XNAQʼTZBʼIL 3
¿Tiʼ xnaqʼtzbʼil jaku tzʼel qiʼn tiʼj Jesús tej tjaw oqʼ?
«Jawtzun oqʼ Jesús» (JUAN 11:35).
BʼITZ 17 «Ok, waje»
AJU KʼELEL QNIKʼ TIʼJ *
1-3. ¿Tiquʼn at maj jaku qo jaw oqʼ?
¿JTOJE jaw oqʼ teya mankbʼil maj? At maj in qo jaw oqʼ tuʼnju in qo tzalaj, pero chʼixme tkyaqil maj in qo jaw oqʼ tuʼnju in qo bʼisun. Jun techel, bʼalo in qo oqʼ tuʼnju o kyim jun toj qja. In tzaj tqʼamaʼn jun ermana te Estados Unidos jlu, aju Lorilei tbʼi: * «Kubʼ nnaʼne junjun maj qa tzaj nim nbʼise tiʼj wale otoq kyim ex kubʼ nximane qa ni jun jaku tzaj qʼuqbʼante nkʼuʼje. Mintiʼ el nnikʼe tiʼj tzeʼn jakutoq tzikʼx bʼis wuʼne».
2 Pero at junjuntl tiquʼn jaku qo jaw oqʼ. Tqʼama Hiromi jlu, jun precursora te Japón: «At maj in tzaj bʼaj nkʼuʼje tuʼnju mintiʼ in nok kybʼiʼn xjal tbʼanel tqanil. In netz taʼl nwitze aj t-xi nqanine te Jehová tuʼn tonin wiʼje tuʼn tkanet jun xjal wuʼne aju taj tuʼn tel tnikʼ tiʼj axix tok».
3 Axlo ikx qe in netz taʼl qwitz ik tzeʼn kye ermana lu (1 Ped. 5:9). Qaj tuʼn qajbʼen te Jehová tukʼil tzalajbʼil, pero atlo maj in netz taʼl qwitz tuʼnju o kyim jun toj qja, tuʼnju in tzaj bʼaj qkʼuʼj moqa tuʼnju in nok qʼuqbʼil qkʼuʼj toj malbʼil aj ttzaj jun nya bʼaʼn qiʼj (Sal. 6:6; 100:2). ¿Tiʼ jaku bʼant quʼn qa ma bʼaj jlu qiʼj?
4. ¿Tiʼ kʼelel qnikʼ tiʼj toj xnaqʼtzbʼil lu?
4 Jaku tzʼonin qiʼj aju bʼaj tiʼj Jesús. At maj jaw oqʼ tuʼnju tzaj tbʼis (Juan 11:35; Luc. 19:41; 22:44; Heb. 5:7). Toj xnaqʼtzbʼil lu, qo yolil kyiʼj ambʼil tej tjaw oqʼ Jesús. Ax ikx, qo yolil tiʼj tiʼ xnaqʼtzbʼil jaku tzʼel qiʼn tiʼj Jesús ex tiʼj Jehová. Ex kʼelel qnikʼ tiʼj tiʼ jaku bʼant quʼn aj qjaw oqʼ tuʼn bʼis.
JAW OQʼ KYIʼJ TAMIW
Qo onin kyiʼj qeju o kyim jun toj kyja ik tzeʼn bʼant tuʼn Jesús. (Qʼonka twitza kyiʼj taqikʼ 5 a 9). *
5. ¿Tiʼ in tzaj tyekʼin Juan 11:32 a 36 qe tiʼj Jesús?
5 Tej chʼixtoq tkubʼaj abʼqʼi 32, tzaj yabʼil tiʼj Lázaro ex kyim (Juan 11:3, 14). Kʼujlaʼntoq Lázaro tuʼn Jesús ex qeju kabʼe tanabʼ, Marta ex María. Tzaj nim kybʼis tej tkyim kyxibʼin. Tej otoqxi kyim Lázaro, xiʼ Jesús visitaril kye toj tnam Betania. Tej tok tbʼiʼn Marta qa chʼixtoq tpon Jesús, jun rat etz keʼyilte. Qo ximen tiʼj jniʼ bʼis kubʼ tnaʼn Marta tej t-xi tqʼamaʼn jlu te Jesús: «Tat, noqwit ata tzalu, miwtlo o kyim nxibʼane» (Juan 11:21). Ex tej tok tkeʼyin Jesús in noqʼ María kyukʼil junjuntl xjal, «jawtzun oqʼ» (kjawil uʼjit Juan 11:32-36).
6. ¿Tiquʼn jaw oqʼ Jesús?
6 ¿Tiquʼn jaw oqʼ Jesús? In tzaj tqʼamaʼn uʼj Perspicacia para comprender las Escrituras jlu: «Jaw oqʼ Jesús tuʼnju otoq kyim Lázaro aju tamiw ex tuʼnju ok tkeʼyin qa in che oqʼ tanabʼ». * Bʼalo ximen Jesús tiʼj kʼixkʼoj ikʼx tuʼn Lázaro tej ttzaj tyabʼ ex tiʼjju kubʼ tnaʼn tej chʼixtoq tkyim. Ax ikx, jawlo oqʼ tuʼnju in che bʼisun Marta ex María tuʼnju otoq kyim kyxibʼin. Qa o kyim jun teya toj tja moqa jun tamiwa, in nel-lo tnikʼa tiʼj jlu. Qo yolin tiʼj oxe xnaqʼtzbʼil jaku tzʼel qiʼn tiʼj txʼolbʼabʼil lu.
7. ¿Tiʼ in tzaj tyekʼin qe tiʼj Jehová tej tjaw oqʼ Jesús?
7 In nel tnikʼ Jehová tiʼjju in kubʼ tnaʼna. In tzaj tqʼamaʼn Tyol Dios jlu tiʼj Jesús: «Ax tilbʼilal Kʼwaʼlbʼaj ik tzaʼn tilbʼilal Dios» (Heb. 1:3). A jlu in tzaj tyekʼin qe qa kubʼ tyekʼin Jesús aju in kubʼ tnaʼn Jehová (Juan 14:9). Qa in bʼisun teya tuʼnju o kyim jun toj tjaya, jaku tzʼok qeʼ tkʼuʼja tiʼj qa nya oʼkx in nel tnikʼ Jehová tiʼj tbʼisa, sino ax ikx in bʼisun tukʼila. Taj tuʼn tel bʼis tiʼj tanmiya (Sal. 34:18; 147:3).
8. ¿Tiquʼn jaku tzʼok qeʼ qkʼuʼj tiʼj qa che jawil anqʼin toj qja tuʼn Jesús?
8 Taj Jesús tuʼn kyjaw anqʼin toj tjaya tuʼn. Tej naʼmxtoq tjaw oqʼ Jesús, xi tqʼamaʼn jlu te Marta: «Kjawil anqʼin t-xibʼana». Ok qeʼ tkʼuʼj Marta kyiʼj yol lu (Juan 11:23-27). Tuʼnju in najbʼentoq Marta te Jehová, ojtzqiʼntoq tuʼn qa e jaw anqʼin junjun xjal kyuʼn profeta Elías ex Eliseo (1 Rey. 17:17-24; 2 Rey. 4:32-37). Ex oklo tbʼiʼn qa otoq che jaw anqʼin junjun xjal tuʼn Jesús (Luc. 7:11-15; 8:41, 42, 49-56). Ax ikx teya jaku tzʼok qeʼ tkʼuʼja tiʼj qa che jawil anqʼin toj tjaya juntl maj. Tej tjaw oqʼ Jesús kyukʼil tamiw, in tzaj tyekʼin qa ax tok taj tuʼn kyjaw anqʼin kyimni.
9. ¿Tzeʼn jaku txi tqʼuqbʼaʼna kykʼuʼj qeju in che bʼisun ik tzeʼn bʼant tuʼn Jesús? Qʼamantza jun techel.
9 Jaku txi tqʼuqbʼaʼna kykʼuʼj qeju in che bʼisun. Nya oʼkx jaw oqʼ Jesús tukʼil Marta ex María, sino ax ikx xi tqʼuqbʼaʼn kykʼuʼj ex ok tqʼoʼn twiʼ tiʼj kyyol. Ax jlu jaku bʼant quʼn kyukʼil qeju o kyim jun toj kyja. In tzaj tqʼamaʼn jun ansyan jlu aju Dan tbʼi te tnam Australia: «Tej tkyim nxuʼjile, wajtoqe nim onbʼil. Ateʼ nim mejebʼleʼn ok kybʼiʼn nyole toj alkyexku or. Tzaj kyqʼoʼn ambʼil weye tuʼn woqʼe ex mintiʼ kubʼ kynaʼn nya bʼaʼn tuʼn jlu. Ax ikx e onin wiʼje tej tkubʼ nnaʼne qa mintiʼtoq wipumale, bʼaj kytxʼjoʼn nkarre, tzaj kylaqʼoʼn qe tiʼchaq at tajbʼen weye ex bʼaj kybʼinchaʼn nwaye. Nim maj e naʼn Dios wukʼile. Kubʼ kyyekʼin qa e ok te axix tok wamiwe kyoj ambʼil kwest» (Prov. 17:17).
JAW OQʼ KYIʼJ XJAL
10. ¿Tiʼ txʼolbʼabʼil in tzaj qʼamaʼn toj Lucas 19:36 a 40?
10 Xiʼ Jesús toj tnam Jerusalén toj 9 te nisán te abʼqʼi 33. Tej chʼixtoq tpon toj tnam, ok kychmon kyibʼ xjal ex kubʼ kyqʼoʼn junjun xbʼalun toj bʼe tuʼn tkubʼ kyyekʼin qa kyajtoq tuʼn tok Jesús te kyrey. Jaku txi qqʼamaʼn qa ok ambʼil lu te tzalajbʼil (kjawil uʼjit Lucas 19:36-40). Tuʼntzunju, e jawlo labʼin t-xnaqʼtzbʼen Jesús tiʼjju bʼant tuʼn yajxitl. In tzaj tqʼamaʼn Tyol Dios jlu: «Tejtzun tpon laqʼeʼ Jesús niqayin tibʼaj tnam Jerusalén, xi tkeʼyin ju tnam ex jaw oqʼ tiʼj». Etz taʼl twitz Jesús tej tkyaj tqʼamaʼn tiʼtoq kbʼajel kyiʼj xjal te Jerusalén (Luc. 19:41-44).
11. ¿Tiquʼn jaw oqʼ Jesús kyiʼj xjal te Jerusalén?
11 Tzaj tbʼis Jesús tuʼnju el tnikʼ tiʼj qa chʼixme kykyaqil aj Judiy mlaytoq txi kybʼiʼn tbʼanel tqanil tiʼj Tkawbʼil Dios maske in che tzalajtoq. Tuʼntzunju, kbʼeltoq xiten tnam Jerusalén ex che xeltoq qʼiʼn aj Judiy pres (Luc. 21:20-24). Bʼisbʼajilxix tuʼnju chʼixme kykyaqil xjal el kyikʼun Jesús ik tzeʼn otoq kyaj tqʼamaʼn. ¿Tiʼ kymod xjal in kubʼ kyyekʼin tiʼj pakbʼabʼil jatumel in nanqʼina? Qa mintiʼ in nok bʼiʼna kyuʼn xjal maske in nok tilil tuʼna, ¿tiʼ xnaqʼtzbʼil jaku tzʼel tiʼna tiʼj Jesús tej tjaw oqʼ? Qo yolin kyiʼj oxe xnaqʼtzbʼil.
12. ¿Tiʼ in tzaj tyekʼin qe tiʼj Jehová tej tjaw oqʼ Jesús kyiʼj xjal?
12 Kʼujlaʼn qe xjal tuʼn Jehová. Tuʼnju jaw oqʼ Jesús, in tzaj tyekʼin qe qa nim kyoklen xjal toj twitz Jehová. In tzaj tqʼamaʼn Tyol Dios jlu: «Miʼn tajbʼil Qajaw tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Ped. 3:9). In kubʼ qyekʼin qa kʼujlaʼn qe xjal quʼn aj tok tilil quʼn tuʼn tpon tbʼanel tqanil toj kyanmi (Mat. 22:39).
Qo pakbʼan kye xjal toj ambʼil mas bʼaʼn toj kywitz ik tzeʼn bʼant tuʼn Jesús. (Qʼonka twitza tiʼj taqikʼ 13 ex 14). *
13, 14. a) ¿Tzeʼn kubʼ tyekʼin Jesús qa tzaj qʼaqʼin tkʼuʼj kyiʼj xjal? b) ¿Tzeʼn jaku kubʼ qyekʼin qʼaqʼbʼil qkʼuʼj?
13 Ok tilil tuʼn Jesús tuʼn tpakbʼan. Tuʼnju ok tkʼujlaʼn Jesús qe xjal, ok tilil tuʼn tuʼn tpakbʼan kye (Luc. 19:47, 48). Bʼant jlu tuʼn tuʼnju tzaj qʼaqʼin tkʼuʼj kyiʼj. At maj kyajtoq nim xjal tuʼn tok kybʼiʼn tbʼanel tqanil, tuʼntzunju «mintiʼ tumel tuʼn twaʼn Jesús kyukʼix t-xnaqʼtzbʼen» (Mar. 3:20). Ex tej tpon jun xjal visitaril te Jesús toj qonikʼen, xi tqʼoʼn ambʼil te tuʼn tyolin tukʼil (Juan 3:1, 2). Nya kykyaqil xjal e ok te t-xnaqʼtzbʼen Jesús, pero ok kybʼiʼn tbʼanel tqanil. Ax ikx toj ambʼil jaʼlo, qaj tuʼn tok kybʼiʼn kykyaqil xjal tbʼanel tqanil (Hech. 10:42). Tuʼn tbʼant jlu, il-lo tiʼj tuʼn tbʼant junjun chʼixpubʼil quʼn.
14 Qbʼincham qe chʼixpubʼil qa il tiʼj. Qa ax or in qo pakbʼan, mlaylo che kanet xjal quʼn aqeju kyaj tuʼn tok kybʼiʼn tbʼanel tqanil. In tzaj tqʼamaʼn jun precursora jlu, aju Matilda tbʼi: «In qo pakbʼane toj junxichaq or tukʼil nchmile. Te prim, in qo pakbʼane kyoj kʼaẍjel. Atzun toj tmij qʼij, in qo pakbʼane kyukʼil yekʼbʼil uʼj. Ex te qale in qo pakbʼane kyojele ja tuʼnju mas in che kanet xjal quʼne». Mas bʼaʼn tuʼn qpakbʼan toj or jatumel jaku che kanet xjal quʼn twitzju tuʼn tjaw qskʼoʼn alkye or mas bʼaʼn toj qwitz. Qa ma bʼant jlu quʼn, jaku tzʼok qeʼ qkʼuʼj tiʼj qa ktzalajel Jehová qiʼj.
JAW OQʼ JESÚS TUʼNJU MINTIʼ JAW NIMSAʼN TBʼI JEHOVÁ
Qqaninx onbʼil te Jehová aj ttzaj bʼaj qkʼuʼj ik tzeʼn bʼant tuʼn Jesús. (Qʼonka twitza kyiʼj taqikʼ 15 a 17). *
15. Ik tzeʼn in jaw quʼjin toj Lucas 22:39 a 44, ¿tiʼ bʼant tuʼn Jesús toj qonikʼen tej chʼixtoq tkyim?
15 Toj qonikʼen te 14 te nisán te abʼqʼi 33, xiʼ Jesús toj jardín te Getsemaní. Tej tpon atz, ok ten naʼl Dios te Jehová (kjawil uʼjit Lucas 22:39-44). Toj ambʼil aju, «naʼn Dios ex o kubʼsanxix wen, ex jaw tqʼajqʼajel twiʼ kyuw, ex jaw oqʼ twitz Dios» (Heb. 5:7). ¿Tiʼ xi tqanin Jesús toj tnaʼj Dios toj qonikʼen tej chʼixtoq tkyim? Xi tqanin tipumal te Jehová tuʼn tten tzʼaqli twitz ex tuʼn t-xi tbʼinchaʼn tajbʼil. Tzaj tbʼiʼn Jehová tnaʼj Dios Tkʼwal ex tzaj tsamaʼn jun anjel tuʼn t-xi tqʼuqbʼaʼn tkʼuʼj.
16. ¿Tiquʼn jaw oqʼ Jesús tej tnaʼn Dios toj jardín te Getsemaní?
16 ¿Tiquʼn jaw oqʼ Jesús tej tnaʼn Dios toj jardín te Getsemaní? Tuʼnju tzaj tbʼis tej tkubʼ kyximen xjal qa otoq xmayin tiʼj Dios. Ax ikx, el tnikʼ tiʼj qa nim toklen tuʼn tkolin tiʼj tbʼi Tman. Qa in nok weʼya twitz jun nya bʼaʼn ex in nok qʼuqbʼil tkʼuʼja toj malbʼil, ¿tiʼ xnaqʼtzbʼil jaku tzʼel tiʼna kyiʼj taʼl twitz Jesús? Qo yolin kyiʼj oxe xnaqʼtzbʼil.
17. ¿Tiʼ in tzaj tyekʼin qe tiʼj Jehová tej ttzaj ttzaqʼweʼn tnaʼj Dios Jesús?
17 In tzaj tbʼiʼn Jehová tnaʼj Diosa. Tzaj tbʼiʼn Jehová tnaʼj Dios Tkʼwal. ¿Tiquʼn? Tuʼnju mas ok tqʼoʼn toklen tuʼn tten tzʼaqli twitz Jehová ex tuʼn tkolin tiʼj tbʼi. Ax ikx qe, qa mas ma tzʼok qqʼoʼn toklen tuʼn qten tzʼaqli twitz Jehová ex tuʼn qkolin tiʼj tbʼi, tzul tbʼiʼn qnaʼj Dios (Sal. 145:18, 19).
18. ¿Tiquʼn in xi qqʼamaʼn qa in nel tnikʼ Jesús qiʼj?
18 In nel tnikʼ Jesús tiʼjju in kubʼ tnaʼna. Aj ttzaj bʼaj qkʼuʼj, in qo tzalaj aj tel tnikʼ jun qamiw qiʼj ex mas qa o tzikʼ kyoj nya bʼaʼn ik tzeʼn qe. Ex a Jesús in nok te qamiw lu. In nel tnikʼ qiʼj qa mintiʼ qipumal ex qa qaj onbʼil. Ojtzqiʼn tuʼn tzeʼn o qo kubʼ bʼinchaʼn ex ktzajel tqʼoʼn onbʼil qe «ok tul tajbʼenxix qe» (Heb. 4:15, 16). Xi tkʼamoʼn Jesús onbʼil tej ttzaj tsamaʼn Jehová jun anjel qʼuqbʼalte tkʼuʼj toj jardín te Getsemaní. Ax ikx qe, bʼaʼn tuʼn ttzaj qkʼamoʼn onbʼil in tzaj tqʼoʼn Jehová qe. At maj in tzaj tqʼoʼn onbʼil qe toj jun uʼj, toj jun video, toj jun chikʼbʼabʼil, tuʼn tbʼanel tyol jun ansyan moqa aj qyolin tukʼil jun qamiw.
19. ¿Tiʼ kʼonil tiʼja qa in nok weʼya twitz jun nya bʼaʼn? Qʼamantza jun techel.
19 Kqebʼil tkʼuʼja tuʼn Jehová. ¿Tzeʼn in tzaj tqʼuqbʼaʼn Jehová qkʼuʼj? In tzaj tqʼamaʼn Biblia qa in bʼant jlu tuʼn Jehová aj qnaʼn Dios: «Kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal» (Filip. 4:6, 7). Aj tbʼant jlu tuʼn Jehová, in nonin qiʼj tuʼn qximen toj tumel. Atzun jlu kubʼ tnaʼn jun ermana Luz tbʼi. Tqʼama jlu: «At maj in kubʼ nnaʼne qa njunalxe atine ex in kubʼ nximane qa nya kʼujlaʼn qine tuʼn Jehová. Pero kyoj ambʼil lu, jun rat in xi nqʼamaʼne te Jehová tiʼ in kubʼ nnaʼne. In nonin naʼj Dios wiʼje tuʼn tkubʼ nnaʼne bʼaʼn». Ik tzeʼn ma tzaj tqʼamaʼn ermana Luz, in nonin naʼj Dios qiʼj tuʼn tchewix qanmi.
20. ¿Alkyeqe xnaqʼtzbʼil ma tzʼel qiʼn kyiʼj taʼl twitz Jesús?
20 Tbʼanel qe xnaqʼtzbʼil ma tzʼel qnikʼ kyiʼj tej tjaw oqʼ Jesús tuʼnju in che onin qiʼj ex in tzaj kyqʼuqbʼaʼn qkʼuʼj. Tej tjaw oqʼ Jesús, in tzaj tnaʼn qe qa nim toklen tuʼn qonin kyiʼj qamiw in che bʼisun ex in nel qnikʼ tiʼj qa kʼonil Jehová ex Jesús qiʼj aj tkyim jun toj qja. Ax ikx, in nonin qiʼj tuʼn ttzaj qʼaqʼin qkʼuʼj kyiʼj xjal aj qpakbʼan ex aj qqʼon xnaqʼtzbʼil tuʼnju in kubʼ tqʼoʼn Jehová ex Jesús jun tbʼanel techel qwitz. Ex in qeʼ qkʼuʼj tej tjaw oqʼ Jesús tuʼnju in tzaj tyekʼin qe qa in nel tnikʼ Jehová tiʼjju in kubʼ qnaʼn. Ax ikx in nel kynikʼ tiʼj qa mintiʼ qipumal ex che onil qiʼj tuʼn tikʼx quʼn. Kukx qbʼincham aju ma tzʼel qnikʼ tiʼj tzmaxi aj tjapun kywi tyol Jehová lu: «Kʼelel t-suʼn Dios taʼl kywitz kykyaqil» (Apoc. 21:4).
BʼITZ 120 Qo ok te mans ik tzeʼn te Cristo
^ At maj tzaj bʼaj tkʼuʼj Jesús ex tuʼn jlu jaw oqʼ. Toj xnaqʼtzbʼil lu, qo yolil tiʼj oxe maj tej tjaw oqʼ Jesús ex kʼelel qnikʼ tiʼj tiʼ xnaqʼtzbʼil jaku tzʼel qiʼn tiʼj.
^ Ma che kubʼ chʼixpet junjun bʼibʼaj.
^ Qʼonka twitza tiʼj uʼj Perspicacia para comprender las Escrituras, volumen 2, t-xaq 96.
^ TQANIL KYIʼJ TILBʼILAL: Xi tqʼuqbʼaʼn Jesús tkʼuʼj María ex Marta. Ax jlu jaku bʼant quʼn aj tkyim jun toj tja jun erman.
^ TQANIL KYIʼJ TILBʼILAL: Xi tqʼoʼn Jesús xnaqʼtzbʼil te Nicodemo toj qonikʼen. Ax ikx qe bʼaʼn tuʼn t-xi qqʼoʼn xnaqʼtzbʼil kye xjal toj ambʼil mas bʼaʼn toj kywitz.
^ TQANIL KYIʼJ TILBʼILAL: Xi tqanin Jesús tipumal te Jehová tuʼn kukx tten tzʼaqli twitz. Ax jlu jaku bʼant quʼn aj qok weʼ kywitz nya bʼaʼn.