1, 2. ¿Tiquʼn in qoʼx tkyaqil abʼqʼi toj Conmemoración?

 MA TZIKʼ chʼixmi 2,000 abʼqʼi t-xilen tqʼoʼn Jesús tchwinqlal tuʼn qklet ex tuʼn jlu o tzaj qʼoʼn ambʼil qe tuʼn qanqʼin te jumajx. Toj qonikʼen tej naʼmxtoq tkyim, kubʼ tikʼsaʼn jun wabʼj jatumel ajbʼen pan ex vino tuʼn. Ex xi tqʼamaʼn kye t-xnaqʼtzbʼen tuʼn kukx tkubʼ kyikʼsaʼn tuʼntzun ttzaj kynaʼn tkʼujlabʼil (1 Cor. 11:23-26).

² In xi kynimen okslal kawbʼil tqʼama Jesús tuʼnju kʼujlaʼnxix kyuʼn (Juan 14:15). Tkyaqil abʼqʼi aj qxiʼ toj Conmemoración, in kubʼ qyekʼin qa in nok qqʼoʼn toklen chojbʼil bʼant tuʼn Jesús. Jun techel, in nel qpaʼn ambʼil tuʼn qnaʼn Dios ex tuʼn qximen tiʼjju t-xilen tkyimlen. Ax ikx, in nel qpaʼn mas ambʼil tuʼn qpakbʼan ex tuʼn t-xi qqʼoʼn txokbʼil kyiʼj nim xjal tuʼntzun kyten qukʼil toj nabʼitz lu. Ex nya qaj tuʼn t-xi qqʼoʼn ambʼil te nijun tiʼ tuʼntzun miʼn qten.

3. ¿Tiʼ kʼelel qnikʼ tiʼj toj xnaqʼtzbʼil lu?

³ O tzʼok tilil kyuʼn tmajen Jehová tuʼn ttzaj kynaʼn tkyimlen Jesucristo. Toj xnaqʼtzbʼil lu, kʼelel qnikʼ tiʼj oxe tiʼ in tzaj tyekʼin qa in nok tilil quʼn. Tnejel, in kubʼ qikʼsaʼn Conmemoración ik tzeʼnx tqʼama Jesús. Tkabʼin, in xi qqʼoʼn txokbʼil kyiʼj xjal tuʼn kyten qukʼil. Ex toxin, in kubʼ qikʼsaʼn maske in qo ok weʼ kywitz nya bʼaʼn.

4. a) ¿Alkye junjun xnaqʼtzbʼil in che tzaj chikʼbʼaʼn tkyaqil abʼqʼi toj Conmemoración? (Lucas 22:19, 20). b) ¿Tiquʼn nim toklen tuʼn tel qnikʼ kyiʼj xnaqʼtzbʼil lu?

⁴ Tkyaqil abʼqʼi aj qxiʼ toj Conmemoración, in netz qʼoʼn jun chikʼbʼabʼil in jatz toj Tyol Dios jatumel in tzaj qʼoʼn tzaqʼwebʼil kyiʼj junjun xjel. Jun techel, in tzaj tzaqʼweʼn tiquʼn tzaj qʼoʼn chojbʼil ex tzeʼn in nonin tuʼn tkubʼ najset kyil nim xjal. Ax ikx, in tzaj naʼn qe alkyeqe in che waʼn tiʼj pan ex in che kʼan tiʼj vino ex tiʼ kyxilen qe jlu (kjawil uʼjit Lucas 22:19, 20). Akux in netz qʼoʼn chikʼbʼabʼil, in qo ximen kyiʼj kʼiwlabʼil che ul qʼoʼn kye qeju che anqʼil tzalu twitz Txʼotxʼ (Is. 35:5, 6; 65:17, 21-23). Nimxix toklen tuʼn tel qnikʼ kyiʼj xnaqʼtzbʼil lu. Ateʼ nim millón xjal mintiʼ in nel kynikʼ kyiʼj xnaqʼtzbʼil lu ex mintiʼ in nok kyqʼoʼn toklen chojbʼil bʼant tuʼn Jesús. Ax ikx, mintiʼ in kubʼ kyikʼsaʼn tkyimlen Jesús ik tzeʼnx kyaj tqʼamaʼn. ¿Tiquʼn in bʼant jlu kyuʼn?

5. ¿Tiʼ bʼant kyuʼn xjal tuʼn ttzaj kynaʼn tkyimlen Jesús tej otoq che kyim chʼixmi kykyaqil apóstol?

⁵ Tej tikʼ chʼin ambʼil kykyimlen chʼixmi kykyaqil apóstol, e okx nya ax tok okslal toj congregación (Mat. 13:24-27, 37-39). Xi kyqʼamaʼn «xnaqʼtzbʼil mya ax tok, noq tuʼn kyok lpeʼ okslal kyiʼj» (Hech. 20:29, 30). Jun kyxol qe «xnaqʼtzbʼil mya ax tok» xi kyxnaqʼtzaʼn aju qa mya «noq junx maj tuʼn tkyim [Jesús] tuʼn tchjet kyil nimku xjal». Mintiʼ xi kyxnaqʼtzaʼn aju in tzaj tqʼamaʼn Biblia tuʼnju kyqʼama qa iltoq tiʼj tuʼn t-xi tqʼoʼn Jesús chojbʼil nimku maj (Heb. 9:27, 28). Toj ambʼil jaʼlo, ateʼ nim xjal at jun tbʼanel kyanmi in nok qeʼ kykʼuʼj tiʼj nya ax tok xnaqʼtzbʼil lu. In cheʼx toj iglesia tkyaqil seman moqa tkyaqil qʼij tuʼn tkubʼ kyikʼsaʼn Santa Cena. b Atzun junjuntl okslabʼil, mintiʼ in tzaj kynaʼn tkyimlen Jesús tkyaqil maj ex mintiʼ in nel kynikʼ tiʼj tiʼ t-xilen chojbʼil bʼant tuʼn. Bʼalo ateʼ junjun in kubʼ kyxjelin jlu: «¿Axpe tok in kubʼ najsaʼn wile noq tuʼnju chojbʼil bʼant tuʼn Jesús?». In kubʼ kyxjelin jlu tuʼnju o txi xnaqʼtzaʼn kye qa aju chojbʼil bʼant tuʼn Jesús mintiʼ in kubʼ tnajsaʼn qil. Yajtzun qeju axix tok t-xnaqʼtzbʼen Jesús, ¿tiʼ o bʼant kyuʼn?

6. ¿Tiʼ el tnikʼ jun grupo xjal tiʼj toj Tyol Dios toj 1872?

⁶ Tej chʼixtoq kykubʼaj abʼqʼi 1800, xi tzyet tuʼn t-xnaqʼtzan jun grupo xjal tiʼj Tyol Dios tukʼil tonbʼil Charles Russell. Kyajtoq tuʼn tel kynikʼ tiʼj jniʼ toklen chojbʼil bʼant tuʼn Jesús ex alkye tten tuʼn ttzaj kynaʼn. Toj 1872, el kynikʼ tiʼj tuʼn tonbʼil Tyol Dios qa xi tqʼoʼn Jesús jun chojbʼil kyiʼj kykyaqil xjal. Ex mintiʼ kubʼ kyewin aju otoq tzʼel kynikʼ tiʼj. Aju bʼant kyuʼn, etz kyqʼoʼn kyoj libro, kyoj periódico ex kyoj revista. Tej tikʼ chʼin ambʼil, xi tzyet tuʼn tkubʼ kyikʼsaʼn tkyimlen Jesús jun maj toj abʼqʼi ik tzeʼn bʼant kyuʼn okslal toj tnejel syent abʼqʼi.

7. ¿Tzeʼn in nonin qiʼj toj ambʼil jaʼlo aju el kynikʼ okslal tiʼj toj ambʼil ojtxe?

⁷ ¿Tzeʼn in nonin qiʼj toj ambʼil jaʼlo tkyaqilju el kynikʼ okslal tiʼj toj ambʼil aju? Tzaj tkʼiwlaʼn Jehová tkyaqilju bʼant kyuʼn ex tuʼn jlu in nel qnikʼ tiʼj tiʼ t-xilen chojbʼil bʼant tuʼn Jesús ex tiʼ kbʼantel tuʼn (1 Juan 2:1, 2). Ax ikx, o tzʼel qnikʼ tiʼj toj Biblia qa at kabʼe qʼuqbʼil kykʼuʼj xjal bʼaʼn  che nimen te Dios. At jun kʼloj xjal che xeʼl toj kyaʼj ex mlay che kyim, atzun juntl kʼloj che anqʼil tzalu twitz Txʼotxʼ te jumajx. Aj qximen tiʼj qa kʼujlaʼn qoʼ tuʼn Jehová ex qa in tzaj tiʼn tbʼanel qe aju chojbʼil bʼant tuʼn Jesús, mas in qo ok laqʼeʼ ttxlaj (1 Ped. 3:18; 1 Juan 4:9). Tuʼntzunju, in xi qqʼoʼn txokbʼil kyiʼj xjal tuʼn kyten toj Conmemoración ik tzeʼn kye okslal toj ambʼil ojtxe ex in kubʼ qikʼsaʼn ik tzeʼn kyaj tqʼamaʼn Jesús.

8. ¿Tiʼ o bʼant kyuʼn tmajen Jehová tuʼn t-xi kyqʼoʼn txokbʼil kye xjal tuʼn kyten toj Conmemoración? (Qʼonka twitza kyiʼj foto).

⁸ Ma tzikʼ nim abʼqʼi in xi kyqʼoʼn tmajen Jehová txokbʼil kyiʼj xjal tuʼn kyten toj Conmemoración. Ex toj 1881, toj revista lu tzaj qʼamaʼn tuʼn tok kychmon kyibʼ erman te Estados Unidos toj jun ja atz Allegheny toj tnam Pensilvania tuʼn tkubʼ kyikʼsaʼn tkyimlen Jesús. Yajxitl, teyele junjun congregación ok kychmon kyibʼ. Pero tzmaxi toj marzo te 1940, xi qʼamaʼn kye pakbʼal tuʼn t-xi kyqʼoʼn txokbʼil tiʼj alkyexku xjal taj tuʼn tten toj nabʼitz lu. Ex toj 1960, xi tsamaʼn Betel kyoj congregación qe txokbʼil otoq che etz imprimirit. Atxix toj ambʼil aju, o txi kysipen testigo de Jehová nim millón txokbʼil. ¿Tiquʼn in nel qpaʼn ambʼil ex qipumal tuʼn tbʼant aqʼuntl lu?

9, 10. ¿Alkyeqe xjal in nonin kyiʼj aj t-xi qqʼoʼn txokbʼil tiʼj Conmemoración? (Juan 3:16).

⁹ Tuʼnju qaj tuʼn tel kynikʼ xjal tiʼjju o bʼant tuʼn Jehová ex Jesús qiʼj, in xi qqʼoʼn txokbʼil kyiʼj tuʼn kyten qukʼil toj Conmemoración  (kjawil uʼjit Juan 3:16). Aj kypon xjal lu tnejel maj toj nabʼitz lu, qaj tuʼn tonin kyiʼj aju kʼokel kykeʼyin ex aju kʼokel kybʼiʼn tuʼn tok kyojtzqiʼn Jehová ex tuʼn kyok te tmajen. Pero nya oʼkx kyiʼj xjal lu in nonin txokbʼil in xi qqʼoʼn.

¹⁰ Ax ikx in nonin txokbʼil in xi qqʼoʼn kyiʼj qeju o che chewix toj kyokslabʼil. In xi qqʼoʼn txokbʼil kyiʼj tuʼn kypon toj Conmemoración tuʼn ttzaj kynaʼn qa kukx kʼujlaʼn qe tuʼn Jehová. Ex in kubʼ qnaʼn nim tzalajbʼil aj kypon toj nabʼitz lu. Toj qonikʼen aju in tzaj kynaʼn qa e tzalaj tej kyajbʼen te Jehová. Qo yolin tiʼjju bʼaj tiʼj Mónica. c Tej ttzaj COVID-19, xi tzyet tuʼn tpakbʼan juntl maj. Tej otoq ten toj Conmemoración te 2021, tqʼama jlu: «Tbʼanel ma tzʼok nabʼitz lu te weye. Ma tzikʼ 20 abʼqʼi ex atzun tnejel maj in chin pakbʼane juntl maj kye xjal tuʼn t-xi nqʼoʼne txokbʼil kye tuʼn kyten toj Conmemoración. Ma bʼant jlu wuʼne tuʼn tkyaqil wanmiye tuʼnju waje tuʼn t-xi nqʼoʼne chjonte te Jehová ex te Jesús tiʼj tkyaqilju o bʼant kyuʼn wiʼje» (Sal. 103:1-4). Qa ma txi kykʼamoʼn xjal txokbʼil moqa mintiʼ, in nok tilil quʼn tuʼn t-xi qqʼoʼn txokbʼil kyiʼj tuʼnju ojtzqiʼn quʼn qa in nok tqʼoʼn Jehová toklen tkyaqilju in bʼant quʼn.

11. ¿Tzeʼn o tzaj tkʼiwlaʼn Jehová tkyaqilju o bʼant quʼn tuʼn t-xi qqʼoʼn txokbʼil kyiʼj xjal? (Ageo 2:7).

¹¹ O tzaj tkʼiwlaʼn Jehová tkyaqilju o bʼant quʼn tuʼn t-xi qqʼoʼn txokbʼil kyiʼj xjal tuʼn kyten toj Conmemoración. Jun techel, maske mintiʼ ok qchmon qibʼ tuʼn tpaj COVID-19 toj 2021, e ten 21,367,603 xjal toj Conmemoración. Mas nim tajlal jlu ik tzeʼn kybʼet testigo de Jehová at twitz tkyaqil Txʼotxʼ. Pero mas nim kyoklen xjal toj twitz Jehová twitzju kyajlal (Luc. 15:7; 1 Tim. 2:3, 4). Qʼuqli qkʼuʼj tiʼj qa in najbʼen campaña tiʼj Conmemoración tuʼn Jehová tuʼn tonin qiʼj tuʼn kykanet xjal at jun tbʼanel kyanmi (kjawil uʼjit Ageo 2:7).

12. ¿Alkye junjun nya bʼaʼn jaku tzʼel qʼinte ambʼil qe tuʼn miʼn qten toj Conmemoración? (Qʼonka twitza tiʼj foto).

¹² Kyaj tqʼamaʼn Jesús qa kyoj mankbʼil tqʼijlalil qo okel weʼ kywitz nya bʼaʼn ik tzeʼn aj qel ikʼun kyuʼn toj qja, aj tel qʼiʼn ambʼil qe tuʼn qajbʼen te Jehová, tuʼn tpaj qʼoj, yabʼil ex junjuntl tiʼchaq (Mat. 10:36; Mar. 13:9; Luc. 21:10, 11). Ex jaku tzʼel tiʼn jun kyxol nya bʼaʼn lu ambʼil qe tuʼn qten toj Conmemoración. ¿Tiʼ o bʼant kyuʼn erman kyoj ambʼil lu ex tzeʼn o tzʼonin Jehová kyiʼj?

13. ¿Tzeʼn tzaj kʼiwlaʼn Artiom tuʼnju ten tipumal tuʼn tkubʼ tikʼsaʼn Conmemoración toj cárcel?

¹³ Aju cárcel. Aʼyeju erman ateʼ toj cárcel in nok tilil kyuʼn tuʼn ttzaj kynaʼn Conmemoración. Qo yolin tiʼjju bʼaj tiʼj Artiom. Tej tpon ambʼil te Conmemoración te abʼqʼi 2020, okx jupuʼn toj jun kwart te 17 metro cuadrado jatumel in che okx qʼoʼn jweʼ pres junx. Maske ikju, tzaj tjyoʼn junjun tiʼchaq tuʼn tkubʼ kyechlaʼn pan ex vino toj Conmemoración. Ex bʼaj tbʼinchaʼn tten tuʼn tex tqʼoʼn chikʼbʼabʼil tuʼntzun tonin tiʼj. Pero ok weʼ twitz jun nya bʼaʼn, aʼyeju tukʼil tokx toj kwart in che sichʼin ex in che yolin kyiʼj nya bʼaʼn yol. ¿Tiʼ bʼant tuʼn Artiom? Xi tqanin kye qa jakutoq kyaj kytzaqpiʼn sichʼ jun or ex tuʼn miʼn kyyolin kyiʼj nya bʼaʼn yol. Jaw labʼin tej ttzaj kyqʼamaʼn qa jaku. Tqʼama jlu: «Xi nqʼamaʼne kye qa jakutoq txi  nchikʼbʼaʼne tiʼ in bʼaj toj nabʼitz lu». Maske xi kyqʼamaʼn te erman qa nyatoq kyaj tuʼn tel kynikʼ tiʼj, xi kyqanin mas tqanil te tej tok kykeʼyin aju otoq kubʼ tikʼsaʼn.

14. ¿Tiʼ bʼant tuʼn ttnam Jehová tuʼn tkubʼ ikʼset Conmemoración maske otoq tzaj COVID-19?

¹⁴ Aju pandemia te COVID-19. Tuʼnju tzaj pandemia, mintiʼ ok kychmon kyibʼ tmajen Jehová tuʼn tkubʼ kyikʼsaʼn Conmemoración. Pero nya a t-xilen jlu qa mintiʼ kubʼ kyikʼsaʼn. d Aqeju erman at ky-internet, ok kyqʼoʼn kywitz tiʼj ikʼsabʼil lu toj videoconferencia. Yajtzun qeju mintiʼ ky-internet, ¿tiʼ bʼant kyuʼn? Kyoj junjun tnam, ok kykeʼyin chikʼbʼabʼil toj televisión moqa ok kybʼiʼn toj radio. Ax ikx, kubʼ kygrabarin sucursal Conmemoración toj mas te 500 yol tuʼntzun tok kykeʼyin kykyaqil erman, axpe ikx qeju in che anqʼin najchaq. Ex ateʼ junjun erman xi kyiʼn qe grabación lu kye.

15. ¿Tiʼ xnaqʼtzbʼil jaku tzʼel qiʼn tiʼj Sue?

¹⁵ Aj qel ikʼun kyuʼn toj qja. Kwest o tzʼela toj kywitz junjun tuʼn tkubʼ kyikʼsaʼn  Conmemoración tuʼnju in che el ikʼun kyuʼn toj kyja. Atzun jlu bʼaj tiʼj jun xuʼj in xnaqʼtzan tiʼj Tyol Dios aju Sue tbʼi. Tej naʼmxtoq tok Conmemoración toj 2021, xi tqʼamaʼn Sue te ermana xi tqʼoʼn xnaqʼtzbʼil te qa mlayxtoq kubʼ tikʼsaʼn Conmemoración tuʼnju nyatoq kygan toj tja. Xi tuʼjin ermana Lucas 22:44 te Sue ex xi tqʼamaʼn te qa tbʼanel tuʼn tel qkanoʼn techel kyaj tqʼoʼn Jesús aj qok weʼ twitz ikʼbʼil. Ax ikx, xi tqʼamaʼn te qa tbʼanel tuʼn tok qeʼ qkʼuʼj tiʼj qa ktzajel ttzaqʼweʼn Jehová qnaʼj Dios ex qa kʼonil qiʼj. Toj juntl qʼij, kubʼ tbʼinchaʼn Sue pan ex vino, ex ok tqʼoʼn twitz tiʼj video tiʼj texto te qlax toj jw.org. Te qale, okx tjupun tibʼ toj tkwart ex ok tbʼiʼn Conmemoración toj tcelular. Yajxitl, xi ttzʼibʼin jlu te ermana in qʼon xnaqʼtzbʼil te: «Tzaj tqʼuqbʼaʼna nkʼuʼje ew. Ma tzʼok tilil wuʼne tuʼn ntene toj Conmemoración ex ma tzʼonin Jehová wiʼje. In chin tzalaje ex in xi nqʼoʼne nim chjonte teya». Qa ax jlu in bʼaj tiʼja, ¿in nokpe qeʼ tkʼuʼja tiʼj qa jaku tzʼonin Jehová tiʼja?

16. ¿Tiquʼn jaku tzʼok qeʼ qkʼuʼj tiʼj qa ktzajel tkʼiwlaʼn Jehová tkyaqilju kbʼantel quʼn tuʼn qten toj Conmemoración? (Romanos 8:31, 32).

¹⁶ In nok tqʼoʼn Jehová toklen tkyaqilju in bʼant quʼn tuʼn ttzaj qnaʼn tkyimlen Tkʼwal. Jaku tzʼok qeʼ qkʼuʼj tiʼj qa ok qo tzajel tkʼiwlaʼn Jehová qa ma txi qqʼoʼn chjonte te tiʼj tkyaqilju o bʼant tuʼn qiʼj (kjawil uʼjit Romanos 8:31, 32). Tuʼntzunju, mlay txi qqʼoʼn ambʼil te jun tiʼ tuʼn miʼn qten toj Conmemoración toj abʼqʼi lu. Ex qqʼonk tilil tuʼn tbʼant mas quʼn toj qajbʼebʼil te Jehová toj ambʼil lu.