1. ¿Tiʼ teya in kubʼ tnaʼn tuʼnju kʼujlaʼna tuʼn Jehová?

KUBʼ ttzʼibʼin apóstol Juan jun txol yol nya kwest tuʼn tel qnikʼ tiʼj, pero nim toklen. Tqʼama jlu: «Ate Dios at tkʼujlalil» (1 Juan 4:8). Atz tukʼil Jehová in tzaj chwinqlal, noqtzun tuʼnj, ax ikx atz tukʼil in tzaj kʼujlabʼil. Kʼujlaʼn qoʼ tuʼn ex tuʼn tkʼujlabʼil in qo tzalaj ex in kubʼ qnaʼn bʼaʼn.

2. a) Ik tzeʼn in tzaj tqʼamaʼn Mateo 22:37 a 40, ¿alkye kabʼe mandamyent mas nim kyoklen? b) ¿Tiquʼn mas kwest tuʼn t-xi qbʼiʼn aju tkabʼin mandamyent?

² Jun kawbʼil aju tuʼn tkubʼ qyekʼin qkʼujlabʼil, tuʼntzunju, mlay kubʼ qximen qa kbʼel qyekʼin moqa miʼn (kjawil uʼjit Mateo 22:37-40). Qa mas ma tzʼok qojtzqiʼn Jehová, mas nya kwest tuʼn t-xi qbʼiʼn aju tnejel mandamyent. Tzʼaqli te Jehová, kʼujlaʼn qoʼ tuʼn ex in ximen qiʼj. Noqtzun tuʼnj, bʼalo mas kwest tuʼn t-xi qbʼiʼn aju tkabʼin mandamyent. ¿Tiquʼn? Tuʼnju aj il qe erman ex at maj jaku tzaj kyqʼamaʼn jun tiʼ nya toj tumel moqa jaku kubʼ kybʼinchaʼn jun tiʼ jaku tzaj qbʼis tuʼn. Ojtzqiʼn jlu tuʼn Jehová, tuʼntzunju, e ajbʼen junjun xjal tuʼn tuʼn tkubʼ kytzʼibʼin tzeʼn ex tiquʼn tuʼn tkubʼ qyekʼin qkʼujlabʼil qxolx. Jun kyxol qe jlu, ten apóstol Juan (1 Juan 3:11, 12).

3. ¿Alqiʼj mas yolin apóstol Juan?

³ Kyoj qe uʼj e kubʼ ttzʼibʼin apóstol Juan, mas yolin tiʼj tuʼn tkubʼ qyekʼin qkʼujlabʼil qxolx. Axpe ikx, tojju uʼj in yolin tiʼj tanqʼibʼil Jesús kubʼ ttzʼibʼin Juan, mas yolin tiʼj kʼujlabʼil kywitz qeju oxetl uʼj. Bʼalo otoq japun apóstol Juan twi 100 abʼqʼi tej tkubʼ ttzʼibʼin tuʼj in yolin tiʼj tanqʼibʼil  Jesús ex qeju oxe carta. Kyoj qe uʼj kubʼ ttzʼibʼin, in nel qnikʼ tiʼj qa tkyaqilju in bʼant kyuʼn okslal, il tiʼj tuʼn t-xi kybʼinchaʼn tuʼn kʼujlabʼil (1 Juan 4:10, 11). Xi tiʼn ambʼil tuʼn tbʼant jlu tuʼn Juan.

4. Qʼamantza jun techel jatumel mintiʼ kubʼ tyekʼin Juan tkʼujlabʼil.

⁴ Tej tzmatoq kuʼxun Juan, nya toj tkyaqil ambʼil kubʼ tyekʼin tkʼujlabʼil. Jun techel, akux in bʼettoq t-xiʼ tukʼil Jesús tuʼn kypon Jerusalén, e ikʼ toj jun aldea te Samaria, pero mintiʼ e okx kʼamoʼn kyuʼn xjal. ¿Tiʼ tmod Juan kubʼ tyekʼin? Xi tqanin jlu te Jesús: «¿Tajpeya tuʼn t-xi qmaʼne tuʼn tkuʼtz qʼaqʼ twitz kyaʼj tuʼn kynaj xjal lu?» (Luc. 9:52-56). Ex toj juntl maj, mintiʼ ximen kyiʼj txqantl apóstol. In tzaj tyekʼin Tyol Dios qa ok tilil tuʼn Juan ex Santiago tuʼn t-xi tqʼamaʼn te ttxuʼ tuʼn t-xiʼ tukʼil Jesús tuʼntzun t-xi tqanin jun tbʼanel kyoklen toj Tkawbʼil Dios. Tej tok kybʼiʼn junjuntl apóstol jlu, tzaj kyqʼoj (Mat. 20:20, 21, 24). Maske el txalpaj Juan nim maj, kukx ok kʼujlaʼn tuʼn Jesús (Juan 21:7).

5. ¿Tiʼ kʼelel qnikʼ tiʼj toj xnaqʼtzbʼil lu?

⁵ Toj xnaqʼtzbʼil lu, kʼelel qnikʼ tiʼj techel kyaj tqʼoʼn apóstol Juan ex tiʼj junjun tiʼchaq kyaj ttzʼibʼin tiʼj kʼujlabʼil. Kʼelel qnikʼ tiʼj tzeʼn kbʼel qyekʼin qkʼujlabʼil kyiʼj erman, ax ikx kʼelel qnikʼ tiʼj tiʼ kbʼantel kyuʼn mambʼaj tuʼn tkubʼ kyyekʼin qa kʼujlaʼn qe toj kyja kyuʼn.

6. ¿Tzeʼn o kubʼ tyekʼin Jehová qa kʼujlaʼn qoʼ tuʼn?

⁶ Qa in nok tkʼujlaʼn jun xjal juntl xjal, nya oʼkx tuʼn tyol kbʼel tyekʼin qa at tkʼujlabʼil tiʼj. Sino il tiʼj tuʼn tkubʼ tyekʼin tukʼil tbʼinchbʼen (mojbʼankuya tukʼil Santiago 2:17, 26). Jun techel, kʼujlaʼn qoʼ tuʼn Jehová (1 Juan 2:19). In kubʼ tyekʼin tkʼujlabʼil qiʼj aj ttzaj tqʼamaʼn tbʼanel yol qe toj Xjan Uʼj (Sal. 25:10; Rom. 8:38, 39). Ojtzqiʼn quʼn qa nya oʼkx in tzaj tqʼamaʼn Jehová qe qa kʼujlaʼn qoʼ tuʼn, sino in kubʼ tyekʼin tukʼilju in bʼant tuʼn. Tuʼntzunju, kubʼ ttzʼibʼin Juan jlu: «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn» (1 Juan 4:9). Tzaj tqʼoʼn Jehová ambʼil tuʼn tok bʼinchaʼn nya bʼaʼn tiʼj Tkʼwal ex tuʼn tkyim tuʼn qpaj (Juan 3:16). Tuʼntzunju, qʼuqli qkʼuʼj tiʼj qa kʼujlaʼn qoʼ tuʼn.

7. ¿Tzeʼn kubʼ tyekʼin Jesús qa kʼujlaʼn qoʼ tuʼn?

⁷ ¿Yajtzun te Jesús? Xi tqʼamaʼn kye t-xnaqʼtzbʼen qa kʼujlaʼn qe tuʼn (Juan  13:1; 15:15). Pero nya oʼkx xi tqʼamaʼn jlu kye, sino kubʼ tyekʼin tukʼil tbʼinchbʼen qa ax tok kʼujlaʼn qe tuʼn, ex kubʼ tyekʼin qa ax ikx kʼujlaʼn qoʼ tuʼn. Ax ikx tqʼama jlu: «Qa at jun xjal ma txi tqʼon tibʼ tuʼn tkyim tuʼn kyklet qe tamiw, mas maʼ tkʼujlalil, mlay pon tkʼujlalil juntl ik tzaʼn jlu» (Juan 15:13). Aj qximen tiʼjju o bʼant tuʼn Jehová ex Jesús qiʼj, ¿tiʼ il tiʼj tuʼn tbʼant quʼn?

8. Ik tzeʼn in tzaj tqʼamaʼn 1 Juan 3:18, ¿tiʼ il tiʼj tuʼn tbʼant quʼn?

⁸ Aj t-xi qbʼiʼn Jehová ex Jesús, in kubʼ qyekʼin qa kʼujlaʼn qe quʼn (Juan 14:15; 1 Juan 5:3). Ex kyaj tqʼamaʼn Jesús qa nim toklen tuʼn tok qkʼujlan qibʼ qxolx (Juan 13:34, 35). Noqtzun tuʼnj, nya oʼkx kxel qqʼamaʼn kye erman qa kʼujlaʼn qe quʼn, sino ax ikx kbʼel qyekʼin tukʼil qbʼinchbʼen (kjawil uʼjit 1 Juan 3:18). ¿Alkye junjun tiʼchaq jaku bʼant quʼn tuʼn tkubʼ qyekʼin qkʼujlabʼil?

9. ¿Tiʼ bʼant tuʼn apóstol Juan tuʼnju ten tkʼujlabʼil?

⁹ Jakutoq kyaj ten Juan tukʼil tman tuʼn tkambʼan tiʼj mas pwaq tuʼnju in che aqʼunantoq toj tja tuʼn kytzyet pescad. Pero mintiʼ bʼant jlu tuʼn, sino onin kyiʼj xjal tuʼn tel kynikʼ tiʼj axix tok tiʼj Jehová ex tiʼj Jesús, maske ok weʼ twitz nya bʼaʼn. El ikʼun, ex tej chʼixtoq tkubʼaj tnejel syent abʼqʼi, etz lajoʼn toj tnam. Ya otoq tijen tej tbʼaj jlu tiʼj (Hech. 3:1; 4:1-3; 5:18; Apoc. 1:9). Ex tej tel qʼiʼn ambʼil te tuʼn tyolin tiʼj Jesús, kubʼ tyekʼin qa ximen kyiʼj txqantl. Jun techel, akux attoq toj isla te Patmos, kubʼ ttzʼibʼin toj uʼj te Apocalipsis aju ok tkeʼyin toj jun witzikʼ ex xi tsamaʼn kye okslal tuʼntzun tok kykeʼyin tiʼtoq tuʼn tbʼaj (Apoc. 1:1). Ex bʼalo tej tetz tzaqpiʼn toj isla te Patmos, kubʼ ttzʼibʼin aju bʼaj tiʼj ex aju bʼaj tiʼj Jesús. Ax ikx, kubʼ ttzʼibʼin oxe carta tuʼntzun t-xi tqʼuqbʼaʼn kykʼuʼj erman. ¿Tzeʼn jaku tzʼel qkanoʼn tiʼj techel kyaj tqʼoʼn apóstol Juan?

10. ¿Tzeʼn jaku kubʼ qyekʼin qa kʼujlaʼn qe xjal quʼn?

¹⁰ Jaku kubʼ qyekʼin qkʼujlabʼil kyiʼj xjal tukʼilju in bʼant quʼn. Kyaj xjal tuʼn tbʼaj qnajsaʼn ambʼil ex qipumal tuʼn tkanet qqʼinumabʼil tuʼntzun tok ojtzqiʼn qwitz kyuʼn txqantl. Noqtzun tuʼnj, ateʼ nim erman in nok tilil kyuʼn tuʼn kypakbʼan tiʼj tbʼanel tqanil ex in che onin kyiʼj xjal tuʼn kyok laqʼeʼ ttxlaj Jehová. Axpe ikx, ateʼ junjun in che ajbʼen toj tkyaqil ambʼil.

11. ¿Tzeʼn jaku kubʼ qyekʼin qa kʼujlaʼn Jehová quʼn ex qe erman?

¹¹ Ateʼ nim erman il tiʼj tuʼn kyaqʼunan toj tkyaqil ambʼil tuʼntzun kykʼaʼchit qe toj kyja. Maske ikju, in nok tilil kyuʼn tuʼn kyonin tiʼj aqʼuntl in bʼant toj ttnam Jehová. Jun techel, ateʼ junjun in che onin tiʼj aqʼuntl in bʼant aj ttzaj jun xitbʼil, junjuntl in che onin tuʼn kyjaw bʼinchet ja, ex qkyaqilx jaku txi qqʼoʼn oyaj tuʼntzun qonin tiʼj aqʼuntl in bʼant twitz tkyaqil Txʼotxʼ. Iktzun tten in kubʼ kyyekʼin kykʼujlabʼil tiʼj Dios ex kyiʼj txqantl. Nya oʼkxju, ax ikx in kubʼ qyekʼin qkʼujlabʼil kyiʼj erman aj qten kyoj kykyaqil chmabʼil maske otoq qo sikt ex aj t-xi qqʼoʼn jun qyol kyoj maske in qo tzaj xobʼ. Ax ikx, in kubʼ qyekʼin qkʼujlabʼil kyiʼj erman aj tok tilil quʼn tuʼn t-xi qqʼoʼn qʼuqbʼil kykʼuʼj kyoj chmabʼil maske ax ikx qe in qo ok weʼ kywitz nya bʼaʼn (Heb. 10:24, 25). In xi qqʼoʼn nim chjonte tiʼj tkyaqilju in bʼant kyuʼn erman.

12. ¿Alkye juntl tten kubʼ tyekʼin Juan tkʼujlabʼil kyiʼj erman?

 ¹² Kubʼ tyekʼin apóstol Juan tkʼujlabʼil kyiʼj erman tej t-xi tqʼamaʼn tbʼanel yol kye tiʼj kyaqʼun ex tej t-xi tqʼoʼn kyconsej. Jun techel, kyoj uʼj xi ttzʼibʼin kye okslal, xi tqʼoʼn chjonte kye tiʼj qʼuqbʼil kykʼuʼj ex tiʼj tbʼanel kyaqʼun. Pero ax ikx xi tqʼamaʼn kye tuʼn tok kyxqʼuqin kyibʼ tuʼn miʼn tkubʼ kybʼinchan jun il (1 Juan 1:8–2:1, 13, 14). Ax ikx qe jaku txi qqʼuqbʼaʼn kykʼuʼj erman aj t-xi qqʼamaʼn tbʼanel yol kye tiʼj kyaqʼun in bʼant. Pero qa ma tzʼok qqʼoʼn qwitz tiʼj jun erman in bʼant junjun tiʼchaq tuʼn nya toj tumel, moqa chʼix tkubʼ tbʼinchan jun il, bʼaʼn tuʼn tkubʼ qyekʼin qkʼujlabʼil tiʼj aj t-xi qqʼoʼn jun nabʼil te. Tuʼn tbʼant jlu quʼn, nim toklen tuʼn tten qipumal, pero in tzaj tqʼamaʼn Tyol Dios qa aʼyeju axix tok amiw, in bʼaj kyonin kyibʼ ik tzeʼn jun kʼuxbʼil in japun ttzi tuʼn juntl kʼuxbʼil (Prov. 27:17).

13. ¿Tiʼ mintiʼ tuʼn tbʼant quʼn?

¹³ Aj tkubʼ qximen tuʼn miʼn tbʼant junjun tiʼchaq quʼn, atzun juntl tumel tuʼn tkubʼ qyekʼin qkʼujlabʼil kyiʼj erman. Jun techel, mintiʼ tuʼn ttzaj naj qqʼoj kyiʼj tiʼchaq in tzaj qʼamaʼn qe. Qo ximen tiʼjju bʼaj tej chʼixtoq tkubʼ bʼyoʼn Jesús. Xi tqʼamaʼn kye t-xnaqʼtzbʼen qa tuʼn tten kychwinqlal te jumajx, iltoq tiʼj tuʼn t-xi kywaʼn t-xmilal ex tuʼn t-xi kykʼaʼn tchkʼel (Juan 6:53-57). Ateʼ nim t-xnaqʼtzbʼen nya bʼaʼn ela jlu toj kywitz ex kyaj kytzaqpiʼn Jesús. Pero aʼyeju axix tok tamiw, kukx e ten tukʼil ex mintiʼ kyaj kytzaqpiʼn, jun kyxol jlu ten apóstol Juan. Bʼalo mintiʼ el kynikʼ tiʼjju xi tqʼamaʼn kye, pero mintiʼ tzaj kyqʼoj ex mintiʼ kubʼ kyximen qa otoq tzʼel tzpet Jesús. Sino kukx ok qeʼ kykʼuʼj tiʼj tuʼnju kukx yolin axix tok (Juan 6:60, 66-69). Tuʼntzunju, tbʼanel tuʼn miʼn ttzaj qqʼoj tiʼjju in tzaj kyqʼamaʼn erman qe, maske mintiʼ in nel qnikʼ tiʼj (Prov. 18:13; Ecl. 7:9).

14. ¿Tiquʼn mintiʼ tuʼn kyel qikʼun erman?

¹⁴ Ax ikx tqʼama apóstol Juan tuʼn miʼn kyel qikʼun erman. Tuʼnju qa mintiʼ ma tzʼok qxqʼuqin qibʼ tiʼj jlu, jaku qo ajbʼen tuʼn Satanás tuʼn ttzaj nya bʼaʼn qxol (1 Juan 2:11; 3:15). Atzun jlu bʼaj kyiʼj junjun okslal tej chʼixtoq tkubʼaj tnejel syent abʼqʼi. Ok tilil tuʼn Satanás tuʼn ttzaj qʼoj kyxol tmajen Jehová ex tuʼn tel  kyikʼun kywitz. Tej t-xi ttzʼibʼin apóstol Juan tuʼj kye okslal, ya ateʼ junjun otoq chʼiy ikʼbʼil toj kyanmi. Jun kyxol qe jlu, a Diótrefes, ok tilil tuʼn tuʼn ttzaj nya bʼaʼn kyxol okslal. Mintiʼ ok tqʼoʼn kyoklen ansyan in che bʼet kyojele Ja te Chmabʼil, aʼyeju i eʼx samaʼn tuʼn kʼloj xjal qʼil twitz aqʼuntl. Jaw tnimsan tibʼ ex tajtoq tuʼn kyex lajet erman in che bʼinchan xtalbʼil kyiʼj qeju ikʼun kywitz tuʼn (3 Juan 9, 10). Toj ambʼil jaʼlo, kukx in nok tilil tuʼn Satanás tuʼn ttzaj pabʼil kyxol xjal. Tuʼntzunju, qxqʼuqink qibʼ tuʼntzun miʼn ttzaj pabʼil qxol.

15. ¿Tiʼ il tiʼj tuʼn ttzaj kynaʼn mambʼaj?

¹⁵ Jun tten tuʼn tkubʼ tyekʼin mambʼaj qa kʼujlaʼn qe toj tja tuʼn, aju qa ma txi tqʼoʼn aju at tajbʼen kye (1 Tim. 5:8). Pero bʼaʼn tuʼn ttzaj tnaʼn qa mas nim toklen tuʼn tonin kyiʼj tuʼn tten jun tbʼanel kyamiwbʼil tukʼil Jehová (Mat. 5:3). Qo xnaqʼtzan tiʼj techel kyaj tqʼoʼn Jesús. In tzaj tqʼamaʼn uʼj te Juan qa tej tjaw qʼoʼn Jesús twitz tzeʼ, kukxtoq in ximen kyiʼj toj tja. Toj lugar aju, attoq Juan ex María aju ttxuʼ Jesús. Maske in nikʼxtoq kʼixkʼoj tuʼn Jesús, xi tqʼamaʼn te Juan tuʼn tok t-xqʼuqin ttxuʼ (Juan 19:26, 27). Ateʼtoq junjuntl tal María jakutoq che xqʼuqin tiʼj, pero toj ambʼil aju, bʼalo nijun otoq tzʼok te t-xnaqʼtzbʼen Jesús. Tuʼntzunju, ok tilil tuʼn Jesús tuʼn tten aju at tajbʼen te ttxuʼ ex tuʼn kukx tten tamiwbʼil tukʼil Jehová.

16. ¿Alkye junjun toklen apóstol Juan ten?

¹⁶ Attoq nim tiʼchaq tuʼn tbʼant tuʼn Juan. Tuʼnju ok qʼoʼn toklen te apóstol, iltoq tiʼj tuʼn tkubʼ tqʼoʼn jun tbʼanel techel toj pakbʼabʼil. Bʼalo otoq kubʼ mojeʼ. Qa ikju, iltoq tiʼj tuʼn t-xi tqʼoʼn aju at tajbʼen kye toj tja ex tuʼn t-xqʼuqin tiʼj kyamiwbʼil tukʼil Jehová (1 Cor. 9:5). ¿Tiʼ xnaqʼtzbʼil jaku tzʼel kyiʼn mambʼaj tiʼj apóstol Juan?

17. ¿Tiquʼn nim toklen tuʼn kyonin tatbʼaj kyiʼj toj kyja tuʼn tten jun tbʼanel kyamiwbʼil tukʼil Jehová?

¹⁷ Ax ikx kye mambʼaj jaku ten junxichaq kyoklen. Jun techel, il tiʼj tuʼn kyok te tbʼanel aqʼunal tuʼntzun kyyolin txqantl bʼaʼn tiʼj Jehová (Efes. 6:5, 6; Tito 2:9, 10). Ax ikx, bʼalo at junjun kyoklen  toj kʼloj okslal, ik tzeʼn tuʼn kyxqʼuqin kyiʼj erman ex tuʼn tkubʼ kyqʼoʼn jun tbʼanel techel toj pakbʼabʼil. Ex nim toklen tuʼn kyxnaqʼtzan tiʼj Tyol Dios tukʼil kyxuʼjil ex kyukʼil kykʼwal. Kxel kyqʼoʼn toj kyja chjonte kye tuʼnju in nok tilil kyuʼn tuʼn t-xi kyqʼoʼn aju at tajbʼen kye, tuʼn t-xi kyqʼuqbʼaʼn kykʼuʼj ex tuʼn kyonin kyiʼj tuʼn tten jun tbʼanel kyamiwbʼil tukʼil Jehová (Efes. 5:28, 29; 6:4).

18. ¿Tiʼ ok qeʼ tkʼuʼj Juan tiʼj?

¹⁸ Anqʼin Juan nim ambʼil ex bʼaj nim tiʼchaq toj tanqʼibʼil. Ok weʼ twitz nim nya bʼaʼn aju jakutoq chewix qʼuqbʼil tkʼuʼj tuʼn. Pero ok tilil tuʼn tuʼn kyjapun qe tmandamyent Jesús tuʼn, kyxol jlu, tuʼn tok tkʼujlaʼn qe erman. Tuʼntzunju, ok qeʼ tkʼuʼj Juan tiʼj qa kʼujlaʼn tuʼn Jehová ex tuʼn Jesús ex qa che oniltoq tiʼj aj tok weʼ twitz alkyexku nya bʼaʼn (Juan 14:15-17; 15:9, 10; 1 Juan 4:16). Mintiʼ el tiʼn Satanás nix qe xjal ambʼil te Juan tuʼn tkubʼ tyekʼin tkʼujlabʼil kyiʼj erman, tukʼil tyol ex tukʼil tbʼinchbʼen.

19. Ik tzeʼn in tzaj tqʼamaʼn 1 Juan 4:7, ¿tiʼ il tiʼj tuʼn tbʼant quʼn ex tiquʼn?

¹⁹ Ik tzeʼn bʼaj tiʼj Juan, ax ikx qe in qo anqʼin kyxol xjal at ikʼbʼil toj kyanmi tuʼnju ateʼ tjaqʼ tkawbʼil Satanás (1 Juan 3:1, 10). Taj Satanás tuʼn miʼn tok qkʼujlaʼn qe erman, noqtzun tuʼnj, qa ma txi qqʼoʼn ambʼil te jaku chʼexpaj qximbʼetz tuʼn. Pero tuʼn miʼn tbʼaj jlu, tbʼanel tuʼn kukx tkubʼ qyekʼin qkʼujlabʼil kyiʼj erman, jaku bʼant quʼn tukʼil qyol ex qbʼinchbʼen. Qa ma bʼant jlu quʼn, kbʼel qnaʼn nim tzalajbʼil tuʼnju atoʼ kyxol toj tja Jehová ex axix tok qo tzalajel (kjawil uʼjit 1 Juan 4:7).