AJU yol griego in najbʼen toj Biblia tiʼj «carwaj», atz in yolin tiʼj junxichaq clase kar (Hech. 8:​28, 29, 38). Tuʼntzunju, aju kar ajbʼen tuʼn xjal te Etiopía, nya jun kar in najbʼen kyuʼn soldad moqa toj jun carrera. Sino mas matij kar lu. Qo yolin tiʼj junjun tiquʼn in xi qqʼamaʼn jlu.

Nimtoq toklen xjal te Etiopía ex nim otoq txi tbʼetin. «Nim toklen ju xjal lu, ex onil te jun xuʼj rey Candase tbʼi, aju kyrey aj Etiopía. Tuj tkwent taʼ aju tqʼinumabʼl xuʼj rey» (Hech. 8:27). Toj ambʼil ojtxe, tzyuʼn txʼotxʼ te Sudán tuʼn Etiopía ex aju taʼ kubʼni te tnam Egipto toj ambʼil jaʼlo. Bʼalo nya oʼkx viajarin xjal te Etiopía toj junx kar, axlo ikx qʼiʼn nim tiʼchaq tuʼn. Toj tnejel syent abʼqʼi, in che ajbʼentoq nim clase kar tuʼn kyxi qʼiʼn xjal toj. Jun kyxol qe jlu, at jun karwaj at kyaje trued ex maqsiʼn tiʼj. Tzaj qʼamaʼn jlu toj jun libro in yolin tiʼj Biblia: «Jakutoq txi qʼiʼn mas iqtz kyoj karwaj lu, mas tbʼanel jaku qo viajarin toj ex bʼalo jaku qox tiʼn mas najchaq» (Acts—An Exegetical Commentary).

In uʼjintoq xjal te Etiopía tej tpon laqʼeʼ Felipe ttxlaj. In tzaj tqʼamaʼn Biblia qa «xitzun qelan Felipe ttxlaj, ex o tbʼi in schʼintoq tuj Tuʼjil Isaías aju t-sanjel Dios» (Hech. 8:30). Nyatoq bʼinchaʼn qe karwaj lu tuʼn kybʼet jun rat naj. Tuʼnju chebʼe bʼet kar lu, bʼant tuʼn tuʼjin xjal te Etiopía ex iktzun tten pon kanin Felipe ttxlaj.

«O kubʼsan xjal [te Etiopía] tuʼn tjax Felipe tukʼil ex tuʼn tkubʼ qeʼ ttxlaj» (Hech. 8:31). Toj jun kar te carrera, nya qʼuqlitoq xjal in manejarin tiʼj. Atzun toj jun karwaj in xi tiʼn qe xjal, mas at espacio toj. Tuʼntzunju, bʼant tuʼn t-xi qeʼ xjal te Etiopía ex Felipe.

Tuʼn tqanil in tzaj qʼoʼn toj Hechos capítulo 8 ex qe yekʼbʼil ateʼ, ya mintiʼ in kubʼ qdibujarine tkar xjal te Etiopía ik tzeʼn qe karwaj te qʼoj moqa te carrera, sino mas matij kar lu.