʼil tuʼn kyok xjal te t-xnaqʼtzbʼen kye qeju 11 t-apóstol. ¿Tiquʼn ojtzqiʼn jlu quʼn? Tuʼnju tqʼama jlu kye t-xnaqʼtzbʼen tej chʼixtoq tbʼaj yolin: «Lu qine chin tele kyukʼile tkyaqil qʼij akutzun in japun bʼaj mankbʼil tqʼijlalil» (Mat. 28:20). Ik tzeʼn tqʼama Jesús, nim xjal in che ok te t-xnaqʼtzbʼen toj ambʼil jaʼlo. Tkyaqil abʼqʼi chʼixme 300,000 xjal in jaw aʼ kywiʼ tuʼntzun kyok te testigo de Jehová. ¡Tbʼanelxix jlu!

7. ¿Tiʼ qo xnaqʼtzal tiʼj ex tiquʼn?

⁷ Ateʼ nim xjal in che xnaqʼtzan tiʼj Tyol Dios in che chʼiy toj kyokslabʼil ex in jaw aʼ kywiʼ. Pero ateʼ junjuntl in jawje kykʼuʼj tuʼn kyok te t-xnaqʼtzbʼen Jesús. Kygan tuʼn kyxnaqʼtzan, pero mintiʼ in ok tilil kyuʼn tuʼn tjaw aʼ kywiʼ. Qʼuqli qkʼuʼj tiʼj qa kyaj qeju in che qʼon xnaqʼtzbʼil tiʼj Tyol Dios tuʼn kyonin kyiʼj xjal tuʼn tkubʼ kybʼinchaʼn aju in nel kynikʼ tiʼj ex tuʼn kyok te t-xnaqʼtzbʼen Jesús. Toj xnaqʼtzbʼil lu, kʼelel qnikʼ tiʼj tzeʼn jaku qo onin kyiʼj xjal tuʼn tpon tbʼanel tqanil toj kyanmi ex tuʼn kychʼiy toj kyokslabʼil. ¿Tiquʼn nim toklen tuʼn tel qnikʼ tiʼj jlu? Tuʼnju kpol ambʼil tuʼn tkubʼ qximen qa kukx kxel qqʼoʼn xnaqʼtzbʼil te jun xjal moqa miʼn.

8. ¿Tiquʼn at maj kwest tuʼn tkuʼpin Tyol Dios toj kyanmi xjal?

⁸ Taj Jehová tuʼn kyajbʼen xjal te tuʼnju at kykʼujlabʼil tiʼj. Tuʼntzunju, qaj tuʼn tel kynikʼ qeju in che xnaqʼtzan tiʼj Xjan Uʼj qa kʼujlaʼnxix qe tuʼn Jehová ex qa in ximen tiʼj teyele junjun kye. Ax ikx qaj tuʼn tok kyqʼoʼn Jehová te «mambʼaj kye qe kʼwaʼl mintiʼ kyman [...] ex kolol kyiʼj qe mebʼa xuʼj» (Sal. 68:5). Aj in nok kyqʼoʼn xjal in che xnaqʼtzan tiʼj Xjan Uʼj toklen tkʼujlabʼil Jehová at kyiʼj, jaku pon jlu toj kyanmi ex jaku chʼiy kykʼujlabʼil tiʼj. Noqtzun tuʼnj, ateʼ junjun xjal kwest tuʼn t-xi kynimen qa at tkʼujlabʼil Jehová kyiʼj, tuʼnju mintiʼ kubʼ yekʼin kʼujlabʼil kyiʼj kyuʼn kytat tej kyjaw  chʼiy (2 Tim. 3:1, 3). Tuʼntzunju, qqʼamanx qe tbʼanel tmod Jehová kye akux in che xnaqʼtzan. Ex qo onin kyiʼj tuʼn tel kynikʼ tiʼj qa taj Jehová tuʼn tten kychwinqlal te jumajx ex qa taj tuʼn tonin kyiʼj tuʼn tkanet jlu kyuʼn. ¿Tiʼ mas jaku bʼant quʼn?

9, 10. ¿Alkyeqe uʼj bʼaʼn tuʼn kyajbʼen quʼn aj qqʼon xnaqʼtzbʼil tiʼj Tyol Dios, ex tiquʼn mas bʼaʼn tuʼn kyajbʼen jlu?

⁹ Che ajbʼenx qe uʼj quʼn ¿Tiʼ in tzaj t-xnaqʼtzaʼn Tyol Dios qe? ex aju uʼj «Ax che tenkje tuj tkʼujlalil Dios». O che bʼaj bʼinchaʼn uʼj lu tuʼn qonin kyiʼj xjal in che xnaqʼtzan tiʼj Tyol Dios tuʼn tkuʼpin tbʼanel tqanil toj kyanmi. Jun techel, toj tnejel xnaqʼtzbʼil te uʼj In tzaj t-xnaqʼtzaʼn in che tzaj tzaqʼweʼn xjel lu: ¿Atpe tkʼuʼj Dios qiʼj moqa mintiʼ? ¿Tiʼ in tnaʼn Dios aj ttzaj nya bʼaʼn qiʼj? Ex ¿jakupe tzʼoka te tamiw Jehová? Atzunte uʼj «Tkʼujlalil Dios» kʼonil tiʼj xjal tuʼn tel tnikʼ tiʼj qa mas tbʼanel tanqʼibʼil ktel qa ma chex tbʼiʼn nabʼil toj Xjan Uʼj ex kʼonil tiʼj tuʼn tten jun tbʼanel tamiwbʼil tukʼil Jehová. Maske o txi qqʼoʼn  xnaqʼtzbʼil kye junjuntl xjal kyukʼil uʼj lu, nim toklen tuʼn tbʼaj qbʼinchaʼn qten aj qxiʼ qʼol xnaqʼtzbʼil te teyele junjun xjal ex tuʼn qximen tiʼjju onbʼil taj.

¹⁰ Pero qo ximen tiʼj qa taj xjal tuʼn tel tnikʼ tiʼj jun xnaqʼtzbʼil toj juntl uʼj aju mintiʼ kyxol onbʼil tuʼn qqʼon xnaqʼtzbʼil. Qa ikju, jaku txi qqʼamaʼn te tuʼn tjaw tuʼjin uʼj tjunalx ex kukx qqʼonx xnaqʼtzbʼil te tukʼil jun kyxol qeju uʼj ma txi qqʼamaʼn.

11. ¿Toj alkye ambʼil bʼaʼn tuʼn t-xi tzyet tuʼn qnaʼn Dios tukʼil jun xjal in xnaqʼtzan, ex tzeʼn jaku qo yolin tukʼil tiʼj jlu?

¹¹ Bʼaʼn tuʼn t-xi tzyet xnaqʼtzbʼil quʼn tukʼil jun naʼj Dios. Qa ma txi tzyet tuʼn t-xnaqʼtzan jun xjal tiʼj Tyol Dios, mas tbʼanel qa ma txi qʼamet te tuʼn tok jun naʼj Dios aj t-xi tzyet t-xnaqʼtzbʼil ex aj tkubʼaj noq oʼkx aj tikʼ junjun seman. Bʼaʼn tuʼn qonin tiʼj xjal tuʼn tel tnikʼ tiʼj qa oʼkx jaku tzʼel qnikʼ tiʼj Xjan Uʼj qa ma txi qqanin xewbʼaj xjan te Dios. Ateʼ junjun erman in che yolin tiʼj naʼj Dios kyukʼil xjal aj tjaw kyuʼjin Santiago 1:5, aju in tzaj tqʼamaʼn jlu: «Qa at jun kyxole atx taj tnabʼl, qaninx tnabʼl te Dios». Tibʼajxi jlu in xi kyqanin te xjal: «¿Alkye tten jaku txi qqanin qnabʼil te Dios?». Bʼalo ax xjal jaku tzaj tzaqʼwente qa jaku txi qqanin toj naʼj Dios.

12. ¿Alkye tten jaku tzʼajbʼen Salmo 139:2 a 4 quʼn tuʼntzun qonin tiʼj jun xjal tuʼn tbʼant tnaʼn Dios?

¹² Qxnaqʼtzanx te xjal in xnaqʼtzan tuʼn tbʼant tnaʼn Dios. Qqʼamanx te xjal qa taj Jehová tuʼn tok tbʼiʼn qe tnaʼj Dios. Qqʼamanx te qa jaku txi tqʼamaʼn te Jehová tkyaqilju tkuʼx toj tanmi ex tiʼ in kubʼ tnaʼn, aju mlayxlo txi tqʼamaʼn te alkyexku juntl xjal. Ex bʼaʼn tuʼn ttzaj qnaʼn ya ojtzqiʼn tkyaqil qximbʼetz tuʼn Jehová (kjawil uʼjit Salmo 139:2-4). Ax ikx, jaku txi qqʼamaʼn te xjal tuʼn t-xi tqanin onbʼil te Dios tuʼn tbʼaj tchʼexpuʼn t-ximbʼetz ex tuʼn tonin tiʼj tuʼn tkyaj ttzaqpiʼn qe nya bʼaʼn kostumbr. Jun techel, qo ximen tiʼj jun xjal ma tzikʼ ambʼil in xnaqʼtzan tiʼj Tyol Dios ex mintiʼ in kyaj ttzaqpiʼn jun ninqʼij. Ojtzqiʼn tuʼn xjal qa nya bʼaʼn jlu, pero at junjun tiʼchaq tgan tiʼj ninqʼij. Qqʼamanx te tuʼn t-xi tqʼamaʼn te Jehová tiʼxix in kubʼ tnaʼn tiʼj ninqʼij ex bʼaʼn tuʼn tkubʼsan twitz tuʼn tonin tiʼj tuʼn tok tkʼujlaʼn aju kʼujlaʼn tuʼn (Sal. 97:10).

13. a) ¿Tiquʼn nim toklen tuʼn t-xi qqʼoʼn naj txokbʼil tiʼj xjal in xnaqʼtzan tiʼj Tyol Dios tuʼn t-xiʼ kyoj chmabʼil? b) ¿Tiʼ jaku bʼant quʼn tuʼntzun ttzalaj jun xjal aj tpon kyoj chmabʼil?

¹³ Qqʼonx naj txokbʼil tiʼj xjal tuʼn t-xiʼ kyoj chmabʼil. ¿Tiquʼn? Tuʼnju qa ma pon, jaku kuʼpin toj tanmi aju kʼokel tbʼiʼn ex aju kʼokel tkeʼyin, ex jaku tzʼonin tiʼj tuʼn tchʼiy toj tokslabʼil. Tuʼntzunju, bʼaʼn tuʼn t-xi qyekʼin video te aju tok tbʼi ¿Tiʼ in bʼaj toj jun Ja te Chmabʼil? ex qqʼonx txokbʼil tiʼj tuʼn t-xiʼ kyoj chmabʼil. Qa jaku bʼant, qqʼamanx te qa jaku qo pon qʼilte. Jun tiʼ jaku tzʼonin tiʼj xjal, aju qa ma chex qtxkoʼn junxichaq erman qʼol xnaqʼtzbʼil qukʼil. Kʼonil jlu tiʼj tuʼn tok tojtzqiʼn junjuntl erman ex mas ktzalajel aj tpon kyoj chmabʼil.

14. ¿Tiʼ jaku tzʼonin tiʼj xjal in xnaqʼtzan tiʼj Tyol Dios tuʼn tchʼiy tamiwbʼil tukʼil Jehová?

¹⁴ Qaj tuʼn qonin tuʼn tchʼiy xjal toj tokslabʼil (Efes. 4:13). Aj t-xi tzyet tuʼn t-xnaqʼtzan jun xjal tiʼj Tyol Dios, bʼalo in bʼant jlu tuʼn tuʼntzun tonin tiʼj. Pero aj tchʼiy tkʼujlabʼil tiʼj Jehová, jakulo tzʼok ten ximel tiʼj tzeʼn jaku tzʼonin kyiʼj txqantl, ik tzeʼn kyiʼj erman ateʼ toj kʼloj okslal (Mat. 22:37-39). Ax ikx, bʼaʼn tuʼn t-xi qjyoʼn jun tbʼanel ambʼil tuʼn t-xi qqʼamaʼn te xjal qa at jun tbʼanel qoklen tuʼn qonin tiʼj Tkawbʼil Dios aj t-xi qqʼoʼn jun oyaj toj Ja te Chmabʼil.

15. ¿Tzeʼn jaku qo onin tiʼj jun xjal in xnaqʼtzan tiʼj Tyol Dios tuʼn tex kywitz nya bʼaʼn?

 ¹⁵ Qxnaqʼtzanx te xjal tzeʼn jaku tzʼex twitz jun nya bʼaʼn. Jun techel, qo ximen tiʼj qa at jun xjal o tzʼok te pakbʼal ex in tzaj tqʼamaʼn qe qa o tzʼok tbʼinchaʼn jun erman jun nya bʼaʼn tiʼj. ¿Tiʼ kbʼantel quʼn? Miʼn tzʼokx qqʼon qibʼ toj nya bʼaʼn, sino mas tbʼanel tuʼn tkubʼ qxnaqʼtzaʼn tukʼil tiʼ in tzaj tqʼamaʼn Tyol Dios. Jaku txi qchikʼbʼaʼn te qa jaku bʼant kabʼe tiʼ tuʼn: jun, jaku kubʼ tnajsaʼn til erman, tkabʼ, qa mlay tzʼel naj tiʼj tkʼuʼj, jaku yolin tukʼil erman tuʼntzun tten tbʼanel kyxolx (mojbʼankuya tukʼil Mateo 18:15). Qo onin tiʼj xjal tuʼn t-ximen tiʼj tiʼ kxel tqʼamaʼn. Ax ikx bʼaʼn tuʼn t-xi qxnaqʼtzaʼn te tzeʼn jaku tzʼajbʼen JW Library^® tuʼn, ex aju Onbʼil tuʼn kyxnaqʼtzan testigos de Jehová ex aju qtembʼil toj jw.org^® tuʼntzun tel tnikʼ tiʼj qa at junxichaq tten tuʼn t-xi qbʼinchaʼn kyiʼj nya bʼaʼn. Qa mas ma bʼaj tbʼinchaʼn tten tzeʼn tuʼn tex kywitz junjun nya bʼaʼn naʼmxtoq tjaw aʼ twiʼ, mas jaku ten tbʼanel tamiwbʼil kyukʼil erman aj tbʼet ambʼil.

16. ¿Tiʼ tbʼanel jaku tzaj qa ma txi qqʼoʼn txokbʼil tiʼj juntl erman tuʼn t-xiʼ qukʼil qʼol xnaqʼtzbʼil?

¹⁶ Qqʼonx txokbʼil kyiʼj junjuntl erman tuʼn kyxiʼ qʼol xnaqʼtzbʼil qukʼil ex tiʼj ansyan in bʼet kyojele Ja te Chmabʼil aj tpon visitaril kʼloj okslal. ¿Tiquʼn? Tuʼnju nya oʼkx jaku tzʼok tojtzqiʼn xjal kywitz junjuntl erman ik tzeʼn ma qo yolin tiʼj toj taqikʼ 13, sino jakulo che onin tiʼj xjal toj junjuntl tten. Qo ximen tiʼj qa at jun xjal in xnaqʼtzan qukʼil ex in nok tilil tuʼn tkyaj ttzaqpiʼn tuʼn tsichʼen, pero mintiʼ in kubʼ tiʼj tuʼn. Qa ikju, qqʼonx txokbʼil tiʼj jun erman o kubʼ tiʼj jlu tuʼn maske kwest ela toj twitz tuʼn tkyaj ttzaqpiʼn. Jakulo txi tqʼoʼn erman junjun tbʼanel consej te xjal in xnaqʼtzan. Qa in kubʼ qximen qa mlay bʼant tuʼn t-xi qqʼoʼn xnaqʼtzbʼil twitz jun erman mas at tojtzqibʼil ik tzeʼn qe, qqʼamanx te tuʼn t-xi tqʼoʼn xnaqʼtzbʼil. Pero bʼaʼn tuʼn ttzaj qnaʼn qa jaku tzʼonin tiʼj xjal aju o tzikʼ toj kyanqʼibʼil txqantl erman. Ex miʼn tzikʼ tnaʼl quʼn tiʼ qaj tuʼn tbʼant quʼn, qaj tuʼn qonin tiʼj xjal tuʼn tchʼiy toj tokslabʼil.

17, 18. ¿Tiʼ kʼonil qiʼj tuʼn tel qnikʼ tiʼj qa kukx kxel qqʼoʼn xnaqʼtzbʼil tiʼj Tyol Dios te jun xjal moqa ya miʼn?

¹⁷ Qa mintiʼ in bʼant chʼixpubʼil tuʼn xjal, bʼaʼn tuʼn tkubʼ qxjelin qa kukx kxel qqʼoʼn xnaqʼtzbʼil te. Noqtzun tuʼnj, bʼaʼn tuʼn tel qnikʼ tiʼj jniʼ jaku bʼant tuʼn. Ateʼ junjun xjal in xi tiʼn mas ambʼil tuʼn tel kynikʼ tiʼj xnaqʼtzbʼil. Tuʼntzunju, bʼaʼn tuʼn tkubʼ qxjelin jlu: «¿In kubʼpe tyekʼin xjal qa in che bʼant chʼixpubʼil tuʼn ik tzeʼn in nel tnikʼ tiʼj toj Tyol Dios? ¿Ope txi tzyet tuʼn tkubʼ tbʼinchaʼn aju in nel tnikʼ tiʼj?» (Mat. 28:20). Maske chebʼe in nel tnikʼ jun xjal tiʼj Tyol Dios, bʼaʼn tuʼn tel qnikʼ tiʼj qa in che bʼant chʼixpubʼil tuʼn.

 ¹⁸ Pero, ¿tiʼ kbʼantel quʼn qa at jun xjal mintiʼxix in nok tqʼoʼn toklen t-xnaqʼtzbʼil tiʼj Tyol Dios? Qo ximen tiʼj qa o kubʼaj uʼj In tzaj t-xnaqʼtzaʼn tuʼn xjal, axpe ikx o txi tzyet tuʼn t-xnaqʼtzan tiʼj uʼj «Tkʼujlalil Dios», pero naʼmx txiʼ toj jun chmabʼil nix toj Nabʼitz Tkyimlen Jesucristo. Axpe ikx, kukx in tzaj tqʼamaʼn qa mlay bʼant tuʼn t-xnaqʼtzan noq tuʼn junjun tiʼchaq nya nim kyoklen. Qa a jlu in bʼaj, il-lo tiʼj tuʼn qyolin tukʼil xjal. *

19. ¿Tiʼ jaku txi qqʼamaʼn te jun xjal mintiʼ in nok tqʼoʼn toklen t-xnaqʼtzbʼil tiʼj Tyol ex tiʼ bʼaʼn tuʼn qximen tiʼj?

¹⁹ Jaku txi qqanin jun xjel te xjal ik tzeʼn jlu: «¿Alkye jun matij nya bʼaʼn in nok weʼya twitz, aju mintiʼ in tzaj tqʼoʼn ambʼil teya tuʼn toka te testigo de Jehová?». Qa ma tzʼel ambʼil in xnaqʼtzan xjal tiʼj Tyol Dios ex in tzaj tqʼamaʼn qe qa tgan aju in xnaqʼtzan tiʼj, pero in tzaj tqʼamaʼn qa mlayx tzʼok te testigo de Jehová. ¿Kukxpe kxel qqʼoʼn xnaqʼtzbʼil te xjal lu? Noqtzun tuʼnj, bʼalo tzma tnejel maj tzul tqʼamaʼn xjal qe tiquʼn mintiʼ in chʼiy tamiwbʼil tukʼil Jehová. Jun techel, bʼalo in kubʼ t-ximen jun xjal qa mlayx bʼant tuʼn tex pakbʼal ttziyele ja. Aj tok qbʼiʼn tiʼ t-ximbʼetz jun xjal, mas nya kwest jaku qo onin tiʼj.

20. ¿Alkye tten in nonin Hechos 13:48 qiʼj tuʼntzun tel qnikʼ tiʼj qa kukx kxel qqʼoʼn xnaqʼtzbʼil te jun xjal moqa ya miʼn?

²⁰ Bʼisbʼajil tuʼnju ateʼ junjun xjal in che xnaqʼtzan tiʼj Tyol Dios ik kymod ik tzeʼn kye aj Israel e ten toj tqʼijlalil Ezequiel. Xi tqʼamaʼn Jehová te profeta Ezequiel tiʼ t-ximbʼetz attoq kyiʼj, chi: «Ik nnoʼka te kye ik tzaʼn jun xjal mejor bʼitzan, mejor tqʼajqʼajel twiʼ, ex mejor chimbʼan tiʼj arpa. In kybʼiʼn ju tyola pero mintiʼ in kybʼinchaʼn aju in tmaʼna» (Ezeq. 33:32). Bʼalo kwest jaku tzʼela toj qwitz tuʼn t-xi qqʼamaʼn te jun xjal qa ya mlay txi qqʼoʼn xnaqʼtzbʼil te, pero qnaʼntz qa ya mintiʼ ambʼil (1 Cor. 7:29). Tuʼntzunju, mas bʼaʼn tuʼn qjyon kyiʼj junjuntl xjal kyaj tuʼn tel kynikʼ tiʼj Tyol Dios ex nya tuʼn tbʼaj qnajsaʼn ambʼil kyukʼil qeju nya kyaj tuʼn kyajbʼen te Jehová (kjawil uʼjit Hechos 13:48, TNM). *

21. ¿Alkye taqikʼ Tyol Dios ma jaw jyoʼn te abʼqʼi 2020, ex tiquʼn nim toklen jlu?

²¹ Kʼonil taqikʼ Tyol Dios te abʼqʼi 2020 qiʼj tuʼn tok tilil quʼn tuʼn kyok xjal te t-xnaqʼtzbʼen Jesús. Toj taqikʼ Tyol Dios lu, tkuʼx junjun yol tqʼama Jesús toj chmabʼil nim toklen ok twi witz te Galilea. Tqʼama jlu: «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene [...] ex tuʼn kybʼyan» (Mat. 28:19).