1, 2. a) ¿Tiquʼn mintiʼ in qo jaw labʼin aj qok weʼ kywitz nya bʼaʼn? b) ¿Tiʼ kʼelel qnikʼ tiʼj toj xnaqʼtzbʼil lu?

 MINTIʼ in che jaw labʼin tmajen Jehová aj kyok weʼ twitz nya bʼaʼn. ¿Tiquʼn? Tuʼnju in tzaj tqʼamaʼn Tyol Dios jlu: «Ilxix tiʼj tuʼn ttzaj nim yajbʼil qe, tuʼntzun qokx tuj tkawbʼil Dios» (Hech. 14:22). Ax ikx, ojtzqiʼn quʼn qa oʼkx che elel qʼiʼn junjun nya bʼaʼn aj qanqʼin toj Paraíso, jatumel «mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apoc. 21:4).

² Mintiʼ in nel tiʼn Jehová qe nya bʼaʼn in qo ok weʼ kywitz. Noqtzun tuʼnj, in tzaj tqʼoʼn qipumal tuʼn qex kywitz. Qo ximen tiʼjju xi tqʼamaʼn apóstol Pablo kye okslal e anqʼin toj tnam Roma. Tej otoq tqʼama alkyeqe nya bʼaʼn ok weʼ twitz kyukʼil erman, kubʼ ttzʼibʼin jlu: «Tuj tkyaqil jlu in kubʼxix kyiʼj quʼn noq tuʼn Crist aju o qo tkʼujla» (Rom. 8:35-37). In tzaj kyyekʼin yol lu qa jaku tzʼonin Jehová qiʼj tuʼn tel bʼaʼn aju in bʼant quʼn, axpe ikx kyoj ambʼil kwest. Qo xnaqʼtzan tiʼj tzeʼn onin tiʼj José tuʼn tel bʼaʼn tkyaqilju bʼant tuʼn ex tzeʼn jaku tzʼonin qiʼj toj ambʼil jaʼlo.

3. ¿Tiquʼn in xi qqʼamaʼn qa noq minabʼen chʼexpaj tanqʼibʼil José?

³ Ojtzqiʼntoq kyuʼn kykyaqil tkʼwal Jacob qa mas kʼujlaʼntoq José tuʼn (Gén. 37:3, 4). Tej tok kykeʼyin jlu, tzaj  txʼaʼl tiʼj kykʼuʼj tiʼj. Tuʼntzunju, xi kykʼayin kye junjun xjal te Madián. Xi qʼiʼn José kyuʼn xjal lu toj tnam Egipto, najchaq tiʼj tja. Ex tej kypon toj tnam Egipto, xi kykʼayin te Potifar, aju nejenel kye soldad e xqʼuqin tiʼj faraón. Noq minabʼen chʼexpaj tanqʼibʼil José, ya mlaytoq tzʼok kʼujlaʼn tuʼn tman ex otoq tzʼok te majen toj tnam Egipto (Gén. 39:1).

4. ¿Alkyeqe nya bʼaʼn jaku qo ok weʼ twitz ik tzeʼn te José?

⁴ In tzaj tqʼamaʼn Tyol Dios qa «noq minabʼen in tzaj mya bʼaʼn» qiʼj (Ecl. 9:12). At maj, in qo ok weʼ kywitz ax nya bʼaʼn ik tzeʼn kye txqantl xjal (1 Cor. 10:13). Ax ikx, jakulo che xmayin xjal qiʼj moqa jaku qo el ikʼun noq tuʼnju in qo ok lepeʼ tiʼj Jesús (2 Tim. 3:12). Noq alkyexku nya bʼaʼn jaku qo ok weʼ twitz, jaku tzʼonin Jehová qiʼj tuʼn tel bʼaʼn aju kbʼantel quʼn. Qo xnaqʼtzan tiʼj tzeʼn onin tiʼj José.

5. ¿Tiʼ el tnikʼ Potifar tiʼj? (Génesis 39:2-6).

⁵ (Kjawil uʼjit Génesis 39:2-6). El tnikʼ Potifar tiʼj qa attoq nim tnabʼil José ex qa tgantoq tuʼn taqʼunan. Ax ikx, el tnikʼ tiʼj qa «attoq Qman tukʼil, ex tkyaqilju in tbʼinchaʼntoq, bʼaʼntoq nneʼla». b Tej tikʼ ambʼil, xi tqʼamaʼn Potifar te José tuʼn tonin tiʼj ex xi tqʼoʼn toklen tuʼn t-xqʼuqin tiʼj tkyaqilju at te. Tuʼn jlu, tzaj kʼiwlaʼn Potifar tuʼn Jehová.

6. ¿Tiʼtzulo kubʼ t-ximen José?

⁶ Qo ximen tiʼjju bʼaj tiʼj José. ¿Tajpetoq tuʼn tok tqʼoʼn Potifar twitz tiʼj tuʼntzun t-xi qʼoʼn mas toklen? Miʼn. Sino maswitlo bʼaʼn ela toj twitz tuʼn tetz tzaqpiʼn ex tuʼn tmeltzʼaj tukʼil tman. Jakutoq t-xi qʼoʼn mas toklen, pero kukxtoq in najbʼen te tmajen jun xjal in kʼulin kywitz junjuntl dios. Mintiʼ onin Jehová tiʼj José tuʼn tetz tzaqpiʼn tuʼn Potifar ex mas tzaj nya bʼaʼn tiʼj.

7. ¿Tiquʼn jaku txi qqʼamaʼn qa mas tzaj nya bʼaʼn tiʼj José? (Génesis 39:14, 15).

⁷ Ik tzeʼn in tzaj qʼamaʼn toj capítulo 39 te Génesis, ok tqʼoʼn t-xuʼjil Potifar  twitz tiʼj José ex tajtoq tuʼn tkubʼ kuẍe tukʼil. Pero mintiʼ xi tbʼiʼn José tyol. Tuʼntzunju, tzaj nim tqʼoj ex xi tqʼamaʼn qa tajtoq José tuʼn tkubʼ tviolarin te (kjawil uʼjit Génesis 39:14, 15). Tej tok tbʼiʼn Potifar jlu, okx tqʼoʼn José toj cárcel jatumel ten junjun abʼqʼi (Gén. 39:19, 20). ¿Tzeʼntoq lugar jatumel okx qʼoʼn? Aju yol hebreo ajbʼen tuʼn José tuʼn tyolin tiʼj cárcel, jaku yolin tiʼj jun «jul» moqa tiʼj jun «cisterna». Tuʼn jlu, jaku tzʼel qnikʼ tiʼj qa attoq nim qlolj jatumel ten ex bʼisbʼajilxix (Gén. 40:15). Ax ikx, in tzaj tqʼamaʼn Tyol Dios qa ok qʼoʼn kaden tiʼj tqan José ex tiʼj tqul (Sal. 105:17, 18). Ik tzeʼn ma qo yolin tiʼj, mas tzaj nya bʼaʼn tiʼj José, ya mintiʼ ajbʼen te majen ex okx qʼoʼn toj cárcel.

8. ¿Tiʼ jaku tzʼok qeʼ qkʼuʼj tiʼj maske jaku txiʼ jun nya bʼaʼn toj il?

⁸ ¿Ope qo ok weʼ twitz jun ambʼil kwest ex mas xiʼ toj il maske kukx o naʼn Dios? At maj jaku bʼaj jlu qiʼj. Mintiʼ in nel tiʼn Jehová ambʼil tuʼn qok weʼ twitz nya bʼaʼn tjaqʼ tkawbʼil Satanás (1 Juan 5:19). Noqtzun tuʼnj, jaku tzʼok qeʼ qkʼuʼj tiʼj qa in nok tqʼoʼn Jehová twitz tiʼjju in bʼaj qiʼj ex qa in ximen qiʼj (Mat. 10:29-31; 1 Ped. 5:6, 7). Ax ikx, o tzaj ttziyen jlu qe: «Mlay kyaj nkoline, ex mlay kyaj nqʼoʼne» (Heb. 13:5). Tuʼn tonbʼil Jehová, jaku tzikʼx alkyexku nya bʼaʼn quʼn maske in kubʼ qximen qa mlayx qo ex twitz. Atzun jlu bʼaj tiʼj José.

9. ¿Tiquʼn in xi qqʼamaʼn qa onin Jehová tiʼj José tej tten toj cárcel? (Génesis 39:21-23).

⁹ (Kjawil uʼjit Génesis 39:21-23). Onin Jehová tiʼj José tuʼn tel bʼaʼn tkyaqilju bʼant tuʼn maske ok weʼ twitz nya bʼaʼn. ¿Tiquʼn in xi qqʼamaʼn jlu? Tuʼnju xi tqʼoʼn xqʼuqil pres toklen tuʼn tonin tiʼj ex ok qeʼ tkʼuʼj tiʼj ik tzeʼn te Potifar. Ex in tzaj tqʼamaʼn Tyol Dios jlu: «Mintiʼtltoq tbʼis nejenel tiʼj tuʼn tbʼaj tkeʼyin aju attoq tuj tkwent José». Tuʼn jlu, ok tqʼoʼn José twiʼ tiʼj toklen xi qʼoʼn. Jaku qo jaw labʼin tuʼnju tzaj qʼoʼn mas toklen José maske xi qʼamaʼn qa tajtoq tuʼn tkubʼ tviolarin t-xuʼjil Potifar. Pero bʼaj tkyaqil jlu tuʼnju in tzaj tqʼamaʼn Génesis 39:23 qa «attoq Qman tukʼil José ex o tzʼonin tiʼj, kyjaʼtzun, tkyaqil aju in bʼant tuʼn bʼaʼn nneʼla».

10. ¿Tiquʼn jakutoq kubʼ t-ximen José qa nya bʼaʼn ela tkyaqilju bʼant tuʼn?

¹⁰ Qo ximen juntl maj tiʼjju bʼaj tiʼj José. ¿Kubʼpe t-ximen qa tbʼaneltoq in nela tkyaqil maske tokx toj cárcel tuʼnju xi qʼamaʼn jun nya ax tok yol tiʼj? ¿Tajpetoq José tuʼn ttzalaj xqʼuqil cárcel tiʼj? Miʼn. Sino tajtoq tuʼn tetz tzaqpiʼn. Axpe ikx, xi tqʼamaʼn te jun pres otoq tzʼetz tzaqpiʼn tuʼn t-xi tqʼamaʼn te faraón tuʼn tetz qʼiʼn toj cárcel (Gén. 40:14). Tuʼnju yaj yolin xjal lu tukʼil faraón, ten José juntl kabʼe abʼqʼi toj cárcel (Gén. 40:23; 41:1, 14). Pero tuʼnju kukx onin Jehová tiʼj José, bʼaʼn ela tkyaqilju xi tbʼinchaʼn. ¿Tzeʼn bʼant jlu tuʼn?

11. ¿Tiʼ toklen José xi tqʼoʼn Jehová ex tzeʼn onin jlu tuʼn tjapun twi t-ximbʼetz?

¹¹ Akux attoq José toj cárcel, tzaj tqʼoʼn Jehová ambʼil te rey te Egipto tuʼn tok tkeʼyin kabʼe witzikʼ. Tajtoq faraón tuʼn tel tnikʼ kyiʼj witzikʼ. Tuʼntzunju, tej tok tbʼiʼn qa jakutoq tzaj tchikʼbʼaʼn José tiʼ kyxilen twitzikʼ, xi tqʼamaʼn tuʼn ttzaj qʼiʼn. Tuʼn tonbʼil Jehová, nya  oʼkx xi tqʼamaʼn José tiʼ kyxilen twitzikʼ, sino ax ikx xi tqʼamaʼn te tiʼ jakutoq bʼant tuʼn. Tbʼanel ela jlu toj twitz faraón. Ex tej tel tnikʼ tiʼj qa in nonin Jehová tiʼj José, xi tqʼoʼn toklen tuʼn t-xqʼuqin tiʼj wabʼj toj tkyaqil Egipto (Gén. 41:38, 41-44). Tej tikʼ ambʼil, nya oʼkx tzaj weʼyaj toj Egipto, sino ax ikx toj Canaán jatumel in che anqʼintoq toj tja José. Tuʼnju otoq tzaj qʼoʼn toklen José, jakutoq tzʼonin kyiʼj toj tja ex iktzun tten mlaytoq che naj t-xeʼchel Mesías.

12. ¿Tzeʼn onin Jehová tiʼj José tuʼn tel bʼaʼn tkyaqilju bʼant tuʼn?

¹² Qo ximen kyiʼj chʼixpubʼil tzaj toj tanqʼibʼil José. ¿Alkye onin tiʼj tuʼn tok tqʼoʼn Potifar twitz tiʼj tej in najbʼentoq te majen? ¿Alkye onin tiʼj tuʼn tok tqʼoʼn xqʼuqil pres toklen kyibʼaj txqantl toj cárcel? ¿Alkye tzaj qʼonte twitzikʼ faraón ex alkye onin tiʼj José tuʼn t-xi tchikʼbʼaʼn tiʼ kyxilen? ¿Alkye onin tiʼj tuʼn ttzaj qʼoʼn toklen te xqʼuqil wabʼj toj tnam Egipto? (Gén. 45:5). Chikʼlixix taʼ qa a Jehová onin tiʼj José tuʼn tel bʼaʼn tkyaqilju bʼant tuʼn. Maske kyajtoq ttzik José tuʼn tkubʼ kybʼyoʼn, ajbʼen jlu tuʼn Jehová tuʼn tjapun twi t-ximbʼetz.

13. ¿Kukxpe in bʼant jun tiʼ tuʼn Jehová aj qok weʼ kywitz nya bʼaʼn?

¹³ ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj José? ¿Kukxpe in bʼant jun tiʼ tuʼn Jehová aj qok weʼ kywitz nya bʼaʼn? ¿In kubʼpe t-ximen tiʼ tuʼn tbʼaj qiʼj ex in nok jun ambʼil kwest tuʼn te jun tbʼanel ambʼil? Mintiʼ in tzaj t-xnaqʼtzaʼn Tyol Dios jlu (Ecl. 8:9; 9:12). Pero jaku tzʼok qeʼ qkʼuʼj tiʼj qa in ximen Jehová qiʼj ex qa in qo tzaj tbʼiʼn aj qok weʼ twitz jun ambʼil kwest (Sal. 34:15; 55:22; Is. 59:1). Nya oʼkxju, sino ax ikx in nonin qiʼj tuʼn qex kywitz nya bʼaʼn. ¿Tzeʼn in bʼant tuʼn?

14. ¿Tzeʼn in nonin Jehová qiʼj kyoj ambʼil kwest?

¹⁴ In tzaj tqʼuqbʼaʼn Jehová qkʼuʼj ex in bʼant jlu tuʼn toj ambʼil mas at tajbʼen qe (2 Cor. 1:3, 4). Atzun jlu bʼaj tiʼj Eziz, jun ermano te Turkmenistán. Okx qʼoʼn ermano lu kabʼe abʼqʼi toj cárcel tuʼnju in  najbʼen te Jehová. In tzaj tqʼamaʼn jlu: «Toj qʼij tej nxiʼye toj juicio, tzaj tyekʼin jun ermano texto te Isaías 30:15 weye jatumel in tzaj tqʼamaʼn jlu: ‹Qa ma che kubʼ txuleye ex qa ma qeʼ kykʼuʼje wiʼje, oktzun kykʼmaʼye kyipumale›. E onin yol lu wiʼje tuʼn miʼn ttzaj bʼajxix nkʼuʼje ex tuʼn tok qeʼ nkʼuʼje tiʼj Jehová. Tej nximane tiʼj texto lu, onin wiʼje tuʼn miʼn ntzaj xobʼe toj tkyaqil ambʼil tej ntene toj cárcel». ¿In tzajpe qnaʼn tzeʼn o tzʼonin Jehová qiʼj ex tzeʼn o tzaj tqʼuqbʼaʼn qkʼuʼj toj jun ambʼil mas atxix tajbʼen?

15, 16. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Tori?

¹⁵ Chʼixmi tkyaqil maj mintiʼ in nel qnikʼ tiʼj tzeʼn in nonin Jehová qiʼj tzmaxi aj ttzaj qnaʼn aju o tzikʼ qiʼj. Atzun jlu el tnikʼ jun ermana tiʼj aju Tori tbʼi. Kyim Mason aju tal tej otoqxi tzikʼ qaq abʼqʼi toklen cáncer tiʼj. Tzaj nimxix tbʼis Tori tej tbʼaj jlu. In tzaj tqʼamaʼn jlu: «Mintiʼ jun tiʼ mas bʼisbʼajilxix jaku tzikʼ jun txubʼaj toj ik tzeʼn jlu». In tqʼamaʼntl: «Axlo kyximbʼetz mambʼaj jaku ten ik tzeʼn weye, mas in tzaj qbʼis aj ttzaj yabʼil kyiʼj kʼwal ik tzeʼn aj ttzaj yabʼil qiʼjx».

¹⁶ Maske kwest ambʼil ok weʼ Tori twitz, ok ten ximel tiʼj tkyaqilju otoq bʼant tuʼn Jehová tuʼn tonin tiʼj. In tzaj tqʼamaʼn jlu: «Aj nximane tiʼj ambʼil aju, in nel nnikʼe tiʼj qa onin Jehová wiʼje tukʼil kʼujlabʼil toj tkyaqil ambʼil tej yabʼtoq Mason. Naʼnx wuʼne qa e viajarin erman kabʼe or tuʼn kypon toj spital maske mintiʼtoq tipumal wale tuʼn tyolin kyukʼil. Tkyaqil maj, attoq jun erman toj sala de espera tuʼntzun  ttzaj tqʼuqbʼaʼn qkʼuʼje. Ax ikx e onin qiʼje tukʼil pwaq. Kukx ten aju at tajbʼen qeye axpe ikx kyoj ambʼil kwest». Kukx xi tqʼoʼn Jehová aju at tajbʼen te Tori ex te Mason tuʼntzun tikʼx nya bʼaʼn kyuʼn. (Qʼonka twitza tiʼj recuadro « Tzaj tqʼoʼn Jehová aju at tajbʼen qeye»).

17, 18. ¿Tiʼ jaku tzʼonin qiʼj tuʼn tel qnikʼ tiʼj onbʼil in tzaj tqʼoʼn Jehová qe ex tuʼn t-xi qqʼoʼn chjonte te? (Salmo 40:5).

¹⁷ (Kjawil uʼjit Salmo 40:5). Aj t-xiʼ jun xjal pasialil twi jun witz in nok tqʼoʼn twitz kyiʼj junjun tbʼanel lugar akux in bʼet. Chʼixmi ax jlu jaku bʼant quʼn, bʼaʼn tuʼn tel qpaʼn ambʼil tuʼn qximen tiʼj tzeʼn o tzʼonin Jehová qiʼj. Qa ma bʼant jlu quʼn, kʼonil qiʼj tuʼn qex kywitz nya bʼaʼn. Aj tex bʼaj jun qʼij, bʼaʼn tuʼn tkubʼ qxjelin jlu: «¿Alkyeqe kʼiwlabʼil ma tzaj tqʼoʼn Jehová weye jaʼlo? Maske kukx at nya bʼaʼn, ¿tiʼ in bʼant tuʼn Jehová tuʼn tonin wiʼje tuʼn kukx tikʼx wuʼne?». Tuʼntzunju, bʼaʼn tuʼn qximen tkyaqil qʼij tiʼj jun kʼiwlabʼil otoq tzaj tqʼoʼn Jehová qe.

¹⁸ Toj tumel ex tbʼanel qa ma txi qqanin te Jehová tuʼn tel tiʼn nya bʼaʼn in qo ok weʼ twitz (Filip. 4:6). Pero mintiʼ tuʼn tikʼ tnaʼl quʼn qe kʼiwlabʼil in che tzaj qkʼamoʼn jaʼlo. ¿Tiquʼn? Tuʼnju in tzaj ttziyen Jehová tuʼn ttzaj tqʼoʼn qipumal ex tuʼn tonin qiʼj tuʼn tikʼx quʼn. Tuʼntzunju, bʼaʼn tuʼn t-xi qqʼoʼn chjonte tiʼj onbʼil in tzaj tqʼoʼn. Qa ma bʼant jlu quʼn, kʼelel qnikʼ tiʼj tzeʼn in nonin Jehová qiʼj tuʼn tel bʼaʼn tkyaqilju in bʼant quʼn ik tzeʼn bʼaj tiʼj José (Gén. 41:51, 52).