XNAQʼTZBʼIL 3
BʼITZ 35 Bʼaʼn tuʼn tel qnikʼ tiʼj alkye mas nim toklen
Jyoʼnktza aju mas bʼaʼn toj twitz Jehová
«Qa ma qo niman te Qman, atzun in xeʼt tuʼn tten qnabʼl, ex qa ma tzʼel qnikʼ tiʼj ju Dios Xjanxix, atzun in knet ojtzqibʼl quʼn» (PROV. 9:10).
¿TIʼ KʼELEL QNIKʼ TIʼJ?
Kʼelel qnikʼ tiʼj tzeʼn jaku tzʼajbʼen qojtzqibʼil ex qnabʼil tuʼn tel qnikʼ tiʼj alkye bʼaʼn ex alkye nya bʼaʼn.
1. ¿Tiʼ in bʼant quʼn qkyaqilx ex tiquʼn at maj kwest?
TKYAQIL qʼij in kubʼ qximen tiʼ tuʼn tbʼant quʼn, ik tzeʼn tiʼ kxel qwaʼn ex jniʼ or qo xeʼl jtal. Nya kwest tuʼn tkubʼ qximen jlu, pero at junjuntl tiʼchaq mas kwest tuʼn tjaw qjyoʼn. Ik tzeʼn tuʼn tok qxqʼuqin qxmilal, tuʼn qtzalaj, aju at toklen tukʼil qfamilia ex tukʼil qajbʼebʼil te Jehová. Qaj tuʼn tel bʼaʼn tkyaqil aju in kubʼ qximen, tanto te qe ex kye toj qja, pero mas tuʼn ttzalaj Jehová quʼn (Rom. 12:1, 2).
2. ¿Alkyeqe oxe tiʼ jaku che onin tiʼja tuʼn tjaw tjyoʼna aju mas bʼaʼn?
2 Toj xnaqʼtzbʼil lu kʼelel qnikʼ tiʼj oxe tiʼ jaku tzʼonin qiʼj tuʼn tjaw qjyoʼn aju mas bʼaʼn. Tnejel, tuʼn tok qojtzqiʼn tkyaqil tqanil. Tkabʼin, tuʼn qximen tiʼj tiʼ t-ximbʼetz Jehová tiʼj. Ex toxin, tuʼn qkubʼ ten ximel tiʼj alkye mas bʼaʼn. Ax ikx, kʼelel qnikʼ tiʼj tzeʼn tuʼn tten qnabʼil (Prov. 2:11).
OJTZQINKA TKYAQIL TQANIL
3. Qʼamantza tukʼil jun techel tiquʼn nim toklen tuʼn t-xi qjyoʼn tqanil tiʼj jun tiʼ naʼmxtoq tkubʼ qximen tuʼn tbʼant quʼn.
3 Tuʼn tjaw qjyoʼn aju mas bʼaʼn, tnejel il tiʼj tuʼn tok qbʼiʼn tkyaqil tqanil. ¿Tiquʼn nim toklen jlu? Qo ximen tiʼj jun techel, at jun xjal tok jun yabʼil grave tiʼj ex in xiʼ tukʼil doctor. ¿Kxelpe tqʼoʼn doctor tqʼanbʼil qa naʼmx tok t-examinarin moqa naʼmx t-xi tqanin tiʼ in choʼn te? Mlay. Ax ikx teya kjawil tjyoʼna aju mas bʼaʼn qa ma ximana tnejel tiʼjju in nok weʼya twitz. ¿Tzeʼn jaku bʼant jlu tuʼna?
4. Ik tzeʼn in tzaj tqʼamaʼn Proverbios 18:13, ¿tiʼ il tiʼj tuʼn tbʼant tuʼna tuʼn tok tbʼiʼna tkyaqil tqanil? (Ax ikx qʼonka twitza kyiʼj tilbʼilal).
4 Tuʼn tok qbʼiʼn jun tqanil, nim toklen tuʼn kyajbʼen xjel quʼn. Jun techel, ximana tiʼj qa in tzaj qʼoʼn txokbʼil tiʼja tuʼn t-xiʼya toj jun reunión social, ¿kxelpe tkʼamoʼna txokbʼil? Il-lo tiʼj tuʼn t-xi tqanina junjun xjel, qa mintiʼ ojtzqiʼn twitz xjal tuʼna moqa mintiʼ ojtzqiʼn tuʼna tiʼ ok kbʼantel kyuʼn. Jakulo txi tqanina jlu: «¿Jtoj ex jatumel kʼokel reunión? ¿Jteʼ xjal che pol ex alkyeqe? ¿Alkye encargad tiʼj? ¿Tiʼtzun ok kbʼantel toj ambʼil aju? ¿Ktzajelpe qʼoʼn qʼeʼn?». Kjawil tjyoʼna aju mas bʼaʼn qa ma txi tqanina qe xjel tkubʼ toj párrafo lu (kjawil uʼjit Proverbios 18:13).
Qaninxa qe xjel tuʼn tok tbʼiʼna tkyaqil tqanil. (Qʼonka twitza tiʼj párrafo 4). a
5. Qa ya ojtzqiʼn tkyaqil tqanil tuʼna, ¿tiʼ mas jaku bʼant tuʼna?
5 Aj tok tbʼiʼna tkyaqil tqanil, ximana tiʼj tiʼ mas jaku bʼaj toj reunión lu. Jun techel, ¿yajtzun qa ma tzʼok tbʼiʼna qa toj reunión lu che pol junjun xjal mintiʼ in nok kyqʼoʼn kyoklen nabʼil in che jatz toj Biblia moqa tzul qʼoʼn nim qʼeʼn? ¿In kubʼpe t-ximana qa jaku tzaj nya bʼaʼn tuʼn fiesta lu? (1 Ped. 4:3). Moqa, ¿tiʼ jaku bʼant tuʼna qa tuʼn fiesta lu mlay bʼant tuʼn t-xiʼya toj chmabʼil moqa toj pakbʼabʼil? Qa ma ximana tiʼj tkyaqilju jaku bʼaj toj reunión social, jaku tzʼonin tiʼja tuʼn tjaw tjyona aju mas bʼaʼn. Pero nya oʼkx jlu tuʼn tbʼant tuʼna. Kyukʼil qe xjel ma che tzaj qʼamaʼn, ya ma tzʼel tnikʼa tiʼj tiʼ kbʼantel tuʼna, pero bʼaʼn tuʼn t-ximana tiʼj: «¿Tiʼ t-ximbʼetz Jehová tiʼj jlu?» (Prov. 2:6).
XIMANA TIʼJ TIʼ T-XIMBʼETZ JEHOVÁ
6. Ik tzeʼn in tzaj tqʼamaʼn Santiago 1:5, ¿tiquʼn nim toklen tuʼn t-xi qqanin onbʼil te Jehová?
6 Qaninxa onbʼil te Jehová tuʼn tel tnikʼa tiʼj tiʼ t-ximbʼetz at tiʼj junjun tiʼchaq tuʼnju in tzaj ttziyen qa ktzajel tqʼoʼn nimxix qnabʼil «porke ate Dios nimxix in tzaj tqʼoʼn kye kykyaqil ex mintiʼ in ilin» (kjawil uʼjit Santiago 1:5). Kʼonil nabʼil lu qiʼj tuʼn tel qnikʼ tiʼj qa bʼaʼn moqa nya bʼaʼn toj twitz Jehová aju kbʼantel quʼn.
7. ¿Tzeʼn jaku tzʼel qnikʼ tiʼj t-ximbʼetz Jehová? Yolina tiʼj jun techel.
7 Tej otoqxi txi tqanina onbʼil te Jehová, bʼaʼn tuʼn tel tnikʼa tiʼj tzeʼn ktzajel ttzaqʼweʼn tnaʼj Diosa. Qo ximen tiʼj jun techel. Qa in xiʼya toj jun lugar ex ya mintiʼ ojtzqiʼn tuʼna jatumel tuʼn t-xiʼya, bʼalo il tiʼj tuʼn t-xi tqanina onbʼil te jun xjal in nanqʼin toj lugar aju. Mlaylo tzikʼ bʼeta qa naʼmx tok tbʼiʼna tqanil tzul tqʼamaʼn xjal teya tiʼj alkye bʼe tuʼn t-xi tiʼna. Chʼixme ax jlu in bʼaj qiʼj aj t-xi qqanin qnabʼil te Jehová. Tuʼn ttzaj ttzaqʼweʼn Jehová qnaʼj Dios, il tiʼj tuʼn t-xi qjyoʼn qe nabʼil toj Tyol, aʼyeju at kyoklen tukʼilju in qo ok weʼ twitz. Qo ximen juntl maj tiʼj txokbʼil in tzaj qʼoʼn tiʼja tuʼn t-xiʼya toj jun reunión social. Naʼmxtoq tkubʼ t-ximana qa kxeʼla moqa miʼn, bʼaʼn tuʼn t-ximana tiʼjju in tzaj tqʼamaʼn Biblia kyiʼj fiesta, kyiʼj qe nya bʼaʼn amiw ex tiʼjju tuʼn tkubʼ tqʼoʼna Tkawbʼil Dios tnejel ex nya aju teya tajbʼil (Mat. 6:33; Rom. 13:13; 1 Cor. 15:33).
8. ¿Tiʼ jaku bʼant tuʼna qa taja onbʼil tuʼn kykanet xnaqʼtzbʼil tuʼna? (Ax ikx qʼonka twitza tiʼj tilbʼilal).
8 Pero bʼalo at maj il tiʼj tuʼn tonin juntl tiʼja tuʼn kykanet nabʼil tuʼna. Jaku tzʼonin jun erman at tnabʼil tiʼja tuʼn tkanet jun xnaqʼtzbʼil in yolin tiʼjju in nok weʼya twitz moqa tuʼn ttzaj tqʼoʼn jun consej teya. Ax ikx bʼaʼn tuʼn t-xi tjyoʼna mas tqanil tjunalxa. Jaku txi tjyoʼna qe xnaqʼtzbʼil toj Onbʼil tuʼn kyxnaqʼtzan testigos de Jehová moqa toj libro Qe texto jaku che onin toj kyanqʼibʼil okslal. Miʼn tzikʼ tnaʼl tuʼna qa mas bʼaʼn tuʼn tkubʼ tbʼinchaʼna aju bʼaʼn in nela toj twitz Jehová.
Ximana tiʼj tiʼ t-ximbʼetz Jehová. (Qʼonka twitza tiʼj párrafo 8). b
9. ¿Tzeʼn jaku tzʼel qnikʼ tiʼj qa bʼaʼn in nela toj twitz Jehová aju in jaw qjyoʼn? (Efesios 5:17).
9 ¿Tzeʼn jaku tzʼel qnikʼ tiʼj qa bʼaʼn in nela toj twitz Jehová aju in jaw qjyoʼn? Tnejel, il tiʼj tuʼn tok qojtzqiʼnxix Jehová. In tzaj tqʼamaʼn Proverbios 9:10 jlu: «Qa ma tzʼel qnikʼ tiʼj ju Dios Xjanxix, atzun in knet ojtzqibʼl quʼn». A t-xilen jlu qa il tiʼj tuʼn tel qnikʼ tiʼj alkyeqe tmod Jehová, tiʼ t-ximbʼetz, tiʼ in nok tkʼujlaʼn ex tiʼ in nel tikʼun. Xjelinkuya jlu: «Aj nximane tiʼj tkyaqilju ojtzqiʼn wuʼne tiʼj Jehová, ¿alkye mas bʼaʼn toj twitz?» (kjawil uʼjit Efesios 5:17).
10. ¿Tiquʼn mas nim kyoklen qe nabʼil in che jatz toj Tyol Dios twitzju kycostumbr qe toj qja ex kycostumbr xjal?
10 Tuʼn ttzalaj Jehová quʼn, atlo maj nya bʼaʼn kʼelel toj kywitz qe toj qja moqa toj kywitz qe qamiw aju kbʼantel quʼn. Jun techel, at maj ateʼ junjun mambʼaj in xi kyqʼamaʼn kye kymeʼjel tuʼn kykubʼ mojeʼ kyukʼil xjal at nim kypwaq maske mintiʼxix in nok tilil kyuʼn tuʼn tten jun tbʼanel kyamiwbʼil tukʼil Jehová. In bʼantlo jlu kyuʼn tuʼnju kyaj tuʼn tten aju at tajbʼen kye kymeʼjel. Pero, ¿alkyetzun kʼonil kyiʼj tuʼn tchʼiy kyamiwbʼil tukʼil Jehová? ¿Tiʼ t-ximbʼetz Jehová at tij jlu? Jaku kanet tzaqʼwebʼil kyiʼj xjel lu quʼn toj Mateo 6:33 jatumel in tzaj tqʼamaʼn jlu: «Kynimanxe tnejelxix aju tkawbʼil Dios». Maske in nok qrespetarin qe qman ex qe xjal jatumel in qo anqʼin, mas nim toklen tuʼn ttzalaj Jehová quʼn.
XIMANA TIʼJ ALKYE MAS BʼAʼN
11. Ik tzeʼn in tzaj tqʼamaʼn Filipenses 1:9 ex 10, ¿tiʼ kʼonil tiʼja tuʼn tjaw tjyoʼna aju mas bʼaʼn?
11 Tej otoqxi txiʼ tjyoʼna tqanil toj Tyol Dios tiʼjju in nok weʼya twitz, bʼaʼn tuʼn t-ximana tiʼj alkye mas bʼaʼn tuʼn tbʼant tuʼna (kjawil uʼjit Filipenses 1:9, 10). ¿Tzeʼn jaku bʼant jlu tuʼna? Qa ma tzʼajbʼen tnabʼila, kʼonil tiʼja tuʼn t-ximana tnejel tiʼj tiʼ jaku tzaj qa ma jaw tjyoʼna jun tiʼ. At maj fácil jaku tzʼela toj qwitz tuʼn tkubʼ qximen tiʼ kbʼantel quʼn, pero at maj kwest tuʼnju mintiʼxix in nel qnikʼ tiʼj alkyeju mas bʼaʼn. Qa ma ten tnabʼila kʼonil tiʼja tuʼn tjaw tjyoʼna aju mas bʼaʼn, axpe ikx kyoj ambʼil kwest.
12, 13. ¿Tzeʼn jaku tzʼonin tnabʼila tiʼja tuʼn tjaw tjyoʼna jun tbʼanel aqʼuntl?
12 Ximana tiʼj juntl techel, in jyona tiʼj jun taqʼuna tuʼntzun kykʼaʼchit qe toj tjaya ex in che kanet kabʼe aqʼuntl tuʼna. Tnejel bʼaʼn tuʼn t-ximana ex tuʼn t-xi tjyoʼna tqanil ik tzeʼn tiʼ aqʼuntl, toj alkye or in xi tzyet ex in kubʼaj, najchaq moqa nqayin taʼ. Ax ikx bʼaʼn tuʼn t-ximana tiʼj tzeʼn in nela aqʼuntl lu toj twitz Jehová. Bʼalo mas bʼaʼn in nela jun aqʼuntl toj twitza tuʼnju mas tgana moqa tuʼnju tzul chjoʼn mas teya. Pero at junjuntl tiʼ bʼaʼn tuʼn t-ximana tiʼj naʼmxtoq tjaw tjyoʼna aqʼuntl.
13 Jun techel, ¿kʼelelpe tiʼn aqʼuntl lu ambʼil tiʼja tuʼn t-xiʼya kyoj chmabʼil? ¿Moqa kʼelel tiʼn ambʼil tiʼja tuʼn tonina kyiʼj toj tjaya tuʼn tten jun tbʼanel kyamiwbʼil tukʼil Jehová ex tuʼn kukx kytzalaj? Qa ma ximana kyiʼj xjel lu, kʼonil tiʼja tuʼn tel tnikʼa tiʼj alkyeqe tiʼchaq mas nim kyoklen. Ik tzeʼn tuʼn tten jun tbʼanel tamiwbʼila ex kyamiwbʼil qe toj tjaya tukʼil Jehová twitzju tuʼn tten nim tpwaqa. A jlu kʼonil tiʼja tuʼn tjaw tjyoʼna aju mas bʼaʼn toj twitz Jehová.
14. ¿Tzeʼn jaku tzʼonin qnabʼil ex qkʼujlabʼil tuʼn miʼn qok te jun tolsabʼil kye txqantl?
14 In nonin qnabʼil qiʼj tuʼn qximen tiʼj tiʼ kbʼel kynaʼn txqantl aj tjaw qskʼoʼn jun tiʼ, qa ma bʼant jlu quʼn, mlay qo ok «te jun tolsabʼl» kye txqantl (1 Cor. 10:32). Nim toklen jlu aj tbʼaj qxbʼalumin qibʼ ex aj tbʼaj qbʼinchaʼn qten. Jun techel, bʼalo qgan jun estilo. Pero, ¿yajtzun qa nya bʼaʼn in nela toj kywitz erman ex qe xjal? Kʼonil qnabʼil qiʼj tuʼn tok qqʼoʼn toklen aju in kubʼ kynaʼn txqantl. Ex qa at qkʼujlabʼil, kʼonil qiʼj tuʼn qximen tiʼj alkye mas bʼaʼn kye txqantl ex tuʼn tkubʼ qin qibʼ (1 Cor. 10:23, 24, 32; 1 Tim. 2:9, 10). Qa ma bʼant jlu quʼn, kbʼel qyekʼin qa in qo respetarin ex qa kʼujlaʼn qe txqantl quʼn.
15. ¿Tiʼ bʼaʼn tuʼn qximen tiʼj naʼmxtoq t-xi qbʼinchaʼn jun tiʼ nim toklen?
15 Aj tjaw tjyoʼna jun tiʼ nim toklen, bʼaʼn tuʼn t-ximana tiʼj tkyaqilju kbʼantel tuʼna naʼmxtoq t-xi tbʼinchaʼna. Kyaj t-xnaqʼtzaʼn Jesús qe tuʼn qkubʼ «qeʼ ximal tiʼj nej nikʼpun knajel» quʼn, toj juntl yol, tuʼn qximen tiʼj jniʼ kbʼajel quʼn (Luc. 14:28). Ximana tiʼj jniʼ pwaq, ambʼil ex tipumala kxel tiʼn tuʼn tbʼant aju ma kubʼ t-ximana. Ax ikx, jaku yolina kyukʼil qe toj tjaya tiʼj tiʼ tuʼn tbʼant tuʼn teyele junjun kye tuʼn kyonin tiʼja tuʼntzun tel bʼaʼn tkyaqil. ¿Tiquʼn nim toklen tuʼn tkubʼ tena ximel tiʼjju kbʼantel tuʼna? Tuʼnju jaku tzʼonin tiʼja tuʼn tel tnikʼa tiʼj qa at jun chʼixpubʼil il tiʼj tuʼj tbʼant tuʼna moqa at juntl tiʼ mas bʼaʼn twitzju ma kubʼ t-ximana. Ex qa ma txi tqanina junjun consej kye toj tjaya, bʼaʼn tuʼn tok tbʼina tuʼnju jaku che onin tiʼja tuʼn tjapun twi t-ximbʼetza (Prov. 15:22).
JYONKTZA AJU MAS BʼAʼN
16. ¿Tiʼ il tiʼj tuʼn tbʼant tuʼna tuʼntzun tel bʼaʼn aju taja tuʼn tbʼant tuʼna? (Qʼonka twitza tiʼj recuadro « ¿Tzeʼn jaku jaw qjyoʼn aju mas bʼaʼn?»).
16 Qa ma txi tbʼinchaʼna aju ma qo yolin tiʼj, ya ma bʼant ttena tuʼn tjaw tjyona aju mas bʼaʼn. Ya ojtzqiʼn tkyaqil tqanil tuʼna ex ya ma xnaqʼtzana kyiʼj qe nabʼil che onil tiʼja tuʼn tjaw tjyoʼna aju in tzalaj Jehová tiʼj. Tuʼntzunju, bʼaʼn tuʼn tnaʼna Dios te Jehová tuʼn tonin tiʼja tuʼn tel bʼaʼn tkyaqil.
17. ¿Tiʼ jaku tzʼonin tiʼja tuʼn tjaw tjyoʼna aju mas bʼaʼn?
17 Bʼalo bʼaʼn ela junjun tiʼchaq e jaw tjyoʼna toj ambʼil ojtxe. Pero bʼaʼn tuʼn ttzaj tnaʼna qa nya tuʼn jlu kukx kjawil tjyoʼna aju mas bʼaʼn, sino mas bʼaʼn tuʼn tok qeʼ tkʼuʼja tiʼj nabʼil in tzaj tukʼil Jehová. Oʼkx te jaku tzaj qʼonte tojtzqibʼila ex tnabʼla tuʼn tel tnikʼa tiʼj alkye bʼaʼn ex alkye nya bʼaʼn (Prov. 2:1-5). Ik tzeʼn ma tzʼel qnikʼ tiʼj, jaku tzʼonin Jehová tiʼja tuʼn tjaw tjyoʼna aju mas bʼaʼn (Sal. 23:2, 3).
BʼITZ 28 Tzeʼn jaku qo ok te tamiw Jehová
