1. ¿Tzeʼn keʼyin Jehová toj twitza?

 ¿OPE ximana jun maj tiʼj tzeʼn keʼyin Jehová? Aj tnaʼna Dios te, ¿tiʼ in nul toj t-ximbʼetza? Ax tok, mintiʼ qʼanchaʼl Jehová, pero in tzaj tqʼamaʼn Biblia junjun tqanil tiʼj. Jun techel, in tzaj tqʼamaʼn qa in nok te «spikʼun ex klol qe» ex in nok «ik tzaʼn jun qʼaqʼ in bʼaj tzʼeʼy tkyaqil tuʼn» (Sal. 84:11; Heb. 12:29). Ax ikx, tqʼama profeta Ezequiel toj jun witzikʼ qa chʼixmi ik keʼyin Jehová ik tzeʼn jun abʼj zafiro, ik tzeʼn jun kʼuxbʼil in qoptzʼaj ex ik tzeʼn jun arcoíris (Ezeq. 1:​26-28). Aj qximen tiʼj jlu, jaku qo jaw labʼin tiʼj moqa jaku qo tzaj xobʼ.

2. ¿Tiquʼn kwest in nela toj kywitz junjun xjal tuʼn kyok laqʼeʼ ttxlaj Jehová?

² Tuʼnju nya qʼanchaʼl Jehová, bʼalo kwest jaku txi qnimen qa qkʼujlaʼn qoʼ tuʼn. Jaku kubʼ qximen qa mlayx qo ok tkʼujlaʼn tuʼnju o tzaj nim nya bʼaʼn toj qanqʼibʼil. Bʼalo mintiʼ o qo ok kʼujlaʼn tuʼn qman. Pero in nel tnikʼ Jehová tiʼjju in kubʼ qnaʼn ex tiquʼn kwest in nela toj qwitz tuʼn qxi laqʼeʼ ttxlaj. Tuʼn tel qnikʼ tiʼj qa kʼujlaʼn qoʼ tuʼn, o kyaj tqʼamaʼn toj Tyol qa at tbʼanel tmod.

3. ¿Tiquʼn qo yolil tiʼj Jehová ex tiʼj tkʼujlabʼil?

³ Aju mod in tzaj tyekʼin tzeʼnxix Jehová, aju kʼujlabʼil (1 Juan 4:8). In kubʼ tyekʼin mod lu ex in xi tbʼinchaʼn tkyaqil tukʼil kʼujlabʼil. At nim tkʼujlalil ex kyuw, axpe ikx in xi tyekʼin kye qeju nya kʼujlaʼn kyuʼn (Mat. 5:​44, 45). Toj xnaqʼtzbʼil lu, qo yolil tiʼj Jehová ex tiʼj tkʼujlabʼil. Qa mas ma tzʼok qojtzqiʼn, mas kʼokel qkʼujlaʼn.

NIM KʼUJLAʼN QOʼ TUʼN JEHOVÁ

4. ¿Tiʼ in kubʼ tnaʼna aj tel tnikʼa tiʼj qa at qʼaqʼbʼil tkʼuʼj Jehová? (Ax ikx qʼonka twitza tiʼj foto).

⁴ «Ate Qman [Jehová] nim in qʼaqʼan tkʼuʼj» (Sant. 5:11).  In nok mojbʼaʼn Jehová toj Biblia ik tzeʼn jun txubʼaj at nim tkʼujlabʼil (Is. 66:​12, 13). Ximana tiʼj jun txubʼaj in nok t-xqʼuqin tal tukʼil kʼujlabʼil. Chebʼe in kubʼ tqʼoʼn tibʼaj tqan ex chebʼe in xi yolin te. Aj tjaw oqʼ tal moqa aj tkʼixbʼi, jun rat in xi tqʼoʼn aju at tajbʼen te. Chʼixmi ax jlu kbʼantel tuʼn Jehová qukʼil aj ttzaj qbʼis. Tuʼntzunju kubʼ ttzʼibʼin salmista jlu: «Ok in tzaj nximbʼetze ex in bʼaj nkʼuʼje, in tzaj tqʼuqbʼaʼna nkʼuʼje ex in tzaj tqʼoʼna tzalajbʼil» (Sal. 94:19).

5. ¿Tiʼ t-xilen toj twitza aj ttzaj qʼamaʼn qa at tkʼujlabʼil Jehová?

⁵ Tzʼaqli Jehová (Sal. 103:8). Kukx in qo ok tkʼujlaʼn maske in qo el txalpaj. Nim maj tzaj tbʼis Jehová kyuʼn israelita, pero kubʼ tyekʼin qa kukx kʼujlaʼn qe tuʼn tej tajtz tiʼj kyanmi. Toj jun maj tqʼama jlu kye: «Nimxix nkʼuʼje kyiʼje, maʼ kyoklene tuj nwitze ex kʼujlaʼn qeye wuʼne» (Is. 43:​4, 5). Mintiʼ in chʼexpaj Jehová ex jaku tzʼok qeʼ qkʼuʼj tiʼj qa ax ikx in kubʼ tyekʼin kʼujlabʼil lu qiʼj. Qa ma kubʼ qbʼinchaʼn jun matij il, mintiʼ in qo kyaj tkolin. Qa ma tzʼajtz tiʼj qanmi ex ma qo meltzʼaj tukʼil, kukx qo okel tkʼujlaʼn. O kyaj tqʼamaʼn qa «at nim xtalbʼil tukʼil tuʼn tkubʼ tnajsaʼn kyil xjal» (Is. 55:7). Ax ikx, in tzaj tqʼamaʼn Biblia qa in nul «tqʼijlalil chewsabʼl» qukʼil aj tkubʼ tnajsaʼn Jehová qil (Hech. 3:19).

6. ¿Tiʼ in tzaj tyekʼin Zacarías 2:8 qe tiʼj Jehová?

⁶ (Kjawil uʼjit Zacarías 2:8). In qo ok tmojbʼaʼn Jehová ik tzeʼn qe tbʼaqʼ twitz. Nim kyoklen tbʼaqʼ qwitz ex jun rat jaku che kʼixbʼi. Jaku txi qqʼamaʼn qa taj Jehová tuʼn ttzaj tqʼamaʼn jlu qe: «Aj tok bʼinchaʼn jun nya bʼaʼn kyiʼje, atz in nok kybʼinchaʼn tiʼj jun tiʼ nim toklen toj nwitze». Tuʼnju kʼujlaʼn qoʼ tuʼn Jehová, in nel tnikʼ tiʼjju in kubʼ qnaʼn ex taj tuʼn t-xqʼuqin qiʼj. Aj ttzaj qbʼis ax ikx te in tzaj tbʼis. Tuʼntzunju, aj qnaʼn Dios te jaku txi qqʼamaʼn jlu: «Chin tkwentin oka ik tzaʼn t-santil qe tbʼaqʼ twitza» (Sal. 17:8).

7. ¿Tiquʼn jaku tzʼok qeʼ tkʼuʼja tiʼj qa kʼujlaʼna tuʼn Jehová?

⁷ Taj Jehová tuʼn tok qeʼ tkʼuʼja tiʼj qa kʼujlaʼna tuʼn. In nel tnikʼ tiʼj qa tuʼnju o tzikʼa kyoj nya bʼaʼn moqa tuʼnju in nok weʼya kywitz problem toj ambʼil jaʼlo,  jaku jawje tkʼuʼja tiʼj qa ax tok kʼujlaʼna tuʼn. Tuʼntzunju, bʼaʼn tuʼn tok qeʼ tkʼuʼja tiʼj qa ax tok kʼujlaʼna tuʼn Jehová. ¿Tiʼ jaku tzʼonin tiʼja tuʼn tok qeʼ tkʼuʼja tiʼj? Jaku tzʼonin tiʼja qa ma xnaqʼtzana tiʼj tzeʼn in kubʼ tyekʼin Jehová qa kʼujlaʼn Jesús tuʼn, qe skʼoʼn maj ex kykyaqil qe tmajen. Atzun jlu qo yolil tiʼj.

IN TZAJ TQʼAMAʼN JEHOVÁ QA KʼUJLAʼN QOʼ TUʼN

8. ¿Tiquʼn ok qeʼ tkʼuʼj Jesús tiʼj qa ax tok kʼujlaʼn tuʼn Tman?

⁸ Jaku txi qqʼamaʼn qa oʼkx Jehová ex Jesús o che ten mas ambʼil junx. Tuʼnju o ten Jehová nim mil abʼqʼi tukʼil Tkʼwal, at nim mujbʼabʼil kyxol ex kʼujlabʼil. Toj Mateo 17:5 tqʼama Jehová qa kʼujlaʼnxix Jesús tuʼn. Nya oʼkx tqʼama: «In chin tzalaje tiʼj», sino tajtoq tuʼn tel qnikʼ tiʼj jniʼ kʼujlaʼn Jesús tuʼn. Tuʼntzunju tqʼama: «Atzun Nkʼwaʼle jlu kʼujlaʼnxix wuʼne». In tzalaj Jehová tiʼj Tkʼwal ex tiʼjju kbʼantel tuʼn (Efes. 1:7). Ok qeʼ tkʼuʼj Jesús tiʼj qa ax tok aju kubʼ tnaʼn Jehová tiʼj ex tqʼama jun ex juntl maj qa kʼujlaʼn tuʼn (Juan 3:35; 10:17; 17:24).

9. ¿Tiquʼn jaku tzʼok qeʼ kykʼuʼj skʼoʼn maj tiʼj qa kʼujlaʼn qe tuʼn Jehová?

⁹ Ax ikx in tzaj tqʼamaʼn Jehová qa kʼujlaʼn qe okslal skʼoʼn maj tuʼn (kjawil uʼjit Romanos 5:5). Tej tkubʼ tzʼibʼin versículo lu, atz yolin tiʼj qa at nim tkʼujlabʼil Jehová kyiʼj skʼoʼn maj ex jaku tzʼok qmojbʼaʼn ik tzeʼn nimxix aʼ. Ojtzqiʼn kyuʼn skʼoʼn maj qa «kʼujlaʼn» qe tuʼn Jehová (Jud. 1). Kykyaqilx in kubʼ kynaʼn jlu ik tzeʼn tqʼama apóstol Juan: «Che ximane tiʼj, maʼxix tkʼujlalil Qman Dios qiʼj, porke ma tzʼok qbʼi tkʼwaʼl Dios» (1 Juan 3:1). ¿Oʼkxpe qe skʼoʼn maj kʼujlaʼn tuʼn Jehová? Miʼn. Ik tzeʼn kʼelel qnikʼ tiʼj, o kubʼ tyekʼin Jehová qa kʼujlaʼn kykyaqil tmajen tuʼn.

10. ¿Alkye yekʼbʼil at tiʼj qa kʼujlaʼnxix qoʼ tuʼn Jehová?

¹⁰ ¿Alkye yekʼbʼil at tiʼj qa kʼujlaʼnxix qoʼ tuʼn Jehová? Aju chojbʼil. Tuʼn jlu kubʼ tyekʼin qa mas kʼujlaʼn qoʼ tuʼn twitz alkyexku juntl (Juan 3:16; Rom. 5:8). Tzaj tsamaʼn Jehová Tkʼwal ex tzaj tqʼoʼn ambʼil tuʼn tkyim tuʼntzun tkubʼ najsaʼn qil ex tuʼn qok te tamiw (1 Juan 4:10). Qa mas ma qo ximen tiʼj tkyaqilju bʼant tuʼn Jehová ex Jesús qiʼj, mas kʼelel qnikʼ tiʼj jniʼ kʼujlaʼn teyele junjun qe kyuʼn (Gál. 2:20). Mintiʼ tzaj tqʼoʼn Jehová chojbʼil noq tuʼn tjapun jun ley tuʼn, sino bʼant tuʼn tuʼnju kʼujlaʼn qoʼ tuʼn. Kubʼ tyekʼin jlu tej ttzaj tsamaʼn Tkʼwal, aju mas nim toklen toj twitz. Tzaj tqʼoʼn ambʼil tuʼn tbʼaj kʼixbʼisaʼn ex tuʼn tkyim tuʼn qpaj.

11. ¿Tiʼ in tzaj tyekʼin Jeremías 31:3 qe?

¹¹ Ik tzeʼn ma tzʼel qnikʼ tiʼj, nya oʼkx in kubʼ tnaʼn Jehová tkʼujlabʼil qiʼj, sino in tzaj tqʼamaʼn (kjawil uʼjit Jeremías 31:3). O qo tzaj tiʼn Jehová toj ttnam tuʼnju kʼujlaʼn qoʼ tuʼn (mojbʼankuya tukʼil Deuteronomio 7:​7, 8). Mintiʼ jun tiʼ jaku tzʼel paʼn qe tiʼj tkʼujlabʼil Jehová (Rom. 8:​38, 39). ¿Tiʼ in kubʼ tnaʼn teya aj tel tnikʼa tiʼj jlu? Atzun jaʼlo, kjawil quʼjin Salmo 23. Akux in bʼant quʼn, ximana tiʼj tzeʼn onin tkʼujlabʼil Jehová tiʼj David ex tzeʼn jaku tzʼonin tiʼja.

¿TIʼ IN KUBʼ TNAʼNA AJ TEL TNIKʼA TIʼJ JNIʼ KʼUJLAʼNA TUʼN JEHOVÁ?

12. ¿Tiʼ jaku tzaj tqʼamaʼna tiʼj Salmo 23?

¹² (Kjawil uʼjit Salmo 23:​1-6). Tqʼama David toj Salmo 23 qa qʼuqli tkʼuʼj tiʼj qa kʼujlaʼn tuʼn Jehová ex qa ok t-xqʼuqin. Yolin tiʼj tbʼanel tamiwbʼil ten tukʼil ex  tqʼama qa ok te Pastoril te. Mintiʼ tzaj xobʼ David tuʼnju el tnikʼ tiʼj qa tzaj tyekʼin Jehová tbʼe ex ok qeʼxix tkʼuʼj tiʼj. Ojtzqiʼnxix tuʼn qa kbʼeltoq tyekʼin Jehová tkʼujlabʼil tiʼj tkyaqil qʼij. Qo xnaqʼtzan tiʼj tiquʼn ok qeʼ tkʼuʼj David tiʼj jlu.

13. ¿Tzeʼn el tnikʼ David tiʼj qa ok xqʼuqin tuʼn Jehová?

¹³ «Tkyaqil at weye tuʼn». El tnikʼ David tiʼj qa ok xqʼuqin tuʼn Jehová tuʼnju xi tqʼoʼn aju at tajbʼen te. Ax ikx, ojtzqiʼntoq tuʼn qa ok Jehová te tamiw ex tzalaj tiʼj. Tuʼntzunju, ok qeʼ tkʼuʼj David tiʼj qa ktzajel tqʼoʼn Jehová aju at tajbʼen te noq tiʼxku bʼaj. Ok qeʼ tkʼuʼj tiʼj qa kʼujlaʼn tuʼn Jehová ex onin tiʼj tuʼn miʼn ttzaj bʼaj tkʼuʼj ex tzalaj (Sal. 16:11).

14. ¿Tzeʼn in qo ok t-xqʼuqin Jehová tukʼil kʼujlabʼil?

¹⁴ In qo ok t-xqʼuqin Jehová tukʼil kʼujlabʼil, mas aj qikʼ kyoj nya bʼaʼn. Qo xnaqʼtzan tiʼjju bʼaj tiʼj Claire, ma tzikʼ mas te 20 abʼqʼi in najbʼen toj Betel. a Tqʼama qa mintiʼ el tnikʼ tiʼj tzeʼn tuʼn tonin tiʼj tfamilia tej kyok weʼ kywitz ambʼil kwest. Tzaj jun derrame cerebral tiʼj tman, ex expulsarin jun titzʼin, kubʼ naj tnegocio tfamilia ex el qʼiʼn kyja. ¿Tzeʼn kubʼ tyekʼin Jehová qa xqʼuqin kyiʼj? Tqʼama Claire jlu: «Xi tqʼoʼn Jehová aju at tajbʼen kye toj njaye junjun qiʼj. Ex nim maj, xi tqʼoʼn mas twitzju at tajbʼen kye. Kukx in tzaj nnaʼne tzeʼn onin Jehová qiʼje ex mlay tzikʼ tnaʼl tkʼujlabʼil wuʼne. In nonin jlu wiʼje tuʼn kukx wajbʼene te Jehová tukʼil tzalajbʼil aj kytzaj nya bʼaʼn toj wanqʼibʼile».

15. ¿Tiʼ onin tiʼj David tuʼn tten tipumal juntl maj? (Ax ikx qʼonka twitza tiʼj dibujo).

¹⁵ «In ten juntl maj wipune tuʼn». Ok weʼ  David kywitz nim nya bʼaʼn ex at maj tzaj bʼaj tkʼuʼj (Sal. 18:​4-6). Noqtzun tuʼnj, ten tipumal juntl maj tej t-ximen tiʼj tkʼujlabʼil Jehová ex tzeʼn xqʼuqin tiʼj. Kubʼ tnaʼn qa xi tiʼn Jehová te «tuj chaʼx kʼul» ex «ttzi aʼ ẍtilun wen». Iktzun tten, ten tipumal ex kukx ajbʼen te Jehová tukʼil tzalajbʼil (Sal. 18:​28-32).

16. ¿Tzeʼn o tzʼonin Jehová tiʼja tuʼn tten tipumala juntl maj?

¹⁶ Aj qok weʼ kywitz nya bʼaʼn, ax ikx qe jaku txi qqʼamaʼn jlu: «Noq tuʼnju tqʼaqʼbʼil tkʼuʼj [Jehová], te jumajx naʼnx qnaj tuʼn» (Lam. 3:22; Col. 1:11). Qo ximen tiʼjju bʼaj tiʼj Rachel. Tzaj bʼaj tkʼuʼj tej tkyaj kolin tuʼn tchmil ex tej tel tpan tibʼ tiʼj Jehová toj pandemia te COVID-19. ¿Tiʼ bʼant tuʼn Jehová tuʼn tonin tiʼj? Tqʼama Rachel jlu: «Onin wiʼje tuʼn tkubʼ nnaʼne bʼaʼn. Tzaj tqʼoʼn nim wamiwe ex el kypaʼn ambʼil tuʼn kyten wukʼile, pon kyiʼn nwaye, pon kysamaʼn mensaje, pon kysamaʼn tbʼanel texto, in jaw tzeʼne kyuʼn ex tzaj kyqʼamaʼn weye qa in xqʼuqin Jehová wiʼje. Kukx in xi nqʼoʼne chjonte te Jehová tiʼj tbʼanel familia lu ex kʼujlaʼn qiʼne kyuʼn».

17. ¿Tiquʼn tqʼama David «Mlay chin xobʼe teju mya bʼaʼn»?

¹⁷ «Mlay chin xobʼe teju mya bʼaʼn, tuʼnju ata wukʼile Nman». E ten nim aj qʼoj tiʼj David ex nim maj chʼixmi kyim. Pero onin tkʼujlabʼil Jehová tiʼj tuʼn tten segur ex tuʼn tok xqʼuqin. Kubʼ tnaʼn ik tzeʼn attoq Jehová ttxlaj toj tkyaqil ambʼil. Tuʼntzunju, xi tbʼitzin jlu: «In klete tuʼn te tkyaqilju in chin xobʼtoqe te» (Sal. 34:4). At maj tzaj xobʼ David, pero kubʼ tiʼj jlu tuʼn tuʼnju tzaj tnaʼn qa kʼujlaʼn tuʼn Jehová.

18. Aj qok weʼ kywitz ambʼil in qo tzaj xobʼ kyuʼn, ¿tzeʼn in nonin qiʼj aj tel qnikʼ tiʼj qa kʼujlaʼn qoʼ tuʼn Jehová?

¹⁸ Aj qok weʼ kywitz ambʼil in qo tzaj xobʼ kyuʼn, ¿tzeʼn in nonin qiʼj aj tel qnikʼ tiʼj qa kʼujlaʼn qoʼ tuʼn Jehová? Tqʼama jun precursora Susi tbʼi, tiʼ kubʼ tnaʼn junx tukʼil tchmil tej tkubʼ tbʼyoʼn tibʼ tal: «Aj tbʼaj jun tiʼ bʼisbʼajilxix toj tanqʼibʼila, in tzaj tiʼn nya bʼaʼn tiʼja ex in tzaj xobʼa tuʼn tbʼaj mas tiʼ. Pero tuʼn tkʼujlabʼil Jehová in kubʼ qnaʼne qa in kolin ex qa in xqʼuqin qiʼje». In tzaj tqʼamaʼn Rachel jlu, aju ma qo yolin tiʼj toj párrafo 16: «Toj jun qonikʼen, tzaj nim nbʼise ex in tzaj xobʼe. Kubʼ nnaʼne qa mlaytoq tzikʼx wuʼne, in jaw oqʼe ex in naʼne Dios te Jehová tukʼil nim bʼis. Jun rat kubʼ nnaʼne ik tzeʼn in tzaj chleʼne tuʼn Jehová tuʼntzun miʼn xobʼe, ik tzeʼn  in bʼant tuʼn jun txubʼaj tukʼil tal. Tibʼajxi jlu, in nikʼ jtane. Mlayx tzikʼ tnaʼl jlu wuʼne». Ten jun ansyan Tasos tbʼi, kyaje abʼqʼi toj jun cárcel tuʼnju mintiʼ xiʼ kyxol soldad. Tqʼama qa ok xqʼuqin tuʼn Jehová tukʼil kʼujlabʼil: «Chʼiy qʼuqbʼil nkʼuʼje tiʼj Jehová tuʼnju tzaj tqʼoʼn mas twitzju at tajbʼen weye. Ax ikx tzaj tqʼoʼn xewbʼaj xjan weye tuʼn tkubʼ nnaʼne tzalajbʼil maske jaku tzaj nim nbʼise toj cárcel. Tuʼn jlu, el nnikʼe tiʼj qa mas kbʼel nnaʼne tkʼujlabʼil Jehová qa mas ma tzʼok qeʼ nkʼuʼje tiʼj. Ex kubʼ nximane tuʼn woke te precursor regular tej atine toj cárcel».

QO OK LAQʼEʼ TTXLAJ JEHOVÁ, AJU DIOS TE KʼUJLABʼIL

19. a) Aj tel qnikʼ tiʼj qa kʼujlaʼn qoʼ tuʼn Jehová, ¿tiʼ jaku txi qqanin toj qnaʼj Dios? b) ¿Alkyeqe texto in che yolin tiʼj tkʼujlabʼil Jehová mas in che pon toj tanmiya? (Qʼonka twitz tiʼj recuadro « Qe texto in che onin qiʼj tuʼn tkubʼ qnaʼn tkʼujlabʼil Jehová»).

¹⁹ In tzaj kyyekʼin experiencia ma qo yolin tiʼj qa a Jehová «aju Dios [ . . . ] at tkʼujlalil» (2 Cor. 13:11). In ximen tiʼj teyele junjun qe. Ex qʼuqli qkʼuʼj tiʼj qa «txolin [ . . . ] [qiʼj] tuʼn tkʼujlalil» (Sal. 32:10). Qa mas ma qo ximen tiʼj tzeʼn o kubʼ tyekʼin Jehová tkʼujlabʼil qiʼj, mas kʼokel qqʼoʼn qwitz tiʼj qa in xqʼuqin qiʼj ex mas qo okel laqʼeʼ ttxlaj. Tuʼntzunju, jaku qo naʼn Dios te ex jaku txi qqanin te tuʼn qok tkʼujlaʼn. Jaku txi qqʼamaʼn te tkyaqilju in tzaj qbʼis tuʼn ex jaku tzʼok qeʼ qkʼuʼj tiʼj qa in nel tnikʼ qiʼj ex qa taj tuʼn tonin qiʼj (Sal. 145:​18, 19).

20. ¿Tzeʼn in nonin tkʼujlabʼil Jehová qiʼj tuʼn qten nqayin ttxlaj?

²⁰ Tbʼanel tkʼujlabʼil Jehová ik tzeʼn tkyaqal qʼaqʼ aj ttzaj nim cheʼw qonikʼen. Qaj tuʼn kukx qten nqayin ttxlaj. At nim tipumal tkʼujlabʼil Jehová ex in kubʼ qnaʼn bʼaʼn tuʼn. Ax ikx, in kubʼ qnaʼn nim tzalajbʼil tuʼnju kʼujlaʼnxix qoʼ tuʼn Jehová. Qkyaqilx qaj tuʼn t-xi qqʼamaʼn jlu: «At nkʼujlalile tiʼj Qman [Jehová]» (Sal. 116:1).