XNAQʼTZBʼIL 1
In nok qeʼ qkʼuʼj tiʼj qa tkuʼx axix tok toj Tyol Dios
TEXTO TE ABʼQʼI 2023: «Kykyaqil qe tyola axix tok qe» (SAL. 119:160).
BʼITZ 96 Jun qʼinumabʼil aju Tyol Dios
AJU KʼELEL QNIKʼ TIʼJ a
1. ¿Tiquʼn mintiʼ in nok qeʼ kykʼuʼj nim xjal tiʼj Biblia?
TOJ ambʼil jaʼlo, mintiʼ in nok qeʼ kykʼuʼj xjal kyiʼj txqantl. In nok kyqʼoʼn kyoklen qeju ateʼ toj política, qeju científico ex qeju xjal at kykʼaẍjel, pero mintiʼ in nok qeʼ kykʼuʼj tiʼj qa in xi kybʼinchaʼn aju mas tbʼanel. Ex mintiʼxix in che respetarin kye nejenel kye okslabʼil. Tuʼntzunju, mintiʼ in qo jaw labʼin aj tok qbʼiʼn qa mintiʼ in nok qeʼ kykʼuʼj xjal tiʼj Biblia, aju uʼj in tzaj kyqʼamaʼn nejenel kye okslabʼil qa in che ok lepeʼ tiʼj.
2. Ik tzeʼn in tzaj tqʼamaʼn Salmo 119:160, ¿tiʼ il tiʼj tuʼn tok qeʼ qkʼuʼj tiʼj?
2 Qʼuqli kykʼuʼj tmajen Jehová tiʼj qa a «Dios axix tok» ex qa taj aju mas tbʼanel kye xjal (Sal. 31:5; Is. 48:17). Jaku tzʼok qeʼ qkʼuʼj tiʼjju in tzaj tqʼamaʼn Biblia tuʼnju in tzaj tqʼamaʼn jlu tiʼj Jehová: «Kykyaqil qe tyola axix tok qe» (kjawil uʼjit Salmo 119:160). Tuʼntzunju, ax qximbʼetz ik tzeʼn te jun xjal in xnaqʼtzan tiʼj Biblia. Tqʼama jlu: «Axix tok tkyaqilju in tzaj tqʼamaʼn Dios ex in japun twiʼ. Jaku tzʼok qeʼ tkʼuʼj ttnam tiʼj tyol tuʼnju in nok qeʼ kykʼuʼj tiʼj qa a o qʼamante».
3. ¿Tiʼ kʼelel qnikʼ tiʼj toj xnaqʼtzbʼil lu?
3 ¿Tzeʼn jaku qo onin kyiʼj txqantl tuʼn tok qeʼ kykʼuʼj tiʼj Tyol Dios ik tzeʼn qe? Jaku qo onin kyiʼj aj t-xi qxnaqʼtzaʼn kye qa naʼmx tchʼexpaj tqanil tkuʼx toj Biblia, qa kukx in che japun kywi profecía in tzaj tqʼamaʼn ex qa jaku chʼexpaj kyanqʼibʼil xjal tuʼn.
NAʼMX TCHʼEXPAJ TQANIL TKUʼX TOJ BIBLIA
4. ¿Tiquʼn in kubʼ kyximen junjun xjal qa o chʼexpaj tqanil tkuʼx toj Biblia?
4 E ajbʼen junlo 40 xjal tuʼn Jehová tuʼn tkubʼ kytzʼibʼin qe uʼj tkuʼx toj Biblia. Pero toj ambʼil jaʼlo, ya mintiʼ in che kanet qe tnejel uʼj ex qe manuscrito e kubʼ tzʼibʼin. b Sino oʼkx qe copia jaku che kanet quʼn. Tuʼn jlu, ateʼ junjun xjal mintiʼxix in nok qeʼ kykʼuʼj tiʼj qa axju in tzaj tqʼamaʼn Tyol Dios ik tzeʼn kubʼ tzʼibʼin toj ambʼil ojtxe. ¿Tzeʼn jaku tzʼok qeʼ qkʼuʼj tiʼj qa naʼmx tchʼexpaj tqanil tkuʼx toj Biblia?
Ok tilil kyuʼn xjal e aqʼunan tuʼn tcopiarit Tyol Dios kubʼ tzʼibʼin toj yol hebreo tuʼn tbʼant jun tbʼanel aqʼuntl kyuʼn. (Qʼonka twitza tiʼj párrafo 5).
5. ¿Tzeʼn e bʼant copia kyiʼj uʼj e kubʼ tzʼibʼin tiʼj Tyol Dios toj yol hebreo? (Qʼonka twitza tiʼj tilbʼilal tok tiʼj revista).
5 Tuʼn tok t-xqʼuqin Jehová tqanil tkuʼx toj Tyol, tzaj tqʼamaʼn tuʼn kybʼant copia tiʼj. Tzaj tqʼamaʼn kye rey te Israel tuʼn tkubʼ kytzʼibʼin jun copia tiʼj Ley, atzun kye tyajil Leví tzaj tqʼamaʼn kye tuʼn t-xi kychikʼbʼaʼn kye xjal (Deut. 17:18; 31:24-26; Neh. 8:7). Tej kyxi qʼiʼn xjal te Israel toj tnam Babilonia, ok tilil kyuʼn junjun xjal tuʼn tkubʼ kytzʼibʼin nim copia kyiʼj uʼj tiʼj Tyol Dios toj yol hebreo (Esd. 7:6, TNM). Bʼant jun tbʼanel aqʼuntl kyuʼn xjal lu. Tej tikʼ ambʼil, axpe ikx bʼaj kyajlaʼn qe yol ex qe letra. Maske ikju, at maj i el tzpet tuʼnju nya tzʼaqli qeʼ. Noqtzun tuʼnj, el nikʼbʼaj tiʼj jatumel otoq che el tzpet tuʼnju otoq che bʼant nim copia tiʼj ax uʼj. Qo xnaqʼtzan tiʼj tzeʼn bʼant jlu.
6. ¿Tzeʼn in nel nikʼbʼaj tiʼj jatumel i el tzpet qeju tzaj kycopiarin Tyol Dios?
6 Toj ambʼil jaʼlo, in bʼant junjun tiʼchaq kyuʼn xjal in che xnaqʼtzan tiʼj Biblia tuʼn tel kynikʼ tiʼj jatumel i el tzpet qeju tzaj kycopiarin uʼj tiʼj Tyol Dios. Tuʼn tel qnikʼ tiʼjju in bʼant kyuʼn, qo ximen tiʼj qa in xi qanin te jun syent xjal tuʼn ttzaj kycopiarin jun uʼj, pero at jun kye in nel tzpet. Tuʼn tel nikʼbʼaj tiʼj jatumel otoq tzʼel tzpet, il tiʼj tuʼn kyok mojbʼet kykyaqil copia. Atzun jlu in bʼant kyuʼn xnaqʼtzal tiʼj Biblia tuʼn tel kynikʼ tiʼj jatumel mintiʼ kux qʼoʼn jun tqanil moqa jatumel i el tzpet qeju tzaj kycopiarin uʼj tiʼj Tyol Dios.
7. ¿Tiquʼn in xi qqʼamaʼn qa bʼant jun tbʼanel aqʼuntl kyuʼn qeju tzaj kycopiarin Tyol Dios?
7 Qo xnaqʼtzan tiʼj jun techel in tzaj tyekʼin qa bʼant jun tbʼanel aqʼuntl kyuʼn qeju tzaj kycopiarin Tyol Dios. Aju copia tiʼj Tyol Dios toj yol hebreo mas ojtxe o kanet, kubʼ tzʼibʼin kyoj abʼqʼi 1008 moqa 1009 tiʼj ambʼil qʼiʼn quʼn jaʼlo ex tok tbʼi te Códice de Leningrado. Noqtzun tuʼnj, e kanet junjuntl copia ex junjuntl piẍ uʼj tiʼj Tyol Dios e kubʼ tzʼibʼin junlo mil abʼqʼi antes te Códice de Leningrado. Tuʼnju e bʼant nim copia toj mil abʼqʼi, jakulo kubʼ kyximen junjun xjal qa chʼexpaj tqanil tkuʼx toj Códice de Leningrado kyukʼil uʼj e kubʼ tzʼibʼin tnejel. Pero mintiʼ bʼaj jlu. Tej tok kymojbʼaʼn xjal in che xnaqʼtzan tiʼj Biblia qe ojtxe copia kyukʼil qeju e bʼant yajxitl, el kynikʼ tiʼj qa e ajbʼen junjuntl yol kyuʼn xjal, pero mintiʼ chʼexpaj tqanil tkuʼx toj Tyol Dios.
8. ¿Tiquʼn junxitl qe copia kubʼ tzʼibʼin toj yol griego tiʼj Tyol Dios kyukʼil junjuntl uʼj e kubʼ tzʼibʼin ojtxe?
8 Ok tilil kyuʼn tnejel okslal tuʼn tel kykanoʼn kyiʼj qeju tzaj kycopiarin uʼj tiʼj Tyol Dios toj yol hebreo. ¿Tiquʼn? Tuʼnju bʼant jun tbʼanel aqʼuntl kyuʼn tej ttzaj kycopiarin qeju 27 libro toj yol griego e ajbʼen kyuʼn toj chmabʼil ex toj pakbʼabʼil. Ok tmojbʼaʼn jun xjal in xnaqʼtzan tiʼj Tyol Dios qe copia kubʼ kytzʼibʼin tnejel okslal kyukʼil junjuntl uʼj e kubʼ tzʼibʼin toj ambʼil aju. Tqʼama jlu kyiʼj copia tiʼj Biblia: «Chʼixme tkyaqil maj, ateʼ mas copia [...] ex mas tzʼaqli qe». In tzaj tqʼamaʼn jun libro jlu kyiʼj uʼj tiʼj Tyol Dios e kubʼ tzʼibʼin toj yol griego: «Jaku tzʼok qeʼ qkʼuʼj tiʼj qa axju tqanil jaku jaw quʼjin toj jun tbʼanel traducción toj ambʼil jaʼlo tukʼilju kubʼ tzʼibʼin kyuʼn xjal toj ambʼil ojtxe» (Anatomy of the New Testament).
9. ¿Tiʼ in tzaj tqʼamaʼn Isaías 40:8 tiʼj tqanil tkuʼx toj Biblia?
9 Jaku qo xnaqʼtzan tiʼj jun traducción tzʼaqli tiʼj Tyol Dios toj ambʼil jaʼlo tuʼnju bʼant jun tbʼanel aqʼuntl kyuʼn qeju e onin tuʼn tcopiarit toj ambʼil ojtxe. c Tuʼn jlu, in nel qnikʼ tiʼj qa ok t-xqʼuqin Jehová tqanil tkuʼx toj Tyol (kjawil uʼjit Isaías 40:8). Pero jakulo tzaj kyqʼamaʼn junjun xjal qa nya tyol Dios tkuʼx toj Biblia maske mintiʼ chʼexpaj tqanil tkuʼx toj. Tuʼntzunju, qo xnaqʼtzan kyiʼj junjun techel in tzaj kyyekʼin qa tyol Dios tkuʼx toj Biblia.
KUKX IN JAPUN KYWI PROFECÍA IN TZAJ TQʼAMAʼN BIBLIA
Left: C. Sappa/DeAgostini/Getty Images; right: Image © Homo Cosmicos/Shutterstock
Japun kywi profecía toj ambʼil ojtxe ex in japun kywi toj ambʼil jaʼlo. (Qʼonka twitza tiʼj párrafo 10 ex 11). e
10. Yolina tiʼj jun profecía japun twi ex in tzaj tyekʼin qa ax tok aju in tzaj tqʼamaʼn 2 Pedro 1:21 (qʼonka twitza kyiʼj tilbʼilal).
10 O japun kywi nim profecía in tzaj tqʼamaʼn Tyol Dios ex ateʼ junjun otoq tzikʼ nim syent abʼqʼi kytzajlen qʼamaʼn. Aju o bʼaj ojtxe, in tzaj tyekʼin qa japun kywi profecía lu. Mintiʼ in qo jaw labʼin tiʼj jlu tuʼnju a Jehová o kyaj qʼamante (kjawil uʼjit 2 Pedro 1:21). Qo ximen tiʼj ambʼil tej tkubʼ tiʼj tnam Babilonia. Kyxol abʼqʼi 778 a 732 tjaqʼxi ambʼil qʼiʼn quʼn jaʼlo, tzaj tqʼamaʼn Jehová te profeta Isaías tuʼn tkubʼ ttzʼibʼin qa kbʼel tiʼj tnam Babilonia. Axpe ikx, kubʼ ttzʼibʼin Isaías qa Ciro tbʼi xjal kbʼel tiʼj tnam tuʼn ex kyaj tqʼamaʼn tzeʼn tuʼn tkubʼ tiʼj (Is. 44:27–45:2). Nya oʼkxju, ax ikx kyaj tqʼamaʼn qa aj tbʼet ambʼil kbʼeltoq xiten tnam Babilonia ex mintiʼ jun xjal kʼanqʼil toj (Is. 13:19, 20). Japun twi profecía lu ik tzeʼn kyaj qʼamaʼn. Maske ten tipumal Babilonia ex ok te jun tbʼanel tnam, kubʼ tiʼj kyuʼn xjal te Medopersia toj abʼqʼi 539 tjaqʼxi ambʼil qʼiʼn quʼn jaʼlo ex oʼkx qe tbʼuchil at. (Qʼonka twitza tiʼj video Kyaj tqʼamaʼn Tyol Dios qa oktoq kbʼel xiten tnam Babilonia. Jaku kanet tuʼna toj xnaqʼtzbʼil 3, punto 5 toj libro Tzalaja tiʼj tanqʼibʼila edición digital).
11. ¿Tzeʼn in japun twi Daniel 2:41 a 43?
11 Pero nya oʼkx toj ambʼil ojtxe japun kywi profecía, ax ikx in japun kywi toj ambʼil jaʼlo. Jun techel, qo ximen tiʼj tzeʼn in japun twi profecía kyaj tqʼamaʼn Daniel tiʼj nimaq kawbʼil te Reino Unido ex Estados Unidos (kjawil uʼjit Daniel 2:41-43). In tzaj tqʼamaʼn profecía qa «tuj jun tumel ktel nim tipun» nimaq kawbʼil lu ik tzeʼn kʼuxbʼil, pero «tuj juntl tumel mya nim tipun ktel» ik tzeʼn xkabʼ txʼotxʼ. Ex atzun jlu in nok qqʼoʼn qwitz tiʼj. O ten kyipumal kabʼe tnam lu ik tzeʼn kʼuxbʼil tuʼnju nim e onin kyoj kabʼe nimaq qʼoj ex kukx at nim kysoldad tuʼn kyqʼojin. Noqtzun tuʼnj, o tzʼel qʼiʼn kyipumal kawbʼil lu kyuʼn sindicato ex tuʼnju in che manifestarin xjal tuʼn kykolin tiʼj kyoklen ex kyiʼj junjuntl tiʼchaq. Kʼitzqeku tqʼama jun xjal at tojtzqibʼil tiʼj política jlu: «Qa ma qo yolin tiʼj política, mas at pabʼil kyxol xjal te Estados Unidos kywitz txqantl tnam nim kyoklen». ¿Yajtzun tkawbʼil Reino Unido? Kyoj qeju mankbʼil abʼqʼi o che ikʼ, mintiʼ in mojeʼ t-ximbʼetz kyukʼil txqantl tnam ateʼ toj Unión Europea. Tuʼnju mintiʼ mujbʼabʼil kyxol, kwest in nela toj twitz tnam te Reino Unido ex Estados Unidos tuʼn tel kynikʼ tiʼj tiʼ tuʼn t-xi kybʼinchaʼn.
12. ¿Tzeʼn in nonin qiʼj tuʼnju o japun kywi profecía tkuʼx toj Tyol Dios?
12 Aj tel qnikʼ tiʼj qa o japun kywi nim profecía tkuʼx toj Tyol Dios, in nonin qiʼj tuʼn tok qeʼ qkʼuʼj tiʼj qa ax tok kjapunel kywi tyol Jehová toj ambʼil tzul. Ax qximbʼetz ik tzeʼn te jun salmista tej t-xi tqʼamaʼn jlu te Jehová: «In chin ayone tiʼj tuʼn nklete tuʼna; pero ma tzʼok qeʼ nkʼuʼje tiʼj tyola» (Sal. 119:81). Tuʼnju kʼujlaʼn qoʼ tuʼn Jehová, in tzaj tqʼamaʼn jlu qe: «In xi nmaʼne jlu tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl» (Jer. 29:11). Ktel jun tbʼanel qanqʼibʼil tuʼnju a Jehová in tzaj tziyente ex nya tuʼnju in nok tilil kyuʼn xjal tuʼn tten jun tbʼanel qanqʼibʼil. Tuʼntzunju, kukx qo xnaqʼtzan kyiʼj profecía tuʼntzun tchʼiy qʼuqbʼil qkʼuʼj tiʼj Tyol Dios.
IN CHE ONIN CONSEJ TKUʼX TOJ TYOL DIOS KYIʼJ NIM XJAL
13. ¿Tiquʼn kukx jaku tzʼok qeʼ qkʼuʼj tiʼj Tyol Dios?
13 Ax ikx jaku tzʼok qeʼ qkʼuʼj tiʼj Tyol Dios tuʼnju in che onin tconsej kyiʼj xjal qa ma che ok lepeʼ kyiʼj (kjawil uʼjit Salmo 119:66, 138). Jun techel, ateʼ junjun mejebʼleʼn otoq kubʼ kyximen tuʼn tel kypan kyibʼ, pero jaʼlo in che tzalaj ex junx ateʼ. Atzun qeju kykʼwal, in kubʼ kynaʼn qa kʼujlaʼn qe ex qa in che ok xqʼuqin (Efes. 5:22-29).
14. ¿Alkye jun techel in tzaj tyekʼin qa in che onin consej tkuʼx toj Biblia tuʼn qok te jun tbʼanel xjal?
14 Ax ikx, o che onin consej tkuʼx toj Tyol Dios kyiʼj xjal otoq bʼant nim nya bʼaʼn kyuʼn. Qo xnaqʼtzan tiʼj tzeʼn e onin consej lu tiʼj jun pres Jack tbʼi. d Otoq naqʼet tuʼn tbʼiyen ex ok ojtzqiʼn twitz tuʼnju ten kyxol qeju xjal mas nya bʼaʼn kymod otoq kubʼ qʼoʼn kysentens tuʼn kykyim. Pero jun qʼij, kubʼ qeʼ bʼilte jun xnaqʼtzbʼil tiʼj Tyol Dios. Tbʼanel ela toj twitz tuʼnju kubʼ kyyekʼin erman tbʼanel kymod tukʼil, tuʼntzunju, kubʼ t-ximen tuʼn t-xnaqʼtzan. Chʼexpaj tmod tej tkubʼ tbʼinchaʼn aju in tzaj tqʼamaʼn Tyol Dios. Tej tikʼ ambʼil, e japun requisito tuʼn tuʼn tok te pakbʼal ex yajxitl bautisarin. Yolin tukʼil tzalajbʼil tiʼj tbʼanel tqanil tiʼj Tkawbʼil Dios kyukʼil txqantl ex onin kyiʼj kyaje pres tuʼn tok kyojtzqiʼn axix tok. Tej tpon ambʼil tuʼn tkubʼ bʼyoʼn Jack, otoq chʼexpaj tmod. Tqʼama jun kyxol qe t-abogado Jack jlu: «Ma tzikʼ junlo 20 abʼqʼi toklen wojtzqiʼne Jack ex junxitl tmod jaʼlo. O chʼexpaj tanqʼibʼil tuʼnju xnaqʼtzbʼil xi kyqʼoʼn testigo de Jehová te». Maske kubʼ bʼyoʼn Jack, aju bʼaj tiʼj in tzaj tyekʼin qe qa jaku tzʼok qeʼ qkʼuʼj tiʼj Tyol Dios ex qa jaku tzʼonin qiʼj tuʼn tchʼexpaj qanqʼibʼil (Is. 11:6-9).
O che onin consej tkuʼx toj Tyol Dios kyiʼj nim xjal te junxichaq tnam tuʼn tchʼexpaj kyanqʼibʼil. (Qʼonka twitza tiʼj párrafo 15). f
15. ¿Tiquʼn junxitl qe tmajen Jehová? (Qʼonka twitza kyiʼj foto).
15 Tuʼnju in xi kybʼiʼn tmajen Jehová qe consej tkuʼx toj Biblia, in che tzalaj ex at mujbʼabʼil kyxol (Juan 13:35; 1 Cor. 1:10). Mas in che jaw labʼin xjal tiʼj jlu tuʼnju mintiʼ in ten junx kyximbʼetz tiʼj política, tiʼj kyyajil ex tiʼj kyoklen. Jaw labʼin jun kuʼxun te África Jean tbʼi kyiʼj tmajen Jehová tuʼnju at mujbʼabʼil qxol. Tej t-xi tzyet qʼoj toj lugar jatumel in nanqʼin, okx tqʼon tibʼ kyxol soldad. Yajxitl, xiʼ oq toj juntl tnam jatumel e ok tojtzqiʼn testigo de Jehová. Tqʼama Jean jlu: «El nnikʼe tiʼj qa mintiʼ in nokx kyqʼon kyibʼ axix tok okslal toj política ex at mujbʼabʼil kyxol. Nya oʼkxju, ax ikx in nok kykʼujlan kyibʼ». Tqʼamatl jlu: «Otoq kubʼ nximane tuʼn tajbʼen wanqʼibʼile tuʼn nkoline tiʼj ntname, pero tej tel nnikʼe tiʼj axix tok, ajbʼen wuʼne tuʼn wajbʼene te Jehová». Chʼexpaj t-ximbʼetz kuʼxun lu. Ya mintiʼ in qʼojin kyukʼil xjal te junxitl tnam, sino in xi t-xnaqʼtzaʼn kye kykyaqil aju in tzaj tqʼamaʼn Tyol Dios. Tuʼnju in che onin consej tkuʼx toj Biblia tiʼj alkyexku xjal, mas jaku tzʼok qeʼ qkʼuʼj tiʼj.
KUKX QEʼK QKʼUʼJ TIʼJ AXIX TOK TKUʼX TOJ TYOL DIOS
16. ¿Tiquʼn nim toklen tuʼn tchʼiy qʼuqbʼil qkʼuʼj tiʼj Tyol Dios?
16 Mas kxeʼl nya bʼaʼn toj il aj tikʼ ambʼil ex kʼokel qʼuqbʼil qkʼuʼj tiʼj Tyol Dios toj prueba. Jakulo tzaj kyqʼamaʼn xjal qe qa mintiʼ in tzaj tqʼamaʼn Biblia axix tok ex qa mintiʼ o tzaj tqʼoʼn Jehová toklen majen in bʼant taqʼun ex at tnabʼl tuʼn tkubʼ nej qwitz. Pero qa ma tzʼok qeʼ qkʼuʼj tiʼj qa kukx in tzaj tqʼamaʼn Tyol Dios axix tok, mlay kubʼ qiʼj kyuʼn. Sino kʼokel tilil quʼn tuʼn kyjapun qe tley Jehová «te jumajx» (Sal. 119:112). Tuʼntzunju, mlay tzaj qchʼixwi aj qyolin kyukʼil txqantl tiʼj axix tok ex kyiʼj consej tkuʼx toj Biblia (Sal. 119:46). Ax ikx, jaku qo tzalaj ex jaku ten qpasens aj qok weʼ kywitz junjuntl prueba mas kwest ik tzeʼn ikʼbʼil (Col. 1:11; Sal. 119:143, 157).
17. ¿Tiʼ tzul tnaʼn texto te abʼqʼi 2023 qe?
17 In xi qqʼoʼn nimxix chjonte te Jehová tuʼnju o tzaj tqʼoʼn ambʼil qe tuʼn tel qnikʼ tiʼj axix tok. Mintiʼ in nel kynikʼ xjal tiʼj tiʼ tuʼn tbʼant kyuʼn. Atzun qe, in nonin axix tok qiʼj tuʼn qtzalaj ex in tzaj tyekʼin qe tzeʼn tuʼn qanqʼin kyoj ambʼil kwest. Ax ikx in tzaj tqʼamaʼn qe qa ktel jun tbʼanel qanqʼibʼil tjaqʼ Tkawbʼil Dios. Kuchiwt tzʼonin texto te abʼqʼi 2023 qiʼj tuʼn tok qeʼ qkʼuʼj tiʼj qa axix tok tkyaqil tqanil tkuʼx toj Tyol Dios (Sal. 119:160).
BʼITZ 94 In xi qqʼoʼn chjonte tiʼj Tyol Dios
a O jaw skʼoʼn jun tbʼanel texto te abʼqʼi 2023 ex in tzaj tqʼuqbʼaʼn qkʼuʼj. ¿Alkye? Aju texto te Salmo 119:160 ex in tzaj tqʼamaʼn jlu: «Kykyaqil qe tyola axix tok qe». Axlo ikx qe qʼuqli qkʼuʼj kyiʼj yol lu. Pero ateʼ nim xjal mintiʼ in nok qeʼ kykʼuʼj tiʼj qa tkuʼx axix tok toj Tyol Dios ex qa at kyajbʼen tconsej. Toj xnaqʼtzbʼil lu, qo yolil kyiʼj oxe tiʼ jaku che ajbʼen quʼn tuʼn qonin kyiʼj xjal at jun tbʼanel kyanmi tuʼn tok qeʼ kykʼuʼj tiʼj Biblia ex kyiʼj tconsej.
b Jun ojtxe uʼj manuscrito ex kubʼ kytzʼibʼin xjal tuʼn kyqʼabʼ.
c Qa taja tuʼn tel mas tnikʼa tiʼjju o bʼant tuʼn tok xqʼuqit Biblia, jaku tzʼokxa toj jw.org ex jaku kubʼ ttzʼibʼina «Aju Tyol Dios ex aju o bʼaj tiʼj».
d Ma che kubʼ chʼixpet junjun bʼibʼaj.
