XNAQʼTZBʼIL 5
Tzʼajbʼenx ambʼil toj tumel quʼn
«Miʼn che bʼete mintiʼ kynabʼle, noq oʼkx tuʼn tten kynabʼle. Tzʼajbʼenxwit tkyaqil qʼij kyuʼne tuʼn kybʼinchanteye bʼaʼn» (EFES. 5:15, 16).
BʼITZ 8 A Jehová in kolin qiʼj
AJU KʼELEL QNIKʼ TIʼJ *
1. ¿Tzeʼn in nel qpaʼn ambʼil tuʼn qten tukʼil Jehová?
QKYAQILX in qo tzalaj aj qten kyukʼil xjal kʼujlaʼn quʼn. Jun techel, in che tzalaj mejebʼleʼn aj kyten jun rat junx. Atzun kye kuʼxun, in che tzalaj aj kyten kyukʼil kyamiw. Atzun qe, in qo tzalaj aj qten kyukʼil erman. Pero maslo in qo tzalaj aj tel qpaʼn ambʼil tuʼn qten tukʼil Jehová. ¿Tzeʼn in bʼant jlu quʼn? In bʼant quʼn aj qnaʼn Dios, aj quʼjin tiʼj Tyol, aj qximen kyiʼj ttziybʼil ex aj qximen kyiʼj tbʼanel tmod. ¡Nimxix tzalajbʼil in kubʼ qnaʼn aj qten tukʼil Jehová! (Sal. 139:17).
2. ¿Tiquʼn at maj kwest tuʼn tel qpaʼn ambʼil tuʼn qten tukʼil Jehová?
2 Nimxix tzalajbʼil in kubʼ qnaʼn aj qten tukʼil Jehová, noqtzun tuʼnj, at maj kwest tuʼn tbʼant jlu quʼn. Tuʼnju at nim tiʼchaq tuʼn tbʼant quʼn, kwest jaku tzʼela toj qwitz tuʼn tel qpaʼn ambʼil tuʼn qkʼulin te Jehová. Jakulo kubʼ qximen qa mintiʼ ambʼil qiʼj tuʼn qnaʼn Dios, tuʼn qxnaqʼtzan ex tuʼn qximen kyiʼj ttziybʼil Jehová tuʼnju at nim qaqʼun ex il tiʼj tuʼn qxqʼuqin kyiʼj toj qja moqa il tiʼj tuʼn kybʼant junjuntl tiʼchaq quʼn.
3. ¿Alkye juntl tiʼ nim toklen tuʼn tok qxqʼuqin qibʼ tiʼj?
3 Pero ateʼ junjuntl tiʼchaq il tiʼj tuʼn tok qxqʼuqin qibʼ kyiʼj. Mintiʼlo jun nya bʼaʼn in bʼant quʼn aj tbʼant jun tiʼ quʼn, pero jaku tzʼel tiʼn ambʼil qe tuʼn qten tukʼil Jehová. Jun techel, in kubʼ qnaʼn bʼaʼn aj tel qpaʼn ambʼil tuʼn qtzalaj jun rat. Pero qa mintiʼ ma tzʼok qxqʼuqin qibʼ, jakulo tzʼel kyiʼn saqchbʼil ambʼil qe tuʼn qkʼulin te Jehová. Tuʼntzunju, nim toklen tuʼn tok qxqʼuqin qibʼ kyiʼj saqchbʼil (Prov. 25:27; 1 Tim. 4:8).
4. ¿Tiʼ kʼelel qnikʼ tiʼj toj xnaqʼtzbʼil lu?
4 Toj xnaqʼtzbʼil lu, kʼelel qnikʼ tiʼj tiquʼn nim toklen tuʼn tel qnikʼ tiʼj alkyeqe tiʼchaq mas nim kyoklen. Ax ikx, kʼelel qnikʼ tiʼj tzeʼn jaku qo tzalaj tiʼj ambʼil in nel qpaʼn tuʼn qten tukʼil Jehová ex alkyeqe kʼiwlabʼil in che tzaj qkʼamoʼn aj tbʼant jlu quʼn.
QJYONKTZ AJU MAS BʼAʼN EX QO XIMEN TIʼJ ALKYE MAS NIM TOKLEN
5. ¿Tzeʼn jaku tzʼonin Efesios 5:15 a 17 kyiʼj kuʼxun tuʼn tjaw kyskʼoʼn aju mas bʼaʼn?
5 Qjyonktz aju mas tbʼanel bʼe. Atzun jlu in che ximen nim kuʼxun tiʼj. Jakulo txi kyqʼamaʼn maestro ex qe kyfamiliar nya testigo kye tuʼn kukx kyxnaqʼtzan ex tuʼn tten jun tbʼanel kyaqʼun. Pero qa ma bʼant jlu kyuʼn, jakulo tzʼel tiʼn nim ambʼil kye. Atzun kye kyman ex qe txqantl erman, jakulo txi kyqʼamaʼn kye qa mas bʼaʼn tuʼn kyajbʼen te Jehová. ¿Tiʼ jaku tzʼonin kyiʼj kuʼxun kʼujlaʼn Jehová kyuʼn tuʼn tjaw kyskʼoʼn aju mas bʼaʼn? Jaku jaw kyuʼjin Efesios 5:15 a 17 (uʼjinktza). Otoqxi che ximen tiʼjju in tzaj tqʼamaʼn, jaku che ximen kyiʼj xjel lu: «¿Tiʼ taj Jehová tuʼn tbʼant wuʼne? ¿Alkye mas bʼaʼn toj twitz? ¿Tzeʼn jaku tzʼajbʼen ambʼil toj tumel wuʼne?». Bʼaʼn tuʼn ttzaj qnaʼn qa «mya bʼaʼn ju tqʼijlalil jaʼlo» ex qa chʼix tkubʼ xiten tkawbʼil Satanás. Tuʼntzunju, mas bʼaʼn tuʼn tajbʼen qchwinqlal quʼn tuʼn qajbʼen te Jehová tuʼntzun ttzalaj qiʼj.
6. ¿Tiʼ bʼant tuʼn María ex tiquʼn in xi qqʼamaʼn qa jaw tskʼoʼn aju mas tbʼanel?
6 Qo ximen tiʼj alkye mas nim toklen. Tuʼn tajbʼen ambʼil toj tumel quʼn, at maj il tiʼj tuʼn tjaw qskʼoʼn tiʼ tuʼn t-xi qbʼinchaʼn maske bʼaʼn tkyaqil tiʼchaq qaj tuʼn tbʼant quʼn. Atzun jlu bʼaj tiʼj María ex Marta tej tpon Jesús visitaril kye. Kubʼ tnaʼn Marta nim tzalajbʼil tej tpon Jesús tja, tuʼntzunju ok ten bʼinchalte jun tbʼanel wabʼj. Atzunte María, kubʼ qeʼ t-xe tqan Jesús tuʼn tok tbʼiʼn tyol ex t-xnaqʼtzbʼil. Mintiʼ kubʼ tbʼinchaʼn Marta jun nya bʼaʼn, pero tqʼama Jesús qa jaw tskʼoʼn María «aju mas bʼaʼn» (Luc. 10:38-42). Bʼalo ikʼ tnaʼl tuʼn María tiʼ twa xi qʼoʼn toj qʼij aju, pero mintiʼ ikʼ tnaʼl qe tyol Jesús tuʼn. Ok tqʼoʼn María toklen ambʼil el tpaʼn tuʼn tten tukʼil Jesús. Ax ikx qe, in nok qqʼoʼn toklen ambʼil in nel qpaʼn tuʼn qten tukʼil Jehová. Pero, ¿tzeʼn jaku qo tzalaj tiʼj ambʼil lu?
QO TZALAJ TIʼJ AMBʼIL IN NEL QPAʼN TE JEHOVÁ
7. ¿Tiquʼn nim toklen tuʼn qnaʼn Dios, tuʼn qxnaqʼtzan ex tuʼn qximen?
7 Bʼaʼn tuʼn ttzaj qnaʼn qa in qo kʼulin te Jehová aj qnaʼn Dios, aj qxnaqʼtzan ex aj qximen. Aj qnaʼn Dios, in qo yolin tukʼil Jehová (Sal. 5:7). Aj qxnaqʼtzan tiʼj Tyol Dios, in nel qnikʼ tiʼj tojtzqibʼil Jehová, aju xjal mas nim tnabʼil at twitz alkyexku juntl (Prov. 2:1-5). Ex aj qximen, in qo ximen kyiʼj tbʼanel tmod Jehová ex tiʼjju taj kye kykyaqil xjal. Aj t-xi qbʼinchaʼn jlu, in najbʼen ambʼil toj tumel quʼn. Pero nya nim ambʼil at qiʼj, tuʼntzunju, ¿tzeʼn jaku tzʼajbʼen ambʼil toj tumel quʼn?
Aj t-xnaqʼtzana tjunalxa, ¿jakupe kanet jun lugar tuʼna jatumel mintiʼ bulla? (Qʼonka twitza tiʼj taqikʼ 8 ex 9).
8. ¿Tiʼ tbʼanel techel kyaj tqʼoʼn Jesús qwitz tej t-xiʼ toj tzqij txʼotxʼ?
8 Qa jaku bʼant, qjyonx jun lugar jatumel mintiʼ bulla. Qo ximen tiʼj tzeʼn bʼant jlu tuʼn Jesús. Tej t-xi tzyet tuʼn tpakbʼan, ten 40 qʼij toj tzqij txʼotxʼ (Luc. 4:1, 2). Toj ambʼil lu, naʼn Dios ex ximen tiʼjju taj Jehová tuʼn tbʼant tuʼn. Jaku txi qqʼamaʼn qa onin jlu tiʼj tuʼn tbʼaj tbʼinchaʼn tten kyiʼj nya bʼaʼn kʼokeltoq weʼ twitz. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn? Qa nim qbʼet toj qja, bʼalo kwest tuʼn tkanet jun lugar quʼn jatumel mintiʼ bulla. Qa ikju, ¿jakupe txi qjyoʼn juntl lugar? Atzun jlu in bʼant tuʼn Julie aj tel tpaʼn ambʼil tuʼn tnaʼn Dios te Jehová. In nanqʼin Julie tukʼil tchmil toj jun tal apartamento atz Francia, tuʼntzunju, kwest tuʼn tkanet ambʼil tuʼn tuʼn tten tjunalx ex jatumel mintiʼ bulla. In tzaj tqʼamaʼn jlu: «Tkyaqil qʼij in chin exe bʼetil toj parque. Aj in pone atz, jaku chin tene njunalxe, jaku tzʼok nqʼoʼne nwiʼye kyiʼj tiʼchaq ex jaku bʼant nyoline tukʼil Jehová».
9. ¿Tzeʼn kubʼ tyekʼin Jesús qa ok tqʼoʼn toklen tamiwbʼil tukʼil Jehová maske attoq nim tiʼchaq tuʼn tbʼant tuʼn?
9 Attoq nim tiʼchaq tuʼn tbʼant tuʼn Jesús. Noq jaxku tumel ten, e pon laqʼeʼ xjal tukʼil ex kyajtoq tuʼn tok tqʼoʼn twiʼ kyiʼj. In tzaj tqʼamaʼn Tyol Dios qa toj jun ambʼil «kykyaqil xjal tuj tnam pon kychmon kyibʼ ttzi ja» tuʼn tok kykeʼyin Jesús. Maske ikju, el tpaʼn ambʼil tuʼn tok t-xqʼuqin tamiwbʼil tukʼil Jehová. Tej naʼmxtoq qsqix, xiʼ toj jun lugar tuʼn tyolin tukʼil Tman (Mar. 1:32-35).
10, 11. Ik tzeʼn in tzaj tqʼamaʼn Mateo 26:40 ex 41, ¿tiʼ xi tqʼamaʼn Jesús kye t-xnaqʼtzbʼen toj jardín te Getsemaní ex tiʼ bʼant kyuʼn?
10 Toj qonikʼen tej chʼixtoq tkubʼ bʼyoʼn Jesús, xiʼ toj jardín te Getsemaní tuʼn tnaʼn Dios ex tuʼn t-ximen. Tbʼaneltoq lugar lu tuʼnju mintiʼtoq bulla toj (Mat. 26:36). Toj ambʼil lu, xi tqʼoʼn jun tbʼanel consej kye t-xnaqʼtzbʼen tiʼj naʼj Dios.
11 Qo yolin tiʼjju bʼaj. Bʼalo ya otoq tzikʼ tmij aqʼbʼil tej kypon toj jardín te Getsemaní. Xiʼ Jesús naʼl Dios ex xi tqʼamaʼn kye t-xnaqʼtzbʼen tuʼn miʼn kyikʼ jtan (Mat. 26:37-39). Pero tej tmeltzʼaj, otoq che ikʼ jtan. Tuʼntzunju, xi tqʼamaʼn jlu kye juntl maj: «Che xqʼuqine ex che naʼne Dios» (kjawil uʼjit Mateo 26:40, 41). Ojtzqiʼntoq tuʼn Jesús qa otoq che sikt t-xnaqʼtzbʼen. Tuʼntzunju, tzaj qʼaqʼin tkʼuʼj kyiʼj ex xi tqʼamaʼn jlu kye: «Atzun kyximlale mintiʼ tipun». Xiʼ Jesús juntl kabʼe maj naʼl Dios ex tej tmeltzʼaj in che jtantoq t-apóstol ex mintiʼtoq in che naʼn Dios (Mat. 26:42-45).
¿Jakupe tzʼel tpaʼna ambʼil tuʼn tnaʼna Dios aj tkubʼ tnaʼna qa nya siktni taʼya? (Qʼonka twitza tiʼj taqikʼ 12).
12. ¿Tiʼ jaku bʼant quʼn qa otoq qo sikt ex kwest tuʼn qnaʼn Dios?
12 Bʼaʼn tuʼn tjaw qjyoʼn aju ambʼil mas tbʼanel. Bʼalo at maj in kubʼ qnaʼn nim siktleʼn ex kwest tuʼn qnaʼn Dios. Qa ikju, ¿tiʼ jaku bʼant quʼn? Ateʼ junjun erman otoq che naqʼet tuʼn kynaʼn Dios aj kyxiʼ jtal, pero o tzʼel kynikʼ tiʼj qa mas bʼaʼn tuʼn kynaʼn Dios naʼmxtoq kykubʼ kuẍe. Atzun junjuntl, o tzʼel kynikʼ tiʼj qa mas in nok kyqʼoʼn kywiʼ tiʼj kynaʼj Dios aj kykubʼ qeʼ moqa aj kykubʼ ẍmejeʼ. ¿Yajtzun qa in kubʼ qnaʼn qa in qo bʼisun moqa in tzaj bʼaj qkʼuʼj aj qnaʼn Dios? Qqʼamanx te Jehová aju in kubʼ qnaʼn ex jaku tzʼok qeʼ qkʼuʼj tiʼj qa ktzajel qʼaqʼin tkʼuʼj qiʼj ex qa kʼelel tnikʼ qiʼj (Sal. 139:4).
¿Jakupe txi tjyoʼna jun tumel tuʼn miʼn tok tqʼoʼna twitza kyiʼj mensaje ex correo electrónico toj chmabʼil? (Qʼonka twitza tiʼj taqikʼ 13 ex 14).
13. ¿Tzeʼn jaku tzʼel tiʼn celular ambʼil qiʼj aj tel qpaʼn ambʼil te Jehová?
13 Miʼn tzʼok qqʼoʼn qwiʼ kyiʼj junjuntl tiʼchaq aj qxnaqʼtzan. Juntl tiʼ jaku tzʼonin qiʼj tuʼn tchʼiy qamiwbʼil tukʼil Jehová, aju qa ma qo xnaqʼtzan tiʼj Tyol ex qa ma qoʼx kyoj chmabʼil. ¿Atpe jun tiʼ jaku bʼant quʼn tuʼn tok qqʼoʼn qwiʼ tiʼj qxnaqʼtzbʼil ex kyiʼj chmabʼil? Bʼaʼn tuʼn tkubʼ qxjelin jlu: «¿Tiquʼn mintiʼ in nok nqʼoʼn nwiʼye tiʼj chmabʼil moqa tiʼj xnaqʼtzbʼil?». Jaku tzʼel kyiʼn llamada, correo electrónico ex qe mensaje ambʼil qiʼj tuʼn tok qqʼoʼn qwiʼ kyiʼj chmabʼil. Nim in che onin tiʼchaq lu qiʼj tuʼnju nim qe xjal in najbʼen kyuʼn, pero in tzaj kyqʼamaʼn junjun xjal at kyojtzqibʼil qa jun rat jaku tzʼok qqʼoʼn qwiʼ tiʼj jun celular qa nqayin tok qtxlaj. In tzaj tqʼamaʼn jun profesor te Psicología jlu: «Mintiʼ in nok tqʼoʼn twiʼya tiʼjju in bʼant tuʼna. Saber jatumel in nikʼ twiʼya». Qa in tzaj qʼamaʼn qe tuʼn tel qiʼn tvolumen qcelular kyoj nimaq chmabʼil tuʼntzun tok kyqʼoʼn txqantl kywiʼ tiʼj xnaqʼtzbʼil, ¿jakupe bʼant jlu quʼn aj tel qpaʼn ambʼil te Jehová tuʼntzun miʼn tel tiʼn celular ambʼil qiʼj?
14. Ik tzeʼn in tzaj tqʼamaʼn Filipenses 4:6 ex 7, ¿tiʼ kbʼantel tuʼn Jehová tuʼn tonin qiʼj tuʼn tok qqʼoʼn qwiʼ tiʼj xnaqʼtzbʼil?
14 Qqaninx te Jehová tuʼn tonin qiʼj tuʼn tok qqʼoʼn qwiʼ tiʼj xnaqʼtzbʼil. Qa ma tzʼel qnikʼ tiʼj qa kwest tuʼn tok qqʼoʼn qwiʼ tiʼj chmabʼil moqa aj qxnaqʼtzan qjunalx, qqaninx onbʼil te Jehová. Ex qa at jun tiʼ in bʼaj qkʼuʼj tiʼj, bʼalo tuʼn jlu mintiʼxix in nok qqʼoʼn qwiʼ tiʼj qajbʼebʼil te Jehová, pero nim toklen tuʼn tbʼant quʼn. Ax ikx, bʼaʼn tuʼn qnaʼn Dios te Jehová tuʼn tonin qiʼj tuʼn tten qximbʼetz toj tumel ex nya oʼkx tuʼn miʼn ttzaj bʼaj qkʼuʼj (kjawil uʼjit Filipenses 4:6, 7).
QE KʼIWLABʼIL IN TZAJ QKʼAMOʼN AJ TEL QPAʼN AMBʼIL TE JEHOVÁ
15. ¿Alkye jun kʼiwlabʼil jaku tzaj qkʼamoʼn qa ma tzʼel qpaʼn ambʼil tuʼn qten tukʼil Jehová?
15 Tzul qkʼamoʼn nim kʼiwlabʼil qa ma tzʼel qpaʼn ambʼil tuʼn qyolin tukʼil Jehová, qa ma txi qbʼiʼn ex qa ma qo ximen tiʼj. ¿Alkyeqe kʼiwlabʼil lu? Tnejel, kjawel qjyoʼn aju mas bʼaʼn. In tzaj tqʼamaʼn Tyol Dios jlu: «Qa ma tzʼok tjunin tibʼa kyukʼil qe xjal at kynabʼl, ktel tnabʼla» (Prov. 13:20). Tuʼntzunju, qa mas ma tzʼel qpaʼn ambʼil tuʼn qten tukʼil Jehová, mas ktel qnabʼil tuʼnju mas nim te tnabʼil at qwitz. Ex kʼelel qnikʼ tiʼj tzeʼn jaku tzalaj quʼn ex mlay kubʼ qbʼinchaʼn jun tiʼ jaku tzaj tbʼis tuʼn.
16. ¿Tiquʼn in qo ok te tbʼanel aj xnaqʼtzal aj tel qpaʼn ambʼil tuʼn qten tukʼil Jehová?
16 Tkabʼin, qo okel te tbʼanel aj xnaqʼtzal. Aj qqʼon xnaqʼtzbʼil tiʼj Tyol Dios, qaj tuʼn kyok laqʼeʼ xjal ttxlaj Jehová. Qa kukx in qo yolin tukʼil Jehová, mas kʼokel qkʼujlaʼn ex kʼonil qiʼj tuʼn qonin kyiʼj xjal tuʼn tok kykʼujlaʼn. Atzun jlu bʼant tuʼn Jesús. Tej tyolin tiʼj Tman, yolin tiʼj tukʼil kʼujlabʼil, tuʼntzunju, ax ikx kye t-xnaqʼtzbʼen ok kykʼujlaʼn Jehová (Juan 17:25, 26).
17. Qa ma tzʼel qpaʼn ambʼil tuʼn qnaʼn Dios ex tuʼn qxnaqʼtzan, ¿tzeʼn in nonin jlu tiʼj qʼuqbʼil qkʼuʼj?
17 Toxin, kchʼiyil mas qʼuqbʼil qkʼuʼj. Qo ximen tiʼj tiʼ in bʼaj aj t-xi qqanin onbʼil moqa qʼuqbʼil qkʼuʼj te Jehová. Aj in tzaj ttzaqʼweʼn qnaʼj Dios, mas in chʼiy qʼuqbʼil qkʼuʼj tiʼj (1 Juan 5:15). Ax ikx, jaku chʼiy qʼuqbʼil qkʼuʼj qa ma tzʼel qpaʼn ambʼil tuʼn qxnaqʼtzan qjunalx. ¿Tiquʼn? Tuʼnju «in qo okslan tuʼnju yol in qbʼiʼn» (Rom. 10:17). Pero qa qaj tuʼn tchʼiy qʼuqbʼil qkʼuʼj, nya oʼkx qo xnaqʼtzal. Qa ikju, ¿tiʼ mas jaku bʼant quʼn?
18. ¿Tiquʼn nim toklen tuʼn qximen tiʼjju in kubʼ qxnaqʼtzaʼn? Qʼamantza jun techel.
18 Nim toklen tuʼn qximen tiʼjju in qo xnaqʼtzan tiʼj. Qo ximen tiʼjju bʼaj tiʼj aj tzʼibʼil tiʼj Salmo 77. Tzaj bʼaj tkʼuʼj tuʼnju kubʼ t-ximen qa ya mintiʼtoq in tzalaj Jehová tiʼj ex kyiʼj aj Israel. Tuʼn jlu, ya mintiʼtoq in jtan te qonikʼen (versículo 2-8). ¿Tiʼtzun bʼant tuʼn? Xi tqʼamaʼn jlu te Jehová: «Chin ximale tiʼj tkyaqilju o tbʼinchaya, chin yolile kyiʼj qe tbʼinchbʼena» (versículo 12). Otoq tzʼok tojtzqiʼn aj tzʼibʼil tiʼ otoq bʼant tuʼn Jehová kyiʼj tmajen. Maske ikju, kubʼ t-xjelin jlu: «¿Mapetzun tzikʼ tnaʼl tuʼn Dios aju t-xtalbʼil? ¿Maske at tqʼoj, mlaypelo tzaj qʼaqʼan tkʼuʼj qiʼj?» (versículo 9). Ximen aj tzʼibʼil lu tiʼjju otoq bʼant tuʼn Jehová ex tiʼj qʼaqʼbʼil tkʼuʼj otoq kubʼ tyekʼin kyiʼj tmajen (versículo 11). ¿Tzeʼn onin jlu tiʼj? Onin tiʼj tuʼn tok qeʼ tkʼuʼj tiʼj qa mlayx kyaj tkolin Jehová qe tmajen (versículo 15). Ax jlu jaku bʼaj qiʼj, kchʼiyel qʼuqbʼil qkʼuʼj tiʼj Jehová qa ma qo ximen tiʼjju o bʼant tuʼn kyiʼj tmajen ex tiʼjju o bʼant tuʼn qiʼj.
19. ¿Alkye juntl kʼiwlabʼil tzul qkʼamoʼn qa ma tzʼel qpaʼn ambʼil tuʼn qten tukʼil Jehová?
19 Tkyajin, mas kʼokel qkʼujlaʼn Jehová. Atzun kʼiwlabʼil lu mas nim toklen. ¿Tiquʼn? Tuʼnju jaku tzʼonin kʼujlabʼil qiʼj tuʼn qnimen te Jehová, tuʼn kybʼant chʼixpubʼil quʼn tuʼn ttzalaj qiʼj ex tuʼn tikʼx alkyexku nya bʼaʼn quʼn (Mat. 22:37-39; 1 Cor. 13:4, 7; 1 Juan 5:3). Mintiʼ juntl tiʼ mas nim toklen twitzju tuʼn qok te tamiw Jehová (Sal. 63:1-8).
20. ¿Tiʼ taja tuʼn tbʼant tuʼna tuʼn ttena mas ambʼil tukʼil Jehová?
20 Ik tzeʼn ma tzʼel qnikʼ tiʼj, in qo kʼulin te Jehová aj qnaʼn Dios, aj qxnaqʼtzan ex aj qximen tiʼjju in nel qnikʼ tiʼj. Bʼaʼn tuʼn tel qkanoʼn tiʼj Jesús ex qjyonx jun lugar jatumel mintiʼ bulla tuʼntzun qyolin tukʼil Jehová. Ax ikx, qqʼonk tilil tuʼn miʼn tok qqʼoʼn qwiʼ kyiʼj junjuntl tiʼchaq. Ex aj qkʼulin te Jehová, qqaninx onbʼil te tuʼn tok qqʼoʼn qwiʼ tiʼjju in bʼant quʼn. Qa ma tzʼajbʼen ambʼil toj tumel quʼn, qo tzajel tkʼiwlaʼn Jehová aj qanqʼin te jumajx toj akʼaj twitz Txʼotxʼ (Mar. 4:24).
BʼITZ 28 Tzeʼn jaku qo ok te tamiw Jehová
^ A Jehová mas tbʼanel qamiw at. Nim toklen tamiwbʼil toj qwitz, tuʼntzunju, qaj tuʼn tok qojtzqiʼnxix ex tuʼn qok te tamiw. Tuʼn tbʼant jlu quʼn, nim toklen tuʼn tel qpaʼn ambʼil tuʼn qten tukʼil. Pero, ¿tzeʼn jaku bʼant jlu quʼn tuʼnju at nim tiʼchaq tuʼn tbʼant quʼn? Toj xnaqʼtzbʼil lu, kʼelel qnikʼ tiʼj.