1, 2. a) ¿Tiʼ jaku kubʼ qnaʼn aj qximen tiʼj tanqʼibʼil ex tpakbʼabʼil Jesús? b) ¿Tiʼ kʼelel qnikʼ tiʼj toj xnaqʼtzbʼil lu?

 AJ TKYIM jun xjal kʼujlaʼn quʼn, in tzaj nimxix qbʼis. Ex kwest jaku tzʼela toj qwitz aj qximen tiʼj ambʼil tej naʼmxtoq tkyim, mas qa ikʼx nim kʼixkʼoj tuʼn. Aj tikʼ ambʼil, jakulo kubʼ qnaʼn tzalajbʼil aj ttzaj qnaʼn jun tiʼ otoq tzaj tqʼamaʼn qe, jun tiʼ otoq bʼant tuʼn tuʼn ttzaj tqʼuqbʼaʼn qkʼuʼj moqa tuʼn qtzeʼn.

² Chʼixme ax jlu jaku kubʼ qnaʼn aj qximen tiʼj kʼixkʼoj ikʼx tuʼn Jesús tej tkyim. Toj ambʼil te Conmemoración, in nok tilil quʼn tuʼn qximen tiʼj chojbʼil bʼant tuʼn Jesús (1 Cor. 11:24, 25). Pero in kubʼ qnaʼn tzalajbʼil aj qximen tiʼjju tqʼama ex tiʼjju bʼant tuʼn tej tten tzalu twitz Txʼotxʼ. Ax ikx, in tzaj tqʼuqbʼaʼn qkʼuʼj aj qximen tiʼjju in bʼant tuʼn toj ambʼil jaʼlo ex tiʼjju kbʼantel tuʼn toj ambʼil tzul. Toj xnaqʼtzbʼil lu, kʼelel qnikʼ tiʼj tzeʼn jaku kubʼ qyekʼin qa in xi qqʼoʼn chjonte tiʼj tkʼujlabʼil Jesús aj qximen tiʼj tkyaqilju ma qo yolin tiʼj.

3. ¿Tiquʼn bʼaʼn tuʼn t-xi qqʼoʼn chjonte tiʼj chojbʼil?

³ Aj qximen tiʼj tanqʼibʼil Jesús ex tiʼj tkyimlen, in nonin qiʼj tuʼn t-xi qqʼoʼn chjonte. Tej tpakbʼan twitz Txʼotxʼ, xi  tyekʼin kye xjal tiʼ kbʼantel tuʼn Tkawbʼil Dios. In qo tzalaj kyiʼj tbʼanel xnaqʼtzbʼil lu. Nim toklen chojbʼil toj qwitz tuʼnju in tzaj tqʼoʼn ambʼil qe tuʼn qok te tamiw Jehová ex te tamiw Jesús. Qa ma tzʼok qeʼ qkʼuʼj tiʼj Jesús, ktzajel qʼoʼn ambʼil qe tuʼn qanqʼin te jumajx ex tuʼn tok qqʼoʼn qwitz kyiʼj toj qja che kjawil anqʼin toj ambʼil tzul (Juan 5:28, 29; Rom. 6:23). Mintiʼ qoklen tuʼn ttzaj qkʼamoʼn qe kʼiwlabʼil lu. Ex mlay bʼant tchjet quʼn tkyaqilju o bʼant tuʼn Dios ex tuʼn Jesús qiʼj (Rom. 5:8, 20, 21). Pero, ¿tzeʼn jaku kubʼ qyekʼin qa in xi qqʼoʼn chjonte kye? Qo xnaqʼtzan tiʼj.

4. ¿Tiʼ bʼant tuʼn María Magdalena tuʼn tkubʼ tyekʼin qa xi tqʼoʼn chjonte tiʼjju otoq bʼant tuʼn Jesús tiʼj? (Qʼonka twitza tiʼj dibujo).

⁴ Qo ximen tiʼjju bʼaj tiʼj jun xuʼj judiy, María Magdalena tbʼi. Ikʼ toj nim kʼixkʼoj tuʼnju attoq wuq demonio toj t-xmilal. Kubʼlo t-ximen qa mlaytoq tzʼex twitz nya bʼaʼn lu. Pero kubʼlo tnaʼn nim tzalajbʼil tej tonin Jesús tiʼj ex xiʼlo tqʼoʼn nim chjonte te. Tuʼntzunju, ok lepeʼ tiʼj ex el tpaʼn ambʼil, tipumal ex qe tiʼchaq te tuʼn tonin tiʼj toj tpakbʼabʼil (Luc. 8:1-3). Nimtoq toklen toj twitz María aju otoq bʼant tuʼn Jesús tuʼn tonin tiʼj, pero mintiʼlo el tnikʼ tiʼj jniʼ toklen oyaj chʼixtoq tbʼant tuʼn Jesús. Chʼixtoq t-xi tqʼoʼn tchwinqlal kyiʼj xjal tuʼntzun kyanqʼin qeju «ma che okslan» tiʼj te jumajx (Juan 3:16). Maske ikju, kubʼ tyekʼin María qa xi tqʼoʼn chjonte te Jesús ex kyaj ten onil tiʼj ex kyiʼj qeju e kyaj ten tukʼil tej otoq jaw qʼoʼn twitz tzeʼ (Juan 19:25). Tej otoq kux maquʼn Jesús, xi tiʼn María ex juntl kabʼe xuʼj qe tiʼchaq at kykʼokʼjal tuʼntzun tok kyqʼoʼn tiʼj t-xmilal (Mar. 16:1, 2). Tuʼnju ten María tzʼaqli twitz Jehová, tzaj kʼiwlaʼn tuʼn ex yolin juntl maj tukʼil Jesús tej otoqxi jaw anqʼin. Ex nya kykyaqil t-xnaqʼtzbʼen Jesús xi qʼoʼn oklenj jlu kye (Juan 20:11-18).

5. ¿Tzeʼn jaku kubʼ qyekʼin qa in xi qqʼoʼn chjonte tiʼj tkyaqilju o bʼant tuʼn Jehová ex Jesús qiʼj?

 ⁵ Ax ikx qe, jaku kubʼ qyekʼin qa in xi qqʼoʼn chjonte tiʼjju o bʼant tuʼn Jehová ex Jesús qiʼj. ¿Tzeʼn jaku kubʼ qyekʼin? Jaku kubʼ qyekʼin aj tajbʼen ambʼil, qipumal ex qe tiʼchaq at qe tuʼn qonin tiʼj aqʼuntl in bʼant tiʼj Tkawbʼil Dios. Jun techel, jaku txi qqʼamaʼn tuʼn qonin toj construcción moqa tuʼn kybʼaj bʼinchet chʼintl ja in che ajbʼen quʼn tuʼn qkʼulin te Jehová.

6. ¿Tiquʼn in xi qqʼamaʼn qa jun oyaj chojbʼil o tzaj qʼoʼn te teyele junjun qe?

⁶ Aj qximen tiʼj qa kʼujlaʼnxix qoʼ tuʼn Jehová ex Jesús, ax ikx qe qaj tuʼn kyok qkʼujlaʼn (1 Juan 4:10, 19). Ex mas in che ok qkʼujlaʼn aj tel qnikʼ tiʼj qa kyim Jesús tiʼj teyele junjun qe. Xi tqʼoʼn apóstol Pablo nim chjonte tiʼj oyaj lu. Tuʼntzunju, tqʼama jlu toj carta xi ttzʼibʼin kye okslal te Galacia: «Tuʼn [...] Tkʼwaʼl Dios in kʼujlanjtze tuʼn, ex xi tqʼon tibʼ tuʼn tkyim tuʼntzun nklete» (Gál. 2:20). Noq tuʼn chojbʼil bʼant tuʼn Jesús, o tzaj tqʼoʼn Jehová ambʼil teya tuʼn toka te tamiw (Juan 6:44). ¿Tiʼ in kubʼ tnaʼna tuʼnju ok tqʼoʼn Jehová twitz tiʼja ex tuʼnju xi tqʼoʼn jun chojbʼil tuʼntzun toka te tamiw? Aj t-ximana tiʼj tzaqʼwebʼil tiʼj xjel lu, taja tuʼn tkubʼ tyekʼina tkʼujlabʼila tiʼj Jehová ex tiʼj Jesús. Tuʼntzunju, qkyaqilx bʼaʼn tuʼn tkubʼ qxjelin jlu: «¿Tiʼ jaku bʼant wuʼne tuʼn tkubʼ nyekʼine qa in xi nqʼoʼne chjonte tiʼj tkʼujlabʼil Jehová ex Jesús?».

7. Ik tzeʼn in tzaj yekʼin toj foto, ¿tiʼ jaku bʼant quʼn tuʼn tkubʼ qyekʼin qkʼujlabʼil tiʼj Jehová ex tiʼj Jesús? (2 Corintios 5:14, 15; 6:1, 2).

⁷ Tuʼnju kʼujlaʼn Jehová ex Jesús quʼn, in nonin qiʼj tuʼn kyok qkʼujlaʼn txqantl (kjawil uʼjit 2 Corintios 5:14, 15; 6:1, 2). Jun tumel tzeʼn in kubʼ qyekʼin  qkʼujlabʼil aju qa ma qo pakbʼan te alkyexku xjal. Tuʼntzunju, in qo pakbʼan kye xjal te junxitl kyyajil, kykostumbr, kyoklen, qa qʼinun ex qa prow qe. Iktzun tten in qo onin tiʼj Jehová tuʼnju taj «tuʼn kyklet kykyaqil xjal ex tuʼn tel kynikʼ tiʼj ju yol axix tok» (1 Tim. 2:4).

8. ¿Tzeʼn jaku kubʼ qyekʼin qa kʼujlaʼn qe erman quʼn?

⁸ Juntl tumel tuʼn tkubʼ qyekʼin qa kʼujlaʼn Jehová ex Jesús quʼn, aju qa ma che ok qkʼujlaʼn qe erman (1 Juan 4:21). Jun techel, in qo ximen kyiʼj ex in qo onin kyiʼj aj kyok weʼ kywitz nya bʼaʼn. In xi qqʼuqbʼaʼn kykʼuʼj aj tkyim jun kyfamiliar, in qoʼx visitaril kye aj ttzaj yabʼil kyiʼj ex in nok tilil quʼn tuʼn qonin kyiʼj aj ttzaj kybʼis (2 Cor. 1:3-7; 1 Tes. 5:11, 14). Ax ikx, in qo naʼn Dios kyiʼj tuʼnju in tzaj tqʼamaʼn Biblia jlu: «Aju tnaʼj Dios ju xjal tzʼaqlxix at nim tipumal ex nim in tbʼinchaʼn» (Sant. 5:16).

9. ¿Alkye juntl tumel jaku kubʼ qyekʼin qa kʼujlaʼn qe erman quʼn?

⁹ Ax ikx, jaku kubʼ qyekʼin qa kʼujlaʼn qe erman quʼn qa ma tzʼok tilil quʼn tuʼn qten bʼaʼn kyukʼil ex qa ma kubʼ qnajsaʼn kyil ik tzeʼn te Jehová. Qa xi tqʼoʼn Jehová ambʼil tuʼn tkyim tkʼwal tuʼn tchjet qil, in tzaj tyekʼin jlu qe qa jun rat naj tuʼn tkubʼ qnajsaʼn kyil erman aj tok kybʼinchaʼn jun nya bʼaʼn qiʼj. Nya qaj tuʼn qok ik tzeʼn majen yolin Jesús tiʼj. Kubʼ najsaʼn nim tkʼas tuʼn tpatrón, atzunte mintiʼ kubʼ tnajsaʼn tkʼas jun tukʼil ex nyatoq nim (Mat. 18:23-35). Qa o tzaj jun nya bʼaʼn kyxole tukʼil jun erman, tbʼanel-lo qa ma txi tbʼinchaʼna tiʼj naʼmxtoq tok Conmemoración (Mat. 5:23, 24). Qa ma bʼant jlu tuʼna, kbʼel tyekʼina qa kʼujlaʼnxix Jehová ex Jesús tuʼna.

10, 11. ¿Tzeʼn jaku kubʼ kyyekʼin ansyan qa kʼujlaʼn Jehová ex Jesús kyuʼn? (1 Pedro 5:1, 2).

¹⁰ In kubʼ kyyekʼin ansyan kykʼujlabʼil tiʼj Jehová ex tiʼj Jesús aj kyxqʼuqin kyiʼj t-ẍneʼl Jesús (kjawil uʼjit 1 Pedro 5:1, 2). Atzun jlu xi tqʼamaʼn Jesús te apóstol Pedro. Tuʼnju tqʼama Pedro oxe maj qa mintiʼtoq ojtzqiʼn Jesús tuʼn, tajtoq tuʼn tok tbʼiʼn qa kukxtoq kʼujlaʼn. Tej tjaw anqʼin Jesús xi tqanin jlu te: «Aya Simón tkyʼajal Jonás, ¿kʼujlaʼnpe qine tuʼna?». Jaku txi qqʼamaʼn qa xiwtlo tbʼinchaʼn Pedro noq alkyexku tiʼ tuʼn tkubʼ tyekʼin tkʼujlabʼil. Atzunte Jesús xi ttzaqʼweʼn jlu te: «Che tkwentin oka qe tal nẍneʼle» (Juan 21:15-17). Atxix toj ambʼil aju, kubʼ tyekʼin Pedro tkʼujlabʼil kyiʼj t-ẍneʼl Jesús ex iktzun tten kubʼ tyekʼin qa kʼujlaʼn tuʼn.

¹¹ ¿Tzeʼn jaku kubʼ kyyekʼin ansyan toj ambʼil te Conmemoración qa in xi kybʼiʼn qe yol xi tqʼamaʼn Jesús te Pedro? Jaku kubʼ kyyekʼin qa kʼujlaʼn Jehová ex Jesús kyuʼn qa ma tzʼok tilil kyuʼn tuʼn kyxqʼuqin kyiʼj erman ex qa ma che onin kyiʼj qeju o che chewix toj kyokslabʼil (Ezeq. 34:11, 12). Ax ikx, jaku che onin kyiʼj qeju in che xnaqʼtzan tiʼj Tyol Dios ex kyiʼj qeju in che pon tnejel maj toj Conmemoración. Tbʼanel qa kukx ma kubʼ kyximen ansyan qa jaku che ok xjal lu te t-xnaqʼtzbʼen Jesús ex tuʼn kyonin kyiʼj tuʼn tkubʼ kynaʼn bʼaʼn.

12. ¿Tiquʼn in nonin qiʼj tuʼn tten qipumal aj qximen tiʼjju tqʼama Jesús toj qonikʼen tej chʼixtoq tkyim? (Juan 16:32, 33).

¹² Toj qonikʼen tej chʼixtoq tkyim Jesús, xi tqʼamaʼn jlu kye t-xnaqʼtzbʼen: «Tzul yajbʼil kyeye twitz txʼotxʼ; ex qeʼ  kykʼuʼje porke ma kubʼ tiʼj tkyaqil mya bʼaʼn at twitz txʼotxʼ wuʼne» (kjawil uʼjit Juan 16:32, 33). ¿Tiʼ onin tiʼj Jesús tuʼn tten tipumal tej tok bʼinchaʼn nya bʼaʼn tiʼj kyuʼn aj qʼoj ex tuʼn tten tzʼaqli tzmaxi tej tkyim? Onin tiʼj tej tok qeʼ tkʼuʼj tiʼj Jehová. Tuʼnju el tnikʼ Jesús tiʼj qa chʼixme aʼyex nya bʼaʼn che okel weʼ t-xnaqʼtzbʼen twitz, xi tqanin te Jehová tuʼn t-xqʼuqin kyiʼj (Juan 17:11). ¿Tiquʼn in nonin jlu qiʼj? Tuʼnju mas nim tipumal Jehová twitz alkyexku aj qʼoj (1 Juan 4:4). Ex in nok tqʼoʼn twitz tiʼj tkyaqilju in bʼaj qiʼj. Qa ma tzʼok qeʼ qkʼuʼj tiʼj Jehová mlayx qo tzaj xobʼ ex ktel qipumal.

13. ¿Tzeʼn kubʼ tyekʼin José te Arimatea qa ya mintiʼ tzaj xobʼ?

¹³ Qo ximen tiʼjju bʼaj tiʼj José te Arimatea, jun xjal ten nim toklen kyxol judiy. Attoq toklen toj tribunal supremo kye judiy, aju Sanedrín tbʼi. Pero mintiʼ ten tipumal tej tpakbʼan Jesús. Tqʼama apóstol Juan qa «mintiʼ xi tmaʼn [José te Arimatea] kye xjal judiy qa t-xnaqʼtzbʼen Jesús te tuʼnju in xobʼ kywitz» (Juan 19:38). Maske tajtoq tuʼn tok tbʼiʼn tbʼanel tqanil tiʼj Tkawbʼil Dios, kubʼ tewin qʼuqbʼil tkʼuʼj tiʼj Jesús. Bʼalo bʼant jlu tuʼn tuʼnju tzaj xobʼ kywitz xjal. Noq tiʼxku bʼaj, in tzaj tqʼamaʼn Tyol Dios jlu tiʼj José te Arimatea: «Okx tukʼil Pilato mintiʼ o xobʼ, xi tqanin t-ximlal Jesús» (Mar. 15:42, 43). Ya mintiʼ kubʼ tewin José qʼuqbʼil tkʼuʼj.

14. ¿Tiʼ jaku bʼant tuʼna qa in tzaj xobʼa kywitz xjal?

¹⁴ ¿In tzajpe xobʼ teya kywitz xjal ik tzeʼn bʼaj tiʼj José te Arimatea? ¿In tzajpe tchʼixwiya tuʼn t-xi tqʼamaʼna toj escuela moqa toj aqʼuntl qa testigo de Jehová teya? ¿Naʼmxpe toka te pakbʼal ex naʼmx tbautisarina tuʼnju in tzaj xobʼa kywitz xjal? Tenx tipuna ex bʼinchankuya aju mas bʼaʼn. Qaninxa onbʼil te Jehová tuʼn ttzaj tqʼoʼn tipumala tuʼn tkubʼ tbʼinchaʼna tajbʼil. Aj tok tqʼoʼn twitza tiʼj qa in tzaj ttzaqʼweʼn Jehová tnaʼj Diosa, kʼonil tiʼja tuʼn tten tipumala ex tuʼn miʼn ttzaj xobʼa (Is. 41:10, 13).

15. ¿Tzeʼn onin kyiʼj t-xnaqʼtzbʼen Jesús tej tjaw anqʼin? (Lucas 24:52, 53).

¹⁵ Tzaj nimxix kybʼis t-xnaqʼtzbʼen Jesús tej tkyim. Ex axlo jlu jaku kubʼ qnaʼn noqwit bʼaj jlu qiʼj. Kʼujlaʼntoq Jesús kyuʼn t-xnaqʼtzbʼen ex kubʼ kyximen qa ya mintiʼtoq qʼuqbʼil kykʼuʼj tej tkyim  (Luc. 24:17-21). Yajxitl, kubʼ tyekʼin tibʼ Jesús kywitz ex xi tchikʼbʼaʼn kye qa japun kywi profecía tiʼj. Ax ikx, xi tqʼamaʼn kye tuʼn tbʼant jun aqʼuntl nim toklen kyuʼn (Luc. 24:26, 27, 45-48). Tej tikʼ 40 qʼij ex tej tjax Jesús toj kyaʼj, ya mintiʼ e bʼisun t-xnaqʼtzbʼen, sino e tzalaj. Nimxix e jaw tzalaj tej tok kybʼiʼn qa otoq jaw anqʼin Jesús ex qa kʼonil kyiʼj tuʼn tjapun kyoklen. Onin jlu kyiʼj tuʼn kukx tjaw kynimsaʼn Jehová (kjawil uʼjit Lucas 24:52, 53; Hech. 5:42).

16. ¿Tzeʼn jaku tzʼel qkanoʼn kyiʼj t-xnaqʼtzbʼen Jesús?

¹⁶ ¿Yajtzun qe, tzeʼn jaku tzʼel qkanoʼn kyiʼj t-xnaqʼtzbʼen Jesús? Jaku bʼant quʼn qa ma qo ajbʼen te Jehová tukʼil tzalajbʼil tkyaqil qʼij ex nya oʼkx toj ambʼil te Conmemoración. Tuʼntzunju, nim toklen tuʼn tkubʼ qqʼoʼn Tkawbʼil Dios tnejel toj qanqʼibʼil. Jun techel, ateʼ junjun o bʼant chʼixpubʼil kyuʼn toj kyaqʼun tuʼntzun kypakbʼan mas ambʼil, tuʼn kyten kyoj chmabʼil ex tuʼn tok kykʼulbʼil kyukʼil toj kyja tkyaqil seman. Atzun junjuntl, o kubʼ kyximen tuʼn miʼn tten nim tiʼchaq kye tuʼntzun kyonin mas toj congregación moqa tuʼn kyxiʼ pakbʼal jatumel kyaj erman onbʼil. Ojtzqiʼn quʼn qa il tiʼj tuʼn tok tilil quʼn tuʼn kukx qajbʼen te Jehová. Pero in tzaj ttziyen qa qo ktzajel tkʼiwlaʼn qa ma kubʼ qqʼoʼn Tkawbʼil tnejel toj qanqʼibʼil (Prov. 10:22; Mat. 6:32, 33).

17. ¿Tiʼ bʼaʼn tuʼn tbʼant quʼn toj ambʼil te Conmemoración? (Qʼonka twitza tiʼj foto).

¹⁷ Ya qaj tuʼn tpon qʼij martes 4 te abril tuʼntzun qten toj Conmemoración. Pero mintiʼ tuʼn qayon tzmaxi aj tpon qʼij lu tuʼn qximen tiʼj tanqʼibʼil Jesús, tiʼj ambʼil tej tkyim, tiʼj tkʼujlabʼil ex tiʼj tkʼujlabʼil Jehová o kubʼ tyekʼin qiʼj. Sino jaku qo ximen tiʼj jlu toj alkyexku qʼij toj ambʼil te Conmemoración. Jun techel, jaku tzʼel qpaʼn ambʼil tuʼn tkubʼ qxnaqʼtzaʼn aju bʼaj toj tanqʼibʼil Jesús ex jaku tzʼok qqʼoʼn qwitz tiʼj xnaqʼtzbʼil 16 toj folleto Jun onbʼil tuʼn qxnaqʼtzan tiʼj Tyol Dios aju tok tbʼi: «Aju mankbʼil seman tanqʼibʼil Jesús twitz Txʼotxʼ». Ax ikx, jaku txi qjyoʼn junjun txʼolbʼabʼil jaku che onin qiʼj tuʼn tchʼiy qkʼujlabʼil, tuʼn tten qipumal, tuʼn t-xi qqʼoʼn chjonte ex tuʼn qtzalaj. Ex qo ximen tiʼj tzeʼn jaku kubʼ qyekʼin qa ax tok in xi qqʼoʼn chjonte tuʼn tkyaqil qanmi. Jaku tzʼok qeʼ qkʼuʼj tiʼj qa in nok tqʼoʼn Jesús toklen tkyaqilju in bʼant quʼn tuʼn ttzaj qnaʼn toj ambʼil te Conmemoración (Apoc. 2:19).