1. ¿Tiquʼn kubʼ tbʼinchaʼn Jehová mejebʼleʼn?

 «AT-XIX tzalajbʼil tukʼil» Jehová, tuʼntzunju ax ikx taj tuʼn qtzalaj (1 Tim. 1:11). O tzaj tqʼoʼn Jehová nim oyaj qe tuʼn qtzalaj toj qanqʼibʼil (Sant. 1:17). Jun kyxol oyaj lu aju mejebʼlen. Aj tkubʼ mojeʼ jun xinaq tukʼil jun xuʼj, in xi kytziyen tuʼn tok kykʼujlaʼn kyibʼ, tuʼn tok kyxqʼuqin kyibʼ ex tuʼn kyrespetarin kyibʼ kyxolx. Qa ma tzʼok tilil tuʼn chmilbʼaj ex tuʼn xuʼjilbʼaj tuʼn tten kykʼujlabʼil kyuw kyxolx, jaku che tzalajxix (Prov. 5:18).

 2. ¿Tzeʼn taʼ kymejebʼleʼn nimku xjal toj ambʼil jaʼlo?

² Noqtzun tuʼnj, bʼisbʼajilxix tuʼnju ateʼ nim mejebʼlen toj ambʼil jaʼlo mintiʼ in japun twi kyyol in xi kytziyen aj kykubʼ mojeʼ. Ex tuʼn jlu mintiʼ in che tzalaj toj kymejebʼleʼn. In tzaj tqʼamaʼn jun tqanil etz tuʼn Organización Mundial de la Salud qa ateʼ nim chmilbʼaj in nok kybʼyoʼn kyxuʼjil, in xi kyqʼamaʼn junjun kyyol nya bʼaʼn kye moqa in nok kybʼinchaʼn junjuntl nya bʼaʼn kyiʼj. In kubʼlo kyyekʼin tbʼanel kymod tukʼil kyxuʼjil kywitz xjal, pero in nok kybʼinchaʼn nya bʼaʼn kyiʼj aj kyten kyjunalx. Ax ikx in tzaj nya bʼaʼn kyxol qeju o che kubʼ mojeʼ tuʼnju ateʼ chmilbʼaj in nok kykeʼyin pornografía.

 3. ¿Tiquʼn ateʼ chmilbʼaj in nok kybʼinchaʼn nya bʼaʼn tiʼj kyxuʼjil?

³ ¿Tiquʼn ateʼ junjun chmilbʼaj in nok kybʼinchaʼn nya bʼaʼn tiʼj kyxuʼjil? At maj tuʼnju kubʼ tyekʼin kyman nya bʼaʼn kymod tiʼj kytxuʼ tej kyjaw chʼiy ex in kubʼ kyximen qa toj tumel mod lu. Ateʼ junjuntl, in bʼant jlu kyuʼn tuʼnju atzunju in bʼant kyuʼn chʼixmi kykyaqil xjal jatumel in che anqʼin. Bʼalo in kubʼ kyximen qa il tiʼj tuʼn tkubʼ kyyekʼin nya bʼaʼn kymod kyukʼil kyxuʼjil tuʼntzun tel kynikʼ tiʼj qa aqe in che mandarin toj kyja. Ex ateʼ junjuntl chmilbʼaj mintiʼ tzaj xnaqʼtzan kye tzeʼn tuʼn kyjakʼunte kyibʼ aj ttzaj kyqʼoj. Ax ikx, ateʼ junjuntl chmilbʼaj in ten nya bʼaʼn kyximbʼetz tiʼj kyxuʼjil ex tiʼjju ambʼil aj kykubʼ ten kyukʼil tuʼnju in nok kyqʼoʼn kywitz tiʼj pornografía. Nya oʼkx jlu, ax  ikx o tzʼel kynikʼ junjun xjal at kynabʼil, qa atxix tej ttzaj pandemia te COVID-19, mas ateʼ chmilbʼaj in nok kybʼinchaʼn nya bʼaʼn tiʼj kyxuʼjil. Maske o tzikʼ tkyaqil jlu tiʼj jun chmilbʼaj, ni jun kyxol tkyaqil jlu in tzaj tqʼoʼn ambʼil te tuʼn tok tbʼinchaʼn nya bʼaʼn tiʼj t-xuʼjil.

 4. ¿Tiʼ il tiʼj tuʼn tok kyxqʼuqin kyibʼ chmilbʼaj okslal tiʼj ex tiquʼn?

⁴ Il tiʼj tuʼn tok kyxqʼuqin kyibʼ chmilbʼaj okslal tuʼn miʼn tten kyximbʼetz kyiʼj xuʼj ik tzeʼn kye xjal. a ¿Tiquʼn? Tuʼnju chʼixmi tkyaqil maj in kubʼ kybʼinchaʼn xjal aju in kubʼ kyximen. Qo ximen tiʼjju bʼaj kyiʼj okslal skʼoʼn maj toj congregación te Roma toj tnejel syent abʼqʼi. Tej tikʼ chʼin ambʼil ttzajlen tzyet congregación, xi tzʼibʼin jlu kye: «Kytzoqpinkje qeju tiʼchaq at twitz Txʼotxʼ» (Rom. 12:​1, 2, TNM). Kyuʼn yol lu in nel qnikʼ tiʼj qa ateʼ junjun okslal kukxtoq in xi kybʼinchaʼn junjun tiʼchaq ik tzeʼn kye xjal. Tuʼntzunju, xi tqʼamaʼn Pablo kye qa iltoq tiʼj tuʼn tchʼexpaj kymod ex kyximbʼetz. Ax ikx at tajbʼen consej lu kye chmilbʼaj toj ambʼil jaʼlo tuʼnju ateʼ junjun ermano kukx at kyximbʼetz ik tzeʼn kye xjal ex in nok kybʼinchaʼn nya bʼaʼn tiʼj kyxuʼjil. b ¿Alkye tmod chmilbʼaj taj Jehová tuʼn kubʼ tyekʼin tukʼil t-xuʼjil? Ok kkanetel tzaqʼwebʼil tiʼj xjel lu quʼn toj texto jatumel xjatz xnaqʼtzbʼil lu.

 5. Ik tzeʼn in tzaj tqʼamaʼn 1 Pedro 3:​7, ¿tzeʼn tmod chmilbʼaj il tiʼj tuʼn tten tukʼil t-xuʼjil?

⁵ (Kjawil uʼjit 1 Pedro 3:7). In tzaj tqʼamaʼn Jehová kye chmilbʼaj tuʼn t-xi kyqʼoʼn nimbʼil te kyxuʼjil. In xi qqʼoʼn nimbʼil te jun xjal qa in qo respetarin te ex in kubʼ qyekʼin jlu tukʼil qmod. In xi tqʼoʼn chmilbʼaj nimbʼil te t-xuʼjil qa in kubʼ tyekʼin tbʼanel tmod tukʼil ex qa in nok tkʼujlaʼn. Toj xnaqʼtzbʼil lu, kʼelel qnikʼ tiʼj alkye junjun tumel tzeʼn jaku txi tqʼoʼn chmilbʼaj nimbʼil te t-xuʼjil. Pero tnejel kʼelel qnikʼ tiʼj alkye junjun tiʼchaq mintiʼ tuʼn tbʼant tuʼn jun chmilbʼaj.

MIʼN KUB TBʼINCHAʼNA JUN TIʼ AJU JAKU TZAJ TBʼIS T-XUʼJILA TUʼN

 6. ¿Tiʼ t-ximbʼetz Jehová at kyiʼj chmilbʼaj in nok kybʼinchaʼn nya bʼaʼn tiʼj kyxuʼjil? (Colosenses 3:19).

⁶ Mintiʼ tuʼn tok tbʼyoʼn chmilbʼaj t-xuʼjil. Nya bʼaʼn in nela toj twitz Jehová qe xjal in che bʼiyen (Sal. 11:5). Ex mas nya bʼaʼn in nela toj twitz qe chmilbʼaj in nok kybʼyoʼn kyxuʼjil (Mal. 2:16; kjawil uʼjit Colosenses 3:19). Ik tzeʼn in tzaj tqʼamaʼn 1 Pedro 3:​7, jatumel xjatz xnaqʼtzbʼil lu, qa at jun chmilbʼaj nya bʼaʼn tmod tukʼil t-xuʼjil ax ikx in tzaj tiʼn nya bʼaʼn tiʼj tamiwbʼil tukʼil Dios. Axpe ikx, ya mintiʼlo in tzaj bʼiʼn tnaʼj Dios tuʼn Jehová.

 7. Ik tzeʼn in tzaj tqʼamaʼn Efesios 4:31 ex 32, ¿alkyeqe yol mintiʼ tuʼn t-xi kyqʼamaʼn chmilbʼaj te kyxuʼjil? (Ax ikx qʼonka twitza tiʼj «Yol nim toklen»).

⁷ Mintiʼ tuʼn t-xi tqʼamaʼn chmilbʼaj junjun tyol nya bʼaʼn te t-xuʼjil. Ateʼ junjun chmilbʼaj in xi kyqʼamaʼn junjun kyyol tukʼil qʼoj ex kyuw te kyxuʼjil ex in kubʼ kynaʼn nya bʼaʼn tuʼn. Pero in tzaj tqʼamaʼn Efesios 4:31 ex 32 (kjawil uʼjit) qa in nel tikʼun Jehová aju qʼoj, aju tmod xjal in jaw kyaqpaj, in jaw schʼin tuʼn tqʼoj ex in yasun. c Ex tuʼnju in nok tbʼiʼn Jehová tkyaqil, in nok tqʼoʼn twiʼ tiʼj alkyeqe yol in che ajbʼen tuʼn chmilbʼaj aj tyolin tukʼil t-xuʼjil axpe ikx aj kyten kyjunalx kyja. Qa kyuw tyol chmilbʼaj in xi tqʼamaʼn te t-xuʼjil ex qa nya toj tumel, nya oʼkx in tzaj tiʼn nya bʼaʼn toj tmejebʼleʼn, ax ikx in tzaj tiʼn nya bʼaʼn tiʼj tamiwbʼil tukʼil Dios (Sant. 1:26).

 8. ¿Tiʼ t-xim Jehová at tiʼj pornografía ex tiquʼn?

 ⁸ Mintiʼ tuʼn tok tqʼoʼn twitz chmilbʼaj tiʼj pornografía. ¿Tiʼ t-xim Jehová at tiʼj pornografía? In nel tikʼun. Qa at jun chmilbʼaj in nok tqʼoʼn twitz kyiʼj tilbʼilal nya bʼaʼn, in xi tnajsaʼn tamiwbʼil tukʼil Jehová, mintiʼ in respetarin te t-xuʼjil ex in nel tiʼn toklen. d Tajbʼil Jehová tuʼn tten chmilbʼaj tzʼaqli twitz t-xuʼjil, nya oʼkx tukʼil tbʼinchbʼen sino ax ikx tukʼil t-ximbʼetz. Tqʼama Jesús jlu: «Alkye jun ma txi keʼyinte jun xuʼj ex in pon tkʼuʼj tiʼj tuʼn tbʼinchante mya bʼaʼn tukʼil, ma tbʼincha aj pajil tuj tanmi» (Mat. 5:​28, 29). e

 9. ¿Tiquʼn nya bʼaʼn in nela toj twitz Jehová qa at jun chmilbʼaj okslal in xi tqʼamaʼn te t-xuʼjil tuʼn tkubʼ tbʼinchaʼn junjun tiʼchaq nya bʼaʼn aj kykubʼ ten junx?

⁹ Mintiʼ tuʼn tok t-obligarin chmilbʼaj t-xuʼjil tuʼn tkubʼ tbʼinchaʼn jun nya bʼaʼn aj kykubʼ ten junx. Ateʼ junjun chmilbʼaj in xi kyqʼamaʼn te kyxuʼjil tuʼn t-xi kybʼinchaʼn junjun nya bʼaʼn aj kykubʼ ten junx. Tuʼn jlu in kubʼ kynaʼn xuʼjilbʼaj nya bʼaʼn, in kubʼ kynaʼn qa nya kʼujlaʼn qe ex qa mintiʼ kyoklen. Nya bʼaʼn in nela toj twitz Jehová aju xjal oʼkx in ximen tiʼjx ex mintiʼ in kubʼ tyekʼin kʼujlabʼil. Taj Jehová tuʼn kubʼ tyekʼin chmilbʼaj tkʼujlabʼil ex tbʼanel tmod tukʼil t-xuʼjil ex tuʼn trespetarin tiʼjju in kubʼ tnaʼn ex in kubʼ t-ximen (Efes. 5:​28, 29). ¿Tiʼ jaku bʼant tuʼn jun chmilbʼaj okslal qa o tzʼok tbʼyoʼn t-xuʼjil, qa o tzʼok tbʼinchaʼn nya bʼaʼn tiʼj moqa in nok tqʼoʼn twitz tiʼj pornografía? ¿Tiʼ jaku bʼant tuʼn tuʼn tchʼexpaj tmod ex t-xim?

¿TIʼ JAKU BʼANT TUʼN JUN CHMILBʼAJ TUʼN TKYAJ TTZAQPIʼN NYA BʼAʼN TMOD?

10. ¿Tiʼ xnaqʼtzbʼil jaku tzʼel kyiʼn chmilbʼaj tiʼj Jesús?

¹⁰ ¿Tiʼ jaku tzʼonin tiʼj jun chmilbʼaj okslal tuʼn tkyaj ttzaqpiʼn nya bʼaʼn tmod, aju in nel tiʼn toklen t-xuʼjil moqa in nok tbʼinchaʼn nya bʼaʼn tiʼj? Tuʼn tok tilil tuʼn tuʼn tel tkanoʼn tiʼj tbʼanel tmod Jesús. Ax tok mintiʼ kubʼ mojeʼ Jesús, pero kubʼ tyekʼin tbʼanel tmod kyukʼil qe t-discípulo ex tuʼntzunju in nok te jun tbʼanel techel kye chmilbʼaj (Efes. 5:25). Kʼelel qnikʼ tiʼj tiʼ xnaqʼtzbʼil jaku tzʼel kyiʼn chmilbʼaj tiʼj alkye tmod Jesús kubʼ tyekʼin kyiʼj t-apóstol ex tiʼj alkyeqe yol ajbʼen tuʼn tej tyolin kyukʼil.

11. ¿Alkye tmod Jesús kubʼ tyekʼin kyukʼil t-apóstol?

¹¹ Toj tkyaqil maj kubʼ tyekʼin Jesús tbʼanel tmod kyukʼil t-apóstol ex respetarin kye. Nyatoq kyuw tmod kyukʼil ex nya noq in mandarin kye. Maske atoq Kyajaw ex atoq Kypatrón, mintiʼ kubʼ t-ximen qa iltoq tiʼj tuʼn tkubʼ tyekʼin tipumal tuʼn tel nikʼbʼaj tiʼj alkye at mas toklen. Sino ok tilil tuʼn tuʼn tkubʼ tin tibʼ ex tuʼn tajbʼen kye (Juan 13:​12-17). Xi tqʼamaʼn jlu kye t-discípulo: «Kyxnaqʼtzam kyibʼe wiʼje, porke mans qine ex mans wanmiye; oktzun knetel jun ojlabʼl kyuʼne te kyanmiye» (Mat. 11:​28-30). Aju xjal mans nya t-xilen qa mintiʼ tipun, sino in ten tipun tuʼn tok t-xqʼuqin tibʼ tuʼn miʼn tjaw kyaqpaj.

12. ¿Alkye tten yolin Jesús kyukʼil txqantl?

¹² E ajbʼen yol tuʼn Jesús tuʼn t-xi tqʼuqbʼaʼn kykʼuʼj txqantl ex tuʼn tkubʼ kynaʼn bʼaʼn. Ni jun maj xi yolin kyuw kye t-discípulo (Luc. 8:​47, 48). Axpe ikx tej kyok ten aj qʼoj yasil tiʼj ex tej tok tilil kyuʼn tuʼn ttzaj tqʼoj, «mintiʼ aj tmojtzaʼn yasbʼil» (1 Ped. 2:​21-23). Axpe ikx, at maj mas bʼaʼn ela toj twitz tuʼn miʼn t-xi tqʼamaʼn jun tyol (Mat. 27:​12-14). Kyaj tqʼoʼn jun tbʼanel techel kywitz chmilbʼaj okslal.

13. ¿Tzeʼn jaku kubʼ tyekʼin chmilbʼaj qa kʼujlaʼnxix t-xuʼjil tuʼn? (Mateo 19:4 a 6; ax ikx qʼonka twitza tiʼj tilbʼilal).

¹³ Xi tqʼamaʼn Jesús kye chmilbʼaj tuʼn kyten tzʼaqli kywitz kyxuʼjil. Tzaj tnaʼn qe tyol Tman tej tqʼama qa aju «xinaq [ . . . ] kmojebʼel tukʼil t-xuʼjil» (kjawil uʼjit Mateo 19:​4-6). Aju yol griego kubʼ qʼoʼn «kmojebʼel tukʼil», a t-xilen  «tuʼn tok pegaret jun tiʼ tiʼj juntl». Toj juntl yol, aju kʼujlabʼil in kubʼ tnaʼn chmilbʼaj ex xuʼjilbʼaj kyxolx il tiʼj tuʼn tten tipumal ik tzeʼn tipumal jun pegament. Kykabʼil kbʼel kynaʼn kʼixkʼoj qa ma tzʼel kypan kyibʼ. Qa kʼujlaʼnxix xuʼjilbʼaj tuʼn chmilbʼaj mlay tzʼok tqʼoʼn twitz tiʼj pornografía. Jurat kʼelel tiʼn twitz «tiʼjju mintiʼ tajbʼen» (Sal. 119:​37, TNM). Toj juntl yol, in kubʼ tqʼoʼn jun ley kyiʼj twitz tuʼn miʼn tpon tkʼuʼj tiʼj juntl xuʼj qa nya t-xuʼjil (Job 31:1).

14. ¿Alkye junjun tiʼchaq il tiʼj tuʼn tbʼant tuʼn jun chmilbʼaj tuʼn tten juntl maj bʼaʼn tukʼil Jehová ex tukʼil t-xuʼjil?

¹⁴ Nya oʼkx jlu il tiʼj tuʼn tbʼant tuʼn jun chmilbʼaj o tzʼok tbʼyoʼn t-xuʼjil moqa in xi tqʼamaʼn nya bʼaʼn yol te. Sino ax ikx il tiʼj tuʼn kybʼant junjuntl tiʼchaq tuʼn tuʼn tten juntl maj bʼaʼn tukʼil t-xuʼjil ex tukʼil Jehová. ¿Tiʼ il tiʼj tuʼn tbʼant tuʼn? Tnejel, il tiʼj tuʼn tel tnikʼ tiʼj qa nya bʼaʼn aju in bʼant tuʼn. In nok tqʼoʼn Jehová twitz tiʼj tkyaqil ex mlay bʼant tuʼn t-xi qewin jun tiʼ twitz (Sal. 44:21; Ecl. 12:14; Heb. 4:13). Tkabʼin, il tiʼj tuʼn tkubʼ tchʼexpun tmod ex tuʼn miʼn tok tbʼinchaʼn juntl maj nya bʼaʼn tiʼj t-xuʼjil (Prov. 28:13). Toxin, il tiʼj tuʼn t-xi tqanin najsam te t-xuʼjil ex te Jehová tuʼn tkyaqil tkʼuʼj ex tuʼn t-xi tqʼamaʼn qa nya bʼaʼn aju otoq bʼant tuʼn (Hech. 3:19). Ax ikx, il tiʼj tuʼn tkubʼsan te Jehová tuʼntzun tonin tiʼj tuʼn tkubʼ kyiʼj nya bʼaʼn t-ximbʼetz, kyiʼj tyol ex kyiʼj tbʼinchbʼen, ax ikx tuʼn tonin tiʼj tuʼn tkubʼ tnaʼn qa il tiʼj tuʼn tchʼexpaj tmod (Sal. 51:​10-12; 2 Cor. 10:5; Filip. 2:13). Tkyajin, il tiʼj tuʼn t-xi tbʼinchaʼn aju otoq txi tqanin te Jehová ex tuʼn tel tikʼun qe yol kyuw ex alkyexku juntl nya bʼaʼn in nok tbʼinchaʼn tiʼj t-xuʼjil (Sal. 97:10). Tjweʼyin, il tiʼj tuʼn t-xiʼ naj jyol onbʼil kyukʼil qe ansyan, aqeju kbʼel kyyekʼin tbʼanel kymod tukʼil (Sant. 5:​14-16). Tqaqin, il tiʼj tuʼn tkubʼ t-ximen tiʼ jaku bʼant tuʼn tuʼn miʼn tkubʼ tzʼaq juntl maj toj il. Ax ikx, il tiʼj tuʼn tbʼant tkyaqil jlu tuʼn jun chmilbʼaj in nok tqʼoʼn twitz tiʼj pornografía. Qa ma tzʼok tilil tuʼn jun chmilbʼaj tuʼn tchʼexpaj tmod, ktzajel kʼiwlaʼn tuʼn Jehová (Sal. 37:5). Pero nya oʼkx il tiʼj tuʼn tkyaj ttzaqpiʼn jun chmilbʼaj nya bʼaʼn tbʼinchbʼen, sino ax ikx il tiʼj tuʼn tel tnikʼ tiʼj tzeʼn jaku kubʼ tyekʼin tkʼujlabʼil tiʼj t-xuʼjil ex tuʼn t-respetarin te. Qo xnaqʼtzan tiʼj tzeʼn jaku bʼant tuʼn.

 ¿TZEʼN JAKU TXI TQʼOʼN CHMILBʼAJ NIMBʼIL TE T-XUʼJIL?

15. ¿Tzeʼn jaku kubʼ tyekʼin jun chmilbʼaj kʼujlabʼil tiʼj t-xuʼjil?

¹⁵ Bʼaʼn tuʼn tkubʼ tyekʼin chmilbʼaj tkʼujlabʼil. ¿Tiʼ o tzʼonin kyiʼj junjun chmilbʼaj tuʼn kytzalajxix toj kymejebʼleʼn? O txi kyxnaqʼtzan kyibʼ tuʼn tkubʼ kyyekʼin kykʼujlabʼil tiʼj kyxuʼjil tkyaqil qʼij (1 Juan 3:18). Ex nya il tiʼj tuʼn tbʼant nim tiʼchaq tuʼn jun chmilbʼaj okslal tuʼn tkubʼ tyekʼin tkʼujlabʼil te t-xuʼjil. Jun techel, jaku txi ttzyuʼn tqʼabʼ moqa jaku tzaj tchleʼn tukʼil kʼujlabʼil. Ax ikx jaku txi tsamaʼn jun mensaje ik tzeʼn jlu: «¿Tzeʼn taʼya?» moqa «In chin ximane tiʼja». Atzun toj junjuntl maj, jaku txi ttzʼibʼin junjun tbʼanel yol te t-xuʼjil toj jun carta moqa toj jun tarjeta. Aj tbʼant jlu tuʼn jun chmilbʼaj, in xi tqʼoʼn nimbʼil te t-xuʼjil ex in nonin tuʼn tten jun tbʼanel tmejebʼleʼn.

16. ¿Tiquʼn bʼaʼn tuʼn t-xi tqʼamaʼn chmilbʼaj te t-xuʼjil qa nim toklen toj twitz?

¹⁶ Bʼaʼn tuʼn t-xi tqʼamaʼn chmilbʼaj te t-xuʼjil qa nim toklen toj twitz. Aju chmilbʼaj in xi tqʼoʼn nimbʼil te t-xuʼjil, in xi tqʼamaʼn te tiquʼn nim toklen toj twitz ex in xi tqʼamaʼn tbʼanel yol te tuʼn tkubʼ tnaʼn bʼaʼn. Jun techel, mintiʼ in nikʼ tnaʼl tuʼn tuʼn t-xi tqʼoʼn chjonte te t-xuʼjil tuʼn tkyaqil onbʼil in xi tqʼoʼn te (Col. 3:15). Aj t-xi tqʼamaʼn jun chmilbʼaj te t-xuʼjil tiquʼn kʼujlan tuʼn, in kubʼ tnaʼn xuʼjilbʼaj bʼaʼn, in kubʼ tnaʼn qa kʼujlaʼn ex qa in xi qʼoʼn nimbʼil te (Prov. 31:28).

17. ¿Tzeʼn jaku kubʼ tyekʼin jun chmilbʼaj qa in respetarin te t-xuʼjil?

¹⁷ Bʼaʼn tuʼn tkubʼ tyekʼin tbʼanel tmod ex tuʼn t-respetarin. Aju chmilbʼaj kʼujlaʼn t-xuʼjil tuʼn in nok tqʼoʼn toklen ex in nok t-xqʼuqin. Toj twitz ik tten ik tzeʼn jun oyaj nim toklen o tzaj tqʼoʼn Jehová te (Prov. 18:22; 31:10). Tuʼntzunju, in kubʼ tyekʼin tbʼanel tmod tukʼil ex in respetarin te, axpe ikx aj kykubʼ ten junx. Mintiʼ in nok ten obligaril te t-xuʼjil tuʼn tkubʼ tbʼinchaʼn junjun tiʼ aju jaku kubʼ tnaʼn nya bʼaʼn tuʼn aj kykubʼ ten junx. f Ax ikx te chmilbʼaj in nok tilil tuʼn tuʼn tkubʼ tnaʼn bʼaʼn twitz Jehová (Hech. 24:16).

18. ¿Tiʼ il tiʼj tuʼn kukx tbʼant tuʼn chmilbʼaj? (Qʼonka twitza tiʼj recuadro « Kyaje tumel tuʼn tkubʼ tyekʼina qa in respetarina te t-xuʼjila»).

¹⁸ Aya chmilbʼaj, jaku tzʼok qe tkʼuʼja tiʼj qa nim toklen toj twitz Jehová tkyaqilju in bʼant tuʼna tuʼn tok tkʼujlaʼna t-xuʼjila ex tuʼn t-respetarina te. Kukx qʼonka tilil tuʼn miʼn tkubʼ tbʼinchaʼna jun tiʼ aju in nel tiʼn toklen t-xuʼjila, sino kukx yekʼinkuya tbʼanel tmoda tukʼil, tuʼn kukx t-respetarina te ex tuʼn kukx tok tkʼujlaʼna. Iktzun tten kbʼel tyekʼina qa in nok tkʼujlaʼna ex qa nim toklen toj twitza. Qa ma txi tqʼoʼna nimbʼil te t-xuʼjila kʼokel t-xqʼuqina tamiwbʼila tukʼil Jehová, aju mas nim toklen (Sal. 25:14).