1, 2. ¿Alkyeqe nya bʼaʼn jaku che ok weʼ tmajen Jehová twitz?

 NOQ minabʼen jaku chʼexpaj qanqʼibʼil tuʼn jun tiʼ. Qo yolin kyiʼj junjun techel. Toj jun qʼij, xi tqʼamaʼn doctor te jun ermano Luis tbʼi qa attoq cáncer tiʼj ex qa oʼkx kanqʼil junjun xjaw. a Attoq nim tiʼ in bʼant tuʼn Monika toj tajbʼebʼil te Jehová junx tukʼil tchmil, aju in najbʼentoq te ansyan. Noqtzun tuʼnj, ok tbʼiʼn qa otoq bʼinchaʼn tchmil il toj nim ambʼil. Ex oq Olivia tja tuʼnju kyjaʼ ttzaj jun huracán. Tej tmeltzʼaj, otoq kubʼ xitj tja. Noq minabʼen chʼexpaj tanqʼibʼil Luis, Monika ex Olivia. ¿Ope bʼaj jlu tiʼja?

² Ax ikx qe, in qo ok weʼ kywitz problem ex in tzaj yabʼil qiʼj ik tzeʼn kye xjal. Nya oʼkxju, ax ikx in nok bʼinchaʼn nya bʼaʼn qiʼj kyuʼn aj qʼoj tiʼj ttnam Jehová. Ax tok, mintiʼ in nel tiʼn Jehová qe nya bʼaʼn in che tzaj qiʼj, pero o kyaj ttziyen qa kʼonil qiʼj (Is. 41:10). Tuʼn tonbʼil, kukx jaku qo tzalaj, jaku jaw qjyoʼn aju mas tbʼanel ex jaku qo ten tzʼaqli twitz, axpe ikx kyoj ambʼil kwest. Toj xnaqʼtzbʼil lu, qo yolil tiʼj kyaje tumel tzeʼn in nonin Jehová qiʼj aj qok weʼ kywitz problem. Ex kʼelel qnikʼ tiʼj tiʼ jaku bʼant quʼn tuʼn tonin qiʼj.

 KXQʼUQIL JEHOVÁ QIʼJ

3. ¿Tiʼ kwest jaku tzʼela toj qwitz aj qikʼ toj jun ambʼil kyuw?

³ Qa in qo ikʼ toj jun ambʼil kyuw, kwest jaku tzʼela toj qwitz tuʼn qximen toj tumel ex tuʼn tjaw qjyoʼn aju mas tbʼanel. ¿Tiquʼn? Tuʼnju jaku kubʼ qnaʼn nim bʼis ex jaku tzaj bʼaj qkʼuʼj ex mlay tzʼel qnikʼ tiʼj tiʼ jaku bʼant quʼn. Atzun jlu kubʼ kynaʼn kabʼe ermana ma qo yolin tiʼj toj tnejel párrafo. Tqʼama Olivia jlu: «Tej tkubʼ xitj njaye tuʼn huracán, tzaj bʼaj nkʼuʼje ex mintiʼ el nnikʼe tiʼ tuʼn tbʼant wuʼne». Atzunte Monika, tqʼama jlu tiʼj il otoq bʼant tuʼn tchmil: «Nya oʼkx tzaj nbʼise. Sino nim tzaj choʼn toj wanmiye. Mintiʼ ten wipumale tuʼn t-xi nbʼinchaʼne qe tiʼchaq in bʼant wuʼne junjun qʼij. Ex mintiʼ kubʼ nximane qa tuʼn tbʼaj jlu wiʼje». ¿Tiʼ o kyaj ttziyan Jehová tuʼntzun tonin qiʼj aj tkubʼ qnaʼn nim bʼis?

4. ¿Tiʼ in tzaj ttziyen Jehová qe toj Filipenses 4:6 ex 7?

⁴ Aju in bʼant tuʼn Jehová. In tzaj tqʼamaʼn Biblia jlu: «Kqebʼil kykʼuʼje tuʼn Dios» (kjawil uʼjit Filipenses 4:​6, 7). In qeʼ qkʼuʼj tuʼn Jehová aj tchewix qanmi tuʼnju at jun tbʼanel qamiwbʼil tukʼil. Tbʼanel ex «mas maʼ t-xilen jlu twitz tkyaqil kynabʼl xjal» moqa twitzju jaku kubʼ qximen. ¿Ope naʼna Dios jun maj ex tibʼajxi jlu chewix tanmiya? Qa ikju, toj ambʼil lu kubʼ tnaʼna qa qeʼ tkʼuʼja tuʼn Jehová.

5. ¿Tiʼ in kubʼ qnaʼn aj tok kwentin qanmi ex qximbʼetz tuʼn qʼuqbʼil qkʼuʼj in tzaj tqʼoʼn Jehová?

⁵ Nya oʼkx in tzaj tqʼamaʼn Filipenses 4:7 qa «kqebʼil kykʼuʼje tuʼn Dios», sino ax ikx in tzaj tqʼamaʼn jlu: «Kʼokel kwentin kyanmiye ex kyximbʼetze». Aju yol original ajbʼen kyiʼj yol «kʼokel kwentin», atz tzajni tiʼj jun yol ajbʼen kyiʼj soldad in che xqʼuqin tuʼn miʼn kyok tzoqpaj aj qʼoj tiʼj jun tnam. Toj txubʼtxaj in che jtantoq xjal toj tnam tuʼnju ojtzqiʼn kyuʼn qa in che xqʼuqin soldad ttzi puert. Ax ikx qe, aj tok kwentin qanmi ex qximbʼetz tuʼn qʼuqbʼil qkʼuʼj in tzaj tqʼoʼn Jehová, in chewix qanmi ex segur atoʼ (Sal. 4:8). Ik tzeʼn bʼaj tiʼj Ana, ax ikx jaku chewix qanmi maske nya jun rat in xi bʼinchaʼn tiʼj nya bʼaʼn (1 Sam. 1:​16-18). Aj tbʼaj jlu, kʼonil qiʼj tuʼn tten qximbʼetz toj tumel ex tuʼn tjaw qjyoʼn aju mas tbʼanel.

6. ¿Tiʼ il tiʼj tuʼn tbʼant quʼn tuʼn tqeʼ qkʼuʼj tuʼn Jehová? (Ax ikx qʼonka twitza kyiʼj tilbʼilal).

⁶ Aju il tiʼj tuʼn tbʼant quʼn. Ik tzeʼn kye xjal toj tnam jaku txi kyqanin kye soldad tuʼn kyok xqʼuqin, ax ik qe jaku txi qqanin te Jehová tuʼn qok t-xqʼuqin.  Kukx qo naʼn Dios te tzmaxi aj tqeʼ qkʼuʼj tuʼn (Luc. 11:9; 1 Tes. 5:17). Atzun jlu bʼant tuʼn Luis ex Ana tej t-xi qʼamaʼn te qa oʼkx junjun xjaw tuʼn tanqʼin. Tqʼama jlu: «Kyoj ambʼil ik tzeʼn jlu, kwest tuʼn tel qnikʼ tiʼj alkyeqe tratamiento kjawil qjyoʼn ex tiʼ kbʼantel quʼn kyukʼil junjuntl tiʼchaq. Nim in nonin naʼj Dios qiʼje tuʼn tkubʼ qnaʼne txubʼtxaj kyoj ambʼil lu». Kykabʼil e naʼn Dios nim maj ex tuʼn tkyaqil kyanmi xi kyqanin te Jehová tuʼn kyximen toj tumel, tuʼn tok t-xqʼuqin kyanmi ex tuʼn tten kynabʼil tuʼn tjaw kyjyoʼn aju mas tbʼanel. Kubʼ kynaʼn qa onin Jehová kyiʼj. Qa in nikʼa toj jun ambʼil kwest, kukx naʼna Dios. Kʼokel tkeʼyina tzeʼn kqebʼil tkʼuʼja tuʼn Jehová ex tzeʼn kʼokel t-xqʼuqin tanmiya ex t-ximbʼetza (Rom. 12:12).

KʼONIL JEHOVÁ TUʼN TKUBʼ QNAʼN QA SEGUR ATOʼ

7. ¿Tiʼ jaku kubʼ qnaʼn aj qikʼ kyoj ambʼil kyuw?

⁷ Qa in qo ikʼ toj jun ambʼil kyuw, kwest jaku tzʼela toj qwitz tuʼn tten qximbʼetz toj tumel ex mintiʼ in xi qbʼinchaʼn qe tiʼchaq ik tzeʼnx in bʼant quʼn tnejel. Ik tzeʼn in bʼaj tiʼj jun bark aj ttzaj kyqʼiqʼ jbʼal toj mar, in pon nim ola tiʼj bark. Ax ikx qe, jaku kubʼ qnaʼn nim tiʼ toj ax ambʼil. Tej tkyim Luis, tqʼama t-xuʼjil tiʼ kubʼ tnaʼn: «Kubʼ nnaʼne qa mintiʼ ttxolin wanqʼibʼile ex tzaj nbʼise wiʼje. Ex toj junjuntl ambʼil, tzaj nqʼoje tuʼnju mintiʼtoq Luis wukʼile». Ax ikx tqʼama ermana qa at maj kubʼ tnaʼn qa tjunalx attoq ex tzaj tqʼoj tuʼnju a kbʼel ximen tiʼ kbʼantel tuʼn kyiʼj junjun tiʼchaq in bʼanttoq tuʼn Luis. Kubʼ tnaʼn ermana qa attoq toj jun mar tukʼil kyqʼiqʼ jbʼal. Noqtzun tuʼnj, ¿tzeʼn in nonin Jehová qiʼj aj tkubʼ qnaʼn nim tiʼ toj ax ambʼil?

8. ¿Tiʼ in tzaj ttziyen Jehová qe toj Isaías 33:6?

⁸ Aju in bʼant tuʼn Jehová. O kyaj ttziyen Jehová qa kʼonil qiʼj tuʼn tkubʼ qnaʼn qa segur atoʼ (kjawil uʼjit Isaías 33:6). Nim jaku yukch jun bark aj ttzaj jun kyqʼiqʼ jbʼal. Tuʼn tten segur, ateʼ junjun kʼuxbʼil tjaqʼ ex in che ajbʼen kyoj ambʼil lu. Iktzun tten, nya nim in yukch bark ex segur ateʼ xjal toj. Noqtzun tuʼnj, mas in che onin kʼuxbʼil ateʼ tjaqʼ bark aj bʼet. Ax ikx qe, qa qaj tuʼn tonin Jehová qiʼj tuʼn miʼn qtzaj xobʼ kyoj ambʼil kwest, nim toklen tuʼn kukx qten tzʼaqli twitz.

9. ¿Tzeʼn in tzaj qʼuqbʼaʼn qkʼuʼj kyuʼn onbʼil in tzaj tqʼoʼn ttnam Jehová? (Ax ikx qʼonka twitza kyiʼj tilbʼilal).

⁹ Aju il tiʼj tuʼn tbʼant quʼn. Qa in tzaj bʼaj qkʼuʼj tuʼnju in kubʼ qnaʼn, tzʼok tilil  quʼn tuʼn kukx qnaʼn Dios, tuʼn kukx qpakbʼan ex tuʼn kukx qxiʼ kyoj chmabʼil. Bʼalo nya aʼyex tiʼchaq jaku che bʼant quʼn jaʼlo, pero in nel tnikʼ Jehová qiʼj (mojbʼankuya tukʼil Lucas 21:​1-4). Paʼmila ambʼil tuʼn t-xnaqʼtzana tjunalxa ex tuʼn t-ximana. In najbʼen ttnam Jehová tuʼn tuʼn ttzaj tqʼoʼn xnaqʼtzbʼil ex qe video tuʼn tonin qiʼj tuʼn miʼn ttzaj bʼaj qkʼuʼj kyoj ambʼil kwest. Tuʼn tkanet onbʼil tuʼna, jaku txi tjyoʼna toj aplicación JW Library^®, aju Índice de las publicaciones Watch Tower ex aju Onbʼil tuʼn kyxnaqʼtzan testigos de Jehová. Tqʼama Monika, aju ma qo yolin tiʼj, qa in che ajbʼen onbʼil lu tuʼn aj tkubʼ tnaʼn qa in tzaj bʼaj tkʼuʼj. Jun techel, at maj kubʼ ttzʼibʼin qe yol ira, traición moqa lealtad, ex jaw tuʼjin qe tqanil ajxi tkubʼ tnaʼn bʼaʼn. Tqʼama jlu: «Kubʼ nnaʼne nim bʼis tej t-xi njyoʼne tqanil. Pero akux in chin uʼjine tiʼj tqanil, kubʼ nnaʼne qa in tzaj chleʼne tuʼn Jehová. Ex ok nqʼoʼn nwitze tiʼj qa in nelxix tnikʼ Jehová tiʼjju in kubʼ nnaʼne ex onin wiʼje». Jaku onin Jehová tiʼja tuʼn miʼn ttzaj bʼaj tkʼuʼja ex tuʼn tkubʼ tnaʼna bʼaʼn (Sal. 119:​143, 144).

KʼONIL JEHOVÁ QIʼJ

10. ¿Tiʼ jakulo kubʼ qnaʼn aj kytzaj nya bʼaʼn toj qchwinqlal?

¹⁰ Aj ttzaj jun nya bʼaʼn toj qchwinqlal, jaku kubʼ qnaʼn qa mintiʼ qipumal ex mintiʼ in qo tzalaj. Jakulo kubʼ qnaʼn qa ik qoʼ ik tzeʼn jun xjal in koxin toj jun carrera tuʼnju otoq kʼixbʼi. Bʼalo kwest in nela qe tuʼn t-xi qbʼinchaʼn qe tiʼchaq ik tzeʼn in bʼant quʼn tnejel moqa nya qaj tuʼn t-xi qbʼinchaʼn qe tiʼchaq qgan. Axlo ikx, bʼalo oʼkx qaj tuʼn qjtan ik tzeʼn bʼaj tiʼj Elías (1 Rey. 19:​5-7). Pero, ¿tiʼ kbʼantel tuʼn Jehová tuʼn tonin qiʼj aj tkubʼ qnaʼn qa mintiʼ qipun?

11. ¿Tiʼ o kyaj ttziyen Jehová tuʼn tbʼant tuʼn? (Salmo 94:18).

¹¹ Aju in bʼant tuʼn Jehová. O kyaj ttziyen Jehová qa kʼonil qiʼj (kjawil uʼjit Salmo 94:18). Aj tkʼixbʼi jun xjal toj jun carrera, taj onbʼil tuʼn tbʼet. Ax ikx qe, bʼalo il tiʼj tuʼn ttzaj qʼoʼn onbʼil qe tuʼn kukx qajbʼen te Jehová. Kyoj ambʼil lu, o kyaj ttziyen Jehová tuʼn tbʼant jlu tuʼn: «Porke aqine Dios aju Kymane, tzyuʼn qeye wuʼne ex o nmaye kyeye kyjaʼ: Miʼn che xobʼe, chin onile kyiʼje» (Is. 41:13). Tej tok weʼ David twitz nim  nya bʼaʼn ex kywitz aj qʼoj, ok tqʼoʼn twitz tiʼj qa onin Jehová tiʼj. Tuʼntzunju, tqʼama jlu: «Tzyuʼn qine tuʼn tbʼanqʼabʼa» (Sal. 18:35). Yajtzun jaʼlo, ¿tzeʼn in nonin Jehová qiʼj?

12. ¿Alkyeqe jaku che ajbʼen tuʼn Jehová tuʼn tonin qiʼj?

¹² Nim maj in che ajbʼen txqantl xjal tuʼn Jehová tuʼn tonin qiʼj. Jun techel, tzaj bʼaj tkʼuʼj David toj jun ambʼil, pero pon Jonatán aju tamiw qʼuqbʼal tkʼuʼj (1 Sam. 23:​16, 17). Atzunte Elías, ajbʼen Eliseo tuʼn Jehová tuʼn t-xi tqʼoʼn onbʼil te (1 Rey. 19:​16, 21; 2 Rey. 2:2). Toj ambʼil jaʼlo, jaku che ajbʼen qe toj qja, qe qamiw moqa qe ansyan tuʼn Jehová tuʼn kyonin qiʼj. Noqtzun tuʼnj, qa nya bʼaʼn atoʼ, nya qaj tuʼn qten kyukʼil txqantl. Ax tok, toj tumel aj tkubʼ qnaʼn jlu. Pero, ¿tiʼ il tiʼj tuʼn tbʼant quʼn tuʼn ttzaj qkʼamoʼn onbʼil in tzaj tqʼoʼn Jehová?

13. ¿Tiʼ mintiʼ tuʼn tbʼant quʼn tuʼn ttzaj qkʼamoʼn onbʼil in tzaj tqʼoʼn Jehová qe? (Ax ikx qʼonka twitza kyiʼj tilbʼilal).

¹³ Aju il tiʼj tuʼn tbʼant quʼn. Miʼn tzʼel qpan qibʼ kyiʼj txqantl. Qa ma tzʼel qpan qibʼ kyiʼj, kbʼel qyekʼin qa oʼkx in qo ximen qiʼjx ex kyiʼj qproblem. Ex tuʼn jlu, nya toj tumel jaku txi qbʼinchaʼn qe tiʼchaq (Prov. 18:1). Ax tok, atlo maj qkyaqilx qaj tuʼn qten qjunalx jun rat aj qikʼ toj jun ambʼil kwest. Pero qa ma tzʼel qpan qibʼ kyiʼj txqantl toj nim ambʼil, mlaylo tzaj qkʼamoʼn onbʼil ktzajel kyqʼoʼn xjal in che ajbʼen tuʼn Jehová tuʼn tonin qiʼj. Tuʼntzunju, maske kwest ambʼil bʼaʼn tuʼn t-xi qkʼamoʼn onbʼil ktzajel kyqʼoʼn toj qja, qe qamiw ex qe ansyan qe. Bʼaʼn tuʼn ttzaj qnaʼn qa in che ajbʼen tuʼn Jehová tuʼn tonin qiʼj (Prov. 17:17; Is. 32:​1, 2).

KTZAJEL TQʼUQBʼAʼN JEHOVÁ QKʼUʼJ

14. ¿Tiʼ jaku qo tzaj xobʼ tuʼn?

¹⁴ Atlo maj jaku kubʼ qnaʼn qa nim in qo tzaj xobʼ. In yolin Biblia kyiʼj tmajen Jehová kyqʼama qa e tzaj luʼlun tuʼnju e tzaj xobʼ kywitz aj qʼoj moqa kyuʼn junjuntl nya bʼaʼn (Sal. 18:4; 55:​1, 5). Yajtzun qe, ¿in qo el ikʼun kyuʼn qe qukʼil toj escuela, toj aqʼuntl, kyuʼn qfamilia moqa kyuʼn aqʼunal te Gobierno? ¿In qo xobʼ tuʼnju jaku qo kyim tuʼn jun yabʼil at qiʼj? Kyoj ambʼil lu, jaku qo tzaj xobʼ ik tzeʼn jun tal kʼwal. ¿Tiʼtzun in bʼant tuʼn Jehová tuʼn tonin qiʼj?

15. In tzeʼn in tzaj tqʼamaʼn Salmo 94:​19, ¿tiʼ kbʼantel tuʼn Jehová?

 ¹⁵ Aju in bʼant tuʼn Jehová. In tzaj tqʼuqbʼaʼn Jehová qkʼuʼj ex in chewix qanmi tuʼn (kjawil uʼjit Salmo 94:19). Qo ximen tiʼj jun tal txin mintiʼ in jtan tuʼnju at nim qʼankyoq moqa rayo. Toj ambʼil lu, in pon tman ex in tzaj chleʼn tuʼn. In xi tqʼamaʼn te tuʼn miʼn ttzaj xobʼ, kukx in bʼant jlu tuʼn tman ajxi tikʼ jtan. Maske kukx in tzaj nim jbʼal ex rayo, in kubʼ tnaʼn txin qa mlay tzaj nya bʼaʼn tiʼj tuʼnju in kubʼ tnaʼn qa segur taʼ tukʼil tman. Chʼixme ax jlu in bʼaj qiʼj, jaku txi qqʼamaʼn qa aj qtzaj luʼlun tuʼnju in qo tzaj xobʼ, qaj tuʼn qtzaj chleʼn tuʼn Jehová ajxi qex kywitz ambʼil kwest. ¿Tiʼ kbʼantel quʼn tuʼn ttzaj tqʼuqbʼaʼn Jehová qkʼuʼj?

16. ¿Tiʼ kbʼantel quʼn tuʼn ttzaj tqʼuqbʼaʼn Jehová qkʼuʼj? (Ax ikx qʼonka twitza kyiʼj tilbʼilal).

¹⁶ Aju il tiʼj tuʼn tbʼant quʼn. Nim toklen tuʼn tel qpaʼn ambʼil tuʼn qyolin tukʼil Jehová toj naʼj Dios ex tuʼn quʼjin tiʼj Tyol (Sal. 77:​1, 12-14). Iktzun tten, aj qikʼ toj jun ambʼil kwest, tnejel kbʼel qximen tuʼn qjyon onbʼil tukʼil Jehová. Jaku txi qqʼamaʼn te tiʼ in tzaj bʼaj qkʼuʼj tuʼn ex tiʼ in qo tzaj xobʼ tuʼn. Bʼaʼn tuʼn t-xi qqʼoʼn ambʼil te tuʼn qtzaj ttzaqʼweʼn ex tuʼn ttzaj qʼuqbʼaʼn qkʼuʼj tuʼn Tyol (Sal. 119:28). Ateʼ junjun libro toj Biblia nim jaku che onin qiʼj toj ambʼil kwest, ik tzeʼn aju libro te Job, Salmos ex Proverbios. Ax ikx, jaku che onin qiʼj qe yol tqʼama Jesús toj Mateo capítulo 6. Tuʼntzunju, qa ma naʼna Dios te Jehová ex qa ma jaw tuʼjina Tyol, kʼokel tqʼoʼn twitza tiʼj tzeʼn ktzajel qʼuqbʼaʼn tkʼuʼja tuʼn.

17. ¿Tiʼ bʼaʼn tuʼn ttzaj qnaʼn?

¹⁷ Bʼaʼn tuʼn ttzaj qnaʼn qa kukx ktel Jehová onil qe maske in qo ok weʼ kywitz ambʼil kwest. Mlayx qo kyaj tkolin (Sal. 23:4; 94:14). O kyaj ttziyen Jehová qa kbʼel qnaʼn qa segur atoʼ, kʼonil qiʼj ex ktzajel tqʼuqbʼaʼn qkʼuʼj. Xi tqʼamaʼn Isaías jlu te Jehová: «Nman, aqeju waʼlxix tuj kyokslabʼl in che ok tkwentina tuʼn kyten tuj txubʼtxaj porke nnoʼk qeʼ kykʼuʼj tiʼja» (Is. 26:3). Tuʼntzunju, qeʼk tkʼuʼja tiʼj Jehová ex kʼamonxa tkyaqil onbʼil in tzaj tqʼoʼn teya. Qa ma bʼant jlu tuʼna, kʼonil tiʼja tuʼn tten tipumala tuʼn texa kywitz ambʼil kwest.