1. ¿Tiʼtoq in bʼant tuʼn jun kuʼxun tej naʼmxtoq tok tbʼiʼn jun chikʼbʼabʼil toj 1935?

TOJ 1926, jaw aʼ twiʼ jun kuʼxun te 18 abʼqʼi. Otoq che ok tman te Xnaqʼtzal tiʼj Tyol Dios, atzun kybʼi testigo de Jehová tok toj ambʼil aju. Attoq oxe kykʼwal ex kabʼe kymeʼjel, ex otoq txi kyxnaqʼtzaʼn kye tuʼn kyajbʼen te Jehová ex tuʼn kyok lepeʼ tiʼj techel kyaj tqʼoʼn Jesús. Tkyaqil abʼqʼi in waʼntoq kuʼxun lu tiʼj pan ex in kʼantoq vin toj Nabʼitz Tkyimlen Jesucristo, ik tzeʼn in bʼant kyuʼn kykyaqil Xnaqʼtzal tiʼj Tyol Dios kyoj abʼqʼi aju. Pero chʼexpaj tanqʼibʼil tej tok tbʼiʼn chikʼbʼabʼil lu: «Qeju nimxix kyajlal xjal». A ermano Joseph Rutherford etz qʼonte chikʼbʼabʼil lu toj 1935 toj jun nimaq chmabʼil ok atz Washington Estados Unidos. ¿Alkye akʼaj xnaqʼtzbʼil etz qʼamaʼn toj nimaq chmabʼil lu?

2. ¿Alkye akʼaj xnaqʼtzbʼil etz tqʼoʼn ermano Rutherford toj tchikʼbʼabʼil?

² Etz tqʼamaʼn ermano Rutherford toj tchikʼbʼabʼil alkyeqe che tel kyxol nimxix kyajlal xjal aju in yolin Apocalipsis 7:9 tiʼj. Toj ambʼil aju, in kubʼtoq kyximen erman qa atzun tkabʼin kʼloj xjal che xeʼl anqʼil toj kyaʼj tuʼnju mintiʼxix in che japun tkawbʼil Jehová kyuʼn. Ajbʼen Tyol Dios tuʼn ermano Rutherford tuʼn ttzaj tchikʼbʼaʼn qa aqeju nimxix kyajlal xjal, mlay cheʼx anqʼil toj kyaʼj. Sino atz in yolin jlu kyiʼj txqantl t-ẍneʼl Cristo che kjel anqʼin toj nimxix yajbʼil ex che anqʼil te jumajx tzalu twitz Txʼotxʼ (Apoc. 7:14). * Kyaj ttziyen Jesús jlu: «Ateʼ txqantl nẍneʼle mya a  ateʼ tuj peʼn lu; ax ikx il tiʼj tuʼn kytzaj wiʼne, ex ok kybʼiʼ tqʼajqʼajel nwiʼye; ex jun peʼnx ẍneʼl ktel ex junx pastor» (Juan 10:16). Aju kʼloj ẍneʼl lu, atz in yolin kyiʼj testigo de Jehová kukx in che ajbʼen te ex at qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ aj tok te jun tbʼanel najbʼil (Mat. 25:31-33, 46). Qo xnaqʼtzan tiʼj tzeʼn chʼexpaj kyanqʼibʼil nim tmajen Jehová ex aju kuʼxun te 18 abʼqʼi tuʼn akʼaj xnaqʼtzbʼil etz tqʼoʼn ermano Rutherford (Sal. 97:11; Prov. 4:18).

3, 4. Tej tok nimaq chmabʼil toj 1935, ¿tiʼ el kynikʼ nim erman tiʼj ex tiquʼn?

³ Xi tqanin ermano Rutherford jlu kye qeju otoq che pon toj nimaq chmabʼil: «Kynajsame, ¿jakupe che jaw weʼ kykyaqil qeju in kubʼ kyximen qa at qʼuqbʼil kykʼuʼj tuʼn kyanqʼin tzalu twitz Txʼotxʼ?». Tbʼanel ok ambʼil lu. Tqʼama jun ermano ten toj nimaq chmabʼil qa e pon junlo 20 mil xjal, ex e jaw weʼ mas te 10 mil. Tqʼamatzun ermano Rutherford jlu: «¡Atzun qe jlu in che ok te nimxix kyajlal xjal!». Tej tok kybʼiʼn erman jlu, nimxix e jaw tzalaj. Aqeju otoq che jaw weʼ, el kynikʼ tiʼj qa mintiʼ otoq che jaw skʼoʼn tuʼn xewbʼaj xjan tuʼn kyxiʼ anqʼil toj kyaʼj. Toj juntl qʼij, jaw aʼ kywiʼ 840 xjal ex chʼixme kykyaqil at qʼuqbʼil kykʼuʼj tuʼn kyanqʼin tzalu twitz Txʼotxʼ.

⁴ Atxix toj ambʼil aju, kyaj kytzaqpiʼn nim mil erman tuʼn kywaʼn tiʼj pan ex tuʼn kykʼan tiʼj vin toj Nabʼitz Tkyimlen Jesucristo, axpe ikx te kuʼxun ma qo yolin tiʼj. Nim kye kubʼ kyximen ik tzeʼn te jun ermano tej tqʼama jlu: «Toj abʼqʼi 1935 in waʼne mankbʼil maj tiʼj pan ex in kʼane tiʼj vin. El nnikʼe tiʼj qa mintiʼ otoq chin jaw skʼoʼne tuʼn xewbʼaj xjan tuʼn nxiʼye anqʼil toj kyaʼj. Sino attoq qʼuqbʼil nkʼuʼje tuʼn wanqʼine tzalu twitz Txʼotxʼ ex tuʼn wonine tiʼj aqʼuntl tuʼn tok te jun tbʼanel najbʼil» (Rom. 8:16, 17; 2 Cor. 1:21, 22). Atxix toj abʼqʼi aju, kukx in chʼiy kybʼet nimxix kyajlal xjal ex kukx in che aqʼunan tuʼntzun kyonin junx kyukʼil skʼoʼn maj ateʼx tzalu twitz Txʼotxʼ.

5. ¿Tiʼ t-ximbʼetz Jehová in ten kyiʼj qeju in kyaj kytzaqpiʼn tuʼn kywaʼn tiʼj pan ex tuʼn kykʼan tiʼj vino?

⁵ ¿Tiʼ t-ximbʼetz Jehová ten kyiʼj qeju kyaj kytzaqpiʼn tuʼn kywaʼn tiʼj pan ex tuʼn kykʼan tiʼj vin tej tkubʼaj abʼqʼi 1935? Ex, ¿tiʼ in bʼaj qa at jun testigo de Jehová in waʼn tiʼj pan ex in kʼan tiʼj vin tuʼnju in kubʼ t-ximen qa at qʼuqbʼil tkʼuʼj tuʼn t-xiʼ toj kyaʼj, pero yajxitl in nel tnikʼ tiʼj qa mintiʼ otoq jaw skʼoʼn? (1 Cor. 11:28). Ateʼ junjun e waʼn tiʼj emblema tuʼnju kubʼ kyximen qa atz tuʼn kyxiʼ anqʼil toj kyaʼj. Noqtzun tuʼnj, kyaj kytzaqpiʼn tuʼn kywaʼn tiʼj tuʼnju el kynikʼ tiʼj qa otoq che el tzpet, pero kukx e ajbʼen te Jehová. Tuʼntzunju, xi tqʼoʼn Jehová ambʼil kye tuʼn kyten kyxol txqantl ẍneʼl. Maske ya mintiʼ in che waʼn tiʼj pan ex mintiʼ in che kʼan tiʼj vino, kukx in cheʼx toj Nabʼitz Tkyimlen Jesucristo tuʼntzun t-xi kyqʼoʼn chjonte tiʼjju o bʼant tuʼn Jehová ex tuʼn Jesús kyiʼj.

6. ¿Tiʼ xi tqʼamaʼn Jesús kye anjel tuʼn tbʼant kyuʼn?

⁶ Ya chʼix tul nimxix yajbʼil. Tuʼntzunju, nim toklen tuʼn qxnaqʼtzan chʼintl tiʼjju in tzaj tqʼamaʼn capítulo 7 te uʼj Apocalipsis kyiʼj okslal skʼoʼn maj ex kyiʼj nimxix kyajlal xjal. Toj taqikʼ lu xi tqʼamaʼn Jesús kye anjel tuʼn tkubʼ kymaqoʼn kyaje kyqʼiqʼ te  kʼixbʼisabʼil. Mintiʼ tuʼn t-xi kyqʼoʼn anjel ambʼil tuʼn tok tkʼixbʼisaʼn kyqʼiqʼ Txʼotxʼ tzmaxi aj tok bʼaj sey te jumajx kyiʼj qeju skʼoʼn maj tuʼn Jehová (Apoc. 7:1-4). Che okel skʼoʼn maj te aj kawil ex te pal junx tukʼil Jesús toj kyaʼj, atzun oyaj lu tzul qʼoʼn kye tuʼnju kukx in che ajbʼen te Jehová (Apoc. 20:6). Nimxix ktzalajel Jehová, Jesús ex qe anjel aj ttzaj qʼoʼn oyaj kye qeju 144,000 toj kyaʼj.

7. Ik tzeʼn in tzaj tqʼamaʼn Apocalipsis 7:9 ex 10, ¿tiʼ ok tqʼoʼn Juan twitz tiʼj ex tiʼtoq in bʼant kyuʼn? (Qʼonka twitza tiʼj tilbʼilal tok tiʼj t-xkʼomil).

⁷ Tej otoqxi yolin apóstol Juan kyiʼj qeju 144,000 aj kawil ex pal, ok tqʼoʼn twitz tiʼj juntl tiʼ tbʼanelxix. Ok tkeʼyin nimxix kyajlal xjal e kyaj anqʼin toj Armagedón, mas nim kybʼet jlu kywitz qeju 144,000 ex ni jun jakutoq bʼant tajlante kye (kjawil uʼjit Apocalipsis 7:9, 10). «Tok kyxbʼalun saq» ex a jlu in tzaj tyekʼin qa mintiʼ in bʼaj kytzʼilsan kyibʼ kyukʼil tiʼchaq tokx tjaqʼ tkawbʼil Satanás ex qa kukx in che ajbʼen te Dios ex te Cristo (Sant. 1:27). In che jaw schʼin tuʼn tkyaqil tqʼajqʼajel kywiʼ ex in xi kyqʼamaʼn qa otoq che klet noq tuʼnju otoq bʼant tuʼn Jesús ex Jehová kyiʼj. Ax ikx, qʼiʼn t-xaq palmera kyuʼn toj kyqʼabʼ tuʼntzun tkubʼ kyyekʼin qa tbʼanel in nela toj kywitz tuʼnju otoq jaw tskʼoʼn Jehová Jesús te aj Kawil (jaku tzʼok tmojbʼaʼna tukʼil Juan 12:12, 13).

8. ¿Tiʼ in tzaj tqʼamaʼn Apocalipsis 7:11 ex 12 kyiʼj toj tja Jehová at toj kyaʼj?

⁸ (Kjawil uʼjit Apocalipsis 7:11, 12). ¿Tiʼ kymod qe toj tja Jehová at toj kyaʼj kubʼ kyyekʼin? Ok tkeʼyin Juan qa nimxix in che tzalaj ex in jaw kynimsaʼn Jehová tej tok kyqʼoʼn kywitz tiʼj nimxix kyajlal xjal. Nimxix ktzalajel Jehová kyukʼil qe toj tja at toj kyaʼj aj tok kyqʼoʼn kywitz tiʼj aj tjapun kywi yol lu, tuʼnju che kletel nimxix kyajlal xjal toj nimxix yajbʼil.

9. Ik tzeʼn in tzaj tyekʼin Apocalipsis 7:13 a 15, ¿tiʼ in bʼant kyuʼn nimxix kyajlal xjal toj ambʼil jaʼlo?

⁹ (Kjawil uʼjit Apocalipsis 7:13-15). Tqʼama Juan qa otoq tzʼel kytxʼjoʼn nimxix kyajlal xjal tiʼj kyxbʼalun ex qa otoq bʼaj saqix tiʼj kyxbʼalun tuʼn «tchkʼel Tal Ẍneʼl». A t-xilen jlu qa txubʼtxaj taʼ kyximbʼetz ex qa in tzalaj Jehová kyiʼj (Is. 1:18). O jaw aʼ kywiʼ okslal lu ex in che ajbʼen te Jehová ex qʼuqli kykʼuʼj tiʼj chojbʼil bʼant tuʼn Jesús, ex in che ok te tamiw Jehová (Juan 3:36; 1 Ped. 3:21). Tuʼn tkyaqil jlu, in che ajbʼen te Dios qʼijl ex qonikʼen, ex jaku che ten twitz tja Dios mintiʼ qʼanchaʼl. Toj juntl yol, aju tumel in najbʼen tuʼn Jehová tuʼn qajbʼen te. Toj ambʼil jaʼlo, in nok tilil kyuʼn tuʼn kypakbʼan ex tuʼn kyonin kyiʼj xjal tuʼn kyok te t-xnaqʼtzbʼen Jesús. Ex tnejel in che ximen tiʼj Tkawbʼil Jehová twitzju kye kyajbʼil (Mat. 6:33; 24:14; 28:19, 20).

10. ¿Tiʼ in nok qeʼ kykʼuʼj nimxix kyajlal xjal tiʼj ex alkye tziybʼil in che ayon tiʼj tuʼn tjapun twiʼ?

¹⁰ Aqeju nimxix kyajlal xjal, qʼuqlixix kykʼuʼj tiʼj qa kukx che okel kwentin tuʼn Dios aj tbʼaj nimxix yajbʼil. Ex kjapunel twi juntl tziybʼil lu, aju in che ayon txqantl ẍneʼl tiʼj: «Ex kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porke aqeju at tnejel ma che naj» (Apoc. 21:3, 4).

11, 12. a) Ik tzeʼn in tzaj tqʼamaʼn Apocalipsis 7:16 ex 17, ¿tiʼ kʼiwlabʼil in che ayon qeju nimxix kyajlal xjal tiʼj? b) Aj tok Nabʼitz Tkyimlen Jesucristo, ¿tiʼ in bʼant kyuʼn txqantl ẍneʼl ex tiquʼn in bʼant jlu kyuʼn?

¹¹ (Kjawil uʼjit Apocalipsis 7:16, 17).  Toj ambʼil jaʼlo, ateʼ nim tmajen Jehová in nikʼx weʼyaj kyuʼn tuʼn tpaj mintiʼ kypwaq moqa tuʼnju nya bʼaʼn in tzaj kyuʼn xjal moqa kyuʼn nimaq qʼoj. Atzun junjuntl ateʼ toj cárcel noq tuʼnju nimen kyuʼn. Noqtzun tuʼnj, in che tzalaj nimxix kyajlal xjal aj tel kynikʼ tiʼj qa kukx ktel kywa ex kukx tzul qʼoʼn xnaqʼtzbʼil kye tuʼn Jehová aj kykyaj anqʼin toj nimxix yajbʼil. Aj tkubʼ t-xitin Jehová tkyaqilju tokx tjaqʼ tkawbʼil Satanás, kʼokel tilil tuʼn tuʼn tok t-xqʼuqin qeju nimxix kyajlal xjal aj ttzaj tqʼoj aju kʼokel ik tzeʼn nimxix «taʼw kyaq». Ajtzun tbʼaj nimxix yajbʼil, kxel tiʼn Jesús kye qeju nimxix kyajlal xjal jatumel in «jatz twi aʼ te chwinqlal» ex che anqʼil te jumajx. Noqpe qo ximen tiʼj tbʼanel qʼuqbʼil kykʼuʼj nimxix kyajlal xjal at. Kyxol nim millón xjal o che anqʼin, oʼkx kye mlay che kyim (Juan 11:26).

¹² In xi kyqʼoʼn txqantl ẍneʼl nimxix chjonte te Jehová ex te Jesús tiʼjju tbʼanel qʼuqbʼil kykʼuʼj at. Maske mintiʼ o jaw tskʼoʼn Jehová kye tuʼn kyxiʼ toj kyaʼj, ax ikx kʼujlaʼn qe tuʼn ik tzeʼn in che ok tkʼujlaʼn qe skʼoʼn maj. Jaku jaw kynimsaʼn txqantl ẍneʼl ex qe skʼoʼn maj Jehová ex Jesús. Ex jun tumel jaku bʼant jlu kyuʼn, aju qa ma che pon toj Nabʼitz Tkyimlen Jesucristo.

13, 14. ¿Tiquʼn nim toklen tuʼn qxiʼ qkyaqilx toj Nabʼitz Tkyimlen Jesucristo?

¹³ Chʼixmi tkyaqil maj, qa ma pon mil xjal toj Nabʼitz Tkyimlen Jesucristo, at maj noq jun in waʼn tiʼj pan ex in kʼan tiʼj vino. A jlu in tzaj tyekʼin qa chʼixme kykyaqil qeju xjal in che pon toj Nabʼitz Tkyimlen Jesucristo, at qʼuqbʼil kykʼuʼj tuʼn kyanqʼin tzalu twitz Txʼotxʼ. Qa ikju, ¿tiquʼntzun in cheʼx? Qo ximen tiʼj jun techel, aj tkubʼ mojeʼ jun xjal, in che pon tamiw toj tmejebʼleʼn tuʼnju kʼujlaʼn kyuʼn. Ax ikx kye txqantl ẍneʼl, in cheʼx toj Nabʼitz Tkyimlen Jesucristo tuʼnju kyaj tuʼn tkubʼ kyyekʼin kykʼujlabʼil tiʼj ex kyiʼj skʼoʼn maj, ex kyaj tuʼn kyonin kyiʼj. Iktzun tten in kubʼ kyyekʼin qa in xi kyqʼoʼn chjonte tiʼj chojbʼil bʼant tuʼn Jesús, aju in tzaj tqʼoʼn ambʼil kye tuʼn kyanqʼin te jumajx tzalu twitz Txʼotxʼ.

 ¹⁴ Nya oʼkxju, ax ikx in chʼex txqantl ẍneʼl toj Nabʼitz Tkyimlen Jesucristo tuʼnju kyaj tuʼn t-xi kynimen aju kawbʼil kyaj tqʼamaʼn Jesús. Tej tkubʼ tikʼsaʼn Jesús Wabʼj te Qale kyukʼil t-apóstol kukx e ok lepeʼ tiʼj, tqʼama jlu kye: «Kybʼinchame jlu te nabʼl weye» (1 Cor. 11:23-26). Tuʼntzunju, kukx che xeʼl txqantl ẍneʼl toj Nabʼitz Tkyimlen Jesucristo akux ateʼ okslal skʼoʼn maj tzalu twitz Txʼotxʼ. Ax ikx, in xi kyqʼoʼn txokbʼil kyiʼj kykyaqil xjal tuʼntzun kypon toj qʼij lu.

15. ¿Tiʼ jaku bʼant tuʼn teyele junjun qe tuʼn tjaw qnimsaʼn Dios ex Cristo toj Wabʼj te Qale?

¹⁵ Aj tok Nabʼitz Tkyimlen Jesucristo, tzul tqʼoʼn jlu ambʼil qe tuʼn tjaw qnimsaʼn Jehová ex Cristo aj qbʼitzin ex aj qnaʼn Dios junx. Aju tbʼi chikʼbʼabʼil te abʼqʼi lu atzun jlu: «Qqʼonx chjonte te Dios ex te Cristo tiʼjju o bʼant kyuʼn qiʼj». Aj tok qbʼiʼn, mas kbʼel qnaʼn qa qaj tuʼn t-xi qqʼoʼn chjonte te Jehová ex te Cristo. Aj tikʼx qʼoʼn pan ex vino, bʼaʼn tuʼn qximen tiʼj qa in kubʼ techlaʼn jlu t-xmilal Jesús ex tchkʼel. Ax ikx tzul qnaʼn qa tzaj tqʼoʼn Jehová ambʼil tuʼn tkyim Tkʼwal tuʼn qpaj tuʼntzun ttzaj qʼoʼn ambʼil qe tuʼn qanqʼin te jumajx (Mat. 20:28). Kykyaqil qeju kʼujlaʼn Jehová ex Jesús kyuʼn, che pol toj Wabʼj te Qale.

16. ¿Tiquʼn in xi qqʼamaʼn qa nya mas nim kyoklen skʼoʼn maj kywitz qeju txqantl ẍneʼl?

¹⁶ Nya mas nim kyoklen skʼoʼn maj toj twitz Jehová kywitz qeju txqantl ẍneʼl. In che ok tkʼujlaʼn kabʼe kʼloj xjal lu. ¿Tiquʼn? Tuʼnju tzaj tqʼoʼn ambʼil tuʼn tkyim Tkʼwal tuʼn kylaqʼet skʼoʼn maj ex qe txqantl ẍneʼl. Oʼkx in chʼexpaj qʼuqbʼil kykʼuʼj, pero kykyaqilx il tiʼj tuʼn tok tilil kyuʼn tuʼn kukx kyajbʼen te Jehová ex te Cristo (Sal. 31:23). Ex bʼaʼn tuʼn ttzaj qnaʼn qa mintiʼ in tzaj tqʼoʼn Jehová mas xewbʼaj xjan kye skʼoʼn maj kywitz qeju txqantl ẍneʼl. In najbʼen xewbʼaj xjan tuʼn Jehová tuʼn tonin tiʼj teyele junjun tmajen, qa skʼoʼn maj moqa miʼn.

17. ¿Tiʼ in che ayon skʼoʼn maj tiʼj?

¹⁷ Mintiʼ in che ul itzʼj okslal skʼoʼn maj tukʼil qʼuqbʼil kykʼuʼj tuʼn kyxiʼ toj kyaʼj, sino a Jehová in kux qʼonte toj kyanmi. In che ximen okslal lu tiʼj qʼuqbʼil kykʼuʼj, in xi kyqʼamaʼn toj kynaʼj Dios ex kyaj tuʼn tpon ambʼil tuʼn ttzaj qʼoʼn oyaj kye toj kyaʼj. Ax tok, mintiʼ in pon kyximbʼetz tiʼj tzeʼn kʼokel kyxmilal aj kypon toj kyaʼj, pero kyaj tuʼn tpon ambʼil tuʼn kyten junx tukʼil Jehová, Jesús, qe anjel ex qe txqantl skʼoʼn maj ex tuʼn ttzaj qʼoʼn  kyoklen tuʼn kykawin toj kyaʼj (Filip. 3:20, 21; 1 Juan 3:2).

18. ¿Alkye ambʼil in che ayon txqantl ẍneʼl tiʼj?

¹⁸ Axju in kubʼ kynaʼn txqantl ẍneʼl ik tzeʼn kykyaqil xjal, nya kyaj tuʼn kykyim. Tuʼntzunju, in che ximen tiʼj qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ (Ecl. 3:11). Kyajxix tuʼn tpon ambʼil tuʼn kyonin tuʼn tok Txʼotxʼ te jun tbʼanel najbʼil tuʼntzun tjaw kybʼinchaʼn kyja twitz ex tuʼn tkux kyawaʼn kyawal ex tuʼn kyawaʼn kyiʼj bʼech. Ax ikx, kyaj tuʼn kyanqʼin toj tzalajbʼil jatumel ya mlay tzaj yabʼil kyiʼj nix kyiʼj toj kyja (Is. 65:21-23). Ex kyaj tuʼn tpon qʼij jatumel jaku cheʼx pasialil twitz tkyaqil Txʼotxʼ tuʼntzun tok kyqʼoʼn kywitz kyiʼj matij witz ex tiʼj mar, ex tuʼn tok kyojtzqiʼn tbʼanel tbʼinchbʼen Jehová. Pero aju mas nim toklen toj kywitz, aju qa kchʼiyel kyamiwbʼil tukʼil Jehová ex qa mas che tel nqayin ttxlaj junjun qʼij.

19. ¿Alkye ambʼil in tzaj qʼoʼn qe toj Nabʼitz Tkyimlen Jesucristo ex alkye qʼij kbʼel ikʼset toj abʼqʼi lu?

¹⁹ O tzaj tqʼoʼn Jehová jun tbʼanel qʼuqbʼil kykʼuʼj teyele junjun tmajen (Jer. 29:11). Ikju, tzaj tqʼoʼn Jehová ambʼil tuʼn tkyim Tkʼwal tuʼntzun qanqʼin te jumajx. Tuʼntzunju, aj tok Nabʼitz Tkyimlen Jesucristo, qkyaqilx jaku jaw qnimsaʼn Jehová ex Cristo. Atzun qʼij lu mas nim toklen kye kykyaqil tmajen Jehová. Toj abʼqʼi lu, kbʼel ikʼset Nabʼitz Tkyimlen Jesucristo toj sábado 27 te marzo aj tkux bʼaj Qʼij. Ateʼ junjun mlay che ok weʼ twitz nim nya bʼaʼn aj tkubʼ kyikʼsaʼn qʼij lu, atzun junjuntl che okel weʼ twitz ikʼbʼil ex junjuntl kbʼel kyikʼsaʼn toj cárcel. Kuchiwt che tzalaj kykyaqil kʼloj okslal aj tkubʼ kyikʼsaʼn qʼij lu tuʼnju xqʼuqin ateʼ tuʼn Jehová, Jesús ex kyuʼn anjel ateʼ toj kyaʼj.