XNAQʼTZBʼIL 4
¿Tiquʼn in qoʼx toj Nabʼitz Tkyimlen Jesucristo?
«Kybʼinchame jlu te nabʼl weye» (LUC. 22:19).
BʼITZ 20 Tzaj tqʼoʼna oʼkxku jun Tkʼwaʼla
AJU KʼELEL QNIKʼ TIʼJ *
1, 2. a) ¿Toj alkye ambʼil mas in tzaj qnaʼn jun toj qja otoq kyim? b) ¿Tiʼ tqʼama Jesús toj qonikʼen tej chʼixtoq tkyim?
AJ IN kyim jun toj qja, kukx in tzaj qnaʼn maske otoq tzikʼ nim ambʼil. Ex mas in tzaj qnaʼn aj in japun juntl abʼqʼi tkyimlen.
2 Tkyaqil abʼqʼi in nok kychmon kyibʼ nim millón xjal twitz tkyaqil Txʼotxʼ tuʼn ttzaj kynaʼn tkyimlen Jesucristo, ex kyxol qe xjal lu, ax ikx atoʼ (1 Ped. 1:8). In nok qchmon qibʼ tuʼn ttzaj qnaʼn qa xi tqʼoʼn Jesús tchwinqlal tuʼn qklet tiʼj il ex kamik (Mat. 20:28). Tajtoq Jesús tuʼn ttzaj kynaʼn t-xnaqʼtzbʼen tkyimlen. Toj qonikʼen tej chʼixtoq tkyim, bʼaj tbʼinchaʼn jun wabʼj nim toklen kyukʼil t-xnaqʼtzbʼen ex xi tqʼamaʼn jlu kye: «Kybʼinchame jlu te nabʼl weye» (Luc. 22:19). *
3. ¿Tiʼ kʼelel qnikʼ tiʼj toj xnaqʼtzbʼil lu?
3 Kyxol qeju nim millón xjal in che ten toj Nabʼitz Tkyimlen Jesucristo, noq junjun che xeʼl anqʼil toj kyaʼj, atzun kye txqantl atz che anqʼil tzalu twitz Txʼotxʼ. Toj xnaqʼtzbʼil lu, kʼelel qnikʼ kyiʼj junjun tiquʼn kyaj kabʼe kʼloj xjal lu tuʼn kyxiʼ toj Nabʼitz Tkyimlen Jesucristo. Ax ikx, kʼelel qnikʼ tiʼj tzeʼn in nonin qiʼj. Qo xnaqʼtzan tiʼj tnejel tiquʼn in cheʼx okslal skʼoʼn maj toj Nabʼitz Tkyimlen Jesucristo.
¿TIQUʼN IN CHEʼX OKSLAL SKʼOʼN MAJ?
4. ¿Tiquʼn in che waʼn okslal skʼoʼn maj tiʼj pan ex in che kʼan tiʼj vin toj Nabʼitz Tkyimlen Jesucristo?
4 Jun kyxol qe tiquʼn in cheʼx okslal skʼoʼn maj toj Nabʼitz Tkyimlen Jesucristo, aju tuʼn kywaʼn tiʼj pan ex tuʼn kykʼan tiʼj vino. ¿Tiquʼn in bʼant jlu kyuʼn? Tuʼn tel qnikʼ tiʼj tzaqʼwebʼil, bʼaʼn tuʼn ttzaj qnaʼn aju bʼant tuʼn Jesús toj mankbʼil qonikʼen tej tten tzalu twitz Txʼotxʼ. Tej otoqxi kubʼ tikʼsaʼn Jesús Xjan Qʼij, kubʼ tikʼsaʼn Wabʼj te Qale. Ikʼx tqʼoʼn pan ex vin kywitz 11 t-apóstol kukx e ten tukʼil ex xi tqʼamaʼn kye tuʼn kywan ex tuʼn kykʼan. Yolin Jesús kyukʼil tiʼj kabʼe yol tuʼn tkyaj bʼant tiʼj. Tnejel, aju akʼaj yol ex tkabʼin, aju yol tuʼn tten jun Kawbʼil (Luc. 22:19, 20, 28-30). * Kyuʼn kabʼe yol lu, xi qʼoʼn ambʼil kye t-apóstol Jesús tuʼn kyok te aj kawil ex te pal toj kyaʼj junx kyukʼil junjuntl okslal skʼoʼn maj (Apoc. 5:10; 14:1). At kyoklen okslal skʼoʼn maj * kyiʼj kabʼe yol kyaj bʼant tiʼj tuʼn Jesús, tuʼntzunju, jaku che waʼn tiʼj pan ex jaku che kʼan tiʼj vino toj Nabʼitz Tkyimlen Jesucristo.
5. ¿Tiʼ ojtzqiʼn kyuʼn skʼoʼn maj tiʼj qʼuqbʼil kykʼuʼj o tzaj qʼoʼn?
5 Ax ikx in cheʼx okslal skʼoʼn maj toj Nabʼitz Tkyimlen Jesucristo tuʼnju in tzaj tqʼoʼn ambʼil kye tuʼn kyximen tiʼj qʼuqbʼil kykʼuʼj. O txi tqʼoʼn Jehová jun tbʼanel qʼuqbʼil kykʼuʼj okslal skʼoʼn maj tuʼn kyanqʼin toj kyaʼj jatumel mlay naj kyxmilal ex che ajbʼel junx tukʼil Jesús. Ex aju mas nim toklen, che tel twitz Jehová (1 Cor. 15:51-53; 1 Juan 3:2). Ojtzqiʼn kyuʼn skʼoʼn maj qa o txi qʼoʼn txokbʼil kyiʼj tuʼn kytzalaj kyiʼj tbʼanel oklenj jlu. Pero nim toklen tuʼn kyten tzʼaqli twitz Jehová tzmaxi aj kykyim tuʼntzun ttzaj kykʼamoʼn qe oklenj lu (2 Tim. 4:7, 8). Nimxix in che tzalaj aj kyximen tiʼj qʼuqbʼil kykʼuʼj (Tito 2:13, TNM). ¿Yajtzun kye txqantl t-ẍneʼl Jesús? (Juan 10:16). ¿Tiquʼn in cheʼx toj Nabʼitz Tkyimlen Jesucristo? Qo xnaqʼtzan tiʼj.
¿TIQUʼN IN CHEʼX TXQANTL ẌNEʼL?
6. ¿Tiquʼn in cheʼx txqantl t-ẍneʼl Jesús toj Nabʼitz Tkyimlen tkyaqil abʼqʼi?
6 Jun kyxol qe tiquʼn in cheʼx txqantl t-ẍneʼl Jesús toj Nabʼitz Tkyimlen, tuʼnju kyaj tuʼn tok kykeʼyin tzeʼn in kubʼ ikʼset ex nya tuʼn kywan tiʼj pan nix tuʼn kykʼan tiʼj vin. Toj 1938, tzaj qʼoʼn txokbʼil tnejel maj kyiʼj qeju at qʼuqbʼil kykʼuʼj tuʼn kyanqʼin tzalu twitz Txʼotxʼ tuʼn kyten toj Nabʼitz Tkyimlen Jesucristo. Toj uʼj La Torre del Vigía te abril te 1938 etz qʼamaʼn qa «nim toklen ex toj tumel» tuʼn kyten qe txqantl ẍneʼl «toj chmabʼil lu ex tuʼn tok kykeʼyin tzeʼn in kubʼ ikʼset». Ex tqʼamatl jlu: «Tbʼanel qa ma che tzalaj tiʼj ambʼil lu». In che tzalaj txqantl ẍneʼl aj in che ten toj Nabʼitz Tkyimlen Jesucristo ik tzeʼn tzalajbʼil in kubʼ kynaʼn xjal aj in che ten toj tboda jun kyamiw.
7. ¿Tiquʼn kyaj txqantl ẍneʼl tuʼn tok kybʼiʼn chikʼbʼabʼil in netz qʼoʼn toj Nabʼitz Tkyimlen Jesucristo?
7 Ax ikx kye txqantl ẍneʼl in che ximen tiʼj qʼuqbʼil kykʼuʼj toj ambʼil te Nabʼitz Tkyimlen Jesucristo. Kyaj tuʼn tok kybʼiʼn chikʼbʼabʼil toj qʼij lu tuʼnju in yolin tiʼjju kbʼantel tuʼn Jesús ex qeju 144,000 kyiʼj xjal aj kykawin toj mil abʼqʼi. Kʼonil Jesús kyukʼil qeju 144,000 tuʼn tok Txʼotxʼ te jun paraíso ex tuʼn kyok xjal te tzʼaqli. Nimlo tzalajbʼil in kubʼ kynaʼn qeju in che ten toj Nabʼitz Tkyimlen Jesucristo aj kyximen tiʼj ambʼil aj tjapun kywi profecía in tzaj qʼamaʼn toj Isaías 35:5 ex 6; ex 65:21 a 23, ex Apocalipsis 21:3 ex 4. Aj kyximen tiʼj ambʼil aj kyten junx kyukʼil qeju xjal kʼujlaʼn kyuʼn toj akʼaj twitz Txʼotxʼ, in chʼiy qʼuqbʼil kykʼuʼj ex kyaj tuʼn kukx kyajbʼen te Jehová (Mat. 24:13; Gál. 6:9).
8. ¿Alkye juntl tiquʼn in cheʼx txqantl ẍneʼl toj Nabʼitz Tkyimlen Jesucristo?
8 Ax ikx in cheʼx txqantl ẍneʼl toj Nabʼitz Tkyimlen Jesucristo tuʼnju kyaj tuʼn tkubʼ kyyekʼin kykʼujlabʼil kyiʼj skʼoʼn maj ex kyaj tuʼn kyonin kyiʼj. Kyaj tqʼamaʼn Tyol Dios qa ktel mujbʼabʼil kyxol okslal skʼoʼn maj kyukʼil qeju che anqʼil tzalu twitz Txʼotxʼ. Qo xnaqʼtzan kyiʼj junjun profecía jatumel in tzaj yekʼin jlu.
9. Ik tzeʼn in tzaj tqʼamaʼn Zacarías 8:23, ¿tiʼ in kubʼ kynaʼn txqantl ẍneʼl kyiʼj skʼoʼn maj?
9 (Kjawil uʼjit Zacarías 8:23). Tukʼil jun tbʼanel techel, in tzaj tqʼamaʼn profecía lu tiʼ in kubʼ kynaʼn txqantl ẍneʼl kyiʼj skʼoʼn maj. Aqeju yol «jun xjal judiy» ex «kyukʼile», atz in yolin kyiʼj skʼoʼn maj (Rom. 2:28, 29). Atzun qeju «laj stranjer xjal», atz in yolin kyiʼj txqantl ẍneʼl. In nok kytzyun kyibʼ kyiʼj skʼoʼn maj, toj juntl yol, junx in che ajbʼen te Jehová. In kubʼ kyyekʼin txqantl ẍneʼl qa at mujbʼabʼil kyxol kyukʼil skʼoʼn maj aj kyten junx kyukʼil toj Nabʼitz Tkyimlen Jesucristo.
10. ¿Tiʼ o bʼant tuʼn Jehová tuʼn tjapun twi profecía tkuʼx toj Ezequiel 37:15 a 19, 24 ex 25?
10 (Kjawil uʼjit Ezequiel 37:15-19, 24, 25). O japun twi profecía lu tuʼn Jehová tuʼnju in nonin kyiʼj txqantl ẍneʼl ex qe skʼoʼn maj tuʼn tten mujbʼabʼil kyxol aj kyajbʼen te. In yolin profecía lu tiʼj kabʼe tzeʼ. Aqeju at qʼuqbʼil kykʼuʼj tuʼn kyxiʼ toj kyaʼj, in che ok ik tzeʼn tzeʼ te Judá, aju kʼloj kyyajil aj Israel jatumel e jaw skʼoʼn qe xjal tuʼn kyok te aj kawil. Atzun qeju che anqʼil tzalu twitz Txʼotxʼ, in che ok ik tzeʼn tzeʼ te Efraín. * Kyaj qʼamaʼn qa tuʼn tok tmojbʼaʼn Jehová qe tzeʼ lu tuʼntzun kyok «te junx». A t-xilen jlu qa junx che ajbʼel tjaqʼ Tkawbʼil Jesús. Tkyaqil abʼqʼi, nya part in che ten skʼoʼn maj ex qe txqantl ẍneʼl toj Nabʼitz Tkyimlen Jesucristo, sino junx in che ten ik tzeʼn jun kʼloj ẍneʼl ex junx pastoril kye at (Juan 10:16).
11. ¿Alkye tten in che onin ẍneʼl kyiʼj terman Cristo, aqeju in tzaj qʼamaʼn toj Mateo 25:31 a 36 ex 40?
11 (Kjawil uʼjit Mateo 25:31-36, 40). Aqeju ẍneʼl yolin Jesús tiʼj toj txʼolbʼabʼil lu, atz in yolin kyiʼj xjal che tel tzʼaqli kyoj mankbʼil tqʼijlalil ex at qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ. Tuʼn tkyaqil kykʼuʼj in che onin kyiʼj terman Cristo tuʼn tbʼant jun aqʼuntl nim toklen, aju tuʼn tpakbʼet tbʼanel tqanil ex tuʼn t-xi qʼet xnaqʼtzbʼil kye xjal (Mat. 24:14; 28:19, 20).
12, 13. ¿Alkye junjuntl tten in che onin txqantl ẍneʼl kyiʼj terman Cristo?
12 Tkyaqil abʼqʼi, in che onin txqantl ẍneʼl kyiʼj skʼoʼn maj naʼmxtoq tok Nabʼitz Tkyimlen Jesucristo. ¿Tzeʼn in bʼant jlu kyuʼn? Aj tok tilil kyuʼn tuʼn t-xi kyqʼoʼn txokbʼil kyiʼj kykyaqil xjal. (Qʼonka twitza tiʼj recuadro « ¿Atpe jun tiʼ taja tuʼn tbʼant tuʼna toj Nabʼitz Tkyimlen Jesucristo?»). Twitz tkyaqil Txʼotxʼ, in bʼaj kybʼinchaʼn kʼloj okslal kyten tiʼj Nabʼitz Tkyimlen Jesucristo maske mintiʼ jun okslal skʼoʼn maj kyxol. Tuʼn jlu in kubʼ kynaʼn txqantl ẍneʼl tzalajbʼil tuʼnju in che onin kyiʼj terman Cristo. Ojtzqiʼn kyuʼn qa aj kyonin kyiʼj skʼoʼn maj, in nok jlu ik tzeʼn in che onin tiʼj Jesús (Mat. 25:37-40).
13 Noq alkyexku qʼuqbʼil qkʼuʼj at, ¿tiquʼn nim toklen tuʼn qten toj Nabʼitz Tkyimlen Jesucristo?
¿TIQUʼN IN QO TEN QKYAQILX?
14. ¿Alkye yekʼbʼil mas matij at tiʼj tkʼujlabʼil Jehová ex Jesús?
14 Tuʼnju in xi qqʼoʼn chjonte tiʼj tkʼujlabʼil Jehová ex Jesús. O kubʼ tyekʼin Jehová tkʼujlabʼil qiʼj toj nimku tten. Pero aju yekʼbʼil mas nim toklen tiʼj tkʼujlabʼil, aju tej ttzaj tsamaʼn Tkʼwal tzalu twitz Txʼotxʼ tuʼn tkyim tuʼn qpaj (Juan 3:16). Ax ikx te Jesús kubʼ tyekʼin qa kʼujlaʼn qoʼ tuʼn tej t-xi tqʼon tibʼ tuʼn tkyim te qxel (Juan 15:13). Mlayx chjet tkyaqilju o bʼant kyuʼn qiʼj, pero jaku kubʼ qyekʼin qa in xi qqʼoʼn chjonte kye tuʼnju alkye tten in qo anqʼin (Col. 3:15). Aj qten toj Nabʼitz Tkyimlen Jesucristo, in xi qqʼoʼn chjonte tiʼj kykʼujlabʼil ex in kubʼ qyekʼin qkʼujlabʼil kyiʼj.
15. ¿Tiquʼn in xi kyqʼoʼn skʼoʼn maj ex qe txqantl ẍneʼl chjonte tiʼj chojbʼil?
15 Tuʼnju in xi qqʼoʼn nimxix chjonte tiʼj chojbʼil (Mat. 20:28). In nok kyqʼoʼn okslal skʼoʼn maj toklen chojbʼil tuʼnju in tzaj tqʼoʼn ambʼil kye tuʼn tten qʼuqbʼil kykʼuʼj. Ex tuʼnju o kubʼ kyyekʼin qʼuqbʼil kykʼuʼj tiʼj chojbʼil bʼant tuʼn Jesús, in che ok tqʼoʼn Jehová te tzʼaqli ex in che ok tqʼoʼn ik tzeʼn tkʼwal (Rom. 5:1; 8:15-17, 23). Atzun kye txqantl ẍneʼl in nok kyqʼoʼn toklen chojbʼil tuʼnju in tzaj tqʼoʼn ambʼil kye tuʼn ttzalaj Dios kyiʼj, tuʼn kyajbʼen te ex tuʼn kykyaj anqʼin «tuj nimxix yajbʼil» (Apoc. 7:13-15). Aj kyten skʼoʼn maj ex qe txqantl ẍneʼl toj Nabʼitz Tkyimlen Jesucristo tkyaqil abʼqʼi, in kubʼ kyyekʼin qa in xi kyqʼoʼn chjonte tiʼj chojbʼil.
16. ¿Alkye juntl tiquʼn in qoʼx toj Nabʼitz Tkyimlen Jesucristo?
16 Tuʼnju qaj tuʼn t-xi qbʼiʼn aju kyaj tqʼamaʼn Jesús. Qkyaqilx in xi qbʼiʼn kawbʼil kyaj tqʼamaʼn Jesús toj qonikʼen tej tkubʼ tikʼsaʼn Wabʼj te Qale. Tqʼama jlu: «Kybʼinchame jlu te nabʼl weye» (1 Cor. 11:23, 24).
¿TZEʼN IN NONIN QIʼJ QKYAQILX?
17. ¿Tiquʼn mas in qo ok laqʼeʼ ttxlaj Jehová aj qxiʼ toj Nabʼitz Tkyimlen Jesucristo?
17 In qo ok laqʼeʼ mas ttxlaj Jehová (Sant. 4:8). Ik tzeʼn ma tzʼel qnikʼ tiʼj, aj qxiʼ toj Nabʼitz Tkyimlen Jesucristo in tzaj tqʼoʼn ambʼil qe tuʼn qximen tiʼj qʼuqbʼil qkʼuʼj o tzaj tqʼoʼn Jehová ex tiʼj tkʼujlabʼil o kubʼ tyekʼin qiʼj (Jer. 29:11; 1 Juan 4:8-10). Qʼuqli qkʼuʼj tiʼj qa mlayx bʼaj tkʼujlabʼil Jehová qiʼj ex qa ax tok qʼuqbʼil qkʼuʼj o tzaj ttziyen. Aj qximen tiʼj tkyaqil jlu, mas in nok qkʼujlaʼn Jehová ex mas in qo ok laqʼeʼ ttxlaj (Rom. 8:38, 39).
18. ¿Tzeʼn jaku tzʼonin qiʼj qa ma qo ximen tiʼj techel kyaj tqʼoʼn Jesús?
18 In nonin qiʼj tuʼn tel qkanoʼn tiʼj techel kyaj tqʼoʼn Jesús (1 Ped. 2:21). Kyoj qʼij naʼmxtoq tok Nabʼitz Tkyimlen Jesucristo, in qo xnaqʼtzan tiʼjju bʼant tuʼn Jesús toj bʼajsbʼil seman tej tten tzalu twitz Txʼotxʼ. Ax ikx in qo xnaqʼtzan tiʼjju bʼaj tiʼj tej tkyim ex tej tjaw anqʼin. Ex aj tok qbʼiʼn chikʼbʼabʼil toj Nabʼitz Tkyimlen Jesucristo, in tzaj qnaʼn tkʼujlabʼil at qiʼj (Efes. 5:2; 1 Juan 3:16). Aj tjaw quʼjin qa ok tilil tuʼn Jesús ex aj qximen tiʼjju bʼant tuʼn, in nonin qiʼj tuʼn qbʼet ik tzeʼn te (1 Juan 2:6).
19. ¿Tiʼ kbʼantel quʼn tuʼn kukx qten toj tkʼujlabʼil Dios?
19 In nonin qiʼj tuʼn kukx qten toj tkʼujlabʼil Dios (Jud. 20, 21). Aj tok tilil quʼn tuʼn qnimen te Jehová, tuʼn tjaw qnimsaʼn tbʼi ex tuʼn ttzalaj tanmi quʼn, in nonin jlu qiʼj tuʼn kukx qten toj tkʼujlabʼil (Prov. 27:11; Mat. 6:9; 1 Juan 5:3). Aj qten toj Nabʼitz Tkyimlen Jesucristo, in tzaj tqʼoʼn qipumal tuʼn t-xi qqʼamaʼn jlu te Jehová tukʼil qbʼinchbʼen: «Waje tuʼn woke te tamiwa te jumajx».
20. ¿Tiquʼn in qoʼx toj Nabʼitz Tkyimlen Jesucristo?
20 Qa atz qo anqʼil toj kyaʼj moqa tzalu twitz Txʼotxʼ, at nim tiquʼn tuʼn qxiʼ toj Nabʼitz Tkyimlen Jesucristo tkyaqil abʼqʼi. Aj tok qchmon qibʼ, in tzaj qnaʼn Jesús, aju kʼujlaʼnxix quʼn. Ex aju mas nim toklen, in tzaj qnaʼn tkʼujlabʼil Jehová kubʼ tyekʼin qiʼj tej ttzaj tsamaʼn Tkʼwal tuʼn tkyim tuʼn qklet tiʼj il. Toj abʼqʼi lu, kbʼel ikʼset Nabʼitz Tkyimlen Jesucristo toj viernes 15 te abril te 2022. Kʼujlaʼn Jehová ex Jesús quʼn. Tuʼntzunju, mintiʼ juntl tiʼ mas nim toklen toj qwitz twitzju tuʼn qten toj Nabʼitz Tkyimlen Jesucristo.
BʼITZ 16 Qnimsanktz Jehová tuʼnju toklen Tkʼwaʼl
^ Qa atz qo anqʼil toj kyaʼj moqa tzalu twitz Txʼotxʼ, tkyaqil abʼqʼi in qo ayon tuʼn qxiʼ toj Nabʼitz Tkyimlen Jesucristo. Toj xnaqʼtzbʼil lu, tzul kyyekʼin junjun taqikʼ Tyol Dios qe tiquʼn nim toklen tuʼn qxiʼ toj Nabʼitz Tkyimlen Jesucristo ex tzeʼn in nonin qiʼj.
^ Kyoj junjun traducción tiʼj Tyol Dios, in tzaj qʼamaʼn jlu: «Kybʼinchame jlu tuʼn ntzaj kynaʼne» (Biblia de Jerusalén Latinoamericana) moqa «Kybʼinchim kyejiʼy lo, noq te naʼbʼl weʼy» (Akʼaj Tuʼjil Tyol qMan).
^ Kkanetel mas tqanil tuʼna tiʼj akʼaj yol ex tiʼj yol tuʼn tten jun Kawbʼil toj xnaqʼtzbʼil «Che okel nqʼoʼne te pal tuj nkawbʼile», toj uʼj Aju Xqʼuqil te 1 te octubre te 2014, t-xaq 16 a 20.
^ YOL NIM TOKLEN: Aj tajbʼen yol skʼoʼn maj quʼn toj xnaqʼtzbʼil lu, atz in qo yolin kyiʼj okslal skʼoʼn maj kukx ateʼ tzalu twitz Txʼotxʼ.
^ Kkanetel mas tqanil tuʼna tiʼj profecía in yolin kyiʼj kabʼe tzeʼ in tzaj qʼamaʼn toj capítulo 37 toj uʼj te Ezequiel toj libro La adoración pura de Jehová: ¡por fin restaurada!, t-xaq 130 a 135, taqikʼ 3 a 17.
